📜
၄။ ဥပါဒိန္နတ္တိကဝဏ္ဏနာ
၅၁။ ဥပါဒိန္နုပါဒါနိယတ္တိကဿ ¶ ပဉှာဝါရေ ဝတ္ထု ဥပါဒါနိယာနံ ခန္ဓာနံ ပုရေဇာတပစ္စယေန ပစ္စယောတိ ပဝတ္တိံ သန္ဓာယ ဝုတ္တံ။ ပဋိသန္ဓိယံ ပန တံ ပုရေဇာတံ န ဟောတိ။
၇၂။ ဥပါဒိန္နုပါဒါနိယော ကဗဠီကာရော အာဟာရော ဥပါဒိန္နုပါဒါနိယဿ ကာယဿ အာဟာရပစ္စယေန ပစ္စယောတိ ဧတ္ထ ဥပါဒိန္နုပါဒါနိယော ကဗဠီကာရာဟာရော နာမ ကမ္မသမုဋ္ဌာနာနံ ရူပါနံ အဗ္ဘန္တရဂတာ ဩဇာ။ ဥပါဒိန္နုပါဒါနိယဿ ကာယဿာတိ တဿေဝ ကမ္မသမုဋ္ဌာနရူပကာယဿ အာဟာရပစ္စယေန ပစ္စယော။ ရူပဇီဝိတိန္ဒြိယံ ဝိယ ကဋတ္တာရူပါနံ အနုပါလနဥပတ္ထမ္ဘနဝသေန ပစ္စယော၊ န ဇနကဝသေန။ ယံ ပန မဏ္ဍူကာဒယော ဂိလိတွာ ဌိတာနံ အဟိအာဒီနံ ကာယဿ ဇီဝမာနကမဏ္ဍူကာဒိသရီရေ ဩဇာ အာဟာရပစ္စယေန ¶ ပစ္စယောတိ ဝဒန္တိ၊ တံ န ဂဟေတဗ္ဗံ။ န ဟိ ဇီဝမာနကသရီရေ ဩဇာ အညဿ သရီရဿ အာဟာရပစ္စယတံ သာဓေတိ။ အနုပါဒိန္နုပါဒါနိယဿ ကာယဿာတိ ဧတ္ထ ပန ဇနကဝသေနာပိ လဗ္ဘတိ။ ဥပါဒိန္နုပါဒါနိယဿ စ အနုပါဒိန္နုပါဒါနိယဿ စာတိ ဧတ္ထ ဧကဿ ဥပတ္ထမ္ဘကဝသေန၊ ဧကဿ ဇနကဝသေန၊ ဥဘိန္နမ္ပိ ဝါ ဥပတ္ထမ္ဘကဝသေနေဝ ဝုတ္တော။ ဒွေ ပန အာဟာရာ ဧကတော ပစ္စယာ ဟောန္တာ ဥပတ္ထမ္ဘကာဝ ဟောန္တိ၊ န ဇနကာ။ သေသမေတ္ထ ပါဠိမေဝ သာဓုကံ ဩလောကေတွာ ဝေဒိတဗ္ဗံ။
ဥပါဒိန္နတ္တိကဝဏ္ဏနာ။