📜

၅-၂၂။ သင်္ကိလိဋ္ဌတ္တိကာဒိဝဏ္ဏနာ

သင်္ကိလိဋ္ဌသင်္ကိလေသိကတ္တိကေ သဗ္ဗံ ကုသလတ္တိကေ ဝုတ္တနယာနုသာရေနေဝ ဝေဒိတဗ္ဗံ။

၇၉။ ဝိတက္ကတ္တိကေ ယထာကမ္မူပဂဉာဏဿ ပရိကမ္မန္တိ ဒိဗ္ဗစက္ခုပရိကမ္မမေဝ တဿ ဥပ္ပာဒနတ္ထာယ ပရိကမ္မံ။ ဥပ္ပန္နဿ ပန ဝဠဉ္ဇနကာလေ ပရိကမ္မံ သန္ဓာယေတံ ဝုတ္တံ။ သေသမေတ္ထ ယထာပါဠိမေဝ နိယျာတိ။

၈၂။  တိ တဒါရမ္မဏဘဝင်္ဂမူလဘဝင်္ဂါနံ ဝသေန ဝုတ္တံ။ သေသမေတ္ထ သဗ္ဗံ ပါဠိဝသေနေဝ ဝေဒိတဗ္ဗံ။

ဒဿနတ္တိကေ ဒဿနေန ပဟာတဗ္ဗော ရာဂေါ ဥပ္ပဇ္ဇတီတိအာဒီသု ဒဿနေန ပဟာတဗ္ဗော ပုထုဇ္ဇနဿ ဥပ္ပဇ္ဇတိ။ ဘာဝနာယ ပဟာတဗ္ဗော သောတာပန္နဿာပီတိ ဧဝံ ဥပရိမဿ ဥပရိမဿ ဟေဋ္ဌိမာ ဟေဋ္ဌိမာ နုပ္ပဇ္ဇန္တီတိ ဝေဒိတဗ္ဗာ။ ဒဿနေန ပဟာတဗ္ဗော ဓမ္မော ဘာဝနာယ ပဟာတဗ္ဗဿ ဓမ္မဿ ဧကေနပိ ပစ္စယေန ပစ္စယော န ဟောတိ။ သေသမေတ္ထ ပါဠိံ အနုဂန္တွာ ကုသလတ္တိကေ ဝုတ္တလက္ခဏဝသေနေဝ ဝေဒိတဗ္ဗံ။

ဒဿနေနပဟာတဗ္ဗဟေတုကတ္တိကေ ဒဿနေနပဟာတဗ္ဗဟေတုကာဒီနံ ဝိဘာဂေါ အဋ္ဌကထာကဏ္ဍေ ဝုတ္တနယေနေဝ ဝေဒိတဗ္ဗော။ ဝိစိကိစ္ဆုဒ္ဓစ္စသဟဂတော မောဟော အဟေတုကတ္တာ တတိယပဒေ ပဝိဋ္ဌော။ ဧဝမေတ္ထ ယေသံ ဒဿနဘာဝနာဟိ ပဟာတဗ္ဗော ဟေတု အတ္ထိ၊ တေ ပဟာတဗ္ဗဟေတုကာ။ ယေသံ သော နတ္ထိ တေ နေဝဒဿနေန နဘာဝနာယပဟာတဗ္ဗဟေတုကာတိ ဣမံ ပဟာတဗ္ဗဟေတုကဝိဘာဂံ ဉတွာ သေသံ ဒဿနေနပဟာတဗ္ဗတ္တိကေ စေဝ ကုသလတ္တိကေ စ ဒဿိတလက္ခဏာနုသာရေနေဝ ဝေဒိတဗ္ဗံ။

အာစယဂါမိတ္တိကေ စ ပဋိစ္စဝါရသံသဋ္ဌဝါရေသု အနုလောမံ ကုသလတ္တိကသဒိသမေဝ။ သေသံ ဝိဿဇ္ဇနတော ဂဏနတော စ ယထာပါဠိမေဝ နိယျာတိ။

သေက္ခတ္တိကေ အသေက္ခော ဓမ္မော သေက္ခဿ ဓမ္မဿ န ကေနစိ ပစ္စယေန ပစ္စယော။ သေက္ခော အသေက္ခဿ အနန္တရပကတူပနိဿယော ပန ဟောတိ။ သေသမေတ္ထ ယထာပါဠိမေဝ နိယျာတိ၊ တထာ ပရိတ္တတ္တိကေ။

ပရိတ္တာရမ္မဏတ္တိကေ အပ္ပမာဏာရမ္မဏာစေတနာတိ သေက္ခာနံ ဂေါတြဘုစေတနာ၊ ပစ္စဝေက္ခဏစေတနာတိပိ ဝတ္တုံ ဝဋ္ဋတိ။ ဝိပါကာနံ ပရိတ္တာရမ္မဏာနန္တိ ပဋိသန္ဓိယံ ကမ္မံ အာရမ္မဏံ ကတွာ၊ ပဝတ္တေ စက္ခုဝိညာဏာဒိဝသေနရူပါဒိအာရမ္မဏံ၊ တဒါရမ္မဏဝသေန ဇဝနေန ဂဟိတပရိတ္တာရမ္မဏဉ္စ အာရမ္မဏံ ကတွာ ဥပ္ပန္နာနံ။ ယေ ပန ‘‘ဂေါတြဘုစိတ္တေန နတ္ထိ ပဋိသန္ဓီ’’တိ ဝဒန္တိ၊ တေ ဣမိနာ သုတ္တေန ပဋိသေဓေတဗ္ဗာ။ သေသမေတ္ထ ပါဠိနယေနေဝ ဝေဒိတဗ္ဗံ။ ဟီနတ္တိကော သင်္ကိလိဋ္ဌတ္တိကသဒိသော။

မိစ္ဆတ္တတ္တိကေ မိစ္ဆတ္တနိယတော သမ္မတ္တနိယတဿ၊ သမ္မတ္တနိယတော ဝါ မိစ္ဆတ္တနိယတဿ ကေနစိ ပစ္စယေန ပစ္စယော န ဟောတိ။ မိစ္ဆတ္တနိယတော ဝါ သမ္မတ္တနိယတော ဝါ သဟဇာတာဓိပတိရဟိတော နာမ နတ္ထိ။ သမ္မတ္တနိယတေ ဧကန္တတော အာရမ္မဏပုရေဇာတံ နတ္ထိ၊ မိစ္ဆတ္တနိယတေ သိယာ အာရမ္မဏပုရေဇာတံ။ အနိယတံ စိတ္တံ အာရဗ္ဘ နိယတာ မိစ္ဆာဒိဋ္ဌိ ဥပ္ပဇ္ဇေယျ။ သေသာ နိယတံ အာရဗ္ဘ နိယတံ နုပ္ပဇ္ဇတိ၊ မိစ္ဆတ္တနိယတံ ဂရုံ ကတွာ န ကောစိ ဓမ္မော ဥပ္ပဇ္ဇတိ။ ကုသလော မိစ္ဆတ္တဿ ဥပနိဿယပစ္စယော န ဟောတိ။ သေသမေတ္ထ ပါဠိယံ ဝုတ္တနယေနေဝ ဝေဒိတဗ္ဗံ။

မဂ္ဂါရမ္မဏတ္တိကေ ပဋိစ္စဝါရဿ အနုလောမေ ဝိပါကပစ္စယော နတ္ထိ။ ကမ္မပစ္စယေပိ ဣမသ္မိံ တိကေ နာနာက္ခဏိကံ န လဗ္ဘတိ၊ တထာ ဥပ္ပန္နတ္တိကအတီတတ္တိကေသု။ ပစ္စနီယေ အဟေတုကံ မဂ္ဂါရမ္မဏန္တိ အဟေတုကံ မဂ္ဂါရမ္မဏံ၊ အာဝဇ္ဇနံ သန္ဓာယေတံ ဝုတ္တံ။ သေသမေတ္ထ ပါဠိအနုသာရေနေဝ ဝေဒိတဗ္ဗံ။

ဥပ္ပန္နတ္တိကေ စ အတီတတ္တိကေ စ ပဋိစ္စဝါရာဒယော နတ္ထိ၊ ပဉှာဝါရမတ္တမေဝ လဗ္ဘတိ။ ကသ္မာ? ပဋိစ္စဝါရာဒယော ဟိ သဟဇာတပုရေဇာတာနညေဝ ဟောန္တိ။ ဣမေ စ တိကာ အတီတာနာဂတမိဿကာ။ ဥပ္ပန္နတ္တိကေ စေတ္ထ အနန္တရဘာဂိယာပိ ပစ္စယာ န လဗ္ဘန္တိ။ ကသ္မာ? ဥပ္ပန္နတ္တိကေ အတီတဿ အဘာဝတော။ ဥပ္ပန္နော စ အနုပ္ပန္နော စာတိ ဣမေ စေတ္ထ ဒွေ ဓမ္မာ ဥပ္ပန္နဿ စ အနုပ္ပန္နဿ စာတိ ဣမေသံ ဒွိန္နံ န ကေနစိ ပစ္စယေန ပစ္စယော။ အနုပ္ပန္နော စ ဥပ္ပာဒီ စာတိ ဣမေ ပန ဒွေ ဥပ္ပန္နဿ အာရမ္မဏူပနိဿယဝသေန ဒွီဟိ ပစ္စယေဟိ ပစ္စယော။ သေသမေတ္ထ ပါဠိယံ အာဂတနယေနေဝ ဝေဒိတဗ္ဗံ။

အတီတတ္တိကေ ပစ္စုပ္ပန္နံ အတီတာနာဂတဿ၊ အတီတာနာဂတဉ္စ အတီတာနာဂတဿ န ကေနစိ ပစ္စယေန ပစ္စယော။ နိဗ္ဗာနံ ပန ဒွီသုပိ ဣမေသု တိကေသု နေဝ ပစ္စယတော န ပစ္စယုပ္ပန္နတော လဗ္ဘတိ။ သေသမိဓာပိ ပါဠိယံ အာဂတနယေနေဝ ဝေဒိတဗ္ဗံ။

အဇ္ဈတ္တတ္တိကေ အဇ္ဈတ္တဗဟိဒ္ဓါပဒံ န ဂဟိတံ။ အဇ္ဈတ္တဗဟိဒ္ဓါသင်္ခါတာ ဟိ ဥဘော ရာသယော နေဝ ဧကတော ပစ္စယာ ဟောန္တိ၊ န ပစ္စယုပ္ပန္နာ၊ တသ္မာ ဟတ္ထတလေ ဌပိတဿ သာသပဿ ဝဏ္ဏောပိ ဟတ္ထတလဝဏ္ဏေန သဒ္ဓိံ ဧကတော အာရမ္မဏံ န ဟောတီတိ ဝေဒိတဗ္ဗော။ ယထာ စ အဇ္ဈတ္တဗဟိဒ္ဓါပဒံ၊ ဧဝမေတ္ထ အဇ္ဈတ္တာရမ္မဏတ္တိကေပိ အဇ္ဈတ္တဗဟိဒ္ဓါရမ္မဏပဒံ န လဗ္ဘတိ။ သေသံ ယထာပါဠိမေဝ နိယျာတိ။

သနိဒဿနတ္တိကေပိ ပါဠိဝသေနေဝ အတ္ထော ဂဟေတဗ္ဗော။ ဂဏနာပေတ္ထ ပါဠိယံ အာဂတဝါရေ သင်္ခိပိတွာ ဟေဋ္ဌာ ဝုတ္တနယေနေဝ သံသန္ဒနေသု သံသန္ဒိတွာ ဝေဒိတဗ္ဗာတိ။

ဓမ္မာနုလောမေ တိကပဋ္ဌာနဝဏ္ဏနာ။