📜

၂။ ဒုကပဋ္ဌာနဝဏ္ဏနာ

ဒုကပဋ္ဌာနေပိ သဗ္ဗဒုကေသု ပဉှာဝိဿဇ္ဇနာနိ စေဝ ဂဏနာ စ ပါဠိယံ အာဂတနယေနေဝ ဝေဒိတဗ္ဗာ။ အပိစေတ္ထ သဟေတုကဟေတုသမ္ပယုတ္တဒုကာနံ ဝိဿဇ္ဇနံ ဟေတုဒုကဝိဿဇ္ဇနသဒိသံ၊ တထာ ဟေတူစေဝသဟေတုကဟေတူစေဝဟေတုသမ္ပယုတ္တဒုကာနံ၊ တထာ သပ္ပစ္စယသင်္ခတဒုကာနံ။ ဣဒံ ဒုကံ ယထာ သပ္ပစ္စယဒုကံ၊ ဧဝံ ကာတဗ္ဗန္တိ ဣဒံ ယသ္မာ သပ္ပစ္စယော ဝိယ အပ္ပစ္စယေန သင်္ခတောပိ၊ အသင်္ခတေန သဒ္ဓိံ ယောဇနံ န လဗ္ဘတိ၊ တသ္မာ ဝုတ္တံ။ သာရမ္မဏစိတ္တသမ္ပယုတ္တသံသဋ္ဌဒုကာပိ သဒိသဝိဿဇ္ဇနာယေဝ၊ တထာ အာသဝဩဃယောဂဂေါစ္ဆကာ။ ဧတေ ဟိ တယော အညမညံ သဒိသဝိဿဇ္ဇနာယေဝ။ အပိစ လောကိယသာသဝသံယောဇနိယဂန္ထနိယနီဝရဏိယပရာမဋ္ဌသင်္ကိလေသိကဒုကာ အာသဝဝိပ္ပယုတ္တသာသဝသံယောဇနဝိပ္ပယုတ္တသံယောဇနိယဂန္ထဝိပ္ပယုတ္တဂန္ထနိယနီဝရဏဝိပ္ပယုတ္တနီဝရဏိယပရာမာသဝိပ္ပယုတ္တပရာမဋ္ဌကိလေသဝိပ္ပယုတ္တသင်္ကိလေသိကပရိယာပန္နသဥတ္တရဒုကာတ ဣမေပိ ဒုကာ သမာနာ။

ကိလေသဒုကံ သံယောဇနဒုကသဒိသံ။ သင်္ကိလိဋ္ဌကိလေသသမ္ပယုတ္တနီဝရဏသမ္ပယုတ္တဒဿနေနပဟာတဗ္ဗသရဏဒုကာပိ သမာနာ။ တထာကိလေသာ စေဝ သင်္ကိလိဋ္ဌနီဝရဏာ စေဝ နီဝရဏသမ္ပယုတ္တကိလေသာ စေဝ ကိလေသသမ္ပယုတ္တဒုကာ။ ဣမိနာ နယေန သဗ္ဗေသံ အတ္ထတော သဒိသာနံ ဒုကာနံ ဝိဿဇ္ဇနာနိ သဒိသာနေဝ ဟောန္တီတိ ဝေဒိတဗ္ဗာနိ။ သဗ္ဗသ္မိမ္ပိ ပန ပဋ္ဌာနေ ကေနစိဝိညေယျဒုကံ န လဗ္ဘတိ။ အာသဝါ စေဝ အာသဝသမ္ပယုတ္တာ စ၊ သံယောဇနာ စေဝ သံယောဇနသမ္ပယုတ္တာ စ၊ ဂန္ထာ စေဝ ဂန္ထသမ္ပယုတ္တာ စ၊ နီဝရဏာ စေဝ နီဝရဏသမ္ပယုတ္တာ စ၊ ကိလေသာ စေဝ သင်္ကိလိဋ္ဌာ စာတိ ဧဝရူပေသု ဒုကေသု ဝိပါကပစ္စယော စေဝ နာနာက္ခဏိကကမ္မပစ္စယော စ န လဗ္ဘတိ။ နဟေတုသဟေတုကနဟေတုအဟေတုကေသု ဟေတုပစ္စယော နတ္ထိ။ ဟေတူ စေဝ ဟေတုသမ္ပယုတ္တာ စ၊ အာသဝါ စေဝ အာသဝသမ္ပယုတ္တာ စ၊ ဂန္ထာ စေဝ ဂန္ထသမ္ပယုတ္တာ စာတိ ဣမေသု ဒုကေသု နဟေတုနဈာနနမဂ္ဂါ န လဗ္ဘန္တိ။ သံယောဇနာ စေဝ သံယောဇနသမ္ပယုတ္တာ စ၊ နီဝရဏာ စေဝ နီဝရဏသမ္ပယုတ္တာ စ၊ ကိလေသာ စေဝ ကိလေသသမ္ပယုတ္တာ စ၊ ကိလေသာ စေဝ သင်္ကိလိဋ္ဌာ စာတိ ဣမေသု ပန ဝိစိကိစ္ဆုဒ္ဓစ္စသဟဂတဿ မောဟဿ ဝသေန နဟေတုပစ္စယော လဗ္ဘတိ၊ နဈာနနမဂ္ဂပစ္စယာ န လဗ္ဘန္တီတိ ဧဝံ သဗ္ဗဒုကေသု လဗ္ဘမာနာလဗ္ဘမာနံ ဥပပရိက္ခိတွာ ပါဠိဝသေနေဝ ဝါရဂဏနာ ဝေဒိတဗ္ဗာတိ။

ဒုကပဋ္ဌာနဝဏ္ဏနာ။