📜

၃။ ဒုကတိကပဋ္ဌာနဝဏ္ဏနာ

ဒုကတိကပဋ္ဌာနေ ဟေတုံ ကုသလံ ဓမ္မံ ပဋိစ္စ ဟေတု ကုသလော ဓမ္မော ဥပ္ပဇ္ဇတိ ဟေတုပစ္စယာတိ ဧဝံ ပဉှာမတ္တုဒ္ဓါရဝသေနေဝ သင်္ခေပတော ဒေသနာ ကတာ။ ‘‘ကုသလံ အလောဘံ ပဋိစ္စ အဒေါသော အမောဟော’’တိအာဒိနာ ပန နယေန ဝိတ္ထာရော ဝတ္တဗ္ဗော သိယာ၊ သော ဟေဋ္ဌာ ဒဿိတနယေန သက္ကာ အဝုတ္တောပိ ဇာနိတုန္တိ ဧကပဒေပိ ဧကပစ္စယော ဝါ န ဝုတ္တော။ ယာ ပနေသာ သင်္ခေပတော ဒေသနာ ကတာ၊ သာ ဧဝံ ကတာတိ ဝေဒိတဗ္ဗာ။ ဟေတုဒုကေန ဟိ သဒ္ဓိံ ကုသလပဒံ ယောဇေတွာ ပဋိစ္စဝါရေ အနုလောမဿ စေဝ ပစ္စနီယဿ စ ဝသေန သဗ္ဗေ လဗ္ဘမာနကပစ္စယာ ဒဿိတာ၊ အနုလောမပစ္စနီယပစ္စနီယာနုလောမနယာ စေဝ သဟဇာတဝါရာဒယော စ န ဒဿိတာ၊ ကေဝလံ ‘‘ပဋိစ္စဝါရသဒိသံယေဝ ဝိတ္ထာရေတဗ္ဗ’’န္တိ ဝုတ္တံ။ ပဉှာဝါရေ ပဉှမ္ပိ အဝိဿဇ္ဇေတွာ ကေဝလံ ပဉှုဒ္ဓါရမတ္တံ ကတွာ အနုလောမပစ္စနီယဝသေနေဝ လဗ္ဘမာနပစ္စယာ ဒဿိတာ။ ယထာ စ ကုသလပဒံ၊ ဧဝံ အကုသလအဗျာကတပဒါနိပိ ဟေတုဒုကေန သဒ္ဓိံ ယောဇေတွာ ဟေတုကုသလဒုကတိကံ နိဒ္ဒိသိတဗ္ဗန္တိ ဝုတ္တံ။

တတော ပရံ ဟေတုံ သုခါယ ဝေဒနာယ သမ္ပယုတ္တံ ဓမ္မန္တိအာဒိနာ နယေန ဟေတုဝေဒနာဒုကတိကာဒီနိ ဧကဝီသတိ ဒုကတိကာနိ ဒဿိတာနိ။ ယသ္မာ ပန ဟေတု နာမ သနိဒဿနသပ္ပဋိဃော အနိဒဿနသပ္ပဋိဃော ဝါ နတ္ထိ၊ တသ္မာ ဟေတုပဒေန သဒ္ဓိံ သနိဒဿနသပ္ပဋိဃအနိဒဿနသပ္ပဋိဃပဒါနိ န ယောဇိတာနိ။ ဧဝံ ဟေတုဒုကေန သဒ္ဓိံ လဗ္ဘမာနကဝသေန ဒွါဝီသတိ တိကေ ယောဇေတွာ ပုန တေ သဟေတုကဒုကာဒီဟိ သရဏဒုကပရိယောသာနေဟိ သဗ္ဗဒုကေဟိ သဒ္ဓိံ ယောဇိတာ။ တတ္ထ ယံ ယံ ပဒံ ယေန ယေန ပဒေန သဒ္ဓိံ ယောဇနံ န ဂစ္ဆတိ၊ တံ တံ ပါဠိယံယေဝ န လဗ္ဘတီတိ ဝုတ္တံ။ ဧဝမေတ္ထ ဧကေန ဒုကေန သဒ္ဓိံ ဗာဝီသတိ တိကေ ယောဇေတွာ ပုန အပရေန ဗာဝီသတိ၊ အပရေန ဗာဝီသတီတိ ပဋိပါဋိယာ ဒုကသတေ လဗ္ဘမာနဒုကပဒေဟိ သဒ္ဓိံ ဒွါဝီသတိ တိကာ ယောဇိတာတိ ဒွါဝီသတိ တိကေ ဂဟေတွာ ဒုကသတေ ပက္ခိပိတွာ ဒုကတိကပဋ္ဌာနံ နာမ ဒေသိတံ။ တတ္ထ ယေသု ယေသု ဌာနေသု နယံ ဒဿေတွာ ပါဠိယာ သင်္ခေပေါ ကတော၊ တေသု တေသု ဌာနေသု ဒဿိတနယာနုရူပေန တဿာ ဝိတ္ထာရော ဝေဒိတဗ္ဗောတိ။

ဒုကတိကပဋ္ဌာနဝဏ္ဏနာ။