📜
၅။ တိကတိကပဋ္ဌာနဝဏ္ဏနာ
တိကတိကပဋ္ဌာနေပိ ကုသလံ သုခါယ ဝေဒနာယ သမ္ပယုတ္တံ ဓမ္မံ ပဋိစ္စ ကုသလော သုခါယ ဝေဒနာယ သမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာတိ ပဉှုဒ္ဓါရဝသေနေဝ သင်္ခေပတော ဒေသနာ ကတာ။ ဧတ္ထ စ ကုသလတ္တိကံ ဝေဒနာတ္တိကာဒီဟိ၊ ဝေဒနာတ္တိကာဒယော စ ကုသလတ္တိကေနာတိ ဧဝံ တိကေသုယေဝ တိကာ ပက္ခိတ္တာ။ ယေန ယေန စ ပဒေန သဒ္ဓိံ ယံ ယံ ပဒံ ယောဇနံ န ဂစ္ဆတိ၊ တံ တံ ဟာပေတွာ လဗ္ဘမာနဝသေနေဝ သဗ္ဗပစ္စယေသု ဝါရာ စ ဂဏနနယာ စ ဒဿိတာ၊ တသ္မာ တေ သာဓုကံ ပါဠိံ ဥပပရိက္ခိတွာ ဝေဒိတဗ္ဗာ။ ယထာ စ ကုသလတ္တိကံ ဝေဒနာတ္တိကာဒီဟိ၊ ဝေဒနာတ္တိကာဒယော စ တေန သဒ္ဓိံ ယောဇေတွာ ဝေဒိတဗ္ဗာ၊ တထာ ဧကေကံ တိကံ သေသေဟိ။ သေသာ စ တေဟိ သဒ္ဓိံ ယောဇေတွာ ဝေဒိတဗ္ဗာတိ။
တိကတိကပဋ္ဌာနဝဏ္ဏနာ။