📜

၇-၁၂။ ပစ္စနီယပဋ္ဌာနဝဏ္ဏနာ

၁။ ဣဒါနိ ကုသလာဒီနံ ပဒါနံ ပဋိက္ခေပဝသေန ဓမ္မာနံ ပစ္စနီယတာယ လဒ္ဓနာမံ ပစ္စနီယပဋ္ဌာနံ ဒဿေတုံ နကုသလံ ဓမ္မံ ပဋိစ္စ နကုသလော ဓမ္မော ဥပ္ပဇ္ဇတိ ဟေတုပစ္စယာတိအာဒိ အာရဒ္ဓံ။ တတ္ထ နကုသလံ ဓမ္မံ ပဋိစ္စာတိ ကုသလဿ ပစ္စယဘာဝံ ဝါရေတိ။ နကုသလော ဓမ္မော ဥပ္ပဇ္ဇတီတိ ကုသလဿ ဥပ္ပတ္တိံ ဝါရေတိ၊ တသ္မာ ‘‘အကုသလာဗျာကတံ ဧကံ ခန္ဓံ ပဋိစ္စ အကုသလာဗျာကတာ တယော ခန္ဓာ စိတ္တသမုဋ္ဌာနဉ္စ ရူပ’’န္တိ ဧဝမာဒိနာ နယေနေတ္ထ ပဉှံ ဝိဿဇ္ဇိတဗ္ဗံ။ တသ္မိံ တသ္မိံ ပစ္စယေ လဒ္ဓဂဏနာ ပန ပါဠိယံ ဝုတ္တာယေဝ။ ယေပိ ဝါရာ သဒိသဝိဿဇ္ဇနာ၊ တေပိ တတ္ထေဝ ဒဿိတာ။ တသ္မာ သဗ္ဗမေတ္ထ ဟေဋ္ဌာ ဝုတ္တနယာနုသာရေန ပါဠိံ ဥပပရိက္ခိတွာ ဝေဒိတဗ္ဗံ။ ယထာ စေတ္ထ၊ ဧဝံ ဒုကပဋ္ဌာနေ၊ ဒုကတိကပဋ္ဌာနေ၊ တိကဒုကပဋ္ဌာနေ တိကတိကပဋ္ဌာနေ၊ ဒုကဒုကပဋ္ဌာနေ စ။

ဧတ္တာဝတာ –

တိကဉ္စ ပဋ္ဌာနဝရံ ဒုကုတ္တမံ၊

ဒုကံ တိကဉ္စေဝ တိကံ ဒုကဉ္စ၊

တိကံ တိကဉ္စေဝ၊ ဒုကံ ဒုကဉ္စ၊

ဆ ပစ္စနီယမှိ နယာ သုဂမ္ဘီရာတိ။ –

အဋ္ဌကထာယံ ဝုတ္တဂါထာယ ဒီပိတာ။ ဓမ္မပစ္စနီယပဋ္ဌာနေ ဆ နယာ နိဒ္ဒိဋ္ဌာ ဟောန္တိ။ ပစ္စယဝသေန ပနေတ္ထ ဧကေကသ္မိံ ပဋ္ဌာနေ အနုလောမာဒယော စတ္တာရော စတ္တာရော နယာတိ ဧကေန ပရိယာယေန စတုဝီသတိနယပဋိမဏ္ဍိတံ ပစ္စနီယပဋ္ဌာနညေဝ ဝေဒိတဗ္ဗံ။

ပစ္စနီယပဋ္ဌာနဝဏ္ဏနာ။