📜

၁၃-၁၈။ အနုလောမပစ္စနီယပဋ္ဌာနဝဏ္ဏနာ

၁။ ဣဒါနိ ကုသလာဒီသု ဓမ္မေသု ပစ္စယဓမ္မံ အပ္ပဋိက္ခိပိတွာ ပစ္စယုပ္ပန္နဿ ကုသလာဒိဘာဝပဋိက္ခေပဝသေန ဓမ္မာနံ အနုလောမပစ္စနီယတာယ လဒ္ဓနာမံ အနုလောမပစ္စနီယပဋ္ဌာနံ ဒဿေတုံ ကုသလံ ဓမ္မံ ပဋိစ္စ န ကုသလော ဓမ္မော ဥပ္ပဇ္ဇတိ ဟေတုပစ္စယာတိအာဒိ အာရဒ္ဓံ။ တတ္ထ ကုသလံ ဓမ္မံ ပဋိစ္စာတိ ကုသလဿ ပစ္စယဘာဝံ အနုဇာနာတိ။ န ကုသလော ဓမ္မော ဥပ္ပဇ္ဇတီတိ ကုသလဿေဝ ဥပ္ပတ္တိံ ဝါရေတိ။ တသ္မာ ‘‘ကုသလေ ခန္ဓေ ပဋိစ္စ စိတ္တသမုဋ္ဌာနံ ရူပ’’န္တိအာဒိနာ နယေန ဝိဿဇ္ဇနံ ဒဿိတံ၊ တံ သဗ္ဗံ ပါဠိံ ဩလောကေတွာ သာဓုကံ သလ္လက္ခေတဗ္ဗံ။ ယမ္ပိ ယေန သဒိသံ၊ ယဉ္စ ယတ္ထ လဗ္ဘတိ၊ ယော စ ယေသံ ဝိဿဇ္ဇနာနံ ယေသု ပစ္စယေသု ဂဏနပရိစ္ဆေဒေါ၊ သော သဗ္ဗော ပါဠိယံ ဒဿိတော၊ တသ္မာ ပါဠိယေဝ ဧတ္ထ အတ္ထော။ ယထာ စေတ္ထ၊ ဧဝံ ဒုကပဋ္ဌာနာဒီသုပီတိ။

ဧတ္တာဝတာ –

တိကဉ္စ ¶ ပဋ္ဌာနဝရံ ဒုကုတ္တမံ၊

ဒုကံ တိကဉ္စေဝ တိကံ ဒုကဉ္စ၊

တိကံ တိကဉ္စေဝ ဒုကံ ဒုကဉ္စ၊

ဆ အနုလောမပစ္စနီယမှိ နယာ သုဂမ္ဘီရာတိ။ –

အဋ္ဌကထာယံ ဝုတ္တဂါထာယ ဒီပိတာ ဓမ္မာနုလောမပစ္စနီယပဋ္ဌာနေ ဆ နယာ နိဒ္ဒိဋ္ဌာ ဟောန္တိ။ ပစ္စယဝသေန ပနေတ္ထ ဧကေကသ္မိံ ပဋ္ဌာနေ အနုလောမာဒယော စတ္တာရော စတ္တာရော နယာတိ ဧကေန ပရိယာယေန စတုဝီသတိနယပဋိမဏ္ဍိတံ အနုလောမပစ္စနီယပဋ္ဌာနညေဝ ဝေဒိတဗ္ဗံ။

အနုလောမပစ္စနီယပဋ္ဌာနဝဏ္ဏနာ။