📜

၁၉-၂၄။ ပစ္စနီယာနုလောမပဋ္ဌာနဝဏ္ဏနာ

၁။ ဣဒါနိ ကုသလာဒီသု ဓမ္မေသု ပစ္စယဓမ္မံ ပဋိက္ခိပိတွာ ပစ္စယုပ္ပန္နဿ ကုသလာဒိဘာဝံ အပ္ပဋိက္ခေပဝသေန ဓမ္မာနံ ပစ္စနီယာနုလောမတာယ လဒ္ဓနာမံ ပစ္စနီယာနုလောမပဋ္ဌာနံ ဒဿေတုံ နကုသလံ ဓမ္မံ ပဋိစ္စ အကုသလော ဓမ္မော ဥပ္ပဇ္ဇတိ ဟေတုပစ္စယာတိအာဒိ အာရဒ္ဓံ။ တတ္ထ နကုသလံ ဓမ္မံ ပဋိစ္စာတိ ကုသလဿ ပစ္စယဘာဝံ ဝါရေတိ။ အကုသလော ဓမ္မော ဥပ္ပဇ္ဇတီတိ အကုသလဿ ဥပ္ပတ္တိံ အနုဇာနာတိ။ နကုသလဉှိ အကုသလံ အဗျာကတံ ဝါ၊ တဉ္စ သဟဇာတပစ္စယံ ကတွာ ဥပ္ပဇ္ဇမာနော ကုသလော နာမ နတ္ထိ၊ တသ္မာ အကုသလာဗျာကတဝသေန ဒေသနာ ကတာ။ တတ္ထ ‘‘အကုသလံ ဧကံ ခန္ဓံ ပဋိစ္စ တယော ခန္ဓာ’’တိ ဧဝံ နကုသလံ ဓမ္မံ ပဋိစ္စ ဝိဿဇ္ဇနံ ဝေဒိတဗ္ဗံ။ အဗျာကတော ဓမ္မော ဥပ္ပဇ္ဇတိ ဟေတုပစ္စယာတိ အယံ ပန ပဉှော ‘‘ဝိပါကာဗျာကတံ ကိရိယာဗျာကတံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပ’’န္တိ ဝိဿဇ္ဇိတောဝ။ ဣတိ သဗ္ဗပဉှေသု အဝိဿဇ္ဇိတဿ အတ္ထာနုရူပံ ဝိဿဇ္ဇိတဿ စ ပါဠိအာဂတမေဝ ဝိဿဇ္ဇနံ။ ဧကေကသ္မိဉ္စ တိကဒုကေ ဝါရပ္ပဘေဒပစ္စယဂဏနဝိဓာနံ သဗ္ဗံ ဟေဋ္ဌာ ဝုတ္တနယာနုသာရေနေဝ ဝေဒိတဗ္ဗံ။

ဧတ္တာဝတာ စ –

တိကဉ္စ ပဋ္ဌာနဝရံ ဒုကုတ္တမံ၊

ဒုကံ တိကဉ္စေဝ တိကံ ဒုကဉ္စ၊

တိကံ တိကဉ္စေဝ ဒုကံ ဒုကဉ္စ၊

ဆ ပစ္စနီယာနုလောမမှိ နယာ သုဂမ္ဘီရာတိ။ –

အဋ္ဌကထာယံ ဝုတ္တဂါထာယ ဒီပိတာ။ ဓမ္မပစ္စနီယာနုလောမပဋ္ဌာနေ ဆ နယာ နိဒ္ဒိဋ္ဌာ ဟောန္တိ။ ပစ္စယဝသေန ပနေတ္ထ ဧကေကသ္မိံ ပဋ္ဌာနေ အနုလောမာဒယော စတ္တာရော စတ္တာရော နယာတိ ဧကေန ပရိယာယေန စတုဝီသတိနယပဋိမဏ္ဍိတံ ပစ္စနီယာနုလောမပဋ္ဌာနညေဝ ဝေဒိတဗ္ဗံ။

ပစ္စနီယာနုလောမပဋ္ဌာနဝဏ္ဏနာ။

ဧဝံ ဓမ္မာနုလောမာဒိဝသေန စတူသု ဝါရေသု ဧကေကသ္မိံ စတုဝီသတိယာ စတုဝီသတိယာ နယာနံ ဝသေန ဆန္နဝုတိ နယာ ဟောန္တိ။ တတ္ထ ပစ္စယနယေ အဂ္ဂဟေတွာ ဧကေကသ္မိံ ပဋ္ဌာနေ တိကဒုကာဒီနညေဝ ဆန္နံ ဆန္နံ နယာနံ ဝသေနေတံ စတုဝီသတိနယပဋိမဏ္ဍိတံ သမန္တပဋ္ဌာနမဟာပကရဏံ ဝေဒိတဗ္ဗံ။ ကေစိ ပန ‘‘ကုသလာရမ္မဏော ဓမ္မော အကုသလာရမ္မဏော ဓမ္မော’’တိအာဒိနာ နယေန အာရမ္မဏမာတိကံ နာမ ဌပေတွာ ‘‘ကုသလာရမ္မဏော ဓမ္မော ကုသလာရမ္မဏဿ ဓမ္မဿ ဟေတုပစ္စယေန ပစ္စယော’’တိအာဒိနာ နယေန အာရမ္မဏပဋ္ဌာနံ နာမ ဒဿေတွာ အပရမ္ပိ ဖဿာဒီနံ ဝသေနပိ ဖဿပဋ္ဌာနံ နာမ ဥဒ္ဓရိတွာ ဒဿေန္တိ။ တံ နေဝ ပါဠိယံ န အဋ္ဌကထာသု သန္ဒိဿတီတိ ဣဓ န ဝိစာရိတံ။ သင်္ဂီတိအာရုဠှပါဠိဝသေနေဝ ပနေတ္ထ ဝဏ္ဏနာ ကတာတိ ဝေဒိတဗ္ဗာ။

ဧတ္တာဝတာ စ –

သမ္မူဠှာ ယတ္ထ ပဇာ၊ တန္တာကုလာဒိဘာဝမာပန္နာ၊

နေကဝိဓဒုက္ခဂဟနံ၊ သံသာရံ နာတိဝတ္တန္တိ။

ပစ္စယဘေဒေ ကုသလော၊ လောကေ ဂရုတမ္ပိ ပစ္စယာကာရံ၊

အတိနိပ္ပုဏဂမ္ဘီရံ၊ ဇဝနဗ္ဘူမိံ ဗုဒ္ဓဉာဏဿ။

ကုသလာဒိဓမ္မဘေဒံ၊ နိဿာယ နယေဟိ ဝိဝိဓဂဏနေဟိ၊

ဝိတ္ထာရေန္တော သတ္တမ-မဘိဓမ္မပ္ပကရဏံ သတ္ထာ။

သုဝိဟိတသန္နိဋ္ဌာနော ၊ ပဋ္ဌာနံ နာမ ယံ ပကာသေသိ၊

သဒ္ဓါယ သမာရဒ္ဓါ၊ ယာ အဋ္ဌကထာ မယာ တဿ။

အာစရိယာနံ ဝါဒံ၊ အဝိဟာယ ဝိဘဇ္ဇဝါဒိသိဿာနံ၊

အတိဗဟုဝိဓန္တရာယေ၊ လောကမှိ အနန္တရာယေန။

သာ ဧဝံ အဇ္ဇ ကတာ၊ စုဒ္ဒသမတ္တေဟိ ဘာဏဝါရေဟိ၊

အတ္ထံ ပကာသယန္တီ၊ ပဋ္ဌာနဝရဿ သကလဿ။

သန္နိဋ္ဌာနံ ပတ္တာ ယထေဝ နိဋ္ဌံ တထာ ဗဟုဇနဿ၊

သမ္ပာပုဏန္တု သီဃံ၊ ကလျာဏာ သဗ္ဗသင်္ကပ္ပာ။

ဧတ္တာဝတာ –

သတ္တပ္ပကရဏံ နာထော၊ အဘိဓမ္မမဒေသယိ၊

ဒေဝါတိဒေဝေါ ဒေဝါနံ၊ ဒေဝလောကမှိ ယံ ပုရေ။

တဿ အဋ္ဌကထာ ဧသာ၊ သကလဿာပိ နိဋ္ဌိတာ၊

စိရဋ္ဌိတတ္ထံ ဓမ္မဿ၊ နိဋ္ဌပေန္တေန တံ မယာ။

ယံ ပတ္တံ ကုသလံ တဿ၊ အာနုဘာဝေန ပါဏိနော၊

သဗ္ဗေ သဒ္ဓမ္မရာဇဿ၊ ဉတွာ ဓမ္မံ သုခါဝဟံ။

ပါပုဏန္တု ဝိသုဒ္ဓါယ၊ သုခါယ ပဋိပတ္တိယာ၊

အသောကမနုပါယာသံ၊ နိဗ္ဗာနသုခမုတ္တမံ။

စိရံ တိဋ္ဌတု သဒ္ဓမ္မော၊ ဓမ္မေ ဟောန္တု သဂါရဝါ၊

သဗ္ဗေပိ သတ္တာ ကာလေန၊ သမ္မာ ဒေဝေါ ပဝဿတု။

ယထာ ရက္ခိံသု ပေါရာဏာ၊ သုရာဇာနော တထေဝိမံ၊

ရာဇာ ရက္ခတု ဓမ္မေန၊ အတ္တနောဝ ပဇံ ပဇန္တိ။

ပဋ္ဌာနပ္ပကရဏ-အဋ္ဌကထာ နိဋ္ဌိတာ။

နိဋ္ဌိတာ စ ပဉ္စပကရဏဋ္ဌကထာတိ။

နိဂမနကထာ

ပရမဝိသုဒ္ဓသဒ္ဓါဗုဒ္ဓိဝီရိယပဋိမဏ္ဍိတေန သီလာစာရဇ္ဇဝမဒ္ဒဝါဒိဂုဏသမုဒယသမုဒိတေန သကသမယသမယန္တရဂဟနဇ္ဈောဂါဟဏသမတ္ထေန ပညာဝေယျတ္တိယသမန္နာဂတေန တိပိဋကပရိယတ္တိပ္ပဘေဒေ သာဋ္ဌကထေ သတ္ထုသာသနေ အပ္ပဋိဟတဉာဏပ္ပဘာဝေန မဟာဝေယျာကရဏေန ကရဏသမ္ပတ္တိဇနိတသုခဝိနိဂ္ဂတမဓုရောဒါရဝစနလာဝဏ္ဏယုတ္တေန ယုတ္တမုတ္တဝါဒိနာ ဝါဒီဝရေန မဟာကဝိနာ ပဘိန္နပဋိသမ္ဘိဒါပရိဝါရေ ဆဠဘိညာဒိပ္ပဘေဒဂုဏပဋိမဏ္ဍိတေ ဥတ္တရိမနုဿဓမ္မေ သုပ္ပတိဋ္ဌိတဗုဒ္ဓီနံ ထေရဝံသပ္ပဒီပါနံ ထေရာနံ မဟာဝိဟာရဝါသီနံ ဝံသာလင်္ကာရဘူတေန ဝိပုလဝိသုဒ္ဓဗုဒ္ဓိနာ ဗုဒ္ဓဃောသောတိ ဂရူဟိ ဂဟိတနာမဓေယျေန ထေရေန ကတာ အယံ သကလဿပိ အဘိဓမ္မပိဋကဿ အဋ္ဌကထာ –

တာဝ တိဋ္ဌတု လောကသ္မိံ၊ လောကနိတ္ထရဏေသိနံ၊

ဒဿေန္တီ ကုလပုတ္တာနံ၊ နယံ ပညာဝိသုဒ္ဓိယာ။

ယာဝ ဗုဒ္ဓါတိ နာမမ္ပိ၊ သုဒ္ဓစိတ္တဿ တာဒိနော၊

လောကမှိ လောကဇေဋ္ဌဿ၊ ပဝတ္တတိ မဟေသိနောတိ။

အဘိဓမ္မပိဋက-အဋ္ဌကထာ နိဋ္ဌိတာ။