📜

၁၃။ တေရသမနယော

၁၃။ အသင်္ဂဟိတေနသမ္ပယုတ္တဝိပ္ပယုတ္တပဒနိဒ္ဒေသော

၄၄၈။ ရူပက္ခန္ဓေန ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန အသင်္ဂဟိတာ ဓာတုသင်္ဂဟေန အသင်္ဂဟိတာ၊ တေ ဓမ္မာ ကတိဟိ ခန္ဓေဟိ ကတိဟာယတနေဟိ ကတိဟိ ဓာတူဟိ သမ္ပယုတ္တာ? တေ ဓမ္မာ တီဟိ ခန္ဓေဟိ သမ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ သမ္ပယုတ္တာ။ ကတိဟိ ဝိပ္ပယုတ္တာ? ဧကေန ခန္ဓေန ဒသဟာယတနေဟိ ဒသဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ။

၄၄၉။ ဓမ္မာယတနေန ယေ ဓမ္မာ… ဓမ္မဓာတုယာ ယေ ဓမ္မာ… ဣတ္ထိန္ဒြိယေန ယေ ဓမ္မာ… ပုရိသိန္ဒြိယေန ယေ ဓမ္မာ… ဇီဝိတိန္ဒြိယေန ယေ ဓမ္မာ… ဝိညာဏပစ္စယာ နာမရူပေန ယေ ဓမ္မာ… အသညာဘဝေန ယေ ဓမ္မာ… ဧကဝေါကာရဘဝေန ယေ ဓမ္မာ… ဇာတိယာ ယေ ဓမ္မာ… ဇရာယ ယေ ဓမ္မာ… မရဏေန ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန အသင်္ဂဟိတာ ဓာတုသင်္ဂဟေန အသင်္ဂဟိတာ…ပေ… တေ ဓမ္မာ တီဟိ ခန္ဓေဟိ သမ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ သမ္ပယုတ္တာ။ ကတိဟိ ဝိပ္ပယုတ္တာ? ဧကေန ခန္ဓေန ဒသဟာယတနေဟိ ဒသဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ။

၄၅၀။ အရူပဘဝေန ယေ ဓမ္မာ… နေဝသညာနာသညာဘဝေန ယေ ဓမ္မာ… စတုဝေါကာရဘဝေန ယေ ဓမ္မာ… ဣဒ္ဓိပါဒေန ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန အသင်္ဂဟိတာ ဓာတုသင်္ဂဟေန အသင်္ဂဟိတာ ၊ တေ ဓမ္မာ ကတိဟိ ခန္ဓေဟိ ကတိဟာယတနေဟိ ကတိဟိ ဓာတူဟိ သမ္ပယုတ္တာတိ ? နတ္ထိ? ကတိဟိ ဝိပ္ပယုတ္တာ? စတူဟိ ခန္ဓေဟိ ဧကေနာယတနေန သတ္တဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ။

၄၅၁။ ကုသလေဟိ ဓမ္မေဟိ ယေ ဓမ္မာ… အကုသလေဟိ ဓမ္မေဟိ ယေ ဓမ္မာ… သုခါယ ဝေဒနာယ သမ္ပယုတ္တေဟိ ဓမ္မေဟိ ယေ ဓမ္မာ… ဒုက္ခာယ ဝေဒနာယ သမ္ပယုတ္တေဟိ ဓမ္မေဟိ ယေ ဓမ္မာ… အဒုက္ခမသုခါယ ဝေဒနာယ သမ္ပယုတ္တေဟိ ဓမ္မေဟိ ယေ ဓမ္မာ… ဝိပါကေဟိ ဓမ္မေဟိ ယေ ဓမ္မာ… ဝိပါကဓမ္မဓမ္မေဟိ ယေ ဓမ္မာ… အနုပါဒိန္နအနုပါဒါနိယေဟိ ဓမ္မေဟိ ယေ ဓမ္မာ… သံကိလိဋ္ဌသံကိလေသိကေဟိ ဓမ္မေဟိ ယေ ဓမ္မာ… အသံကိလိဋ္ဌအသံကိလေသိကေဟိ ဓမ္မေဟိ ယေ ဓမ္မာ… သဝိတက္ကသဝိစာရေဟိ ဓမ္မေဟိ ယေ ဓမ္မာ… အဝိတက္ကဝိစာရမတ္တေဟိ ဓမ္မေဟိ ယေ ဓမ္မာ… ပီတိသဟဂတေဟိ ဓမ္မေဟိ ယေ ဓမ္မာ… သုခသဟဂတေဟိ ဓမ္မေဟိ ယေ ဓမ္မာ… ဥပေက္ခာသဟဂတေဟိ ဓမ္မေဟိ ယေ ဓမ္မာ… ဒဿနေန ပဟာတဗ္ဗေဟိ ဓမ္မေဟိ ယေ ဓမ္မာ… ဘာဝနာယ ပဟာတဗ္ဗေဟိ ဓမ္မေဟိ ယေ ဓမ္မာ… ဒဿနေန ပဟာတဗ္ဗဟေတုကေဟိ ဓမ္မေဟိ ယေ ဓမ္မာ… ဘာဝနာယ ပဟာတဗ္ဗဟေတုကေဟိ ဓမ္မေဟိ ယေ ဓမ္မာ… အာစယဂါမီဟိ ဓမ္မေဟိ ယေ ဓမ္မာ… အပစယဂါမီဟိ ဓမ္မေဟိ ယေ ဓမ္မာ… သေက္ခေဟိ ဓမ္မေဟိ ယေ ဓမ္မာ… အသေက္ခေဟိ ဓမ္မေဟိ ယေ ဓမ္မာ… မဟဂ္ဂတေဟိ ဓမ္မေဟိ ယေ ဓမ္မာ… အပ္ပမာဏေဟိ ဓမ္မေဟိ ယေ ဓမ္မာ… ပရိတ္တာရမ္မဏေဟိ ဓမ္မေဟိ ယေ ဓမ္မာ… မဟဂ္ဂတာရမ္မဏေဟိ ဓမ္မေဟိ ယေ ဓမ္မာ… အပ္ပမာဏာရမ္မဏေဟိ ဓမ္မေဟိ ယေ ဓမ္မာ… ဟီနေဟိ ဓမ္မေဟိ ယေ ဓမ္မာ… ပဏီတေဟိ ဓမ္မေဟိ ယေ ဓမ္မာ… မိစ္ဆတ္တနိယတေဟိ ဓမ္မေဟိ ယေ ဓမ္မာ… သမ္မတ္တနိယတေဟိ ဓမ္မေဟိ ယေ ဓမ္မာ… မဂ္ဂါရမ္မဏေဟိ ဓမ္မေဟိ ယေ ဓမ္မာ… မဂ္ဂဟေတုကေဟိ ဓမ္မေဟိ ယေ ဓမ္မာ… မဂ္ဂါဓိပတီဟိ ဓမ္မေဟိ ယေ ဓမ္မာ… အတီတာရမ္မဏေဟိ ဓမ္မေဟိ ယေ ဓမ္မာ… အနာဂတာရမ္မဏေဟိ ဓမ္မေဟိ ယေ ဓမ္မာ… ပစ္စုပ္ပန္နာရမ္မဏေဟိ ဓမ္မေဟိ ယေ ဓမ္မာ… အဇ္ဈတ္တာရမ္မဏေဟိ ဓမ္မေဟိ ယေ ဓမ္မာ… ဗဟိဒ္ဓါရမ္မဏေဟိ ဓမ္မေဟိ ယေ ဓမ္မာ… အဇ္ဈတ္တဗဟိဒ္ဓါရမ္မဏေဟိ ဓမ္မေဟိ ယေ ဓမ္မာ… သဟေတုကေဟိ ဓမ္မေဟိ ယေ ဓမ္မာ… ဟေတုသမ္ပယုတ္တေဟိ ဓမ္မေဟိ ယေ ဓမ္မာ… သဟေတုကေဟိ စေဝ န စ ဟေတူဟိ ဓမ္မေဟိ ယေ ဓမ္မာ… ဟေတုသမ္ပယုတ္တေဟိ စေဝ န စ ဟေတူဟိ ဓမ္မေဟိ ယေ ဓမ္မာ… န ဟေတုသဟေတုကေဟိ ဓမ္မေဟိ ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန အသင်္ဂဟိတာ ဓာတုသင်္ဂဟေန အသင်္ဂဟိတာ၊ တေ ဓမ္မာ ကတိဟိ ခန္ဓေဟိ ကတိဟာယတနေဟိ ကတိဟိ ဓာတူဟိ သမ္ပယုတ္တာတိ? နတ္ထိ။ ကတိဟိ ဝိပ္ပယုတ္တာ? စတူဟိ ခန္ဓေဟိ ဧကေနာယတနေန သတ္တဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ။

၄၅၂။ ရူပီဟိ ဓမ္မေဟိ ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန အသင်္ဂဟိတာ ဓာတုသင်္ဂဟေန အသင်္ဂဟိတာ… တေ ဓမ္မာ တီဟိ ခန္ဓေဟိ သမ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ သမ္ပယုတ္တာ။ ကတိဟိ ဝိပ္ပယုတ္တာ? ဧကေန ခန္ဓေန ဒသဟာယတနေဟိ ဒသဟိ ဓာတူဟိ ဝိပ္ပယုတ္တာ ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ။

၄၅၃။ အရူပီဟိ ဓမ္မေဟိ ယေ ဓမ္မာ… လောကုတ္တရေဟိ ဓမ္မေဟိ ယေ ဓမ္မာ… အနာသဝေဟိ ဓမ္မေဟိ ယေ ဓမ္မာ… အာသဝသမ္ပယုတ္တေဟိ ဓမ္မေဟိ ယေ ဓမ္မာ… အာသဝဝိပ္ပယုတ္တေဟိ စေဝ နော စ အာသဝေဟိ ဓမ္မေဟိ ယေ ဓမ္မာ… အာသဝဝိပ္ပယုတ္တေဟိ အနာသဝေဟိ ဓမ္မေဟိ ယေ ဓမ္မာ… အသံယောဇနိယေဟိ ဓမ္မေဟိ ယေ ဓမ္မာ… အဂန္ထနိယေဟိ ဓမ္မေဟိ ယေ ဓမ္မာ… အနောဃနိယေဟိ ဓမ္မေဟိ ယေ ဓမ္မာ… အယောဂနိယေဟိ ဓမ္မေဟိ ယေ ဓမ္မာ… အနီဝရဏိယေဟိ ဓမ္မေဟိ ယေ ဓမ္မာ… အပရာမဋ္ဌေဟိ ဓမ္မေဟိ ယေ ဓမ္မာ… ပရာမာသသမ္ပယုတ္တေဟိ ဓမ္မေဟိ ယေ ဓမ္မာ… ပရာမာသဝိပ္ပယုတ္တေဟိ အပရာမဋ္ဌေဟိ ဓမ္မေဟိ ယေ ဓမ္မာ… သာရမ္မဏေဟိ ဓမ္မေဟိ ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန အသင်္ဂဟိတာ ဓာတုသင်္ဂဟေန အသင်္ဂဟိတာ၊ တေ ဓမ္မာ ကတိဟိ ခန္ဓေဟိ ကတိဟာယတနေဟိ ကတိဟိ ဓာတူဟိ သမ္ပယုတ္တာတိ? နတ္ထိ။ ကတိဟိ ဝိပ္ပယုတ္တာ? စတူဟိ ခန္ဓေဟိ ဧကေနာယတနေန သတ္တဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ။

၄၅၄။ အနာရမ္မဏေဟိ ဓမ္မေဟိ ယေ ဓမ္မာ… နော စိတ္တေဟိ ဓမ္မေဟိ ယေ ဓမ္မာ… စိတ္တဝိပ္ပယုတ္တေဟိ ဓမ္မေဟိ ယေ ဓမ္မာ … စိတ္တဝိသံသဋ္ဌေဟိ ဓမ္မေဟိ ယေ ဓမ္မာ… စိတ္တသမုဋ္ဌာနေဟိ ဓမ္မေဟိ ယေ ဓမ္မာ… စိတ္တသဟဘူဟိ ဓမ္မေဟိ ယေ ဓမ္မာ… စိတ္တာနုပရိဝတ္တီဟိ ဓမ္မေဟိ ယေ ဓမ္မာ… ဗာဟိရေဟိ ဓမ္မေဟိ ယေ ဓမ္မာ… ဥပါဒါဓမ္မေဟိ ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန အသင်္ဂဟိတာ ဓာတုသင်္ဂေန အသင်္ဂဟိတာ၊ တေ ဓမ္မာ ကတိဟိ ခန္ဓေဟိ ကတိဟာယတနေဟိ ကတိဟိ ဓာတူဟိ သမ္ပယုတ္တာ? တေ ဓမ္မာ တီဟိ ခန္ဓေဟိ သမ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ သမ္ပယုတ္တာ။ ကတိဟိ ဝိပ္ပယုတ္တာ? ဧကေန ခန္ဓေန ဒသဟာယတနေဟိ ဒသဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ။

၄၅၅။ အနုပါဒါနိယေဟိ ဓမ္မေဟိ ယေ ဓမ္မာ… ဥပါဒါနသမ္ပယုတ္တေဟိ ဓမ္မေဟိ ယေ ဓမ္မာ… ဥပါဒါနသမ္ပယုတ္တေဟိ စေဝ နော စ ဥပါဒါနေဟိ ဓမ္မေဟိ ယေ ဓမ္မာ… ဥပါဒါနဝိပ္ပယုတ္တေဟိ အနုပါဒါနိယေဟိ ဓမ္မေဟိ ယေ ဓမ္မာ… အသံကိလေသိကေဟိ ဓမ္မေဟိ ယေ ဓမ္မာ… အသံကိလိဋ္ဌေဟိ ဓမ္မေဟိ ယေ ဓမ္မာ… ကိလေသသမ္ပယုတ္တေဟိ ဓမ္မေဟိ ယေ ဓမ္မာ… သံကိလိဋ္ဌေဟိ စေဝ နော စ ကိလေသေဟိ ဓမ္မေဟိ ယေ ဓမ္မာ… ကိလေသသမ္ပယုတ္တေဟိ စေဝ နော စ ကိလေသေဟိ ဓမ္မေဟိ ယေ ဓမ္မာ… ကိလေသဝိပ္ပယုတ္တေဟိ အသံကိလေသိကေဟိ ဓမ္မေဟိ ယေ ဓမ္မာ… ဒဿနေန ပဟာတဗ္ဗေဟိ ဓမ္မေဟိ ယေ ဓမ္မာ… ဘာဝနာယ ပဟာတဗ္ဗေဟိ ဓမ္မေဟိ ယေ ဓမ္မာ… ဒဿနေန ပဟာတဗ္ဗဟေတုကေဟိ ဓမ္မေဟိ ယေ ဓမ္မာ… ဘာဝနာယ ပဟာတဗ္ဗဟေတုကေဟိ ဓမ္မေဟိ ယေ ဓမ္မာ… သဝိတက္ကေဟိ ဓမ္မေဟိ ယေ ဓမ္မာ… သဝိစာရေဟိ ဓမ္မေဟိ ယေ ဓမ္မာ… သပ္ပီတိကေဟိ ဓမ္မေဟိ ယေ ဓမ္မာ… ပီတိသဟဂတေဟိ ဓမ္မေဟိ ယေ ဓမ္မာ… သုခသဟဂတေဟိ ဓမ္မေဟိ ယေ ဓမ္မာ… ဥပေက္ခာသဟဂတေဟိ ဓမ္မေဟိ ယေ ဓမ္မာ… န ကာမာဝစရေဟိ ဓမ္မေဟိ ယေ ဓမ္မာ… ရူပါဝစရေဟိ ဓမ္မေဟိ ယေ ဓမ္မာ… အရူပါဝစရေဟိ ဓမ္မေဟိ ယေ ဓမ္မာ… အပရိယာပန္နေဟိ ဓမ္မေဟိ ယေ ဓမ္မာ… နိယျာနိကေဟိ ဓမ္မေဟိ ယေ ဓမ္မာ … နိယတေဟိ ဓမ္မေဟိ ယေ ဓမ္မာ… အနုတ္တရေဟိ ဓမ္မေဟိ ယေ ဓမ္မာ… သရဏေဟိ ဓမ္မေဟိ ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန အသင်္ဂဟိတာ ဓာတုသင်္ဂဟေန အသင်္ဂဟိတာ၊ တေ ဓမ္မာ ကတိဟိ ခန္ဓေဟိ ကတိဟာယတနေဟိ ကတိဟိ ဓာတူဟိ သမ္ပယုတ္တာတိ? နတ္ထိ။ ကတိဟိ ဝိပ္ပယုတ္တာ? စတူဟိ ခန္ဓေဟိ ဧကေနာယတနေန သတ္တဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ။

ရူပဉ္စ ဓမ္မာယတနံ ဓမ္မဓာတု၊ ဣတ္ထိပုမံ ဇီဝိတံ နာမရူပံ၊

ဒွေ ဘဝါ ဇာတိဇရာ မစ္စုရူပံ၊ အနာရမ္မဏံ နော စိတ္တံ စိတ္တေန ဝိပ္ပယုတ္တံ။

ဝိသံသဋ္ဌံ သမုဋ္ဌာနသဟဘု၊ အနုပရိဝတ္တိ ဗာဟိရံ ဥပါဒါ၊

ဒွေ ဝိသယော ဧသနယော သုဗုဒ္ဓါတိ။

အသင်္ဂဟိတေနသမ္ပယုတ္တဝိပ္ပယုတ္တပဒနိဒ္ဒေသော တေရသမော။