မူလ > အဘိဓမ္မပိဋက > ကထာဝတ္ထုပါဠိ

ကာမရာဂါနုသယော အဗျာကတောတိ? အာမန္တာ။ ကာမရာဂေါ ကာမရာဂပရိယုဋ္ဌာနံ ကာမရာဂသံယောဇနံ ကာမောဃော ကာမယောဂေါ ကာမစ္ဆန္ဒနီဝရဏံ အဗျာကတန္တိ? န ဟေဝံ ဝတ္တဗ္ဗေ…ပေ… ကာမရာဂေါ ကာမရာဂပရိယုဋ္ဌာနံ…ပေ… ကာမစ္ဆန္ဒနီဝရဏံ အကုသလန္တိ? အာမန္တာ။ ကာမရာဂါနုသယော အကုသလောတိ? န ဟေဝံ ဝတ္တဗ္ဗေ…ပေ…။

ပဋိဃာနုသယော အဗျာကတောတိ? အာမန္တာ။ ပဋိဃံ ပဋိဃပရိယုဋ္ဌာနံ ပဋိဃသံယောဇနံ အဗျာကတန္တိ? န ဟေဝံ ဝတ္တဗ္ဗေ…ပေ… ပဋိဃံ ပဋိဃပရိယုဋ္ဌာနံ ပဋိဃသံယောဇနံ အကုသလန္တိ? အာမန္တာ။ ပဋိဃာနုသယော အကုသလောတိ? န ဟေဝံ ဝတ္တဗ္ဗေ…ပေ…။

မာနာနုသယော ¶ အဗျာကတောတိ? အာမန္တာ။ မာနော မာနပရိယုဋ္ဌာနံ ¶ မာနသံယောဇနံ အဗျာကတန္တိ? န ဟေဝံ ဝတ္တဗ္ဗေ …ပေ… မာနော မာနပရိယုဋ္ဌာနံ မာနသံယောဇနံ အကုသလန္တိ? အာမန္တာ။ မာနာနုသယော အကုသလောတိ? န ဟေဝံ ဝတ္တဗ္ဗေ …ပေ…။

ဒိဋ္ဌာနုသယော ¶ အဗျာကတောတိ? အာမန္တာ။ ဒိဋ္ဌိ ဒိဋ္ဌောဃော ဒိဋ္ဌိယောဂေါ ဒိဋ္ဌိပရိယုဋ္ဌာနံ ဒိဋ္ဌိသံယောဇနံ အဗျာကတန္တိ? န ဟေဝံ ဝတ္တဗ္ဗေ…ပေ… ဒိဋ္ဌိ ဒိဋ္ဌောဃော ဒိဋ္ဌိယောဂေါ ဒိဋ္ဌိပရိယုဋ္ဌာနံ ဒိဋ္ဌိသံယောဇနံ အကုသလန္တိ? အာမန္တာ။ ဒိဋ္ဌာနုသယော အကုသလောတိ? န ဟေဝံ ဝတ္တဗ္ဗေ…ပေ…။

ဝိစိကိစ္ဆာနုသယော အဗျာကတောတိ? အာမန္တာ။ ဝိစိကိစ္ဆာ ဝိစိကိစ္ဆာပရိယုဋ္ဌာနံ ဝိစိကိစ္ဆာသံယောဇနံ ဝိစိကိစ္ဆာနီဝရဏံ အဗျာကတန္တိ? န ဟေဝံ ဝတ္တဗ္ဗေ…ပေ… ဝိစိကိစ္ဆာ ¶ ဝိစိကိစ္ဆာပရိယုဋ္ဌာနံ ဝိစိကိစ္ဆာသံယောဇနံ ဝိစိကိစ္ဆာနီဝရဏံ အကုသလန္တိ? အာမန္တာ။ ဝိစိကိစ္ဆာနုသယော အကုသလောတိ? န ဟေဝံ ဝတ္တဗ္ဗေ…ပေ…။

ဘဝရာဂါနုသယော အဗျာကတောတိ? အာမန္တာ။ ဘဝရာဂေါ ဘဝရာဂပရိယုဋ္ဌာနံ ဘဝရာဂသံယောဇနံ အဗျာကတန္တိ? န ဟေဝံ ဝတ္တဗ္ဗေ…ပေ… ဘဝရာဂေါ ဘဝရာဂပရိယုဋ္ဌာနံ ဘဝရာဂသံယောဇနံ အကုသလန္တိ? အာမန္တာ။ ဘဝရာဂါနုသယော အကုသလောတိ? န ဟေဝံ ဝတ္တဗ္ဗေ…ပေ…။

အဝိဇ္ဇာနုသယော အဗျာကတောတိ? အာမန္တာ။ အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာပရိယုဋ္ဌာနံ အဝိဇ္ဇာသံယောဇနံ အဝိဇ္ဇာနီဝရဏံ အဗျာကတန္တိ? န ဟေဝံ ဝတ္တဗ္ဗေ…ပေ… အဝိဇ္ဇာ အဝိဇ္ဇောဃော အဝိဇ္ဇာယောဂေါ ¶ အဝိဇ္ဇာပရိယုဋ္ဌာနံ အဝိဇ္ဇာသံယောဇနံ အဝိဇ္ဇာနီဝရဏံ အကုသလန္တိ? အာမန္တာ။ အဝိဇ္ဇာနုသယော ¶ အကုသလောတိ? န ဟေဝံ ဝတ္တဗ္ဗေ…ပေ…။

၆၀၆။ န ဝတ္တဗ္ဗံ – ‘‘အနုသယာ အဗျာကတာ’’တိ? အာမန္တာ။ ပုထုဇ္ဇနော ကုသလာဗျာကတေ စိတ္တေ ဝတ္တမာနေ ‘‘သာနုသယော’’တိ ဝတ္တဗ္ဗောတိ? အာမန္တာ။ ကုသလာကုသလာ ဓမ္မာ သမ္မုခီဘာဝံ အာဂစ္ဆန္တီတိ? န ဟေဝံ ဝတ္တဗ္ဗေ…ပေ… တေန ဟိ အနုသယာ အဗျာကတာတိ။ ပုထုဇ္ဇနော ကုသလာဗျာကတေ စိတ္တေ ဝတ္တမာနေ ‘‘သရာဂေါ’’တိ ဝတ္တဗ္ဗောတိ? အာမန္တာ။ ကုသလာကုသလာ ဓမ္မာ သမ္မုခီဘာဝံ အာဂစ္ဆန္တီတိ? န ဟေဝံ ဝတ္တဗ္ဗေ…ပေ… တေန ဟိ ရာဂေါ အဗျာကတောတိ။

၆၀၇။ အနုသယာ ¶ အဟေတုကာတိ? အာမန္တာ။ ရူပံ နိဗ္ဗာနံ စက္ခာယတနံ…ပေ… ဖောဋ္ဌဗ္ဗာယတနန္တိ? န ဟေဝံ ဝတ္တဗ္ဗေ…ပေ…။

ကာမရာဂါနုသယော အဟေတုကောတိ? အာမန္တာ။ ကာမရာဂေါ ကာမရာဂပရိယုဋ္ဌာနံ ကာမရာဂသံယောဇနံ ကာမစ္ဆန္ဒနီဝရဏံ အဟေတုကန္တိ? န ဟေဝံ ဝတ္တဗ္ဗေ…ပေ… ကာမရာဂေါ ကာမရာဂပရိယုဋ္ဌာနံ…ပေ… ကာမစ္ဆန္ဒနီဝရဏံ သဟေတုကန္တိ? အာမန္တာ။ ကာမရာဂါနုသယော သဟေတုကောတိ? န ဟေဝံ ဝတ္တဗ္ဗေ…ပေ… ပဋိဃာနုသယော…ပေ… မာနာနုသယော… ဒိဋ္ဌာနုသယော… ဝိစိကိစ္ဆာနုသယော… ဘဝရာဂါနုသယော… အဝိဇ္ဇာနုသယော အဟေတုကောတိ? အာမန္တာ။ အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာပရိယုဋ္ဌာနံ အဝိဇ္ဇာသံယောဇနံ အဝိဇ္ဇာနီဝရဏံ အဟေတုကန္တိ ¶ ? န ဟေဝံ ဝတ္တဗ္ဗေ ¶ …ပေ… အဝိဇ္ဇာ ¶ အဝိဇ္ဇောဃော…ပေ… အဝိဇ္ဇာနီဝရဏံ သဟေတုကန္တိ? အာမန္တာ။ အဝိဇ္ဇာနုသယော သဟေတုကောတိ? န ဟေဝံ ဝတ္တဗ္ဗေ…ပေ…။

၆၀၈။ န ဝတ္တဗ္ဗံ – ‘‘အနုသယာ အဟေတုကာ’’တိ? အာမန္တာ။ ပုထုဇ္ဇနော ကုသလာဗျာကတေ စိတ္တေ ဝတ္တမာနေ ‘‘သာနုသယော’’တိ ဝတ္တဗ္ဗောတိ? အာမန္တာ။ အနုသယာ တေန ဟေတုနာ သဟေတုကာတိ? န ဟေဝံ ဝတ္တဗ္ဗေ…ပေ… တေန ဟိ အနုသယာ အဟေတုကာတိ။ ပုထုဇ္ဇနော ကုသလာဗျာကတေ စိတ္တေ ဝတ္တမာနေ ‘‘သရာဂေါ’’တိ ဝတ္တဗ္ဗောတိ? အာမန္တာ။ ရာဂေါ တေန ဟေတုနာ သဟေတုကောတိ? န ဟေဝံ ဝတ္တဗ္ဗေ…ပေ… တေန ဟိ ရာဂေါ အဟေတုကောတိ။

၆၀၉။ အနုသယာ စိတ္တဝိပ္ပယုတ္တာတိ? အာမန္တာ။ ရူပံ နိဗ္ဗာနံ စက္ခာယတနံ…ပေ… ဖောဋ္ဌဗ္ဗာယတနန္တိ? န ဟေဝံ ဝတ္တဗ္ဗေ…ပေ…။

ကာမရာဂါနုသယော စိတ္တဝိပ္ပယုတ္တောတိ? အာမန္တာ။ ကာမရာဂေါ ကာမရာဂပရိယုဋ္ဌာနံ ကာမရာဂသံယောဇနံ ကာမောဃော ကာမယောဂေါ ကာမစ္ဆန္ဒနီဝရဏံ စိတ္တဝိပ္ပယုတ္တန္တိ? န ဟေဝံ ဝတ္တဗ္ဗေ…ပေ… ကာမရာဂေါ ကာမရာဂပရိယုဋ္ဌာနံ…ပေ… ကာမစ္ဆန္ဒနီဝရဏံ စိတ္တသမ္ပယုတ္တန္တိ? အာမန္တာ။ ကာမရာဂါနုသယော စိတ္တသမ္ပယုတ္တောတိ? န ဟေဝံ ဝတ္တဗ္ဗေ…ပေ…။

၆၁၀။ ကာမရာဂါနုသယော စိတ္တဝိပ္ပယုတ္တောတိ? အာမန္တာ။ ကတမက္ခန္ဓပရိယာပန္နောတိ? သင်္ခါရက္ခန္ဓပရိယာပန္နောတိ။ သင်္ခါရက္ခန္ဓော ¶ စိတ္တဝိပ္ပယုတ္တောတိ? န ¶ ဟေဝံ ဝတ္တဗ္ဗေ။ သင်္ခါရက္ခန္ဓော စိတ္တဝိပ္ပယုတ္တောတိ? အာမန္တာ။ ဝေဒနာက္ခန္ဓော သညာက္ခန္ဓော စိတ္တဝိပ္ပယုတ္တောတိ? န ဟေဝံ ဝတ္တဗ္ဗေ…ပေ…။

ကာမရာဂါနုသယော ¶ သင်္ခါရက္ခန္ဓပရိယာပန္နော စိတ္တဝိပ္ပယုတ္တောတိ? အာမန္တာ။ ကာမရာဂေါ သင်္ခါရက္ခန္ဓပရိယာပန္နော စိတ္တဝိပ္ပယုတ္တောတိ? န ဟေဝံ ဝတ္တဗ္ဗေ…ပေ… ကာမရာဂေါ သင်္ခါရက္ခန္ဓပရိယာပန္နော စိတ္တသမ္ပယုတ္တောတိ? အာမန္တာ။ ကာမရာဂါနုသယော သင်္ခါရက္ခန္ဓပရိယာပန္နော စိတ္တသမ္ပယုတ္တောတိ? န ဟေဝံ ဝတ္တဗ္ဗေ…ပေ…။

ကာမရာဂါနုသယော သင်္ခါရက္ခန္ဓပရိယာပန္နော စိတ္တဝိပ္ပယုတ္တော၊ ကာမရာဂေါ သင်္ခါရက္ခန္ဓပရိယာပန္နော ¶ စိတ္တသမ္ပယုတ္တောတိ? အာမန္တာ။ သင်္ခါရက္ခန္ဓော ဧကဒေသော စိတ္တသမ္ပယုတ္တော ဧကဒေသော စိတ္တဝိပ္ပယုတ္တောတိ? န ဟေဝံ ဝတ္တဗ္ဗေ…ပေ…။

သင်္ခါရက္ခန္ဓော ဧကဒေသော စိတ္တသမ္ပယုတ္တော ဧကဒေသော စိတ္တဝိပ္ပယုတ္တောတိ? အာမန္တာ။ ဝေဒနာက္ခန္ဓော သညာက္ခန္ဓော ဧကဒေသော စိတ္တသမ္ပယုတ္တော ဧကဒေသော စိတ္တဝိပ္ပယုတ္တောတိ? န ဟေဝံ ဝတ္တဗ္ဗေ…ပေ…။

၆၁၁။ ပဋိဃာနုသယော မာနာနုသယော ဒိဋ္ဌာနုသယော ဝိစိကိစ္ဆာနုသယော ဘဝရာဂါနုသယော အဝိဇ္ဇာနုသယော စိတ္တဝိပ္ပယုတ္တောတိ? အာမန္တာ။ အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာနီဝရဏံ စိတ္တဝိပ္ပယုတ္တန္တိ? န ဟေဝံ ဝတ္တဗ္ဗေ…ပေ… အဝိဇ္ဇာ ¶ အဝိဇ္ဇောဃော အဝိဇ္ဇာယောဂေါ အဝိဇ္ဇာနီဝရဏံ စိတ္တသမ္ပယုတ္တန္တိ? အာမန္တာ။ အဝိဇ္ဇာနုသယော စိတ္တသမ္ပယုတ္တောတိ? န ဟေဝံ ဝတ္တဗ္ဗေ…ပေ…။

၆၁၂။ အဝိဇ္ဇာနုသယော စိတ္တဝိပ္ပယုတ္တောတိ? အာမန္တာ။ ကတမက္ခန္ဓပရိယာပန္နောတိ? သင်္ခါရက္ခန္ဓပရိယာပန္နောတိ။ သင်္ခါရက္ခန္ဓော စိတ္တဝိပ္ပယုတ္တောတိ? န ဟေဝံ ဝတ္တဗ္ဗေ ¶ ။ သင်္ခါရက္ခန္ဓော စိတ္တဝိပ္ပယုတ္တောတိ? အာမန္တာ။ ဝေဒနာက္ခန္ဓော သညာက္ခန္ဓော စိတ္တဝိပ္ပယုတ္တောတိ? န ဟေဝံ ဝတ္တဗ္ဗေ…ပေ…။

အဝိဇ္ဇာနုသယော သင်္ခါရက္ခန္ဓပရိယာပန္နော စိတ္တဝိပ္ပယုတ္တောတိ? အာမန္တာ။ အဝိဇ္ဇာ သင်္ခါရက္ခန္ဓပရိယာပန္နာ စိတ္တဝိပ္ပယုတ္တာတိ? န ဟေဝံ ဝတ္တဗ္ဗေ…ပေ… အဝိဇ္ဇာ သင်္ခါရက္ခန္ဓပရိယာပန္နာ စိတ္တသမ္ပယုတ္တာတိ? အာမန္တာ။ အဝိဇ္ဇာနုသယော သင်္ခါရက္ခန္ဓပရိယာပန္နော စိတ္တသမ္ပယုတ္တောတိ? န ဟေဝံ ဝတ္တဗ္ဗေ…ပေ…။

အဝိဇ္ဇာနုသယော ¶ သင်္ခါရက္ခန္ဓပရိယာပန္နော စိတ္တဝိပ္ပယုတ္တော၊ အဝိဇ္ဇာသင်္ခါရက္ခန္ဓပရိယာပန္နာ စိတ္တသမ္ပယုတ္တာတိ? အာမန္တာ။ သင်္ခါရက္ခန္ဓော ဧကဒေသော စိတ္တသမ္ပယုတ္တော ဧကဒေသော စိတ္တဝိပ္ပယုတ္တောတိ? န ဟေဝံ ဝတ္တဗ္ဗေ။

သင်္ခါရက္ခန္ဓော ဧကဒေသော စိတ္တသမ္ပယုတ္တော ဧကဒေသော စိတ္တဝိပ္ပယုတ္တောတိ? အာမန္တာ။ ဝေဒနာက္ခန္ဓော ¶ သညာက္ခန္ဓော ဧကဒေသော စိတ္တသမ္ပယုတ္တော ဧကဒေသော စိတ္တဝိပ္ပယုတ္တောတိ? န ¶ ဟေဝံ ဝတ္တဗ္ဗေ…ပေ…။

၆၁၃။ န ဝတ္တဗ္ဗံ – ‘‘အနုသယာ စိတ္တဝိပ္ပယုတ္တာ’’တိ? အာမန္တာ။ ပုထုဇ္ဇနော ကုသလာဗျာကတေ စိတ္တေ ဝတ္တမာနေ ‘‘သာနုသယော’’တိ ဝတ္တဗ္ဗောတိ? အာမန္တာ။ အနုသယာ တေန စိတ္တေန သမ္ပယုတ္တာတိ? န ဟေဝံ ဝတ္တဗ္ဗေ။ တေန ဟိ အနုသယာ စိတ္တဝိပ္ပယုတ္တာတိ။ ပုထုဇ္ဇနော ကုသလာဗျာကတေ စိတ္တေ ဝတ္တမာနေ ‘‘သရာဂေါ’’တိ ဝတ္တဗ္ဗောတိ? အာမန္တာ။ ရာဂေါ တေန စိတ္တေန သမ္ပယုတ္တောတိ? န ဟေဝံ ဝတ္တဗ္ဗေ။ တေန ဟိ ရာဂေါ စိတ္တဝိပ္ပယုတ္တောတိ။

၆၁၄။ အညာဏေ ¶ ဝိဂတေ ဉာဏဝိပ္ပယုတ္တေ စိတ္တေ ဝတ္တမာနေ န ဝတ္တဗ္ဗံ – ‘‘ဉာဏီ’’တိ? အာမန္တာ။ ရာဂေ ဝိဂတေ န ဝတ္တဗ္ဗံ – ‘‘ဝီတရာဂေါ’’တိ? န ဟေဝံ ဝတ္တဗ္ဗေ…ပေ… အညာဏေ ဝိဂတေ ဉာဏဝိပ္ပယုတ္တေ စိတ္တေ ဝတ္တမာနေ န ဝတ္တဗ္ဗံ – ‘‘ဉာဏီ’’တိ? အာမန္တာ။ ဒေါသေ ဝိဂတေ… မောဟေ ဝိဂတေ… ကိလေသေ ဝိဂတေ န ဝတ္တဗ္ဗံ – ‘‘နိက္ကိလေသော’’တိ? န ဟေဝံ ဝတ္တဗ္ဗေ…ပေ…။

ရာဂေ ဝိဂတေ ဝတ္တဗ္ဗံ – ‘‘ဝီတရာဂေါ’’တိ? အာမန္တာ။ အညာဏေ ဝိဂတေ ဉာဏဝိပ္ပယုတ္တေ စိတ္တေ ဝတ္တမာနေ ဝတ္တဗ္ဗံ – ‘‘ဉာဏီ’’တိ? န ဟေဝံ ဝတ္တဗ္ဗေ…ပေ… ဒေါသေ ¶ ဝိဂတေ… မောဟေ ဝိဂတေ… ကိလေသေ ဝိဂတေ ဝတ္တဗ္ဗံ – ‘‘နိက္ကိလေသော’’တိ? အာမန္တာ။ အညာဏေ ဝိဂတေ ဉာဏဝိပ္ပယုတ္တေ စိတ္တေ ဝတ္တမာနေ ဝတ္တဗ္ဗံ – ‘‘ဉာဏီ’’တိ? န ဟေဝံ ဝတ္တဗ္ဗေ…ပေ…။

၆၁၅။ အညာဏေ ¶ ဝိဂတေ ဉာဏဝိပ္ပယုတ္တေ စိတ္တေ ဝတ္တမာနေ ဝတ္တဗ္ဗံ – ‘‘ဉာဏီ’’တိ? အာမန္တာ ¶ ။ အတီတေန ဉာဏေန ဉာဏီ နိရုဒ္ဓေန ဝိဂတေန ပဋိပဿဒ္ဓေန ဉာဏေန ဉာဏီတိ? န ဟေဝံ ဝတ္တဗ္ဗေ…ပေ…။

(၁၁၀) ၅။ ဉာဏံ စိတ္တဝိပ္ပယုတ္တန္တိကထာ

၆၁၆။ ဉာဏံ ¶ စိတ္တဝိပ္ပယုတ္တန္တိ? အာမန္တာ။ ရူပံ နိဗ္ဗာနံ စက္ခာယတနံ…ပေ… ဖောဋ္ဌဗ္ဗာယတနန္တိ? န ဟေဝံ ဝတ္တဗ္ဗေ…ပေ… ဉာဏံ စိတ္တဝိပ္ပယုတ္တန္တိ? အာမန္တာ။ ပညာ ပညိန္ဒြိယံ ပညာဗလံ သမ္မာဒိဋ္ဌိ ဓမ္မဝိစယသမ္ဗောဇ္ဈင်္ဂေါ စိတ္တဝိပ္ပယုတ္တောတိ? န ဟေဝံ ဝတ္တဗ္ဗေ…ပေ… ပညာ ပညိန္ဒြိယံ ပညာဗလံ သမ္မာဒိဋ္ဌိ ဓမ္မဝိစယသမ္ဗောဇ္ဈင်္ဂေါ စိတ္တသမ္ပယုတ္တောတိ? အာမန္တာ။ ဉာဏံ စိတ္တသမ္ပယုတ္တန္တိ? န ဟေဝံ ဝတ္တဗ္ဗေ…ပေ…။

ဉာဏံ စိတ္တဝိပ္ပယုတ္တန္တိ? အာမန္တာ။ ကတမက္ခန္ဓပရိယာပန္နန္တိ ¶ ? သင်္ခါရက္ခန္ဓပရိယာပန္နန္တိ။ သင်္ခါရက္ခန္ဓော စိတ္တဝိပ္ပယုတ္တောတိ? န ဟေဝံ ဝတ္တဗ္ဗေ…ပေ… သင်္ခါရက္ခန္ဓော စိတ္တဝိပ္ပယုတ္တောတိ? အာမန္တာ။ ဝေဒနာက္ခန္ဓော သညာက္ခန္ဓော စိတ္တဝိပ္ပယုတ္တောတိ? န ဟေဝံ ဝတ္တဗ္ဗေ…ပေ… ဉာဏံ သင်္ခါရက္ခန္ဓပရိယာပန္နံ စိတ္တဝိပ္ပယုတ္တန္တိ? အာမန္တာ။ ပညာ သင်္ခါရက္ခန္ဓပရိယာပန္နာ စိတ္တဝိပ္ပယုတ္တာတိ? န ဟေဝံ ဝတ္တဗ္ဗေ…ပေ… ပညာ သင်္ခါရက္ခန္ဓပရိယာပန္နာ စိတ္တသမ္ပယုတ္တာတိ? အာမန္တာ။ ဉာဏံ သင်္ခါရက္ခန္ဓပရိယာပန္နံ စိတ္တသမ္ပယုတ္တန္တိ? န ဟေဝံ ဝတ္တဗ္ဗေ…ပေ… ဉာဏံ သင်္ခါရက္ခန္ဓပရိယာပန္နံ စိတ္တဝိပ္ပယုတ္တံ၊ ပညာ သင်္ခါရက္ခန္ဓပရိယာပန္နာ ¶ စိတ္တသမ္ပယုတ္တာတိ? အာမန္တာ။ သင်္ခါရက္ခန္ဓော ဧကဒေသော စိတ္တသမ္ပယုတ္တော ဧကဒေသော စိတ္တဝိပ္ပယုတ္တောတိ? န ဟေဝံ ဝတ္တဗ္ဗေ…ပေ… သင်္ခါရက္ခန္ဓော ဧကဒေသော စိတ္တသမ္ပယုတ္တော ဧကဒေသော စိတ္တဝိပ္ပယုတ္တောတိ? အာမန္တာ။ ဝေဒနာက္ခန္ဓော သညာက္ခန္ဓော ဧကဒေသော စိတ္တသမ္ပယုတ္တော ဧကဒေသော စိတ္တဝိပ္ပယုတ္တောတိ? န ဟေဝံ ဝတ္တဗ္ဗေ…ပေ…။

၆၁၇။ န ¶ ဝတ္တဗ္ဗံ – ‘‘ဉာဏံ စိတ္တဝိပ္ပယုတ္တ’’န္တိ? အာမန္တာ။ အရဟာ စက္ခုဝိညာဏသမင်္ဂီ ‘‘ဉာဏီ’’တိ ဝတ္တဗ္ဗောတိ? အာမန္တာ။ ဉာဏံ တေန စိတ္တေန သမ္ပယုတ္တန္တိ? န ¶ ဟေဝံ ဝတ္တဗ္ဗေ။ တေန ဟိ ဉာဏံ စိတ္တဝိပ္ပယုတ္တန္တိ။

အရဟာ ¶ စက္ခုဝိညာဏသမင်္ဂီ ‘‘ပညဝါ’’တိ ဝတ္တဗ္ဗောတိ [သကဝါဒီပုစ္ဆာ ဝိယ ဒိဿတိ]? အာမန္တာ။ ပညာ တေန စိတ္တေန သမ္ပယုတ္တာတိ? န ဟေဝံ ဝတ္တဗ္ဗေ။ တေန ဟိ ပညာ စိတ္တဝိပ္ပယုတ္တာတိ။

ဉာဏံ စိတ္တဝိပ္ပယုတ္တန္တိကထာ နိဋ္ဌိတာ။

၆၁၈။ ‘‘ဣဒံ ဒုက္ခ’’န္တိ ဝါစံ ဘာသတော ‘‘ဣဒံ ဒုက္ခ’’န္တိ ဉာဏံ ပဝတ္တတီတိ? အာမန္တာ။ ‘‘အယံ ဒုက္ခသမုဒယော’’တိ ဝါစံ ဘာသတော ‘‘အယံ ဒုက္ခသမုဒယော’’တိ ဉာဏံ ပဝတ္တတီတိ? န ဟေဝံ ဝတ္တဗ္ဗေ…ပေ… ‘‘ဣဒံ ဒုက္ခ’’န္တိ ဝါစံ ဘာသတော ‘‘ဣဒံ ဒုက္ခ’’န္တိ ဉာဏံ ပဝတ္တတီတိ? အာမန္တာ။ ‘‘အယံ ဒုက္ခနိရောဓော’’တိ ဝါစံ ဘာသတော ‘‘အယံ ဒုက္ခနိရောဓော’’တိ ဉာဏံ ပဝတ္တတီတိ? န ¶ ဟေဝံ ဝတ္တဗ္ဗေ…ပေ… ‘‘ဣဒံ ဒုက္ခ’’န္တိ ဝါစံ ဘာသတော ‘‘ဣဒံ ဒုက္ခ’’န္တိ ဉာဏံ ပဝတ္တတီတိ? အာမန္တာ။ ‘‘အယံ မဂ္ဂေါ’’တိ ဝါစံ ဘာသတော ‘‘အယံ မဂ္ဂေါ’’တိ ဉာဏံ ပဝတ္တတီတိ? န ဟေဝံ ဝတ္တဗ္ဗေ…ပေ…။

‘‘အယံ သမုဒယော’’တိ ဝါစံ ဘာသတော န စ ‘‘အယံ သမုဒယော’’တိ ဉာဏံ ပဝတ္တတီတိ? အာမန္တာ။ ‘‘ဣဒံ ဒုက္ခ’’န္တိ ဝါစံ ဘာသတော န စ ‘‘ဣဒံ ဒုက္ခ’’န္တိ ဉာဏံ ပဝတ္တတီတိ? န ဟေဝံ ဝတ္တဗ္ဗေ…ပေ… ‘‘အယံ ¶ နိရောဓော’’တိ… ‘‘အယံ မဂ္ဂေါ’’တိ ဝါစံ ဘာသတော န စ ‘‘အယံ မဂ္ဂေါ’’တိ ဉာဏံ ပဝတ္တတီတိ? အာမန္တာ။ ‘‘ဣဒံ ဒုက္ခ’’န္တိ ဝါစံ ဘာသတော န စ ‘‘ဣဒံ ဒုက္ခ’’န္တိ ဉာဏံ ပဝတ္တတီတိ? န ဟေဝံ ဝတ္တဗ္ဗေ…ပေ…။

၆၁၉။ ‘‘ဣဒံ ¶ ဒုက္ခ’’န္တိ ဝါစံ ဘာသတော ‘‘ဣဒံ ဒုက္ခ’’န္တိ ဉာဏံ ပဝတ္တတီတိ? အာမန္တာ။ ‘‘ရူပံ အနိစ္စ’’န္တိ ဝါစံ ဘာသတော ‘‘ရူပံ အနိစ္စ’’န္တိ ဉာဏံ ပဝတ္တတီတိ? န ဟေဝံ ဝတ္တဗ္ဗေ…ပေ… ‘‘ဣဒံ ဒုက္ခ’’န္တိ ဝါစံ ဘာသတော ‘‘ဣဒံ ဒုက္ခ’’န္တိ ဉာဏံ ပဝတ္တတီတိ? အာမန္တာ။ ဝေဒနာ… သညာ… သင်္ခါရာ… ‘‘ဝိညာဏံ အနိစ္စ’’န္တိ ဝါစံ ဘာသတော ‘‘ဝိညာဏံ အနိစ္စ’’န္တိ ဉာဏံ ပဝတ္တတီတိ? န ဟေဝံ ဝတ္တဗ္ဗေ…ပေ…။

‘‘ဣဒံ ¶ ဒုက္ခ’’န္တိ ဝါစံ ဘာသတော ‘‘ဣဒံ ဒုက္ခ’’န္တိ ဉာဏံ ပဝတ္တတီတိ? အာမန္တာ။ ‘‘ရူပံ အနတ္တာ’’တိ ဝါစံ ဘာသတော ‘‘ရူပံ အနတ္တာ’’တိ ဉာဏံ ပဝတ္တတီတိ? န ဟေဝံ ဝတ္တဗ္ဗေ…ပေ… ‘‘ဣဒံ ဒုက္ခ’’န္တိ ဝါစံ ဘာသတော ‘‘ဣဒံ ဒုက္ခ’’န္တိ ဉာဏံ ပဝတ္တတီတိ? အာမန္တာ။ ဝေဒနာ ¶ … သညာ… သင်္ခါရာ… ‘‘ဝိညာဏံ အနတ္တာ’’တိ ဝါစံ ဘာသတော ‘‘ဝိညာဏံ အနတ္တာ’’တိ ဉာဏံ ပဝတ္တတီတိ? န ဟေဝံ ဝတ္တဗ္ဗေ…ပေ…။

‘‘ရူပံ ¶ အနိစ္စ’’န္တိ ဝါစံ ဘာသတော န စ ‘‘ရူပံ အနိစ္စ’’န္တိ ဉာဏံ ပဝတ္တတီတိ? အာမန္တာ။ ‘‘ဣဒံ ဒုက္ခ’’န္တိ ဝါစံ ဘာသတော န စ ‘‘ဣဒံ ဒုက္ခ’’န္တိ ဉာဏံ ပဝတ္တတီတိ? န ဟေဝံ ဝတ္တဗ္ဗေ…ပေ… ဝေဒနာ… သညာ… သင်္ခါရာ… ‘‘ဝိညာဏံ အနိစ္စ’’န္တိ ဝါစံ ဘာသတော န စ ‘‘ဝိညာဏံ အနိစ္စ’’န္တိ ဉာဏံ ပဝတ္တတီတိ? အာမန္တာ။ ‘‘ဣဒံ ဒုက္ခ’’န္တိ ဝါစံ ဘာသတော န စ ‘‘ဣဒံ ဒုက္ခ’’န္တိ ဉာဏံ ပဝတ္တတီတိ? န ဟေဝံ ဝတ္တဗ္ဗေ…ပေ…။

‘‘ရူပံ အနတ္တာ’’တိ ဝါစံ ဘာသတော န စ ‘‘ရူပံ အနတ္တာ’’တိ ဉာဏံ ပဝတ္တတီတိ? အာမန္တာ။ ‘‘ဣဒံ ဒုက္ခ’’န္တိ ဝါစံ ဘာသတော န စ ‘‘ဣဒံ ဒုက္ခ’’န္တိ ဉာဏံ ပဝတ္တတီတိ? န ဟေဝံ ဝတ္တဗ္ဗေ …ပေ… ဝေဒနာ… သညာ… သင်္ခါရာ… ‘‘ဝိညာဏံ အနတ္တာ’’တိ ဝါစံ ဘာသတော န စ ‘‘ဝိညာဏံ အနတ္တာ’’တိ ဉာဏံ ပဝတ္တတီတိ? အာမန္တာ။ ‘‘ဣဒံ ဒုက္ခ’’န္တိ ဝါစံ ဘာသတော န စ ‘‘ဒုက္ခ’’န္တိ ဉာဏံ ပဝတ္တတီတိ? န ဟေဝံ ဝတ္တဗ္ဗေ…ပေ…။

၆၂၀။ ‘‘ဣဒံ ဒုက္ခ’’န္တိ ဝါစံ ဘာသတော ‘‘ဣဒံ ဒုက္ခ’’န္တိ ဉာဏံ ပဝတ္တတီတိ? အာမန္တာ။ ‘‘ဣ’’တိ [ဤတိ (သျာ။ ပီ။)] စ ‘‘ဒ’’န္တိ စ ‘‘ဒု’’တိ [ဒူတိ (သျာ။ ပီ။)] စ ‘‘ခ’’န္တိ စ ဉာဏံ ပဝတ္တတီတိ? န ဟေဝံ ဝတ္တဗ္ဗေ…ပေ…။

၆၂၁။ ဣဒ္ဓိဗလေန ¶ ¶ ¶ သမန္နာဂတော ကပ္ပံ တိဋ္ဌေယျာတိ? အာမန္တာ။ ဣဒ္ဓိမယိကော သော အာယု၊ ဣဒ္ဓိမယိကာ သာ ဂတိ၊ ဣဒ္ဓိမယိကော သော အတ္တဘာဝပ္ပဋိလာဘောတိ? န ဟေဝံ ဝတ္တဗ္ဗေ…ပေ…။

ဣဒ္ဓိဗလေန ¶ သမန္နာဂတော ကပ္ပံ တိဋ္ဌေယျာတိ? အာမန္တာ။ အတီတံ ကပ္ပံ တိဋ္ဌေယျ၊ အနာဂတံ ကပ္ပံ တိဋ္ဌေယျာတိ? န ဟေဝံ ဝတ္တဗ္ဗေ…ပေ… ဣဒ္ဓိဗလေန သမန္နာဂတော ကပ္ပံ တိဋ္ဌေယျာတိ? အာမန္တာ။ ဒွေ ကပ္ပေ တိဋ္ဌေယျ၊ တယော ကပ္ပေ တိဋ္ဌေယျ၊ စတ္တာရော ကပ္ပေ တိဋ္ဌေယျာတိ? န ဟေဝံ ဝတ္တဗ္ဗေ…ပေ… ဣဒ္ဓိဗလေန သမန္နာဂတော ကပ္ပံ တိဋ္ဌေယျာတိ? အာမန္တာ။ သတိ ဇီဝိတေ ဇီဝိတာဝသေသေ တိဋ္ဌေယျ၊ အသတိ ဇီဝိတေ ဇီဝိတာဝသေသေ တိဋ္ဌေယျာတိ? သတိ ဇီဝိတေ ဇီဝိတာဝသေသေ တိဋ္ဌေယျာတိ။ ဟဉ္စိ သတိ ဇီဝိတေ ဇီဝိတာဝသေသေ တိဋ္ဌေယျ၊ နော စ ဝတ ရေ ဝတ္တဗ္ဗေ – ‘‘ဣဒ္ဓိဗလေန သမန္နာဂတော ကပ္ပံ တိဋ္ဌေယျာ’’တိ။ အသတိ ဇီဝိတေ ဇီဝိတာဝသေသေ တိဋ္ဌေယျာတိ၊ မတော တိဋ္ဌေယျ၊ ကာလင်္ကတော တိဋ္ဌေယျာတိ? န ဟေဝံ ဝတ္တဗ္ဗေ…ပေ…။

၆၂၂။ ဣဒ္ဓိဗလေန သမန္နာဂတော ကပ္ပံ တိဋ္ဌေယျာတိ? အာမန္တာ။ ဥပ္ပန္နော ဖဿော မာ နိရုဇ္ဈီတိ လဗ္ဘာ ဣဒ္ဓိယာ ပဂ္ဂဟေတုန္တိ? န ဟေဝံ ဝတ္တဗ္ဗေ…ပေ… ဥပ္ပန္နာ ဝေဒနာ…ပေ… ဥပ္ပန္နာ သညာ ¶ …ပေ… ဥပ္ပန္နာ စေတနာ…ပေ… ဥပ္ပန္နံ စိတ္တံ… ဥပ္ပန္နာ သဒ္ဓါ… ဥပ္ပန္နံ ဝီရိယံ… ဥပ္ပန္နာ သတိ… ဥပ္ပန္နော သမာဓိ ¶ …ပေ… ဥပ္ပန္နာ ပညာ မာ နိရုဇ္ဈီတိ လဗ္ဘာ ဣဒ္ဓိယာ ပဂ္ဂဟေတုန္တိ? န ဟေဝံ ဝတ္တဗ္ဗေ…ပေ…။

ဣဒ္ဓိဗလေန သမန္နာဂတော ကပ္ပံ တိဋ္ဌေယျာတိ? အာမန္တာ။ ရူပံ နိစ္စံ ဟောတူတိ လဗ္ဘာ ဣဒ္ဓိယာ ပဂ္ဂဟေတုန္တိ? န ဟေဝံ ဝတ္တဗ္ဗေ…ပေ… ဝေဒနာ…ပေ… သညာ… သင်္ခါရာ… ဝိညာဏံ နိစ္စံ ဟောတူတိ လဗ္ဘာ ဣဒ္ဓိယာ ပဂ္ဂဟေတုန္တိ? န ဟေဝံ ဝတ္တဗ္ဗေ…ပေ…။

ဣဒ္ဓိဗလေန သမန္နာဂတော ကပ္ပံ တိဋ္ဌေယျာတိ? အာမန္တာ။ ဇာတိဓမ္မာ သတ္တာ မာ ဇာယိံသူတိ လဗ္ဘာ ¶ ဣဒ္ဓိယာ ပဂ္ဂဟေတုန္တိ? န ဟေဝံ ဝတ္တဗ္ဗေ…ပေ… ဇရာဓမ္မာ သတ္တာ မာ ဇီရိံသူတိ…ပေ… ဗျာဓိဓမ္မာ သတ္တာ မာ ဗျာဓိယိံသူတိ…ပေ… မရဏဓမ္မာ သတ္တာ မာ မီယိံသူတိ လဗ္ဘာ ဣဒ္ဓိယာ ပဂ္ဂဟေတုန္တိ? န ဟေဝံ ဝတ္တဗ္ဗေ…ပေ…။

၆၂၃။ န ဝတ္တဗ္ဗံ – ‘‘ဣဒ္ဓိဗလေန သမန္နာဂတော ကပ္ပံ တိဋ္ဌေယျာ’’တိ? အာမန္တာ။ နနု ဝုတ္တံ ဘဂဝတာ – ‘‘ယဿ ကဿစိ၊ အာနန္ဒ၊ စတ္တာရော ဣဒ္ဓိပါဒါ ဘာဝိတာ ဗဟုလီကတာ ယာနီကတာ ဝတ္ထုကတာ အနုဋ္ဌိတာ ပရိစိတာ သုသမာရဒ္ဓါ၊ သော အာကင်္ခမာနော ကပ္ပံ ဝါ တိဋ္ဌေယျ ကပ္ပာဝသေသံ ဝါ’’တိ [ဒီ။ နိ။ ၂။၁၆၆၊ သံ။ နိ။ ၅။၈၂၂၊ ဥဒါ။ ၅၁]! အတ္ထေဝ ¶ သုတ္တန္တောတိ? အာမန္တာ။ တေန ဟိ ဣဒ္ဓိဗလေန သမန္နာဂတော ကပ္ပံ တိဋ္ဌေယျာတိ။

၆၂၄။ ဣဒ္ဓိဗလေန ¶ သမန္နာဂတော ကပ္ပံ တိဋ္ဌေယျာတိ? အာမန္တာ။ နနု ဝုတ္တံ ဘဂဝတာ – ‘‘စတုန္နံ၊ ဘိက္ခဝေ၊ ဓမ္မာနံ နတ္ထိ ကောစိ ပါဋိဘောဂေါ သမဏော ဝါ ဗြာဟ္မဏော ဝါ ဒေဝေါ ဝါ မာရော ဝါ ဗြဟ္မာ ဝါ ကောစိ ဝါ လောကသ္မိံ! ကတမေသံ စတုန္နံ? ဇရာဓမ္မော ‘‘မာ ဇီရီ’’တိ နတ္ထိ ကောစိ ပါဋိဘောဂေါ ¶ သမဏော ဝါ ဗြာဟ္မဏော ဝါ ဒေဝေါ ဝါ မာရော ဝါ ဗြဟ္မာ ဝါ ကောစိ ဝါ လောကသ္မိံ။ ဗျာဓိဓမ္မော ‘‘မာ ဗျာဓိယီ’’တိ…ပေ… မရဏဓမ္မော ‘‘မာ မီယီ’’တိ…ပေ… ယာနိ ခေါ ပန တာနိ ပုဗ္ဗေ ကတာနိ ပါပကာနိ ကမ္မာနိ သံကိလေသိကာနိ ပေါနောဗ္ဘဝိကာနိ [ပေါနောဘဝိကာနိ (သီ။ ပီ။)] သဒရာနိ [နိဿာရာနိ (သီ။ ပီ။ က။)၊ ဒုက္ခုဒြယာနိ (သျာ။)] ဒုက္ခဝိပါကာနိ အာယတိံ ဇာတိဇရာမရဏိယာနိ တေသံ ဝိပါကော ‘‘မာ နိဗ္ဗတ္တီ’’တိ နတ္ထိ ကောစိ ပါဋိဘောဂေါ သမဏော ဝါ ဗြာဟ္မဏော ဝါ ဒေဝေါ ဝါ မာရော ဝါ ဗြဟ္မာ ဝါ ကောစိ ဝါ လောကသ္မိံ။ ဣမေသံ ခေါ၊ ဘိက္ခဝေ၊ စတုန္နံ ဓမ္မာနံ နတ္ထိ ကောစိ ပါဋိဘောဂေါ သမဏော ဝါ ဗြာဟ္မဏော ဝါ ဒေဝေါ ဝါ မာရော ဝါ ဗြဟ္မာ ဝါ ကောစိ ဝါ လောကသ္မိ’’န္တိ [အ။ နိ။ ၄။၁၈၂]။ အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘ဣဒ္ဓိဗလေန သမန္နာဂတော ကပ္ပံ တိဋ္ဌေယျာ’’တိ။

၆၂၅။ စိတ္တသန္တတိ ¶ သမာဓီတိ? အာမန္တာ။ အတီတာ စိတ္တသန္တတိ သမာဓီတိ? န ဟေဝံ ဝတ္တဗ္ဗေ ¶ …ပေ… စိတ္တသန္တတိ သမာဓီတိ? အာမန္တာ။ အနာဂတာ စိတ္တသန္တတိ သမာဓီတိ? န ဟေဝံ ဝတ္တဗ္ဗေ…ပေ… စိတ္တသန္တတိ သမာဓီတိ? အာမန္တာ။ နနု အတီတံ နိရုဒ္ဓံ အနာဂတံ အဇာတန္တိ? အာမန္တာ။ ဟဉ္စိ အတီတံ နိရုဒ္ဓံ အနာဂတံ အဇာတံ၊ နော စ ဝတ ရေ ဝတ္တဗ္ဗေ – ‘‘စိတ္တသန္တတိ သမာဓီ’’တိ။

၆၂၆။ ဧကစိတ္တက္ခဏိကော ¶ သမာဓီတိ? အာမန္တာ။ စက္ခုဝိညာဏသမင်္ဂီ သမာပန္နောတိ? န ဟေဝံ ဝတ္တဗ္ဗေ…ပေ… သောတဝိညာဏသမင်္ဂီ…ပေ… ဃာနဝိညာဏသမင်္ဂီ… ဇိဝှာဝိညာဏသမင်္ဂီ… ကာယဝိညာဏသမင်္ဂီ…ပေ… အကုသလစိတ္တသမင်္ဂီ ¶ …ပေ… ရာဂသဟဂတစိတ္တသမင်္ဂီ…ပေ… ဒေါသသဟဂတစိတ္တသမင်္ဂီ…ပေ… မောဟသဟဂတစိတ္တသမင်္ဂီ…ပေ… အနောတ္တပ္ပသဟဂတစိတ္တသမင်္ဂီ သမာပန္နောတိ? န ဟေဝံ ဝတ္တဗ္ဗေ…ပေ…။

စိတ္တသန္တတိ သမာဓီတိ? အာမန္တာ။ အကုသလစိတ္တသန္တတိ သမာဓီတိ? န ဟေဝံ ဝတ္တဗ္ဗေ…ပေ… ရာဂသဟဂတာ…ပေ… ဒေါသသဟဂတာ…ပေ… မောဟသဟဂတာ…ပေ… အနောတ္တပ္ပသဟဂတာ စိတ္တသန္တတိ သမာဓီတိ? န ဟေဝံ ဝတ္တဗ္ဗေ…ပေ…။

န ဝတ္တဗ္ဗံ – ‘‘စိတ္တသန္တတိ သမာဓီ’’တိ? အာမန္တာ။ နနု ဝုတ္တံ ¶ ဘဂဝတာ – ‘‘အဟံ ခေါ၊ အာဝုသော နိဂဏ္ဌာ၊ ပဟောမိ အနိဉ္ဇမာနော ကာယေန၊ အဘာသမာနော ဝါစံ၊ သတ္တ ရတ္တိန္ဒိဝါနိ [ရတ္တိဒိဝါနိ (က။)] ဧကန္တသုခံ ပဋိသံဝေဒီ ဝိဟရိတု’’န္တိ [မ။ နိ။ ၁။၁၈၀]! အတ္ထေဝ သုတ္တန္တောတိ? အာမန္တာ။ တေန ဟိ စိတ္တသန္တတိ သမာဓီတိ။

၆၂၇။ ဓမ္မဋ္ဌိတတာ ပရိနိပ္ဖန္နာတိ? အာမန္တာ။ တာယ ဌိတတာ ပရိနိပ္ဖန္နာတိ? န ဟေဝံ ဝတ္တဗ္ဗေ…ပေ… တာယ ဌိတတာ ပရိနိပ္ဖန္နာတိ? အာမန္တာ။ တာယ တာယေဝ နတ္ထိ ဒုက္ခဿန္တကိရိယာ ¶ ၊ နတ္ထိ ဝဋ္ဋုပစ္ဆေဒေါ၊ နတ္ထိ အနုပါဒါပရိနိဗ္ဗာနန္တိ? န ဟေဝံ ဝတ္တဗ္ဗေ…ပေ…။

ရူပဿ ¶ ဌိတတာ ပရိနိပ္ဖန္နာတိ? အာမန္တာ။ တာယ ဌိတတာ ပရိနိပ္ဖန္နာတိ? န ဟေဝံ ဝတ္တဗ္ဗေ…ပေ… တာယ ဌိတတာ ပရိနိပ္ဖန္နာတိ? အာမန္တာ။ တာယ တာယေဝ နတ္ထိ ဒုက္ခဿန္တကိရိယာ၊ နတ္ထိ ဝဋ္ဋုပစ္ဆေဒေါ၊ နတ္ထိ အနုပါဒါပရိနိဗ္ဗာနန္တိ? န ဟေဝံ ဝတ္တဗ္ဗေ…ပေ…။

ဝေဒနာယ ¶ ဌိတတာ…ပေ… သညာယ ဌိတတာ…ပေ… သင်္ခါရာနံ ဌိတတာ…ပေ… ဝိညာဏဿ ဌိတတာ ပရိနိပ္ဖန္နာတိ? အာမန္တာ။ တာယ ဌိတတာ ပရိနိပ္ဖန္နာတိ? န ဟေဝံ ဝတ္တဗ္ဗေ…ပေ… တာယ ဌိတတာ ပရိနိပ္ဖန္နာတိ? အာမန္တာ။ တာယ ¶ တာယေဝ နတ္ထိ ဒုက္ခဿန္တကိရိယာ၊ နတ္ထိ ဝဋ္ဋုပစ္ဆေဒေါ၊ နတ္ထိ အနုပါဒါပရိနိဗ္ဗာနန္တိ? န ဟေဝံ ဝတ္တဗ္ဗေ…ပေ…။

၆၂၈။ အနိစ္စတာ ပရိနိပ္ဖန္နာတိ? အာမန္တာ။ တာယ အနိစ္စတာယ အနိစ္စတာ ပရိနိပ္ဖန္နာတိ? န ဟေဝံ ဝတ္တဗ္ဗေ…ပေ… တာယ အနိစ္စတာယ အနိစ္စတာ ပရိနိပ္ဖန္နာတိ? အာမန္တာ။ တာယ တာယေဝ နတ္ထိ ဒုက္ခဿန္တကိရိယာ၊ နတ္ထိ ဝဋ္ဋုပစ္ဆေဒေါ၊ နတ္ထိ အနုပါဒါပရိနိဗ္ဗာနန္တိ? န ဟေဝံ ဝတ္တဗ္ဗေ။

ဇရာ ပရိနိပ္ဖန္နာတိ? အာမန္တာ။ တာယ ဇရာယ ဇရာ ပရိနိပ္ဖန္နာတိ? န ¶ ဟေဝံ ဝတ္တဗ္ဗေ…ပေ… တာယ ဇရာယ ဇရာ ပရိနိပ္ဖန္နာတိ? အာမန္တာ။ တာယ တာယေဝ နတ္ထိ ဒုက္ခဿန္တကိရိယာ ¶ ၊ နတ္ထိ ဝဋ္ဋုပစ္ဆေဒေါ၊ နတ္ထိ အနုပါဒါပရိနိဗ္ဗာနန္တိ? န ဟေဝံ ဝတ္တဗ္ဗေ…ပေ…။

မရဏံ ပရိနိပ္ဖန္နန္တိ? အာမန္တာ။ တဿ မရဏဿ မရဏံ ပရိနိပ္ဖန္နန္တိ? န ဟေဝံ ဝတ္တဗ္ဗေ။ တဿ မရဏဿ မရဏံ ပရိနိပ္ဖန္နန္တိ? အာမန္တာ။ တဿ တဿေဝ နတ္ထိ ဒုက္ခဿန္တကိရိယာ၊ နတ္ထိ ဝဋ္ဋုပစ္ဆေဒေါ၊ နတ္ထိ အနုပါဒါပရိနိဗ္ဗာနန္တိ? န ¶ ဟေဝံ ဝတ္တဗ္ဗေ…ပေ…။

၆၂၉။ ရူပံ ပရိနိပ္ဖန္နံ၊ ရူပဿ အနိစ္စတာ အတ္ထီတိ? အာမန္တာ။ အနိစ္စတာ ပရိနိပ္ဖန္နာ၊ အနိစ္စတာယ အနိစ္စတာ အတ္ထီတိ? န ဟေဝံ ဝတ္တဗ္ဗေ…ပေ… ရူပံ ပရိနိပ္ဖန္နံ၊ ရူပဿ ဇရာ အတ္ထီတိ? အာမန္တာ။ ဇရာ ပရိနိပ္ဖန္နာ၊ ဇရာယ ဇရာ အတ္ထီတိ? န ဟေဝံ ဝတ္တဗ္ဗေ…ပေ…။

ရူပံ ပရိနိပ္ဖန္နံ၊ ရူပဿ ဘေဒေါ အတ္ထိ၊ အန္တရဓာနံ အတ္ထီတိ? အာမန္တာ။ မရဏံ ပရိနိပ္ဖန္နံ၊ မရဏဿ ဘေဒေါ အတ္ထိ၊ အန္တရဓာနံ အတ္ထီတိ? န ဟေဝံ ဝတ္တဗ္ဗေ…ပေ…။

ဝေဒနာ ¶ …ပေ… သညာ… သင်္ခါရာ…ပေ… ဝိညာဏံ ပရိနိပ္ဖန္နံ၊ ဝိညာဏဿ အနိစ္စတာ အတ္ထီတိ? အာမန္တာ။ အနိစ္စတာ ပရိနိပ္ဖန္နာ၊ အနိစ္စတာယ အနိစ္စတာ အတ္ထီတိ? န ဟေဝံ ဝတ္တဗ္ဗေ …ပေ… ဝိညာဏံ ပရိနိပ္ဖန္နံ၊ ဝိညာဏဿ ဇရာ အတ္ထီတိ? အာမန္တာ။ ဇရာ ပရိနိပ္ဖန္နာ၊ ဇရာယ ဇရာ အတ္ထီတိ? န ဟေဝံ ဝတ္တဗ္ဗေ…ပေ…။

ဝိညာဏံ ¶ ပရိနိပ္ဖန္နံ၊ ဝိညာဏဿ ဘေဒေါ အတ္ထိ၊ အန္တရဓာနံ အတ္ထီတိ? အာမန္တာ။ မရဏံ ပရိနိပ္ဖန္နံ၊ မရဏဿ ဘေဒေါ အတ္ထိ၊ အန္တရဓာနံ အတ္ထီတိ? န ဟေဝံ ဝတ္တဗ္ဗေ…ပေ…။

အနုသယာ ¶ အဗျာကတာ၊ အဟေတုကာ၊ စိတ္တဝိပ္ပယုတ္တာ၊ အညာဏေ ¶ ဝိဂတေ ဉာဏီ၊ ဉာဏံ စိတ္တဝိပ္ပယုတ္တံ၊ ယတ္ထ သဒ္ဒေ [ယတ္ထ သဒ္ဒေါ (သီ။)၊ ယထာသဒ္ဒံ (?)] ဉာဏံ ပဝတ္တတိ၊ ဣဒ္ဓိဗလေန သမန္နာဂတော ကပ္ပံ တိဋ္ဌေယျ၊ စိတ္တသန္တတိ သမာဓိ၊ ဓမ္မဋ္ဌိတတာ၊ အနိစ္စတာတိ။