မူလ > အဘိဓမ္မပိဋက > ကထာဝတ္ထုပါဠိ

၈၀၂။ န ¶ ဝတ္တဗ္ဗံ – ‘‘ဗုဒ္ဓါ ဘဂဝါ မနုဿလောကေ အဋ္ဌာသီ’’တိ? အာမန္တာ။ နနု အတ္ထိ ဗုဒ္ဓဝုတ္ထာနိ စေတိယာနိ အာရာမဝိဟာရဂါမနိဂမနဂရာနိ ရဋ္ဌာနိ ဇနပဒါနီတိ? အာမန္တာ။ ဟဉ္စိ အတ္ထိ ဗုဒ္ဓဝုတ္ထာနိ စေတိယာနိ အာရာမဝိဟာရဂါမနိဂမနဂရာနိ ရဋ္ဌာနိ ဇနပဒါနိ၊ တေန ဝတ ရေ ဝတ္တဗ္ဗေ – ‘‘ဗုဒ္ဓါ ဘဂဝါ မနုဿလောကေ အဋ္ဌာသီ’’တိ။

န ဝတ္တဗ္ဗံ – ‘‘ဗုဒ္ဓါ ဘဂဝါ မနုဿလောကေ အဋ္ဌာသီ’’တိ? အာမန္တာ။ နနု ဘဂဝါ လုမ္ဗိနိယာ ဇာတော၊ ဗောဓိယာ မူလေ အဘိသမ္ဗုဒ္ဓါ၊ ဗာရာဏသိယံ ဘဂဝတာ ဓမ္မစက္ကံ ပဝတ္တိတံ၊ စာပါလေ ¶ စေတိယေ အာယုသင်္ခါရော ဩဿဋ္ဌော၊ ကုသိနာရာယံ ဘဂဝါ ပရိနိဗ္ဗုတောတိ? အာမန္တာ။ ဟဉ္စိ ¶ ဘဂဝါ လုမ္ဗိနိယာ ဇာတော…ပေ… ကုသိနာရာယံ ဘဂဝါ ပရိနိဗ္ဗုတော၊ တေန ဝတ ရေ ဝတ္တဗ္ဗေ – ‘‘ဗုဒ္ဓါ ဘဂဝါ မနုဿလောကေ အဋ္ဌာသီ’’တိ။

န ဝတ္တဗ္ဗံ – ‘‘ဗုဒ္ဓါ ဘဂဝါ မနုဿလောကေ အဋ္ဌာသီ’’တိ? အာမန္တာ။ နနု ဝုတ္တံ ဘဂဝတာ – ‘‘ဧကမိဒါဟံ၊ ဘိက္ခဝေ၊ သမယံ ဥက္ကဋ္ဌာယံ ဝိဟရာမိ သုဘဂဝနေ သာလရာဇမူလေ’’တိ ¶ [ဒီ။ နိ။ ၂။၉၁]၊ ‘‘ဧကမိဒါဟံ၊ ဘိက္ခဝေ၊ သမယံ ဥရုဝေလာယံ ဝိဟရာမိ အဇပါလနိဂြောဓေ ပဌမာဘိသမ္ဗုဒ္ဓါ’’တိ [အ။ နိ။ ၄။၂၁]၊ ‘‘ဧကမိဒါဟံ၊ ဘိက္ခဝေ၊ သမယံ ရာဇဂဟေ ဝိဟရာမိ ဝေဠုဝနေ ကဠန္ဒကနိဝါပေ’’တိ [ဒီ။ နိ။ ၂။၁၈၀]၊ ‘‘ဧကမိဒါဟံ၊ ဘိက္ခဝေ၊ သမယံ သာဝတ္ထိယံ ဝိဟရာမိ ဇေတဝနေ အနာထပိဏ္ဍိကဿ အာရာမေ’’တိ ¶ ၊ ‘‘ဧကမိဒါဟံ၊ ဘိက္ခဝေ၊ သမယံ ဝေသာလိယံ ဝိဟရာမိ မဟာဝနေ ကူဋာဂါရသာလာယ’’န္တိ [ဒီ။ နိ။ ၃။၁၁]! အတ္ထေဝ သုတ္တန္တောတိ? အာမန္တာ။ တေန ဟိ ဗုဒ္ဓါ ဘဂဝါ မနုဿလောကေ အဋ္ဌာသီတိ။

၈၀၃။ ဗုဒ္ဓါ ဘဂဝါ မနုဿလောကေ အဋ္ဌာသီတိ? အာမန္တာ။ နနု ဘဂဝါ လောကေ ဇာတော၊ လောကေ သံဝဍ္ဎော၊ လောကံ အဘိဘုယျ ဝိဟရတိ အနုပလိတ္တော လောကေနာတိ [အ။ နိ။ ၄။၃၆]? အာမန္တာ။ ဟဉ္စိ ဘဂဝါ လောကေ ဇာတော၊ လောကေ သံဝဍ္ဎော၊ လောကံ အဘိဘုယျ ဝိဟရတိ အနုပလိတ္တော လောကေန၊ နော စ ဝတ ရေ ဝတ္တဗ္ဗေ – ‘‘ဗုဒ္ဓါ ဘဂဝါ မနုဿလောကေ အဋ္ဌာသီ’’တိ။

၈၀၄။ န ဝတ္တဗ္ဗံ – ‘‘ဗုဒ္ဓေန ဘဂဝတာ ဓမ္မော ဒေသိတော’’တိ? အာမန္တာ။ ကေန ဒေသိတောတိ? အဘိနိမ္မိတေန ဒေသိတောတိ။ အဘိနိမ္မိတော ဇိနော သတ္ထာ သမ္မာသမ္ဗုဒ္ဓါ သဗ္ဗညူ သဗ္ဗဒဿာဝီ ဓမ္မဿာမီ ဓမ္မပ္ပဋိသရဏောတိ? န ဟေဝံ ဝတ္တဗ္ဗေ…ပေ…။

န ¶ ဝတ္တဗ္ဗံ – ‘‘ဗုဒ္ဓေန ဘဂဝတာ ဓမ္မော ဒေသိတော’’တိ? အာမန္တာ။ ကေန ဒေသိတောတိ? အာယသ္မတာ အာနန္ဒေန ဒေသိတောတိ။ အာယသ္မာ အာနန္ဒော ဇိနော သတ္ထာ သမ္မာသမ္ဗုဒ္ဓါ သဗ္ဗညူ သဗ္ဗဒဿာဝီ ဓမ္မဿာမီ ဓမ္မပ္ပဋိသရဏောတိ? န ဟေဝံ ဝတ္တဗ္ဗေ…ပေ…။

၈၀၅။ န ဝတ္တဗ္ဗံ – ‘‘ဗုဒ္ဓေန ဘဂဝတာ ဓမ္မော ဒေသိတော’’တိ? အာမန္တာ။ နနု ¶ ဝုတ္တံ ဘဂဝတာ – ‘‘သံခိတ္တေနပိ ခေါ အဟံ၊ သာရိပုတ္တ၊ ဓမ္မံ ဒေသေယျံ၊ ဝိတ္ထာရေနပိ ¶ ခေါ အဟံ၊ သာရိပုတ္တ၊ ဓမ္မံ ဒေသေယျံ၊ သံခိတ္တဝိတ္ထာရေနပိ ခေါ အဟံ၊ သာရိပုတ္တ၊ ဓမ္မံ ဒေသေယျံ၊ အညာတာရော စ ဒုလ္လဘာ’’တိ [အ။ နိ။ ၃။၃၃ သာရိပုတ္တသုတ္တေ]! အတ္ထေဝ သုတ္တန္တောတိ? အာမန္တာ။ တေန ဟိ ဗုဒ္ဓေန ဘဂဝတာ ဓမ္မော ဒေသိတောတိ။

၈၀၆။ န ဝတ္တဗ္ဗံ – ‘‘ဗုဒ္ဓေန ဘဂဝတာ ဓမ္မော ဒေသိတော’’တိ? အာမန္တာ။ နနု ဝုတ္တံ ဘဂဝတာ – ‘‘‘အဘိညာယာဟံ၊ ဘိက္ခဝေ၊ ဓမ္မံ ဒေသေမိ၊ နော အနဘိညာယ၊ သနိဒါနာဟံ၊ ဘိက္ခဝေ၊ ဓမ္မံ ဒေသေမိ၊ နော အနိဒါနံ ¶ ၊ သပ္ပာဋိဟာရိယာဟံ၊ ဘိက္ခဝေ၊ ဓမ္မံ ဒေသေမိ၊ နော အပ္ပာဋိဟာရိယံ၊ တဿ [ယဉ္စဿ (သီ။ ပီ။ က။)] မယှံ၊ ဘိက္ခဝေ၊ အဘိညာယ ဓမ္မံ ဒေသယတော နော အနဘိညာယ၊ သနိဒါနံ ဓမ္မံ ဒေသယတော နော အနိဒါနံ၊ သပ္ပာဋိဟာရိယံ ဓမ္မံ ဒေသယတော နော အပ္ပာဋိဟာရိယံ ကရဏီယော ဩဝါဒေါ ကရဏီယာ အနုသာသနီ၊ အလဉ္စ ပန ဝေါ၊ ဘိက္ခဝေ၊ တုဋ္ဌိယာ အလံ အတ္တမနတာယ အလံ သောမနဿာယ – သမ္မာသမ္ဗုဒ္ဓါ ဘဂဝါ၊ သွာက္ခာတော ဓမ္မော၊ သုပ္ပဋိပန္နော သင်္ဃော’တိ။ ဣမသ္မိဉ္စ ပန ဝေယျာကရဏသ္မိံ ဘညမာနေ ဒသသဟဿိလောကဓာတု အကမ္ပိတ္ထာ’’တိ [အ။ နိ။ ၃။၁၂၆]! အတ္ထေဝ သုတ္တန္တောတိ? အာမန္တာ။ တေန ဟိ ဗုဒ္ဓေန ဘဂဝတာ ဓမ္မော ဒေသိတောတိ။

၈၀၇။ နတ္ထိ ဗုဒ္ဓဿ ဘဂဝတော ကရုဏာတိ? အာမန္တာ။ နတ္ထိ ဗုဒ္ဓဿ ဘဂဝတော မေတ္တာတိ ¶ ? န ¶ ဟေဝံ ဝတ္တဗ္ဗေ…ပေ… နတ္ထိ ဗုဒ္ဓဿ ဘဂဝတော ကရုဏာတိ? အာမန္တာ။ နတ္ထိ ဗုဒ္ဓဿ ဘဂဝတော မုဒိတာ…ပေ… ဥပေက္ခာတိ? န ဟေဝံ ဝတ္တဗ္ဗေ…ပေ…။

အတ္ထိ ဗုဒ္ဓဿ ဘဂဝတော မေတ္တာတိ? အာမန္တာ။ အတ္ထိ ဗုဒ္ဓဿ ဘဂဝတော ကရုဏာတိ? န ဟေဝံ ဝတ္တဗ္ဗေ…ပေ… အတ္ထိ ဗုဒ္ဓဿ ¶ ဘဂဝတော မုဒိတာ…ပေ… ဥပေက္ခာတိ? အာမန္တာ။ အတ္ထိ ဗုဒ္ဓဿ ဘဂဝတော ကရုဏာတိ? န ဟေဝံ ဝတ္တဗ္ဗေ…ပေ…။

နတ္ထိ ¶ ဗုဒ္ဓဿ ဘဂဝတော ကရုဏာတိ? အာမန္တာ။ ဘဂဝါ အကာရုဏိကောတိ? န ဟေဝံ ဝတ္တဗ္ဗေ…ပေ… နနု ဘဂဝါ ကာရုဏိကော လောကဟိတော လောကာနုကမ္ပကော လောကတ္ထစရောတိ? အာမန္တာ။ ဟဉ္စိ ဘဂဝါ ကာရုဏိကော လောကဟိတော လောကာနုကမ္ပကော လောကတ္ထစရော၊ နော စ ဝတ ရေ ဝတ္တဗ္ဗေ – ‘‘နတ္ထိ ဗုဒ္ဓဿ ဘဂဝတော ကရုဏာ’’တိ…ပေ…။

နတ္ထိ ဗုဒ္ဓဿ ဘဂဝတော ကရုဏာတိ? အာမန္တာ။ နနု ဘဂဝါ မဟာကရုဏာသမာပတ္တိံ သမာပဇ္ဇီတိ? အာမန္တာ။ ဟဉ္စိ ဘဂဝါ မဟာကရုဏာသမာပတ္တိံ သမာပဇ္ဇိ၊ နော စ ဝတ ရေ ဝတ္တဗ္ဗေ – ‘‘နတ္ထိ ဗုဒ္ဓဿ ဘဂဝတော ကရုဏာ’’တိ။

၈၀၈။ အတ္ထိ ဗုဒ္ဓဿ ဘဂဝတော ကရုဏာတိ? အာမန္တာ။ ဘဂဝါ သရာဂေါတိ? န ဟေဝံ ဝတ္တဗ္ဗေ။ တေန ဟိ နတ္ထိ ဗုဒ္ဓဿ ဘဂဝတော ကရုဏာတိ။

၈၀၉။ ဗုဒ္ဓဿ ¶ ဘဂဝတော ဥစ္စာရပဿာဝေါ အတိဝိယ အညေ ဂန္ဓဇာတေ အဓိဂ္ဂဏှာတီတိ ¶ ? အာမန္တာ။ ဘဂဝါ ဂန္ဓဘောဇီတိ? န ¶ ဟေဝံ ဝတ္တဗ္ဗေ…ပေ… နနု ဘဂဝါ ဩဒနကုမ္မာသံ ဘုဉ္ဇတီတိ? အာမန္တာ။ ဟဉ္စိ ဘဂဝါ ဩဒနကုမ္မာသံ ဘုဉ္ဇတိ၊ နော စ ဝတ ရေ ဝတ္တဗ္ဗေ – ‘‘ဗုဒ္ဓဿ ဘဂဝတော ဥစ္စာရပဿာဝေါ အတိဝိယ အညေ ဂန္ဓဇာတေ အဓိဂ္ဂဏှာတီ’’တိ။

ဗုဒ္ဓဿ ဘဂဝတော ဥစ္စာရပဿာဝေါ အတိဝိယ အညေ ဂန္ဓဇာတေ အဓိဂ္ဂဏှာတီတိ? အာမန္တာ။ အတ္ထိ ကေစိ ဗုဒ္ဓဿ ဘဂဝတော ဥစ္စာရပဿာဝံ နှာယန္တိ ဝိလိမ္ပန္တိ ဥစ္ဆာဒေန္တိ [ဥစ္စာရေန္တိ (သီ။ ပီ။ က။)] ပေဠာယ ပဋိသာမေန္တိ ကရဏ္ဍာယ နိက္ခိပန္တိ အာပဏေ ပသာရေန္တိ၊ တေန စ ဂန္ဓေန ဂန္ဓကရဏီယံ ကရောန္တီတိ? န ဟေဝံ ဝတ္တဗ္ဗေ…ပေ…။

၈၁၀။ ဧကေန ¶ အရိယမဂ္ဂေန စတ္တာရိ သာမညဖလာနိ သစ္ဆိကရောတီတိ? အာမန္တာ။ စတုန္နံ ဖဿာနံ…ပေ… စတုန္နံ သညာနံ သမောဓာနံ ဟောတီတိ? န ဟေဝံ ဝတ္တဗ္ဗေ…ပေ… ဧကေန အရိယမဂ္ဂေန စတ္တာရိ သာမညဖလာနိ သစ္ဆိကရောတီတိ? အာမန္တာ။ သောတာပတ္တိမဂ္ဂေနာတိ ¶ ? န ဟေဝံ ဝတ္တဗ္ဗေ…ပေ… သကဒါဂါမိ…ပေ… အနာဂါမိမဂ္ဂေနာတိ? န ဟေဝံ ဝတ္တဗ္ဗေ…ပေ…။

ကတမေန မဂ္ဂေနာတိ? အရဟတ္တမဂ္ဂေနာတိ။ အရဟတ္တမဂ္ဂေန သက္ကာယဒိဋ္ဌိံ ဝိစိကိစ္ဆံ သီလဗ္ဗတပရာမာသံ ¶ ဇဟတီတိ? န ဟေဝံ ဝတ္တဗ္ဗေ…ပေ… အရဟတ္တမဂ္ဂေန သက္ကာယဒိဋ္ဌိံ ဝိစိကိစ္ဆံ သီလဗ္ဗတပရာမာသံ ဇဟတီတိ? အာမန္တာ။ နနု တိဏ္ဏံ သံယောဇနာနံ ပဟာနံ သောတာပတ္တိဖလံ ဝုတ္တံ ဘဂဝတာတိ? အာမန္တာ။ ဟဉ္စိ တိဏ္ဏံ သံယောဇနာနံ ပဟာနံ သောတာပတ္တိဖလံ ဝုတ္တံ ¶ ဘဂဝတာ၊ နော စ ဝတ ရေ ဝတ္တဗ္ဗေ – ‘‘အရဟတ္တမဂ္ဂေန သက္ကာယဒိဋ္ဌိံ ဝိစိကိစ္ဆံ သီလဗ္ဗတပရာမာသံ ဇဟတီ’’တိ။

အရဟတ္တမဂ္ဂေန ဩဠာရိကံ ကာမရာဂံ ဩဠာရိကံ ဗျာပါဒံ ဇဟတီတိ? န ဟေဝံ ဝတ္တဗ္ဗေ…ပေ… အရဟတ္တမဂ္ဂေန ဩဠာရိကံ ကာမရာဂံ ဩဠာရိကံ ဗျာပါဒံ ဇဟတီတိ? အာမန္တာ။ နနု ကာမရာဂဗျာပါဒါနံ တနုဘာဝံ သကဒါဂါမိဖလံ ဝုတ္တံ ဘဂဝတာတိ? အာမန္တာ။ ဟဉ္စိ ကာမရာဂဗျာပါဒါနံ တနုဘာဝံ သကဒါဂါမိဖလံ ဝုတ္တံ ဘဂဝတာ၊ နော စ ဝတ ရေ ဝတ္တဗ္ဗေ – ‘‘အရဟတ္တမဂ္ဂေန ဩဠာရိကံ ကာမရာဂံ ဩဠာရိကံ ဗျာပါဒံ ဇဟတီ’’တိ။

အရဟတ္တမဂ္ဂေန အဏုသဟဂတံ ကာမရာဂံ အဏုသဟဂတံ ဗျာပါဒံ ဇဟတီတိ? န ဟေဝံ ဝတ္တဗ္ဗေ…ပေ… အရဟတ္တမဂ္ဂေန အဏုသဟဂတံ ကာမရာဂံ အဏုသဟဂတံ ဗျာပါဒံ ဇဟတီတိ? အာမန္တာ ¶ ။ နနု ကာမရာဂဗျာပါဒါနံ အနဝသေသပ္ပဟာနံ အနာဂါမိဖလံ ဝုတ္တံ ဘဂဝတာတိ? အာမန္တာ။ ဟဉ္စိ ကာမရာဂဗျာပါဒါနံ အနဝသေသပ္ပဟာနံ အနာဂါမိဖလံ ဝုတ္တံ ဘဂဝတာ၊ နော စ ဝတ ရေ ဝတ္တဗ္ဗေ – ‘‘အရဟတ္တမဂ္ဂေန အဏုသဟဂတံ ကာမရာဂံ အဏုသဟဂတံ ဗျာပါဒံ ဇဟတီ’’တိ။

၈၁၁။ န ဝတ္တဗ္ဗံ – ‘‘ဧကေန အရိယမဂ္ဂေန စတ္တာရိ သာမညဖလာနိ သစ္ဆိကရောတီ’’တိ? အာမန္တာ။ ဘဂဝတာ သောတာပတ္တိမဂ္ဂေါ ဘာဝိတောတိ? အာမန္တာ ¶ ¶ ။ ဘဂဝါ သောတာပန္နောတိ? န ဟေဝံ ဝတ္တဗ္ဗေ…ပေ… ဘဂဝတာ သကဒါဂါမိ…ပေ… အနာဂါမိမဂ္ဂေါ ဘာဝိတောတိ? အာမန္တာ။ ဘဂဝါ အနာဂါမီတိ? န ဟေဝံ ဝတ္တဗ္ဗေ…ပေ…။

၈၁၂။ ဘဂဝါ ဧကေန အရိယမဂ္ဂေန စတ္တာရိ သာမညဖလာနိ သစ္ဆိကရောတိ၊ သာဝကာ စတူဟိ အရိယမဂ္ဂေဟိ စတ္တာရိ သာမညဖလာနိ သစ္ဆိကရောန္တီတိ? အာမန္တာ။ သာဝကာ ဗုဒ္ဓဿ ဘဂဝတော အဒိဋ္ဌံ ဒက္ခန္တိ အနဓိဂတံ အဓိဂစ္ဆန္တိ အသစ္ဆိကတံ သစ္ဆိကရောန္တီတိ? န ဟေဝံ ဝတ္တဗ္ဗေ…ပေ…။

၈၁၃။ ဈာနာ ¶ ဈာနံ သင်္ကမတီတိ? အာမန္တာ။ ပဌမာ ¶ ဈာနာ တတိယံ ဈာနံ သင်္ကမတီတိ? န ဟေဝံ ဝတ္တဗ္ဗေ…ပေ… ဈာနာ ဈာနံ သင်္ကမတီတိ? အာမန္တာ။ ဒုတိယာ ဈာနာ စတုတ္ထံ ဈာနံ သင်္ကမတီတိ? န ဟေဝံ ဝတ္တဗ္ဗေ…ပေ…။

ပဌမာ ဈာနာ ဒုတိယံ ဈာနံ သင်္ကမတီတိ? အာမန္တာ။ ယာ ပဌမဿ ဈာနဿ ဥပ္ပာဒါယ အာဝဋ္ဋနာ…ပေ… ပဏိဓိ၊ သာဝ ဒုတိယဿ ဈာနဿ ဥပ္ပာဒါယ အာဝဋ္ဋနာ…ပေ… ပဏိဓီတိ? န ဟေဝံ ဝတ္တဗ္ဗေ…ပေ…။

ပဌမာ ဈာနာ ဒုတိယံ ဈာနံ သင်္ကမတိ၊ န ဝတ္တဗ္ဗံ ¶ – ‘‘ယာ ပဌမဿ ဈာနဿ ဥပ္ပာဒါယ အာဝဋ္ဋနာ…ပေ… ပဏိဓိ၊ သာဝ ဒုတိယဿ ဈာနဿ ဥပ္ပာဒါယ အာဝဋ္ဋနာ…ပေ… ပဏိဓီ’’တိ? အာမန္တာ။ ဒုတိယံ ဈာနံ အနာဝဋ္ဋေန္တဿ ဥပ္ပဇ္ဇတိ…ပေ… အပ္ပဏိဒဟန္တဿ ဥပ္ပဇ္ဇတီတိ? န ဟေဝံ ဝတ္တဗ္ဗေ…ပေ… နနု ဒုတိယံ ဈာနံ အာဝဋ္ဋေန္တဿ ဥပ္ပဇ္ဇတိ…ပေ… ပဏိဒဟန္တဿ ဥပ္ပဇ္ဇတီတိ? အာမန္တာ။ ဟဉ္စိ ဒုတိယံ ဈာနံ အာဝဋ္ဋေန္တဿ ဥပ္ပဇ္ဇတိ…ပေ… ပဏိဒဟန္တဿ ဥပ္ပဇ္ဇတိ၊ နော စ ဝတ ရေ ဝတ္တဗ္ဗေ – ‘‘ပဌမာ ဈာနာ ဒုတိယံ ဈာနံ သင်္ကမတီ’’တိ…ပေ…။

ပဌမာ ဈာနာ ဒုတိယံ ဈာနံ သင်္ကမတီတိ? အာမန္တာ။ ပဌမံ ဈာနံ ကာမေ အာဒီနဝတော မနသိကရောတော ဥပ္ပဇ္ဇတီတိ? အာမန္တာ။ ဒုတိယံ ဈာနံ ကာမေ အာဒီနဝတော မနသိကရောတော ဥပ္ပဇ္ဇတီတိ? န ဟေဝံ ဝတ္တဗ္ဗေ…ပေ…။

ပဌမံ ¶ ဈာနံ သဝိတက္ကံ သဝိစာရန္တိ? အာမန္တာ ¶ ။ ဒုတိယံ ဈာနံ သဝိတက္ကံ သဝိစာရန္တိ? န ဟေဝံ ဝတ္တဗ္ဗေ…ပေ… ပဌမာ ဈာနာ ဒုတိယံ ဈာနံ သင်္ကမတီတိ? အာမန္တာ။ တညေဝ ပဌမံ ဈာနံ တံ ဒုတိယံ ဈာနန္တိ? န ဟေဝံ ဝတ္တဗ္ဗေ…ပေ…။

၈၁၄။ ဒုတိယာ ¶ ဈာနာ တတိယံ ဈာနံ သင်္ကမတီတိ? အာမန္တာ။ ယာ ဒုတိယဿ ဈာနဿ ဥပ္ပာဒါယ အာဝဋ္ဋနာ…ပေ… ပဏိဓိ၊ သာဝ တတိယဿ ဈာနဿ ဥပ္ပာဒါယ အာဝဋ္ဋနာ…ပေ… ပဏိဓီတိ? န ဟေဝံ ဝတ္တဗ္ဗေ…ပေ…။

ဒုတိယာ ဈာနာ တတိယံ ဈာနံ သင်္ကမတိ၊ န ဝတ္တဗ္ဗံ – ‘‘ယာ ဒုတိယဿ ဈာနဿ ဥပ္ပာဒါယ အာဝဋ္ဋနာ…ပေ… ပဏိဓိ၊ သာဝ တတိယဿ ဈာနဿ ဥပ္ပာဒါယ အာဝဋ္ဋနာ…ပေ… ပဏိဓီ’’တိ? အာမန္တာ ¶ ။ တတိယံ ဈာနံ အနာဝဋ္ဋေန္တဿ ဥပ္ပဇ္ဇတိ…ပေ… အပ္ပဏိဒဟန္တဿ ဥပ္ပဇ္ဇတီတိ? န ဟေဝံ ဝတ္တဗ္ဗေ …ပေ… နနု တတိယံ ဈာနံ အာဝဋ္ဋေန္တဿ ဥပ္ပဇ္ဇတိ…ပေ… ပဏိဒဟန္တဿ ဥပ္ပဇ္ဇတီတိ? အာမန္တာ။ ဟဉ္စိ တတိယံ ဈာနံ အာဝဋ္ဋေန္တဿ ဥပ္ပဇ္ဇတိ…ပေ… ပဏိဒဟန္တဿ ဥပ္ပဇ္ဇတိ၊ နော စ ဝတ ရေ ဝတ္တဗ္ဗေ – ‘‘ဒုတိယာ ဈာနာ တတိယံ ဈာနံ သင်္ကမတီ’’တိ။

ဒုတိယာ ဈာနာ တတိယံ ဈာနံ သင်္ကမတီတိ? အာမန္တာ။ ဒုတိယံ ဈာနံ ဝိတက္ကဝိစာရေ အာဒီနဝတော မနသိကရောတော ဥပ္ပဇ္ဇတီတိ? အာမန္တာ။ တတိယံ ဈာနံ ဝိတက္ကဝိစာရေ အာဒီနဝတော မနသိကရောတော ဥပ္ပဇ္ဇတီတိ? န ဟေဝံ ဝတ္တဗ္ဗေ…ပေ…။

ဒုတိယံ ဈာနံ သပ္ပီတိကန္တိ? အာမန္တာ။ တတိယံ ဈာနံ သပ္ပီတိကန္တိ? န ¶ ဟေဝံ ဝတ္တဗ္ဗေ…ပေ… ဒုတိယာ ဈာနာ တတိယံ ဈာနံ သင်္ကမတီတိ? အာမန္တာ။ တညေဝ ဒုတိယံ ဈာနံ တံ တတိယံ ဈာနန္တိ? န ဟေဝံ ဝတ္တဗ္ဗေ…ပေ…။

၈၁၅။ တတိယာ ဈာနာ စတုတ္ထံ ဈာနံ သင်္ကမတီတိ? အာမန္တာ။ ယာ တတိယဿ ဈာနဿ ဥပ္ပာဒါယ အာဝဋ္ဋနာ…ပေ… ပဏိဓိ၊ သာဝ စတုတ္ထဿ ဈာနဿ ဥပ္ပာဒါယ အာဝဋ္ဋနာ…ပေ… ပဏိဓီတိ? န ဟေဝံ ဝတ္တဗ္ဗေ…ပေ…။

တတိယာ ဈာနာ စတုတ္ထံ ဈာနံ သင်္ကမတိ၊ န ဝတ္တဗ္ဗံ – ‘‘ယာ တတိယဿ ဈာနဿ ဥပ္ပာဒါယ အာဝဋ္ဋနာ…ပေ… ပဏိဓိ၊ သာဝ စတုတ္ထဿ ဈာနဿ ဥပ္ပာဒါယ အာဝဋ္ဋနာ…ပေ… ပဏိဓီ’’တိ? အာမန္တာ။ စတုတ္ထံ ဈာနံ အနာဝဋ္ဋေန္တဿ ဥပ္ပဇ္ဇတိ…ပေ… အပ္ပဏိဒဟန္တဿ ¶ ဥပ္ပဇ္ဇတီတိ? န ဟေဝံ ဝတ္တဗ္ဗေ…ပေ… နနု စတုတ္ထံ ဈာနံ အာဝဋ္ဋေန္တဿ ဥပ္ပဇ္ဇတိ…ပေ… ပဏိဒဟန္တဿ ¶ ဥပ္ပဇ္ဇတီတိ? အာမန္တာ။ ဟဉ္စိ ¶ စတုတ္ထံ ဈာနံ အာဝဋ္ဋေန္တဿ ဥပ္ပဇ္ဇတိ…ပေ… ပဏိဒဟန္တဿ ဥပ္ပဇ္ဇတိ၊ နော စ ဝတ ရေ ဝတ္တဗ္ဗေ – ‘‘တတိယာ ဈာနာ စတုတ္ထံ ဈာနံ သင်္ကမတီ’’တိ။

တတိယာ ဈာနာ စတုတ္ထံ ဈာနံ သင်္ကမတီတိ? အာမန္တာ။ တတိယံ ဈာနံ ပီတိံ အာဒီနဝတော မနသိကရောတော ဥပ္ပဇ္ဇတီတိ? အာမန္တာ။ စတုတ္ထံ ဈာနံ ပီတိံ အာဒီနဝတော မနသိကရောတော ဥပ္ပဇ္ဇတီတိ? န ဟေဝံ ဝတ္တဗ္ဗေ…ပေ…။

တတိယံ ဈာနံ သုခသဟဂတန္တိ? အာမန္တာ။ စတုတ္ထံ ဈာနံ သုခသဟဂတန္တိ? န ¶ ဟေဝံ ဝတ္တဗ္ဗေ…ပေ… တတိယာ ဈာနာ စတုတ္ထံ ဈာနံ သင်္ကမတီတိ? အာမန္တာ။ တညေဝ တတိယံ ဈာနံ တံ စတုတ္ထံ ဈာနန္တိ? န ဟေဝံ ဝတ္တဗ္ဗေ…ပေ…။

၈၁၆။ န ဝတ္တဗ္ဗံ – ‘‘ဈာနာ ဈာနံ သင်္ကမတီ’’တိ? အာမန္တာ။ နနု ဝုတ္တံ ဘဂဝတာ – ‘‘ဣဓ၊ ဘိက္ခဝေ၊ ဘိက္ခု ဝိဝိစ္စေဝ ကာမေဟိ…ပေ… စတုတ္ထံ ဈာနံ ဥပသမ္ပဇ္ဇ ဝိဟရတီ’’တိ [အ။ နိ။ ၂။၁၃၊ ၄။၁၆၃]! အတ္ထေဝ သုတ္တန္တောတိ? အာမန္တာ။ တေန ဟိ ဈာနာ ဈာနံ သင်္ကမတီတိ။

၈၁၇။ အတ္ထိ ¶ ဈာနန္တရိကာတိ? အာမန္တာ။ အတ္ထိ ဖဿန္တရိကာ…ပေ… အတ္ထိ သညန္တရိကာတိ? န ဟေဝံ ဝတ္တဗ္ဗေ…ပေ…။

အတ္ထိ ဈာနန္တရိကာတိ? အာမန္တာ။ ဒုတိယဿ စ ဈာနဿ တတိယဿ စ ဈာနဿ အန္တရေ အတ္ထိ ဈာနန္တရိကာတိ? န ဟေဝံ ဝတ္တဗ္ဗေ…ပေ…။

အတ္ထိ ¶ ဈာနန္တရိကာတိ? အာမန္တာ။ တတိယဿ စ ဈာနဿ စတုတ္ထဿ စ ဈာနဿ အန္တရေ အတ္ထိ ဈာနန္တရိကာတိ? န ဟေဝံ ဝတ္တဗ္ဗေ…ပေ…။

ဒုတိယဿ စ ဈာနဿ တတိယဿ စ ဈာနဿ အန္တရေ နတ္ထိ ဈာနန္တရိကာတိ? အာမန္တာ။ ဟဉ္စိ ဒုတိယဿ စ ဈာနဿ တတိယဿ စ ဈာနဿ အန္တရေ နတ္ထိ ¶ ဈာနန္တရိကာ၊ နော စ ဝတ ရေ ဝတ္တဗ္ဗေ – ‘‘အတ္ထိ ဈာနန္တရိကာ’’တိ။

တတိယဿ ¶ စ ဈာနဿ စတုတ္ထဿ စ ဈာနဿ အန္တရေ နတ္ထိ ဈာနန္တရိကာတိ? အာမန္တာ။ ဟဉ္စိ တတိယဿ စ ဈာနဿ စတုတ္ထဿ စ ဈာနဿ အန္တရေ နတ္ထိ ဈာနန္တရိကာ၊ နော စ ဝတ ရေ ဝတ္တဗ္ဗေ – ‘‘အတ္ထိ ဈာနန္တရိကာ’’တိ။

၈၁၈။ ပဌမဿ စ ဈာနဿ ဒုတိယဿ စ ဈာနဿ အန္တရေ အတ္ထိ ဈာနန္တရိကာတိ? အာမန္တာ။ ဒုတိယဿ စ ဈာနဿ တတိယဿ စ ဈာနဿ အန္တရေ အတ္ထိ ဈာနန္တရိကာတိ? န ဟေဝံ ဝတ္တဗ္ဗေ…ပေ…။

ပဌမဿ စ ဈာနဿ ဒုတိယဿ စ ဈာနဿ အန္တရေ အတ္ထိ ဈာနန္တရိကာတိ? အာမန္တာ။ တတိယဿ စ ဈာနဿ စတုတ္ထဿ စ ဈာနဿ အန္တရေ ¶ အတ္ထိ ဈာနန္တရိကာတိ? န ဟေဝံ ဝတ္တဗ္ဗေ…ပေ…။

ဒုတိယဿ စ ဈာနဿ တတိယဿ စ ဈာနဿ အန္တရေ နတ္ထိ ဈာနန္တရိကာတိ? အာမန္တာ။ ပဌမဿ စ ဈာနဿ ဒုတိယဿ စ ဈာနဿ အန္တရေ နတ္ထိ ဈာနန္တရိကာတိ? န ဟေဝံ ဝတ္တဗ္ဗေ…ပေ…။

တတိယဿ စ ဈာနဿ စတုတ္ထဿ စ ဈာနဿ အန္တရေ နတ္ထိ ဈာနန္တရိကာတိ? အာမန္တာ။ ပဌမဿ စ ဈာနဿ ဒုတိယဿ စ ဈာနဿ အန္တရေ နတ္ထိ ဈာနန္တရိကာတိ? န ဟေဝံ ဝတ္တဗ္ဗေ…ပေ…။

၈၁၉။ အဝိတက္ကော ¶ ဝိစာရမတ္တော သမာဓိ ဈာနန္တရိကာတိ? အာမန္တာ။ သဝိတက္ကော သဝိစာရော သမာဓိ ဈာနန္တရိကာတိ? န ဟေဝံ ဝတ္တဗ္ဗေ…ပေ…။

အဝိတက္ကော ဝိစာရမတ္တော သမာဓိ ဈာနန္တရိကာတိ? အာမန္တာ။ အဝိတက္ကော ¶ အဝိစာရော သမာဓိ ဈာနန္တရိကာတိ? န ဟေဝံ ဝတ္တဗ္ဗေ…ပေ…။

သဝိတက္ကော သဝိစာရော သမာဓိ န ဈာနန္တရိကာတိ? အာမန္တာ။ အဝိတက္ကော ဝိစာရမတ္တော သမာဓိ န ဈာနန္တရိကာတိ? န ဟေဝံ ဝတ္တဗ္ဗေ…ပေ…။

အဝိတက္ကော အဝိစာရော သမာဓိ န ဈာနန္တရိကာတိ? အာမန္တာ။ အဝိတက္ကော ဝိစာရမတ္တော သမာဓိ န ဈာနန္တရိကာတိ? န ဟေဝံ ဝတ္တဗ္ဗေ…ပေ…။

၈၂၀။ ဒွိန္နံ ဈာနာနံ ပဋုပ္ပန္နာနမန္တရေ အဝိတက္ကော ဝိစာရမတ္တော သမာဓီတိ? အာမန္တာ။ နနု အဝိတက္ကေ ဝိစာရမတ္တေ သမာဓိမှိ ဝတ္တမာနေ ပဌမံ ဈာနံ နိရုဒ္ဓံ ဒုတိယံ ဈာနံ ပဋုပ္ပန္နန္တိ? အာမန္တာ။ ဟဉ္စိ အဝိတက္ကေ ဝိစာရမတ္တေ ¶ သမာဓိမှိ ဝတ္တမာနေ ပဌမံ ¶ ဈာနံ နိရုဒ္ဓံ ဒုတိယံ ဈာနံ ပဋုပ္ပန္နံ၊ နော စ ဝတ ရေ ဝတ္တဗ္ဗေ – ‘‘ဒွိန္နံ ဈာနာနံ ပဋုပ္ပန္နာနမန္တရေ အဝိတက္ကော ဝိစာရမတ္တော သမာဓိ ဈာနန္တရိကာတိ။

၈၂၁။ အဝိတက္ကော ဝိစာရမတ္တော သမာဓိ န ဈာနန္တရိကာတိ? အာမန္တာ။ အဝိတက္ကော ဝိစာရမတ္တော သမာဓိ ပဌမံ ဈာနံ…ပေ… ဒုတိယံ ဈာနံ…ပေ… တတိယံ ဈာနံ…ပေ… စတုတ္ထံ ဈာနန္တိ? န ဟေဝံ ဝတ္တဗ္ဗေ။ တေန ဟိ အဝိတက္ကော ဝိစာရမတ္တော သမာဓိ ဈာနန္တရိကာတိ။

၈၂၂။ အဝိတက္ကော ဝိစာရမတ္တော သမာဓိ ဈာနန္တရိကာတိ? အာမန္တာ။ နနု တယော သမာဓီ ဝုတ္တာ ဘဂဝတာ – သဝိတက္ကော သဝိစာရော သမာဓိ၊ အဝိတက္ကော ဝိစာရမတ္တော သမာဓိ၊ အဝိတက္ကော အဝိစာရော သမာဓီတိ [ဒီ။ နိ။ ၃။၃၀၅၊ ၃၅၃]? အာမန္တာ။ ဟဉ္စိ တယော သမာဓီ ဝုတ္တာ ဘဂဝတာ – သဝိတက္ကော…ပေ… အဝိစာရော သမာဓိ၊ နော စ ဝတ ရေ ဝတ္တဗ္ဗေ ¶ – ‘‘အဝိတက္ကော ဝိစာရမတ္တော သမာဓိ ဈာနန္တရိကာ’’တိ။

၈၂၃။ သမာပန္နော ¶ သဒ္ဒံ သုဏာတီတိ? အာမန္တာ။ သမာပန္နော စက္ခုနာ ရူပံ ပဿတိ…ပေ… သောတေန…ပေ… ဃာနေန…ပေ… ဇိဝှာယ…ပေ… ကာယေန ဖောဋ္ဌဗ္ဗံ ဖုသတီတိ? န ဟေဝံ ဝတ္တဗ္ဗေ…ပေ…။

သမာပန္နော ¶ သဒ္ဒံ သုဏာတီတိ? အာမန္တာ။ သောတဝိညာဏသမင်္ဂီ သမာပန္နောတိ? န ဟေဝံ ဝတ္တဗ္ဗေ။ နနု သမာဓိ မနောဝိညာဏသမင်္ဂိဿာတိ? အာမန္တာ။ ဟဉ္စိ သမာဓိ မနောဝိညာဏသမင်္ဂိဿ၊ နော စ ဝတ ရေ ဝတ္တဗ္ဗေ – ‘‘သမာပန္နော သဒ္ဒံ သုဏာတီ’’တိ။

သမာဓိ မနောဝိညာဏသမင်္ဂိဿ၊ သောတဝိညာဏသမင်္ဂီ သဒ္ဒံ သုဏာတီတိ? အာမန္တာ။ ဟဉ္စိ သမာဓိ မနောဝိညာဏသမင်္ဂိဿ၊ သောတဝိညာဏသမင်္ဂီ သဒ္ဒံ သုဏာတိ၊ နော စ ဝတ ရေ ဝတ္တဗ္ဗေ – ‘‘သမာပန္နော သဒ္ဒံ သုဏာတီ’’တိ ¶ ။ သမာဓိ မနောဝိညာဏသမင်္ဂိဿ၊ သောတဝိညာဏသမင်္ဂီ သဒ္ဒံ သုဏာတီတိ? အာမန္တာ။ ဒွိန္နံ ဖဿာနံ…ပေ… ဒွိန္နံ စိတ္တာနံ သမောဓာနံ ဟောတီတိ? န ဟေဝံ ဝတ္တဗ္ဗေ…ပေ…။

၈၂၄။ န ဝတ္တဗ္ဗံ – ‘‘သမာပန္နော သဒ္ဒံ သုဏာတီ’’တိ? အာမန္တာ။ နနု ပဌမဿ ဈာနဿ သဒ္ဒေါ ကဏ္ဋကော ဝုတ္တော ဘဂဝတာတိ? အာမန္တာ ¶ ။ ဟဉ္စိ ပဌမဿ ဈာနဿ သဒ္ဒေါ ကဏ္ဋကော ဝုတ္တော ဘဂဝတာ၊ တေန ဝတ ရေ ဝတ္တဗ္ဗေ – ‘‘သမာပန္နော သဒ္ဒံ သုဏာတီ’’တိ။

၈၂၅။ ပဌမဿ ဈာနဿ သဒ္ဒေါ ကဏ္ဋကော ဝုတ္တော ဘဂဝတာတိ၊ သမာပန္နော သဒ္ဒံ သုဏာတီတိ? အာမန္တာ။ ဒုတိယဿ ဈာနဿ ဝိတက္ကော ဝိစာရော ကဏ္ဋကော ဝုတ္တော ဘဂဝတာ၊ အတ္ထိ တဿ ဝိတက္ကဝိစာရာတိ? န ဟေဝံ ဝတ္တဗ္ဗေ…ပေ…။

ပဌမဿ ဈာနဿ သဒ္ဒေါ ကဏ္ဋကော ဝုတ္တော ဘဂဝတာတိ၊ သမာပန္နော သဒ္ဒံ သုဏာတီတိ? အာမန္တာ။ တတိယဿ ဈာနဿ ပီတိ ကဏ္ဋကော…ပေ… စတုတ္ထဿ ဈာနဿ အဿာသပဿာသော ကဏ္ဋကော ¶ … အာကာသာနဉ္စာယတနံ သမာပန္နဿ ¶ ရူပသညာ ကဏ္ဋကော… ဝိညာဏဉ္စာယတနံ သမာပန္နဿ အာကာသာနဉ္စာယတနသညာ ကဏ္ဋကော… အာကိဉ္စညာယတနံ သမာပန္နဿ ဝိညာဏဉ္စာယတနသညာ ကဏ္ဋကော… နေဝသညာနာသညာယတနံ သမာပန္နဿ အာကိဉ္စညာယတနသညာ ကဏ္ဋကော… သညာဝေဒယိတနိရောဓံ သမာပန္နဿ သညာ စ ဝေဒနာ စ ကဏ္ဋကော ဝုတ္တော ဘဂဝတာ၊ အတ္ထိ တဿ သညာ စ ဝေဒနာ စာတိ? န ဟေဝံ ဝတ္တဗ္ဗေ…ပေ…။

(၁၈၅) ၉။ စက္ခုနာ ရူပံ ပဿတီတိကထာ

၈၂၆။ စက္ခုနာ ရူပံ ပဿတီတိ? အာမန္တာ။ ရူပေန ရူပံ ပဿတီတိ? န ဟေဝံ ဝတ္တဗ္ဗေ…ပေ… ရူပေန ရူပံ ပဿတီတိ? အာမန္တာ။ ရူပေန ရူပံ ပဋိဝိဇာနာတီတိ? န ¶ ဟေဝံ ဝတ္တဗ္ဗေ…ပေ… ရူပေန ရူပံ ပဋိဝိဇာနာတီတိ? အာမန္တာ။ ရူပံ မနောဝိညာဏန္တိ ¶ ? န ဟေဝံ ဝတ္တဗ္ဗေ…ပေ… စက္ခုနာ ရူပံ ပဿတီတိ? အာမန္တာ။ အတ္ထိ စက္ခုဿ အာဝဋ္ဋနာ…ပေ… ပဏိဓီတိ? န ဟေဝံ ဝတ္တဗ္ဗေ…ပေ… နနု နတ္ထိ စက္ခုဿ အာဝဋ္ဋနာ…ပေ… ပဏိဓီတိ? အာမန္တာ။ ဟဉ္စိ နတ္ထိ စက္ခုဿ အာဝဋ္ဋနာ…ပေ… ပဏိဓိ၊ နော စ ဝတ ရေ ဝတ္တဗ္ဗေ – ‘‘စက္ခုနာ ရူပံ ပဿတီ’’တိ။

သောတေန သဒ္ဒံ သုဏာတီတိ…ပေ… ဃာနေန ဂန္ဓံ ဃာယတီတိ…ပေ… ဇိဝှာယ ရသံ သာယတီတိ…ပေ… ကာယေန ¶ ဖောဋ္ဌဗ္ဗံ ဖုသတီတိ? အာမန္တာ။ ရူပေန ရူပံ ဖုသတီတိ? န ဟေဝံ ဝတ္တဗ္ဗေ…ပေ…။

ရူပေန ရူပံ ဖုသတီတိ? အာမန္တာ။ ရူပေန ရူပံ ပဋိဝိဇာနာတီတိ? န ဟေဝံ ဝတ္တဗ္ဗေ…ပေ… ရူပေန ရူပံ ပဋိဝိဇာနာတီတိ? အာမန္တာ။ ရူပံ မနောဝိညာဏန္တိ? န ဟေဝံ ဝတ္တဗ္ဗေ ¶ …ပေ… ကာယေန ဖောဋ္ဌဗ္ဗံ ဖုသတီတိ? အာမန္တာ။ အတ္ထိ ကာယဿ အာဝဋ္ဋနာ…ပေ… ပဏိဓီတိ? န ဟေဝံ ဝတ္တဗ္ဗေ…ပေ… နနု နတ္ထိ ကာယဿ အာဝဋ္ဋနာ…ပေ… ပဏိဓီတိ? အာမန္တာ။ ဟဉ္စိ နတ္ထိ ကာယဿ အာဝဋ္ဋနာ…ပေ… ပဏိဓိ၊ နော စ ဝတ ရေ ဝတ္တဗ္ဗေ – ‘‘ကာယေန ဖောဋ္ဌဗ္ဗံ ဖုသတီ’’တိ…ပေ…။

၈၂၇။ န ဝတ္တဗ္ဗံ – ‘‘စက္ခုနာ ရူပံ ပဿတီ’’တိ…ပေ… ‘‘ကာယေန ဖောဋ္ဌဗ္ဗံ ဖုသတီ’’တိ? အာမန္တာ။ နနု ¶ ဝုတ္တံ ဘဂဝတာ – ‘‘ဣဓ၊ ဘိက္ခဝေ၊ ဘိက္ခု စက္ခုနာ ရူပံ ပဿတိ…ပေ… ကာယေန ဖောဋ္ဌဗ္ဗံ ဖုသတီ’’တိ [မ။ နိ။ ၁။၃၄၉၊ အ။ နိ။ ၄။၃၇ (အဋ္ဌကထာ ပဿိတဗ္ဗာ)]! အတ္ထေဝ သုတ္တန္တောတိ? အာမန္တာ။ တေန ဟိ စက္ခုနာ ရူပံ ပဿတိ…ပေ… ကာယေန ဖောဋ္ဌဗ္ဗံ ဖုသတီတိ။

စက္ခုနာ ရူပံ ပဿတီတိကထာ နိဋ္ဌိတာ။

ဗုဒ္ဓါ ဘဂဝါ မနုဿလောကေ အဋ္ဌာသိ၊ ဗုဒ္ဓေန ဘဂဝတာ ဓမ္မော ဒေသိတော၊ နတ္ထိ ဗုဒ္ဓဿ ဘဂဝတော ကရုဏာ၊ ဗုဒ္ဓဿ ဘဂဝတော ဥစ္စာရပဿာဝေါ အတိဝိယ ¶ အညေ ဂန္ဓဇာတေ အဓိဂ္ဂဏှာတိ၊ ဧကေန အရိယမဂ္ဂေန စတ္တာရိ သာမညဖလာနိ သစ္ဆိကရောတိ၊ ဈာနာ ဈာနံ သင်္ကမတိ၊ အတ္ထိ ဈာနန္တရိကာ၊ သမာပန္နော သဒ္ဒံ သုဏာတိ၊ စက္ခုနာ ရူပံ ပဿတိ ကာယေန ဖောဋ္ဌဗ္ဗံ ဖုသတိ။