မူလ > အဘိဓမ္မပိဋက > ပဋ္ဌာနပါဠိ-၂

သေက္ခံ ဓမ္မံ ပဋိစ္စ နေဝသေက္ခနာသေက္ခော [နေဝသေခါနာသေခေါ (သီ။)၊ နေဝသေက္ခာနာသေက္ခော (သျာ။ က။)] ဓမ္မော ဥပ္ပဇ္ဇတိ ဟေတုပစ္စယာ – သေက္ခေ ခန္ဓေ ပဋိစ္စ စိတ္တသမုဋ္ဌာနံ ရူပံ။ (၂)

သေက္ခံ ဓမ္မံ ပဋိစ္စ သေက္ခော စ နေဝသေက္ခနာသေက္ခော စ ဓမ္မာ ဥပ္ပဇ္ဇန္တိ ဟေတုပစ္စယာ – သေက္ခံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ…ပေ… ဒွေ ခန္ဓေ…ပေ…။ (၃)

၂။ အသေက္ခံ ဓမ္မံ ပဋိစ္စ အသေက္ခော ဓမ္မော ဥပ္ပဇ္ဇတိ ဟေတုပစ္စယာ – အသေက္ခံ ဧကံ ခန္ဓံ ပဋိစ္စ တယော ခန္ဓာ…ပေ…။ (၁)

အသေက္ခံ ¶ ဓမ္မံ ပဋိစ္စ နေဝသေက္ခနာသေက္ခော ဓမ္မော ဥပ္ပဇ္ဇတိ ဟေတုပစ္စယာ – အသေက္ခေ ခန္ဓေ ပဋိစ္စ စိတ္တသမုဋ္ဌာနံ ရူပံ။ (၂)

အသေက္ခံ ဓမ္မံ ပဋိစ္စ အသေက္ခော စ နေဝသေက္ခနာသေက္ခော စ ဓမ္မာ…ပေ… အသေက္ခံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ…ပေ… ဒွေ ခန္ဓေ…ပေ…။ (၃)

၃။ နေဝသေက္ခနာသေက္ခံ ဓမ္မံ ပဋိစ္စ နေဝသေက္ခနာသေက္ခော ဓမ္မော ဥပ္ပဇ္ဇတိ ဟေတုပစ္စယာ – နေဝသေက္ခနာသေက္ခံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ…ပေ… ဒွေ ခန္ဓေ…ပေ… ပဋိသန္ဓိက္ခဏေ …ပေ… ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ၊ ဧကံ မဟာဘူတံ ပဋိစ္စ ¶ တယော မဟာဘူတာ…ပေ… ဒွေ မဟာဘူတေ ပဋိစ္စ ဒွေ မဟာဘူတာ၊ မဟာဘူတေ ပဋိစ္စ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ။ (၁)

သေက္ခဉ္စ ¶ နေဝသေက္ခနာသေက္ခဉ္စ ဓမ္မံ ပဋိစ္စ နေဝသေက္ခနာသေက္ခော ဓမ္မော ဥပ္ပဇ္ဇတိ ဟေတုပစ္စယာ – သေက္ခေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ။ (၁)

အသေက္ခဉ္စ နေဝသေက္ခနာသေက္ခဉ္စ ဓမ္မံ ပဋိစ္စ နေဝသေက္ခနာသေက္ခော ဓမ္မော ဥပ္ပဇ္ဇတိ ဟေတုပစ္စယာ – အသေက္ခေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ။ (၁)

၄။ သေက္ခံ ဓမ္မံ ပဋိစ္စ သေက္ခော ဓမ္မော ဥပ္ပဇ္ဇတိ အာရမ္မဏပစ္စယာ… အဓိပတိပစ္စယာ (ပဋိသန္ဓိ နတ္ထိ)… အနန္တရပစ္စယာ… သမနန္တရပစ္စယာ… သဟဇာတပစ္စယာ (သဗ္ဗေ မဟာဘူတာ ကာတဗ္ဗာ)… အညမညပစ္စယာ… နိဿယပစ္စယာ… ဥပနိဿယပစ္စယာ… ပုရေဇာတပစ္စယာ… အာသေဝနပစ္စယာ – သေက္ခံ ဧကံ ခန္ဓံ ပဋိစ္စ တယော ခန္ဓာ…ပေ… ဒွေ ခန္ဓေ…ပေ…။

နေဝသေက္ခနာသေက္ခံ ဓမ္မံ ပဋိစ္စ နေဝသေက္ခနာသေက္ခော ဓမ္မော ဥပ္ပဇ္ဇတိ အာသေဝနပစ္စယာ – နေဝသေက္ခနာသေက္ခံ ဧကံ ခန္ဓံ ပဋိစ္စ တယော ခန္ဓာ…ပေ… ဒွေ ခန္ဓေ ¶ …ပေ… ကမ္မပစ္စယာ၊ ဝိပါကပစ္စယာ – ဝိပါကံ သေက္ခံ ဧကံ ခန္ဓံ ပဋိစ္စ တယော ခန္ဓာ…ပေ… ဒွေ ခန္ဓေ…ပေ… (တီဏိ၊ ပရိပုဏ္ဏံ)။

အသေက္ခံ ဓမ္မံ ပဋိစ္စ အသေက္ခော ဓမ္မော ဥပ္ပဇ္ဇတိ ဝိပါကပစ္စယာ ¶ – အသေက္ခံ ဧကံ ခန္ဓံ ပဋိစ္စ… တီဏိ။

နေဝသေက္ခနာသေက္ခံ ဓမ္မံ ပဋိစ္စ နေဝသေက္ခနာသေက္ခော ဓမ္မော ဥပ္ပဇ္ဇတိ ဝိပါကပစ္စယာ – ဝိပါကံ နေဝသေက္ခနာသေက္ခံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ…ပေ… ဒွေ ခန္ဓေ…ပေ… ပဋိသန္ဓိက္ခဏေ…ပေ… ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ၊ ဧကံ မဟာဘူတံ…ပေ…။ (၁)

သေက္ခဉ္စ နေဝသေက္ခနာသေက္ခဉ္စ ဓမ္မံ ပဋိစ္စ နေဝသေက္ခနာသေက္ခော ဓမ္မော ဥပ္ပဇ္ဇတိ ဝိပါကပစ္စယာ – ဝိပါကေ သေက္ခေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ။ (၁)

အသေက္ခဉ္စ နေဝသေက္ခနာသေက္ခဉ္စ ဓမ္မံ ပဋိစ္စ နေဝသေက္ခနာသေက္ခော ဓမ္မော ဥပ္ပဇ္ဇတိ ဝိပါကပစ္စယာ – အသေက္ခေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ။ (၁)

၅။ သေက္ခံ ¶ ဓမ္မံ ပဋိစ္စ သေက္ခော ဓမ္မော ဥပ္ပဇ္ဇတိ အာဟာရပစ္စယာ… ဣန္ဒြိယပစ္စယာ… ဈာနပစ္စယာ… မဂ္ဂပစ္စယ… သမ္ပယုတ္တပစ္စယာ… ဝိပ္ပယုတ္တပစ္စယာ… အတ္ထိပစ္စယာ… နတ္ထိပစ္စယာ… ဝိဂတပစ္စယာ… အဝိဂတပစ္စယာ။

၆။ ဟေတုယာ ¶ နဝ၊ အာရမ္မဏေ တီဏိ၊ အဓိပတိယာ နဝ၊ အနန္တရေ တီဏိ၊ သမနန္တရေ တီဏိ၊ သဟဇာတေ နဝ၊ အညမညေ တီဏိ၊ နိဿယေ နဝ၊ ဥပနိဿယေ တီဏိ၊ ပုရေဇာတေ တီဏိ၊ အာသေဝနေ ဒွေ၊ ကမ္မေ နဝ၊ ဝိပါကေ အာဟာရေ ဣန္ဒြိယေ ဈာနေ မဂ္ဂေ နဝ၊ သမ္ပယုတ္တေ တီဏိ၊ ဝိပ္ပယုတ္တေ နဝ၊ အတ္ထိယာ နဝ၊ နတ္ထိယာ ¶ တီဏိ၊ ဝိဂတေ တီဏိ၊ အဝိဂတေ နဝ (ဧဝံ ဂဏေတဗ္ဗံ)။

၇။ နေဝသေက္ခနာသေက္ခံ ဓမ္မံ ပဋိစ္စ နေဝသေက္ခနာသေက္ခော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ နေဝသေက္ခနာသေက္ခံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ…ပေ… ဒွေ ခန္ဓေ…ပေ… အဟေတုကပဋိသန္ဓိက္ခဏေ…ပေ… ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ၊ ဧကံ မဟာဘူတံ…ပေ… ဗာဟိရံ… အာဟာရသမုဋ္ဌာနံ… ဥတုသမုဋ္ဌာနံ… အသညသတ္တာနံ ဧကံ မဟာဘူတံ…ပေ… ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော။ (၁)

၈။ သေက္ခံ ဓမ္မံ ပဋိစ္စ နေဝသေက္ခနာသေက္ခော ဓမ္မော ဥပ္ပဇ္ဇတိ နအာရမ္မဏပစ္စယာ – သေက္ခေ ခန္ဓေ ပဋိစ္စ စိတ္တသမုဋ္ဌာနံ ရူပံ။ (၁)

အသေက္ခံ ¶ ¶ ဓမ္မံ ပဋိစ္စ နေဝသေက္ခနာသေက္ခော ဓမ္မော ဥပ္ပဇ္ဇတိ နအာရမ္မဏပစ္စယာ – အသေက္ခေ ခန္ဓေ ပဋိစ္စ စိတ္တသမုဋ္ဌာနံ ရူပံ။ (၁)

နေဝသေက္ခနာသေက္ခံ ဓမ္မံ ပဋိစ္စ နေဝသေက္ခနာသေက္ခော ဓမ္မော ဥပ္ပဇ္ဇတိ နအာရမ္မဏပစ္စယာ – နေဝသေက္ခနာသေက္ခေ ခန္ဓေ ပဋိစ္စ စိတ္တသမုဋ္ဌာနံ ရူပံ…ပေ… ပဋိသန္ဓိက္ခဏေ…ပေ… ခန္ဓေ ပဋိစ္စ ဝတ္ထု…ပေ… ဧကံ မဟာဘူတံ…ပေ… အသညသတ္တာနံ…ပေ…။ (၁)

သေက္ခဉ္စ နေဝသေက္ခနာသေက္ခဉ္စ ဓမ္မံ ပဋိစ္စ နေဝသေက္ခနာသေက္ခော ဓမ္မော ဥပ္ပဇ္ဇတိ နအာရမ္မဏပစ္စယာ – သေက္ခေ ခန္ဓေ စ မဟာဘူတေ ¶ စ ပဋိစ္စ စိတ္တသမုဋ္ဌာနံ ရူပံ။ (၁)

အသေက္ခဉ္စ နေဝသေက္ခနာသေက္ခဉ္စ ဓမ္မံ ပဋိစ္စ နေဝသေက္ခနာသေက္ခော ဓမ္မော ဥပ္ပဇ္ဇတိ နအာရမ္မဏပစ္စယာ – အသေက္ခေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ။ (၁)

၉။ သေက္ခံ ဓမ္မံ ပဋိစ္စ သေက္ခော ဓမ္မော ဥပ္ပဇ္ဇတိ နအဓိပတိပစ္စယာ – သေက္ခေ ခန္ဓေ ပဋိစ္စ သေက္ခော အဓိပတိ။ (၁)

အသေက္ခံ ဓမ္မံ ပဋိစ္စ အသေက္ခော ဓမ္မော ဥပ္ပဇ္ဇတိ နအဓိပတိပစ္စယာ – အသေက္ခေ ခန္ဓေ ပဋိစ္စ အသေက္ခော အဓိပတိ။ (၁)

နေဝသေက္ခနာသေက္ခံ ဓမ္မံ ပဋိစ္စ နေဝသေက္ခနာသေက္ခော ဓမ္မော ဥပ္ပဇ္ဇတိ နအဓိပတိပစ္စယာ… (ပရိပုဏ္ဏံ၊ ပဋိသန္ဓိပိ မဟာဘူတာပိ သဗ္ဗေ) နအနန္တရပစ္စယာ… နသမနန္တရပစ္စယာ… နအညမညပစ္စယာ… နဥပနိဿယပစ္စယာ… နပုရေဇာတပစ္စယာ… သတ္တ (ကုသလတ္တိကသဒိသာ)… နပစ္ဆာဇာတပစ္စယာ…ပေ… နအာသေဝနပစ္စယာ။ ဝိပါကံ သေက္ခံ ဧကံ ခန္ဓံ ပဋိစ္စ တယော ခန္ဓာ…ပေ… ဒွေ ခန္ဓေ…ပေ…။ (၁)

၁၀။ သေက္ခံ ¶ ဓမ္မံ ပဋိစ္စ နေဝသေက္ခနာသေက္ခော ဓမ္မော ဥပ္ပဇ္ဇတိ နအာသေဝနပစ္စယာ – သေက္ခေ ခန္ဓေ ပဋိစ္စ စိတ္တသမုဋ္ဌာနံ ရူပံ။ (၂)

သေက္ခံ ဓမ္မံ ပဋိစ္စ သေက္ခော စ နေဝသေက္ခနာသေက္ခော စ ဓမ္မာ ဥပ္ပဇ္ဇန္တိ နအာသေဝနပစ္စယာ – ဝိပါကံ သေက္ခံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ…ပေ… ဒွေ ခန္ဓေ…ပေ…။ (၃)

အသေက္ခံ ¶ ဓမ္မံ ပဋိစ္စ အသေက္ခော ဓမ္မော… တီဏိ။

နေဝသေက္ခနာသေက္ခံ ဓမ္မံ ပဋိစ္စ နေဝသေက္ခနာသေက္ခော ဓမ္မော ဥပ္ပဇ္ဇတိ နအာသေဝနပစ္စယာ… နေဝသေက္ခနာသေက္ခံ ¶ (ဧကံ၊ ပရိပုဏ္ဏံ၊ သေက္ခဉ္စ၊ နေဝသေက္ခနာသေက္ခဉ္စ၊ ဃဋနာ ပရိပုဏ္ဏာ၊ ဒွေပိ ကာတဗ္ဗာ။ နဝ) နကမ္မပစ္စယာ – သေက္ခေ ခန္ဓေ ပဋိစ္စ သေက္ခာ စေတနာ။

နေဝသေက္ခနာသေက္ခံ ဓမ္မံ ပဋိစ္စ နေဝသေက္ခနာသေက္ခော ဓမ္မော ဥပ္ပဇ္ဇတိ နကမ္မပစ္စယာ – နေဝသေက္ခနာသေက္ခေ ခန္ဓေ ပဋိစ္စ နေဝသေက္ခနာသေက္ခာ စေတနာ၊ ဗာဟိရံ… အာဟာရသမုဋ္ဌာနံ… ဥတုသမုဋ္ဌာနံ… ဧကံ မဟာဘူတံ…ပေ…။

၁၁။ သေက္ခံ ဓမ္မံ ပဋိစ္စ သေက္ခော ဓမ္မော ဥပ္ပဇ္ဇတိ နဝိပါကပစ္စယာ – သေက္ခံ ဧကံ ခန္ဓံ ပဋိစ္စ တယော ခန္ဓာ…ပေ…။ (၁)

သေက္ခံ ဓမ္မံ ပဋိစ္စ နေဝသေက္ခနာသေက္ခော ဓမ္မော ဥပ္ပဇ္ဇတိ နဝိပါကပစ္စယာ – သေက္ခေ ခန္ဓေ ပဋိစ္စ စိတ္တသမုဋ္ဌာနံ ရူပံ။(၂)

သေက္ခံ ဓမ္မံ ပဋိစ္စ သေက္ခော စ နေဝသေက္ခနာသေက္ခော စ ဓမ္မာ ဥပ္ပဇ္ဇန္တိ နဝိပါကပစ္စယာ – သေက္ခံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ…ပေ…။ (၃)

၁၂။ နေဝသေက္ခနာသေက္ခံ ¶ ဓမ္မံ ပဋိစ္စ နေဝသေက္ခနာသေက္ခော ဓမ္မော ဥပ္ပဇ္ဇတိ နဝိပါကပစ္စယာ (ပရိပုဏ္ဏံ၊ ပဋိသန္ဓိ နတ္ထိ )။

သေက္ခဉ္စ နေဝသေက္ခနာသေက္ခဉ္စ ဓမ္မံ ပဋိစ္စ နေဝသေက္ခနာသေက္ခော ဓမ္မော ဥပ္ပဇ္ဇတိ နဝိပါကပစ္စယာ – သေက္ခေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ။ (၁)

၁၃။ နေဝသေက္ခနာသေက္ခံ ဓမ္မံ ပဋိစ္စ နေဝသေက္ခနာသေက္ခော ဓမ္မော ဥပ္ပဇ္ဇတိ နအာဟာရပစ္စယာ… နဣန္ဒြိယပစ္စယာ… နဈာနပစ္စယာ… နမဂ္ဂပစ္စယာ ¶ ။

၁၄။ သေက္ခံ ဓမ္မံ ပဋိစ္စ နေဝသေက္ခနာသေက္ခော ဓမ္မော ဥပ္ပဇ္ဇတိ နသမ္ပယုတ္တပစ္စယာ…ပေ… (နအာရမ္မဏပစ္စယသဒိသံ)။

သေက္ခံ ¶ ဓမ္မံ ပဋိစ္စ သေက္ခော ဓမ္မော ဥပ္ပဇ္ဇတိ နဝိပ္ပယုတ္တပစ္စယာ။ အရူပေ သေက္ခံ ဧကံ ခန္ဓံ ပဋိစ္စ တယော ခန္ဓာ…ပေ…။ (၁)

အသေက္ခံ ဓမ္မံ ပဋိစ္စ အသေက္ခော ဓမ္မော ဥပ္ပဇ္ဇတိ နဝိပ္ပယုတ္တပစ္စယာ – အရူပေ အသေက္ခံ ဧကံ ခန္ဓံ ပဋိစ္စ တယော ခန္ဓာ…ပေ…။ (၁)

နေဝသေက္ခနာသေက္ခံ ဓမ္မံ ပဋိစ္စ နေဝသေက္ခနာသေက္ခော ဓမ္မော ဥပ္ပဇ္ဇတိ နဝိပ္ပယုတ္တပစ္စယာ – အရူပေ နေဝသေက္ခနာသေက္ခံ ဧကံ ခန္ဓံ ပဋိစ္စ တယော ခန္ဓာ…ပေ… ဗာဟိရံ… အာဟာရသမုဋ္ဌာနံ… ဥတုသမုဋ္ဌာနံ… အသညသတ္တာနံ…ပေ… နောနတ္ထိပစ္စယာ… နောဝိဂတပစ္စယာ။

၁၅။ နဟေတုယာ ¶ ဧကံ၊ နအာရမ္မဏေ ပဉ္စ၊ နအဓိပတိယာ တီဏိ၊ နအနန္တရေ နသမနန္တရေ နအညမညေ နဥပနိဿယေ ပဉ္စ၊ နပုရေဇာတေ သတ္တ၊ နပစ္ဆာဇာတေ နဝ၊ နအာသေဝနေ နဝ၊ နကမ္မေ ဒွေ၊ နဝိပါကေ ပဉ္စ၊ နအာဟာရေ ဧကံ၊ နဣန္ဒြိယေ ဧကံ၊ နဈာနေ ဧကံ၊ နမဂ္ဂေ ဧကံ၊ နသမ္ပယုတ္တေ ပဉ္စ၊ နဝိပ္ပယုတ္တေ တီဏိ၊ နောနတ္ထိယာ ပဉ္စ၊ နောဝိဂတေ ပဉ္စ (ဧဝံ ဂဏေတဗ္ဗံ)။

၁၆။ ဟေတုပစ္စယာ နအာရမ္မဏေ ပဉ္စ၊ နအဓိပတိယာ တီဏိ၊ နအနန္တရေ နသမနန္တရေ နအညမညေ နဥပနိဿယေ ပဉ္စ၊ နပုရေဇာတေ သတ္တ၊ နပစ္ဆာဇာတေ နအာသေဝနေ နဝ၊ နကမ္မေ ဒွေ၊ နဝိပါကေ ပဉ္စ၊ နသမ္ပယုတ္တေ ပဉ္စ၊ နဝိပ္ပယုတ္တေ တီဏိ၊ နောနတ္ထိယာ ပဉ္စ၊ နောဝိဂတေ ¶ ပဉ္စ (ဧဝံ ဂဏေတဗ္ဗံ)။

၁၇။ နဟေတုပစ္စယာ ¶ ¶ အာရမ္မဏေ ဧကံ၊ အနန္တရေ သမနန္တရေ သဟဇာတေ အညမညေ နိဿယေ ဥပနိဿယေ ပုရေဇာတေ အာသေဝနေ ကမ္မေ ဝိပါကေ အာဟာရေ ဣန္ဒြိယေ ဈာနေ မဂ္ဂေ သမ္ပယုတ္တေ ဝိပ္ပယုတ္တေ အတ္ထိယာ နတ္ထိယာ ဝိဂတေ အဝိဂတေ ဧကံ (ဧဝံ ဂဏေတဗ္ဗံ)။

(သဟဇာတဝါရော ပဋိစ္စဝါရသဒိသော။)

၁၈။ သေက္ခံ ဓမ္မံ ပစ္စယာ သေက္ခော ဓမ္မော ဥပ္ပဇ္ဇတိ ဟေတုပစ္စယာ… တီဏိ (ပဋိစ္စဝါရသဒိသံ)။

အသေက္ခံ ¶ ဓမ္မံ ပစ္စယာ အသေက္ခော ဓမ္မော ဥပ္ပဇ္ဇတိ ဟေတုပစ္စယာ… တီဏိ (ပဋိစ္စဝါရသဒိသံ)။

၁၉။ နေဝသေက္ခနာသေက္ခံ ဓမ္မံ ပစ္စယာ နေဝသေက္ခနာသေက္ခော ဓမ္မော ဥပ္ပဇ္ဇတိ ဟေတုပစ္စယာ (ပရိပုဏ္ဏံ)၊ မဟာဘူတေ ပစ္စယာ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ၊ ဝတ္ထုံ ပစ္စယာ နေဝသေက္ခနာသေက္ခာ ခန္ဓာ။ (၁)

နေဝသေက္ခနာသေက္ခံ ဓမ္မံ ပစ္စယာ သေက္ခော ဓမ္မော ဥပ္ပဇ္ဇတိ ဟေတုပစ္စယာ – ဝတ္ထုံ ပစ္စယာ သေက္ခာ ခန္ဓာ။ (၂)

နေဝသေက္ခနာသေက္ခံ ဓမ္မံ ပစ္စယာ အသေက္ခော ဓမ္မော ဥပ္ပဇ္ဇတိ ဟေတုပစ္စယာ – ဝတ္ထုံ ပစ္စယာ အသေက္ခာ ခန္ဓာ။ (၃)

နေဝသေက္ခနာသေက္ခံ ¶ ဓမ္မံ ပစ္စယာ သေက္ခော စ နေဝသေက္ခနာသေက္ခော ¶ စ ဓမ္မာ ဥပ္ပဇ္ဇန္တိ ဟေတုပစ္စယာ – ဝတ္ထုံ ပစ္စယာ သေက္ခာ ခန္ဓာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ။ (၄)

နေဝသေက္ခနာသေက္ခံ ဓမ္မံ ပစ္စယာ အသေက္ခော စ နေဝသေက္ခနာသေက္ခော စ ဓမ္မာ ဥပ္ပဇ္ဇန္တိ ဟေတုပစ္စယာ – ဝတ္ထုံ ပစ္စယာ အသေက္ခာ ခန္ဓာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ။ (၅)

၂၀။ သေက္ခဉ္စ နေဝသေက္ခနာသေက္ခဉ္စ ဓမ္မံ ပစ္စယာ သေက္ခော ဓမ္မော ဥပ္ပဇ္ဇတိ ဟေတုပစ္စယာ – သေက္ခံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ…ပေ… ဒွေ ခန္ဓာ။ (၁)

သေက္ခဉ္စ နေဝသေက္ခနာသေက္ခဉ္စ ဓမ္မံ ပစ္စယာ နေဝသေက္ခနာသေက္ခော ဓမ္မော ဥပ္ပဇ္ဇတိ ဟေတုပစ္စယာ – သေက္ခေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ။ (၂)

သေက္ခဉ္စ နေဝသေက္ခနာသေက္ခဉ္စ ဓမ္မံ ပစ္စယာ သေက္ခော စ နေဝသေက္ခနာသေက္ခော စ ဓမ္မာ ဥပ္ပဇ္ဇန္တိ ဟေတုပစ္စယာ – သေက္ခံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ…ပေ… ဒွေ ခန္ဓာ။ သေက္ခေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ။ (၃)

အသေက္ခဉ္စ ¶ နေဝသေက္ခနာသေက္ခဉ္စ ဓမ္မံ ပစ္စယာ… တီဏိ (သေက္ခသဒိသာ)။

၂၁။ သေက္ခံ ဓမ္မံ ပစ္စယာ သေက္ခော ဓမ္မော ဥပ္ပဇ္ဇတိ အာရမ္မဏပစ္စယာ… ဧကံ။

အသေက္ခံ ဓမ္မံ ပစ္စယာ အသေက္ခော ဓမ္မော… ဧကံ။

နေဝသေက္ခနာသေက္ခံ ဓမ္မံ ပစ္စယာ နေဝသေက္ခနာသေက္ခော ဓမ္မော ဥပ္ပဇ္ဇတိ အာရမ္မဏပစ္စယာ… ဧကံ၊ ဝတ္ထုံ ပစ္စယာ နေဝသေက္ခနာသေက္ခာ ခန္ဓာ၊ စက္ခာယတနံ ပစ္စယာ စက္ခုဝိညာဏံ…ပေ… ကာယာယတနံ ပစ္စယာ ကာယဝိညာဏံ၊ ဝတ္ထုံ ပစ္စယာ နေဝသေက္ခနာသေက္ခာ ခန္ဓာ။ (၁)

နေဝသေက္ခနာသေက္ခံ ¶ ဓမ္မံ ပစ္စယာ သေက္ခော ဓမ္မော ဥပ္ပဇ္ဇတိ အာရမ္မဏပစ္စယာ – ဝတ္ထုံ ပစ္စယာ သေက္ခာ ခန္ဓာ။ (၂)

နေဝသေက္ခနာသေက္ခံ ¶ ဓမ္မံ ပစ္စယာ အသေက္ခော ဓမ္မော ဥပ္ပဇ္ဇတိ အာရမ္မဏပစ္စယာ – ဝတ္ထုံ ပစ္စယာ အသေက္ခာ ခန္ဓာ။ (၃)

သေက္ခဉ္စ နေဝသေက္ခနာသေက္ခဉ္စ ဓမ္မံ ပစ္စယာ သေက္ခော ဓမ္မော ဥပ္ပဇ္ဇတိ အာရမ္မဏပစ္စယာ – သေက္ခံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ…ပေ… ဒွေ ခန္ဓာ။ (၁)

အသေက္ခဉ္စ နေဝသေက္ခနာသေက္ခဉ္စ ဓမ္မံ ပစ္စယာ အသေက္ခော ဓမ္မော ဥပ္ပဇ္ဇတိ အာရမ္မဏပစ္စယာ – အသေက္ခံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ…ပေ… ဒွေ ခန္ဓာ။ (၁)

၂၂။ သေက္ခံ ဓမ္မံ ပစ္စယာ သေက္ခော ဓမ္မော ဥပ္ပဇ္ဇတိ အဓိပတိပစ္စယာ… အနန္တရပစ္စယာ… သမနန္တရပစ္စယာ… သဟဇာတပစ္စယာ… အညမညပစ္စယ… နိဿယပစ္စယာ ¶ … ဥပနိဿယပစ္စယာ… ပုရေဇာတပစ္စယာ… အာသေဝနပစ္စယာ – သေက္ခံ ဧကံ ခန္ဓံ ပစ္စယာ တယော ခန္ဓာ…ပေ…

နေဝသေက္ခနာသေက္ခံ ဓမ္မံ ပစ္စယာ နေဝသေက္ခနာသေက္ခော ဓမ္မော ဥပ္ပဇ္ဇတိ အာသေဝနပစ္စယာ – နေဝသေက္ခနာသေက္ခံ ဧကံ ခန္ဓံ ပစ္စယာ…ပေ… ဝတ္ထုံ ပစ္စယာ နေဝသေက္ခနာသေက္ခာ ခန္ဓာ။ (၁)

နေဝသေက္ခနာသေက္ခံ ဓမ္မံ ပစ္စယာ သေက္ခော ဓမ္မော ဥပ္ပဇ္ဇတိ အာသေဝနပစ္စယာ – ဝတ္ထုံ ပစ္စယာ သေက္ခာ ခန္ဓာ။ (၂)

သေက္ခဉ္စ နေဝသေက္ခနာသေက္ခဉ္စ ဓမ္မံ ပစ္စယာ သေက္ခော ဓမ္မော ဥပ္ပဇ္ဇတိ အာသေဝနပစ္စယာ ¶ – သေက္ခံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ…ပေ… ဒွေ ခန္ဓာ။ (၁)

၂၃။ သေက္ခံ ဓမ္မံ ပစ္စယာ သေက္ခော ဓမ္မော ဥပ္ပဇ္ဇတိ ကမ္မပစ္စယာ… ဝိပါကပစ္စယာ – ဝိပါကံ သေက္ခံ ဧကံ ခန္ဓံ…ပေ… အာဟာရပစ္စယာ… ဣန္ဒြိယပစ္စယာ… ဈာနပစ္စယာ… မဂ္ဂပစ္စယာ… သမ္ပယုတ္တပစ္စယာ… ဝိပ္ပယုတ္တပစ္စယာ… အတ္ထိပစ္စယာ… နတ္ထိပစ္စယာ… ဝိဂတပစ္စယာ… အဝိဂတပစ္စယာ။

၂၄။ ဟေတုယာ ¶ သတ္တရသ၊ အာရမ္မဏေ သတ္တ၊ အဓိပတိယာ သတ္တရသ၊ အနန္တရေ သတ္တ၊ သမနန္တရေ သတ္တ၊ သဟဇာတေ သတ္တရသ၊ အညမညေ သတ္တ၊ နိဿယေ သတ္တရသ၊ ဥပနိဿယေ သတ္တ၊ ပုရေဇာတေ သတ္တ၊ အာသေဝနေ စတ္တာရိ၊ ကမ္မေ သတ္တရသ၊ ဝိပါကေ သတ္တရသ၊ အာဟာရေ သတ္တရသ၊ ဣန္ဒြိယေ ဈာနေ ¶ မဂ္ဂေ သတ္တရသ၊ သမ္ပယုတ္တေ သတ္တ၊ ဝိပ္ပယုတ္တေ သတ္တရသ၊ အတ္ထိယာ သတ္တရသ၊ နတ္ထိယာ သတ္တ၊ ဝိဂတေ သတ္တ၊ အဝိဂတေ သတ္တရသ (ဧဝံ ဂဏေတဗ္ဗံ)။

၂၅။ နေဝသေက္ခနာသေက္ခံ ဓမ္မံ ပစ္စယာ နေဝသေက္ခနာသေက္ခော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ နေဝသေက္ခနာသေက္ခံ ဧကံ ခန္ဓံ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ…ပေ… ဒွေ ခန္ဓာ။ အဟေတုကပဋိသန္ဓိက္ခဏေ…ပေ… ခန္ဓေ ပစ္စယာ ဝတ္ထု၊ ဝတ္ထုံ ပစ္စယာ ခန္ဓာ၊ ဧကံ မဟာဘူတံ ပစ္စယာ…ပေ… ဗာဟိရံ… အာဟာရသမုဋ္ဌာနံ… ဥတုသမုဋ္ဌာနံ… အသညသတ္တာနံ…ပေ… စက္ခာယတနံ ပစ္စယာ စက္ခုဝိညာဏံ…ပေ… ကာယာယတနံ ပစ္စယာ ကာယဝိညာဏံ၊ ဝတ္ထုံ ပစ္စယာ အဟေတုကာ နေဝသေက္ခနာသေက္ခာ ခန္ဓာ၊ ဝိစိကိစ္ဆာသဟဂတေ ဥဒ္ဓစ္စသဟဂတေ ¶ ခန္ဓေ စ ဝတ္ထုဉ္စ ပစ္စယာ ဝိစိကိစ္ဆာသဟဂတော ဥဒ္ဓစ္စသဟဂတော မောဟော။ (၁)

၂၆။ သေက္ခံ ဓမ္မံ ပစ္စယာ နေဝသေက္ခနာသေက္ခော ဓမ္မော ဥပ္ပဇ္ဇတိ နအာရမ္မဏပစ္စယာ…ပေ…။ (၁)

သေက္ခံ ဓမ္မံ ပစ္စယာ သေက္ခော ဓမ္မော ဥပ္ပဇ္ဇတိ နအဓိပတိပစ္စယာ – သေက္ခေ ခန္ဓေ ပစ္စယာ သေက္ခော အဓိပတိ။ (၁)

အသေက္ခံ ¶ ¶ ဓမ္မံ ပစ္စယာ အသေက္ခော ဓမ္မော ဥပ္ပဇ္ဇတိ နအဓိပတိပစ္စယာ – အသေက္ခေ ခန္ဓေ ပစ္စယာ အသေက္ခော အဓိပတိ။ (၁)

နေဝသေက္ခနာသေက္ခံ ဓမ္မံ ပစ္စယာ နေဝသေက္ခနာသေက္ခော ဓမ္မော ဥပ္ပဇ္ဇတိ နအဓိပတိပစ္စယာ (ပရိပုဏ္ဏံ) အသညသတ္တာနံ…ပေ… စက္ခာယတနံ…ပေ… ဝတ္ထုံ ပစ္စယာ နေဝသေက္ခနာသေက္ခာ ခန္ဓာ။ (၁)

နေဝသေက္ခနာသေက္ခံ ဓမ္မံ ပစ္စယာ သေက္ခော ဓမ္မော ဥပ္ပဇ္ဇတိ နအဓိပတိပစ္စယာ – ဝတ္ထုံ ပစ္စယာ သေက္ခော အဓိပတိ။ (၂)

နေဝသေက္ခနာသေက္ခံ ဓမ္မံ ပစ္စယာ အသေက္ခော ဓမ္မော ဥပ္ပဇ္ဇတိ နအဓိပတိပစ္စယာ – ဝတ္ထုံ ပစ္စယာ အသေက္ခော အဓိပတိ။ (၃)

သေက္ခဉ္စ နေဝသေက္ခနာသေက္ခဉ္စ ဓမ္မံ ပစ္စယာ သေက္ခော ဓမ္မော ဥပ္ပဇ္ဇတိ နအဓိပတိပစ္စယာ – သေက္ခေ ခန္ဓေ စ ဝတ္ထုဉ္စ ပစ္စယာ သေက္ခော အဓိပတိ။ (၁)

အသေက္ခဉ္စ နေဝသေက္ခနာသေက္ခဉ္စ ဓမ္မံ ပစ္စယာ အသေက္ခော ဓမ္မော ဥပ္ပဇ္ဇတိ နအဓိပတိပစ္စယာ – အသေက္ခေ ခန္ဓေ စ ဝတ္ထုဉ္စ ပစ္စယာ အသေက္ခော အဓိပတိ။ (၁)

၂၇။ သေက္ခံ ဓမ္မံ ပစ္စယာ နေဝသေက္ခနာသေက္ခော ဓမ္မော ဥပ္ပဇ္ဇတိ နအနန္တရပစ္စယာ… နသမနန္တရပစ္စယာ… နအညမညပစ္စယာ… နဥပနိဿယပစ္စယာ… နပုရေဇာတပစ္စယာ… နပစ္ဆာဇာတပစ္စယာ (သတ္တ)… နအာသေဝနပစ္စယာ… ¶ နကမ္မပစ္စယာ – သေက္ခေ ခန္ဓေ ပစ္စယာ သေက္ခာ စေတနာ။

နေဝသေက္ခနာသေက္ခံ ဓမ္မံ ပစ္စယာ နေဝသေက္ခနာသေက္ခော ဓမ္မော ဥပ္ပဇ္ဇတိ နကမ္မပစ္စယာ – နေဝသေက္ခနာသေက္ခေ ¶ ခန္ဓေ ပစ္စယာ နေဝသေက္ခနာသေက္ခာ စေတနာ။ ဗာဟိရံ… အာဟာရသမုဋ္ဌာနံ… ဥတုသမုဋ္ဌာနံ…ပေ… ဝတ္ထုံ ပစ္စယာ နေဝသေက္ခနာသေက္ခာ စေတနာ။ (၁)

နေဝသေက္ခနာသေက္ခံ ဓမ္မံ ပစ္စယာ သေက္ခော ဓမ္မော ဥပ္ပဇ္ဇတိ နကမ္မပစ္စယာ – ဝတ္ထုံ ပစ္စယာ သေက္ခာ စေတနာ။ (၂)

သေက္ခဉ္စ နေဝသေက္ခနာသေက္ခဉ္စ ဓမ္မံ ပစ္စယာ သေက္ခော ဓမ္မော ဥပ္ပဇ္ဇတိ နကမ္မပစ္စယာ – သေက္ခေ ခန္ဓေ စ ဝတ္ထုဉ္စ ပစ္စယာ သေက္ခာ စေတနာ။ (၁)

၂၈။ သေက္ခံ ¶ ဓမ္မံ ပစ္စယာ သေက္ခော ဓမ္မော ဥပ္ပဇ္ဇတိ နဝိပါကပစ္စယာ (သေက္ခမူလကေ တီဏိ)။

နေဝသေက္ခနာသေက္ခံ ဓမ္မံ ပစ္စယာ နေဝသေက္ခနာသေက္ခော ဓမ္မော ဥပ္ပဇ္ဇတိ နဝိပါကပစ္စယာ (နေဝသေက္ခနာသေက္ခမူလကေ တီဏိ)။

သေက္ခဉ္စ နေဝသေက္ခနာသေက္ခဉ္စ ဓမ္မံ ပစ္စယာ သေက္ခော ဓမ္မော ဥပ္ပဇ္ဇတိ နဝိပါကပစ္စယာ (သေက္ခဃဋနေသု တီဏိ)။

၂၉။ နေဝသေက္ခနာသေက္ခံ ဓမ္မံ ပစ္စယာ နေဝသေက္ခနာသေက္ခော ဓမ္မော ဥပ္ပဇ္ဇတိ နအာဟာရပစ္စယာ… နဣန္ဒြိယပစ္စယာ… နဈာနပစ္စယာ… နမဂ္ဂပစ္စယာ… နသမ္ပယုတ္တပစ္စယာ… နဝိပ္ပယုတ္တပစ္စယာ… နောနတ္ထိပစ္စယာ… နောဝိဂတပစ္စယာ…ပေ…။

၃၀။ နဟေတုယာ ¶ ဧကံ၊ နအာရမ္မဏေ ပဉ္စ၊ နအဓိပတိယာ သတ္တ၊ နအနန္တရေ ပဉ္စ၊ နသမနန္တရေ ပဉ္စ၊ နအညမညေ ပဉ္စ၊ နဥပနိဿယေ ¶ ပဉ္စ၊ နပုရေဇာတေ သတ္တ၊ နပစ္ဆာဇာတေ သတ္တရသ၊ နအာသေဝနေ သတ္တရသ၊ နကမ္မေ စတ္တာရိ၊ နဝိပါကေ နဝ၊ နအာဟာရေ ဧကံ၊ နဣန္ဒြိယေ ဧကံ၊ နဈာနေ ဧကံ၊ နမဂ္ဂေ ဧကံ၊ နသမ္ပယုတ္တေ ပဉ္စ၊ နဝိပ္ပယုတ္တေ တီဏိ၊ နောနတ္ထိယာ ပဉ္စ၊ နောဝိဂတေ ပဉ္စ (ဧဝံ ဂဏေတဗ္ဗံ)။

၃၁။ ဟေတုပစ္စယာ နအာရမ္မဏေ ပဉ္စ၊ နအဓိပတိယာ သတ္တ၊ နအနန္တရေ နသမနန္တရေ နအညမညေ နဥပနိဿယေ ပဉ္စ၊ နပုရေဇာတေ သတ္တ၊ နပစ္ဆာဇာတေ ¶ သတ္တရသ၊ နအာသေဝနေ သတ္တရသ၊ နကမ္မေ စတ္တာရိ၊ နဝိပါကေ နဝ၊ နသမ္ပယုတ္တေ ပဉ္စ၊ နဝိပ္ပယုတ္တေ တီဏိ၊ နောနတ္ထိယာ ပဉ္စ၊ နောဝိဂတေ ပဉ္စ (ဧဝံ ဂဏေတဗ္ဗံ)။

၃၂။ နဟေတုပစ္စယာ ¶ အာရမ္မဏေ ဧကံ၊ အနန္တရေ သမနန္တရေ သဟဇာတေ အညမညေ ဧကံ…ပေ… အဝိဂတေ ဧကံ (ဧဝံ ဂဏေတဗ္ဗံ)။

၃၃။ သေက္ခံ ဓမ္မံ သံသဋ္ဌော သေက္ခော ဓမ္မော ဥပ္ပဇ္ဇတိ ဟေတုပစ္စယာ ¶ – သေက္ခံ ဧကံ ခန္ဓံ သံသဋ္ဌာ တယော ခန္ဓာ…ပေ… ဒွေ ခန္ဓေ…ပေ…။ (၁)

အသေက္ခံ ဓမ္မံ သံသဋ္ဌော အသေက္ခော ဓမ္မော ဥပ္ပဇ္ဇတိ ဟေတုပစ္စယာ – အသေက္ခံ ဧကံ ခန္ဓံ သံသဋ္ဌာ တယော ခန္ဓာ…ပေ… ဒွေ ခန္ဓေ…ပေ…။ (၁)

နေဝသေက္ခနာသေက္ခံ ဓမ္မံ သံသဋ္ဌော နေဝသေက္ခနာသေက္ခော ဓမ္မော ဥပ္ပဇ္ဇတိ ဟေတုပစ္စယာ – နေဝသေက္ခနာသေက္ခံ ဧကံ ခန္ဓံ သံသဋ္ဌာ တယော ခန္ဓာ…ပေ… ဒွေ ခန္ဓေ…ပေ… ပဋိသန္ဓိက္ခဏေ…ပေ…။ (၁)

၃၄။ သေက္ခံ ¶ ¶ ဓမ္မံ သံသဋ္ဌော သေက္ခော ဓမ္မော ဥပ္ပဇ္ဇတိ အာရမ္မဏပစ္စယာ… အဓိပတိပစ္စယာ…ပေ… ပုရေဇာတပစ္စယာ… အာသေဝနပစ္စယာ (ဒွေ ကာတဗ္ဗာ)…ပေ… အဝိဂတပစ္စယာ။

၃၅။ ဟေတုယာ တီဏိ၊ အာရမ္မဏေ တီဏိ၊ အဓိပတိယာ တီဏိ၊ အနန္တရေ သမနန္တရေ သဟဇာတေ အညမညေ နိဿယေ ဥပနိဿယေ ပုရေဇာတေ တီဏိ၊ အာသေဝနေ ဒွေ၊ ကမ္မေ တီဏိ…ပေ… အဝိဂတေ တီဏိ (ဧဝံ ဂဏေတဗ္ဗံ)။

၃၆။ နေဝသေက္ခနာသေက္ခံ ဓမ္မံ သံသဋ္ဌော နေဝသေက္ခနာသေက္ခော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ နေဝသေက္ခနာသေက္ခံ ဧကံ ခန္ဓံ သံသဋ္ဌာ တယော ခန္ဓာ…ပေ… ဒွေ ခန္ဓေ…ပေ… အဟေတုကပဋိသန္ဓိက္ခဏေ…ပေ… ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ သံသဋ္ဌော ဝိစိကိစ္ဆာသဟဂတော ဥဒ္ဓစ္စသဟဂတော မောဟော။ (၁)

၃၇။ သေက္ခံ ¶ ဓမ္မံ သံသဋ္ဌော သေက္ခော ဓမ္မော ဥပ္ပဇ္ဇတိ နအဓိပတိပစ္စယာ ¶ – သေက္ခေ ခန္ဓေ သံသဋ္ဌော သေက္ခော အဓိပတိ။ (၁)

အသေက္ခံ ဓမ္မံ သံသဋ္ဌော အသေက္ခော ဓမ္မော ဥပ္ပဇ္ဇတိ နအဓိပတိပစ္စယာ – အသေက္ခေ ခန္ဓေ သံသဋ္ဌော အသေက္ခော အဓိပတိ။ (၁)

နေဝသေက္ခနာသေက္ခံ ဓမ္မံ သံသဋ္ဌော နေဝသေက္ခနာသေက္ခော ဓမ္မော ဥပ္ပဇ္ဇတိ နအဓိပတိပစ္စယာ (ပရိပုဏ္ဏံ၊ ဧကံ)။

၃၈။ သေက္ခံ ¶ ဓမ္မံ သံသဋ္ဌော သေက္ခော ဓမ္မော ဥပ္ပဇ္ဇတိ နပုရေဇာတပစ္စယာ… နပစ္ဆာဇာတပစ္စယာ… နအာသေဝနပစ္စယာ… နကမ္မပစ္စယာ (ဒွေ ကာတဗ္ဗာ)… နဝိပါကပစ္စယာ (ဒွေ ကာတဗ္ဗာ)… နဈာနပစ္စယာ… နမဂ္ဂပစ္စယာ… နဝိပ္ပယုတ္တပစ္စယာ…ပေ…။

၃၉။ နဟေတုယာ ဧကံ၊ နအဓိပတိယာ တီဏိ၊ နပုရေဇာတေ တီဏိ၊ နပစ္ဆာဇာတေ တီဏိ၊ နအာသေဝနေ တီဏိ၊ နကမ္မေ ဒွေ၊ နဝိပါကေ ဒွေ၊ နဈာနေ ဧကံ၊ နမဂ္ဂေ ဧကံ၊ နဝိပ္ပယုတ္တေ တီဏိ (ဧဝံ ဂဏေတဗ္ဗံ)။

၄၀။ ဟေတုပစ္စယာ နအဓိပတိယာ တီဏိ၊ နပုရေဇာတေ တီဏိ၊ နပစ္ဆာဇာတေ နအာသေဝနေ တီဏိ၊ နကမ္မေ ဒွေ၊ နဝိပါကေ ဒွေ၊ နဝိပ္ပယုတ္တေ တီဏိ (ဧဝံ ဂဏေတဗ္ဗံ)။

၄၁။ နဟေတုပစ္စယာ ¶ အာရမ္မဏေ ဧကံ၊ အနန္တရေ သမနန္တရေ သဟဇာတေ အညမညေ နိဿယေ ဥပနိဿယေ ပုရေဇာတေ အာသေဝနေ ကမ္မေ ဝိပါကေ အာဟာရေ ဣန္ဒြိယေ ဈာနေ မဂ္ဂေ သမ္ပယုတ္တေ ဝိပ္ပယုတ္တေ အတ္ထိယာ ¶ နတ္ထိယာ ဝိဂတေ အဝိဂတေ ဧကံ (ဧဝံ ဂဏေတဗ္ဗံ)။

(သမ္ပယုတ္တဝါရော သံသဋ္ဌဝါရသဒိသော။)

၄၂။ သေက္ခော ¶ ဓမ္မော သေက္ခဿ ဓမ္မဿ ဟေတုပစ္စယေန ပစ္စယော – သေက္ခာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော။ (၁)

သေက္ခော ဓမ္မော နေဝသေက္ခနာသေက္ခဿ ဓမ္မဿ ဟေတုပစ္စယေန ပစ္စယော – သေက္ခာ ဟေတူ စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော။ (၂)

သေက္ခော ¶ ဓမ္မော သေက္ခဿ စ နေဝသေက္ခနာသေက္ခဿ စ ဓမ္မဿ ဟေတုပစ္စယေန ပစ္စယော – သေက္ခာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော။ (၃)

အသေက္ခော ဓမ္မော အသေက္ခဿ ဓမ္မဿ (တီဏိ)။

နေဝသေက္ခနာသေက္ခော ဓမ္မော နေဝသေက္ခနာသေက္ခဿ ဓမ္မဿ ဟေတုပစ္စယေန ပစ္စယော – နေဝသေက္ခနာသေက္ခာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော။ ပဋိသန္ဓိက္ခဏေ…ပေ…။ (၁)

၄၃။ သေက္ခော ဓမ္မော နေဝသေက္ခနာသေက္ခဿ ဓမ္မဿ အာရမ္မဏပစ္စယေန ပစ္စယော – အရိယာ မဂ္ဂါ ဝုဋ္ဌဟိတွာ မဂ္ဂံ ပစ္စဝေက္ခန္တိ၊ သေက္ခံ ဖလံ ပစ္စဝေက္ခန္တိ၊ စေတောပရိယဉာဏေန သေက္ခစိတ္တသမင်္ဂိဿ ¶ စိတ္တံ ဇာနန္တိ၊ သေက္ခာ ခန္ဓာ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော။ (၁)

အသေက္ခော ဓမ္မော နေဝသေက္ခနာသေက္ခဿ ဓမ္မဿ အာရမ္မဏပစ္စယေန ပစ္စယော – အရဟာ အသေက္ခံ ဖလံ ပစ္စဝေက္ခတိ၊ စေတောပရိယဉာဏေန အသေက္ခစိတ္တသမင်္ဂိဿ စိတ္တံ ဇာနာတိ၊ အသေက္ခာ ခန္ဓာ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော။ (၁)

၄၄။ နေဝသေက္ခနာသေက္ခော ¶ ဓမ္မော နေဝသေက္ခနာသေက္ခဿ ဓမ္မဿ အာရမ္မဏပစ္စယေန ပစ္စယော – ဒါနံ ဒတွာ သီလံ သမာဒိယိတွာ ဥပေါသထကမ္မံ ကတွာ တံ ပစ္စဝေက္ခတိ၊ ပုဗ္ဗေ သုစိဏ္ဏာနိ…ပေ… ဈာနာ ဝုဋ္ဌဟိတွာ ဈာနံ ပစ္စဝေက္ခတိ၊ အရိယာ နိဗ္ဗာနံ ပစ္စဝေက္ခန္တိ။ နိဗ္ဗာနံ ဂေါတြဘုဿ၊ ဝေါဒါနဿ၊ အာဝဇ္ဇနာယ အာရမ္မဏပစ္စယေန ပစ္စယော။ အရိယာ ပဟီနေ ကိလေသေ ပစ္စဝေက္ခန္တိ ဝိက္ခမ္ဘိတေ ကိလေသေ ပစ္စဝေက္ခန္တိ၊ ပုဗ္ဗေ သမုဒါစိဏ္ဏေ ကိလေသေ ဇာနန္တိ၊ စက္ခုံ အနိစ္စတော ဒုက္ခတော အနတ္တတော ဝိပဿန္တိ၊ အဿာဒေန္တိ အဘိနန္ဒန္တိ၊ တံ အာရဗ္ဘ ရာဂေါ ဥပ္ပဇ္ဇတိ…ပေ… ဒေါမနဿံ ဥပ္ပဇ္ဇတိ၊ သောတံ…ပေ… ဝတ္ထုံ နေဝသေက္ခနာသေက္ခေ ¶ ခန္ဓေ အနိစ္စတော ဒုက္ခတော အနတ္တတော ဝိပဿန္တိ၊ အဿာဒေန္တိ…ပေ… ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ၊ စေတောပရိယဉာဏေန နေဝသေက္ခနာသေက္ခစိတ္တသမင်္ဂိဿ စိတ္တံ ဇာနာတိ၊ အာကာသာနဉ္စာယတနံ ¶ ဝိညာဏဉ္စာယတနဿ…ပေ… အာကိဉ္စညာယတနံ နေဝသညာနာသညာယတနဿ အာရမ္မဏပစ္စယေန ပစ္စယော။ ရူပါယတနံ စက္ခုဝိညာဏဿ…ပေ… ဖောဋ္ဌဗ္ဗာယတနံ ကာယဝိညာဏဿ…ပေ… နေဝသေက္ခနာသေက္ခာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော။ (၁)

နေဝသေက္ခနာသေက္ခော ဓမ္မော သေက္ခဿ ဓမ္မဿ အာရမ္မဏပစ္စယေန ပစ္စယော – နိဗ္ဗာနံ မဂ္ဂဿ၊ သေက္ခဿ ဖလဿ အာရမ္မဏပစ္စယေန ပစ္စယော။ (၂)

နေဝသေက္ခနာသေက္ခော ဓမ္မော အသေက္ခဿ ဓမ္မဿ အာရမ္မဏပစ္စယေန ပစ္စယော – နိဗ္ဗာနံ အသေက္ခဿ ဖလဿ အာရမ္မဏပစ္စယေန ပစ္စယော။ (၃)

၄၅။ သေက္ခော ဓမ္မော သေက္ခဿ ဓမ္မဿ အဓိပတိပစ္စယေန ပစ္စယော။ သဟဇာတာဓိပတိ – သေက္ခာဓိပတိ သမ္ပယုတ္တကာနံ ခန္ဓာနံ အဓိပတိပစ္စယေန ပစ္စယော။ (၁)

သေက္ခော ဓမ္မော နေဝသေက္ခနာသေက္ခဿ ဓမ္မဿ အဓိပတိပစ္စယေန ပစ္စယော။ အာရမ္မဏာဓိပတိ၊ သဟဇာတာဓိပတိ။ အာရမ္မဏာဓိပတိ – အရိယာ မဂ္ဂါ ဝုဋ္ဌဟိတွာ မဂ္ဂံ ဂရုံ ကတွာ ပစ္စဝေက္ခန္တိ၊ သေက္ခံ ဖလံ ဂရုံ ကတွာ ပစ္စဝေက္ခန္တိ ¶ ။ သဟဇာတာဓိပတိ – သေက္ခာဓိပတိ စိတ္တသမုဋ္ဌာနာနံ ရူပါနံ အဓိပတိပစ္စယေန ပစ္စယော။ (၂)

သေက္ခော ¶ ဓမ္မော သေက္ခဿ စ နေဝသေက္ခနာသေက္ခဿ စ ဓမ္မဿ အဓိပတိပစ္စယေန ပစ္စယော။ သဟဇာတာဓိပတိ – သေက္ခာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော။ (၃)

၄၆။ အသေက္ခော ¶ ဓမ္မော အသေက္ခဿ ဓမ္မဿ အဓိပတိပစ္စယေန ပစ္စယော။ သဟဇာတာဓိပတိ – အသေက္ခာဓိပတိ သမ္ပယုတ္တကာနံ ခန္ဓာနံ အဓိပတိပစ္စယေန ပစ္စယော။ (၁)

အသေက္ခော ဓမ္မော နေဝသေက္ခနာသေက္ခဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ။ အာရမ္မဏာဓိပတိ – အရဟာ အသေက္ခံ ဖလံ ဂရုံ ကတွာ ပစ္စဝေက္ခတိ။ သဟဇာတာဓိပတိ – အသေက္ခာဓိပတိ စိတ္တသမုဋ္ဌာနာနံ ရူပါနံ အဓိပတိပစ္စယေန ပစ္စယော။ (၂)

အသေက္ခော ဓမ္မော အသေက္ခဿ စ နေဝသေက္ခနာသေက္ခဿ စ ဓမ္မဿ အဓိပတိပစ္စယေန ပစ္စယော။ သဟဇာတာဓိပတိ – အသေက္ခာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော။ (၃)

၄၇။ နေဝသေက္ခနာသေက္ခော ဓမ္မော နေဝသေက္ခနာသေက္ခဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ။ အာရမ္မဏာဓိပတိ – ဒါနံ ဒတွာ သီလံ သမာဒိယိတွာ ဥပေါသထကမ္မံ ကတွာ တံ ဂရုံ ကတွာ ပစ္စဝေက္ခတိ၊ ပုဗ္ဗေ သုစိဏ္ဏာနိ ဂရုံ ကတွာ ပစ္စဝေက္ခတိ၊ ဈာနာ ဝုဋ္ဌဟိတွာ ¶ ဈာနံ ဂရုံ ကတွာ ပစ္စဝေက္ခတိ၊ အရိယာ နိဗ္ဗာနံ ဂရုံ ကတွာ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ အဓိပတိပစ္စယေန ပစ္စယော။ စက္ခုံ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ။ သောတံ…ပေ… ဝတ္ထုံ နေဝသေက္ခနာသေက္ခေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ။ သဟဇာတာဓိပတိ – နေဝသေက္ခနာသေက္ခာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော။ (၁)

နေဝသေက္ခနာသေက္ခော ဓမ္မော သေက္ခဿ ဓမ္မဿ အဓိပတိပစ္စယေန ပစ္စယော။ အာရမ္မဏာဓိပတိ – နိဗ္ဗာနံ မဂ္ဂဿ၊ သေက္ခဿ ဖလဿ အဓိပတိပစ္စယေန ပစ္စယော။ (၂)

နေဝသေက္ခနာသေက္ခော ¶ ဓမ္မော အသေက္ခဿ ဓမ္မဿ အဓိပတိပစ္စယေန ပစ္စယော။ အာရမ္မဏာဓိပတိ – နိဗ္ဗာနံ အသေက္ခဿ ဖလဿ အဓိပတိပစ္စယေန ပစ္စယော။ (၃)

၄၈။ သေက္ခော ¶ ဓမ္မော သေက္ခဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ သေက္ခာ ခန္ဓာ ပစ္ဆိမာနံ ပစ္ဆိမာနံ သေက္ခာနံ ခန္ဓာနံ အနန္တရပစ္စယေန ပစ္စယော။ မဂ္ဂေါ သေက္ခဿ ဖလဿ… သေက္ခံ ဖလံ သေက္ခဿ ဖလဿ အနန္တရပစ္စယေန ပစ္စယော။ (၁)

သေက္ခော ဓမ္မော အသေက္ခဿ ဓမ္မဿ အနန္တရပစ္စယေန ပစ္စယော – မဂ္ဂေါ အသေက္ခဿ ဖလဿ အနန္တရပစ္စယေန ပစ္စယော။ (၂)

သေက္ခော ¶ ဓမ္မော နေဝသေက္ခနာသေက္ခဿ ဓမ္မဿ အနန္တရပစ္စယေန ပစ္စယော – သေက္ခံ ဖလံ ဝုဋ္ဌာနဿ အနန္တရပစ္စယေန ပစ္စယော။ (၃)

၄၉။ အသေက္ခော ဓမ္မော အသေက္ခဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ အသေက္ခာ ခန္ဓာ ပစ္ဆိမာနံ ပစ္ဆိမာနံ အသေက္ခာနံ ခန္ဓာနံ အနန္တရပစ္စယေန ပစ္စယော။ အသေက္ခံ ဖလံ အသေက္ခဿ ဖလဿ အနန္တရပစ္စယေန ပစ္စယော။ (၁)

အသေက္ခော ဓမ္မော နေဝသေက္ခနာသေက္ခဿ ဓမ္မဿ အနန္တရပစ္စယေန ပစ္စယော – အသေက္ခံ ဖလံ ဝုဋ္ဌာနဿ အနန္တရပစ္စယေန ပစ္စယော။ (၂)

၅၀။ နေဝသေက္ခနာသေက္ခော ဓမ္မော နေဝသေက္ခနာသေက္ခဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ နေဝသေက္ခနာသေက္ခာ ခန္ဓာ ပစ္ဆိမာနံ ပစ္ဆိမာနံ နေဝသေက္ခနာသေက္ခာနံ ခန္ဓာနံ…ပေ… အနုလောမံ ဂေါတြဘုဿ… အနုလောမံ ဝေါဒါနဿ… အာဝဇ္ဇနာ နေဝသေက္ခနာသေက္ခာနံ ခန္ဓာနံ အနန္တရပစ္စယေန ပစ္စယော။ (၁)

နေဝသေက္ခနာသေက္ခော ဓမ္မော သေက္ခဿ ဓမ္မဿ အနန္တရပစ္စယေန ပစ္စယော – ဂေါတြဘု မဂ္ဂဿ… ဝေါဒါနံ မဂ္ဂဿ… အနုလောမံ သေက္ခာယ ဖလသမာပတ္တိယာ… နိရောဓာ ဝုဋ္ဌဟန္တဿ နေဝသညာနာသညာယတနကုသလံ သေက္ခာယ ဖလသမာပတ္တိယာ အနန္တရပစ္စယေန ပစ္စယော။ (၂)

နေဝသေက္ခနာသေက္ခော ¶ ¶ ဓမ္မော အသေက္ခဿ ဓမ္မဿ အနန္တရပစ္စယေန ပစ္စယော – အနုလောမံ အသေက္ခာယ ဖလသမာပတ္တိယာ… နိရောဓာ ဝုဋ္ဌဟန္တဿ ¶ နေဝသညာနာသညာယတနကိရိယံ အသေက္ခာယ ဖလသမာပတ္တိယာ အနန္တရပစ္စယေန ပစ္စယော။ (၃)

၅၁။ သေက္ခော ဓမ္မော သေက္ခဿ ဓမ္မဿ သမနန္တရပစ္စယေန ပစ္စယော…ပေ… (အနန္တရသဒိသံ၊ အဋ္ဌ ပဉှာ)။

၅၂။ သေက္ခော ဓမ္မော သေက္ခဿ ဓမ္မဿ သဟဇာတပစ္စယေန ပစ္စယော…ပေ… (ပဋိစ္စဝါရေ သဟဇာတသဒိသံ၊ နဝ ပဉှာ) အညမညပစ္စယေန ပစ္စယော (ပဋိစ္စဝါရေ အညမညသဒိသံ၊ တီဏိ။ နိဿယပစ္စယေ ကုသလတ္တိကေ နိဿယပစ္စယသဒိသံ၊ တေရသ ပဉှာ)။

၅၃။ သေက္ခော ဓမ္မော သေက္ခဿ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော…ပေ…။ ပကတူပနိဿယော – ပဌမော မဂ္ဂေါ ဒုတိယဿ မဂ္ဂဿ ဥပနိဿယပစ္စယေန ပစ္စယော။ ဒုတိယော မဂ္ဂေါ တတိယဿ မဂ္ဂဿ ဥပနိဿယပစ္စယေန ပစ္စယော။ တတိယော မဂ္ဂေါ စတုတ္ထဿ မဂ္ဂဿ ဥပနိဿယပစ္စယေန ပစ္စယော။ မဂ္ဂေါ သေက္ခာယ ဖလသမာပတ္တိယာ ဥပနိဿယပစ္စယေန ပစ္စယော။ (၁)

သေက္ခော ဓမ္မော အသေက္ခဿ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော…ပေ…။ ပကတူပနိဿယော – မဂ္ဂေါ အသေက္ခာယ ဖလသမာပတ္တိယာ ဥပနိဿယပစ္စယေန ပစ္စယော။ (၂)

သေက္ခော ဓမ္မော နေဝသေက္ခနာသေက္ခဿ ဓမ္မဿ ဥပနိဿယပစ္စယေန ပစ္စယ – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော…ပေ…။ ပကတူပနိဿယော – အရိယာ မဂ္ဂံ ¶ ဥပနိဿာယ အနုပ္ပန္နံ ကုသလသမာပတ္တိံ ¶ ဥပ္ပာဒေန္တိ၊ ဥပ္ပန္နံ သမာပဇ္ဇန္တိ၊ သင်္ခါရေ အနိစ္စတော…ပေ… ဝိပဿန္တိ၊ မဂ္ဂေါ အရိယာနံ အတ္ထပ္ပဋိသမ္ဘိဒါယ…ပေ… ပဋိဘာနပ္ပဋိသမ္ဘိဒါယ… ဌာနာဌာနကောသလ္လဿ ¶ ဥပနိဿယပစ္စယေန ပစ္စယော။ သေက္ခာ ဖလသမာပတ္တိယာ ကာယိကဿ သုခဿ ဥပနိဿယပစ္စယေန ပစ္စယော။ (၃)

၅၄။ အသေက္ခော ဓမ္မော အသေက္ခဿ ဓမ္မဿ ဥပနိဿယပစ္စယေန ပစ္စယော။ အနန္တရူပနိဿယော – ပုရိမာ ပုရိမာ အသေက္ခာ ခန္ဓာ ပစ္ဆိမာနံ ပစ္ဆိမာနံ အသေက္ခာနံ ခန္ဓာနံ…ပေ… အသေက္ခံ ဖလံ အသေက္ခဿ ဖလဿ ဥပနိဿယပစ္စယေန ပစ္စယော။ (၁)

အသေက္ခော ဓမ္မော နေဝသေက္ခနာသေက္ခဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော…ပေ…။ ပကတူပနိဿယော – အသေက္ခာ ဖလသမာပတ္တိ ကာယိကဿ သုခဿ ဥပနိဿယပစ္စယေန ပစ္စယော။ (၂)

၅၅။ နေဝသေက္ခနာသေက္ခော ဓမ္မော နေဝသေက္ခနာသေက္ခဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော…ပေ…။ ပကတူပနိဿယော – နေဝသေက္ခနာသေက္ခံ သဒ္ဓံ ဥပနိဿာယ ဒါနံ ဒေတိ။ သီလံ…ပေ… ဥပေါသထကမ္မံ…ပေ… ဈာနံ…ပေ… ဝိပဿနံ…ပေ… အဘိညံ…ပေ… သမာပတ္တိံ ဥပ္ပာဒေတိ၊ မာနံ ဇပ္ပေတိ၊ ဒိဋ္ဌိံ ဂဏှာတိ။ နေဝသေက္ခနာသေက္ခံ သီလံ…ပေ… ပညံ… ရာဂံ…ပေ… ပတ္ထနံ… ကာယိကံ သုခံ…ပေ… ဥတုံ… ဘောဇနံ… သေနာသနံ ဥပနိဿာယ ဒါနံ ဒေတိ၊ သီလံ…ပေ… သမာပတ္တိံ ဥပ္ပာဒေတိ၊ ပါဏံ ဟနတိ…ပေ… သင်္ဃံ ဘိန္ဒတိ။ နေဝသေက္ခနာသေက္ခာ သဒ္ဓါ…ပေ… ပညာ၊ ရာဂေါ…ပေ… ပတ္ထနာ၊ ကာယိကံ သုခံ…ပေ… ¶ သေနာသနံ နေဝသေက္ခနာသေက္ခာယ သဒ္ဓါယ…ပေ… ပညာယ၊ ရာဂဿ…ပေ… ပတ္ထနာယ၊ ကာယိကဿ သုခဿ၊ ကာယိကဿ ဒုက္ခဿ ဥပနိဿယပစ္စယေန ပစ္စယော။ ပဌမဿ ဈာနဿ ပရိကမ္မံ ပဌမဿ ဈာနဿ ဥပနိဿယပစ္စယေန ပစ္စယော…ပေ… နေဝသညာနာသညာယတနဿ ပရိကမ္မံ နေဝသညာနာသညာယတနဿ…ပေ… ပဌမံ ဈာနံ ဒုတိယဿ ဈာနဿ ဥပနိဿယပစ္စယေန ပစ္စယော…ပေ… အာကိဉ္စညာယတနံ နေဝသညာနာသညာယတနဿ ဥပနိဿယပစ္စယေန ပစ္စယော။ (၁)

နေဝသေက္ခနာသေက္ခော ဓမ္မော သေက္ခဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော ¶ ၊ အနန္တရူပနိဿယော၊ ပကတူပနိဿယော…ပေ…။ ပကတူပနိဿယော – ပဌမဿ မဂ္ဂဿ ပရိကမ္မံ ပဌမဿ မဂ္ဂဿ ဥပနိဿယပစ္စယေန ပစ္စယော…ပေ… စတုတ္ထဿ မဂ္ဂဿ ပရိကမ္မံ စတုတ္ထဿ မဂ္ဂဿ ဥပနိဿယပစ္စယေန ပစ္စယော။ (၂)

နေဝသေက္ခနာသေက္ခော ¶ ဓမ္မော အသေက္ခဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော…ပေ…။ ပကတူပနိဿယော – ကာယိကံ သုခံ… ကာယိကံ ဒုက္ခံ… ဥတုံ… ဘောဇနံ… သေနာသနံ အသေက္ခာယ ဖလသမာပတ္တိယာ ဥပနိဿယပစ္စယေန ပစ္စယော။ (၃)

၅၆။ နေဝသေက္ခနာသေက္ခော ဓမ္မော နေဝသေက္ခနာသေက္ခဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ။ အာရမ္မဏပုရေဇာတံ – စက္ခုံ အနိစ္စတော…ပေ… ဝိပဿတိ၊ အဿာဒေတိ အဘိနန္ဒတိ၊ တံ အာရဗ္ဘ ရာဂေါ ဥပ္ပဇ္ဇတိ…ပေ… ဒေါမနဿံ ဥပ္ပဇ္ဇတိ။ သောတံ…ပေ… ဝတ္ထုံ အနိစ္စတော ဒုက္ခတော ¶ အနတ္တတော ဝိပဿတိ…ပေ… ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ၊ ရူပါယတနံ စက္ခုဝိညာဏဿ…ပေ… ဖောဋ္ဌဗ္ဗာယတနံ ကာယဝိညာဏဿ ပုရေဇာတပစ္စယေန ပစ္စယော။ ဝတ္ထုပုရေဇာတံ – စက္ခာယတနံ စက္ခုဝိညာဏဿ…ပေ… ကာယာယတနံ ကာယဝိညာဏဿ၊ ဝတ္ထု နေဝသေက္ခနာသေက္ခာနံ ခန္ဓာနံ ပုရေဇာတပစ္စယေန ပစ္စယော။ (၁)

နေဝသေက္ခနာသေက္ခော ဓမ္မော သေက္ခဿ ဓမ္မဿ ပုရေဇာတပစ္စယေန ပစ္စယော။ ဝတ္ထုပုရေဇာတံ – ဝတ္ထု သေက္ခာနံ ခန္ဓာနံ ပုရေဇာတပစ္စယေန ပစ္စယော။ (၂)

နေဝသေက္ခနာသေက္ခော ဓမ္မော အသေက္ခဿ ဓမ္မဿ ပုရေဇာတပစ္စယေန ပစ္စယော။ ဝတ္ထုပုရေဇာတံ – ဝတ္ထု အသေက္ခာနံ ခန္ဓာနံ ပုရေဇာတပစ္စယေန ပစ္စယော။ (၃)

၅၇။ သေက္ခော ¶ ဓမ္မော နေဝသေက္ခနာသေက္ခဿ ဓမ္မဿ ပစ္ဆာဇာတပစ္စယေန ပစ္စယော – ပစ္ဆာဇာတာ သေက္ခာ ခန္ဓာ ပုရေဇာတဿ ဣမဿ ကာယဿ ပစ္ဆာဇာတပစ္စယေန ပစ္စယော။ (၁)

အသေက္ခော ဓမ္မော နေဝသေက္ခနာသေက္ခဿ ဓမ္မဿ ပစ္ဆာဇာတပစ္စယေန ပစ္စယော – ပစ္ဆာဇာတာ အသေက္ခာ ခန္ဓာ ပုရေဇာတဿ ဣမဿ ကာယဿ ပစ္ဆာဇာတပစ္စယေန ပစ္စယော။ (၁)

နေဝသေက္ခနာသေက္ခော ¶ ဓမ္မော နေဝသေက္ခနာသေက္ခဿ ဓမ္မဿ ပစ္ဆာဇာတပစ္စယေန ပစ္စယော – ပစ္ဆာဇာတာ နေဝသေက္ခနာသေက္ခာ ¶ ခန္ဓာ ပုရေဇာတဿ ဣမဿ ကာယဿ ပစ္ဆာဇာတပစ္စယေန ပစ္စယော။ (၁)

၅၈။ နေဝသေက္ခနာသေက္ခော ဓမ္မော နေဝသေက္ခနာသေက္ခဿ ဓမ္မဿ အာသေဝနပစ္စယေန ပစ္စယော – ပုရိမာ ပုရိမာ နေဝသေက္ခနာသေက္ခာ ခန္ဓာ ပစ္ဆိမာနံ ပစ္ဆိမာနံ နေဝသေက္ခနာသေက္ခာနံ ခန္ဓာနံ အာသေဝနပစ္စယေန ပစ္စယော။ အနုလောမံ ဂေါတြဘုဿ… အနုလောမံ ဝေါဒါနဿ အာသေဝနပစ္စယေန ပစ္စယော။ (၁)

နေဝသေက္ခနာသေက္ခော ဓမ္မော သေက္ခဿ ဓမ္မဿ အာသေဝနပစ္စယေန ပစ္စယော – ဂေါတြဘု မဂ္ဂဿ… ဝေါဒါနံ မဂ္ဂဿ အာသေဝနပစ္စယေန ပစ္စယော။ (၂)

၅၉။ သေက္ခော ဓမ္မော သေက္ခဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ။ သဟဇာတာ – သေက္ခာ စေတနာ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော။ နာနာက္ခဏိကာ – သေက္ခာ စေတနာ ဝိပါကာနံ သေက္ခာနံ ခန္ဓာနံ ကမ္မပစ္စယေန ပစ္စယော။ (၁)

သေက္ခော ¶ ဓမ္မော အသေက္ခဿ ဓမ္မဿ ကမ္မပစ္စယေန ပစ္စယော။ နာနာက္ခဏိကာ – သေက္ခာ စေတနာ အသေက္ခာနံ ခန္ဓာနံ ကမ္မပစ္စယေန ပစ္စယော။ (၂)

သေက္ခော ဓမ္မော နေဝသေက္ခနာသေက္ခဿ ဓမ္မဿ ကမ္မပစ္စယေန ပစ္စယော။ သဟဇာတာ – သေက္ခာ စေတနာ စိတ္တသမုဋ္ဌာနာနံ ရူပါနံ ကမ္မပစ္စယေန ပစ္စယော။ (၃)

သေက္ခော ဓမ္မော သေက္ခဿ စ နေဝသေက္ခနာသေက္ခဿ စ ဓမ္မဿ ¶ ကမ္မပစ္စယေန ပစ္စယော – သေက္ခာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော။ (၄)

၆၀။ အသေက္ခော ဓမ္မော အသေက္ခဿ ဓမ္မဿ ကမ္မပစ္စယေန ပစ္စယော – အသေက္ခာ စေတနာ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော။ (၁)

အသေက္ခော ¶ ဓမ္မော နေဝသေက္ခနာသေက္ခဿ ဓမ္မဿ ကမ္မပစ္စယေန ပစ္စယော – အသေက္ခာ စေတနာ စိတ္တသမုဋ္ဌာနာနံ ရူပါနံ ကမ္မပစ္စယေန ပစ္စယော။ (၂)

အသေက္ခော ဓမ္မော အသေက္ခဿ စ နေဝသေက္ခနာသေက္ခဿ စ ဓမ္မဿ ကမ္မပစ္စယေန ပစ္စယော – အသေက္ခာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော။ (၃)

၆၁။ နေဝသေက္ခနာသေက္ခော ဓမ္မော နေဝသေက္ခနာသေက္ခဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ။ သဟဇာတာ – နေဝသေက္ခနာသေက္ခာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော။ ပဋိသန္ဓိက္ခဏေ…ပေ…။ နာနာက္ခဏိကာ – နေဝသေက္ခနာသေက္ခာ စေတနာ ဝိပါကာနံ နေဝသေက္ခနာသေက္ခာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော။ (၁)

၆၂။ သေက္ခော ¶ ဓမ္မော သေက္ခဿ ဓမ္မဿ ဝိပါကပစ္စယေန ပစ္စယော – ဝိပါကော သေက္ခော ဧကော ခန္ဓော တိဏ္ဏန္နံ ခန္ဓာနံ…ပေ… (သေက္ခမူလကေ တီဏိ )။

အသေက္ခော ¶ ဓမ္မော အသေက္ခဿ ဓမ္မဿ ဝိပါကပစ္စယေန ပစ္စယော – အသေက္ခော ဧကော ခန္ဓော တိဏ္ဏန္နံ ခန္ဓာနံ…ပေ… (အသေက္ခမူလကေ တီဏိ)။

နေဝသေက္ခနာသေက္ခော ဓမ္မော နေဝသေက္ခနာသေက္ခဿ ဓမ္မဿ ဝိပါကပစ္စယေန ပစ္စယော – ဝိပါကော နေဝသေက္ခနာသေက္ခော ဧကော ခန္ဓော တိဏ္ဏန္နံ ခန္ဓာနံ…ပေ… ပဋိသန္ဓိက္ခဏေ…ပေ… ခန္ဓာ ဝတ္ထုဿ ဝိပါကပစ္စယေန ပစ္စယော။ (၁)

၆၃။ သေက္ခော ဓမ္မော သေက္ခဿ ဓမ္မဿ အာဟာရပစ္စယေန ပစ္စယော… ဣန္ဒြိယပစ္စယေန ပစ္စယော… ဈာနပစ္စယေန ပစ္စယော… မဂ္ဂပစ္စယေန ပစ္စယော… သမ္ပယုတ္တပစ္စယေန ပစ္စယော…ပေ…။

၆၄။ သေက္ခော ¶ ဓမ္မော နေဝသေက္ခနာသေက္ခဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ။ သဟဇာတာ – သေက္ခာ ခန္ဓာ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော။ ပစ္ဆာဇာတာ – သေက္ခာ ခန္ဓာ ပုရေဇာတဿ ဣမဿ ကာယဿ ဝိပ္ပယုတ္တပစ္စယေန ပစ္စယော (၁)။

အသေက္ခော ဓမ္မော နေဝသေက္ခနာသေက္ခဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ (သေက္ခသဒိသံ)။

နေဝသေက္ခနာသေက္ခော ဓမ္မော နေဝသေက္ခနာသေက္ခဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ ¶ ၊ ပုရေဇာတံ၊ ပစ္ဆာဇာတံ။ သဟဇာတာ – နေဝသေက္ခနာသေက္ခာ ခန္ဓာ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော။ ပဋိသန္ဓိက္ခဏေ နေဝသေက္ခနာသေက္ခာ ခန္ဓာ ကဋတ္တာရူပါနံ ¶ ဝိပ္ပယုတ္တပစ္စယေန ပစ္စယော။ ခန္ဓာ ဝတ္ထုဿ ဝိပ္ပယုတ္တပစ္စယေန ပစ္စယော။ ဝတ္ထု ခန္ဓာနံ ဝိပ္ပယုတ္တပစ္စယေန ပစ္စယော။ ပုရေဇာတံ – စက္ခာယတနံ စက္ခုဝိညာဏဿ…ပေ… ကာယာယတနံ ကာယဝိညာဏဿ၊ ဝတ္ထု နေဝသေက္ခနာသေက္ခာနံ ခန္ဓာနံ ဝိပ္ပယုတ္တပစ္စယေန ပစ္စယော။ ပစ္ဆာဇာတာ – နေဝသေက္ခနာသေက္ခာ ခန္ဓာ ပုရေဇာတဿ ဣမဿ ကာယဿ ဝိပ္ပယုတ္တပစ္စယေန ပစ္စယော။ (၁)

နေဝသေက္ခနာသေက္ခော ဓမ္မော သေက္ခဿ ဓမ္မဿ ဝိပ္ပယုတ္တပစ္စယေန ပစ္စယော။ ပုရေဇာတံ – ဝတ္ထု သေက္ခာနံ ခန္ဓာနံ ဝိပ္ပယုတ္တပစ္စယေန ပစ္စယော။ (၂)

နေဝသေက္ခနာသေက္ခော ဓမ္မော အသေက္ခဿ ဓမ္မဿ ဝိပ္ပယုတ္တပစ္စယေန ပစ္စယော။ ပုရေဇာတံ – ဝတ္ထု အသေက္ခာနံ ခန္ဓာနံ ဝိပ္ပယုတ္တပစ္စယေန ပစ္စယော။ (၃)

၆၅။ သေက္ခော ဓမ္မော သေက္ခဿ ဓမ္မဿ အတ္ထိပစ္စယေန ပစ္စယော – သေက္ခော ဧကော ခန္ဓော တိဏ္ဏန္နံ ခန္ဓာနံ…ပေ…။ (၁)

သေက္ခော ဓမ္မော နေဝသေက္ခနာသေက္ခဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပစ္ဆာဇာတံ။ သဟဇာတာ – သေက္ခာ ခန္ဓာ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော။ ပစ္ဆာဇာတာ – သေက္ခာ ခန္ဓာ ပုရေဇာတဿ ဣမဿ ကာယဿ အတ္ထိပစ္စယေန ပစ္စယော။ (၂)

သေက္ခော ¶ ဓမ္မော သေက္ခဿ စ နေဝသေက္ခနာသေက္ခဿ စ ဓမ္မဿ ¶ အတ္ထိပစ္စယေန ပစ္စယော – သေက္ခော ဧကော ခန္ဓော တိဏ္ဏန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော…ပေ… ဒွေ ခန္ဓာ…ပေ…။ (၃)

အသေက္ခော ဓမ္မော အသေက္ခဿ ဓမ္မဿ အတ္ထိပစ္စယေန ပစ္စယော…ပေ… တီဏိ (သေက္ခသဒိသံ)။

၆၆။ နေဝသေက္ခနာသေက္ခော ¶ ဓမ္မော နေဝသေက္ခနာသေက္ခဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ။ သဟဇာတော – နေဝသေက္ခနာသေက္ခော ဧကော ခန္ဓော တိဏ္ဏန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော…ပေ… ဒွေ ခန္ဓာ…ပေ… ပဋိသန္ဓိက္ခဏေ…ပေ… ခန္ဓာ ဝတ္ထုဿ အတ္ထိပစ္စယေန ပစ္စယော။ ဝတ္ထု ခန္ဓာနံ အတ္ထိပစ္စယေန ပစ္စယော၊ ဧကံ မဟာဘူတံ…ပေ… ဗာဟိရံ…ပေ… အသညသတ္တာနံ…ပေ…။ ပုရေဇာတံ – စက္ခုံ အနိစ္စတော ဒုက္ခတော အနတ္တတော ဝိပဿတိ၊ အဿာဒေတိ အဘိနန္ဒတိ၊ တံ အာရဗ္ဘ ရာဂေါ ဥပ္ပဇ္ဇတိ…ပေ… ဒေါမနဿံ ဥပ္ပဇ္ဇတိ။ သောတံ…ပေ… ဝတ္ထုံ အနိစ္စတော…ပေ… ဝိပဿတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ၊ ရူပါယတနံ စက္ခုဝိညာဏဿ…ပေ… ဖောဋ္ဌဗ္ဗာယတနံ ကာယဝိညာဏဿ…ပေ… စက္ခာယတနံ စက္ခုဝိညာဏဿ…ပေ… ကာယာယတနံ ကာယဝိညာဏဿ… ဝတ္ထု နေဝသေက္ခနာသေက္ခာနံ ခန္ဓာနံ အတ္ထိပစ္စယေန ပစ္စယော။ ပစ္ဆာဇာတာ – နေဝသေက္ခနာသေက္ခာ ခန္ဓာ ပုရေဇာတဿ ဣမဿ ကာယဿ အတ္ထိပစ္စယေန ပစ္စယော။ ကဗဠီကာရော အာဟာရော ဣမဿ ကာယဿ အတ္ထိပစ္စယေန ပစ္စယော။ ရူပဇီဝိတိန္ဒြိယံ ¶ ကဋတ္တာရူပါနံ အတ္ထိပစ္စယေန ပစ္စယော။ (၁)

နေဝသေက္ခနာသေက္ခော ဓမ္မော သေက္ခဿ ဓမ္မဿ အတ္ထိပစ္စယေန ပစ္စယော။ ပုရေဇာတံ – ဝတ္ထု သေက္ခာနံ ခန္ဓာနံ အတ္ထိပစ္စယေန ပစ္စယော။ (၂)

နေဝသေက္ခနာသေက္ခော ဓမ္မော အသေက္ခဿ ဓမ္မဿ အတ္ထိပစ္စယေန ပစ္စယော။ ပုရေဇာတံ – ဝတ္ထု အသေက္ခာနံ ခန္ဓာနံ အတ္ထိပစ္စယေန ပစ္စယော။ (၃)

၆၇။ သေက္ခော စ နေဝသေက္ခနာသေက္ခော စ ဓမ္မာ သေက္ခဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ။ သဟဇာတော – သေက္ခော ¶ ဧကော ခန္ဓော စ ဝတ္ထု စ တိဏ္ဏန္နံ ခန္ဓာနံ အတ္ထိပစ္စယေန ပစ္စယော…ပေ… ဒွေ ခန္ဓာ…ပေ…။ (၁)

သေက္ခော စ နေဝသေက္ခနာသေက္ခော စ ဓမ္မာ နေဝသေက္ခနာသေက္ခဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ။ သဟဇာတာ – သေက္ခာ ခန္ဓာ စ မဟာဘူတာ စ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော။ ပစ္ဆာဇာတာ – သေက္ခာ ခန္ဓာ စ ကဗဠီကာရော ¶ အာဟာရော စ ဣမဿ ကာယဿ အတ္ထိပစ္စယေန ပစ္စယော။ ပစ္ဆာဇာတာ – သေက္ခာ ခန္ဓာ စ ရူပဇီဝိတိန္ဒြိယဉ္စ ကဋတ္တာရူပါနံ အတ္ထိပစ္စယေန ပစ္စယော။ (၂)

အသေက္ခော စ နေဝသေက္ခနာသေက္ခော စ ဓမ္မာ အသေက္ခဿ ဓမ္မဿ အတ္ထိပစ္စယေန ပစ္စယော…ပေ… (ဒွေ ပဉှာ ကာတဗ္ဗာ၊ သေက္ခသဒိသာ)။

၆၈။ ဟေတုယာ ¶ သတ္တ၊ အာရမ္မဏေ ပဉ္စ၊ အဓိပတိယာ နဝ၊ အနန္တရေ အဋ္ဌ၊ သမနန္တရေ အဋ္ဌ၊ သဟဇာတေ နဝ၊ အညမညေ တီဏိ၊ နိဿယေ တေရသ၊ ဥပနိဿယေ အဋ္ဌ၊ ပုရေဇာတေ တီဏိ၊ ပစ္ဆာဇာတေ တီဏိ၊ အာသေဝနေ ဒွေ၊ ကမ္မေ အဋ္ဌ၊ ဝိပါကေ အာဟာရေ ဣန္ဒြိယေ ဈာနေ မဂ္ဂေ သတ္တ၊ သမ္ပယုတ္တေ တီဏိ၊ ဝိပ္ပယုတ္တေ ပဉ္စ၊ အတ္ထိယာ တေရသ၊ နတ္ထိယာ အဋ္ဌ၊ ဝိဂတေ အဋ္ဌ၊ အဝိဂတေ တေရသ (ဧဝံ ဂဏေတဗ္ဗံ)။

၆၉။ သေက္ခော ဓမ္မော သေက္ခဿ ဓမ္မဿ သဟဇာတပစ္စယေန ပစ္စယော… ဥပနိဿယပစ္စယေန ပစ္စယော။ (၁)

သေက္ခော ဓမ္မော အသေက္ခဿ ဓမ္မဿ ဥပနိဿယပစ္စယေန ပစ္စယော။ (၂)

သေက္ခော ဓမ္မော နေဝသေက္ခနာသေက္ခဿ ဓမ္မဿ အာရမ္မဏပစ္စယေန ပစ္စယော… သဟဇာတပစ္စယေန ပစ္စယော… ဥပနိဿယပစ္စယေန ပစ္စယော… ပစ္ဆာဇာတပစ္စယေန ပစ္စယော။ (၃)

သေက္ခော ဓမ္မော သေက္ခဿ စ နေဝသေက္ခနာသေက္ခဿ စ ဓမ္မဿ သဟဇာတပစ္စယေန ပစ္စယော။ (၄)

၇၀။ အသေက္ခော ¶ ¶ ဓမ္မော အသေက္ခဿ ဓမ္မဿ သဟဇာတပစ္စယေန ပစ္စယော… ဥပနိဿယပစ္စယေန ပစ္စယော။ (၁)

အသေက္ခော ဓမ္မော နေဝသေက္ခနာသေက္ခဿ ဓမ္မဿ အာရမ္မဏပစ္စယေန ပစ္စယော… သဟဇာတပစ္စယေန ပစ္စယော… ဥပနိဿယပစ္စယေန ¶ ပစ္စယော… ပစ္ဆာဇာတပစ္စယေန ပစ္စယော။ (၂)

အသေက္ခော ဓမ္မော အသေက္ခဿ စ နေဝသေက္ခနာသေက္ခဿ စ ဓမ္မဿ သဟဇာတပစ္စယေန ပစ္စယော။ (၃)

၇၁။ နေဝသေက္ခနာသေက္ခော ဓမ္မော နေဝသေက္ခနာသေက္ခဿ ဓမ္မဿ အာရမ္မဏပစ္စယေန ပစ္စယော… သဟဇာတပစ္စယေန ပစ္စယော… ဥပနိဿယပစ္စယေန ပစ္စယော… ပုရေဇာတပစ္စယေန ပစ္စယော… ပစ္ဆာဇာတပစ္စယေန ပစ္စယော… ကမ္မပစ္စယေန ပစ္စယော… အာဟာရပစ္စယေန ပစ္စယော… ဣန္ဒြိယပစ္စယေန ပစ္စယော။ (၁)

နေဝသေက္ခနာသေက္ခော ဓမ္မော သေက္ခဿ ဓမ္မဿ ဥပနိဿယပစ္စယေန ပစ္စယော… ပုရေဇာတပစ္စယေန ပစ္စယော။ (၂)

နေဝသေက္ခနာသေက္ခော ဓမ္မော အသေက္ခဿ ဓမ္မဿ ဥပနိဿယပစ္စယေန ပစ္စယော… ပုရေဇာတပစ္စယေန ပစ္စယော။ (၃)

၇၂။ သေက္ခော စ နေဝသေက္ခနာသေက္ခော စ ဓမ္မာ သေက္ခဿ ဓမ္မဿ သဟဇာတံ၊ ပုရေဇာတံ။ (၁)

သေက္ခော စ နေဝသေက္ခနာသေက္ခော စ ဓမ္မာ နေဝသေက္ခနာသေက္ခဿ ဓမ္မဿ သဟဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ။ (၂)

အသေက္ခော စ နေဝသေက္ခနာသေက္ခော စ ဓမ္မာ အသေက္ခဿ ဓမ္မဿ သဟဇာတံ၊ ပုရေဇာတံ။ (၁)

အသေက္ခော ¶ စ နေဝသေက္ခနာသေက္ခော စ ဓမ္မာ နေဝသေက္ခနာသေက္ခဿ ဓမ္မဿ သဟဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ။ (၂)

၇၃။ နဟေတုယာ ¶ စုဒ္ဒသ၊ နအာရမ္မဏေ နအဓိပတိယာ နအနန္တရေ နသမနန္တရေ စုဒ္ဒသ၊ နသဟဇာတေ ဒသ၊ နအညမညေ ဒသ၊ နနိဿယေ ဒသ ¶ ၊ နဥပနိဿယေ တေရသ၊ နပုရေဇာတေ ဒွါဒသ၊ နပစ္ဆာဇာတေ စုဒ္ဒသ၊ နအာသေဝနေ နကမ္မေ စုဒ္ဒသ၊ နဝိပါကေ ဒွါဒသ၊ နအာဟာရေ နဣန္ဒြိယေ နဈာနေ နမဂ္ဂေ စုဒ္ဒသ၊ နသမ္ပယုတ္တေ ဒသ၊ နဝိပ္ပယုတ္တေ အဋ္ဌ၊ နောအတ္ထိယာ အဋ္ဌ၊ နောနတ္ထိယာ စုဒ္ဒသ၊ နောဝိဂတေ စုဒ္ဒသ၊ နောအဝိဂတေ အဋ္ဌ (ဧဝံ ဂဏေတဗ္ဗံ)။

၇၄။ ဟေတုပစ္စယာ နအာရမ္မဏေ သတ္တ၊ နအဓိပတိယာ သတ္တ၊ နအနန္တရေ သတ္တ၊ နသမနန္တရေ သတ္တ၊ နအညမညေ တီဏိ၊ နဥပနိဿယေ နပုရေဇာတေ နပစ္ဆာဇာတေ နအာသေဝနေ နကမ္မေ သတ္တ၊ နဝိပါကေ စတ္တာရိ၊ နအာဟာရေ နဣန္ဒြိယေ နဈာနေ နမဂ္ဂေ သတ္တ၊ နသမ္ပယုတ္တေ တီဏိ၊ နဝိပ္ပယုတ္တေ တီဏိ၊ နောနတ္ထိယာ သတ္တ၊ နောဝိဂတေ သတ္တ (ဧဝံ ဂဏေတဗ္ဗံ)။

၇၅။ နဟေတုပစ္စယာ ¶ အာရမ္မဏေ ပဉ္စ၊ အဓိပတိယာ နဝ၊ အနန္တရေ အဋ္ဌ၊ သမနန္တရေ အဋ္ဌ၊ သဟဇာတေ နဝ၊ အညမညေ တီဏိ၊ နိဿယေ တေရသ၊ ဥပနိဿယေ အဋ္ဌ၊ ပုရေဇာတေ တီဏိ၊ ပစ္ဆာဇာတေ တီဏိ၊ အာသေဝနေ ဒွေ၊ ကမ္မေ အဋ္ဌ၊ ဝိပါကေ အာဟာရေ ဣန္ဒြိယေ ဈာနေ မဂ္ဂေ သတ္တ၊ သမ္ပယုတ္တေ တီဏိ၊ ဝိပ္ပယုတ္တေ ပဉ္စ၊ အတ္ထိယာ တေရသ၊ နတ္ထိယာ ¶ အဋ္ဌ၊ ဝိဂတေ အဋ္ဌ၊ အဝိဂတေ တေရသ (ဧဝံ ဂဏေတဗ္ဗံ)။