မူလ > အဘိဓမ္မပိဋက > ပဋ္ဌာနပါဠိ-၃ > ၁၁။ ဥပါဒါနဂေါစ္ဆကံ

၁။ ဥပါဒါနံ ¶ ¶ ဓမ္မံ ပဋိစ္စ ဥပါဒါနော ဓမ္မော ဥပ္ပဇ္ဇတိ ဟေတုပစ္စယာ – ဒိဋ္ဌုပါဒါနံ ပဋိစ္စ ကာမုပါဒါနံ၊ ကာမုပါဒါနံ ပဋိစ္စ ဒိဋ္ဌုပါဒါနံ ¶ ၊ သီလဗ္ဗတုပါဒါနံ ပဋိစ္စ ကာမုပါဒါနံ၊ ကာမုပါဒါနံ ပဋိစ္စ သီလဗ္ဗတုပါဒါနံ၊ အတ္တဝါဒုပါဒါနံ ပဋိစ္စ ကာမုပါဒါနံ၊ ကာမုပါဒါနံ ပဋိစ္စ အတ္တဝါဒုပါဒါနံ။ (၁)

ဥပါဒါနံ ဓမ္မံ ပဋိစ္စ နောဥပါဒါနော ဓမ္မော ဥပ္ပဇ္ဇတိ ဟေတုပစ္စယာ – ဥပါဒါနေ ပဋိစ္စ သမ္ပယုတ္တကာ ခန္ဓာ စိတ္တသမုဋ္ဌာနဉ္စ ရူပံ။ (၂)

ဥပါဒါနံ ဓမ္မံ ပဋိစ္စ ဥပါဒါနော စ နောဥပါဒါနော စ ဓမ္မာ ဥပ္ပဇ္ဇန္တိ ဟေတုပစ္စယာ – ဒိဋ္ဌုပါဒါနံ ပဋိစ္စ ကာမုပါဒါနံ သမ္ပယုတ္တကာ စ ခန္ဓာ စိတ္တသမုဋ္ဌာနဉ္စ ရူပံ၊ ကာမုပါဒါနံ…ပေ… (သဗ္ဗံ စက္ကံ ကာတဗ္ဗံ)။ (၃)

၂။ နောဥပါဒါနံ ¶ ဓမ္မံ ပဋိစ္စ နောဥပါဒါနော ဓမ္မော ဥပ္ပဇ္ဇတိ ဟေတုပစ္စယာ – နောဥပါဒါနံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ…ပေ… ဒွေ ခန္ဓေ…ပေ… ပဋိသန္ဓိက္ခဏေ နောဥပါဒါနံ ဧကံ ခန္ဓံ ပဋိစ္စ တယော ခန္ဓာ ကဋတ္တာ စ ရူပံ…ပေ… ဒွေ ခန္ဓေ…ပေ… ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ၊ ဧကံ မဟာဘူတံ…ပေ… မဟာဘူတေ ပဋိစ္စ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ။ (၁)

နောဥပါဒါနံ ဓမ္မံ ပဋိစ္စ ဥပါဒါနော ဓမ္မော ဥပ္ပဇ္ဇတိ ဟေတုပစ္စယာ – နောဥပါဒါနေ ခန္ဓေ ပဋိစ္စ ဥပါဒါနာ။ (၂)

နောဥပါဒါနံ ဓမ္မံ ပဋိစ္စ ဥပါဒါနော စ နောဥပါဒါနော စ ဓမ္မာ ဥပ္ပဇ္ဇန္တိ ဟေတုပစ္စယာ – နောဥပါဒါနံ ဧကံ ခန္ဓံ ပဋိစ္စ တယော ခန္ဓာ ဥပါဒါနာ စ စိတ္တသမုဋ္ဌာနဉ္စ ရူပံ…ပေ… ဒွေ ခန္ဓေ ပဋိစ္စ ဒွေ ခန္ဓာ ဥပါဒါနာ စ စိတ္တသမုဋ္ဌာနဉ္စ ရူပံ။ (၃)

၃။ ဥပါဒါနဉ္စ ¶ နောဥပါဒါနဉ္စ ဓမ္မံ ပဋိစ္စ ဥပါဒါနော ဓမ္မော ¶ ဥပ္ပဇ္ဇတိ ဟေတုပစ္စယာ – ဒိဋ္ဌုပါဒါနဉ္စ သမ္ပယုတ္တကေ စ ခန္ဓေ ပဋိစ္စ ကာမုပါဒါနံ (သဗ္ဗေ စက္ကာ ကာတဗ္ဗာ)။ (၁)

ဥပါဒါနဉ္စ နောဥပါဒါနဉ္စ ဓမ္မံ ပဋိစ္စ နောဥပါဒါနော ဓမ္မော ဥပ္ပဇ္ဇတိ ဟေတုပစ္စယာ – နောဥပါဒါနံ ဧကံ ခန္ဓဉ္စ ဥပါဒါနဉ္စ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ၊ ဒွေ ခန္ဓေ စ…ပေ… ဥပါဒါနဉ္စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ။ (၂)

ဥပါဒါနဉ္စ နောဥပါဒါနဉ္စ ဓမ္မံ ပဋိစ္စ ဥပါဒါနော စ နောဥပါဒါနော စ ဓမ္မာ ဥပ္ပဇ္ဇန္တိ ဟေတုပစ္စယာ – နောဥပါဒါနံ ဧကံ ခန္ဓဉ္စ ဒိဋ္ဌုပါဒါနဉ္စ ပဋိစ္စ တယော ခန္ဓာ ကာမုပါဒါနဉ္စ စိတ္တသမုဋ္ဌာနံ ရူပံ၊ ဒွေ ခန္ဓေ စ…ပေ… (စက္ကံ ကာတဗ္ဗံ)။ (၃)

၄။ ဥပါဒါနံ ဓမ္မံ ပဋိစ္စ ဥပါဒါနော ဓမ္မော ဥပ္ပဇ္ဇတိ အာရမ္မဏပစ္စယာ (နဝပိ ပဉှာ ကာတဗ္ဗာ၊ ရူပံ ဆဍ္ဍေတဗ္ဗံ)။

၅။ ဟေတုယာ ¶ နဝ၊ အာရမ္မဏေ နဝ၊ အဓိပတိယာ နဝ (သဗ္ဗတ္ထ နဝ)၊ ဝိပါကေ ဧကံ…ပေ… အဝိဂတေ နဝ။

၆။ နောဥပါဒါနံ ဓမ္မံ ပဋိစ္စ နောဥပါဒါနော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ နောဥပါဒါနံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ…ပေ… ဒွေ ခန္ဓေ…ပေ… အဟေတုကပဋိသန္ဓိက္ခဏေ…ပေ… ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ၊ ဧကံ မဟာဘူတံ…ပေ… မဟာဘူတေ ပဋိစ္စ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ၊ ဗာဟိရံ… အာဟာရသမုဋ္ဌာနံ… ¶ ဥတုသမုဋ္ဌာနံ… အသညသတ္တာနံ…ပေ… ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော။ (၁)

၇။ ဥပါဒါနံ ¶ ဓမ္မံ ပဋိစ္စ နောဥပါဒါနော ဓမ္မော ဥပ္ပဇ္ဇတိ နအာရမ္မဏပစ္စယာ – ဥပါဒါနေ ပဋိစ္စ စိတ္တသမုဋ္ဌာနံ ရူပံ။ (၁)

နောဥပါဒါနံ ဓမ္မံ ပဋိစ္စ နောဥပါဒါနော ဓမ္မော ဥပ္ပဇ္ဇတိ နအာရမ္မဏပစ္စယာ – နောဥပါဒါနေ ခန္ဓေ ပဋိစ္စ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ နောဥပါဒါနေ ခန္ဓေ ပဋိစ္စ ကဋတ္တာရူပံ၊ ခန္ဓေ ပဋိစ္စ ဝတ္ထု၊ ဧကံ မဟာဘူတံ…ပေ… (ယာဝ အသညသတ္တာ)။ (၁)

ဥပါဒါနဉ္စ နောဥပါဒါနံ စ ဓမ္မံ ပဋိစ္စ နောဥပါဒါနော ဓမ္မော ဥပ္ပဇ္ဇတိ နအာရမ္မဏပစ္စယာ ¶ – ဥပါဒါနေ စ သမ္ပယုတ္တကေ စ ခန္ဓေ ပဋိစ္စ စိတ္တသမုဋ္ဌာနံ ရူပံ၊ ဥပါဒါနေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ။ (၁)

နအဓိပတိပစ္စယာ… နအနန္တရပစ္စယာ…ပေ… နဥပနိဿယပစ္စယာ။

၈။ ဥပါဒါနံ ဓမ္မံ ပဋိစ္စ ဥပါဒါနော ဓမ္မော ဥပ္ပဇ္ဇတိ နပုရေဇာတပစ္စယာ – အရူပေ အတ္တဝါဒုပါဒါနံ ပဋိစ္စ ကာမုပါဒါနံ၊ ကာမုပါဒါနံ ပဋိစ္စ အတ္တဝါဒုပါဒါနံ။ (၁)

ဥပါဒါနံ ဓမ္မံ ပဋိစ္စ နောဥပါဒါနော ဓမ္မော ဥပ္ပဇ္ဇတိ နပုရေဇာတပစ္စယာ – အရူပေ ဥပါဒါနေ ပဋိစ္စ သမ္ပယုတ္တကာ ခန္ဓာ၊ ဥပါဒါနေ ပဋိစ္စ စိတ္တသမုဋ္ဌာနံ ရူပံ (သံခိတ္တံ၊ နဝပိ ပဉှာ အရူပေ ဒွေ ဥပါဒါနာ)။

၉။ နဟေတုယာ ¶ ဧကံ၊ နအာရမ္မဏေ တီဏိ၊ နအဓိပတိယာ နဝ၊ နအနန္တရေ တီဏိ…ပေ… နဥပနိဿယေ တီဏိ၊ နပုရေဇာတေ နဝ၊ နပစ္ဆာဇာတေ နဝ၊ နအာသေဝနေ နဝ၊ နကမ္မေ တီဏိ၊ နဝိပါကေ နဝ၊ နအာဟာရေ ဧကံ၊ နဣန္ဒြိယေ ဧကံ၊ နဈာနေ ဧကံ၊ နမဂ္ဂေ ဧကံ၊ နသမ္ပယုတ္တေ တီဏိ၊ နဝိပ္ပယုတ္တေ နဝ၊ နောနတ္ထိယာ တီဏိ၊ နောဝိဂတေ တီဏိ။

၁၀။ ဟေတုပစ္စယာ ¶ နအာရမ္မဏေ တီဏိ၊ နအဓိပတိယာ နဝ…ပေ… နဥပနိဿယေ တီဏိ၊ နပုရေဇာတေ နဝ၊ နပစ္ဆာဇာတေ နဝ၊ နအာသေဝနေ နဝ၊ နကမ္မေ တီဏိ၊ နဝိပါကေ နဝ၊ နသမ္ပယုတ္တေ တီဏိ၊ နဝိပ္ပယုတ္တေ နဝ၊ နောနတ္ထိယာ တီဏိ၊ နောဝိဂတေ တီဏိ။

၁၁။ နဟေတုပစ္စယာ ¶ အာရမ္မဏေ ဧကံ (သဗ္ဗတ္ထ ဧကံ)၊ မဂ္ဂေ ဧကံ…ပေ… အဝိဂတေ ဧကံ။

(သဟဇာတဝါရော ပဋိစ္စဝါရသဒိသော ဝိဘဇန္တေန ဒိဋ္ဌုပါဒါနံ ‘‘သဟဇာတံ ကာမုပါဒါန’’န္တိ ကာတဗ္ဗံ။)

၁၂။ ဥပါဒါနံ ဓမ္မံ ပစ္စယာ ဥပါဒါနော ဓမ္မော ဥပ္ပဇ္ဇတိ ဟေတုပစ္စယာ – ဒိဋ္ဌုပါဒါနံ ပစ္စယာ ကာမုပါဒါနံ… တီဏိ (ပဋိစ္စသဒိသာ)။

နောဥပါဒါနံ ဓမ္မံ ပစ္စယာ နောဥပါဒါနော ဓမ္မော ဥပ္ပဇ္ဇတိ ဟေတုပစ္စယာ – နောဥပါဒါနံ ဧကံ ခန္ဓံ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ…ပေ… ဒွေ ခန္ဓေ…ပေ… ပဋိသန္ဓိက္ခဏေ…ပေ… ခန္ဓေ ပစ္စယာ ဝတ္ထု…ပေ… (ယာဝ ¶ အဇ္ဈတ္တိကာ မဟာဘူတာ) ဝတ္ထုံ ပစ္စယာ နောဥပါဒါနာ ခန္ဓာ။ (၁)

နောဥပါဒါနံ ဓမ္မံ ပစ္စယာ ဥပါဒါနော ဓမ္မော ဥပ္ပဇ္ဇတိ ဟေတုပစ္စယာ – နောဥပါဒါနေ ခန္ဓေ ပစ္စယာ ဥပါဒါနာ၊ ဝတ္ထုံ ပစ္စယာ ဥပါဒါနာ။ (၂)

နောဥပါဒါနံ ဓမ္မံ ပစ္စယာ ဥပါဒါနော စ နောဥပါဒါနော စ ဓမ္မာ ဥပ္ပဇ္ဇန္တိ ဟေတုပစ္စယာ – နောဥပါဒါနံ ဧကံ ခန္ဓံ ပစ္စယာ တယော ခန္ဓာ ဥပါဒါနာ စ စိတ္တသမုဋ္ဌာနဉ္စ ရူပံ…ပေ… ဒွေ ခန္ဓေ…ပေ… ဝတ္ထုံ ပစ္စယာ ဥပါဒါနာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ၊ ဝတ္ထုံ ပစ္စယာ ဥပါဒါနာ သမ္ပယုတ္တကာ စ ခန္ဓာ။ (၃)

၁၃။ ဥပါဒါနဉ္စ ¶ နောဥပါဒါနဉ္စ ဓမ္မံ ပစ္စယာ ဥပါဒါနော ဓမ္မော ဥပ္ပဇ္ဇတိ ဟေတုပစ္စယာ – ဒိဋ္ဌုပါဒါနဉ္စ သမ္ပယုတ္တကေ စ ခန္ဓေ ပစ္စယာ ကာမုပါဒါနံ၊ ကာမုပါဒါနဉ္စ သမ္ပယုတ္တကေ ¶ စ ခန္ဓေ ပစ္စယာ ဒိဋ္ဌုပါဒါနံ (စက္ကံ ကာတဗ္ဗံ)။ ဒိဋ္ဌုပါဒါနဉ္စ ဝတ္ထုဉ္စ ပစ္စယာ ကာမုပါဒါနံ (စက္ကံ ကာတဗ္ဗံ)။ (၁)

ဥပါဒါနဉ္စ နောဥပါဒါနဉ္စ ဓမ္မံ ပစ္စယာ နောဥပါဒါနော ဓမ္မော ဥပ္ပဇ္ဇတိ ဟေတုပစ္စယာ – နောဥပါဒါနံ ဧကံ ခန္ဓဉ္စ ဥပါဒါနဉ္စ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ…ပေ… ဒွေ ခန္ဓေ စ…ပေ… (စက္ကံ ကာတဗ္ဗံ)။ ဥပါဒါနေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ၊ ဥပါဒါနဉ္စ ဝတ္ထုဉ္စ ပစ္စယာ နောဥပါဒါနာ ခန္ဓာ။ (၂)

ဥပါဒါနဉ္စ နောဥပါဒါနဉ္စ ဓမ္မံ ပစ္စယာ ဥပါဒါနော စ နောဥပါဒါနော စ ဓမ္မာ ဥပ္ပဇ္ဇန္တိ ဟေတုပစ္စယာ – နောဥပါဒါနံ ဧကံ ခန္ဓဉ္စ ဒိဋ္ဌုပါဒါနဉ္စ ပစ္စယာ တယော ခန္ဓာ ကာမုပါဒါနံ ¶ စိတ္တသမုဋ္ဌာနဉ္စ ရူပံ…ပေ… (စက္ကံ)။ ဒိဋ္ဌုပါဒါနဉ္စ ဝတ္ထုဉ္စ ပစ္စယာ ကာမုပါဒါနံ သမ္ပယုတ္တကာ စ ခန္ဓာ…ပေ… (စက္ကံ)။ (၃)

အာရမ္မဏပစ္စယာ… (အာရမ္မဏေ နောဥပါဒါနမူလကေ ပဉ္စာယတနဉ္စ ဝတ္ထုဉ္စ ကာတဗ္ဗာ)။

ဟေတုယာ နဝ၊ အာရမ္မဏေ နဝ၊ အဓိပတိယာ နဝ (သဗ္ဗတ္ထ နဝ)၊ ဝိပါကေ ဧကံ…ပေ… အဝိဂတေ နဝ။

၁၄။ နောဥပါဒါနံ ဓမ္မံ ပစ္စယာ နောဥပါဒါနော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ နောဥပါဒါနံ ဧကံ ခန္ဓံ ပစ္စယာ…ပေ… အဟေတုကပဋိသန္ဓိက္ခဏေ…ပေ… (ယာဝ အသညသတ္တာ) စက္ခာယတနံ ပစ္စယာ စက္ခုဝိညာဏံ…ပေ… ကာယာယတနံ ပစ္စယာ ကာယဝိညာဏံ၊ ဝတ္ထုံ ပစ္စယာ အဟေတုကာ နောဥပါဒါနာ ခန္ဓာ၊ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ စ ဝတ္ထုဉ္စ ပစ္စယာ ဝိစိကိစ္ဆာသဟဂတော ဥဒ္ဓစ္စသဟဂတော မောဟော။

နဟေတုယာ ဧကံ၊ နအာရမ္မဏေ တီဏိ၊ နအဓိပတိယာ နဝ၊ နအနန္တရေ တီဏိ၊ နသမနန္တရေ တီဏိ…ပေ… နပုရေဇာတေ နဝ…ပေ… နကမ္မေ တီဏိ၊ နဝိပါကေ နဝ (ပဋိစ္စသဒိသံ)…ပေ… နောဝိဂတေ တီဏိ။

(ဧဝံ ¶ ဣတရေ ဒွေ ဂဏနာပိ နိဿယဝါရောပိ ကာတဗ္ဗော။)

၁၅။ ဥပါဒါနံ ¶ ဓမ္မံ သံသဋ္ဌော ဥပါဒါနော ဓမ္မော ဥပ္ပဇ္ဇတိ ဟေတုပစ္စယာ – ဒိဋ္ဌုပါဒါနံ သံသဋ္ဌံ ကာမုပါဒါနံ၊ ကာမုပါဒါနံ သံသဋ္ဌံ ဒိဋ္ဌုပါဒါနံ (စက္ကံ။ ဧဝံ နဝပိ ပဉှာ ကာတဗ္ဗာ)။

ဟေတုယာ ¶ နဝ၊ အာရမ္မဏေ နဝ၊ အဓိပတိယာ နဝ (သဗ္ဗတ္ထ နဝ)၊ ဝိပါကေ ဧကံ…ပေ… ဝိဂတေ နဝ၊ အဝိဂတေ နဝ။

၁၆။ နောဥပါဒါနံ ဓမ္မံ သံသဋ္ဌော နောဥပါဒါနော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ နောဥပါဒါနံ ဧကံ ခန္ဓံ သံသဋ္ဌာ တယော ခန္ဓာ…ပေ… ဒွေ ခန္ဓေ…ပေ… အဟေတုကပဋိသန္ဓိက္ခဏေ…ပေ… ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ သံသဋ္ဌော ဝိစိကိစ္ဆာသဟဂတော ဥဒ္ဓစ္စသဟဂတော မောဟော။

နဟေတုယာ ဧကံ၊ နအဓိပတိယာ နဝ၊ နပုရေဇာတေ နဝ၊ နပစ္ဆာဇာတေ နဝ၊ နအာသေဝနေ နဝ၊ နကမ္မေ တီဏိ၊ နဝိပါကေ နဝ၊ နဈာနေ ဧကံ၊ နမဂ္ဂေ ဧကံ၊ နဝိပ္ပယုတ္တေ နဝ။

(ဧဝံ ¶ ဣတရေ ဒွေ ဂဏနာပိ သမ္ပယုတ္တဝါရောပိ ကာတဗ္ဗော။)

၁၇။ ဥပါဒါနော ဓမ္မော ဥပါဒါနဿ ဓမ္မဿ ဟေတုပစ္စယေန ပစ္စယော – ဥပါဒါနာ ဟေတူ သမ္ပယုတ္တကာနံ ဥပါဒါနာနံ ဟေတုပစ္စယေန ပစ္စယော။ (မူလံ ကာတဗ္ဗံ) ဥပါဒါနာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ¶ ဟေတုပစ္စယေန ပစ္စယော။ (မူလံ ကာတဗ္ဗံ) ဥပါဒါနာ ဟေတူ သမ္ပယုတ္တကာနံ ခန္ဓာနံ ဥပါဒါနာနဉ္စ စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော။ (၃)

၁၈။ နောဥပါဒါနော ဓမ္မော နောဥပါဒါနဿ ဓမ္မဿ ဟေတုပစ္စယေန ပစ္စယော – နောဥပါဒါနာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ…ပေ…။ (၁)

နောဥပါဒါနော ဓမ္မော ဥပါဒါနဿ ဓမ္မဿ ¶ ဟေတုပစ္စယေန ပစ္စယော – နောဥပါဒါနာ ဟေတူ သမ္ပယုတ္တကာနံ ဥပါဒါနာနံ ဟေတုပစ္စယေန ပစ္စယော။ (မူလံ ကာတဗ္ဗံ) နောဥပါဒါနာ ဟေတူ သမ္ပယုတ္တကာနံ ခန္ဓာနံ ဥပါဒါနာနဉ္စ စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော။ (၃)

၁၉။ ဥပါဒါနော စ နောဥပါဒါနော စ ဓမ္မာ ဥပါဒါနဿ ဓမ္မဿ ဟေတုပစ္စယေန ပစ္စယော – ဥပါဒါနာ စ နောဥပါဒါနာ စ ဟေတူ သမ္ပယုတ္တကာနံ ဥပါဒါနာနံ ဟေတုပစ္စယေန ပစ္စယော။ (မူလံ ကာတဗ္ဗံ) ဥပါဒါနာ စ နောဥပါဒါနာ စ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော။ (မူလံ ကာတဗ္ဗံ) ဥပါဒါနာ စ နောဥပါဒါနာ စ ဟေတူ သမ္ပယုတ္တကာနံ ခန္ဓာနံ ဥပါဒါနာနဉ္စ စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော။ (၃)

၂၀။ ဥပါဒါနော ¶ ဓမ္မော ဥပါဒါနဿ ဓမ္မဿ အာရမ္မဏပစ္စယေန ပစ္စယော – ဥပါဒါနေ အာရဗ္ဘ ဥပါဒါနာ ဥပ္ပဇ္ဇန္တိ… တီဏိ (အာရဗ္ဘ ကာတဗ္ဗာ)။

နောဥပါဒါနော ဓမ္မော နောဥပါဒါနဿ ဓမ္မဿ အာရမ္မဏပစ္စယေန ပစ္စယော – ဒါနံ ဒတွာ သီလံ…ပေ… ဥပေါသထကမ္မံ ကတွာ တံ ပစ္စဝေက္ခတိ အဿာဒေတိ အဘိနန္ဒတိ၊ တံ အာရဗ္ဘ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ဝိစိကိစ္ဆာ…ပေ… ဥဒ္ဓစ္စံ…ပေ… ဒေါမနဿံ ဥပ္ပဇ္ဇတိ၊ ပုဗ္ဗေ သုစိဏ္ဏာနိ…ပေ… ဈာနာ ဝုဋ္ဌဟိတွာ ဈာနံ ပစ္စဝေက္ခတိ၊ အရိယာ မဂ္ဂါ ဝုဋ္ဌဟိတွာ မဂ္ဂံ ပစ္စဝေက္ခန္တိ၊ ဖလံ…ပေ… နိဗ္ဗာနံ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ၊ မဂ္ဂဿ၊ ဖလဿ၊ အာဝဇ္ဇနာယ အာရမ္မဏပစ္စယေန ¶ ပစ္စယော။ အရိယာ နောဥပါဒါနေ ပဟီနေ ကိလေသေ ¶ …ပေ… ဝိက္ခမ္ဘိတေ ကိလေသေ ပစ္စဝေက္ခန္တိ၊ ပုဗ္ဗေ သမုဒါစိဏ္ဏေ…ပေ… စက္ခုံ…ပေ… ဝတ္ထုံ နောဥပါဒါနေ ခန္ဓေ အနိစ္စတော…ပေ… ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ။ စေတောပရိယဉာဏေန နောဥပါဒါနစိတ္တသမင်္ဂိဿ စိတ္တံ ဇာနာတိ၊ အာကာသာနဉ္စာယတနံ ဝိညာဏဉ္စာယတနဿ…ပေ… အာကိဉ္စညာယတနံ နေဝသညာနာသညာယတနဿ…ပေ… ရူပါယတနံ စက္ခုဝိညာဏဿ…ပေ… ဖောဋ္ဌဗ္ဗာယတနံ ကာယဝိညာဏဿ…ပေ… နောဥပါဒါနာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော။ (၁)

နောဥပါဒါနော ဓမ္မော ဥပါဒါနဿ ဓမ္မဿ အာရမ္မဏပစ္စယေန ပစ္စယော – ဒါနံ…ပေ… သီလံ…ပေ… ဥပေါသထကမ္မံ ကတွာ တံ အဿာဒေတိ အဘိနန္ဒတိ၊ တံ အာရဗ္ဘ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ပုဗ္ဗေ သုစိဏ္ဏာနိ…ပေ… ဈာနာ…ပေ… စက္ခုံ…ပေ… ဝတ္ထုံ နောဥပါဒါနေ ခန္ဓေ အဿာဒေတိ အဘိနန္ဒတိ၊ တံ အာရဗ္ဘ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ။ (၂)

နောဥပါဒါနော ဓမ္မော ဥပါဒါနဿ စ နောဥပါဒါနဿ စ ဓမ္မဿ အာရမ္မဏပစ္စယေန ပစ္စယော – ဒါနံ…ပေ… သီလံ…ပေ… ဥပေါသထကမ္မံ ကတွာ…ပေ… ပုဗ္ဗေ သုစိဏ္ဏာနိ ¶ …ပေ… ဈာနာ ဝုဋ္ဌဟိတွာ ဈာနံ…ပေ… စက္ခုံ…ပေ… ဝတ္ထုံ နောဥပါဒါနေ ခန္ဓေ အဿာဒေတိ အဘိနန္ဒတိ၊ တံ အာရဗ္ဘ ဥပါဒါနာ စ သမ္ပယုတ္တကာ စ ခန္ဓာ ဥပ္ပဇ္ဇန္တိ။ (၃)

ဥပါဒါနော စ နောဥပါဒါနော စ ဓမ္မာ ဥပါဒါနဿ ဓမ္မဿ အာရမ္မဏပစ္စယေန ပစ္စယော… တီဏိ (အာရဗ္ဘ ကာတဗ္ဗာ)။

၂၁။ ဥပါဒါနော ¶ ဓမ္မော ဥပါဒါနဿ ဓမ္မဿ အဓိပတိပစ္စယေန ပစ္စယော။ အာရမ္မဏာဓိပတိ – ဥပါဒါနေ ဂရုံ ကတွာ ဥပါဒါနာ ဥပ္ပဇ္ဇန္တိ… တီဏိ (အာရမ္မဏာဓိပတိယေဝ)။

၂၂။ နောဥပါဒါနော ဓမ္မော နောဥပါဒါနဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ။ အာရမ္မဏာဓိပတိ – ဒါနံ ဒတွာ သီလံ…ပေ… ဥပေါသထကမ္မံ…ပေ… ပုဗ္ဗေ…ပေ… ဈာနာ ဝုဋ္ဌဟိတွာ ဈာနံ ဂရုံ ကတွာ ပစ္စဝေက္ခတိ၊ အဿာဒေတိ အဘိနန္ဒတိ၊ အရိယာ မဂ္ဂါ ဝုဋ္ဌဟိတွာ ¶ မဂ္ဂံ ဂရုံ ကတွာ ပစ္စဝေက္ခန္တိ…ပေ… ဖလဿ အဓိပတိပစ္စယေန ပစ္စယော၊ စက္ခုံ…ပေ… ဝတ္ထုံ နောဥပါဒါနေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ။ သဟဇာတာဓိပတိ – နောဥပါဒါနာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော။ (၁)

နောဥပါဒါနော ဓမ္မော ဥပါဒါနဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ။ အာရမ္မဏာဓိပတိ – ဒါနံ…ပေ… သီလံ…ပေ… ဥပေါသထကမ္မံ ကတွာ တံ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ပုဗ္ဗေ…ပေ… ဈာနာ…ပေ… စက္ခုံ…ပေ… ဝတ္ထုံ နောဥပါဒါနေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ။ သဟဇာတာဓိပတိ – နောဥပါဒါနာဓိပတိ သမ္ပယုတ္တကာနံ ဥပါဒါနာနံ အဓိပတိပစ္စယေန ပစ္စယော။ (၂)

နောဥပါဒါနော ¶ ဓမ္မော ဥပါဒါနဿ စ နောဥပါဒါနဿ စ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ ¶ ၊ သဟဇာတာဓိပတိ။ အာရမ္မဏာဓိပတိ – ဒါနံ…ပေ… သီလံ…ပေ… ဥပေါသထကမ္မံ…ပေ… ပုဗ္ဗေ…ပေ… ဈာနံ…ပေ… စက္ခုံ…ပေ… ဝတ္ထုံ နောဥပါဒါနေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ဥပါဒါနာ စ သမ္ပယုတ္တကာ စ ခန္ဓာ ဥပ္ပဇ္ဇန္တိ။ သဟဇာတာဓိပတိ – နောဥပါဒါနာဓိပတိ သမ္ပယုတ္တကာနံ ခန္ဓာနံ ဥပါဒါနာနဉ္စ စိတ္တသမုဋ္ဌာနာနံ ရူပါနံ အဓိပတိပစ္စယေန ပစ္စယော။ (၃)

ဥပါဒါနော စ နောဥပါဒါနော စ ဓမ္မာ ဥပါဒါနဿ ဓမ္မဿ အဓိပတိပစ္စယေန ပစ္စယော… တီဏိ… အာရမ္မဏာဓိပတိ… တီဏိ (အာရဗ္ဘ ကာတဗ္ဗာ၊ အာရမ္မဏာဓိပတိယေဝ)။

၂၃။ ဥပါဒါနော ဓမ္မော ဥပါဒါနဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ ဥပါဒါနာ ပစ္ဆိမာနံ ပစ္ဆိမာနံ ဥပါဒါနာနံ အနန္တရပစ္စယေန ပစ္စယော။ (မူလံ ကာတဗ္ဗံ) ပုရိမာ ပုရိမာ ဥပါဒါနာ ပစ္ဆိမာနံ ပစ္ဆိမာနံ နောဥပါဒါနာနံ ခန္ဓာနံ အနန္တရပစ္စယေန ပစ္စယော၊ ဥပါဒါနံ ဝုဋ္ဌာနဿ အနန္တရပစ္စယေန ပစ္စယော။ (မူလံ ကာတဗ္ဗံ) ပုရိမာ ပုရိမာ ဥပါဒါနာ ပစ္ဆိမာနံ ပစ္ဆိမာနံ ဥပါဒါနာနံ သမ္ပယုတ္တကာနဉ္စ ခန္ဓာနံ အနန္တရပစ္စယေန ပစ္စယော။ (၃)

၂၄။ နောဥပါဒါနော ¶ ဓမ္မော နောဥပါဒါနဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ နောဥပါဒါနာ ခန္ဓာ ပစ္ဆိမာနံ ပစ္ဆိမာနံ နောဥပါဒါနာနံ ခန္ဓာနံ အနန္တရပစ္စယေန ပစ္စယော၊ အနုလောမံ ဂေါတြဘုဿ…ပေ… ဖလသမာပတ္တိယာ အနန္တရပစ္စယေန ပစ္စယော။ (၁)

နောဥပါဒါနော ဓမ္မော ဥပါဒါနဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ နောဥပါဒါနာ ခန္ဓာ ¶ ပစ္ဆိမာနံ ပစ္ဆိမာနံ ဥပါဒါနာနံ ခန္ဓာနံ အနန္တရပစ္စယေန ပစ္စယော၊ အာဝဇ္ဇနာ ဥပါဒါနာနံ အနန္တရပစ္စယေန ပစ္စယော။ (၂)

နောဥပါဒါနော ဓမ္မော ဥပါဒါနဿ စ နောဥပါဒါနဿ စ ဓမ္မဿ အနန္တရပစ္စယေန ပစ္စယော ¶ – ပုရိမာ ပုရိမာ နောဥပါဒါနာ ခန္ဓာ ပစ္ဆိမာနံ ပစ္ဆိမာနံ ဥပါဒါနာနံ သမ္ပယုတ္တကာနဉ္စ ခန္ဓာနံ အနန္တရပစ္စယေန ပစ္စယော၊ အာဝဇ္ဇနာ ဥပါဒါနာနံ သမ္ပယုတ္တကာနဉ္စ ခန္ဓာနံ အနန္တရပစ္စယေန ပစ္စယော။ (၃)

၂၅။ ဥပါဒါနော စ နောဥပါဒါနော စ ဓမ္မာ ဥပါဒါနဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ ဥပါဒါနာ စ သမ္ပယုတ္တကာ စ ခန္ဓာ ပစ္ဆိမာနံ ပစ္ဆိမာနံ ဥပါဒါနာနံ အနန္တရပစ္စယေန ပစ္စယော။ (မူလံ ကာတဗ္ဗံ) ပုရိမာ ပုရိမာ ဥပါဒါနာ စ သမ္ပယုတ္တကာ စ ခန္ဓာ ပစ္ဆိမာနံ ပစ္ဆိမာနံ နောဥပါဒါနာနံ ခန္ဓာနံ အနန္တရပစ္စယေန ပစ္စယော၊ ဥပါဒါနာ စ သမ္ပယုတ္တကာ စ ခန္ဓာ ဝုဋ္ဌာနဿ အနန္တရပစ္စယေန ပစ္စယော။ (မူလံ ကာတဗ္ဗံ) ပုရိမာ ပုရိမာ ဥပါဒါနာ စ သမ္ပယုတ္တကာ စ ခန္ဓာ ပစ္ဆိမာနံ ပစ္ဆိမာနံ ဥပါဒါနာနံ သမ္ပယုတ္တကာနဉ္စ ခန္ဓာနံ အနန္တရပစ္စယေန ပစ္စယော။ (၃)

သမနန္တရပစ္စယေန ပစ္စယော… သဟဇာတပစ္စယေန ပစ္စယော (ပဋိစ္စသဒိသံ)… အညမညပစ္စယေန ပစ္စယော (ပဋိစ္စသဒိသံ)… နိဿယပစ္စယေန ပစ္စယော (ပစ္စယသဒိသံ)။

၂၆။ ဥပါဒါနော ဓမ္မော ဥပါဒါနဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော ¶ …ပေ…။ ပကတူပနိဿယော – ဥပါဒါနာ ဥပါဒါနာနံ ဥပနိဿယပစ္စယေန ပစ္စယော… တီဏိ။

၂၇။ နောဥပါဒါနော ¶ ဓမ္မော နောဥပါဒါနဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော…ပေ…။ ပကတူပနိဿယော – သဒ္ဓံ ဥပနိဿာယ ဒါနံ ဒေတိ…ပေ… သမာပတ္တိံ ဥပ္ပာဒေတိ၊ မာနံ ဇပ္ပေတိ၊ ဒိဋ္ဌိံ ဂဏှာတိ၊ သီလံ…ပေ… ပညံ… ရာဂံ…ပေ… ပတ္ထနံ… ကာယိကံ သုခံ…ပေ… သေနာသနံ ဥပနိဿာယ ဒါနံ ဒေတိ…ပေ… သမာပတ္တိံ ဥပ္ပာဒေတိ၊ မာနံ ဇပ္ပေတိ၊ ဒိဋ္ဌိံ ဂဏှာတိ၊ ပါဏံ ဟနတိ…ပေ… သင်္ဃံ ဘိန္ဒတိ၊ သဒ္ဓါ…ပေ… သေနာသနံ သဒ္ဓါယ…ပေ… ဖလသမာပတ္တိယာ ဥပနိဿယပစ္စယေန ပစ္စယော။ (၁)

နောဥပါဒါနော ¶ ဓမ္မော ဥပါဒါနဿ ဓမ္မဿ ဥပနိဿယပစ္စယေန ပစ္စယော။ ပကတူပနိဿယော – သဒ္ဓံ ဥပနိဿာယ မာနံ ဇပ္ပေတိ၊ ဒိဋ္ဌိံ ဂဏှာတိ၊ သီလံ…ပေ… သေနာသနံ ဥပနိဿာယ အဒိန္နံ…ပေ… မုသာ…ပေ… ပိသုဏံ…ပေ… သမ္ဖံ…ပေ… သန္ဓိံ…ပေ… နိလ္လောပံ…ပေ… ဧကာဂါရိကံ…ပေ… ပရိပန္ထေ…ပေ… ပရဒါရံ…ပေ… ဂါမဃာတံ…ပေ… နိဂမဃာတံ ကရောတိ၊ သဒ္ဓါ…ပေ… သေနာသနံ ဥပါဒါနာနံ ဥပနိဿယပစ္စယေန ပစ္စယော။ (မူလံ ကာတဗ္ဗံ) သဒ္ဓံ ဥပနိဿာယ မာနံ ဇပ္ပေတိ၊ ဒိဋ္ဌိံ ဂဏှာတိ၊ သီလံ…ပေ… သေနာသနံ ဥပနိဿာယ အဒိန္နံ အာဒိယတိ၊ မုသာ…ပေ… ပိသုဏံ…ပေ… သမ္ဖံ…ပေ… သန္ဓိံ…ပေ… နိလ္လောပံ…ပေ… ဧကာဂါရိကံ…ပေ… ပရိပန္ထေ…ပေ… ပရဒါရံ…ပေ… ဂါမဃာတံ…ပေ… နိဂမဃာတံ ကရောတိ၊ သဒ္ဓါ…ပေ… သေနာသနံ ဥပါဒါနာနံ သမ္ပယုတ္တကာနဉ္စ ခန္ဓာနံ ဥပနိဿယပစ္စယေန ပစ္စယော။ (၃)

ဥပါဒါနော စ နောဥပါဒါနော ¶ စ ဓမ္မာ ဥပါဒါနဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော…ပေ…။ ပကတူပနိဿယော… တီဏိ။

၂၈။ နောဥပါဒါနော ဓမ္မော နောဥပါဒါနဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ။ အာရမ္မဏပုရေဇာတံ – စက္ခုံ…ပေ… ဝတ္ထုံ အနိစ္စတော…ပေ… ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ။ ရူပါယတနံ စက္ခုဝိညာဏဿ…ပေ… ဖောဋ္ဌဗ္ဗာယတနံ ကာယဝိညာဏဿ…ပေ…။ ဝတ္ထုပုရေဇာတံ – စက္ခာယတနံ စက္ခုဝိညာဏဿ…ပေ… ကာယာယတနံ ကာယဝိညာဏဿ…ပေ… ဝတ္ထု နောဥပါဒါနာနံ ခန္ဓာနံ ပုရေဇာတပစ္စယေန ပစ္စယော။ (၁)

နောဥပါဒါနော ¶ ဓမ္မော ဥပါဒါနဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ။ အာရမ္မဏပုရေဇာတံ – စက္ခုံ…ပေ… ဝတ္ထုံ အဿာဒေတိ အဘိနန္ဒတိ၊ တံ အာရဗ္ဘ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ။ ဝတ္ထုပုရေဇာတံ – ဝတ္ထု ဥပါဒါနာနံ ပုရေဇာတပစ္စယေန ပစ္စယော။ (၂)

နောဥပါဒါနော ¶ ဓမ္မော ဥပါဒါနဿ စ နောဥပါဒါနဿ စ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ။ အာရမ္မဏပုရေဇာတံ – စက္ခုံ…ပေ… ဝတ္ထုံ အဿာဒေတိ အဘိနန္ဒတိ၊ တံ အာရဗ္ဘ ဥပါဒါနာ စ သမ္ပယုတ္တကာ စ ခန္ဓာ ဥပ္ပဇ္ဇန္တိ။ ဝတ္ထုပုရေဇာတံ – ဝတ္ထု ဥပါဒါနာနံ သမ္ပယုတ္တကာနဉ္စ ခန္ဓာနံ ပုရေဇာတပစ္စယေန ပစ္စယော။ (၃)

၂၉။ ဥပါဒါနော ဓမ္မော နောဥပါဒါနဿ ဓမ္မဿ ပစ္ဆာဇာတပစ္စယေန ¶ ပစ္စယော (သံခိတ္တံ)။ (၁)

နောဥပါဒါနော ဓမ္မော နောဥပါဒါနဿ ဓမ္မဿ ပစ္ဆာဇာတပစ္စယေန ပစ္စယော (သံခိတ္တံ)။ (၁)

ဥပါဒါနော စ နောဥပါဒါနော စ ဓမ္မာ နောဥပါဒါနဿ ဓမ္မဿ ပစ္ဆာဇာတပစ္စယေန ပစ္စယော (သံခိတ္တံ)။ (၁) …အာသေဝနပစ္စယေန ပစ္စယော။

၃၀။ နောဥပါဒါနော ဓမ္မော နောဥပါဒါနဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ။ သဟဇာတာ – နောဥပါဒါနာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော၊ ပဋိသန္ဓိက္ခဏေ…ပေ…။ နာနာက္ခဏိကာ – နောဥပါဒါနာ စေတနာ ဝိပါကာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော။ (၁)

နောဥပါဒါနော ဓမ္မော ဥပါဒါနဿ ဓမ္မဿ ကမ္မပစ္စယေန ပစ္စယော – နောဥပါဒါနာ စေတနာ သမ္ပယုတ္တကာနံ ဥပါဒါနာနံ ကမ္မပစ္စယေန ပစ္စယော။ (၂)

နောဥပါဒါနော ဓမ္မော ဥပါဒါနဿ စ နောဥပါဒါနဿ စ ဓမ္မဿ ကမ္မပစ္စယေန ပစ္စယော – နောဥပါဒါနာ စေတနာ သမ္ပယုတ္တကာနံ ခန္ဓာနံ ဥပါဒါနာနဉ္စ စိတ္တသမုဋ္ဌာနာနံ ရူပါနံ ကမ္မပစ္စယေန ပစ္စယော။ (၃)

၃၁။ နောဥပါဒါနော ¶ ¶ ဓမ္မော နောဥပါဒါနဿ ဓမ္မဿ ဝိပါကပစ္စယေန ပစ္စယော – ဝိပါကော နောဥပါဒါနော ဧကော ခန္ဓော…ပေ… ဧကံ။

နောဥပါဒါနော ဓမ္မော နောဥပါဒါနဿ ဓမ္မဿ အာဟာရပစ္စယေန ပစ္စယော… တီဏိ (ဧကောယေဝ ကဗဠီကာရော အာဟာရော)… ဣန္ဒြိယပစ္စယေန ပစ္စယော… တီဏိ (ရူပဇီဝိတိန္ဒြိယံ ဧကံယေဝ)… ဈာနပစ္စယေန ပစ္စယော… တီဏိ။

ဥပါဒါနော ¶ ဓမ္မော ဥပါဒါနဿ ဓမ္မဿ မဂ္ဂပစ္စယေန ပစ္စယော – ဥပါဒါနာနိ မဂ္ဂင်္ဂါနိ သမ္ပယုတ္တကာနံ ဥပါဒါနာနံ မဂ္ဂပစ္စယေန ပစ္စယော (ဣမိနာ ကာရဏေန နဝ ပဉှာ ကာတဗ္ဗာ)… သမ္ပယုတ္တပစ္စယေန ပစ္စယော… နဝ။

၃၂။ ဥပါဒါနော ဓမ္မော နောဥပါဒါနဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ။ သဟဇာတာ – ဥပါဒါနာ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော။ ပစ္ဆာဇာတံ – ပစ္ဆာဇာတာ ဥပါဒါနာ ပုရေဇာတဿ ဣမဿ ကာယဿ ဝိပ္ပယုတ္တပစ္စယေန ပစ္စယော။ (၁)

နောဥပါဒါနော ဓမ္မော နောဥပါဒါနဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ (သံခိတ္တံ)။ (၁)

နောဥပါဒါနော ဓမ္မော ဥပါဒါနဿ ဓမ္မဿ ဝိပ္ပယုတ္တပစ္စယေန ပစ္စယော။ ပုရေဇာတံ – ဝတ္ထု ဥပါဒါနာနံ ဝိပ္ပယုတ္တပစ္စယေန ပစ္စယော။ (၂)

နောဥပါဒါနော ဓမ္မော ဥပါဒါနဿ စ နောဥပါဒါနဿ စ ဓမ္မဿ ဝိပ္ပယုတ္တပစ္စယေန ပစ္စယော။ ပုရေဇာတံ – ဝတ္ထု ဥပါဒါနာနံ သမ္ပယုတ္တကာနဉ္စ ခန္ဓာနံ ဝိပ္ပယုတ္တပစ္စယေန ပစ္စယော။ (၃)

၃၃။ ဥပါဒါနော ¶ စ နောဥပါဒါနော စ ဓမ္မာ နောဥပါဒါနဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ။ သဟဇာတာ – ဥပါဒါနာ စ သမ္ပယုတ္တကာ စ ခန္ဓာ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော။ ပစ္ဆာဇာတာ – ဥပါဒါနာ စ သမ္ပယုတ္တကာ စ ခန္ဓာ ပုရေဇာတဿ ဣမဿ ကာယဿ ဝိပ္ပယုတ္တပစ္စယေန ပစ္စယော။ (၁)

၃၄။ ဥပါဒါနော ¶ ¶ ဓမ္မော ဥပါဒါနဿ ဓမ္မဿ အတ္ထိပစ္စယေန ပစ္စယော – ဒိဋ္ဌုပါဒါနံ ကာမုပါဒါနဿ အတ္ထိပစ္စယေန ပစ္စယော (စက္ကံ)။ (၁)

ဥပါဒါနော ဓမ္မော နောဥပါဒါနဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပစ္ဆာဇာတံ။ သဟဇာတာ – ဥပါဒါနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော။ ပစ္ဆာဇာတာ – ဥပါဒါနာ ပုရေဇာတဿ ဣမဿ ကာယဿ အတ္ထိပစ္စယေန ပစ္စယော။ (၂)

ဥပါဒါနော ဓမ္မော ဥပါဒါနဿ စ နောဥပါဒါနဿ စ ဓမ္မဿ အတ္ထိပစ္စယေန ပစ္စယော (သံခိတ္တံ၊ ပဋိစ္စသဒိသံ)။ (၃)

၃၅။ နောဥပါဒါနော ဓမ္မော နောဥပါဒါနဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ (သံခိတ္တံ၊ ဝိတ္ထာရေတဗ္ဗံ)။ (၁)

နောဥပါဒါနော ဓမ္မော ဥပါဒါနဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ။ သဟဇာတံ (သဟဇာတသဒိသံ)။ ပုရေဇာတံ (ပုရေဇာတသဒိသံ)။ (၂)

နောဥပါဒါနော ဓမ္မော ဥပါဒါနဿ စ နောဥပါဒါနဿ စ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ (သံခိတ္တံ၊ သဟဇာတသဒိသံ သဟဇာတံ ဝိဘဇိတဗ္ဗံ၊ ပုရေဇာတသဒိသံ ပုရေဇာတံ)။ (၃)

၃၆။ ဥပါဒါနော ¶ စ နောဥပါဒါနော စ ဓမ္မာ ဥပါဒါနဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ။ သဟဇာတံ – ဒိဋ္ဌုပါဒါနဉ္စ သမ္ပယုတ္တကာ စ ခန္ဓာ ကာမုပါဒါနဿ အတ္ထိပစ္စယေန ပစ္စယော (စက္ကံ)။ သဟဇာတံ – ဒိဋ္ဌုပါဒါနဉ္စ ဝတ္ထု စ ကာမုပါဒါနဿ အတ္ထိပစ္စယေန ပစ္စယော (စက္ကံ)။ (၁)

ဥပါဒါနော စ နောဥပါဒါနော စ ဓမ္မာ နောဥပါဒါနဿ ဓမ္မဿ ¶ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ။ သဟဇာတော – နောဥပါဒါနော ဧကော ခန္ဓော စ ဥပါဒါနာ စ တိဏ္ဏန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော…ပေ… ဒွေ ခန္ဓာ စ…ပေ…။ သဟဇာတာ – ဥပါဒါနာ စ မဟာဘူတာ စ စိတ္တသမုဋ္ဌာနာနံ ရူပါနံ ¶ အတ္ထိပစ္စယေန ပစ္စယော။ သဟဇာတာ – ဥပါဒါနာ စ ဝတ္ထု စ နောဥပါဒါနာနံ ခန္ဓာနံ အတ္ထိပစ္စယေန ပစ္စယော။ ပစ္ဆာဇာတာ – ဥပါဒါနာ စ သမ္ပယုတ္တကာ စ ခန္ဓာ ပုရေဇာတဿ ဣမဿ ကာယဿ အတ္ထိပစ္စယေန ပစ္စယော။ ပစ္ဆာဇာတာ – ဥပါဒါနာ စ သမ္ပယုတ္တကာ စ ခန္ဓာ ကဗဠီကာရော အာဟာရော စ ဣမဿ ကာယဿ အတ္ထိပစ္စယေန ပစ္စယော။ ပစ္ဆာဇာတာ – ဥပါဒါနာ စ သမ္ပယုတ္တကာ စ ခန္ဓာ ရူပဇီဝိတိန္ဒြိယဉ္စ ကဋတ္တာရူပါနံ အတ္ထိပစ္စယေန ပစ္စယော။ (၂)

ဥပါဒါနော စ နောဥပါဒါနော စ ဓမ္မာ ဥပါဒါနဿ စ နောဥပါဒါနဿ စ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ။ သဟဇာတော – နောဥပါဒါနော ဧကော ခန္ဓော စ ဒိဋ္ဌုပါဒါနဉ္စ တိဏ္ဏန္နံ ခန္ဓာနံ ကာမုပါဒါနဿ စ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော…ပေ… ဒွေ ခန္ဓာ စ…ပေ… (စက္ကံ)။ သဟဇာတံ – ဒိဋ္ဌုပါဒါနဉ္စ ဝတ္ထု စ ကာမုပါဒါနဿ သမ္ပယုတ္တကာနဉ္စ ခန္ဓာနံ အတ္ထိပစ္စယေန ပစ္စယော (စက္ကံ)။ (၃)

၃၇။ ဟေတုယာ နဝ၊ အာရမ္မဏေ နဝ၊ အဓိပတိယာ နဝ၊ အနန္တရေ နဝ၊ သမနန္တရေ နဝ၊ သဟဇာတေ နဝ၊ အညမညေ နဝ၊ နိဿယေ နဝ ¶ ၊ ဥပနိဿယေ နဝ၊ ပုရေဇာတေ တီဏိ၊ ပစ္ဆာဇာတေ တီဏိ ¶ ၊ အာသေဝနေ နဝ၊ ကမ္မေ တီဏိ၊ ဝိပါကေ ဧကံ၊ အာဟာရေ တီဏိ၊ ဣန္ဒြိယေ တီဏိ၊ ဈာနေ တီဏိ၊ မဂ္ဂေ နဝ၊ သမ္ပယုတ္တေ နဝ၊ ဝိပ္ပယုတ္တေ ပဉ္စ၊ အတ္ထိယာ နဝ၊ နတ္ထိယာ နဝ၊ ဝိဂတေ နဝ၊ အဝိဂတေ နဝ။

၃၈။ ဥပါဒါနော ဓမ္မော ဥပါဒါနဿ ဓမ္မဿ အာရမ္မဏပစ္စယေန ပစ္စယော… သဟဇာတပစ္စယေန ပစ္စယော… ဥပနိဿယပစ္စယေန ပစ္စယော။ (၁)

ဥပါဒါနော ¶ ဓမ္မော နောဥပါဒါနဿ ဓမ္မဿ အာရမ္မဏပစ္စယေန ပစ္စယော… သဟဇာတပစ္စယေန ပစ္စယော… ဥပနိဿယပစ္စယေန ပစ္စယော… ပစ္ဆာဇာတပစ္စယေန ပစ္စယော။ (၂)

ဥပါဒါနော ဓမ္မော ဥပါဒါနဿ စ နောဥပါဒါနဿ စ ဓမ္မဿ အာရမ္မဏပစ္စယေန ပစ္စယော… သဟဇာတပစ္စယေန ပစ္စယော… ဥပနိဿယပစ္စယေန ပစ္စယော။ (၃)

၃၉။ နောဥပါဒါနော ဓမ္မော နောဥပါဒါနဿ ဓမ္မဿ အာရမ္မဏပစ္စယေန ပစ္စယော… သဟဇာတပစ္စယေန ပစ္စယော… ဥပနိဿယပစ္စယေန ပစ္စယော… ပုရေဇာတပစ္စယေန ပစ္စယော… ပစ္ဆာဇာတပစ္စယေန ပစ္စယော… ကမ္မပစ္စယေန ပစ္စယော… အာဟာရပစ္စယေန ပစ္စယော… ဣန္ဒြိယပစ္စယေန ပစ္စယော။ (၁)

နောဥပါဒါနော ဓမ္မော ဥပါဒါနဿ ဓမ္မဿ အာရမ္မဏပစ္စယေန ပစ္စယော… သဟဇာတပစ္စယေန ပစ္စယော… ဥပနိဿယပစ္စယေန ပစ္စယော… ပုရေဇာတပစ္စယေန ပစ္စယော။ (၂)

နောဥပါဒါနော ဓမ္မော ဥပါဒါနဿ စ နောဥပါဒါနဿ စ ဓမ္မဿ အာရမ္မဏပစ္စယေန ပစ္စယော… သဟဇာတပစ္စယေန ပစ္စယော… ဥပနိဿယပစ္စယေန ပစ္စယော… ပုရေဇာတပစ္စယေန ပစ္စယော ¶ ။ (၃)

၄၀။ ဥပါဒါနော ¶ စ နောဥပါဒါနော စ ဓမ္မာ ဥပါဒါနဿ ဓမ္မဿ အာရမ္မဏပစ္စယေန ပစ္စယော… သဟဇာတပစ္စယေန ပစ္စယော… ဥပနိဿယပစ္စယေန ပစ္စယော။ (၁)

ဥပါဒါနော စ နောဥပါဒါနော စ ဓမ္မာ နောဥပါဒါနဿ ဓမ္မဿ အာရမ္မဏပစ္စယေန ပစ္စယော… သဟဇာတပစ္စယေန ပစ္စယော… ဥပနိဿယပစ္စယေန ပစ္စယော… ပစ္ဆာဇာတပစ္စယေန ပစ္စယော။ (၂)

ဥပါဒါနော စ နောဥပါဒါနော စ ဓမ္မာ ဥပါဒါနဿ စ နောဥပါဒါနဿ စ ဓမ္မဿ အာရမ္မဏပစ္စယေန ပစ္စယော… သဟဇာတပစ္စယေန ပစ္စယော… ဥပနိဿယပစ္စယေန ပစ္စယော။ (၃)

၄၁။ နဟေတုယာ နဝ၊ နအာရမ္မဏေ နဝ (သဗ္ဗတ္ထ နဝ)၊ နောအဝိဂတေ နဝ။

၄၂။ ဟေတုပစ္စယာ ¶ နအာရမ္မဏေ နဝ၊ နအဓိပတိယာ နဝ…ပေ… နအညမညေ တီဏိ၊ နဥပနိဿယေ နဝ (သဗ္ဗတ္ထ နဝ)၊ နသမ္ပယုတ္တေ တီဏိ၊ နဝိပ္ပယုတ္တေ နဝ၊ နောနတ္ထိယာ နဝ၊ နောဝိဂတေ နဝ။

၄၃။ နဟေတုပစ္စယာ အာရမ္မဏေ နဝ၊ အဓိပတိယာ နဝ (အနုလောမမာတိကာ ကာတဗ္ဗာ)…ပေ… အဝိဂတေ နဝ။

၄၄။ ဥပါဒါနိယံ ¶ ¶ ဓမ္မံ ပဋိစ္စ ဥပါဒါနိယော ဓမ္မော ဥပ္ပဇ္ဇတိ ဟေတုပစ္စယာ – ဥပါဒါနိယံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ…ပေ… ဒွေ ခန္ဓေ…ပေ… ပဋိသန္ဓိက္ခဏေ…ပေ… ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ၊ ဧကံ မဟာဘူတံ…ပေ… (ယထာ လောကိယဒုကံ၊ ဧဝံ ကာတဗ္ဗံ။ နိန္နာနာကရဏံ)။

၄၅။ ဥပါဒါနသမ္ပယုတ္တံ ¶ ဓမ္မံ ပဋိစ္စ ဥပါဒါနသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ဥပါဒါနသမ္ပယုတ္တံ ဧကံ ခန္ဓံ ပဋိစ္စ တယော ခန္ဓာ…ပေ… ဒွေ ခန္ဓေ…ပေ…။ (၁)

ဥပါဒါနသမ္ပယုတ္တံ ဓမ္မံ ပဋိစ္စ ဥပါဒါနဝိပ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ဥပါဒါနသမ္ပယုတ္တေ ခန္ဓေ ပဋိစ္စ စိတ္တသမုဋ္ဌာနံ ရူပံ၊ ဒိဋ္ဌိဂတဝိပ္ပယုတ္တလောဘသဟဂတေ ခန္ဓေ ပဋိစ္စ လောဘော စိတ္တသမုဋ္ဌာနဉ္စ ရူပံ။ (၂)

ဥပါဒါနသမ္ပယုတ္တံ ¶ ဓမ္မံ ပဋိစ္စ ဥပါဒါနသမ္ပယုတ္တော စ ဥပါဒါနဝိပ္ပယုတ္တော ¶ စ ဓမ္မာ ဥပ္ပဇ္ဇန္တိ ဟေတုပစ္စယာ – ဥပါဒါနသမ္ပယုတ္တံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ…ပေ… ဒွေ ခန္ဓေ…ပေ… ဒိဋ္ဌိဂတဝိပ္ပယုတ္တလောဘသဟဂတံ ဧကံ ခန္ဓံ ပဋိစ္စ တယော ခန္ဓာ လောဘော စ စိတ္တသမုဋ္ဌာနဉ္စ ရူပံ…ပေ… ဒွေ ခန္ဓေ…ပေ…။ (၃)

၄၆။ ဥပါဒါနဝိပ္ပယုတ္တံ ဓမ္မံ ပဋိစ္စ ဥပါဒါနဝိပ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ ¶ – ဥပါဒါနဝိပ္ပယုတ္တံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ…ပေ… ဒွေ ခန္ဓေ…ပေ… ဒိဋ္ဌိဂတဝိပ္ပယုတ္တံ လောဘံ ပဋိစ္စ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ ဥပါဒါနဝိပ္ပယုတ္တံ ဧကံ ခန္ဓံ ပဋိစ္စ တယော ခန္ဓာ ကဋတ္တာ စ ရူပံ…ပေ… ဒွေ ခန္ဓေ…ပေ… ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ၊ ဧကံ မဟာဘူတံ…ပေ…။ (၁)

ဥပါဒါနဝိပ္ပယုတ္တံ ဓမ္မံ ပဋိစ္စ ဥပါဒါနသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ဒိဋ္ဌိဂတဝိပ္ပယုတ္တံ လောဘံ ပဋိစ္စ သမ္ပယုတ္တကာ ခန္ဓာ။ (၂)

ဥပါဒါနဝိပ္ပယုတ္တံ ဓမ္မံ ပဋိစ္စ ဥပါဒါနသမ္ပယုတ္တော စ ဥပါဒါနဝိပ္ပယုတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ – ဒိဋ္ဌိဂတဝိပ္ပယုတ္တံ လောဘံ ပဋိစ္စ သမ္ပယုတ္တကာ ခန္ဓာ စိတ္တသမုဋ္ဌာနဉ္စ ရူပံ။ (၃)

၄၇။ ဥပါဒါနသမ္ပယုတ္တဉ္စ ဥပါဒါနဝိပ္ပယုတ္တဉ္စ ဓမ္မံ ပဋိစ္စ ဥပါဒါနသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ဒိဋ္ဌိဂတဝိပ္ပယုတ္တလောဘသဟဂတံ ဧကံ ခန္ဓဉ္စ လောဘဉ္စ ပဋိစ္စ တယော ခန္ဓာ…ပေ… ဒွေ ခန္ဓေ စ…ပေ…။ (၁)

ဥပါဒါနသမ္ပယုတ္တဉ္စ ဥပါဒါနဝိပ္ပယုတ္တဉ္စ ဓမ္မံ ပဋိစ္စ ဥပါဒါနဝိပ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ဥပါဒါနသမ္ပယုတ္တေ ခန္ဓေ စ မဟာဘူတေ စ ပဋိစ္စ ¶ စိတ္တသမုဋ္ဌာနံ ရူပံ၊ ဒိဋ္ဌိဂတဝိပ္ပယုတ္တလောဘသဟဂတေ ခန္ဓေ စ လောဘဉ္စ ပဋိစ္စ စိတ္တသမုဋ္ဌာနံ ရူပံ။ (၂)

ဥပါဒါနသမ္ပယုတ္တဉ္စ ဥပါဒါနဝိပ္ပယုတ္တဉ္စ ဓမ္မံ ပဋိစ္စ ဥပါဒါနသမ္ပယုတ္တော စ ဥပါဒါနဝိပ္ပယုတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ – ဒိဋ္ဌိဂတဝိပ္ပယုတ္တလောဘသဟဂတံ ဧကံ ခန္ဓဉ္စ လောဘဉ္စ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ…ပေ… ဒွေ ခန္ဓေ စ…ပေ…။ (၃)

၄၈။ ဥပါဒါနသမ္ပယုတ္တံ ¶ ဓမ္မံ ပဋိစ္စ ဥပါဒါနသမ္ပယုတ္တော ဓမ္မော ဥပ္ပဇ္ဇတိ အာရမ္မဏပစ္စယာ ¶ – ဥပါဒါနသမ္ပယုတ္တံ ဧကံ ခန္ဓံ ပဋိစ္စ တယော ခန္ဓာ…ပေ… ဒွေ ခန္ဓေ…ပေ…။ (၁)

ဥပါဒါနသမ္ပယုတ္တံ ဓမ္မံ ပဋိစ္စ ဥပါဒါနဝိပ္ပယုတ္တော ဓမ္မော ဥပ္ပဇ္ဇတိ အာရမ္မဏပစ္စယာ – ဒိဋ္ဌိဂတဝိပ္ပယုတ္တလောဘသဟဂတေ ခန္ဓေ ပဋိစ္စ လောဘော။ (၂)

ဥပါဒါနသမ္ပယုတ္တံ ဓမ္မံ ပဋိစ္စ ဥပါဒါနသမ္ပယုတ္တော စ ဥပါဒါနဝိပ္ပယုတ္တော စ ဓမ္မာ ဥပ္ပဇ္ဇန္တိ အာရမ္မဏပစ္စယာ – ဒိဋ္ဌိဂတဝိပ္ပယုတ္တလောဘသဟဂတံ ဧကံ ခန္ဓံ ပဋိစ္စ တယော ခန္ဓာ လောဘော စ…ပေ… ဒွေ ခန္ဓေ…ပေ…။ (၃)

၄၉။ ဥပါဒါနဝိပ္ပယုတ္တံ ဓမ္မံ ပဋိစ္စ ဥပါဒါနဝိပ္ပယုတ္တော ဓမ္မော ဥပ္ပဇ္ဇတိ အာရမ္မဏပစ္စယာ – ဥပါဒါနဝိပ္ပယုတ္တံ ဧကံ ခန္ဓံ…ပေ… ဒွေ ခန္ဓေ…ပေ… ပဋိသန္ဓိက္ခဏေ…ပေ… ဝတ္ထုံ ပဋိစ္စ ခန္ဓာ။ (၁)

ဥပါဒါနဝိပ္ပယုတ္တံ ဓမ္မံ ပဋိစ္စ ဥပါဒါနသမ္ပယုတ္တော ဓမ္မော ဥပ္ပဇ္ဇတိ အာရမ္မဏပစ္စယာ – ဒိဋ္ဌိဂတဝိပ္ပယုတ္တံ လောဘံ ပဋိစ္စ သမ္ပယုတ္တကာ ခန္ဓာ။ (၂)

ဥပါဒါနသမ္ပယုတ္တဉ္စ ဥပါဒါနဝိပ္ပယုတ္တဉ္စ ¶ ဓမ္မံ ပဋိစ္စ ဥပါဒါနသမ္ပယုတ္တော ဓမ္မော ဥပ္ပဇ္ဇတိ အာရမ္မဏပစ္စယာ – ဒိဋ္ဌိဂတဝိပ္ပယုတ္တလောဘသဟဂတံ ဧကံ ခန္ဓဉ္စ လောဘဉ္စ ပဋိစ္စ တယော ခန္ဓာ…ပေ… ဒွေ ခန္ဓေ စ…ပေ…။ (၃) (သံခိတ္တံ။)

၅၀။ ဟေတုယာ နဝ၊ အာရမ္မဏေ ဆ၊ အဓိပတိယာ နဝ၊ အနန္တရေ ဆ၊ သမနန္တရေ ဆ၊ သဟဇာတေ နဝ၊ အညမညေ ဆ၊ နိဿယေ နဝ၊ ဥပနိဿယေ ဆ၊ ပုရေဇာတေ ဆ၊ အာသေဝနေ ဆ၊ ကမ္မေ နဝ၊ ဝိပါကေ ဧကံ၊ အာဟာရေ နဝ (သဗ္ဗတ္ထ နဝ)၊ မဂ္ဂေ နဝ၊ သမ္ပယုတ္တေ ဆ၊ ဝိပ္ပယုတ္တေ နဝ၊ အတ္ထိယာ နဝ၊ နတ္ထိယာ ဆ၊ ဝိဂတေ ဆ၊ အဝိဂတေ နဝ။

၅၁။ ဥပါဒါနဝိပ္ပယုတ္တံ ¶ ¶ ဓမ္မံ ပဋိစ္စ ဥပါဒါနဝိပ္ပယုတ္တော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ ဥပါဒါနဝိပ္ပယုတ္တံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ…ပေ… ဒွေ ခန္ဓေ…ပေ… အဟေတုကပဋိသန္ဓိက္ခဏေ…ပေ… (ယာဝ အသညသတ္တာ) ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော။ (၁)

၅၂။ ဥပါဒါနသမ္ပယုတ္တံ ဓမ္မံ ပဋိစ္စ ဥပါဒါနဝိပ္ပယုတ္တော ဓမ္မော ဥပ္ပဇ္ဇတိ နအာရမ္မဏပစ္စယာ – ဥပါဒါနသမ္ပယုတ္တေ ခန္ဓေ ပဋိစ္စ စိတ္တသမုဋ္ဌာနံ ရူပံ။ (၁)

ဥပါဒါနဝိပ္ပယုတ္တံ ဓမ္မံ ပဋိစ္စ ဥပါဒါနဝိပ္ပယုတ္တော ဓမ္မော ဥပ္ပဇ္ဇတိ နအာရမ္မဏပစ္စယာ – ဥပါဒါနဝိပ္ပယုတ္တေ ခန္ဓေ ပဋိစ္စ စိတ္တသမုဋ္ဌာနံ ရူပံ၊ ဒိဋ္ဌိဂတဝိပ္ပယုတ္တံ လောဘံ ပဋိစ္စ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ…ပေ… (ယာဝ အသညသတ္တာ)။ (၁)

ဥပါဒါနသမ္ပယုတ္တဉ္စ ဥပါဒါနဝိပ္ပယုတ္တဉ္စ ဓမ္မံ ပဋိစ္စ ဥပါဒါနဝိပ္ပယုတ္တော ¶ ဓမ္မော ဥပ္ပဇ္ဇတိ နအာရမ္မဏပစ္စယာ – ဥပါဒါနသမ္ပယုတ္တေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ၊ ဒိဋ္ဌိဂတဝိပ္ပယုတ္တလောဘသဟဂတေ ခန္ဓေ စ လောဘဉ္စ ပဋိစ္စ စိတ္တသမုဋ္ဌာနံ ရူပံ။ (၁)

နအဓိပတိပစ္စယာ… နအနန္တရပစ္စယာ… နသမနန္တရပစ္စယာ… နဥပနိဿယပစ္စယာ။

၅၃။ ဥပါဒါနသမ္ပယုတ္တံ ဓမ္မံ ပဋိစ္စ ဥပါဒါနသမ္ပယုတ္တော ဓမ္မော ဥပ္ပဇ္ဇတိ နပုရေဇာတပစ္စယာ ¶ – အရူပေ ဥပါဒါနသမ္ပယုတ္တံ ဧကံ ခန္ဓံ ပဋိစ္စ တယော ခန္ဓာ…ပေ… ဒွေ ခန္ဓေ…ပေ…။ (၁)

ဥပါဒါနသမ္ပယုတ္တံ ဓမ္မံ ပဋိစ္စ ဥပါဒါနဝိပ္ပယုတ္တော ဓမ္မော ဥပ္ပဇ္ဇတိ နပုရေဇာတပစ္စယာ – အရူပေ ဒိဋ္ဌိဂတဝိပ္ပယုတ္တလောဘသဟဂတေ ခန္ဓေ ပဋိစ္စ လောဘော၊ ဥပါဒါနသမ္ပယုတ္တေ ခန္ဓေ ပဋိစ္စ စိတ္တသမုဋ္ဌာနံ ရူပံ။ (၂)

ဥပါဒါနသမ္ပယုတ္တံ ¶ ဓမ္မံ ပဋိစ္စ ဥပါဒါနသမ္ပယုတ္တော စ ဥပါဒါနဝိပ္ပယုတ္တော စ ဓမ္မာ ဥပ္ပဇ္ဇန္တိ နပုရေဇာတပစ္စယာ – အရူပေ ဒိဋ္ဌိဂတဝိပ္ပယုတ္တလောဘသဟဂတံ ဧကံ ခန္ဓံ ပဋိစ္စ တယော ခန္ဓာ လောဘော စ…ပေ… ဒွေ ခန္ဓေ…ပေ…။ (၃)

၅၄။ ဥပါဒါနဝိပ္ပယုတ္တံ ဓမ္မံ ပဋိစ္စ ဥပါဒါနဝိပ္ပယုတ္တော ဓမ္မော ဥပ္ပဇ္ဇတိ နပုရေဇာတပစ္စယာ – အရူပေ ဥပါဒါနဝိပ္ပယုတ္တံ ဧကံ ခန္ဓံ ပဋိစ္စ တယော ခန္ဓာ…ပေ… ဒွေ ခန္ဓေ…ပေ… ဥပါဒါနဝိပ္ပယုတ္တေ ခန္ဓေ ပဋိစ္စ စိတ္တသမုဋ္ဌာနံ ရူပံ၊ ဒိဋ္ဌိဂတဝိပ္ပယုတ္တံ လောဘံ ပဋိစ္စ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ…ပေ… (ယာဝ အသညသတ္တာ)။ (၁)

ဥပါဒါနဝိပ္ပယုတ္တံ ဓမ္မံ ပဋိစ္စ ဥပါဒါနသမ္ပယုတ္တော ဓမ္မော ဥပ္ပဇ္ဇတိ နပုရေဇာတပစ္စယာ ¶ – အရူပေ ဒိဋ္ဌိဂတဝိပ္ပယုတ္တံ လောဘံ ပဋိစ္စ သမ္ပယုတ္တကာ ခန္ဓာ။ (၂)

ဥပါဒါနသမ္ပယုတ္တဉ္စ ဥပါဒါနဝိပ္ပယုတ္တဉ္စ ဓမ္မံ ပဋိစ္စ ဥပါဒါနသမ္ပယုတ္တော ဓမ္မော ဥပ္ပဇ္ဇတိ နပုရေဇာတပစ္စယာ – အရူပေ ဒိဋ္ဌိဂတဝိပ္ပယုတ္တလောဘသဟဂတံ ဧကံ ခန္ဓဉ္စ လောဘဉ္စ ပဋိစ္စ တယော ခန္ဓာ…ပေ… ဒွေ ခန္ဓေ စ…ပေ…။ (၁)

ဥပါဒါနသမ္ပယုတ္တဉ္စ ဥပါဒါနဝိပ္ပယုတ္တဉ္စ ဓမ္မံ ပဋိစ္စ ဥပါဒါနဝိပ္ပယုတ္တော ဓမ္မော ဥပ္ပဇ္ဇတိ နပုရေဇာတပစ္စယာ – ဥပါဒါနသမ္ပယုတ္တေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ၊ ဒိဋ္ဌိဂတဝိပ္ပယုတ္တလောဘသဟဂတေ ခန္ဓေ စ လောဘဉ္စ ပဋိစ္စ စိတ္တသမုဋ္ဌာနံ ရူပံ။ (၂)

နပစ္ဆာဇာတပစ္စယာ… နအာသေဝနပစ္စယာ။

၅၅။ ဥပါဒါနသမ္ပယုတ္တံ ¶ ဓမ္မံ ပဋိစ္စ ဥပါဒါနသမ္ပယုတ္တော ဓမ္မော ဥပ္ပဇ္ဇတိ နကမ္မပစ္စယာ – ဥပါဒါနသမ္ပယုတ္တေ ခန္ဓေ ပဋိစ္စ သမ္ပယုတ္တကာ စေတနာ။ (၁)

ဥပါဒါနဝိပ္ပယုတ္တံ ဓမ္မံ ပဋိစ္စ ဥပါဒါနဝိပ္ပယုတ္တော ဓမ္မော ဥပ္ပဇ္ဇတိ နကမ္မပစ္စယာ – ဥပါဒါနဝိပ္ပယုတ္တေ ခန္ဓေ ပဋိစ္စ သမ္ပယုတ္တကာ စေတနာ၊ ဗာဟိရံ… အာဟာရသမုဋ္ဌာနံ… ဥတုသမုဋ္ဌာနံ…ပေ…။ (၁)

ဥပါဒါနဝိပ္ပယုတ္တံ ဓမ္မံ ပဋိစ္စ ဥပါဒါနသမ္ပယုတ္တော ဓမ္မော ဥပ္ပဇ္ဇတိ နကမ္မပစ္စယာ – ဒိဋ္ဌိဂတဝိပ္ပယုတ္တံ လောဘံ ပဋိစ္စ သမ္ပယုတ္တကာ စေတနာ။ (၂)

ဥပါဒါနသမ္ပယုတ္တဉ္စ ¶ ဥပါဒါနဝိပ္ပယုတ္တဉ္စ ဓမ္မံ ပဋိစ္စ ဥပါဒါနသမ္ပယုတ္တော ဓမ္မော ဥပ္ပဇ္ဇတိ နကမ္မပစ္စယာ – ဒိဋ္ဌိဂတဝိပ္ပယုတ္တလောဘသဟဂတေ ခန္ဓေ စ လောဘဉ္စ ပဋိစ္စ သမ္ပယုတ္တကာ စေတနာ။ (၁) (သံခိတ္တံ။)

၅၆။ နဟေတုယာ ¶ ဧကံ၊ နအာရမ္မဏေ တီဏိ၊ နအဓိပတိယာ နဝ၊ နအနန္တရေ တီဏိ၊ နသမနန္တရေ တီဏိ၊ နအညမညေ တီဏိ၊ နဥပနိဿယေ တီဏိ၊ နပုရေဇာတေ သတ္တ၊ နပစ္ဆာဇာတေ နဝ၊ နအာသေဝနေ နဝ၊ နကမ္မေ စတ္တာရိ၊ နဝိပါကေ နဝ၊ နအာဟာရေ ဧကံ၊ နဣန္ဒြိယေ ဧကံ၊ နဈာနေ ဧကံ၊ နမဂ္ဂေ ဧကံ၊ နသမ္ပယုတ္တေ တီဏိ၊ နဝိပ္ပယုတ္တေ ဆ၊ နောနတ္ထိယာ တီဏိ၊ နောဝိဂတေ တီဏိ။

(ဣတရေ ¶ ဒွေ ဂဏနာပိ ကာတဗ္ဗာ။ သဟဇာတဝါရော ပဋိစ္စဝါရသဒိသော။)

၅၇။ ဥပါဒါနသမ္ပယုတ္တံ ဓမ္မံ ပစ္စယာ ဥပါဒါနသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ… တီဏိ (ပဋိစ္စသဒိသံ)။

ဥပါဒါနဝိပ္ပယုတ္တံ ဓမ္မံ ပစ္စယာ ဥပါဒါနဝိပ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ဥပါဒါနဝိပ္ပယုတ္တံ ဧကံ ခန္ဓံ ပစ္စယာ…ပေ… (ယာဝ အဇ္ဈတ္တိကာ မဟာဘူတာ) ဝတ္ထုံ ပစ္စယာ ဥပါဒါနဝိပ္ပယုတ္တာ ခန္ဓာ၊ ဝတ္ထုံ ပစ္စယာ ဒိဋ္ဌိဂတဝိပ္ပယုတ္တော လောဘော။ (၁)

ဥပါဒါနဝိပ္ပယုတ္တံ ဓမ္မံ ပစ္စယာ ဥပါဒါနသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ဝတ္ထုံ ပစ္စယာ ဥပါဒါနသမ္ပယုတ္တာ ခန္ဓာ၊ ဒိဋ္ဌိဂတဝိပ္ပယုတ္တံ လောဘံ ပစ္စယာ သမ္ပယုတ္တကာ ခန္ဓာ။ (၂)

ဥပါဒါနဝိပ္ပယုတ္တံ ¶ ဓမ္မံ ပစ္စယာ ဥပါဒါနသမ္ပယုတ္တော စ ဥပါဒါနဝိပ္ပယုတ္တော စ ဓမ္မာ ဥပ္ပဇ္ဇန္တိ ¶ ဟေတုပစ္စယာ – ဝတ္ထုံ ပစ္စယာ ဥပါဒါနသမ္ပယုတ္တကာ ခန္ဓာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ၊ ဒိဋ္ဌိဂတဝိပ္ပယုတ္တံ လောဘံ ပစ္စယာ သမ္ပယုတ္တကာ ¶ ခန္ဓာ စိတ္တသမုဋ္ဌာနဉ္စ ရူပံ၊ ဝတ္ထုံ ပစ္စယာ ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ။ (၃)

၅၈။ ဥပါဒါနသမ္ပယုတ္တဉ္စ ဥပါဒါနဝိပ္ပယုတ္တဉ္စ ဓမ္မံ ပစ္စယာ ဥပါဒါနသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ဥပါဒါနသမ္ပယုတ္တံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ…ပေ… ဒွေ ခန္ဓေ စ…ပေ… ဒိဋ္ဌိဂတဝိပ္ပယုတ္တလောဘသဟဂတံ ဧကံ ခန္ဓဉ္စ လောဘဉ္စ ပစ္စယာ တယော ခန္ဓာ…ပေ… ဒွေ ခန္ဓေ စ…ပေ…။ (၁)

ဥပါဒါနသမ္ပယုတ္တဉ္စ ဥပါဒါနဝိပ္ပယုတ္တဉ္စ ဓမ္မံ ပစ္စယာ ဥပါဒါနဝိပ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ဥပါဒါနသမ္ပယုတ္တေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ၊ ဒိဋ္ဌိဂတဝိပ္ပယုတ္တလောဘသဟဂတေ ခန္ဓေ စ လောဘဉ္စ ပစ္စယာ စိတ္တသမုဋ္ဌာနံ ရူပံ၊ ဒိဋ္ဌိဂတဝိပ္ပယုတ္တလောဘသဟဂတေ ခန္ဓေ စ ဝတ္ထုဉ္စ ပစ္စယာ လောဘော။ (၂)

ဥပါဒါနသမ္ပယုတ္တဉ္စ ဥပါဒါနဝိပ္ပယုတ္တဉ္စ ဓမ္မံ ပစ္စယာ ဥပါဒါနသမ္ပယုတ္တော စ ဥပါဒါနဝိပ္ပယုတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ – ဥပါဒါနသမ္ပယုတ္တံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ…ပေ… ဒွေ ခန္ဓေ စ…ပေ… ဥပါဒါနသမ္ပယုတ္တေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ၊ ဒိဋ္ဌိဂတဝိပ္ပယုတ္တလောဘသဟဂတံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ လောဘော စ…ပေ… ဒွေ ခန္ဓေ စ…ပေ…။ (၃) (သံခိတ္တံ။ အာရမ္မဏပစ္စယမှိ ပဉ္စ ဝိညာဏာ ကာတဗ္ဗာ။)

၅၉။ ဟေတုယာ နဝ၊ အာရမ္မဏေ နဝ၊ အဓိပတိယာ နဝ၊ အနန္တရေ နဝ (သဗ္ဗတ္ထ နဝ)၊ ဝိပါကေ ဧကံ…ပေ… အဝိဂတေ နဝ။

၆၀။ ဥပါဒါနဝိပ္ပယုတ္တံ ¶ ဓမ္မံ ပစ္စယာ ဥပါဒါနဝိပ္ပယုတ္တော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ ¶ ဥပါဒါနဝိပ္ပယုတ္တံ ဧကံ ခန္ဓံ ပစ္စယာ…ပေ… (ယာဝ အသညသတ္တာ ¶ ) စက္ခာယတနံ ပစ္စယာ စက္ခုဝိညာဏံ…ပေ… ကာယာယတနံ ပစ္စယာ ကာယဝိညာဏံ…ပေ… ဝတ္ထုံ ပစ္စယာ အဟေတုကာ ဥပါဒါနဝိပ္ပယုတ္တာ ခန္ဓာ၊ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ စ ဝတ္ထုဉ္စ ပစ္စယာ ဝိစိကိစ္ဆာသဟဂတော ဥဒ္ဓစ္စသဟဂတော မောဟော (သံခိတ္တံ)။

၆၁။ နဟေတုယာ ဧကံ၊ နအာရမ္မဏေ တီဏိ၊ နအဓိပတိယာ နဝ၊ နအနန္တရေ တီဏိ၊ နသမနန္တရေ တီဏိ၊ နအညမညေ တီဏိ၊ နဥပနိဿယေ တီဏိ၊ နပုရေဇာတေ သတ္တ၊ နပစ္ဆာဇာတေ နဝ၊ နအာသေဝနေ နဝ၊ နကမ္မေ စတ္တာရိ၊ နဝိပါကေ နဝ၊ နအာဟာရေ ဧကံ၊ နဣန္ဒြိယေ ဧကံ၊ နဈာနေ ဧကံ၊ နမဂ္ဂေ ဧကံ၊ နသမ္ပယုတ္တေ တီဏိ၊ နဝိပ္ပယုတ္တေ ဆ၊ နောနတ္ထိယာ တီဏိ၊ နောဝိဂတေ တီဏိ။

(ဧဝံ ဣတရေ ဒွေ ဂဏနာပိ နိဿယဝါရောပိ ကာတဗ္ဗော။)

၆၂။ ဥပါဒါနသမ္ပယုတ္တံ ဓမ္မံ သံသဋ္ဌော ဥပါဒါနသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ဥပါဒါနသမ္ပယုတ္တံ ဧကံ ခန္ဓံ သံသဋ္ဌာ… တီဏိ။

ဥပါဒါနဝိပ္ပယုတ္တံ ဓမ္မံ သံသဋ္ဌော ဥပါဒါနဝိပ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ (ပဋိစ္စသဒိသံ၊ အရူပံယေဝ ကာတဗ္ဗံ)။

ဥပါဒါနဝိပ္ပယုတ္တံ ¶ ဓမ္မံ သံသဋ္ဌော ဥပါဒါနသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ (ပဋိစ္စသဒိသံ၊ အရူပံယေဝ ကာတဗ္ဗံ)။

ဥပါဒါနသမ္ပယုတ္တဉ္စ ဥပါဒါနဝိပ္ပယုတ္တဉ္စ ဓမ္မံ သံသဋ္ဌော ဥပါဒါနသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ (ပဋိစ္စသဒိသံ၊ အရူပံယေဝ ကာတဗ္ဗံ)။

ဟေတုယာ ဆ၊ အာရမ္မဏေ ဆ၊ အဓိပတိယာ ဆ (သဗ္ဗတ္ထ ဆ)၊ ဝိပါကေ ဧကံ…ပေ… အဝိဂတေ ဆ။

ဥပါဒါနဝိပ္ပယုတ္တံ ဓမ္မံ သံသဋ္ဌော ဥပါဒါနဝိပ္ပယုတ္တော ဓမ္မော ဥပ္ပဇ္ဇတိ နဟေတုပစ္စယာ (သံခိတ္တံ)။

နဟေတုယာ ¶ ဧကံ၊ နအဓိပတိယာ ဆ၊ နပုရေဇာတေ ဆ၊ နပစ္ဆာဇာတေ ဆ၊ နအာသေဝနေ ဆ၊ နကမ္မေ စတ္တာရိ၊ နဝိပါကေ ဆ၊ နဈာနေ ဧကံ၊ နမဂ္ဂေ ဧကံ၊ နဝိပ္ပယုတ္တေ ဆ။

(ဧဝံ ဣတရေ ဒွေ ဂဏနာပိ သမ္ပယုတ္တဝါရောပိ ကာတဗ္ဗော။)

၆၃။ ဥပါဒါနသမ္ပယုတ္တော ¶ ဓမ္မော ဥပါဒါနသမ္ပယုတ္တဿ ဓမ္မဿ ဟေတုပစ္စယေန ပစ္စယော – ဥပါဒါနသမ္ပယုတ္တာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော။ (၁)

ဥပါဒါနသမ္ပယုတ္တော ဓမ္မော ဥပါဒါနဝိပ္ပယုတ္တဿ ဓမ္မဿ ဟေတုပစ္စယေန ပစ္စယော – ဥပါဒါနသမ္ပယုတ္တာ ဟေတူ စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော၊ ဒိဋ္ဌိဂတဝိပ္ပယုတ္တလောဘသဟဂတာ ဟေတူ ဒိဋ္ဌိဂတဝိပ္ပယုတ္တလောဘဿ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော။ (မူလံ ကာတဗ္ဗံ) ဥပါဒါနသမ္ပယုတ္တာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ဒိဋ္ဌိဂတဝိပ္ပယုတ္တလောဘသဟဂတာ ဟေတူ သမ္ပယုတ္တကာနံ ¶ ခန္ဓာနံ လောဘဿ စ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော။ (၃)

၆၄။ ဥပါဒါနဝိပ္ပယုတ္တော ဓမ္မော ဥပါဒါနဝိပ္ပယုတ္တဿ ဓမ္မဿ ဟေတုပစ္စယေန ပစ္စယော – ဥပါဒါနဝိပ္ပယုတ္တာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ဒိဋ္ဌိဂတဝိပ္ပယုတ္တော လောဘော စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ…ပေ…။ (မူလံ ကာတဗ္ဗံ) ဒိဋ္ဌိဂတဝိပ္ပယုတ္တော လောဘော သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော။ (မူလံ ကာတဗ္ဗံ) ဒိဋ္ဌိဂတဝိပ္ပယုတ္တော လောဘော ¶ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော။ (၃)

၆၅။ ဥပါဒါနသမ္ပယုတ္တော စ ဥပါဒါနဝိပ္ပယုတ္တော စ ဓမ္မာ ဥပါဒါနသမ္ပယုတ္တဿ ဓမ္မဿ ဟေတုပစ္စယေန ပစ္စယော – ဒိဋ္ဌိဂတဝိပ္ပယုတ္တလောဘသဟဂတော မောဟော စ လောဘော စ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော။ (မူလံ ကာတဗ္ဗံ) ဒိဋ္ဌိဂတဝိပ္ပယုတ္တလောဘသဟဂတော မောဟော စ လောဘော စ စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော။ (၂)

ဥပါဒါနသမ္ပယုတ္တော ¶ စ ဥပါဒါနဝိပ္ပယုတ္တော စ ဓမ္မာ ဥပါဒါနသမ္ပယုတ္တဿ စ ဥပါဒါနဝိပ္ပယုတ္တဿ စ ဓမ္မဿ ဟေတုပစ္စယေန ပစ္စယော – ဒိဋ္ဌိဂတဝိပ္ပယုတ္တလောဘသဟဂတော မောဟော စ လောဘော စ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော။ (၃)

၆၆။ ဥပါဒါနသမ္ပယုတ္တော ဓမ္မော ဥပါဒါနသမ္ပယုတ္တဿ ဓမ္မဿ အာရမ္မဏပစ္စယေန ပစ္စယော – ဥပါဒါနသမ္ပယုတ္တေ ခန္ဓေ အာရဗ္ဘ ဥပါဒါနသမ္ပယုတ္တာ ¶ ခန္ဓာ ဥပ္ပဇ္ဇန္တိ။ (မူလံ ကာတဗ္ဗံ) ဥပါဒါနသမ္ပယုတ္တေ ခန္ဓေ အာရဗ္ဘ ဥပါဒါနဝိပ္ပယုတ္တာ ခန္ဓာ စ လောဘော စ ဥပ္ပဇ္ဇန္တိ။ (မူလံ ကာတဗ္ဗံ) ဥပါဒါနသမ္ပယုတ္တေ ခန္ဓေ အာရဗ္ဘ ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ဥပ္ပဇ္ဇန္တိ။ (၃)

၆၇။ ဥပါဒါနဝိပ္ပယုတ္တော ဓမ္မော ဥပါဒါနဝိပ္ပယုတ္တဿ ဓမ္မဿ အာရမ္မဏပစ္စယေန ပစ္စယော – ဒါနံ…ပေ… သီလံ…ပေ… ဥပေါသထကမ္မံ…ပေ… ပုဗ္ဗေ သုစိဏ္ဏာနိ…ပေ… ဈာနာ ဝုဋ္ဌဟိတွာ ဈာနံ ပစ္စဝေက္ခတိ၊ အဿာဒေတိ အဘိနန္ဒတိ၊ တံ အာရဗ္ဘ ဒိဋ္ဌိဂတဝိပ္ပယုတ္တော ရာဂေါ…ပေ… ဝိစိကိစ္ဆာ…ပေ… ဥဒ္ဓစ္စံ ဥပ္ပဇ္ဇတိ၊ ဈာနေ ပရိဟီနေ ဝိပ္ပဋိသာရိဿ ဒေါမနဿံ ဥပ္ပဇ္ဇတိ။ အရိယာ မဂ္ဂါ ဝုဋ္ဌဟိတွာ မဂ္ဂံ ပစ္စဝေက္ခန္တိ၊ ဖလံ…ပေ… နိဗ္ဗာနံ ပစ္စဝေက္ခန္တိ။ နိဗ္ဗာနံ ဂေါတြဘုဿ၊ ဝေါဒါနဿ၊ မဂ္ဂဿ၊ ဖလဿ၊ အာဝဇ္ဇနာယ အာရမ္မဏပစ္စယေန ပစ္စယော။ အရိယာ ဥပါဒါနဝိပ္ပယုတ္တေ ပဟီနေ ကိလေသေ…ပေ… ဝိက္ခမ္ဘိတေ ကိလေသေ…ပေ… ပုဗ္ဗေ သမုဒါစိဏ္ဏေ ကိလေသေ…ပေ… စက္ခုံ…ပေ… ဝတ္ထုံ ဥပါဒါနဝိပ္ပယုတ္တေ ခန္ဓေ ¶ စ လောဘဉ္စ အနိစ္စတော…ပေ… ဝိပဿတိ၊ အဿာဒေတိ အဘိနန္ဒတိ၊ တံ အာရဗ္ဘ ဒိဋ္ဌိဂတဝိပ္ပယုတ္တော ရာဂေါ…ပေ… ဝိစိကိစ္ဆာ…ပေ… ဥဒ္ဓစ္စံ…ပေ… ဒေါမနဿံ ဥပ္ပဇ္ဇတိ…ပေ… (သဗ္ဗံ ပရိပုဏ္ဏံ)၊ ဒိဗ္ဗေန စက္ခုနာ… (ယာဝ ကာယဝိညာဏံ)၊ ဥပါဒါနဝိပ္ပယုတ္တာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော။ (၁)

ဥပါဒါနဝိပ္ပယုတ္တော ဓမ္မော ဥပါဒါနသမ္ပယုတ္တဿ ဓမ္မဿ အာရမ္မဏပစ္စယေန ¶ ပစ္စယော – ဒါနံ ¶ …ပေ… ဈာနံ…ပေ… စက္ခုံ…ပေ… ဝတ္ထုံ ဥပါဒါနဝိပ္ပယုတ္တေ ခန္ဓေ စ လောဘဉ္စ အဿာဒေတိ အဘိနန္ဒတိ၊ တံ အာရဗ္ဘ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ။ (၂)

ဥပါဒါနဝိပ္ပယုတ္တော ဓမ္မော ဥပါဒါနသမ္ပယုတ္တဿ စ ဥပါဒါနဝိပ္ပယုတ္တဿ စ ဓမ္မဿ အာရမ္မဏပစ္စယေန ပစ္စယော – စက္ခုံ…ပေ… ဝတ္ထုံ ဥပါဒါနဝိပ္ပယုတ္တေ ခန္ဓေ စ လောဘဉ္စ အာရဗ္ဘ ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ဥပ္ပဇ္ဇန္တိ။ (၃)

၆၈။ ဥပါဒါနသမ္ပယုတ္တော စ ဥပါဒါနဝိပ္ပယုတ္တော စ ဓမ္မာ ဥပါဒါနသမ္ပယုတ္တဿ ဓမ္မဿ အာရမ္မဏပစ္စယေန ပစ္စယော – ဒိဋ္ဌိဂတဝိပ္ပယုတ္တလောဘသဟဂတေ ခန္ဓေ စ လောဘဉ္စ အာရဗ္ဘ ဥပါဒါနသမ္ပယုတ္တာ ခန္ဓာ ဥပ္ပဇ္ဇန္တိ။ (မူလံ ကာတဗ္ဗံ) ဒိဋ္ဌိဂတဝိပ္ပယုတ္တလောဘသဟဂတေ ခန္ဓေ စ လောဘဉ္စ အာရဗ္ဘ ဥပါဒါနဝိပ္ပယုတ္တာ ခန္ဓာ စ လောဘော စ ဥပ္ပဇ္ဇန္တိ။ (မူလံ ကာတဗ္ဗံ) ဒိဋ္ဌိဂတဝိပ္ပယုတ္တလောဘသဟဂတေ ခန္ဓေ စ လောဘဉ္စ အာရဗ္ဘ ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ဥပ္ပဇ္ဇန္တိ။ (၃)

၆၉။ ဥပါဒါနသမ္ပယုတ္တော ဓမ္မော ဥပါဒါနသမ္ပယုတ္တဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ။ အာရမ္မဏာဓိပတိ – ဥပါဒါနသမ္ပယုတ္တေ ခန္ဓေ ဂရုံ ကတွာ ဥပါဒါနသမ္ပယုတ္တာ ခန္ဓာ ဥပ္ပဇ္ဇန္တိ။ သဟဇာတာဓိပတိ – ဥပါဒါနသမ္ပယုတ္တာဓိပတိ သမ္ပယုတ္တကာနံ ခန္ဓာနံ အဓိပတိပစ္စယေန ¶ ပစ္စယော။ (မူလံ ကာတဗ္ဗံ) အာရမ္မဏာဓိပတိ၊ သဟဇာတာဓိပတိ။ အာရမ္မဏာဓိပတိ – ဥပါဒါနသမ္ပယုတ္တေ ¶ ခန္ဓေ ဂရုံ ကတွာ ဒိဋ္ဌိဂတဝိပ္ပယုတ္တော လောဘော ဥပ္ပဇ္ဇတိ။ သဟဇာတာဓိပတိ – ဥပါဒါနသမ္ပယုတ္တာဓိပတိ စိတ္တသမုဋ္ဌာနာနံ ရူပါနံ အဓိပတိပစ္စယေန ပစ္စယော၊ ဒိဋ္ဌိဂတဝိပ္ပယုတ္တလောဘသဟဂတာဓိပတိ လောဘဿ စ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော။ (မူလံ ကာတဗ္ဗံ) အာရမ္မဏာဓိပတိ၊ သဟဇာတာဓိပတိ။ အာရမ္မဏာဓိပတိ – ဥပါဒါနသမ္ပယုတ္တေ ခန္ဓေ ဂရုံ ကတွာ ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ဥပ္ပဇ္ဇန္တိ။ သဟဇာတာဓိပတိ – ဥပါဒါနသမ္ပယုတ္တာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော၊ ဒိဋ္ဌိဂတဝိပ္ပယုတ္တလောဘသဟဂတာဓိပတိ သမ္ပယုတ္တကာနံ ခန္ဓာနံ လောဘဿ စ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော။ (၃)

၇၀။ ဥပါဒါနဝိပ္ပယုတ္တော ¶ ဓမ္မော ဥပါဒါနဝိပ္ပယုတ္တဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ။ အာရမ္မဏာဓိပတိ – ဒါနံ…ပေ… သီလံ…ပေ… ဈာနာ ဝုဋ္ဌဟိတွာ ဈာနံ ဂရုံ ကတွာ ပစ္စဝေက္ခတိ၊ အဿာဒေတိ အဘိနန္ဒတိ၊ တံ ဂရုံ ကတွာ ဒိဋ္ဌိဂတဝိပ္ပယုတ္တော ရာဂေါ ဥပ္ပဇ္ဇတိ…ပေ… အရိယာ မဂ္ဂါ ဝုဋ္ဌဟိတွာ…ပေ… ဖလဿ အဓိပတိပစ္စယေန ပစ္စယော၊ စက္ခုံ…ပေ… ဝတ္ထုံ ဥပါဒါနဝိပ္ပယုတ္တေ ခန္ဓေ စ လောဘဉ္စ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ဒိဋ္ဌိဂတဝိပ္ပယုတ္တော ရာဂေါ ဥပ္ပဇ္ဇတိ။ သဟဇာတာဓိပတိ – ဥပါဒါနဝိပ္ပယုတ္တာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော။ (၁)

ဥပါဒါနဝိပ္ပယုတ္တော ဓမ္မော ¶ ဥပါဒါနသမ္ပယုတ္တဿ ဓမ္မဿ အဓိပတိပစ္စယေန ပစ္စယော။ အာရမ္မဏာဓိပတိ – ဒါနံ…ပေ… ဈာနံ…ပေ… စက္ခုံ…ပေ… ဝတ္ထုံ ဥပါဒါနဝိပ္ပယုတ္တေ ခန္ဓေ စ လောဘဉ္စ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ။ (၂)

ဥပါဒါနဝိပ္ပယုတ္တော ဓမ္မော ဥပါဒါနသမ္ပယုတ္တဿ စ ဥပါဒါနဝိပ္ပယုတ္တဿ စ ဓမ္မဿ အဓိပတိပစ္စယေန ပစ္စယော။ အာရမ္မဏာဓိပတိ – စက္ခုံ…ပေ… ဝတ္ထုံ ဥပါဒါနဝိပ္ပယုတ္တေ ခန္ဓေ စ လောဘဉ္စ ဂရုံ ကတွာ ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ဥပ္ပဇ္ဇန္တိ။ (၃)

၇၁။ ဥပါဒါနသမ္ပယုတ္တော ¶ စ ဥပါဒါနဝိပ္ပယုတ္တော စ ဓမ္မာ ဥပါဒါနသမ္ပယုတ္တဿ ဓမ္မဿ အဓိပတိပစ္စယေန ပစ္စယော။ အာရမ္မဏာဓိပတိ – ဒိဋ္ဌိဂတဝိပ္ပယုတ္တလောဘသဟဂတေ ခန္ဓေ စ လောဘဉ္စ ဂရုံ ကတွာ ဥပါဒါနသမ္ပယုတ္တာ ခန္ဓာ ဥပ္ပဇ္ဇန္တိ။ (မူလံ ကာတဗ္ဗံ) ဒိဋ္ဌိဂတဝိပ္ပယုတ္တလောဘသဟဂတေ ခန္ဓေ စ လောဘဉ္စ ဂရုံ ကတွာ ဒိဋ္ဌိဂတဝိပ္ပယုတ္တော လောဘော ဥပ္ပဇ္ဇတိ။ (မူလံ ကာတဗ္ဗံ) ဒိဋ္ဌိဂတဝိပ္ပယုတ္တလောဘသဟဂတေ ခန္ဓေ စ လောဘဉ္စ ဂရုံ ကတွာ ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ဥပ္ပဇ္ဇန္တိ။ (၃)

၇၂။ ဥပါဒါနသမ္ပယုတ္တော ဓမ္မော ဥပါဒါနသမ္ပယုတ္တဿ ဓမ္မဿ အနန္တရပစ္စယေန ပစ္စယော – ပုရိမာ ¶ ပုရိမာ ဥပါဒါနသမ္ပယုတ္တာ ခန္ဓာ ပစ္ဆိမာနံ ပစ္ဆိမာနံ ဥပါဒါနသမ္ပယုတ္တကာနံ ခန္ဓာနံ အနန္တရပစ္စယေန ပစ္စယော။ (မူလံ ကာတဗ္ဗံ) ပုရိမာ ပုရိမာ ဒိဋ္ဌိဂတဝိပ္ပယုတ္တလောဘသဟဂတာ ¶ ခန္ဓာ ပစ္ဆိမဿ ပစ္ဆိမဿ ဒိဋ္ဌိဂတဝိပ္ပယုတ္တဿ လောဘဿ အနန္တရပစ္စယေန ပစ္စယော၊ ဥပါဒါနသမ္ပယုတ္တာ ခန္ဓာ ဝုဋ္ဌာနဿ အနန္တရပစ္စယေန ပစ္စယော။ (မူလံ ကာတဗ္ဗံ) ပုရိမာ ပုရိမာ ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ ပစ္ဆိမာနံ ပစ္ဆိမာနံ ဒိဋ္ဌိဂတဝိပ္ပယုတ္တလောဘသဟဂတာနံ ခန္ဓာနံ လောဘဿ စ အနန္တရပစ္စယေန ပစ္စယော။ (၃)

၇၃။ ဥပါဒါနဝိပ္ပယုတ္တော ဓမ္မော ဥပါဒါနဝိပ္ပယုတ္တဿ ဓမ္မဿ အနန္တရပစ္စယေန ပစ္စယော – ပုရိမော ပုရိမော ဒိဋ္ဌိဂတဝိပ္ပယုတ္တော လောဘော ပစ္ဆိမဿ ပစ္ဆိမဿ ဒိဋ္ဌိဂတဝိပ္ပယုတ္တဿ လောဘဿ အနန္တရပစ္စယေန ပစ္စယော၊ ပုရိမာ ပုရိမာ ဥပါဒါနဝိပ္ပယုတ္တာ ခန္ဓာ ပစ္ဆိမာနံ ပစ္ဆိမာနံ ဥပါဒါနဝိပ္ပယုတ္တာနံ ခန္ဓာနံ အနန္တရပစ္စယေန ပစ္စယော၊ ဒိဋ္ဌိဂတဝိပ္ပယုတ္တော လောဘော ဝုဋ္ဌာနဿ အနန္တရပစ္စယေန ပစ္စယော၊ အနုလောမံ ဂေါတြဘုဿ…ပေ… ဖလသမာပတ္တိယာ အနန္တရပစ္စယေန ပစ္စယော။ (မူလံ ကာတဗ္ဗံ) ပုရိမော ပုရိမော ဒိဋ္ဌိဂတဝိပ္ပယုတ္တော လောဘော ပစ္ဆိမာနံ ပစ္ဆိမာနံ ဒိဋ္ဌိဂတဝိပ္ပယုတ္တလောဘသဟဂတာနံ ခန္ဓာနံ အနန္တရပစ္စယေန ပစ္စယော။ အာဝဇ္ဇနာ ဥပါဒါနသမ္ပယုတ္တကာနံ ခန္ဓာနံ အနန္တရပစ္စယေန ပစ္စယော။ (မူလံ ကာတဗ္ဗံ) ပုရိမော ပုရိမော ဒိဋ္ဌိဂတဝိပ္ပယုတ္တော လောဘော ပစ္ဆိမာနံ ပစ္ဆိမာနံ ဒိဋ္ဌိဂတဝိပ္ပယုတ္တလောဘသဟဂတာနံ ခန္ဓာနံ လောဘဿ စ အနန္တရပစ္စယေန ပစ္စယော၊ အာဝဇ္ဇနာ ¶ ဒိဋ္ဌိဂတဝိပ္ပယုတ္တလောဘသဟဂတာနံ ခန္ဓာနံ လောဘဿ စ အနန္တရပစ္စယေန ပစ္စယော။ (၃)

၇၄။ ဥပါဒါနသမ္ပယုတ္တော စ ဥပါဒါနဝိပ္ပယုတ္တော စ ဓမ္မာ ဥပါဒါနသမ္ပယုတ္တဿ ¶ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ပစ္ဆိမာနံ ပစ္ဆိမာနံ ဒိဋ္ဌိဂတဝိပ္ပယုတ္တလောဘသဟဂတာနံ ခန္ဓာနံ အနန္တရပစ္စယေန ပစ္စယော။ (မူလံ ကာတဗ္ဗံ) ပုရိမာ ပုရိမာ ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ပစ္ဆိမဿ ပစ္ဆိမဿ ဒိဋ္ဌိဂတဝိပ္ပယုတ္တဿ လောဘဿ အနန္တရပစ္စယေန ပစ္စယော၊ ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ဝုဋ္ဌာနဿ အနန္တရပစ္စယေန ပစ္စယော။ (မူလံ ကာတဗ္ဗံ) ပုရိမာ ပုရိမာ ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ပစ္ဆိမာနံ ပစ္ဆိမာနံ ဒိဋ္ဌိဂတဝိပ္ပယုတ္တလောဘသဟဂတာနံ ခန္ဓာနံ လောဘဿ စ အနန္တရပစ္စယေန ပစ္စယော။ (၃)

၇၅။ ဥပါဒါနသမ္ပယုတ္တော ¶ ဓမ္မော ဥပါဒါနသမ္ပယုတ္တဿ ဓမ္မဿ သမနန္တရပစ္စယေန ပစ္စယော… သဟဇာတပစ္စယေန ပစ္စယော… (ပဋိစ္စသဒိသံ) နဝ… အညမညပစ္စယေန ပစ္စယော… (ပဋိစ္စသဒိသံ) ဆ… နိဿယပစ္စယေန ပစ္စယော… (ပစ္စယဝါရသဒိသံ) နဝ။

၇၆။ ဥပါဒါနသမ္ပယုတ္တော ဓမ္မော ဥပါဒါနသမ္ပယုတ္တဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော…ပေ…။ ပကတူပနိဿယော – ဥပါဒါနသမ္ပယုတ္တာ ခန္ဓာ ဥပါဒါနသမ္ပယုတ္တကာနံ ခန္ဓာနံ ဥပနိဿယပစ္စယေန ပစ္စယော။ (မူလံ ကာတဗ္ဗံ) ဥပါဒါနသမ္ပယုတ္တာ ခန္ဓာ ဥပါဒါနဝိပ္ပယုတ္တကာနံ ခန္ဓာနံ လောဘဿ စ ဥပနိဿယပစ္စယေန ပစ္စယော။ (မူလံ ကာတဗ္ဗံ) ဥပါဒါနသမ္ပယုတ္တာ ¶ ခန္ဓာ ဒိဋ္ဌိဂတဝိပ္ပယုတ္တလောဘသဟဂတာနံ ခန္ဓာနံ လောဘဿ စ ဥပနိဿယပစ္စယေန ပစ္စယော။ (၃)

၇၇။ ဥပါဒါနဝိပ္ပယုတ္တော ¶ ဓမ္မော ဥပါဒါနဝိပ္ပယုတ္တဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော ပကတူပနိဿယော…ပေ…။ ပကတူပနိဿယော – သဒ္ဓံ ဥပနိဿာယ ဒါနံ ဒေတိ…ပေ… သမာပတ္တိံ ဥပ္ပာဒေတိ၊ မာနံ ဇပ္ပေတိ၊ သီလံ…ပေ… ပညံ… ဥပါဒါနဝိပ္ပယုတ္တံ ရာဂံ… မာနံ… ပတ္ထနံ…ပေ… သေနာသနံ ဥပနိဿာယ ဒါနံ ဒေတိ…ပေ… သင်္ဃံ ဘိန္ဒတိ၊ သဒ္ဓါ…ပေ… သေနာသနံ သဒ္ဓါယ…ပေ… ပညာယ ဥပါဒါနဝိပ္ပယုတ္တဿ ရာဂဿ… မာနဿ… ပတ္ထနာယ… ကာယိကဿ သုခဿ…ပေ… ဖလသမာပတ္တိယာ ဥပနိဿယပစ္စယေန ပစ္စယော။ (၁)

ဥပါဒါနဝိပ္ပယုတ္တော ဓမ္မော ဥပါဒါနသမ္ပယုတ္တဿ ဓမ္မဿ ဥပနိဿယပစ္စယေန ပစ္စယော – (တီဏိ ဥပနိဿယာ) သဒ္ဓံ ဥပနိဿာယ မာနံ ဇပ္ပေတိ၊ ဒိဋ္ဌိံ ဂဏှာတိ၊ သီလံ…ပေ… ပညံ… ဥပါဒါနဝိပ္ပယုတ္တံ ရာဂံ… မာနံ… ပတ္ထနံ… သေနာသနံ ဥပနိဿာယ အဒိန္နံ…ပေ… မုသာ…ပေ… ပိသုဏံ…ပေ… သမ္ဖံ…ပေ… သန္ဓိံ…ပေ… နိလ္လောပံ…ပေ… ဧကာဂါရိကံ…ပေ… ပရိပန္ထေ…ပေ… ပရဒါရံ…ပေ… ဂါမဃာတံ…ပေ… နိဂမဃာတံ ကရောတိ ¶ ။ သဒ္ဓါ…ပေ… သေနာသနံ ဥပါဒါနသမ္ပယုတ္တဿ ရာဂဿ… မောဟဿ… မာနဿ… ဒိဋ္ဌိယာ… ပတ္ထနာယ ဥပနိဿယပစ္စယေန ပစ္စယော။ (၂)

ဥပါဒါနဝိပ္ပယုတ္တော ဓမ္မော ဥပါဒါနသမ္ပယုတ္တဿ စ ဥပါဒါနဝိပ္ပယုတ္တဿ စ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော…ပေ…။ ပကတူပနိဿယော – သဒ္ဓံ ဥပနိဿာယ မာနံ ဇပ္ပေတိ၊ သီလံ…ပေ… ပညံ… ဥပါဒါနဝိပ္ပယုတ္တံ ¶ ရာဂံ…ပေ… သေနာသနံ ဥပနိဿာယ အဒိန္နံ အာဒိယတိ…ပေ… ဂါမဃာတံ ကရောတိ… နိဂမဃာတံ ကရောတိ…။ သဒ္ဓါ…ပေ… သေနာသနံ ဒိဋ္ဌိဂတဝိပ္ပယုတ္တလောဘသဟဂတာနံ ခန္ဓာနံ လောဘဿ စ ဥပနိဿယပစ္စယေန ပစ္စယော။ (၃)

၇၈။ ဥပါဒါနသမ္ပယုတ္တော စ ဥပါဒါနဝိပ္ပယုတ္တော စ ဓမ္မာ ဥပါဒါနသမ္ပယုတ္တဿ ဓမ္မဿ ဥပနိဿယပစ္စယေန ပစ္စယော – ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ဥပါဒါနသမ္ပယုတ္တကာနံ ခန္ဓာနံ ဥပနိဿယပစ္စယေန ပစ္စယော။ (မူလံ ကာတဗ္ဗံ) ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ဥပါဒါနဝိပ္ပယုတ္တကာနံ ခန္ဓာနံ လောဘဿ စ ဥပနိဿယပစ္စယေန ပစ္စယော။ (မူလံ ကာတဗ္ဗံ) ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ဒိဋ္ဌိဂတဝိပ္ပယုတ္တလောဘသဟဂတာနံ ခန္ဓာနံ လောဘဿ စ ဥပနိဿယပစ္စယေန ပစ္စယော။ (၃)

၇၉။ ဥပါဒါနဝိပ္ပယုတ္တော ¶ ဓမ္မော ဥပါဒါနဝိပ္ပယုတ္တဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ။ အာရမ္မဏပုရေဇာတံ – စက္ခုံ…ပေ… ဝတ္ထုံ အနိစ္စတော…ပေ… ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ။ ရူပါယတနံ စက္ခုဝိညာဏဿ…ပေ… ဖောဋ္ဌဗ္ဗာယတနံ…ပေ…။ ဝတ္ထုပုရေဇာတံ – စက္ခာယတနံ စက္ခုဝိညာဏဿ…ပေ… ကာယာယတနံ…ပေ… ဝတ္ထု ဥပါဒါနဝိပ္ပယုတ္တကာနံ ခန္ဓာနံ လောဘဿ စ ပုရေဇာတပစ္စယေန ပစ္စယော။ (၁)

ဥပါဒါနဝိပ္ပယုတ္တော ဓမ္မော ဥပါဒါနသမ္ပယုတ္တဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ။ အာရမ္မဏပုရေဇာတံ ¶ – စက္ခုံ…ပေ… ဝတ္ထုံ အဿာဒေတိ အဘိနန္ဒတိ ¶ ၊ တံ အာရဗ္ဘ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ။ ဝတ္ထုပုရေဇာတံ – ဝတ္ထု ဥပါဒါနသမ္ပယုတ္တကာနံ ခန္ဓာနံ ပုရေဇာတပစ္စယေန ပစ္စယော။ (၂)

ဥပါဒါနဝိပ္ပယုတ္တော ဓမ္မော ဥပါဒါနသမ္ပယုတ္တဿ စ ဥပါဒါနဝိပ္ပယုတ္တဿ စ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ။ အာရမ္မဏပုရေဇာတံ – စက္ခုံ…ပေ… ဝတ္ထုံ အာရဗ္ဘ ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ဥပ္ပဇ္ဇန္တိ။ ဝတ္ထုပုရေဇာတံ – ဝတ္ထု ဒိဋ္ဌိဂတဝိပ္ပယုတ္တလောဘသဟဂတာနံ ခန္ဓာနံ လောဘဿ စ ပုရေဇာတပစ္စယေန ပစ္စယော။ (၃)

၈၀။ ဥပါဒါနသမ္ပယုတ္တော ဓမ္မော ဥပါဒါနဝိပ္ပယုတ္တဿ ဓမ္မဿ ပစ္ဆာဇာတပစ္စယေန ပစ္စယော (သံခိတ္တံ)။ (၁)

ဥပါဒါနဝိပ္ပယုတ္တော ဓမ္မော ဥပါဒါနဝိပ္ပယုတ္တဿ ဓမ္မဿ ပစ္ဆာဇာတပစ္စယေန ပစ္စယော (သံခိတ္တံ)။ (၁)

ဥပါဒါနသမ္ပယုတ္တော စ ဥပါဒါနဝိပ္ပယုတ္တော စ ဓမ္မာ ဥပါဒါနဝိပ္ပယုတ္တဿ ဓမ္မဿ ပစ္ဆာဇာတပစ္စယေန ပစ္စယော။ (သံခိတ္တံ။) (၁) …အာသေဝနပစ္စယေန ပစ္စယော။

၈၁။ ဥပါဒါနသမ္ပယုတ္တော ¶ ဓမ္မော ဥပါဒါနသမ္ပယုတ္တဿ ဓမ္မဿ ကမ္မပစ္စယေန ပစ္စယော – ဥပါဒါနသမ္ပယုတ္တာ စေတနာ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော။ (၁)

ဥပါဒါနသမ္ပယုတ္တော ဓမ္မော ဥပါဒါနဝိပ္ပယုတ္တဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ။ သဟဇာတာ – ဥပါဒါနသမ္ပယုတ္တာ စေတနာ စိတ္တသမုဋ္ဌာနာနံ ¶ ရူပါနံ ကမ္မပစ္စယေန ပစ္စယော၊ ဒိဋ္ဌိဂတဝိပ္ပယုတ္တလောဘသဟဂတာ စေတနာ လောဘဿ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော။ နာနာက္ခဏိကာ – ဥပါဒါနသမ္ပယုတ္တာ စေတနာ ဝိပါကာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော။ (၂)

ဥပါဒါနသမ္ပယုတ္တော ¶ ဓမ္မော ဥပါဒါနသမ္ပယုတ္တဿ စ ဥပါဒါနဝိပ္ပယုတ္တဿ စ ဓမ္မဿ ကမ္မပစ္စယေန ပစ္စယော – ဥပါဒါနသမ္ပယုတ္တာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော၊ ဒိဋ္ဌိဂတဝိပ္ပယုတ္တလောဘသဟဂတာ စေတနာ သမ္ပယုတ္တကာနံ ခန္ဓာနံ လောဘဿ စ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော။ (၃)

၈၂။ ဥပါဒါနဝိပ္ပယုတ္တော ဓမ္မော ဥပါဒါနဝိပ္ပယုတ္တဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ။ သဟဇာတာ – ဥပါဒါနဝိပ္ပယုတ္တာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော၊ ပဋိသန္ဓိက္ခဏေ…ပေ…။ နာနာက္ခဏိကာ – ဥပါဒါနဝိပ္ပယုတ္တာ စေတနာ ဝိပါကာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော။ (၁)

ဥပါဒါနဝိပ္ပယုတ္တော ဓမ္မော ဥပါဒါနဝိပ္ပယုတ္တဿ ဓမ္မဿ ဝိပါကပစ္စယေန ပစ္စယော – ဝိပါကော ဥပါဒါနဝိပ္ပယုတ္တော ဧကော…ပေ… ဧကံ။

၈၃။ ဥပါဒါနသမ္ပယုတ္တော ဓမ္မော ဥပါဒါနသမ္ပယုတ္တဿ ဓမ္မဿ အာဟာရပစ္စယေန ပစ္စယော… ဣန္ဒြိယပစ္စယေန ပစ္စယော… ဈာနပစ္စယေန ¶ ပစ္စယော… မဂ္ဂပစ္စယေန ပစ္စယော (ဣမေသု စတူသုပိ ယထာ ကမ္မပစ္စယေ ဒိဋ္ဌိဂတဝိပ္ပယုတ္တော လောဘော ဒဿိတော ဧဝံ ဒဿေတဗ္ဗော။ စတ္တာရိ စတ္တာရိ ပဉှာ)… သမ္ပယုတ္တပစ္စယေန ပစ္စယော… ဆ။

၈၄။ ဥပါဒါနသမ္ပယုတ္တော ¶ ဓမ္မော ဥပါဒါနဝိပ္ပယုတ္တဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ (သံခိတ္တံ)။ (၁)

ဥပါဒါနဝိပ္ပယုတ္တော ဓမ္မော ဥပါဒါနဝိပ္ပယုတ္တဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ (သံခိတ္တံ)။ (၁)

ဥပါဒါနဝိပ္ပယုတ္တော ¶ ဓမ္မော ဥပါဒါနသမ္ပယုတ္တဿ ဓမ္မဿ ဝိပ္ပယုတ္တပစ္စယေန ပစ္စယော။ ပုရေဇာတံ – ဝတ္ထု ဥပါဒါနသမ္ပယုတ္တကာနံ ခန္ဓာနံ ဝိပ္ပယုတ္တပစ္စယေန ပစ္စယော။ (၂)

ဥပါဒါနဝိပ္ပယုတ္တော ဓမ္မော ဥပါဒါနသမ္ပယုတ္တဿ စ ဥပါဒါနဝိပ္ပယုတ္တဿ စ ဓမ္မဿ ဝိပ္ပယုတ္တပစ္စယေန ပစ္စယော။ ပုရေဇာတံ – ဝတ္ထု ဒိဋ္ဌိဂတဝိပ္ပယုတ္တလောဘသဟဂတာနံ ခန္ဓာနံ လောဘဿ စ ဝိပ္ပယုတ္တပစ္စယေန ပစ္စယော။ (၃)

ဥပါဒါနသမ္ပယုတ္တော စ ဥပါဒါနဝိပ္ပယုတ္တော စ ဓမ္မာ ဥပါဒါနဝိပ္ပယုတ္တဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ။ သဟဇာတာ – ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော။ ပစ္ဆာဇာတာ…ပေ…။

၈၅။ ဥပါဒါနသမ္ပယုတ္တော ဓမ္မော ဥပါဒါနသမ္ပယုတ္တဿ ဓမ္မဿ အတ္ထိပစ္စယေန ပစ္စယော… ဧကံ (ပဋိစ္စသဒိသံ)။ (၁)

ဥပါဒါနသမ္ပယုတ္တော ဓမ္မော ဥပါဒါနဝိပ္ပယုတ္တဿ ဓမ္မဿ အတ္ထိပစ္စယေန ပစ္စယော – သဟဇာတံ ¶ ၊ ပစ္ဆာဇာတံ (သံခိတ္တံ)။ (၂)

ဥပါဒါနသမ္ပယုတ္တော ဓမ္မော ဥပါဒါနသမ္ပယုတ္တဿ စ ဥပါဒါနဝိပ္ပယုတ္တဿ စ ဓမ္မဿ အတ္ထိပစ္စယေန ပစ္စယော (ပဋိစ္စသဒိသံ)။ (၃)

၈၆။ ဥပါဒါနဝိပ္ပယုတ္တော ဓမ္မော ဥပါဒါနဝိပ္ပယုတ္တဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ (သံခိတ္တံ)။ (၁)

ဥပါဒါနဝိပ္ပယုတ္တော ဓမ္မော ဥပါဒါနသမ္ပယုတ္တဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ (သံခိတ္တံ)။ (၂)

ဥပါဒါနဝိပ္ပယုတ္တော ¶ ¶ ဓမ္မော ဥပါဒါနသမ္ပယုတ္တဿ စ ဥပါဒါနဝိပ္ပယုတ္တဿ စ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ (ဣမေသု သဟဇာတံ သဟဇာတသဒိသံ၊ ပုရေဇာတံ ပုရေဇာတသဒိသံ)။ (၃)

၈၇။ ဥပါဒါနသမ္ပယုတ္တော စ ဥပါဒါနဝိပ္ပယုတ္တော စ ဓမ္မာ ဥပါဒါနသမ္ပယုတ္တဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ။ သဟဇာတော – ဥပါဒါနသမ္ပယုတ္တော ဧကော ခန္ဓော စ ဝတ္ထု စ တိဏ္ဏန္နံ ခန္ဓာနံ အတ္ထိပစ္စယေန ပစ္စယော…ပေ… ဒွေ ခန္ဓာ စ…ပေ…။ သဟဇာတော – ဒိဋ္ဌိဂတဝိပ္ပယုတ္တလောဘသဟဂတော ဧကော ခန္ဓော စ လောဘော စ တိဏ္ဏန္နံ ခန္ဓာနံ အတ္ထိပစ္စယေန ပစ္စယော…ပေ… ဒွေ ခန္ဓာ စ…ပေ…။ (၁)

ဥပါဒါနသမ္ပယုတ္တော စ ဥပါဒါနဝိပ္ပယုတ္တော စ ဓမ္မာ ဥပါဒါနဝိပ္ပယုတ္တဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ။ သဟဇာတာ – ဥပါဒါနသမ္ပယုတ္တာ ခန္ဓာ စ မဟာဘူတာ စ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော။ သဟဇာတာ – ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော။ သဟဇာတာ – ဒိဋ္ဌိဂတဝိပ္ပယုတ္တလောဘသဟဂတာ ¶ ခန္ဓာ စ ဝတ္ထု စ လောဘဿ အတ္ထိပစ္စယေန ပစ္စယော။ ပစ္ဆာဇာတာ – ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ပုရေဇာတဿ ဣမဿ ကာယဿ အတ္ထိပစ္စယေန ပစ္စယော။ ပစ္ဆာဇာတာ – ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ကဗဠီကာရော အာဟာရော စ ဣမဿ ကာယဿ အတ္ထိပစ္စယေန ပစ္စယော။ ပစ္ဆာဇာတာ – ဒိဋ္ဌိဂတဝိပ္ပယုတ္တလောဘသဟဂတာ ခန္ဓာ စ လောဘော စ ရူပဇီဝိတိန္ဒြိယဉ္စ ကဋတ္တာရူပါနံ အတ္ထိပစ္စယေန ပစ္စယော။ (၂)

ဥပါဒါနသမ္ပယုတ္တော စ ဥပါဒါနဝိပ္ပယုတ္တော စ ဓမ္မာ ဥပါဒါနသမ္ပယုတ္တဿ စ ဥပါဒါနဝိပ္ပယုတ္တဿ စ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ။ သဟဇာတော – ဒိဋ္ဌိဂတဝိပ္ပယုတ္တလောဘသဟဂတော ဧကော ခန္ဓော စ လောဘော စ တိဏ္ဏန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော…ပေ… ဒွေ ခန္ဓာ စ…ပေ…။ သဟဇာတော – ဒိဋ္ဌိဂတဝိပ္ပယုတ္တလောဘသဟဂတော ဧကော ခန္ဓော စ ဝတ္ထု စ တိဏ္ဏန္နံ ခန္ဓာနံ လောဘဿ စ အတ္ထိပစ္စယေန ပစ္စယော…ပေ… ဒွေ ခန္ဓာ စ…ပေ…။ (၃)

နတ္ထိပစ္စယေန ¶ ¶ ပစ္စယော… ဝိဂတပစ္စယေန ပစ္စယော… အဝိဂတပစ္စယေန ပစ္စယော။

၈၈။ ဟေတုယာ နဝ၊ အာရမ္မဏေ နဝ၊ အဓိပတိယာ နဝ၊ အနန္တရေ နဝ၊ သမနန္တရေ နဝ၊ သဟဇာတေ နဝ၊ အညမညေ ဆ၊ နိဿယေ နဝ၊ ဥပနိဿယေ နဝ၊ ပုရေဇာတေ တီဏိ၊ ပစ္ဆာဇာတေ တီဏိ၊ အာသေဝနေ နဝ ¶ ၊ ကမ္မေ စတ္တာရိ၊ ဝိပါကေ ဧကံ၊ အာဟာရေ စတ္တာရိ၊ ဣန္ဒြိယေ စတ္တာရိ၊ ဈာနေ စတ္တာရိ၊ မဂ္ဂေ စတ္တာရိ၊ သမ္ပယုတ္တေ ဆ၊ ဝိပ္ပယုတ္တေ ပဉ္စ၊ အတ္ထိယာ နဝ၊ နတ္ထိယာ နဝ၊ ဝိဂတေ နဝ၊ အဝိဂတေ နဝ။

၈၉။ ဥပါဒါနသမ္ပယုတ္တော ဓမ္မော ဥပါဒါနသမ္ပယုတ္တဿ ဓမ္မဿ အာရမ္မဏပစ္စယေန ပစ္စယော… သဟဇာတပစ္စယေန ပစ္စယော… ဥပနိဿယပစ္စယေန ပစ္စယော။ (၁)

ဥပါဒါနသမ္ပယုတ္တော ဓမ္မော ဥပါဒါနဝိပ္ပယုတ္တဿ ဓမ္မဿ အာရမ္မဏပစ္စယေန ပစ္စယော… သဟဇာတပစ္စယေန ပစ္စယော… ဥပနိဿယပစ္စယေန ပစ္စယော… ပစ္ဆာဇာတပစ္စယေန ပစ္စယော… ကမ္မပစ္စယေန ပစ္စယော။ (၂)

ဥပါဒါနသမ္ပယုတ္တော ဓမ္မော ဥပါဒါနသမ္ပယုတ္တဿ စ ဥပါဒါနဝိပ္ပယုတ္တဿ စ ဓမ္မဿ အာရမ္မဏပစ္စယေန ပစ္စယော… သဟဇာတပစ္စယေန ပစ္စယော… ဥပနိဿယပစ္စယေန ပစ္စယော။ (၃)

၉၀။ ဥပါဒါနဝိပ္ပယုတ္တော ဓမ္မော ဥပါဒါနဝိပ္ပယုတ္တဿ ဓမ္မဿ အာရမ္မဏပစ္စယေန ပစ္စယော… သဟဇာတပစ္စယေန ပစ္စယော… ဥပနိဿယပစ္စယေန ပစ္စယော… ပုရေဇာတပစ္စယေန ပစ္စယော ¶ … ပစ္ဆာဇာတပစ္စယေန ပစ္စယော… ကမ္မပစ္စယေန ပစ္စယော… အာဟာရပစ္စယေန ပစ္စယော… ဣန္ဒြိယပစ္စယေန ပစ္စယော။ (၁)

ဥပါဒါနဝိပ္ပယုတ္တော ¶ ဓမ္မော ဥပါဒါနသမ္ပယုတ္တဿ ဓမ္မဿ အာရမ္မဏပစ္စယေန ပစ္စယော… သဟဇာတပစ္စယေန ပစ္စယော… ဥပနိဿယပစ္စယေန ပစ္စယော… ပုရေဇာတပစ္စယေန ပစ္စယော။ (၂)

ဥပါဒါနဝိပ္ပယုတ္တော ဓမ္မော ဥပါဒါနသမ္ပယုတ္တဿ စ ဥပါဒါနဝိပ္ပယုတ္တဿ ¶ စ ဓမ္မဿ အာရမ္မဏပစ္စယေန ပစ္စယော… သဟဇာတပစ္စယေန ပစ္စယော… ဥပနိဿယပစ္စယေန ပစ္စယော… ပုရေဇာတပစ္စယေန ပစ္စယော။ (၃)

၉၁။ ဥပါဒါနသမ္ပယုတ္တော စ ဥပါဒါနဝိပ္ပယုတ္တော စ ဓမ္မာ ဥပါဒါနသမ္ပယုတ္တဿ ဓမ္မဿ အာရမ္မဏပစ္စယေန ပစ္စယော… သဟဇာတပစ္စယေန ပစ္စယော… ဥပနိဿယပစ္စယေန ပစ္စယော။ (၁)

ဥပါဒါနသမ္ပယုတ္တော စ ဥပါဒါနဝိပ္ပယုတ္တော စ ဓမ္မာ ဥပါဒါနဝိပ္ပယုတ္တဿ ဓမ္မဿ အာရမ္မဏပစ္စယေန ပစ္စယော… သဟဇာတပစ္စယေန ပစ္စယော… ဥပနိဿယပစ္စယေန ပစ္စယော… ပစ္ဆာဇာတပစ္စယေန ပစ္စယော။ (၂)

ဥပါဒါနသမ္ပယုတ္တော စ ဥပါဒါနဝိပ္ပယုတ္တော စ ဓမ္မာ ဥပါဒါနသမ္ပယုတ္တဿ စ ဥပါဒါနဝိပ္ပယုတ္တဿ စ ဓမ္မဿ အာရမ္မဏပစ္စယေန ပစ္စယော… သဟဇာတပစ္စယေန ပစ္စယော… ဥပနိဿယပစ္စယေန ပစ္စယော။ (၃)

၉၂။ နဟေတုယာ နဝ၊ နအာရမ္မဏေ နဝ၊ နအဓိပတိယာ နဝ (သဗ္ဗတ္ထ နဝ)၊ နောအဝိဂတေ နဝ။

၉၃။ ဟေတုပစ္စယာ ¶ နအာရမ္မဏေ နဝ၊ နအဓိပတိယာ နဝ၊ နအနန္တရေ နဝ၊ နသမနန္တရေ နဝ၊ နအညမညေ တီဏိ၊ နဥပနိဿယေ နဝ (သဗ္ဗတ္ထ နဝ)၊ နသမ္ပယုတ္တေ တီဏိ၊ နဝိပ္ပယုတ္တေ ဆ၊ နောနတ္ထိယာ နဝ၊ နောဝိဂတေ နဝ။

၉၄။ နဟေတုပစ္စယာ အာရမ္မဏေ နဝ၊ အဓိပတိယာ နဝ (အနုလောမမာတိကာ)…ပေ… အဝိဂတေ နဝ။

ဥပါဒါနသမ္ပယုတ္တဒုကံ နိဋ္ဌိတံ။

၉၅။ ဥပါဒါနဉ္စေဝ ¶ ¶ ¶ ဥပါဒါနိယဉ္စ ဓမ္မံ ပဋိစ္စ ဥပါဒါနော စေဝ ဥပါဒါနိယော စ ဓမ္မော ဥပ္ပဇ္ဇတိ ဟေတုပစ္စယာ – ဒိဋ္ဌုပါဒါနံ ပဋိစ္စ ကာမုပါဒါနံ၊ ကာမုပါဒါနံ ပဋိစ္စ ဒိဋ္ဌုပါဒါနံ (စက္ကံ)။ (၁)

ဥပါဒါနဉ္စေဝ ဥပါဒါနိယဉ္စ ဓမ္မံ ပဋိစ္စ ဥပါဒါနိယော စေဝ နော စ ဥပါဒါနော ဓမ္မော ဥပ္ပဇ္ဇတိ ဟေတုပစ္စယာ – ဥပါဒါနေ ပဋိစ္စ သမ္ပယုတ္တကာ ခန္ဓာ စိတ္တသမုဋ္ဌာနဉ္စ ရူပံ။ (၁)

ဥပါဒါနဉ္စေဝ ဥပါဒါနိယဉ္စ ဓမ္မံ ပဋိစ္စ ဥပါဒါနော စေဝ ဥပါဒါနိယော စ ဥပါဒါနိယော စေဝ နော စ ဥပါဒါနော စ ဓမ္မာ ဥပ္ပဇ္ဇန္တိ ဟေတုပစ္စယာ – ဒိဋ္ဌုပါဒါနံ ပဋိစ္စ ကာမုပါဒါနံ သမ္ပယုတ္တကာ စ ခန္ဓာ စိတ္တသမုဋ္ဌာနာနဉ္စ ရူပံ (စက္ကံ)။ (၃)

၉၆။ ဥပါဒါနိယဉ္စေဝ နော စ ဥပါဒါနံ ဓမ္မံ ပဋိစ္စ ဥပါဒါနိယော စေဝ နော စ ဥပါဒါနော ဓမ္မော ဥပ္ပဇ္ဇတိ ဟေတုပစ္စယာ – ဥပါဒါနိယဉ္စေဝ နော စ ဥပါဒါနံ ဧကံ ခန္ဓံ ပဋိစ္စ ¶ တယော ခန္ဓာ စိတ္တသမုဋ္ဌာနဉ္စ ရူပံ…ပေ… ဒွေ ခန္ဓေ…ပေ… ပဋိသန္ဓိက္ခဏေ…ပေ… (ယာဝ အဇ္ဈတ္တိကာ မဟာဘူတာ)။ (၁)

ဥပါဒါနိယဉ္စေဝ နော စ ဥပါဒါနံ ဓမ္မံ ပဋိစ္စ ဥပါဒါနော စေဝ ဥပါဒါနိယော စ ဓမ္မော ဥပ္ပဇ္ဇတိ ဟေတုပစ္စယာ – ဥပါဒါနိယေ စေဝ နော စ ဥပါဒါနေ ခန္ဓေ ပဋိစ္စ ဥပါဒါနာ။ (၂)

ဥပါဒါနိယဉ္စေဝ နော စ ဥပါဒါနံ ဓမ္မံ ပဋိစ္စ ဥပါဒါနော စေဝ ဥပါဒါနိယော စ ဥပါဒါနိယော စေဝ နော စ ဥပါဒါနော စ ဓမ္မာ ¶ ဥပ္ပဇ္ဇန္တိ ဟေတုပစ္စယာ – ဥပါဒါနိယဉ္စေဝ နော စ ဥပါဒါနံ ဧကံ ခန္ဓံ ပဋိစ္စ တယော ခန္ဓာ ဥပါဒါနာ စ စိတ္တသမုဋ္ဌာနဉ္စ ရူပံ…ပေ… ဒွေ ခန္ဓေ…ပေ…။ (၃)

၉၇။ ဥပါဒါနဉ္စေဝ ဥပါဒါနိယဉ္စ ဥပါဒါနိယဉ္စေဝ နော စ ဥပါဒါနဉ္စ ဓမ္မံ ပဋိစ္စ ဥပါဒါနော စေဝ ဥပါဒါနိယော စ ဓမ္မော ဥပ္ပဇ္ဇတိ ဟေတုပစ္စယာ – ဒိဋ္ဌုပါဒါနဉ္စ သမ္ပယုတ္တကေ စ ခန္ဓေ ပဋိစ္စ ကာမုပါဒါနံ (စက္ကံ)။ (၁)

ဥပါဒါနဉ္စေဝ ¶ ဥပါဒါနိယဉ္စ ဥပါဒါနိယဉ္စေဝ နော စ ဥပါဒါနဉ္စ ဓမ္မံ ပဋိစ္စ ဥပါဒါနိယော စေဝ နော စ ဥပါဒါနော ဓမ္မော ဥပ္ပဇ္ဇတိ ဟေတုပစ္စယာ – ဥပါဒါနိယဉ္စေဝ နော စ ဥပါဒါနံ ဧကံ ခန္ဓဉ္စ ဥပါဒါနေ စ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ…ပေ… ဒွေ ခန္ဓေ စ…ပေ… ဥပါဒါနေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ။ (၂)

ဥပါဒါနဉ္စေဝ ဥပါဒါနိယဉ္စ ဥပါဒါနိယဉ္စေဝ နော စ ဥပါဒါနဉ္စ ဓမ္မံ ပဋိစ္စ ဥပါဒါနော စေဝ ဥပါဒါနိယော စ ဥပါဒါနိယော စေဝ နော စ ဥပါဒါနော စ ဓမ္မာ ဥပ္ပဇ္ဇန္တိ ဟေတုပစ္စယာ – ဥပါဒါနိယဉ္စေဝ နော စ ဥပါဒါနံ ဧကံ ခန္ဓဉ္စ ဒိဋ္ဌုပါဒါနဉ္စ ပဋိစ္စ တယော ခန္ဓာ ကာမုပါဒါနဉ္စ စိတ္တသမုဋ္ဌာနဉ္စ ရူပံ…ပေ… ဒွေ ခန္ဓေ စ…ပေ… (စက္ကံ)။ (၃)

၂-၆။ သဟဇာတ-ပစ္စယ-နိဿယ-သံသဋ္ဌ-သမ္ပယုတ္တဝါရော

(ယထာ ဥပါဒါနဒုကံ ဧဝံ ပဋိစ္စဝါရောပိ သဟဇာတဝါရောပိ ပစ္စယဝါရောပိ နိဿယဝါရောပိ သံသဋ္ဌဝါရောပိ သမ္ပယုတ္တဝါရောပိ ကာတဗ္ဗာ၊ နိန္နာနာကရဏာ၊ အာမသနံ နာနာကရဏံ။)

၉၈။ ဥပါဒါနော ¶ ¶ စေဝ ဥပါဒါနိယော စ ဓမ္မော ဥပါဒါနဿ စေဝ ဥပါဒါနိယဿ စ ဓမ္မဿ ဟေတုပစ္စယေန ပစ္စယော – ဥပါဒါနာ စေဝ ဥပါဒါနိယာ စ ဟေတူ သမ္ပယုတ္တကာနံ ဥပါဒါနာနံ ဟေတုပစ္စယေန ပစ္စယော။ (၁)

ဥပါဒါနော စေဝ ဥပါဒါနိယော စ ဓမ္မော ဥပါဒါနိယဿ စေဝ နော စ ဥပါဒါနဿ ဓမ္မဿ ဟေတုပစ္စယေန ပစ္စယော – ဥပါဒါနာ စေဝ ဥပါဒါနိယာ စ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော (ဥပါဒါနဒုကသဒိသာ နိန္နာနာ၊ နဝ ပဉှာ)။

၉၉။ ဥပါဒါနော ¶ စေဝ ဥပါဒါနိယော စ ဓမ္မော ဥပါဒါနဿ စေဝ ဥပါဒါနိယဿ စ ဓမ္မဿ အာရမ္မဏပစ္စယေန ပစ္စယော – ဥပါဒါနေ အာရဗ္ဘ ဥပါဒါနာ ဥပ္ပဇ္ဇန္တိ… တီဏိ။

ဥပါဒါနိယော စေဝ နော စ ဥပါဒါနော ဓမ္မော ဥပါဒါနိယဿ စေဝ နော စ ဥပါဒါနဿ ဓမ္မဿ အာရမ္မဏပစ္စယေန ပစ္စယော – ဒါနံ…ပေ… ဈာနာ ဝုဋ္ဌဟိတွာ ဈာနံ ပစ္စဝေက္ခတိ၊ အဿာဒေတိ အဘိနန္ဒတိ၊ တံ အာရဗ္ဘ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ဝိစိကိစ္ဆာ ဥဒ္ဓစ္စံ ဒေါမနဿံ ဥပ္ပဇ္ဇတိ၊ အရိယာ ဂေါတြဘုံ ပစ္စဝေက္ခန္တိ၊ ဝေါဒါနံ ပစ္စဝေက္ခန္တိ၊ ပဟီနေ ကိလေသေ…ပေ… ဝိက္ခမ္ဘိတေ ကိလေသေ…ပေ… ပုဗ္ဗေ သမုဒါစိဏ္ဏေ…ပေ… စက္ခုံ…ပေ… ဝတ္ထုံ…ပေ… (သံခိတ္တံ) အနာဂတံသဉာဏဿ အာဝဇ္ဇနာယ အာရမ္မဏပစ္စယေန ပစ္စယော။ (၁)

ဥပါဒါနိယော ¶ စေဝ နော စ ဥပါဒါနော ဓမ္မော ဥပါဒါနဿ စေဝ ဥပါဒါနိယဿ စ ဓမ္မဿ အာရမ္မဏပစ္စယေန ပစ္စယော (သံခိတ္တံ၊ ဣတရေ ဒွေ ဥပါဒါနဒုကသဒိသာ)။ (၃)

ဥပါဒါနော ¶ စေဝ ဥပါဒါနိယော စ ဥပါဒါနိယော စေဝ နော စ ဥပါဒါနော စ ဓမ္မာ ဥပါဒါနဿ စေဝ ဥပါဒါနိယဿ စ ဓမ္မဿ အာရမ္မဏပစ္စယေန ပစ္စယော… တီဏိ (ဟေဋ္ဌာ အဓိပတိ တီဏိ၊ ဥပါဒါနဒုကသဒိသာ)။

၁၀၀။ ဥပါဒါနိယော စေဝ နော စ ဥပါဒါနော ဓမ္မော ဥပါဒါနိယဿ စေဝ နော စ ဥပါဒါနဿ စ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ။ အာရမ္မဏာဓိပတိ – ဒါနံ…ပေ… ဈာနာ ဝုဋ္ဌဟိတွာ ဈာနံ ဂရုံ ကတွာ ပစ္စဝေက္ခတိ၊ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ သေက္ခာ ဂေါတြဘုံ ဂရုံ ကတွာ…ပေ… ဝေါဒါနံ…ပေ… စက္ခုံ…ပေ… ဝတ္ထုံ ဥပါဒါနိယေ စေဝ နော စ ဥပါဒါနေ ခန္ဓေ ဂရုံ ကတွာ ဥပါဒါနိယာ စေဝ နော စ ဥပါဒါနာ ခန္ဓာ ဥပ္ပဇ္ဇန္တိ။ သဟဇာတာဓိပတိ – ဥပါဒါနိယာ စေဝ နော စ ဥပါဒါနာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော (အဝသေသာ ဒွေပိ အာရမ္မဏာဓိပတိ သဟဇာတာဓိပတိပိ ဥပါဒါနဒုကသဒိသာ)။ (၃)

(ဃဋနာ ¶ အဓိပတိ တီဏိ၊ ဥပါဒါနဒုကသဒိသာ။ သဗ္ဗေ ပစ္စယာ ဥပါဒါနဒုကသဒိသာ။ ဥပါဒါနိယေ လောကုတ္တရံ နတ္ထိ၊ ပစ္စနီယမ္ပိ ဣတရေ ဒွေ ဂဏနာပိ ဥပါဒါနဒုကသဒိသံ။)

ဥပါဒါနဥပါဒါနိယဒုကံ နိဋ္ဌိတံ။

၇၃။ ဥပါဒါနဥပါဒါနသမ္ပယုတ္တဒုကံ

၁၀၁။ ဥပါဒါနဉ္စေဝ ¶ ¶ ဥပါဒါနသမ္ပယုတ္တဉ္စ ဓမ္မံ ပဋိစ္စ ဥပါဒါနော စေဝ ဥပါဒါနသမ္ပယုတ္တော စ ဓမ္မော ဥပ္ပဇ္ဇတိ ဟေတုပစ္စယာ – ဒိဋ္ဌုပါဒါနံ ပဋိစ္စ ကာမုပါဒါနံ (စက္ကံ ကာတဗ္ဗံ)။ (၁)

ဥပါဒါနဉ္စေဝ ဥပါဒါနသမ္ပယုတ္တဉ္စ ဓမ္မံ ပဋိစ္စ ဥပါဒါနသမ္ပယုတ္တော စေဝ နော စ ဥပါဒါနော ဓမ္မော ဥပ္ပဇ္ဇတိ ဟေတုပစ္စယာ – ဥပါဒါနေ ပဋိစ္စ သမ္ပယုတ္တကာ ခန္ဓာ။ (၂)

ဥပါဒါနဉ္စေဝ ဥပါဒါနသမ္ပယုတ္တဉ္စ ဓမ္မံ ပဋိစ္စ ဥပါဒါနော စေဝ ဥပါဒါနသမ္ပယုတ္တော စ ဥပါဒါနသမ္ပယုတ္တော စေဝ နော စ ဥပါဒါနော စ ဓမ္မာ ဥပ္ပဇ္ဇန္တိ ဟေတုပစ္စယာ – ဒိဋ္ဌုပါဒါနံ ပဋိစ္စ ကာမုပါဒါနံ သမ္ပယုတ္တကာ စ ခန္ဓာ (စက္ကံ)။ (၃)

၂-၆။ သဟဇာတ-ပစ္စယ-နိဿယ-သံသဋ္ဌ-သမ္ပယုတ္တဝါရော

ဥပါဒါနသမ္ပယုတ္တဉ္စေဝ နော စ ဥပါဒါနံ ဓမ္မံ ပဋိစ္စ…ပေ…။ (သံခိတ္တံ။ အာမသနံ နာနာကရဏံ ဥပါဒါနဒုကသဒိသံ နဝ ပဉှာ။ ရူပံ နတ္ထိ။ ဧဝံ သဗ္ဗေပိ ဝါရာ ဝိတ္ထာရေတဗ္ဗာ။ အရူပံယေဝ။)

၁၀၂။ ဥပါဒါနော ¶ စေဝ ဥပါဒါနသမ္ပယုတ္တော စ ဓမ္မော ဥပါဒါနဿ စေဝ ဥပါဒါနသမ္ပယုတ္တဿ စ ဓမ္မဿ ဟေတုပစ္စယေန ပစ္စယော – ဥပါဒါနာ စေဝ ဥပါဒါနသမ္ပယုတ္တာ ¶ စ ဟေတူ သမ္ပယုတ္တကာနံ ဥပါဒါနာနံ ဟေတုပစ္စယေန ပစ္စယော။ (မူလံ ပုစ္ဆိတဗ္ဗံ) ဥပါဒါနာ စေဝ ဥပါဒါနသမ္ပယုတ္တာ ¶ စ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော။ (မူလံ ပုစ္ဆိတဗ္ဗံ) ဥပါဒါနာ စေဝ ဥပါဒါနသမ္ပယုတ္တာ စ ဟေတူ သမ္ပယုတ္တကာနံ ခန္ဓာနံ ဥပါဒါနာနဉ္စ ဟေတုပစ္စယေန ပစ္စယော။ (၃)

၁၀၃။ ဥပါဒါနသမ္ပယုတ္တော စေဝ နော စ ဥပါဒါနော ဓမ္မော ဥပါဒါနသမ္ပယုတ္တဿ စေဝ နော စ ဥပါဒါနဿ ဓမ္မဿ ဟေတုပစ္စယေန ပစ္စယော – ဥပါဒါနသမ္ပယုတ္တာ စေဝ နော စ ဥပါဒါနာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော။ (မူလံ ပုစ္ဆိတဗ္ဗံ) ဥပါဒါနသမ္ပယုတ္တာ စေဝ နော စ ဥပါဒါနာ ဟေတူ သမ္ပယုတ္တကာနံ ဥပါဒါနာနံ ဟေတုပစ္စယေန ပစ္စယော။ (မူလံ ပုစ္ဆိတဗ္ဗံ) ဥပါဒါနသမ္ပယုတ္တာ စေဝ နော စ ဥပါဒါနာ ဟေတူ သမ္ပယုတ္တကာနံ ခန္ဓာနံ ဥပါဒါနာနဉ္စ ဟေတုပစ္စယေန ပစ္စယော။ (၃)

၁၀၄။ ဥပါဒါနော စေဝ ဥပါဒါနသမ္ပယုတ္တော စ ဥပါဒါနသမ္ပယုတ္တော စေဝ နော စ ဥပါဒါနော စ ဓမ္မာ ဥပါဒါနဿ စေဝ ဥပါဒါနသမ္ပယုတ္တဿ စ ဓမ္မဿ ဟေတုပစ္စယေန ပစ္စယော – ဥပါဒါနာ စေဝ ဥပါဒါနသမ္ပယုတ္တာ စ ဥပါဒါနသမ္ပယုတ္တာ စေဝ နော စ ဥပါဒါနာ စ ဟေတူ သမ္ပယုတ္တကာနံ ဥပါဒါနာနံ ဟေတုပစ္စယေန ပစ္စယော။ (မူလံ ပုစ္ဆိတဗ္ဗံ) ဥပါဒါနာ စေဝ ဥပါဒါနသမ္ပယုတ္တာ စ ဥပါဒါနသမ္ပယုတ္တာ စေဝ နော စ ဥပါဒါနာ စ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော။ (မူလံ ပုစ္ဆိတဗ္ဗံ) ဥပါဒါနာ စေဝ ဥပါဒါနသမ္ပယုတ္တာ စ ဥပါဒါနသမ္ပယုတ္တာ စေဝ နော စ ဥပါဒါနာ စ ဟေတူ သမ္ပယုတ္တကာနံ ခန္ဓာနံ ဥပါဒါနာနဉ္စ ဟေတုပစ္စယေန ပစ္စယော။ (၃)

၁၀၅။ ဥပါဒါနော ¶ စေဝ ဥပါဒါနသမ္ပယုတ္တော စ ဓမ္မော ဥပါဒါနဿ စေဝ ¶ ဥပါဒါနသမ္ပယုတ္တဿ စ ဓမ္မဿ အာရမ္မဏပစ္စယေန ပစ္စယော – ဥပါဒါနေ အာရဗ္ဘ ဥပါဒါနာ ဥပ္ပဇ္ဇန္တိ။ (မူလံ ပုစ္ဆိတဗ္ဗံ) ဥပါဒါနေ အာရဗ္ဘ ဥပါဒါနသမ္ပယုတ္တာ စေဝ နော စ ဥပါဒါနာ ခန္ဓာ ဥပ္ပဇ္ဇန္တိ။ (မူလံ ပုစ္ဆိတဗ္ဗံ) ဥပါဒါနေ အာရဗ္ဘ ဥပါဒါနာ စ သမ္ပယုတ္တကာ စ ခန္ဓာ ဥပ္ပဇ္ဇန္တိ။ (၃)

ဥပါဒါနသမ္ပယုတ္တော ¶ စေဝ နော စ ဥပါဒါနော ဓမ္မော ဥပါဒါနသမ္ပယုတ္တဿ စေဝ နော စ ဥပါဒါနဿ ဓမ္မဿ အာရမ္မဏပစ္စယေန ပစ္စယော – ဥပါဒါနသမ္ပယုတ္တေ စေဝ နော စ ဥပါဒါနေ ခန္ဓေ အာရဗ္ဘ ဥပါဒါနသမ္ပယုတ္တာ စေဝ နော စ ဥပါဒါနာ ခန္ဓာ ဥပ္ပဇ္ဇန္တိ (တီဏိပိ ကာတဗ္ဗာ၊ ဃဋနေ တီဏိပိ ကာတဗ္ဗာ)။

၁၀၆။ ဥပါဒါနော စေဝ ဥပါဒါနသမ္ပယုတ္တော စ ဓမ္မော ဥပါဒါနဿ စေဝ ဥပါဒါနသမ္ပယုတ္တဿ စ ဓမ္မဿ အဓိပတိပစ္စယေန ပစ္စယော… တီဏိ။ (၃)

ဥပါဒါနသမ္ပယုတ္တော စေဝ နော စ ဥပါဒါနော ဓမ္မော ဥပါဒါနသမ္ပယုတ္တဿ စေဝ နော စ ဥပါဒါနဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ (တီဏိပိ၊ တီသုပိ ဒွေပိ အဓိပတိ ကာတဗ္ဗာ၊ ဃဋနာဓိပတိပိ တီဏိ)။

၁၀၇။ ဥပါဒါနော စေဝ ဥပါဒါနသမ္ပယုတ္တော စ ဓမ္မော ဥပါဒါနဿ စေဝ ဥပါဒါနသမ္ပယုတ္တဿ စ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ ဥပါဒါနာ စေဝ ဥပါဒါနသမ္ပယုတ္တာ စ ခန္ဓာ ပစ္ဆိမာနံ ပစ္ဆိမာနံ ဥပါဒါနာနံ အနန္တရပစ္စယေန ပစ္စယော (ဧဝံ နဝပိ ပဉှာ ကာတဗ္ဗာ၊ အာဝဇ္ဇနာပိ ဝုဋ္ဌာနမ္ပိ နတ္ထိ)။

၁၀၈။ ဥပါဒါနော ¶ ¶ စေဝ ဥပါဒါနသမ္ပယုတ္တော စ ဓမ္မော ဥပါဒါနဿ စေဝ ဥပါဒါနသမ္ပယုတ္တဿ စ ဓမ္မဿ သမနန္တရပစ္စယေန ပစ္စယော… နဝ… သဟဇာတပစ္စယေန ပစ္စယော… နဝ… အညမညပစ္စယေန ပစ္စယော… နဝ… နိဿယပစ္စယေန ပစ္စယော… နဝ။

၁၀၉။ ဥပါဒါနော စေဝ ဥပါဒါနသမ္ပယုတ္တော စ ဓမ္မော ဥပါဒါနဿ စေဝ ဥပါဒါနသမ္ပယုတ္တဿ စ ဓမ္မဿ ဥပနိဿယပစ္စယေန ပစ္စယော…ပေ… တီဏိ။

ဥပါဒါနသမ္ပယုတ္တော ¶ စေဝ နော စ ဥပါဒါနော ဓမ္မော ဥပါဒါနသမ္ပယုတ္တဿ စေဝ နော စ ဥပါဒါနဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော…ပေ…။ ပကတူပနိဿယော – ဥပါဒါနသမ္ပယုတ္တာ စေဝ နော စ ဥပါဒါနာ ခန္ဓာ ဥပါဒါနသမ္ပယုတ္တကာနဉ္စေဝ နော စ ဥပါဒါနာနံ ခန္ဓာနံ ဥပနိဿယပစ္စယေန ပစ္စယော (တီဏိ ဃဋနုပနိဿယေပိ တီဏိ)… အာသေဝနပစ္စယေန ပစ္စယော… နဝ။

၁၁၀။ ဥပါဒါနသမ္ပယုတ္တော စေဝ နော စ ဥပါဒါနော ဓမ္မော ဥပါဒါနသမ္ပယုတ္တဿ စေဝ နော စ ဥပါဒါနဿ ဓမ္မဿ ကမ္မပစ္စယေန ပစ္စယော… တီဏိ… အာဟာရပစ္စယေန ပစ္စယော… တီဏိ… ဣန္ဒြိယပစ္စယေန ပစ္စယော… တီဏိ… ဈာနပစ္စယေန ပစ္စယော… တီဏိ… မဂ္ဂပစ္စယေန ပစ္စယော… နဝ… သမ္ပယုတ္တပစ္စယေန ပစ္စယော… နဝ… အတ္ထိပစ္စယေန ပစ္စယော… နဝ… နတ္ထိပစ္စယေန ပစ္စယော… နဝ… ဝိဂတပစ္စယေန ပစ္စယော… နဝ… အဝိဂတပစ္စယေန ပစ္စယော… နဝ။

၁၁၁။ ဟေတုယာ ¶ ¶ နဝ၊ အာရမ္မဏေ နဝ၊ အဓိပတိယာ နဝ၊ အနန္တရေ နဝ၊ သမနန္တရေ နဝ၊ သဟဇာတေ နဝ၊ အညမညေ နဝ၊ နိဿယေ နဝ၊ ဥပနိဿယေ နဝ၊ အာသေဝနေ နဝ၊ ကမ္မေ တီဏိ၊ အာဟာရေ တီဏိ၊ ဣန္ဒြိယေ တီဏိ၊ ဈာနေ တီဏိ၊ မဂ္ဂေ နဝ၊ သမ္ပယုတ္တေ နဝ၊ အတ္ထိယာ နဝ၊ နတ္ထိယာ နဝ၊ ဝိဂတေ နဝ၊ အဝိဂတေ နဝ။

၁၁၂။ ဥပါဒါနော စေဝ ဥပါဒါနသမ္ပယုတ္တော စ ဓမ္မော ဥပါဒါနဿ စေဝ ဥပါဒါနသမ္ပယုတ္တဿ စ ဓမ္မဿ အာရမ္မဏပစ္စယေန ပစ္စယော… သဟဇာတပစ္စယေန ပစ္စယော… ဥပနိဿယပစ္စယေန ပစ္စယော။ (၁)

ဥပါဒါနော ¶ စေဝ ဥပါဒါနသမ္ပယုတ္တော စ ဓမ္မော ဥပါဒါနသမ္ပယုတ္တဿ စေဝ နော စ ဥပါဒါနဿ ဓမ္မဿ အာရမ္မဏပစ္စယေန ပစ္စယော… သဟဇာတပစ္စယေန ပစ္စယော… ဥပနိဿယပစ္စယေန ပစ္စယော။ (၂)

ဥပါဒါနော စေဝ ဥပါဒါနသမ္ပယုတ္တော စ ဓမ္မော ဥပါဒါနဿ စေဝ ဥပါဒါနသမ္ပယုတ္တဿ စ ဥပါဒါနသမ္ပယုတ္တဿ စေဝ နော စ ဥပါဒါနဿ စ ဓမ္မဿ အာရမ္မဏပစ္စယေန ပစ္စယော… သဟဇာတပစ္စယေန ပစ္စယော… ဥပနိဿယပစ္စယေန ပစ္စယော (ဧဝံ နဝပိ ကာတဗ္ဗာ၊ ဧကေကဿ မူလေ တီဏိ တီဏိ ပဉှာ)။

၁၁၃။ နဟေတုယာ ¶ နဝ၊ နအာရမ္မဏေ နဝ၊ နအဓိပတိယာ နဝ (သဗ္ဗတ္ထ နဝ)၊ နောအဝိဂတေ နဝ။

၁၁၄။ ဟေတုပစ္စယာ နအာရမ္မဏေ နဝ၊ နအဓိပတိယာ နဝ၊ နအနန္တရေ နဝ၊ နသမနန္တရေ နဝ၊ နဥပနိဿယေ နဝ (သဗ္ဗတ္ထ နဝ)၊ နမဂ္ဂေ နဝ၊ နသမ္ပယုတ္တေ နဝ၊ နောနတ္ထိယာ နဝ၊ နောဝိဂတေ နဝ။

၁၁၅။ နဟေတုပစ္စယာ ¶ အာရမ္မဏေ နဝ၊ အဓိပတိယာ နဝ…ပေ… (အနုလောမမာတိကာ ကာတဗ္ဗာ)။

ဥပါဒါနဥပါဒါနသမ္ပယုတ္တဒုကံ နိဋ္ဌိတံ။

၇၄။ ဥပါဒါနဝိပ္ပယုတ္တဥပါဒါနိယဒုကံ

၁၁၆။ ဥပါဒါနဝိပ္ပယုတ္တံ ¶ ဥပါဒါနိယံ ဓမ္မံ ပဋိစ္စ ဥပါဒါနဝိပ္ပယုတ္တော ဥပါဒါနိယော ဓမ္မော ဥပ္ပဇ္ဇတိ ဟေတုပစ္စယာ – ဥပါဒါနဝိပ္ပယုတ္တံ ဥပါဒါနိယံ ဧကံ ¶ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ…ပေ… ဒွေ ခန္ဓေ…ပေ… ပဋိသန္ဓိက္ခဏေ…ပေ… ဧကံ မဟာဘူတံ…ပေ… မဟာဘူတေ ပဋိစ္စ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ။ (၁)

ဥပါဒါနဝိပ္ပယုတ္တံ အနုပါဒါနိယံ ဓမ္မံ ပဋိစ္စ ဥပါဒါနဝိပ္ပယုတ္တော အနုပါဒါနိယော ဓမ္မော ဥပ္ပဇ္ဇတိ ဟေတုပစ္စယာ – ဥပါဒါနဝိပ္ပယုတ္တံ အနုပါဒါနိယံ ဧကံ ခန္ဓံ ပဋိစ္စ တယော ခန္ဓာ…ပေ… ဒွေ ခန္ဓေ…ပေ…။ (၁)

ဥပါဒါနဝိပ္ပယုတ္တံ အနုပါဒါနိယံ ဓမ္မံ ပဋိစ္စ ဥပါဒါနဝိပ္ပယုတ္တော ဥပါဒါနိယော ဓမ္မော ဥပ္ပဇ္ဇတိ ဟေတုပစ္စယာ – ဥပါဒါနဝိပ္ပယုတ္တေ အနုပါဒါနိယေ ခန္ဓေ ပဋိစ္စ စိတ္တသမုဋ္ဌာနံ ရူပံ။ (၂)

ဥပါဒါနဝိပ္ပယုတ္တံ အနုပါဒါနိယံ ဓမ္မံ ပဋိစ္စ ဥပါဒါနဝိပ္ပယုတ္တော ဥပါဒါနိယော စ ဥပါဒါနဝိပ္ပယုတ္တော အနုပါဒါနိယော စ ဓမ္မာ ဥပ္ပဇ္ဇန္တိ ဟေတုပစ္စယာ – ဥပါဒါနဝိပ္ပယုတ္တံ ¶ အနုပါဒါနိယံ ¶ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ…ပေ… ဒွေ ခန္ဓေ…ပေ…။ (၃)

ဥပါဒါနဝိပ္ပယုတ္တံ ဥပါဒါနိယဉ္စ ဥပါဒါနဝိပ္ပယုတ္တံ အနုပါဒါနိယဉ္စ ဓမ္မံ ပဋိစ္စ ဥပါဒါနဝိပ္ပယုတ္တော ဥပါဒါနိယော ဓမ္မော ဥပ္ပဇ္ဇတိ ဟေတုပစ္စယာ – ဥပါဒါနဝိပ္ပယုတ္တေ အနုပါဒါနိယေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ။ (၁)

ဟေတုယာ ပဉ္စ၊ အာရမ္မဏေ ဒွေ…ပေ… အဝိဂတေ ပဉ္စ။

(ဣမံ ဒုကံ စူဠန္တရဒုကေ လောကိယဒုကသဒိသံ၊ နိန္နာနာကရဏံ။)

ဥပါဒါနဝိပ္ပယုတ္တဥပါဒါနိယဒုကံ နိဋ္ဌိတံ။