📜
၁၀။ ဒသမော ပရိစ္ဆေဒေါ
ရူပဝိဘာဂနိဒ္ဒေသော
ဝုတ္တမာဒိမှိ ¶ ယံ ရူပံ၊ စိတ္တဇာနမနန္တရံ၊
တဿ ဒါနိ ကရိဿာမိ၊ သမာသေန ဝိဘာဝနံ။
ယံ ရုပ္ပတီတိ ရူပန္တိ၊ တထာ ရူပယတီတိ ဝါ၊
ရူပါရူပဘဝါတီတော၊ သုရူပေါ ရူပမဗြဝိ။
တံ ရူပံ ဒုဝိဓံ ဟောတိ၊ ဘူတောပါဒါယဘေဒတော၊
စတုဗ္ဗိဓာ မဟာဘူတာ၊ ဥပါဒါ စတုဝီသတိ။
ပထဝီဓာတု အာပေါ စ၊
တေဇော ဝါယော တထေဝ စ၊
စတ္တာရောမေ မဟာဘူတာ၊
မဟာဘူတေန ဒေသိတာ။
မဟန္တာ ပါတုဘူတာတိ၊ မဟာဘူတသမာတိ ဝါ၊
ဝဉ္စကတ္တာ အဘူတေန၊ မဟာဘူတာတိ သညိတာ။
စက္ခု ¶ ¶ သောတဉ္စ ဃာနဉ္စ၊ ဇိဝှာ ကာယော စ ရူပတာ၊
သဒ္ဒေါ ဂန္ဓော ရသော ဣတ္ထိ-ပုရိသိန္ဒြိယဇီဝိတံ။
ဝတ္ထုမာဟာရတာ ကာယ-ဝစီဝိညတ္တိယော ဒုဝေ၊
အာကာသော စေဝ ရူပဿ၊ လဟုတာဒိတ္တယမ္ပိ စ။
ဥပစယော သန္တတိရူပံ၊ ဇရတာနိစ္စတာပိ စ၊
ဥပါဒါတိ ပဝုစ္စန္တိ၊ ဣမာနိ စတုဝီသတိ။
မဟာဘူတာနိ နိဿာယ၊ အမုဉ္စိတွာ ပဝတ္တိတော၊
ဥပါဒါရူပမိစ္စာဟ၊ နိရုပါဒါနမာနသော။
ပထဝီ ပတ္ထဋတ္တာ စ၊ ဝါယော ဝါယနတော ဘဝေ၊
တေဇော တေဇေတိ ရူပါနိ၊ အာပေါ အာပေတိ ပါလနာ။
တေသံ ဒါနိ ပဝက္ခာမိ၊ ရူပါနံ လက္ခဏာဒိကံ၊
လက္ခဏာဒီသု ဉာတေသု၊ ဓမ္မာ အာဝိ ဘဝန္တိ ဟိ။
သာမညံ ဝါ သဘာဝေါ ဝါ၊ ဓမ္မာနံ လက္ခဏံ မတံ၊
ကိစ္စံ ဝါ တဿ သမ္ပတ္တိ၊ ရသောတိ ပရိဒီပိတော။
ဖလံ ဝါ ပစ္စုပဋ္ဌာနံ၊ ဥပဋ္ဌာနနယောပိ ဝါ၊
အာသန္နကာရဏံ ယံ တု၊ တံ ပဒဋ္ဌာနသညိတံ။
တတ္ထ ¶ ကက္ခဠတ္တလက္ခဏာ ပထဝီဓာတု၊ ပတိဋ္ဌာနရသာ၊ သမ္ပဋိစ္ဆနပစ္စုပဋ္ဌာနာ။ ပဂ္ဃရဏလက္ခဏာ အာပေါဓာတု၊ ဥပဗြူဟနရသာ၊ သင်္ဂဟပစ္စုပဋ္ဌာနာ။ ဥဏှတ္တလက္ခဏာ တေဇောဓာတု၊ ပရိပါစနရသာ၊ မဒ္ဒဝါနုပ္ပဒါနပစ္စုပဋ္ဌာနာ။ ဝိတ္ထမ္ဘနလက္ခဏာ ဝါယောဓာတု၊ သမုဒီရဏရသာ၊ အဘိနီဟာရပစ္စုပဋ္ဌာနာ။ ဧကေကာယ စေတ္ထ သေသဘူတတ္တယပဒဋ္ဌာနာတိ ဝေဒိတဗ္ဗာ။
စက္ခတီတိ စက္ခု၊ ရူပံ ဝိဘာဝေတီတိ အတ္ထော။
တတ္ထ ¶ ¶ စက္ခု ဒွိဓာ ဝုတ္တံ၊ ပညာမံသပ္ပဘေဒတော၊
တတ္ထ ပညာမယံ စက္ခု၊ ဟောတိ ပဉ္စဝိဓံ ပန။
ဗုဒ္ဓဓမ္မသမန္တေဟိ၊ ဉာဏဒိဗ္ဗေဟိ နာမတော၊
ယထာနုက္ကမတော တေသံ၊ နာနတ္တံ မေ နိဗောဓထ။
အာသယာနုသယေ ဉာဏံ၊ ဣန္ဒြိယာနံ ပရောပရေ၊
ဗုဒ္ဓစက္ခုန္တိ နိဒ္ဒိဋ္ဌံ၊ မုနိနာ လောကစက္ခုနာ။
ဟေဋ္ဌာမဂ္ဂတ္တယေ ဉာဏံ၊ ဓမ္မစက္ခုန္တိ သညိတံ၊
ဉေယျံ သမန္တစက္ခုန္တိ၊ ဉာဏံ သဗ္ဗညုတာ ပန။
ယံ ‘‘စက္ခုံ ဥဒပါဒီ’’တိ၊ အာဂတံ ဉာဏစက္ခု တံ၊
အဘိညာစိတ္တဇာ ပညာ၊ ဒိဗ္ဗစက္ခုန္တိ ဝုစ္စတိ။
မံသစက္ခုပိ ဒုဝိဓံ၊ သသမ္ဘာရပသာဒတော၊
သသမ္ဘာရဉ္စ နာမေတ္ထ၊ အက္ခိကူပေ ပတိဋ္ဌိတံ။
အက္ခိကူပဋ္ဌိနာ ဟေဋ္ဌာ၊ ဥဒ္ဓဉ္စ ဘမုကဋ္ဌိနာ၊
ဥဘတော အက္ခိကူဋေဟိ၊ မတ္ထလုင်္ဂေန အန္တတော။
ဗဟိဒ္ဓါ အက္ခိလောမေဟိ၊ ပရိစ္ဆိန္နော စ ယော ပန၊
နှာရုသုတ္တေန အာဗန္ဓော၊ မံသပိဏ္ဍော ပဝုစ္စတိ။
သကလောပိ စ လောကောယံ၊ ကမလဿ ဒလံ ဝိယ၊
ပုထုလံ ဝိပုလံ နီလံ၊ ဣတိ ဇာနာတိ လောစနံ။
စက္ခု နာမ န တံ ဟောတိ၊ ဝတ္ထု တဿာတိ ဝုစ္စတိ၊
ဣဒံ ပန သသမ္ဘာရ-စက္ခုန္တိ ပရိဒီပိတံ။
ဝဏ္ဏော ဂန္ဓော ရသော ဩဇာ၊
စတဿော စာပိ ဓာတုယော၊
ဘာဝသမ္ဘဝသဏ္ဌာနံ၊
ဇီဝိတာနိ တထေဝ စ။
သမ္ဘာရာ ဟောန္တိ စုဒ္ဒသ၊
တထာ ဝိတ္ထာရတော စေတံ၊
စတဿော စာပိ ဓာတုယော။
ဝဏ္ဏော ဂန္ဓော ရသော ဩဇာ၊
သဏ္ဌာနသမ္ဘဝေါ တထာ၊
ဒသေတေ စတုသမုဋ္ဌာနာ၊
စတ္တာလီသ ဘဝန္တိ တေ။
စက္ခု ¶ ကာယပ္ပသာဒေါ စ၊ ဘာဝေါ ဇီဝိတမေဝ စ၊
စတ္တာလီသဉ္စ ရူပါနိ၊ စတ္တာရိ တု ဘဝန္တိ ဟိ။
ဣမေသံ ပန ရူပါနံ၊ ဝသေန ပရိပိဏ္ဍိတံ၊
ဣဒံ သမ္ဘာရစက္ခုန္တိ၊ ပဏ္ဍိတေဟိ ပကာသိတံ။
ယော ပနေတ္ထ သိတော အတ္ထိ၊ ပရိဗန္ဓော ပရိတ္တကော၊
စတုန္နံ ပန ဘူတာနံ၊ ပသာဒေါ ကမ္မသမ္ဘဝေါ။
ဣဒံ ပသာဒစက္ခုန္တိ၊ အက္ခာတံ ပဉ္စစက္ခုနာ၊
တဒေတံ တဿ မဇ္ဈေ တု၊ သသမ္ဘာရဿ စက္ခုနော။
သေတေန မဏ္ဍလေနဿ၊ ပရိက္ခိတ္တဿ သဗ္ဗသော၊
ကဏှမဏ္ဍလမဇ္ဈေ ဝါ၊ နိဝိဋ္ဌေ ဒိဋ္ဌမဏ္ဍလေ။
သန္ဓာရဏာဒိကိစ္စာဟိ၊ ဓာတူဟိ စ စတူဟိပိ၊
ကတူပကာရံ ဟုတွာန၊ ဥတုစိတ္တာဒိနာ ပန။
ဥပတ္ထမ္ဘိယမာနံ တံ၊ အာယုနာ ကတပါလနံ၊
ဝဏ္ဏဂန္ဓရသာဒီဟိ၊ ရူပေဟိ ပရိဝါရိတံ။
စက္ခုဝိညာဏကာဒီနံ၊ ဝတ္ထုဒွါရဉ္စ သာဓယံ၊
ဦကာသိရသမာနေန၊ ပမာဏေနေဝ တိဋ္ဌတိ။
‘‘ယေန စက္ခုပသာဒေန၊ ရူပါနိမနုပဿတိ၊
ပရိတ္တံ သုခုမံ ဧတံ၊ ဦကာသိရသမူပမ’’န္တိ။
သောတာဒီသု စ ဧသေဝ၊ နယော ဉေယျော ဝိဘာဝိနာ၊
ဝိသေသမတ္တမေဝေတ္ထ၊ ပဝက္ခာမိ ဣတော ပရံ။
သုဏာတီတိ သောတံ၊ တံ တနုတမ္ဗလောမာစိတေ အင်္ဂုလိဝေဓကသဏ္ဌာနေ ပဒေသေ ဝုတ္တပ္ပကာရာဟိ ဓာတူဟိ ကတူပကာရံ ဥတုစိတ္တာဟာရေဟိ ဥပတ္ထမ္ဘိယမာနံ အာယုနာ ပရိပါလိယမာနံ သောတဝိညာဏာဒီနံ ဝတ္ထုဒွါရဘာဝံ သာဓယမာနံ တိဋ္ဌတိ။
ဃာယတီတိ ဃာနံ၊ တံ သသမ္ဘာရဃာနဗိလဿ အန္တော အဇပဒသဏ္ဌာနေ ပဒေသေ ယထာဝုတ္တပ္ပကာရာ ဟုတွာ တိဋ္ဌတိ။
သာယတီတိ ဇိဝှာ၊ ဇီဝိတမဝှာယတီတိ ဝါ ဇိဝှာ၊ သာ သသမ္ဘာရဇိဝှာမဇ္ဈဿ ဥပရိ ဥပ္ပလဒလဂ္ဂသဏ္ဌာနေ ပဒေသေ ယထာဝုတ္တပ္ပကာရာ ဟုတွာ တိဋ္ဌတိ။
ကုစ္ဆိတာနံ မလာနံ အာယောတိ ကာယော။ ယာဝတာ ပန ဣမသ္မိံ ကာယေ ဥပါဒိန္နကံ ရူပံ အတ္ထိ၊ သဗ္ဗတ္ထ ကာယပသာဒေါ ကပ္ပာသပဋလေ သ္နေဟော ဝိယ ယထာဝုတ္တပ္ပကာရော ဟုတွာ တိဋ္ဌတိ။
ဧတ္ထ ပနေတေသံ လက္ခဏာဒီနိ ပဝက္ခာမိ – ဒဋ္ဌုကာမတာနိဒါနကမ္မသမုဋ္ဌာနဘူတပသာဒလက္ခဏံ ¶ စက္ခု၊ ရူပေသု အာဝိဉ္ဆနရသံ၊ စက္ခုဝိညာဏဿ အာဓာရဘာဝပစ္စုပဋ္ဌာနံ၊ ဒဋ္ဌုကာမတာနိဒါနကမ္မဇဘူတပဒဋ္ဌာနံ။
သောတုကာမတာနိဒါနကမ္မသမုဋ္ဌာနဘူတပသာဒလက္ခဏံ ¶ သောတံ၊ သဒ္ဒေသု အာဝိဉ္ဆနရသံ၊ သောတဝိညာဏဿ အာဓာရဘာဝပစ္စုပဋ္ဌာနံ၊ သောတုကာမတာနိဒါနကမ္မဇဘူတပဒဋ္ဌာနံ။
ဃာယိတုကာမတာနိဒါနကမ္မသမုဋ္ဌာနဘူတပသာဒလက္ခဏံ ဃာနံ၊ ဂန္ဓေသု အာဝိဉ္ဆနရသံ၊ ဃာနဝိညာဏဿ အာဓာရဘာဝပစ္စုပဋ္ဌာနံ၊ ဃာယိတုကာမတာနိဒါနကမ္မဇဘူတပဒဋ္ဌာနံ။
သာယိတုကာမတာနိဒါနကမ္မသမုဋ္ဌာနဘူတပသာဒလက္ခဏာဇိဝှာ ¶ ၊ ရသေသု အာဝိဉ္ဆနရသာ၊ ဇိဝှာဝိညာဏဿ အာဓာရဘာဝပစ္စုပဋ္ဌာနာ၊ သာယိတုကာမတာနိဒါနကမ္မဇဘူတပဒဋ္ဌာနာ။
ဖုသိတုကာမတာနိဒါနကမ္မသမုဋ္ဌာနဘူတပသာဒလက္ခဏော ကာယော၊ ဖောဋ္ဌဗ္ဗေသု အာဝိဉ္ဆနရသော၊ ကာယဝိညာဏဿ အာဓာရဘာဝပစ္စုပဋ္ဌာနော၊ ဖုသိတုကာမတာနိဒါနကမ္မဇဘူတပဒဋ္ဌာနော။
ကေစိ ပနာဟု –
တေဇာဓိကာနံ ဘူတာနံ၊ ပသာဒေါ ပန စက္ခုတိ၊
အာကာသာနိလတောယုဗ္ဗိအဓိကာနံ တု သေသကာ။
တေ ပနေဝံ တု ဝတ္တဗ္ဗာ၊ ‘‘သုတ္တံ အာဟရထာ’’တိ ဟိ၊
သုတ္တမေဝ စ တေ အဒ္ဓါ၊ န ဒက္ခိဿန္တိ ကိဉ္စိပိ။
ဝိသေသေ သတိ ဘူတာနံ၊ ပသာဒေါ ဟိ ကထံ ဘဝေ၊
သမာနာနံ ဟိ ဘူတာနံ၊ ပသာဒေါ ပရိဒီပိတော။
တသ္မာ နိဿယဘူတာနံ၊ စတုန္နံ သဗ္ဗသော ပန၊
ပဟာယေဝ ပနေတေသံ၊ ဝိသေသပရိကပ္ပနံ။
ဉေယျာ ကမ္မဝိသေသေန၊ ပသာဒါနံ ဝိသေသတာ၊
န ဟိ ဘူတဝိသေသေန၊ ဟောတိ တေသံ ဝိသေသတာ။
ဧဝမေတေသု ¶ စက္ခုဉ္စ၊ သောတံ အပတ္တဂါဟကံ၊
သေသံ တု ပန ဃာနာဒိတ္တယံ သမ္ပတ္တဂါဟကံ။
ရူပန္တိ ရူပယတီတိ ရူပံ၊ ဝဏ္ဏဝိကာရမာပဇ္ဇမာနံ ဟဒယင်္ဂတဘာဝံ ပကာသေတီတိ အတ္ထော။ တံ ပန စက္ခုပဋိဟနနလက္ခဏံ၊ စက္ခုဝိညာဏဿ ဝိသယဘာဝရသံ၊ တဿေဝ ဂေါစရဘာဝပစ္စုပဋ္ဌာနံ၊ စတုမဟာဘူတပဒဋ္ဌာနံ။ ယထာ စေတံ၊ တထာ သဗ္ဗာနိပိ ဥပါဒါရူပါနီတိ ¶ ။
သဒ္ဒေါတိ ¶ သဒ္ဒယတီတိ သဒ္ဒေါ၊ သော ပန သောတပဋိဟနနလက္ခဏော၊ သောတဝိညာဏဿ ဝိသယဘာဝရသော၊ တဿေဝ ဂေါစရဘာဝပစ္စုပဋ္ဌာနော။
ရသောတိ ရသန္တိ တေနာတိ ရသော၊ သော ဇိဝှာပဋိဟနနလက္ခဏော၊ ဇိဝှာဝိညာဏဿ ဝိသယဘာဝရသော၊ တဿေဝ ဂေါစရဘာဝပစ္စုပဋ္ဌာနော။
ဂန္ဓောတိ အတ္တာနံ ဂန္ဓယတိ သူစယတီတိ ဂန္ဓော၊ သော ဃာနပဋိဟနနလက္ခဏော၊ ဃာနဝိညာဏဿ ဝိသယဘာဝရသော၊ တဿေဝ ဂေါစရဘာဝပစ္စုပဋ္ဌာနော။
ဣတ္ထိန္ဒြိယန္တိ –
ကမ္မဇော ဣတ္ထိဘာဝေါယံ၊ ပဋိသန္ဓိသမုဋ္ဌိတော၊
ယဉ္စေတံ ဣတ္ထိလိင်္ဂါဒိ၊ န တု တံ ဣန္ဒြိယံ သိယာ။
ဣတ္ထိန္ဒြိယံ ပဋိစ္စေဝ၊ ဣတ္ထိလိင်္ဂါဒယော ပန၊
ပဝတ္တေယေဝ ဇာယန္တေ၊ န တာနိ ပဋိသန္ဓိယံ။
န စ တံ စက္ခုဝိညေယျံ၊ မနောဝိညေယျမေဝ တံ၊
ဣတ္ထိလိင်္ဂါဒယော စက္ခုဝိညေယျာ ဟောန္တိ ဝါ န ဝါ။
ဧသေဝ စ နယော ဉေယျော၊ သေသေပိ ပုရိသိန္ဒြိယေ၊
ဣဒံ ပဌမကပ္ပာနံ၊ ဥဘယံ တု ပဝတ္တိယံ။
သမုဋ္ဌာတီတိ ¶ ဝိညေယျံ၊ ပရတော ပဋိသန္ဓိယံ၊
ပဝတ္တေပိ သမုဋ္ဌာယ၊ ပဝတ္တေ ပရိဝတ္တတိ။
မဟတာ ပါပကမ္မေန၊ ပုရိသတ္တံ ဝိနဿတိ၊
မဟတာ ကုသလေနေဝ၊ ဇာယတေ ပုရိသိန္ဒြိယံ။
ဒုဗ္ဗလာကုသလေနေဝ၊ ဣတ္ထိလိင်္ဂံ ဝိနဿတိ၊
ဒုဗ္ဗလေနေဝ ပုညေန၊ ဣတ္ထိဘာဝေါ ဟိ ဇာယတေ။
ဥဘတောဗျဉ္ဇနဿာပိ ¶ ၊ ဧကမေဝိန္ဒြိယံ သိယာ၊
ဧဝံ သန္တေ အဘာဝေါ စ၊ ဒုတိယဗျဉ္ဇနဿ တု။
န စာဘာဝေါ သိယာ ကသ္မာ၊ န တံ ဗျဉ္ဇနကာရဏံ၊
တဿ ကမ္မသဟာယံ ဟိ၊ ရာဂစိတ္တံ တု ကာရဏံ။
ဥဘယဿ ပနေတဿ လက္ခဏာဒီနိ ဝုစ္စတိ။ တတ္ထ ဣတ္ထိဘာဝလက္ခဏံ ဣတ္ထိန္ဒြိယံ၊ ‘‘ဣတ္ထီ’’တိ ပကာသနရသံ၊ ဣတ္ထိလိင်္ဂနိမိတ္တကုတ္တာကပ္ပာနံ ကာရဏဘာဝပစ္စုပဋ္ဌာနံ။
ပုရိသဘာဝလက္ခဏံ ပုရိသိန္ဒြိယံ၊ ‘‘ပုရိသော’’တိ ပကာသနရသံ၊ ပုရိသလိင်္ဂနိမိတ္တကုတ္တာကပ္ပာနံ ကာရဏဘာဝပစ္စုပဋ္ဌာနံ။
ဇီဝိတန္တိ –
ဇီဝိတိန္ဒြိယနိဒ္ဒေသေ၊ ဝတ္တဗ္ဗံ ယံ သိယာ ဣဓ၊
အရူပဇီဝိတေ ဝုတ္တ-နယေနေဝ စ တံ ဝဒေ။
လက္ခဏာဒီနိ ¶ ပနဿ ဧဝံ ဝေဒိတဗ္ဗာနိ။ သဟဇရူပပရိပါလနလက္ခဏံ ဇီဝိတိန္ဒြိယံ၊ တေသံ ပဝတ္တနရသံ၊ တေသမေဝ ဌပနပစ္စုပဋ္ဌာနံ၊ ယာပယိတဗ္ဗဘူတပဒဋ္ဌာနန္တိ။
ဝတ္ထူတိ ဟဒယဝတ္ထု။
ယံ နိဿာယ မနောဓာတု-မနောဝိညာဏဓာတုယော၊
ဝတ္တန္တိ ပဉ္စဝေါကာရေ၊ တံ ‘‘ဝတ္ထူ’’တိ ပဝုစ္စတိ။
မနောဓာတုမနောဝိညာဏဓာတူနံ ¶ နိဿယလက္ခဏံ ဟဒယဝတ္ထု၊ တာသဉ္စေဝ ဓာတူနံ အာဓာရဏရသံ၊ ဥဗ္ဗာဟနပစ္စုပဋ္ဌာနံ။
အာဟာရတာတိ ကဗဠီကာရော အာဟာရော။ ဩဇဋ္ဌမကံ ရူပံ အာဟရတီတိ အာဟာရော။
ယာယ ¶ ဩဇာယ ယာပေန္တိ၊ ယတ္ထ ယတ္ထ စ ပါဏိနော၊
အယံ တု ‘‘ကဗဠီကာရော၊ အာဟာရော’’တိ ပဝုစ္စတိ။
အန္နပါနာဒိကံ ဝတ္ထု၊ အဂ္ဂိံ ဟရတိ ကမ္မဇံ၊
ကေဝလံ န စ သက္ကောတိ၊ ပါလေတုံ ဇီဝိတံ ပန။
ဩဇာ သက္ကောတိ ပါလေတုံ၊ ဟရိတုံ န စ ပါစကံ၊
ဟရိတုမ္ပိ စ ပါလေတုံ၊ ဥဘော သက္ကောန္တိ ဧကတော။
လက္ခဏာဒိတော ပနဿ ဩဇာလက္ခဏော ကဗဠီကာရော အာဟာရော၊ ရူပါဟရဏရသော၊ ဥပတ္ထမ္ဘနပစ္စုပဋ္ဌာနော၊ ကဗဠံ ကတွာ အဇ္ဈောဟရိတဗ္ဗဝတ္ထုပဒဋ္ဌာနောတိ ဝေဒိတဗ္ဗော။
ကာယဝိညတ္တိနိဒ္ဒေသေ ကာယေန အတ္တနော ဘာဝံ ဝိညာပေန္တာနံ ကာယဂ္ဂဟဏာနုသာရေန ဂဟိတာယ ဧတာယ ဘာဝေါ ဝိညာယတီတိ ဝိညတ္တိ။ သယံ ဝါ ကာယဂ္ဂဟဏာနုသာရေန ဝိညာယတီတိပိ ဝိညတ္တိ။ ‘‘ကာယေန သံဝရော သာဓု၊ သာဓု ဝါစာယ သံဝရော’’တိ အာဂတော စောပနသင်္ခါတော ကာယောဝ ဝိညတ္တိ ကာယဝိညတ္တိ။ ကာယဝိပ္ဖန္ဒနေန အဓိပ္ပာယဝိညာပနဟေတုတ္တာ သယဉ္စ တထာ ဝိညေယျတ္တာ ကာယေန ဝိညတ္တီတိပိ ကာယဝိညတ္တိ။
တတ္ထ ယာ သဟဇာတဿ၊ စိတ္တဇာနိလဓာတုယာ၊
ရူပဿ စလနေ ဟေတု၊ ဧကာကာရဝိကာရတာ။
ကာယဝိညတ္တိ နာမာယံ၊ ကာယဒွါရန္တိ သာ မတာ၊
တတ္ထ ယာ စေတနာသိဒ္ဓါ၊ ပုညာပုညဝသာ ပန။
ကာယကမ္မန္တိ ¶ နိဒ္ဒိဋ္ဌာ၊ သတ္ထုနာ သာ ဟိတေသိနာ၊
သမ္ပဝတ္တိ ပနေတိဿာ၊ ဝစီဒွါရေပိ ဇာယတေ။
လဘိတွာ ¶ ပနုပတ္ထမ္ဘံ၊ ဧကာဝဇ္ဇနဝီထိယံ၊
ဟေဋ္ဌာဟိ ဆဟိ စိတ္တေဟိ၊ ဝါယောဓာတုသမုဋ္ဌိတံ။
သတ္တမေန တု စိတ္တေန၊ ဝါယောဓာတုသမုဋ္ဌိတာ၊
စာလေတိ သဟဇံ ရူပံ၊ ဝိညတ္တိသဟိတာတ္တနာ။
ဝစီဝိညတ္တိနိဒ္ဒေသေ ¶ ပန –
ပစ္စယော စိတ္တဇာတာယ၊ ဥပါဒိန္နကဃဋ္ဋနေ၊
ယော အာကာရဝိကာရေကော၊ အယံ ပထဝိဓာတုယာ။
ဝစီဝိညတ္တိ ဝိညေယျာ၊ သဟ သဒ္ဒဝသာ ပန၊
ဝစီဒွါရန္တိ နိဒ္ဒိဋ္ဌာ၊ သာဝ သကျကုလိန္ဒုနာ။
သဒ္ဒေါ န စိတ္တဇော အတ္ထိ၊ ဝိနာ ဝိညတ္တိဃဋ္ဋနံ၊
ဓာတုသင်္ဃဋ္ဋနေနေဝ၊ သဟ သဒ္ဒေါ ဟိ ဇာယတိ။
သာ ဝိညာပနတော စေဝ၊ အယံ ဝိညေယျတောပိ စ၊
ဝိညတ္တီတိ သိယာ တဿာ၊ သမ္ဘဝေါ ကာရကဒွယေ။
န ဝိညတ္တိဒွယံ အဋ္ဌ၊ ရူပါနိ ဝိယ စိတ္တဇံ၊
စိတ္တဇာနံ ဝိကာရတ္တာ၊ စိတ္တဇန္တိ ပဝုစ္စတိ။
တတ္ထ ကာယဝိညတ္တိ အဓိပ္ပာယပကာသနရသာ၊ ကာယဝိပ္ဖန္ဒနဟေတုဘာဝပစ္စုပဋ္ဌာနာ၊ စိတ္တသမုဋ္ဌာနဝါယောဓာတုပဒဋ္ဌာနာ။ တထာ ဝစီဝိညတ္တိ အဓိပ္ပာယပကာသနရသာ၊ ဝစီဃောသဿ ဟေတုဘာဝပစ္စုပဋ္ဌာနာ၊ စိတ္တသမုဋ္ဌာနပထဝီဓာတုပဒဋ္ဌာနာ။
န ကဿတီတိ အာကာသော၊ ရူပါနံ ဝိဝရော ပန၊
ယော ရူပါနံ ပရိစ္ဆေဒေါ၊ သွာကာသောတိ ပဝုစ္စတိ။
သော ¶ ရူပပရိစ္ဆေဒလက္ခဏော၊ ရူပပရိယန္တပကာသနရသော၊ ရူပမရိယာဒပစ္စုပဋ္ဌာနော၊ အသမ္ဖုဋ္ဌဘာဝဆိဒ္ဒဝိဝရဘာဝပစ္စုပဋ္ဌာနော ဝါ၊ ပရိစ္ဆိန္နရူပပဒဋ္ဌာနော။
ရူပဿ လဟုတာဒိတ္တယနိဒ္ဒေသေ –
ဟေဋ္ဌာ ဝုတ္တနယေနေဝ၊ ရူပဿ လဟုတာဒိသု၊
တိဿော ရူပဝိကာရာတိ၊ ဝိညာတဗ္ဗာ ဝိဘာဝိနာ။
ဧတာသံ ¶ ပန တိဿန္နံ၊ ကမတော စ ပဝတ္တိယံ၊
အရောဂီ မဒ္ဒိတံ စမ္မံ၊ ဓန္တဟေမံ နိဒဿနံ။
ကမ္မံ ကာတုံ န သက္ကောတိ၊ လဟုတာဒိတ္တယံ ပန၊
အာဟာရာဒိတ္တယံယေဝ၊ တံ ကရောတိ တတော တိဇံ။
တတ္ထ ¶ အဒန္ဓတာလက္ခဏာ ရူပဿ လဟုတာ၊ ရူပါနံ ဂရုဘာဝဝိနောဒနရသာ၊ လဟုပရိဝတ္တိတာပစ္စုပဋ္ဌာနာ၊ လဟုရူပပဒဋ္ဌာနာ။
အထဒ္ဓတာလက္ခဏာ ရူပဿ မုဒုတာ၊ ရူပါနံ ထဒ္ဓဘာဝဝိနောဒနရသာ၊ သဗ္ဗကိရိယာသု အဝိရောဓိတာပစ္စုပဋ္ဌာနာ၊ မုဒုရူပပဒဋ္ဌာနာ။
သရီရကိရိယာနုကူလကမ္မညတာလက္ခဏာ ရူပဿ ကမ္မညတာ၊ အကမ္မညတာဝိနောဒနရသာ၊ အဒုဗ္ဗလဘာဝပစ္စုပဋ္ဌာနာ၊ ကမ္မညတာရူပပဒဋ္ဌာနာ။ ဧတာ ပန တိဿောပိ န အညမညံ ဝိဇဟန္တိ။
ဥပစယသန္တတိနိဒ္ဒေသေ –
ရူပါနမာစယော ယော ဟိ၊ ဝုတ္တော ဥပစယောတိ သော၊
အနုပ္ပဗန္ဓတာ တေသံ၊ သန္တတီတိ ပဝုစ္စတိ။
အတ္ထတော ¶ ဥဘယမ္ပေတံ၊ ဇာတိရူပန္တိ ဒီပိတံ၊
ဝုတ္တမာကာရနာနတ္တာ၊ ဝေနေယျာနံ ဝသေန ဝါ။
လက္ခဏာဒိတော ပန အာစယလက္ခဏော ရူပဿ ဥပစယော၊ ပုဗ္ဗန္တတော ရူပါနံ ဥမ္မုဇ္ဇာပနရသော၊ နိယျာတနပစ္စုပဋ္ဌာနော၊ ပရိပုဏ္ဏဘာဝပစ္စုပဋ္ဌာနော ဝါ၊ ဥပစိတရူပပဒဋ္ဌာနော။
ပဝတ္တိလက္ခဏာ ရူပဿ သန္တတိ၊ အနုပ္ပဗန္ဓနရသာ၊ အနုပစ္ဆေဒပစ္စုပဋ္ဌာနာ၊ အနုပ္ပဗန္ဓရူပပဒဋ္ဌာနာ။
ဇရာနိဒ္ဒေသေ ¶ ဇီရဏံ ဇရာ။
ဒုဝိဓာယံ ဇရာ နာမ၊ ပါကဋာပါကဋာတိ စ၊
ပါကဋာ ရူပဓမ္မေသု၊ အရူပေသု အပါကဋာ။
ရူပဿ ပရိပါကတာလက္ခဏာ ရူပဿ ဇရတာ၊ ဥပနယနရသာ၊ သဘာဝါနံ အပဂမေပိ နသဘာဝါပဂမပစ္စုပဋ္ဌာနာ ဝီဟိပုရာဏဘာဝေါ ဝိယ၊ ပရိပစ္စမာနရူပပဒဋ္ဌာနာ။
ပရိဘေဒလက္ခဏာ ရူပဿ အနိစ္စတာ၊ သံသီဒနရသာ၊ ခယဝယပစ္စုပဋ္ဌာနာ၊ ပရိဘိဇ္ဇမာနရူပပဒဋ္ဌာနာတိ ဝေဒိတဗ္ဗာတိ။
ဧဝံ စတုဝီသတိ ဥပါဒါရူပါနိ ဝေဒိတဗ္ဗာနိ။
ဘူတရူပါနိ စတ္တာရိ၊ ဥပါဒါ စတုဝီသတိ၊
အဋ္ဌဝီသတိ ရူပါနိ၊ သဗ္ဗာနေဝ ဘဝန္တိ ဟိ။
ဣမေသု ပန ရူပေသု၊ အသမ္မောဟတ္ထမေဝ တံ၊
သမောဓာနံ သမုဋ္ဌာနံ၊ နိပ္ဖန္နံ သင်္ခတမ္ပိ စ။
စောဒနံ ¶ ပရိဟာရဉ္စ၊ နယမေကဝိဓာဒိကံ၊
သင်္ခေပေန ပဝက္ခာမိ၊ ပကိဏ္ဏကမိဒံ သုဏ။
တတ္ထ ¶ သမောဓာနန္တိ သဗ္ဗမေဝ ဣဒံ ရူပံ သဗ္ဗသမောဓာနတော ပထဝီဓာတု အာပေါဓာတု တေဇောဓာတု ဝါယောဓာတု စက္ခာယတနံ…ပေ… ဇရတာ အနိစ္စတာတိ အဋ္ဌဝီသတိဝိဓံ စ ဟောတိ၊ ဣတော အညံ ရူပံ နာမ နတ္ထိ။ ကေစိ ပန မိဒ္ဓဝါဒိနော ‘‘မိဒ္ဓရူပံ နာမ အတ္ထီ’’တိ ဝဒန္တိ၊ တေ ‘‘အဒ္ဓါ မုနီသိ သမ္ဗုဒ္ဓါ၊ နတ္ထိ နီဝရဏာ တဝါ’’တိ စ ‘‘ထိနမိဒ္ဓနီဝရဏံ အဝိဇ္ဇာနီဝရဏဉ္စ နီဝရဏသမ္ပယုတ္တ’’န္တိ သမ္ပယုတ္တဝစနတော စ မဟာပကရဏပဋ္ဌာနေ ‘‘နီဝရဏံ ဓမ္မံ ပဋိစ္စ နီဝရဏော ဓမ္မော ဥပ္ပဇ္ဇတိ နပုရေဇာတပစ္စယာ’’တိ အရူပေပိ ‘‘ကာမစ္ဆန္ဒနီဝရဏံ ပဋိစ္စ ထိနမိဒ္ဓဥဒ္ဓစ္စကုက္ကုစ္စာဝိဇ္ဇာနီဝရဏ’’န္တိ ဧဝမာဒီဟိ ပါဠီဟိ ဝိရုဇ္ဈနတော စ အရူပမေဝ မိဒ္ဓန္တိ ပဋိက္ခိပိတဗ္ဗာ။
အရူပေပိ ¶ ပနေတဿ၊ မိဒ္ဓဿုပ္ပတ္တိ ပါဌတော၊
နိဋ္ဌမေတ္ထာဝဂန္တဗ္ဗာ၊ အရူပန္တိ စ ဝိညုနာ။
အပရေ ‘‘ဗလရူပေန သဒ္ဓိံ ဧကူနတိံသ၊ သမ္ဘဝရူပေန သဒ္ဓိံ တိံသ၊ ဇာတိရူပေန သဒ္ဓိံ ဧကတိံသ၊ ရောဂရူပေန သဒ္ဓိံ ဒွတ္တိံသ ရူပါနီ’’တိ ဝဒန္တိ။ တေပိ တေသံ ဝိသုံ ဝိသုံ အဘာဝံ ဒဿေတွာ ပဋိက္ခိပိတဗ္ဗာ။ ဝါယောဓာတုယာ ဂဟိတာယ ဗလရူပံ ဂဟိတမေဝ၊ အညံ ဗလရူပံ နာမ နတ္ထိ။ အာပေါဓာတုယာ သမ္ဘဝရူပံ၊ ဥပစယသန္တတီတိ ဇာတိရူပံ၊ ဇရတာအနိစ္စတာဒီဟိ ရောဂရူပံ ဂဟိတံ၊ အညံ ရောဂရူပံ နာမ နတ္ထီတိ၊ တသ္မာ အဋ္ဌဝီသတိဝိဓာနေဝ ရူပါနီတိ။
ဧဝံ သမောဓာနတော ဝေဒိတဗ္ဗာနီတိ။
သမုဋ္ဌာနန္တိ စတ္တာရိ ရူပသမုဋ္ဌာနာနိ ဥတုစိတ္တာဟာရကမ္မာနီတိ။
ကမ္မံ ¶ ဥတု စ စိတ္တဉ္စ၊ အာဟာရော ရူပဟေတုယော၊
ဧတေဟေဝ စ ရူပါနိ၊ ဇာယန္တိ န ပနညတော။
တသ္မာ ဧကသမုဋ္ဌာနာ၊ ဧကာဒသ ဘဝန္တိ ဟိ၊
အဋ္ဌိန္ဒြိယာနိ ဝတ္ထုဉ္စ၊ ဝိညတ္တိဒွယမေဝ စ။
အဋ္ဌိန္ဒြိယာနိ ဝတ္ထုဉ္စ၊ ဧကန္တေနေဝ ကမ္မဇာ၊
စိတ္တဇံယေဝ ဝိညတ္တိ-ဒွယံ ဝုတ္တံ မဟေသိနာ။
စိတ္တေန ဥတုနာ စေဝ၊ သဒ္ဒေါ ဒွီဟိ သမုဋ္ဌိတော၊
ဥတုအာဟာရစိတ္တေဟိ၊ လဟုတာဒိတ္တယံ ကတံ။
ဝဏ္ဏော ¶ ဂန္ဓော ရသော ဩဇာ၊
စတဿော စာပိ ဓာတုယော၊
သန္တတျုပစယာကာသာ၊
ဧကာဒသ စတုဗ္ဘဝါ။
ဧကာဒသေကတော ¶ ဇာတာ၊
ဒွိဇေကောဝ တိဇာ တယော၊
စတုဇေကာဒသက္ခာတာ၊
ဒွေ န ကေနစိ ဇာယရေ။
ကမ္မေန ဝီသတိ ရူပါ၊ သတ္တရသ တု စေတသာ၊
ဥတုနာ ဒသပဉ္စေဝ၊ စုဒ္ဒသာဟာရတော ပန။
ဆသဋ္ဌိ သဗ္ဗာနေတာနိ၊ သမုဋ္ဌာနဝိဘာဂတော၊
အဋ္ဌသဋ္ဌိ စ ဟောန္တေဝ၊ ဇရတာနိစ္စတာဟိ တေ။
ဇရတာနိစ္စတာ စေဝ၊ န ကေနစိ သမုဋ္ဌိတာ၊
ဇာတဿ ပါကဘေဒတ္တာ၊ ဇာယေယျုံ ယဒိ တာနိပိ။
ဧဝံ သန္တေ တု တေသမ္ပိ၊ ပါကဘေဒါ သိယုံ န ဟိ၊
ပါကော ပစ္စတိ ဘေဒေါ ဝါ၊ န စ ဘိဇ္ဇတိ နတ္ထိ တံ။
ဇာတဿ ¶ ပါကဘေဒတ္တာ၊ ဒွယမေတံ န ဇာယတိ၊
သိယာ ကတ္ထစိ ဗုဒ္ဓေတ္ထ၊ ‘‘ရူပဿုပစယော’’တိ ဟိ။
ဝစနေန ယထာ ‘‘ဇာတိ၊ ဇာယတီ’’တိ စ ဒီပိတံ၊
ပါကောပိ ပစ္စတေဝံ တု၊ ဘေဒေါပိ ပရိဘိဇ္ဇတု။
န စေဝ ဇာယတေ ဇာတိ၊ ဣတိ ဉေယျာ ဝိဘာဝိနာ၊
ဇာယမာနဿ ဓမ္မဿ၊ နိဗ္ဗတ္တီတိ ပကာသိတာ။
တတ္ထ ယထာ သိယာ ဇာတိ၊ ယေသံ ဓမ္မာနမေဝ သာ၊
တပ္ပစ္စယတ္တဝေါဟာရံ၊ အဘိနိဗ္ဗတ္တိသမ္မုတိံ။
လဘတေဝ တထာ တေသံ၊ ပါကဘေဒါ လဗ္ဘန္တိ တေ၊
တပ္ပစ္စယတ္တဝေါဟာရံ၊ အဘိနိဗ္ဗတ္တိသမ္မုတိံ။
ဧဝံ ဣဒံ ဒွယဉ္စာပိ၊ ဟောတိ ကမ္မာဒိသမ္ဘဝံ၊
န ပါကဘေဒါ ဝေါဟာရံ၊ တံ လဘန္တိ ကဒါစိပိ။
ကသ္မာ ¶ ဟိ ဇနကာနံ တု၊ ပစ္စယာနမဘာဝတော၊
အာနုဘာဝခဏုပ္ပာဒေ၊ ဇာတိယာ ပန လဗ္ဘတိ။
တပ္ပစ္စယတ္တဝေါဟာရံ၊ အဘိနိဗ္ဗတ္တိသမ္မုတိံ၊
တသ္မာ လဘတိ ဇာတိ စ၊ လဘတီ နေတရဒွယံ။
ဇိယျတီတိ န ဝတ္တဗ္ဗံ၊ တံ ဒွယံ ဘိဇ္ဇတီတိ ဝါ၊
အာနုဘာဝခဏေ တဿ၊ ပစ္စယာနမဘာဝတော။
‘‘အနိစ္စံ သင်္ခတဉ္စေတံ၊ ဇရာမရဏ’’မိစ္စပိ၊
ဝုတ္တတ္တာ ဇာယတိစ္စေတံ၊ အထ မညသိ စေ တုဝံ။
ဧဝမ္ပိ စ န ဝတ္တဗ္ဗံ၊ သာ ဟိ ပရိယာယဒေသနာ၊
အနိစ္စာနံ တု ဓမ္မာနံ၊ ဇရာမရဏတော တထာ။
အနိစ္စံ ¶ သင်္ခတဉ္စာတိ၊ ဝုတ္တံ ဝိညတ္တိယော ဝိယ၊
ယဒိ ဧဝံ တယမေတံ၊ အဇာတတ္တာ စ သဗ္ဗထာ။
နတ္ထီတိ ¶ စေ ခံပုပ္ဖံဝ၊ နိစ္စံ ဝါသင်္ခတံ ဝိယ၊
နောဘယံ ပနိဒံ ကသ္မာ၊ နိဿယာယတ္တဝုတ္တိတော။
ဘာဝေ ပထဝိယာဒီနံ၊ နိဿယာနံ တု ဘာဝတော၊
တသ္မာ ဟိ စ ခံပုပ္ဖံဝ၊ န နတ္ထိ ပန တံ တယံ။
ယသ္မာ ပထဝိယာဒီနံ၊ အဘာဝေန စ လဗ္ဘတိ၊
တသ္မာ န ပန နိစ္စံ ဝါ၊ နိဗ္ဗာနံ ဝိယ တံ တယံ။
နိပ္ဖန္နန္တိ ဧတ္ထ စတ္တာရော မဟာဘူတာ စက္ခုသောတဃာနဇိဝှာကာယရူပသဒ္ဒဂန္ဓရသဣတ္ထိပုရိသဇီဝိတိန္ဒြိယကဗဠီကာရာဟာရဟဒယဝတ္ထူတိ အဋ္ဌာရသ ရူပါနိ နိပ္ဖန္နာနိ နာမ။ သေသာနိ ဒသ အနိပ္ဖန္နာနိ နာမ။
အဋ္ဌာရသ နိပ္ဖန္နာနိ၊ အနိပ္ဖန္နာဝသေသကာ၊
ယဒိ ဟောန္တိ အနိပ္ဖန္နာ၊ ဘဝေယျုံ တေ အသင်္ခတာ။
တေသမေဝ ¶ စ ရူပါနံ၊ ဝိကာရတ္တာ အသင်္ခတာ၊
ကထံ နာမ ဘဝေယျုံ တေ၊ နိပ္ဖန္နာ စေဝ သင်္ခတာ။
ဧဝံ နိပ္ဖန္နသင်္ခတော ဝေဒိတဗ္ဗော။
စောဒနာပရိဟာရန္တိ ဧတ္ထ –
ဣတ္ထိဘာဝေါ ပုမတ္တဉ္စ၊ ဇီဝိတံ သမ္ဘဝေါပိ စ၊
တထာ ကာယပ္ပသာဒေါတိ၊ သဗ္ဗဋ္ဌာနာတိ ဝဏ္ဏိတာ။
ဧဝံ သန္တေ တု ဓမ္မာနံ၊ ဟောတိ သင်္ကရဒေါသတာ၊
စက္ခုကာယပသာဒါနံ၊ ဧကတ္တံ ဥပပဇ္ဇတိ။
အညံ ပန စ အညသ္မိံ၊ န စတ္ထိ ပရမတ္ထတော၊
တသ္မာ ကာယိန္ဒြိယံ စက္ခု-ပသာဒေန န သင်္ကရံ။
အညမညာဝိနိဗ္ဘောဂဝသေန ¶ တု ပဝတ္တိတော၊
တေသံ ဌာနန္တရံ ဝတ္တုံ၊ န သက္ကာ သမယညုနာ။
ယာဝတာ အနုပါဒိန္နသန္တာနံ အတ္ထိ တတ္ထ သော၊
အတ္ထိ ကာယပသာဒေါတိ၊ တသ္မာ ဧဝမုဒီရိတံ။
လက္ခဏာဒိဝသေနာပိ၊ နာနတ္တံ သမုပါဂတံ၊
ဓဇာနံ ပဉ္စဝဏ္ဏာနံ၊ ဆာယာ ဥပမတံ ဂတာ။
တသ္မာ ¶ ဟိ ပန ဓမ္မာနံ၊ အညမညံ ဝိမိဿတာ၊
န ဟောတေဝါတိ ဝိညေယျာ၊ ဝိညုနာ သမယညုနာ။
ဧဝံ နိပ္ဖန္နာနိပ္ဖန္နဘာဝေါ၊ စောဒနာပရိဟာရော စ ဝေဒိတဗ္ဗော။
နယမေကဝိဓာဒိကန္တိ –
လောကိကတ္တာ ¶ နဟေတုတ္တာ၊ သင်္ခတတ္တာ စ သာသဝါ၊
သဗ္ဗမေကဝိဓံ ရူပံ၊ ပစ္စယာယတ္တဝုတ္တိတော။
အဇ္ဈတ္တိကဗဟိဒ္ဓါ စ၊ ဣန္ဒြိယာနိန္ဒြိယာပိ စ၊
သုခုမောဠာရိကာ စေဝ၊ ဥပါဒိန္နာဒိတော ဒွိဓာ။
စက္ခုအာယတနာဒီနိ၊ ပဉ္စ အဇ္ဈတ္တိကာနိ တု၊
တေဝီသတိဝိဓံ သေသံ၊ ဗာဟိရန္တိ ပဝုစ္စတိ။
စက္ခုသောတိန္ဒြိယာဒီနိ၊ ဣန္ဒြိယာနိ ပနဋ္ဌ တု၊
သေသဉ္စ တု ဝီသံ ရူပံ၊ အနိန္ဒြိယမုဒီရိတံ။
စက္ခုအာယတနာဒီနိ၊ နဝ ဖောဋ္ဌဗ္ဗမေဝ စ၊
တံ ဗာရသဝိဓံ ရူပံ၊ ဩဠာရိကမုဒီရိတံ။
သေသာနိ ပန ရူပါနိ၊ သုခုမာနိ တု သောဠသ၊
ကမ္မဇံ တု ဥပါဒိန္နံ၊ အနုပါဒိန္နမညထာ။
ဧဝဉ္စ ဒုဝိဓံ ဟောတိ။
ပုန ¶ သနိဒဿနသပ္ပဋိဃအနိဒဿနသပ္ပဋိဃ- အနိဒဿနအပ္ပဋိဃဘေဒတော စ၊ ကမ္မဇာကမ္မဇနေဝကမ္မဇာနာကမ္မဇဘေဒတော စ တိဝိဓံ။ တတ္ထ ရူပါယတနံ သနိဒဿနသပ္ပဋိဃံ၊ ဧကာဒသဝိဓံ သေသောဠာရိကရူပံ အနိဒဿနသပ္ပဋိဃံ၊ သေသံ သောဠသဝိဓံ သုခုမရူပံ အနိဒဿနအပ္ပဋိဃံ။ ကမ္မတော ဇာတံ ကမ္မဇံ၊ အဋ္ဌိန္ဒြိယာနိ၊ ဝတ္ထု စ ကမ္မဇံ၊ တဒညပ္ပစ္စယာ ဇာတံ အကမ္မဇံ၊ နကုတောစိ ဇာတံ နေဝကမ္မဇာနာကမ္မဇံ ဇရတာ အနိစ္စတာ စ။ ဧဝံ တိဝိဓံ ဟောတိ။
ပုန ဒိဋ္ဌသုတမုတဝိညာတဝသေန စ၊ ဒွါရဉ္စေဝ ဝတ္ထု စ၊ ဒွါရမေဝ ဟုတွာ န ဝတ္ထု စ၊ ဝတ္ထုမေဝ ဟုတွာ န ဒွါရဉ္စ၊ နေဝ ဒွါရဉ္စ န ဝတ္ထု စာတိ ဧဝံ ဘေဒတော စ၊ ဒွါရဉ္စေဝိန္ဒြိယဉ္စ၊ ဒွါရံယေဝ ဟုတွာ နေဝိန္ဒြိယဉ္စ၊ ဣန္ဒြိယမေဝ ဟုတွာ န ဒွါရဉ္စ၊ နေဝ ဒွါရဉ္စ နေဝိန္ဒြိယဉ္စာတိ ဧဝံ ¶ ဘေဒတော စ၊ ဝတ္ထု စေဝ ဣန္ဒြိယဉ္စ၊ ဣန္ဒြိယမေဝ ဟုတွာ န ဝတ္ထု စ၊ ဝတ္ထုမေဝ ဟုတွာ နေဝိန္ဒြိယဉ္စ၊ နေဝိန္ဒြိယံ န ဝတ္ထု စေတိ ဧဝံ ဘေဒတော စ စတုဗ္ဗိဓံ။
တတ္ထ ¶ ဒိဋ္ဌံ နာမ ရူပါယတနံ၊ သုတံ နာမ သဒ္ဒါယတနံ၊ မုတံ နာမ ဂန္ဓရသဖောဋ္ဌဗ္ဗာယတနတ္တယံ၊ ဝိညာတံ နာမ အဝသေသစက္ခာယတနာဒိပဉ္စကံ၊ သောဠသဝိဓံ သုခုမရူပဉ္စ။ စက္ခာယတနာဒိပဉ္စကံ ဒွါရဉ္စေဝ ဝတ္ထု စ၊ ဝိညတ္တိဒွယံ ဒွါရမေဝ ဟောတိ၊ န ဝတ္ထု၊ ဟဒယဝတ္ထု ဝတ္ထုမေဝ ဟောတိ၊ န ဒွါရံ၊ သေသံ သဗ္ဗံ ရူပံ နေဝ ဒွါရံ န ဝတ္ထု စ။ တတိယစတုက္ကေ ဣန္ဒြိယမေဝ ဟုတွာ န ဒွါရန္တိ ဣတ္ထိန္ဒြိယပုရိသိန္ဒြိယဇီဝိတိန္ဒြိယာနိ။ ဣမာနိ ဟိ ဣန္ဒြိယာနေဝ ဟောန္တိ၊ န ဒွါရာနိ၊ သေသမနန္တရစတုက္ကေ ဝုတ္တနယေနေဝ ဝေဒိတဗ္ဗံ။ စတုတ္ထစတုက္ကေ တတိယပဒံ ဟဒယဝတ္ထုံ သန္ဓာယ ဝုတ္တံ၊ သေသံ ဝုတ္တနယမေဝ။ ဧဝံ စတုဗ္ဗိဓံ ဟောတီတိ ဝေဒိတဗ္ဗံ။
ပုန ဧကဇဒွိဇတိဇစတုဇနကုတောစိဇာတဘေဒတော၊ ဒွါရိန္ဒြိယံ ဝတ္ထု စ၊ ဒွါရမေဝ ဟုတွာ နေဝိန္ဒြိယံ န ဝတ္ထု စ၊ ဝတ္ထုမေဝ ဟုတွာ နေဝိန္ဒြိယံ န ဒွါရဉ္စ၊ ဣန္ဒြိယမေဝ ဟုတွာ န ဝတ္ထု န ဒွါရဉ္စ၊ နေဝိန္ဒြိယံ ¶ န ဝတ္ထု န ဒွါရဉ္စာတိ ဧဝံ ပဘေဒတော ပဉ္စဝိဓံ။
တတ္ထ –
အဋ္ဌိန္ဒြိယာနိ ဝတ္ထုဉ္စ၊ ဝိညတ္တိဒွယမေဝ စ၊
ဧကာဒသဝိဓံ ရူပံ၊ ဧကဇန္တိ ပဝုစ္စတိ။
သဒ္ဒေါ ဧကော ဒွိဇော နာမ၊ လဟုတာဒိတ္တယံ တိဇံ၊
ဧကာဒသဝိဓံ သေသံ၊ စတုဇန္တိ ပကာသိတံ။
ဇရတာနိစ္စတာ စေဝ၊ နကုတောစိ ဘဝေ ပန၊
စက္ခာဒိပဉ္စကံ ဒွါရံ၊ ဣန္ဒြိယံ ဝတ္ထုမေဝ စ။
ဝိညတ္တီနံ ဒွယံ ဒွါရံ၊ နေဝိန္ဒြိယံ န ဝတ္ထု စ၊
ဟဒယဝတ္ထု ဝတ္ထူဝ၊ န ဒွါရံ နေဝိန္ဒြိယံ ပန။
ဣတ္ထိပုရိသဇီဝိတိန္ဒြိယာနိ ¶ ဣန္ဒြိယမေဝ န ဝတ္ထု န ဒွါရဉ္စ၊ သေသံ ပန ရူပံ နေဝိန္ဒြိယံ န ဝတ္ထု န ဒွါရန္တိ။ ဧဝံ ပဉ္စဝိဓန္တိ ဝေဒိတဗ္ဗံ။
ပုန ကမ္မဇစိတ္တဇဥတုစိတ္တဇဥတုစိတ္တာဟာရဇစတုဇနကုတောစိဇာတဘေဒတော၊ စက္ခုဝိညေယျသောတဃာနဇိဝှာကာယမနောဝိညေယျဝသေန ဆဗ္ဗိဓံ။
တတ္ထ အဋ္ဌိန္ဒြိယာနိ ဝတ္ထု စ ကမ္မဇမေဝ၊ ဝိညတ္တိဒွယံ စိတ္တဇမေဝ၊ သဒ္ဒေါ ဥတုစိတ္တဇော၊ လဟုတာဒိတ္တယံ ဥတုစိတ္တာဟာရဇမေဝ၊ သေသံ ဧကာဒသဝိဓံ စတုဇံ နာမ၊ ဇရတာ အနိစ္စတာ နကုတောစိဇာတံ နာမ။ ဒုတိယဆက္ကေ စက္ခုဝိညေယျံ ¶ နာမ စက္ခုဝိညာဏေန ဝိညေယျံ ရူပါယတနံ…ပေ… ကာယဝိညေယျံ နာမ ဖောဋ္ဌဗ္ဗာယတနံ၊ မနောဝိညေယျံ နာမ သေသာ ပဉ္စ ဩဠာရိကာ စ သောဠသ သုခုမရူပါနိ စာတိ ဧကဝီသတိဝိဓံ ဟောတိ။ ဧဝံ ဆဗ္ဗိဓံ ဟောတိ။
ပုန ဆဝတ္ထုအဝတ္ထုဘေဒတော စ၊ စက္ခုဝိညေယျံ သောတဃာနဇိဝှာကာယဝိညေယျံ မနောဓာတုဝိညေယျံ မနောဝိညာဏဓာတုဝိညေယျန္တိ သတ္တဝိဓံ ဟောတိ။
တတ္ထ ¶ စက္ခာဒိပဉ္စဝတ္ထူနိ ဟဒယဝတ္ထုနာ သဒ္ဓိံ ဆ ဝတ္ထူနိ၊ သေသံ ဗာဝီသတိဝိဓံ ရူပံ အဝတ္ထု နာမ၊ ဒုတိယသတ္တကမုတ္တာနမေဝ။ ဧဝံ သတ္တဝိဓံ ဟောတိ။
ပုန သတ္တဒွါရာဒွါရဘေဒတော အဋ္ဌဝိဓံ။ တတ္ထ စက္ခုဒွါရာဒီနိ ပဉ္စ ကာယဝိညတ္တိဝစီဝိညတ္တိဒွါရေဟိ သဒ္ဓိံ သတ္တ ဒွါရာနိ၊ သေသမဒွါရန္တိ ဧဝံ အဋ္ဌဝိဓံ ဟောတိ။
ပုန အဋ္ဌိန္ဒြိယာနိန္ဒြိယဘေဒတော ပန နဝဝိဓံ။
ပုန နဝကမ္မဇာကမ္မဇဘေဒတော ဒသဝိဓံ။
ပုန အာယတနဘေဒတော ဧကာဒသဝိဓံ။
ဘဝေသု ရူပကလာပပဝတ္တိဘေဒတော ဗဟုဝိဓန္တိ ဝေဒိတဗ္ဗံ။
ဣတော ပရံ ပဝက္ခာမိ၊ ကာမရူပဘဝဒွယေ၊
ဥပ္ပတ္တိံ ပန ရူပါနံ၊ ပဋိသန္ဓိပဝတ္တိသု။
ဘုမ္မဝဇ္ဇေသု ¶ ဒေဝေသု၊ နိရယေ နိဇ္ဈာမတဏှိကေ၊
ယောနိယော ပုရိမာ တိဿော၊ န သန္တီတိ ဝိနိဒ္ဒိသေ။
သေသေ ဂတိတ္တယေ ဘုမ္မ-ဒေဝေသုပိ စ ယောနိယော၊
စတဿော စ ဘဝန္တီတိ၊ ဝေဒိတဗ္ဗာ ဝိဘာဝိနာ။
ဂဗ္ဘသေယျကသတ္တဿ၊ ပဋိသန္ဓိက္ခဏေ ပန၊
တိံသ ရူပါနိ ဇာယန္တေ၊ သဘာဝဿေဝ ဒေဟိနော။
အဘာဝဂဗ္ဘသေယျာနံ၊ အဏ္ဍဇာနဉ္စ ဝီသတိ၊
ဘဝန္တိ ပန ရူပါနိ၊ ကာယဝတ္ထုဝသေန တု။
ဂဟိတာဂဟဏေနေတ္ထ၊ ဧကာဒသ ဘဝန္တိ တေ၊
ဧသေဝ စ နယော ဉေယျော၊ သဗ္ဗေသု ဒသကေသုပိ။
ဇီဝိတေန ယဒါ သဒ္ဓိံ၊ ဇာတေ သုဒ္ဓကမဋ္ဌကံ၊
ဇီဝိတနဝကံ နာမ၊ ဟောတီတိ သမုဒီရိတံ။
ဇီဝိတနဝကံ ¶ ကာယပသာဒေနေကတော သိယာ၊
တံ ကာယဒသကံ နာမ၊ ဟောတီတိ ပရိယာပုဋံ။
ဧသေဝ စ နယော ဉေယျော၊ သဒ္ဓိံ ဘာဝေန ဝတ္ထုနာ၊
စက္ခာဒီဟိ စ ယောဇေတွာ၊ ဒသကာ သတ္တ ဝိညုနာ။
ဩပပါတိကသတ္တာနံ၊ မနုဿေသူပပတ္တိယံ၊
ကာမာဝစရဒေဝါနံ၊ နိစ္စံ ရူပါနိ သတ္တတိ။
စက္ခု ¶ သောတဉ္စ ဃာနဉ္စ၊ ဇိဝှာ ကာယော စ ဝတ္ထု စ၊
ဘာဝေါ စာတိ ဟိ သတ္တန္နံ၊ ဒသကာနံ ဝသာ ပန။
ဗြဟ္မာနံ ရူပိနံ စက္ခု-သောတဝတ္ထုဝသာ ပန၊
ဒသကာနိ စ တီဏေဝ၊ နဝကံ ဇီဝိတဿ စ။
စတုန္နံ တု ကလာပါနံ၊ ဝသေန ပန ရူပိနံ၊
စတ္တာလီသေဝ ရူပါနိ၊ ဧကူနာနိ ဘဝန္တိ ဟိ။
ဇီဝိတနဝကေနေဝ ¶ ၊ အသညုပ္ပတ္တိ ဒီပိတာ၊
ဇစ္စန္ဓဗဓိရာဃာန-ရဟိတေ တု နပုံသကေ။
ဝတ္ထုနော ကာယဇိဝှာနံ၊ ဝသာ တိံသာဝကံသတော၊
ဥက္ကံသဿာဝကံသဿ၊ အန္တရေ အနုရူပတော။
ပရိပုဏ္ဏာနံ ရူပါနံ၊ ဝသေန ပန ပါဏိနံ၊
ရူပါနံ တု သမုပ္ပတ္တိ၊ ဝေဒိတဗ္ဗာ ဝိဘာဝိနာ။
သတ္တဝီသတိ ရူပါနိ၊ ကာမာဝစရဒေဟိနော၊
အပ္ပဝတ္တနတော ဟောန္တိ၊ ဒွိန္နံ ဘာဝါနမေကတော။
ဃာနံ ဇိဝှာ စ ကာယော စ၊ တထာ ဘာဝဒွယမ္ပိ စ၊
ဗြဟ္မာနံ ပန ရူပီနံ၊ ပဉ္စ ရူပါ န ဝိဇ္ဇရေ။
စတုသန္တတိ ကာမသ္မိံ၊ ရူပေ ဟောန္တိ တိသန္တတိ၊
ဒွိသန္တတိ အသညေသု၊ ဗဟိဒ္ဓါ ဧကသန္တတိ။
ရူပံ ¶ နိဗ္ဗတ္တမာနံ တု၊ သဗ္ဗေသံ ပန ပါဏိနံ၊
ပဌမံ ကမ္မတောယေဝ၊ နိဗ္ဗတ္တတိ န သံသယော။
ဂဗ္ဘသေယျကသတ္တာနံ၊ ပဋိသန္ဓိက္ခဏေ ပန၊
တဉ္စ ခေါ သန္ဓိစိတ္တဿ၊ ဥပ္ပာဒေယေဝ ဇာယရေ။
ယထေဝ တဿ ဥပ္ပာဒေ၊ တိံသ ရူပါနိ ဇာယရေ၊
တထေဝ ဌိတိဘင်္ဂေသု၊ တိံသ တိံသေဝ ဇာယရေ။
သဗ္ဗာနေတာနိ ရူပါနိ၊ ရူပက္ခန္ဓောတိ သညိတော၊
အနိစ္စော အဒ္ဓုဝေါနတ္တာ၊ ဒုက္ခက္ခန္ဓောဝ ကေဝလော။
ရောဂတော ဂဏ္ဍတော ရူပံ၊ ပရတော စ ပလောကတော၊
ဒိသွာန ဒုက္ခတော ရူပံ၊ ရူပေ ဆန္ဒံ ဝိရာဇယေ။
ဂန္တုံ ပနိစ္ဆေ ပိဋကေဘိဓမ္မေ၊
ယော ဓမ္မသေနာပတိနာ သမတ္တံ၊
ဟိတတ္ထိနာ ¶ တေန စ ဘိက္ခုနာယံ၊
သက္ကစ္စ သမ္မာ ပန သိက္ခိတဗ္ဗော။
ဣတိ အဘိဓမ္မာဝတာရေ ရူပဝိဘာဂေါ နာမ
ဒသမော ပရိစ္ဆေဒေါ။