📜

၁၂။ ဒွါဒသမော ပရိစ္ဆေဒေါ

ပညတ္တိနိဒ္ဒေသော

ဧတ္ထာဟ – ‘‘ကိံ ဧတ္တကမေဝ ဉေယျံ၊ ဥဒါဟု အညမ္ပိ အတ္ထီ’’တိ? အတ္ထိ ပညတ္တိ နာမာတိ။ သာ ပနေသာ ပညပေတဗ္ဗတော၊ ပညာပနတော စ ‘‘ပညတ္တီ’’တိ ဝုစ္စတိ။ တေနေဝါဟ – ‘‘ယာ တေသံ တေသံ ဓမ္မာနံ သင်္ခါ သမညာ ပညတ္တိ ဝေါဟာရော နာမံ နာမကမ္မံ နာမဓေယျံ နိရုတ္တိ ဗျဉ္ဇနံ အဘိလာပေါ’’တိ။ တတ္ထ သင်္ခါယတီတိ သင်္ခါ၊ ကထီယတီတိ အတ္ထော။ ကိန္တိ ကထီယတိ? ‘‘အဟ’’န္တိ ‘‘မမ’’န္တိ ‘‘ပရော’’တိ ‘‘ပရဿာ’’တိ ‘‘မဉ္စော’’တိ ‘‘ပီဌ’’န္တိ အနေကေဟိ အာကာရေဟိ ကထီယတီတိ သင်္ခါ။ သမညာယတီတိ သမညာ။ ပညာပီယတီတိ ပညတ္တိ။ ဝေါဟရီယတီတိ ဝေါဟာရော။ ကိန္တိ ဝေါဟရီယတိ? ‘‘အဟ’’န္တိ ‘‘မမ’’န္တိ ‘‘ပရော’’တိ ‘‘ပရဿာ’’တိ ‘‘မဉ္စော’’တိ ‘‘ပီဌ’’န္တိ။ ဧဝံ တာဝ ပညပေတဗ္ဗတော ပညတ္တီတိ ဝုတ္တာ။ ‘‘အဟ’’န္တိ ဟိ ရူပါဒယော ဓမ္မေ ဥပါဒါယ ပဋိစ္စ ကာရဏံ ကတွာ ယထာ တေ ရူပါဒယော ဓမ္မာ ဥပ္ပာဒဝယဝန္တော၊ န ဧဝံဝိဓာ၊ ကေဝလံ လောကသင်္ကေတေန သိဒ္ဓါ ယာ အယံ ‘‘အဟ’’န္တိ ကထီယတိ စေဝ ပညာပီယတိ စ၊ ဧသာ ပညတ္တီတိ အတ္ထော။

ဣဒါနိ ပညာပနတော ပညတ္တိံ ပကာသေတုံ ‘‘နာမံ နာမကမ္မ’’န္တိအာဒိမာဟ။ တတ္ထ နာမန္တိ တံ တံ ဓမ္မံ ‘‘ဧသ ဣတ္ထန္နာမော နာမာ’’တိ ပညပေတိ၊ တသ္မာ တံ ပညတ္တီတိ ပဝုစ္စတိ။ နာမကမ္မန္တိအာဒီနိ တဿာ ဧဝ ဝေဝစနာနိ။ အယံ ပညာပနတော ပညတ္တိ နာမ။

သာ ပနေသာ တဇ္ဇာပညတ္တိ ဥပါဒါပညတ္တိ ဥပနိဓာပညတ္တီတိ တိဝိဓာ ဟောတိ။ တတ္ထ တဇ္ဇာပညတ္တိ နာမ စက္ခုသောတရူပသဒ္ဒပထဝီတေဇောဝါယောတိအာဒိနယပ္ပဝတ္တာ။ ဥပါဒါပညတ္တိ ပန သမူဟာသမူဟဝသေန ဒုဝိဓာ ဟောတိ။ တတ္ထ သမူဟပညတ္တိ နာမ ရူပါရူပဓမ္မေသု ဧကဿ ဝါ ဗဟူနံ ဝါ နာမံ ဂဟေတွာ သမူဟမေဝေါပါဒါယ ဝုစ္စတိ။ ကထံ? အစ္ဆတရစ္ဆဃဋပဋာဒိပ္ပဘေဒါ။ အယံ သမူဟပညတ္တိ နာမ။ အသမူဟပညတ္တိ ပန ဒိသာကာသကာလနိမိတ္တာဘာဝနိရောဓာဒိဘေဒါ။

ယဒါ ပန သာ ဝိဇ္ဇမာနံ ပရမတ္ထံ ဇောတယတိ၊ တဒါ ‘‘ဝိဇ္ဇမာနပညတ္တီ’’တိ ပဝုစ္စတိ။ ယဒါ အဝိဇ္ဇမာနံ သမူဟာသမူဟဘေဒံ နာမမတ္တံ ဇောတယတိ၊ တဒါ ‘‘အဝိဇ္ဇမာနပညတ္တီ’’တိ ပဝုစ္စတိ ။ ဒုဝိဓာပိ ပနေသာ သောတဒွါရဇဝနာနန္တရံ ဂဟိတပုဗ္ဗသင်္ကေတမနောဒွါရဇဝနဝိညာဏေန ဝိညာယတိ။ ယာယ ဂဟိတပုဗ္ဗသင်္ကေတေန မနောဒွါရဇဝနဝိညာဏေန ပညာပီယတိ။ ယံ သန္ဓာယ ‘‘ဝိဇ္ဇမာနပညတ္တိ၊ အဝိဇ္ဇမာနပညတ္တိ၊ ဝိဇ္ဇမာနေန အဝိဇ္ဇမာနပညတ္တိ၊ အဝိဇ္ဇမာနေန ဝိဇ္ဇမာနပညတ္တိ၊ ဝိဇ္ဇမာနေန ဝိဇ္ဇမာနပညတ္တိ၊ အဝိဇ္ဇမာနေန အဝိဇ္ဇမာနပညတ္တီ’’တိ ဆက္ကနယော ဝုတ္တော။ တတ္ထ ပရမတ္ထတော ဝိဇ္ဇမာနာနံ ရူပါဒီနံ ပညာပနာ ဝိဇ္ဇမာနပညတ္တိ။ တထာ အဝိဇ္ဇမာနာနမိတ္ထိပုရိသာဒီနံ ပညာပနာ အဝိဇ္ဇမာနပညတ္တိ။ ဌပေတွာ ပန ဝစနတ္ထံ ကေနစိ အာကာရေန အနုပလဗ္ဘမာနာနံ ပဉ္စမသစ္စာဒီနံ၊ တိတ္ထိယပရိကပ္ပိတာနံ ဝါ ပကတိပုရိသာဒီနံ ပညာပနာပိ အဝိဇ္ဇမာနပညတ္တိယေဝ။ ‘‘တေဝိဇ္ဇော၊ ဆဠဘိညော’’တိ ဧဝမာဒိနယပ္ပဝတ္တာ ဝိဇ္ဇမာနေန အဝိဇ္ဇမာနပညတ္တိ။ ‘‘ဣတ္ထိသဒ္ဒေါ၊ ပုရိသသဒ္ဒေါ’’တိ ဧဝမာဒိကာ အဝိဇ္ဇမာနေန ဝိဇ္ဇမာနပညတ္တိ။ ‘‘စက္ခုဝိညာဏံ၊ သောတဝိညာဏ’’န္တိ ဧဝမာဒိကာ ဝိဇ္ဇမာနေန ဝိဇ္ဇမာနပညတ္တိ။ ‘‘ခတ္တိယကုမာရော၊ ဗြာဟ္မဏကုမာရော၊ ဘိက္ခုကုမာရော’’တိ ဧဝမာဒိကာ အဝိဇ္ဇမာနေန အဝိဇ္ဇမာနပညတ္တီတိ ဧဝံ ဝုတ္တာ ဆ ပညတ္တိယောပိ ဧတ္ထေဝ သင်္ဂဟံ ဂစ္ဆန္တိ။ အယံ ဥပါဒါပညတ္တိ နာမ။

ဥပနိဓာပညတ္တိပိ ဧတိဿာ ဧဝ ပဘေဒါ၊ သာ ပန ‘‘ဒီဃံ ဥပနိဓာယ ရဿော၊ ရဿံ ဥပနိဓာယ ဒီဃော’’တိအာဒိနယပ္ပဝတ္တာ ‘‘ကပဏံ မာနုသကံ ရဇ္ဇံ ဒိဗ္ဗသုခံ ဥပနိဓာယာ’’တိ ဧဝမာဒိကာ စ၊ တသ္မာ ပညပေတဗ္ဗတော စ ပညာပနတော စ ပညတ္တီတိ ဝေဒိတဗ္ဗာ။ သမညာ သမတ္တာ။

၇၇၈။

ပရမတ္ထတော စ ပညတ္တိ၊ တတိယာ ကောဋိ န ဝိဇ္ဇတိ၊

ဒွီသု ဌာနေသု ကုသလော၊ ပရဝါဒေသု န ကမ္ပတိ။

ဣတိ အဘိဓမ္မာဝတာရေ ပညတ္တိနိဒ္ဒေသော နာမ

ဒွါဒသမော ပရိစ္ဆေဒေါ။