📜
၁၄။ စုဒ္ဒသမော ပရိစ္ဆေဒေါ
ရူပါဝစရသမာဓိဘာဝနာနိဒ္ဒေသော
မာနယဉ္စ သုဂတံ သုခါနယံ၊
ဗျာကရောမိ ပရမံ ဣတော ပရံ၊
တံ သုဏာထ မဓုရတ္ထဝဏ္ဏနံ။
ဥတ္တရံ တု မနုဿာနံ၊ ဓမ္မတော ဉာဏဒဿနံ၊
ပတ္တုကာမေန ကာတဗ္ဗံ၊ အာဒိတော သီလသောဓနံ။
သင်္ကဿရသမာစာရေ၊ ဒုဿီလေ သီလဝဇ္ဇိတေ၊
နတ္ထိ ဈာနံ ကုတော မဂ္ဂေါ၊ တသ္မာ သီလံ ဝိသောဓယေ။
သီလံ စာရိတ္တဝါရိတ္တဝသေန ဒုဝိဓံ မတံ၊
တံ ပနာစ္ဆိဒ္ဒမက္ခဏ္ဍမကမ္မာသမနိန္ဒိတံ။
ကတ္တဗ္ဗံ အတ္ထကာမေန၊ ဝိဝေကသုခမိစ္ဆတာ၊
သီလဉ္စ နာမ ဘိက္ခူနံ၊ အလင်္ကာရော အနုတ္တရော။
ရတနံ သရဏံ ခေမံ၊ တာဏံ လေဏံ ပရာယဏံ၊
စိန္တာမဏိ ပဏီတော စ၊ သီလံ ယာနမနုတ္တရံ။
သီတလံ ¶ သလိလံ သီလံ၊ ကိလေသမလဓောဝနံ၊
ဂုဏာနံ မူလဘူတဉ္စ၊ ဒေါသာနံ ဗလဃာတိ စ။
တိဒိဝါရောဟဏဉ္စေတံ၊ သောပါနံ ပရမုတ္တမံ၊
မဂ္ဂေါ ခေမော စ နိဗ္ဗာနနဂရဿ ပဝေသနေ။
တသ္မာ သုပရိသုဒ္ဓံ တံ၊ သီလံ ဒုဝိဓလက္ခဏံ၊
ကတ္တဗ္ဗံ အတ္ထကာမေန၊ ပိယသီလေန ဘိက္ခုနာ။
ကာတဗ္ဗော ပန သီလသ္မိံ၊ ပရိသုဒ္ဓေ ဌိတေနိဓ၊
ပလိဗောဓဿုပစ္ဆေဒေါ၊ ပလိဗောဓာ ဒသာဟု စ။
‘‘အာဝါသော ¶ စ ကုလံ လာဘော၊
ဂဏော ကမ္မဉ္စ ပဉ္စမံ၊
အဒ္ဓါနံ ဉာတိ အာဗာဓော၊
ဂန္ထော ဣဒ္ဓီတိ တေ ဒသာ’’တိ။
ပလိဗောဓဿုပစ္ဆေဒံ၊ ကတွာ ဒသဝိဓဿပိ၊
ဥပသင်္ကမိတဗ္ဗော သော၊ ကမ္မဋ္ဌာနဿ ဒါယကော။
ပိယော ¶ ဂရု ဘာဝနီယော၊ ဝတ္တာ စ ဝစနက္ခမော၊
ဂမ္ဘီရဉ္စ ကထံ ကတ္တာ၊ နော စဋ္ဌာနေ နိယောဇကော။
ဧဝမာဒိဂုဏောပေတမုပဂန္တွာ ဟိတေသိနံ၊
ကလျာဏမိတ္တံ ကာလေန၊ ကမ္မဋ္ဌာနဿ ဒါယကံ။
ကမ္မဋ္ဌာနံ ဂဟေတဗ္ဗံ၊ ဝတ္တံ ကတွာ ပနဿ တု၊
တေနာပိ စရိတံ ဉတွာ၊ ဒါတဗ္ဗံ တဿ ဘိက္ခုနော။
စရိတံ ပနိဒံ ရာဂဒေါသမောဟဝသေန စ၊
သဒ္ဓါဗုဒ္ဓိဝိတက္ကာနံ၊ ဝသေန ဆဗ္ဗိဓံ မတံ။
ဝေါမိဿကနယာ တေသံ၊ စတုသဋ္ဌိ ဘဝန္တိ တေ၊
တေဟိ အတ္ထော န စတ္ထီတိ၊ န မယာ ဣဓ ဒဿိတာ။
အသုဘာ ¶ စ ဒသေဝေတ္ထ၊ တထာ ကာယဂတာသတိ၊
ဧကာဒသ ဣမေ ရာဂ-စရိတဿာနုကူလတာ။
စတဿော အပ္ပမညာယော၊ သဝဏ္ဏကသိဏာ ဣမေ၊
အဋ္ဌေဝ စ သဒါ ဒေါသ-စရိတဿာနုကူလတာ။
တံ မောဟစရိတဿေတ္ထ၊ ဝိတက္ကစရိတဿ စ၊
အနုကူလန္တိ နိဒ္ဒိဋ္ဌံ၊ အာနာပါနံ ပနေကကံ။
ပုရိမာနုဿတိဆက္ကံ၊ သဒ္ဓါစရိတဒေဟိနော၊
မရဏူပသမာယုတ္တာ၊ သတိမာဟာရနိဿိတာ။
သညာ ¶ ဓာတုဝဝတ္ထာနံ၊ ဗုဒ္ဓိပ္ပကတိဇန္တုနော၊
ဣမေ ပန စ စတ္တာရော၊ အနုကူလာတိ ဒီပိတာ။
စတ္တာရောပိ စ အာရုပ္ပာ၊ သေသာနိ ကသိဏာနိ စ၊
အနုကူလာ ဣမေ သဗ္ဗ-စရိတာနန္တိ ဝဏ္ဏိတာ။
ဣဒံ သဗ္ဗံ ပနေကန္တ-ဝိပစ္စနီကဘာဝတော၊
အတိသပ္ပာယတော ဝုတ္တ-မိတိ ဉေယျံ ဝိဘာဝိနာ။
ကမ္မဋ္ဌာနာနိ သဗ္ဗာနိ၊ စတ္တာလီသာတိ နိဒ္ဒိသေ၊
ကသိဏာနိ ဒသ စေဝ၊ အသုဘာနုဿတီ ဒသ။
စတဿော အပ္ပမညာယော၊ စတ္တာရော စ အရူပိနော၊
စတုဓာတုဝဝတ္ထာနံ၊ သညာ စာဟာရတာ ဣတိ။
ကမ္မဋ္ဌာနေသု ဧတေသု၊ ဥပစာရဝဟာ ကတိ၊
အာနာပါနသတိံ ကာယ-ဂတံ ဟိတွာ ပနဋ္ဌပိ။
သေသာနုဿတိယော သညာ၊ ဝဝတ္ထာနန္တိ တေရသ၊
ဥပစာရဝဟာ ဝုတ္တာ၊ သေသာ တေ အပ္ပနာဝဟာ။
အပ္ပနာယာဝဟေသွေတ္ထ၊ ကသိဏာနိ ဒသာပိ စ၊
အာနာပါနသတီ စေဝ၊ စတုက္ကဇ္ဈာနိကာ ဣမေ။
အသုဘာနိ ¶ ဒသ စေတ္ထ၊ တထာ ကာယဂတာသတိ၊
ဧကာဒသ ဣမေ ဓမ္မာ၊ ပဌမဇ္ဈာနိကာ သိယုံ။
အာဒိဗြဟ္မဝိဟာရာတိ ¶ ၊ တိကဇ္ဈာနဝဟာ တယော၊
စတုတ္ထာပိ စ အာရုပ္ပာ၊ စတုတ္ထဇ္ဈာနိကာ မတာ။
ဝသေနာရမ္မဏင်္ဂါနံ၊ ဒုဝိဓော သမတိက္ကမော၊
ဂေါစရာတိက္ကမာရူပေ၊ ရူပေ ဈာနင်္ဂတိက္ကမော။
ဒသေဝ ကသိဏာနေတ္ထ၊ ဝဍ္ဎေတဗ္ဗာနိ ဟောန္တိ ဟိ၊
န စ ဝဍ္ဎနိယာ သေသာ၊ ဘဝန္တိ အသုဘာဒယော။
ဒသေဝ ကသိဏာနေတ္ထ၊ အသုဘာနိ ဒသာပိ စ၊
အာနာပါနသတီ စေဝ၊ တထာ ကာယဂတာသတိ။
ပဋိဘာဂနိမိတ္တာနိ ¶ ၊ ဟောန္တိ အာရမ္မဏာနိ ဟိ၊
သေသာနေဝ ပဋိဘာဂ-နိမိတ္တာရမ္မဏာ သိယုံ။
အသုဘာနိ ဒသာဟာရ-သညာ ကာယဂတာသတိ၊
ဒေဝေသု နပ္ပဝတ္တန္တိ၊ ဒွါဒသေတာနိ သဗ္ဗဒါ။
တာနိ ဒွါဒသ စေတာနိ၊ အာနာပါနသတီပိ စ၊
တေရသေဝ ပနေတာနိ၊ ဗြဟ္မလောကေ န ဝိဇ္ဇရေ။
ဌပေတွာ စတုရာရူပေ၊ နတ္ထိ ကိဉ္စိ အရူပိသု၊
မနုဿလောကေ သဗ္ဗာနိ၊ ပဝတ္တန္တိ န သံသယော။
စတုတ္ထံ ကသိဏံ ဟိတွာ၊ ကသိဏာ အသုဘာနိ စ၊
ဒိဋ္ဌေနေဝ ဂဟေတဗ္ဗာ၊ ဣမေ ဧကူနဝီသတိ။
သတိယမ္ပိ စ ကာယမှိ၊ ဒိဋ္ဌေန တစပဉ္စကံ၊
သေသမေတ္ထ သုတေနေဝ၊ ဂဟေတဗ္ဗန္တိ ဒီပိတံ။
အာနာပါနသတီ ဧတ္ထ၊ ဖုဋ္ဌေန ပရိဒီပိတာ၊
ဝါယောကသိဏမေဝေတ္ထ၊ ဒိဋ္ဌဖုဋ္ဌေန ဂယှတိ။
သုတေနေဝ ¶ ဂဟေတဗ္ဗာ၊ သေသာ အဋ္ဌာရသာပိ စ၊
ဥပေက္ခာ အပ္ပမညာ စ၊ အရူပါ စေဝ ပဉ္စိမေ။
အာဒိတောဝ ဂဟေတဗ္ဗာ၊ န ဟောန္တီတိ ပကာသိတာ၊
ပဉ္စတိံသာဝသေသာနိ၊ ဂဟေတဗ္ဗာနိ အာဒိတော။
ကမ္မဋ္ဌာနေသု ဟေတေသု၊ အာကာသကသိဏံ ဝိနာ၊
ကသိဏာ နဝ ဟောန္တေ စ၊ အရူပါနံ တု ပစ္စယာ။
ဒသာပိ ကသိဏာ ဟောန္တိ၊ အဘိညာနံ တု ပစ္စယာ၊
တယော ဗြဟ္မဝိဟာရာပိ၊ စတုက္ကဿ ဘဝန္တိ တု။
ဟေဋ္ဌိမံ ဟေဋ္ဌိမာရုပ္ပံ၊ ဥပရူပရိမဿ ဟိ၊
တထာ စတုတ္ထမာရုပ္ပံ၊ နိရောဓဿာတိ ဒီပိတံ။
သဗ္ဗာနိ စ ပနေတာနိ၊ စတ္တာလီသဝိဓာနိ တု၊
ဝိပဿနာဘဝသမ္ပတ္တိ-သုခါနံ ပစ္စယာ သိယုံ။
ကမ္မဋ္ဌာနံ ¶ ဂဟေတွာန၊ အာစရိယဿ သန္တိကေ၊
ဝသန္တဿ ကထေတဗ္ဗံ၊ အာဂတဿာဂတက္ခဏေ။
ဥဂ္ဂဟေတွာ ¶ ပနညတြ၊ ဂန္တုကာမဿ ဘိက္ခုနော၊
နာတိသင်္ခေပဝိတ္ထာရံ၊ ကထေတဗ္ဗံ တု တေနပိ။
ကမ္မဋ္ဌာနံ ဂဟေတွာန၊ သမ္မဋ္ဌာနံ မနောဘုနော၊
အဋ္ဌာရသဟိ ဒေါသေဟိ၊ နိစ္စံ ပန ဝိဝဇ္ဇိတေ။
အနုရူပေ ဝိဟာရသ္မိံ၊ ဝိဟာတဗ္ဗံ တု ဂါမတော၊
နာတိဒူရေ နစ္စာသန္နေ၊ သိဝေ ပဉ္စင်္ဂသံယုတေ။
ခုဒ္ဒကော ပလိဗောဓောပိ၊ ဆိန္ဒိတဗ္ဗော ပနတ္ထိ စေ၊
ဒီဃာ ကေသာ နခါ လောမာ၊ ဆိန္ဒိတဗ္ဗာ ဝိဘာဝိနာ။
စီဝရံ ရဇိတဗ္ဗံ တံ၊ ကိလိဋ္ဌံ တု သစေ သိယာ၊
သစေ ပတ္တေ မလံ ဟောတိ၊ ပစိတဗ္ဗောဝ သုဋ္ဌု သော။
အစ္ဆိန္နပလိဗောဓေန ¶ ၊ ပစ္ဆာ တေန စ ဘိက္ခုနာ၊
ပဝိဝိတ္တေ ပနောကာသေ၊ ဝသန္တေန ယထာသုခံ။
ဝဇ္ဇေတွာ မတ္တိကံ နီလံ၊ ပီတံ သေတဉ္စ လောဟိတံ၊
သဏှာယာရုဏဝဏ္ဏာယ၊ မတ္တိကာယ မနောရမံ။
ကတ္တဗ္ဗံ ကသိဏဇ္ဈာနံ၊ ပတ္တုကာမေန ဓီမတာ၊
သေနာသနေ ဝိဝိတ္တသ္မိံ၊ ဗဟိဒ္ဓါ ဝါပိ တာဒိသေ။
ပဋိစ္ဆန္နေ ပနဋ္ဌာနေ၊ ပဗ္ဘာရေ ဝါ ဂုဟန္တရေ၊
သံဟာရိမံ ဝါ ကာတဗ္ဗံ၊ တံ တတြဋ္ဌကမေဝ ဝါ။
သံဟာရိမံ ကရောန္တေန၊ ဒဏ္ဍကေသု စတူသွပိ၊
စမ္မံ ဝါ ကဋသာရံ ဝါ၊ ဒုဿပတ္တမ္ပိ ဝါ တထာ။
ဗန္ဓိတွာ တထာ ကာတဗ္ဗံ၊ မတ္တိကာယ ပမာဏတော၊
ဘူမိယံ ပတ္ထရိတွာ စ၊ ဩလောကေတဗ္ဗမေဝ တံ။
တတြဋ္ဌံ ဘူမိယံ ဝဋ္ဋံ၊ အာကောဋိတွာန ခါဏုကေ၊
ဝလ္လီဟိ တံ ဝိနန္ဓိတွာ၊ ကာတဗ္ဗံ ကဏ္ဏိကံ သမံ။
ဝိတ္ထာရတော ¶ ပမာဏေန၊ ဝိဒတ္ထိစတုရင်္ဂုလံ၊
ဝဋ္ဋံ ဝတ္တတိ တံ ကာတုံ၊ ဝိဝဋ္ဋံ ပန မိစ္ဆတာ။
ဘေရီတလသမံ သာဓု၊ ကတွာ ကသိဏမဏ္ဍလံ၊
သမ္မဇ္ဇိတွာန တံ ဌာနံ၊ နှတွာ အာဂမ္မ ပဏ္ဍိတော။
ဟတ္ထပါသပမာဏသ္မိံ၊ တမှာ ကသိဏမဏ္ဍလာ၊
ပဒေသေ တု သုပညတ္တေ၊ အာသနသ္မိံ သုအတ္ထတေ။
ဥစ္စေ တတ္ထ နိသီဒိတွာ၊ ဝိဒတ္ထိစတုရင်္ဂုလေ၊
ဥဇုကာယံ ပဏိဓာယ၊ ကတွာ ပရိမုခံ သတိံ။
ကာမေသွာဒီနဝံ ဒိသွာ၊ နေက္ခမ္မံ ဒဋ္ဌု ခေမတော၊
ပရမံ ပီတိပါမောဇ္ဇံ၊ ဇနေတွာ ရတနတ္တယေ။
‘‘ဘာဂီ ¶ အဿမဟံ အဒ္ဓါ၊ ဣမာယ ပဋိပတ္တိယာ၊
ပဝိဝေကသုခဿာ’’တိ၊ ကတွာ ဥဿာဟမုတ္တမံ။
အာကာရေန ¶ သမေနေဝ၊ ဥမ္မီလိတွာန လောစနံ၊
နိမိတ္တံ ဂဏှတာ သာဓု၊ ဘာဝေတဗ္ဗံ ပုနပ္ပုနံ။
န ဝဏ္ဏော ပေက္ခိတဗ္ဗော သော၊ ဒဋ္ဌဗ္ဗံ န စ လက္ခဏံ၊
ဝဏ္ဏံ ပန အမုဉ္စိတွာ၊ ဥဿဒဿ ဝသေန ဟိ။
စိတ္တံ ပဏ္ဏတ္တိဓမ္မသ္မိံ၊ ဌပေတွေကဂ္ဂမာနသော၊
‘‘ပထဝီ ပထဝိ’’စ္စေဝံ၊ ဝတွာ ဘာဝေယျ ပဏ္ဍိတော။
ပထဝီ မေဒနီ ဘူမိ၊ ဝသုဓာ စ ဝသုန္ဓရာ၊
ဧဝံ ပထဝိနာမေသု၊ ဧကံ ဝတ္တုမ္ပိ ဝဋ္ဋတိ။
ဥမ္မီလိတွာ နိမီလိတွာ၊ အာဝဇ္ဇေယျ ပုနပ္ပုနံ၊
ယာဝုဂ္ဂဟနိမိတ္တံ တု၊ နုပ္ပဇ္ဇတိ စ တာဝ သော။
ဧဝံ ဘာဝယတော တဿ၊ ပုန ဧကဂ္ဂစေတသော၊
ယဒါ ပန နိမီလေတွာ၊ အာဝဇ္ဇန္တဿ ယောဂိနော။
ယထာ ဥမ္မီလိတေကာလေ၊ တထာပါထံ တု ယာတိ စေ၊
တဒုဂ္ဂဟနိမိတ္တံ တ-မုပ္ပန္နန္တိ ပဝုစ္စတိ။
နိမိတ္တေ ¶ ပန သဉ္ဇာတေ၊ တတော ပဘုတိ ယောဂိနာ၊
နိသီဒိတဗ္ဗံ နော စေဝံ၊ တသ္မိံ ဌာနေ ဝိဇာနတာ။
အတ္တနော ဝသနဋ္ဌာနံ၊ ပဝိသိတွာန ဓီမတာ၊
တေန တတ္ထ နိသိန္နေန၊ ဘာဝေတဗ္ဗံ ယထာသုခံ။
ပပဉ္စပရိဟာရတ္ထံ၊ ပါဒါနံ ပန ဓောဝနေ၊
တဿေကတလိကာ ဒွေ စ၊ ဣစ္ဆိတဗ္ဗာ ဥပါဟနာ။
သမာဓိတရုဏော တဿ၊ အသပ္ပာယေန ကေနစိ၊
သစေ နဿတိ တံ ဌာနံ၊ ဂန္တွာဝါဒါယ တံ ပန။
ပီဌေ ¶ သုခနိသိန္နေန၊ ဘာဝေတဗ္ဗံ ပုနပ္ပုနံ၊
သမန္နာဟရိတဗ္ဗဉ္စ၊ ကရေ တက္ကာဟတမ္ပိ စ။
နိမိတ္တံ ပန တံ ဟိတွာ၊ စိတ္တံ ဓာဝတိ စေ ဗဟိ၊
နိဝါရေတွာ နိမိတ္တသ္မိံ၊ ဌပေတဗ္ဗံ တု မာနသံ။
ယတ္ထ ယတ္ထ နိသီဒိတွာ၊ တမိစ္ဆတိ တပေါဓနော၊
တတ္ထ တတ္ထ ဒိဝါရတ္တိံ၊ တဿုပဋ္ဌာတိ စေတသော။
ဧဝံ တဿ ကရောန္တဿ၊ အနုပုဗ္ဗေန ယောဂိနော၊
ဝိက္ခမ္ဘန္တိ စ သဗ္ဗာနိ၊ ပဉ္စ နီဝရဏာနိပိ။
သမာဓိယတိ စိတ္တမ္ပိ၊ ဥပစာရသမာဓိနာ၊
ပဋိဘာဂနိမိတ္တမ္ပိ၊ ဥပ္ပဇ္ဇတိ စ ယောဂိနော။
ကော ပနာယံ ဝိသေသော ဟိ၊ ဣမဿ ပုရိမဿ ဝါ၊
ထဝိကာ နီဟတာဒါသ-မဏ္ဍလံ ဝိယ မဇ္ဇိတံ။
မေဃတော ဝိယ နိက္ခန္တံ၊ သမ္ပုဏ္ဏစန္ဒမဏ္ဍလံ၊
ပဋိဘာဂနိမိတ္တံ တံ၊ ဗလာကာ ဝိယ တောယဒေ။
တဒုဂ္ဂဟနိမိတ္တံ ¶ တံ၊ ပဒါလေတွာဝ နိဂ္ဂတံ၊
တတောဓိကတရံ သုဒ္ဓံ၊ ဟုတွာပဋ္ဌာတိ တဿ တံ။
တနုသဏ္ဌာနဝန္တဉ္စ၊ ဝဏ္ဏဝန္တံ န စေဝ တံ၊
ဥပဋ္ဌာကာရမတ္တံ တံ၊ ပညဇံ ဘာဝနာမယံ။
ပဋိဘာဂေ ¶ သမုပ္ပန္နေ၊ နိမိတ္တေ ဘာဝနာမယေ၊
ဟောန္တိ ဝိက္ခမ္ဘိတာနေဝ၊ ပဉ္စ နီဝရဏာနိပိ။
ကိလေသာ သန္နိသိန္နာဝ၊ ယုတ္တယောဂဿ ဘိက္ခုနော၊
စိတ္တံ သမာဟိတံယေဝ၊ ဥပစာရသမာဓိနာ။
အာကာရေဟိ ပန ဒွီဟိ၊ သမာဓိယတိ မာနသံ၊
ဥပစာရက္ခဏေ တဿ၊ ပဋိလာဘေ သမာဓိနော။
နီဝါရဏပ္ပဟာနေန ¶ ၊ ဥပစာရက္ခဏေ တထာ၊
အင်္ဂါနံ ပါတုဘာဝေန၊ ပဋိလာဘက္ခဏေ ပန။
ဒွိန္နံ ပန သမာဓီနံ၊ ကိံ နာနာကရဏံ ပန၊
အင်္ဂါနိ ထာမဇာတာနိ၊ ဥပစာရက္ခဏေန စ။
အပ္ပနာယ ပနင်္ဂါနိ၊ ထာမဇာတာနိ ဇာယရေ၊
တသ္မာ တံ အပ္ပနာစိတ္တံ၊ ဒိဝသမ္ပိ ပဝတ္တတိ။
ပလ္လင်္ကေန စ တေနေဝ၊ ဝဍ္ဎေတွာ တံ နိမိတ္တကံ၊
အပ္ပနံ အဓိဂန္တုံ သော၊ သက္ကောတိ ယဒိ သုန္ဒရံ။
နော စေ သက္ကောတိ သော တေန၊
တံ နိမိတ္တံ တု ယောဂိနာ၊
စက္ကဝတ္တိယ ဂဗ္ဘောဝ၊
ရတနံ ဝိယ ဒုလ္လဘံ။
သတတံ အပ္ပမတ္တေန၊ ရက္ခိတဗ္ဗံ သတီမတာ၊
နိမိတ္တံ ရက္ခတော လဒ္ဓံ၊ ပရိဟာနိ န ဝိဇ္ဇတိ။
အာရက္ခဏေ အသန္တမှိ၊ လဒ္ဓံ လဒ္ဓံ ဝိနဿတိ၊
ရက္ခိတဗ္ဗံ ဟိ တသ္မာ တံ၊ တတြာယံ ရက္ခဏာဝိဓိ။
အာဝါသော ဂေါစရော ဘဿံ၊ ပုဂ္ဂလော ဘောဇနံ ဥတု၊
ဣရိယာပထောတိ သတ္တေတေ၊ အသပ္ပာယေ ဝိဝဇ္ဇယေ။
သပ္ပာယေ ¶ သတ္တ သေဝေယျ၊ ဧဝဉှိ ပဋိပဇ္ဇတော၊
န စိရေနေဝ ကာလေန၊ ဟောတိ ဘိက္ခုဿ အပ္ပနာ။
ယဿပ္ပနာ န ဟောတေဝ၊ ဧဝမ္ပိ ပဋိပဇ္ဇတော၊
အပ္ပနာယ စ ကောသလ္လံ၊ သမ္မာ သမ္ပာဒယေ ဗုဓော။
အပ္ပနာယ ဟိ ကောသလ္လ-မိဒံ ဒသဝိဓံ ဣဓ၊
ဂန္ထဝိတ္ထာရဘီတေန၊ မယာ ဝိဿဇ္ဇိတန္တိ စ။
ဧဝဉှိ ¶ သမ္ပာဒယတော၊ အပ္ပနာကောသလ္လံ ပန၊
ပဋိလဒ္ဓေ နိမိတ္တသ္မိံ၊ အပ္ပနာ သမ္ပဝတ္တတိ။
ဧဝမ္ပိ ပဋိပန္နဿ၊ သစေ သာ နပ္ပဝတ္တတိ၊
တထာပိ န ဇဟေ ယောဂံ၊ ဝါယမေထေဝ ပဏ္ဍိတော။
စိတ္တပ္ပဝတ္တိအာကာရံ ¶ ၊ တသ္မာ သလ္လက္ခယံ ဗုဓော၊
သမတံ ဝီရိယဿေဝ၊ ယောဇယေထ ပုနပ္ပုနံ။
ဤသကမ္ပိ လယံ ယန္တံ၊ ပဂ္ဂဏှေထေဝ မာနသံ၊
အစ္စာရဒ္ဓံ နိသေဓေတွာ၊ သမမေဝ ပဝတ္တယေ။
လီနတုဒ္ဓတဘာဝေဟိ၊ မောစယိတွာန မာနသံ၊
ပဋိဘာဂနိမိတ္တာဘိ-မုခံ တံ ပဋိပါဒယေ။
ဧဝံ နိမိတ္တာဘိမုခံ၊ ပဋိပါဒယတော ပန၊
ဣဒါနေဝပ္ပနာ တဿ၊ သာ သမိဇ္ဈိဿတီတိ စ။
ဘဝင်္ဂံ ပန ပစ္ဆိဇ္ဇ၊ ပထဝီကသိဏံ တထာ၊
တဒေဝါရမ္မဏံ ကတွာ၊ မနောဒွါရမှိ ယောဂိနော။
ဇာယတေဝဇ္ဇနံ စိတ္တံ၊ တတြေဝါရမ္မဏေ တတော၊
ဇဝနာနိ စ ဇာယန္တေ၊ တဿ စတ္တာရိ ပဉ္စ ဝါ။
အဝသာနေ ပနေကံ တု၊ ရူပါဝစရိကံ ဘဝေ၊
တက္ကာဒယော ပနညေဟိ၊ ဘဝန္တိ ဗလဝတ္တရာ။
အပ္ပနာစေတသော တာနိ၊ ပရိကမ္မောပစာရတော၊
ဝုစ္စန္တိ ပရိကမ္မာနိ၊ ဥပစာရာနိ စာတိပိ။
အပ္ပနာယာနုလောမတ္တာ ¶ ၊ အနုလောမာနိ ဧဝ စ၊
ယံ တံ သဗ္ဗန္တိမံ ဧတ္ထ၊ ဂေါတြဘူတိ ပဝုစ္စတိ။
ဂဟိတာဂဟဏေနေတ္ထ၊ ပရိကမ္မပ္ပနာဒိကံ၊
ဒုတိယံ ဥပစာရံ တံ၊ တတိယံ အနုလောမကံ။
စတုတ္ထံ ¶ ဂေါတြဘု ဒိဋ္ဌံ၊ ပဉ္စမံ အပ္ပနာမနော၊
ပဌမံ ဥပစာရံ ဝါ၊ ဒုတိယံ အနုလောမကံ။
တတိယံ ဂေါတြဘု ဒိဋ္ဌံ၊ စတုတ္ထံ အပ္ပနာမနော၊
စတုတ္ထံ ပဉ္စမံ ဝါတိ၊ အပ္ပေတိ န တတော ပရံ။
ဆဋ္ဌေ ဝါ သတ္တမေ ဝါပိ၊ အပ္ပနာ နေဝ ဇာယတိ၊
အာသန္နတ္တာ ဘဝင်္ဂဿ၊ ဇဝနံ ပတိ တာဝဒေ။
ပုရိမေဟာသေဝနံ လဒ္ဓါ၊ ဆဋ္ဌံ ဝါ သတ္တမမ္ပိ ဝါ၊
အပ္ပေတီတိ ပနေတ္ထာဟ၊ ဂေါဒတ္တော အာဘိဓမ္မိကော။
ဓာဝန္တော ဟိ ယထာ ကောစိ၊
နရော ဆိန္နတဋာမုခေါ၊
ဌာတုကာမော ပရိယန္တေ၊
ဌာတုံ သက္ကောတိ နေဝ သော။
ဧဝမေဝ ပနစ္ဆဋ္ဌေ၊ သတ္တမေ ဝါပိ မာနသော၊
န သက္ကောတီတိ အပ္ပေတုံ၊ ဝေဒိတဗ္ဗံ ဝိဘာဝိနာ။
ဧကစိတ္တက္ခဏာယေဝ၊ ဟောတာယံ အပ္ပနာ ပန၊
တတော ဘဝင်္ဂပါတောဝ၊ ဟောတီတိ ပရိဒီပိတံ။
တတော ဘဝင်္ဂံ ဆိန္ဒိတွာ၊ ပစ္စဝေက္ခဏဟေတုကံ၊
အာဝဇ္ဇနံ တတော ဈာန-ပစ္စဝေက္ခဏမာနသံ။
ကာမစ္ဆန္ဒော ¶ စ ဗျာပါဒေါ၊ ထိနမိဒ္ဓဉ္စ ဥဒ္ဓတော၊
ကုက္ကုစ္စံ ဝိစိကိစ္ဆာ စ၊ ပဟီနာ ပဉ္စိမေ ပန။
ဝိတက္ကေန ဝိစာရေန၊ ပီတိယာ စ သုခေန စ၊
ဧကဂ္ဂတာယ သံယုတ္တံ၊ ဈာနံ ပဉ္စင်္ဂိကံ ဣဒံ။
နာနာဝိသယလုဒ္ဓဿ ¶ ၊ ကာမစ္ဆန္ဒဝသာ ပန၊
ဣတော စိတော ဘမန္တဿ၊ ဝနေ မက္ကဋကော ဝိယ။
ဧကသ္မိံ ¶ ဝိသယေယေဝ၊ သမာဓာနေဝ စေတသော၊
‘‘သမာဓိ ကာမစ္ဆန္ဒဿ၊ ပဋိပက္ခော’’တိ ဝုစ္စတိ။
ပါမောဇ္ဇဘာဝတော စေဝ၊ သီတလတ္တာ သဘာဝတော၊
‘‘ဗျာပါဒဿ တတော ပီတိ၊ ပဋိပက္ခာ’’တိ ဘာသိတာ။
သဝိပ္ဖာရိကဘာဝေန၊ နေက္ခမ္မာဒိပဝတ္တိတော၊
‘‘ဝိတက္ကော ထိနမိဒ္ဓဿ၊ ပဋိပက္ခော’’တိ ဝဏ္ဏိတော။
အဝူပသန္တဘာဝဿ၊ သယဉ္စေဝါတိသန္တတော၊
‘‘သုခံ ဥဒ္ဓစ္စကုက္ကုစ္စ-ဒွယဿ ပဋိပက္ခကံ’’။
မတိယာ အနုရူပတ္တာ၊ ‘‘အနုမဇ္ဇနလက္ခဏော၊
ဝိစာရော ဝိစိကိစ္ဆာယ၊ ပဋိပက္ခော’’တိ ဒီပိတော။
ပဉ္စင်္ဂဝိပ္ပယုတ္တံ တံ၊ ဈာနံ ပဉ္စင်္ဂသံယုတံ၊
သိဝံ တိဝိဓကလျာဏံ၊ ဒသလက္ခဏသံယုတံ။
ဧဝဉ္စာဓိဂတံ ဟောတိ၊ ပဌမံ တေန ယောဂိနာ၊
သုစိရဋ္ဌိတိကာမေန၊ တဿ ဈာနဿ သဗ္ဗသော။
တံ သမာပဇ္ဇိတဗ္ဗံ တု၊ ဝိသောဓေတွာန ပါပကေ၊
တံ သမာပဇ္ဇတော တဿ၊ သုစိရဋ္ဌိတိကံ ဘဝေ။
စိတ္တဘာဝနဝေပုလ္လံ၊ ပတ္ထယန္တေန ဘိက္ခုနာ၊
ပဋိဘာဂနိမိတ္တံ တံ၊ ဝဍ္ဎေတဗ္ဗံ ယထာက္ကမံ။
ဝဍ္ဎနာဘူမိယော ဒွေ စ၊ ဥပစာရဉ္စ အပ္ပနာ၊
ဥပစာရမ္ပိ ဝါ ပတွာ၊ ဝဍ္ဎေတုံ တဉ္စ ဝတ္တတိ။
အပ္ပနံ ပန ပတွာ ဝါ၊ တတြာယံ ဝဍ္ဎနက္ကမော၊
ကသိတဗ္ဗံ ယထာဌာနံ၊ ပရိစ္ဆိန္ဒတိ ကဿကော။
ယောဂိနာ ဧဝမေဝမ္ပိ၊ အင်္ဂုလဒွင်္ဂုလာဒိနာ၊
ပရိစ္ဆိဇ္ဇ ပရိစ္ဆိဇ္ဇ၊ ဝဍ္ဎေတဗ္ဗံ ယထိစ္ဆကံ။
ပတ္တေပိ ¶ ¶ ပဌမေ ဈာနေ၊ အာကာရေဟိပိ ပဉ္စဟိ၊
သုစိဏ္ဏဝသိနာ တေန၊ ဘဝိတဗ္ဗံ တပဿိနာ။
အာဝဇ္ဇနံ သမာပတ္တိ၊ အဓိဋ္ဌာနေသု တီသု စ၊
ဝုဋ္ဌာနပစ္စဝေက္ခာသု၊ ဝသိတာ ပဉ္စ ဘာသိတာ။
အာဝဇ္ဇိတွာ အဓိဋ္ဌိတွာ၊ သမာပဇ္ဇ ပုနပ္ပုနံ၊
ဝုဋ္ဌိတွာ ပစ္စဝေက္ခိတွာ၊ ဝသိတာ ပဉ္စ သာဓယေ။
ပဌမေ ¶ အဝသိပတ္တေ၊ ဒုတိယံ ယော ပနိစ္ဆတိ၊
ဥဘတော ဘဋ္ဌောဘဝေ ယောဂီ၊ ပဌမာ ဒုတိယာပိ စ။
ကာမဿဟဂတာ သညာ၊ မနက္ကာရာ စရန္တိ စေ၊
ပမာဒယောဂိနော ဈာနံ၊ ဟောတိ တံ ဟာနဘာဂိယံ။
သတိ သန္တိဋ္ဌတေ တသ္မိံ၊ သန္တာ တဒနုဓမ္မတာ၊
မန္ဒဿ ယောဂိနော ဈာနံ၊ ဟောတိ တံ ဌိတိဘာဂိယံ။
အတက္ကသဟိတာ သညာ၊ မနက္ကာရာ စရန္တိ စေ၊
အပ္ပမတ္တဿ တံ ဈာနံ၊ ဝိသေသဘာဂိယံ သိယာ။
နိဗ္ဗိဒါသံယုတာ သညာ၊ မနက္ကာရာ စရန္တိ စေ၊
နိဗ္ဗေဓဘာဂိယံ ဈာနံ၊ ဟောတီတိ ပရိဒီပိတံ။
တသ္မာ ပဉ္စသု ဧတေသု၊ သုစိဏ္ဏဝသိနာ ပန၊
ပဌမာ ပဂုဏတော ဈာနာ၊ ဝုဋ္ဌာယ ဝိဓိနာ တတော။
ယသ္မာ အယံ သမာပတ္တိ၊ အာသန္နာကုသလာရိကာ၊
ထူလတ္တာ တက္ကစာရာနံ၊ တတောယံ အင်္ဂဒုဗ္ဗလာ။
ဣတိ အာဒီနဝံ ဒိသွာ၊ ပဌမေ ပန ယောဂိနာ၊
ဒုတိယံ သန္တတော ဈာနံ၊ စိန္တယိတွာန ဓီမတာ။
နိကန္တိံ ပရိယာဒါယ၊ ဈာနသ္မိံ ပဌမေ ပုန၊
ဒုတိယာဓိဂမတ္ထာယ၊ ကာတဗ္ဗော ဘာဝနက္ကမော။
အထဿ ¶ ပဌမဇ္ဈာနာ၊ ဝုဋ္ဌာယ ဝိဓိနာ ယဒါ၊
သတဿ သမ္ပဇာနဿ၊ ဈာနင်္ဂံ ပစ္စဝေက္ခတော။
ထူလတော ¶ တက္ကစာရာ ဟိ၊ ဥပတိဋ္ဌန္တိ ယောဂိနော၊
သေသမင်္ဂတ္တယံ တဿ၊ သန္တမေဝေါပတိဋ္ဌတိ။
ထူလင်္ဂါနံ ပဟာနာယ၊ တဒါ တဿ စ ယောဂိနော၊
သန္တင်္ဂပဋိလာဘာယ၊ နိမိတ္တံ တု တဒေဝ စ။
‘‘ပထဝီ ပထဝိ’’စ္စေဝံ၊ ကရောတော မနသာ ပုန၊
ဣဒါနိ ဒုတိယဇ္ဈာန-မုပ္ပဇ္ဇိဿတိ တံ ဣတိ။
ဘဝင်္ဂံ ပန ပစ္ဆိဇ္ဇ၊ ပထဝီကသိဏံ ပန၊
တဒေဝါရမ္မဏံ ကတွာ၊ မနောဒွါရမှိ ယောဂိနော။
ဇာယတာဝဇ္ဇနံ စိတ္တံ၊ တသ္မိံ အာရမ္မဏေ တတော၊
ဇဝနာနိ ဟိ ဇာယန္တေ၊ တဿ စတ္တာရိ ပဉ္စ ဝါ။
အဝသာနေ ပနေကမ္ပိ၊ တေသံ ဇဝနစေတသံ၊
ရူပါဝစရိကံ ဟောတိ၊ ဒုတိယဇ္ဈာနမာနသံ။
သမ္ပသာဒနမဇ္ဈတ္တံ၊ ပီတိယာ စ သုခေန စ၊
ဧကဂ္ဂတာယ သံယုတ္တံ၊ ဈာနံ ဟောတိ တိဝင်္ဂိကံ။
ဟေဋ္ဌာ ဝုတ္တနယေနေဝ၊ သေသံ သမုပလက္ခယေ၊
ဧဝံ ဒုဝင်္ဂဟီနံ တု၊ တီဟိ အင်္ဂေဟိ သံယုတံ။
ဈာနံ ¶ တိဝိဓကလျာဏံ၊ ဒသလက္ခဏသံယုတံ၊
ဒုတိယာဓိဂတံ ဟောတိ၊ ဘိက္ခုနာ ဘာဝနာမယံ။
ဒုတိယာဓိဂတေ ဈာနေ၊ အာကာရေဟိ စ ပဉ္စဟိ၊
သုစိဏ္ဏဝသိနာ ဟုတွာ၊ ဒုတိယေပိ သတီမတာ။
တသ္မာ ပဂုဏတော ဈာနာ၊ ဝုဋ္ဌာယ ဒုတိယာ ပုန၊
အာသန္နတက္ကစာရာရိ၊ သမာပတ္တိ အယံ ဣတိ။
ပီတိယာ ¶ ပိယတော တဿ၊ စေတသော ဥပ္ပိလာပနံ၊
ပီတိယာ ပန ထူလတ္တာ၊ တတောယံ အင်္ဂဒုဗ္ဗလာ။
တတ္ထ ¶ အာဒီနဝံ ဒိသွာ၊ တတိယေ သန္တတော ပန၊
နိကန္တိံ ပရိယာဒါယ၊ ဈာနသ္မိံ ဒုတိယေ ပုန။
တတိယာဓိဂမတ္ထာယ၊ ကာတဗ္ဗော ဘာဝနက္ကမော၊
အထဿ ဒုတိယဇ္ဈာနာ၊ ဝုဋ္ဌာယ စ ယဒါ ပန။
သတဿ သမ္ပဇာနဿ၊ ဈာနင်္ဂံ ပစ္စဝေက္ခတော၊
ထူလတော ပီတုပဋ္ဌာတိ၊ သုခါဒိ သန္တတော ပန။
ထူလင်္ဂါနံ ပဟာနာယ၊ တဒါ တဿ စ ယောဂိနော၊
သန္တင်္ဂပဋိလာဘာယ၊ နိမိတ္တံ တု တဒေဝ စ။
‘‘ပထဝီ ပထဝိ’’စ္စေဝံ၊ ကရောတော မနသာ ပုန၊
ဣဒါနိ တတိယံ ဈာန-မုပ္ပဇ္ဇိဿတိ တံ ဣတိ။
ဘဝင်္ဂံ မနုပစ္ဆိဇ္ဇ၊ ပထဝီကသိဏံ ပန၊
တဒေဝါရမ္မဏံ ကတွာ၊ မနောဒွါရမှိ ယောဂိနော။
ဇာယတာဝဇ္ဇနံ စိတ္တံ၊ တသ္မိံ အာရမ္မဏေ တတော၊
ဇဝနာနိ စ ဇာယန္တေ၊ တဿ စတ္တာရိ ပဉ္စ ဝါ။
အဝသာနေ ပနေကံ တု၊ တေသံ ဇဝနစေတသံ၊
ရူပါဝစရိကံ ဟောတိ၊ တတိယဇ္ဈာနမာနသံ။
သတိယာ သမ္ပဇညေန၊ သမ္ပန္နံ တု သုခေန စ၊
ဧကဂ္ဂတာယ သံယုတ္တံ၊ ဒုဝင်္ဂံ တတိယံ မတံ။
ဟေဋ္ဌာ ဝုတ္တနယေနေဝ၊ သေသံ သမုပလက္ခယေ၊
ဧဝမေကင်္ဂဟီနံ တု၊ ဒွီဟိ အင်္ဂေဟိ သံယုတံ။
ဈာနံ တိဝိဓကလျာဏံ၊ ဒသလက္ခဏသံယုတံ၊
တတိယာဓိဂတံ ဟောတိ၊ ဘိက္ခုနာ ဘာဝနာမယံ။
တတိယာဓိဂတေ ¶ ဈာနေ၊ အာကာရေဟိ စ ပဉ္စဟိ၊
သုစိဏ္ဏဝသိနာ ဟုတွာ၊ တသ္မိံ ပန သတီမတာ။
တသ္မာ ပဂုဏတော ဈာနာ၊ ဝုဋ္ဌာယ တတိယာ ပုန၊
အာသန္နပီတိဒေါသာ ဟိ၊ သမာပတ္တိ အယန္တိ စ။
ယဒေဝစေတ္ထ ¶ အာဘောဂေါ၊ သုခမိစ္စေဝ စေတသော၊
ဧဝံ သုခဿ ထူလတ္တာ၊ ဟောတာယံ အင်္ဂဒုဗ္ဗလာ။
ဣတိ ¶ အာဒီနဝံ ဒိသွာ၊ ဈာနသ္မိံ တတိယေ ပုန၊
စတုတ္ထံ သန္တတော ဒိသွာ၊ စေတသာ ပန ယောဂိနာ။
နိကန္တိံ ပရိယာဒါယ၊ ဈာနသ္မိံ တတိယေ ပုန၊
စတုတ္ထာဓိဂမတ္ထာယ၊ ကာတဗ္ဗော ဘာဝနက္ကမော။
အထဿ တတိယဇ္ဈာနာ၊ ဝုဋ္ဌာယ ဟိ ယဒါ ပန၊
သတဿ သမ္ပဇာနဿ၊ ဈာနင်္ဂံ ပစ္စဝေက္ခတော။
ထူလတော တဿုပဋ္ဌာတိ၊ သုခံ တံ မာနသံ တတော၊
ဥပေက္ခာ သန္တတော တဿ၊ စိတ္တဿေကဂ္ဂတာပိ စ။
ထူလင်္ဂဿ ပဟာနာယ၊ သန္တင်္ဂဿူပလဒ္ဓိယာ၊
တဒေဝ စ နိမိတ္တဉှိ၊ ‘‘ပထဝီ ပထဝီ’’တိ စ။
ကရောတော မနသာ ဧဝ၊ ပုနပ္ပုနဉ္စ ယောဂိနော၊
စတုတ္ထံ ပနိဒံ ဈာနံ၊ ဥပ္ပဇ္ဇိဿတိ တံ ဣတိ။
ဘဝင်္ဂံ ပနုပစ္ဆိဇ္ဇ၊ ပထဝီကသိဏံ တထာ၊
တဒေဝါရမ္မဏံ ကတွာ၊ မနောဒွါရမှိ ယောဂိနော။
ဇာယတာဝဇ္ဇနံ စိတ္တံ၊ တသ္မိံ အာရမ္မဏေ တတော၊
ဇဝနာနိ စ ဇာယန္တေ၊ တဿ စတ္တာရိ ပဉ္စ ဝါ။
အဝသာနေ ပနေကံ တု၊ တေသံ ဇဝနစေတသံ၊
ရူပါဝစရိကံ ဟောတိ၊ စတုတ္ထဇ္ဈာနမာနသံ။
ဧကင်္ဂဝိပ္ပဟီနံ ¶ တု၊ ဒွီဟိ အင်္ဂေဟိ ယောဂတော၊
စတုတ္ထံ ပနိဒံ ဈာနံ၊ ဒုဝင်္ဂန္တိ ပဝုစ္စတိ။
ဧဝံ တိဝိဓကလျာဏံ၊ ဒသလက္ခဏသံယုတံ၊
စတုတ္ထာဓိဂတံ ဟောတိ၊ ဘိက္ခုနာ ဘာဝနာမယံ။
ယသ္မာ သုခမုပေက္ခာယ၊ န ဟောတာသေဝနံ ပန၊
ဥပေက္ခာသဟဂတာနေဝ၊ ဇဝနာနိ ဇဝန္တိ စ။
ဥပေက္ခာသဟဂတံ ¶ တသ္မာ၊ စတုတ္ထံ သမုဒီရိတံ၊
အယမေတ္ထ ဝိသေသော ဟိ၊ သေသံ ဝုတ္တနယံ ပန။
ယံ စတုက္ကနယေ ဈာနံ၊ ဒုတိယံ တံ ဒွိဓာ ပန၊
ကတွာန ပဉ္စကနယေ၊ ဒုတိယံ တတိယံ ကတံ။
တတိယံ တံ စတုတ္ထဉ္စ၊ စတုတ္ထံ ပဉ္စမံ ဣဓ၊
ပဌမံ ပဌမံယေဝ၊ အယမေတ္ထ ဝိသေသတာ။
ဧဝမေတ္တာဝတာ ဝုတ္တာ၊ နာတိသင်္ခေပတော မယာ၊
နာတိဝိတ္ထာရတော စာယံ၊ ရူပါဝစရဘာဝနာ။
သုမဓုရဝရတရဝစနော၊ ကံ နု ဇနံ နေဝ ရဉ္ဇယတိ၊
အတိနိသိတဝိသဒဗုဒ္ဓိ-ပသာဒဇန ဝေဒနီယောယံ။
ဣတိ အဘိဓမ္မာဝတာရေ ရူပါဝစရသမာဓိဘာဝနာနိဒ္ဒေသော
နာမ စုဒ္ဒသမော ပရိစ္ဆေဒေါ။