📜
၁၅။ ပန္နရသမော ပရိစ္ဆေဒေါ
အရူပါဝစရသမာဓိဘာဝနာနိဒ္ဒေသော
ရူပါရူပမတီတေန ¶ ¶ ၊ ရူပါရူပါဒိဝေဒိနာ၊
ယာနိ စာရူပပုညာနိ၊ သရူပေနီရိတာနိ တု။
တေသံ ဒါနိ ပဝက္ခာမိ၊ ဘာဝနာနယမုတ္တမံ၊
ယောဂါဝစရဘိက္ခူနံ၊ ဟိတတ္ထာယ သမာသတော။
‘‘ရူပေ ခေါ ဝိဇ္ဇမာနသ္မိံ၊ ဒဏ္ဍာဒါနာဒယော သိယုံ၊
အနေကာပိ ပနာဗာဓာ၊ စက္ခုရောဂါဒယော’’ဣတိ။
ရူပေ အာဒီနဝံ ဒိသွာ၊ ရူပေ နိဗ္ဗိန္ဒမာနသော၊
တဿာတိက္ကမနတ္ထာယ၊ အရူပံ ပဋိပဇ္ဇတိ။
တမှာ ¶ ကသိဏရူပါပိ၊ သော နိဗ္ဗိဇ္ဇ ဝိသာရဒေါ၊
အပက္ကမိတုကာမော စ၊ သူကရာဘိဟတောဝ သာ။
စတုတ္ထေ ပန ဈာနသ္မိံ၊ ဟုတွာ စိဏ္ဏဝသီ ဝသီ၊
စတုတ္ထဇ္ဈာနတော ဓီမာ၊ ဝုဋ္ဌာယ ဝိဓိနာ ပုန။
ကရောတိ ပနိဒံ စိတ္တံ၊ ရူပမာရမ္မဏံ ယတော၊
အာသန္နသောမနဿဉ္စ၊ ထူလသန္တဝိမောက္ခတော။
ဣတိ အာဒီနဝံ ဒိသွာ၊ စတုတ္ထေ တတ္ထ သဗ္ဗသော၊
နိကန္တိံ ပရိယာဒါယ၊ ပဌမာရုပ္ပဉ္စ သန္တတော။
စက္ကဝါဠပရိယန္တံ၊ ယတ္တကံ ဝါ ပနိစ္ဆတိ၊
တတ္တကံ ပတ္ထရိတွာန၊ ဖုဋ္ဌောကာသဉ္စ တေန တံ။
အာကာသော ¶ ဣတိ ဝါနန္တော၊
အာကာသော ဣတိ ဝါ ပုန၊
မနသာ ဟိ ကရောန္တောဝ၊
ဥဂ္ဃာဋေတိ ပဝုစ္စတိ။
ဥဂ္ဃာဋေန္တော ဟိ ကသိဏံ၊ န သံဝေလ္လေတိ တံ ပန၊
န စုဒ္ဓရတိ သော ယောဂီ၊ ပူဝံ ဝိယ ကပါလတော။
ကေဝလံ ပန တံ နေဝ၊ အာဝဇ္ဇတိ န ပေက္ခတိ၊
နာဝဇ္ဇန္တော နပေက္ခန္တော၊ ဥဂ္ဃာဋေတိ ဟိ နာမသော။
ကသိဏုဂ္ဃာဋိမာကာသံ ¶ ၊ နိမိတ္တံ ပန တံဝ သော၊
အာကာသော ဣတိ စိတ္တေန၊ အာဝဇ္ဇတိ ပုနပ္ပုနံ။
အာဝဇ္ဇတော ဟိ တဿေဝံ၊
ကရောတော တက္ကာဟတမ္ပိ စ၊
ပဉ္စ နီဝရဏာ တဿ၊
ဝိက္ခမ္ဘန္တိ ဟိ သဗ္ဗသော။
အာသေဝတိ ¶ စ ဘာဝေတိ၊ တံ နိမိတ္တံ ပုနပ္ပုနံ၊
ကရောတော ပန တဿေဝ၊ သန္တစိတ္တဿ ယောဂိနော။
တတြာကာသေ ပနာပ္ပေတိ၊ ပဌမာရုပ္ပမာနသံ၊
ဣဓာပိ ပုရိမေ ဘာဂေ၊ တီဏိ စတ္တာရိ ဝါ ပန။
ဇဝနာနိ ဥပေက္ခာယ၊ သမ္ပယုတ္တာနိ ဟောန္တိ ဟိ၊
စတုတ္ထံ ပဉ္စမံ ဝါပိ၊ ဟောတိ အာရုပ္ပမာနသံ။
ပုန ဘာဝေတုကာမေန၊ ဒုတိယာရုပ္ပမာနသံ၊
သုစိဏ္ဏဝသိနာ ဟုတွာ၊ ပဌမာရုပ္ပမာနသေ။
အာသန္နရူပါဝစရ-ဇ္ဈာနပစ္စတ္ထိကန္တိ စ၊
ဒုတိယာရုပ္ပစိတ္တံဝ၊ န စ သန္တမိဒန္တိ စ။
ဧဝမာဒီနဝံ ¶ ဒိသွာ၊ ပဌမာရုပ္ပမာနသေ၊
နိကန္တိံ ပရိယာဒါယ၊ ဒုတိယံ သန္တတော ပန။
တမာကာသံ ဖရိတွာန၊ ပဝတ္တမာနသံ ပန၊
တဉ္စ ဝိညာဏမိစ္စေဝံ၊ ကတ္တဗ္ဗံ မနသာ ဗဟုံ။
အာဝဇ္ဇနဉ္စ ကတ္တဗ္ဗံ၊ တထာ တက္ကာဟတမ္ပိ စ၊
‘‘အနန္တ’’န္တိ ‘‘အနန္တ’’န္တိ၊ ကာတဗ္ဗံ မနသာ နိဓ။
တသ္မိံ ပန နိမိတ္တသ္မိံ၊ ဝိစာရေန္တဿ မာနသံ၊
ဥပစာရေန တံ စိတ္တံ၊ သမာဓိယတိ ယောဂိနော။
အာသေဝတိ စ ဘာဝေတိ၊ တံ နိမိတ္တံ ပုနပ္ပုနံ၊
တဿ စေဝံ ကရောန္တဿ၊ သတိသမ္ပန္နစေတသော။
အာကာသံ ဖုသဝိညာဏေ၊ ဒုတိယာရုပ္ပမာနသံ၊
အပ္ပေတိ အပ္ပနာ ယသ္မိံ၊ နယော ဝုတ္တနယောဝ သော။
အာကာသောယမနန္တောတိ၊ ဧဝမာကာသမေဝ တံ၊
ဖရိတွာ ပဝတ္တဝိညာဏံ၊ ‘‘ဝိညာဏဉ္စ’’န္တိ ဝုစ္စတိ။
မနက္ကာရဝသေနာပိ၊ အနန္တံ ပရိဒီပိတံ၊
‘‘ဝိညာဏာနန္တ’’မိစ္စေဝ၊ ဝတ္တဗ္ဗံ ပနိဒံ သိယာ။
အထ ¶ ဘာဝေတုကာမေန၊ တတိယာရုပ္ပမာနသံ၊
သုစိဏ္ဏဝသိနာ ဟုတွာ၊ ဒုတိယာရုပ္ပမာနသေ။
အာသန္နပဌမာရုပ္ပ-စိတ္တပစ္စတ္ထိကန္တိ စ၊
တတိယာရုပ္ပစိတ္တံဝ၊ န စ သန္တမိဒန္တိ စ။
ဧဝမာဒီနဝံ ဒိသွာ၊ ဒုတိယာရုပ္ပမာနသေ၊
နိကန္တိံ ပရိယာဒါယ၊ တတိယံ သန္တတော ပန။
ဧဝံ မနသိ ကတွာန၊ ကာတဗ္ဗော မနသာ ပုန၊
ပဌမာရုပ္ပဝိညာဏာ-ဘာဝေါ တဿေဝ သုညတော။
တံ ¶ ¶ ပနာကာသဝိညာဏံ၊ အကတွာ မနသာ ပုန၊
‘‘နတ္ထိ နတ္ထီ’’တိ ဝါတေန၊ ‘‘သုညံ သုည’’န္တိ ဝါ တတော။
အာဝဇ္ဇိတဗ္ဗမေဝဉှိ၊ ကတ္တဗ္ဗံ မနသာပိ စ၊
တက္ကာဟတဉ္စ ကာတဗ္ဗံ၊ ပုနပ္ပုနံဝ ဓီမတာ။
တသ္မိံ နိမိတ္တေ တဿေဝံ၊ ဝိစာရေန္တဿ မာနသံ၊
သတိ တိဋ္ဌတိ ဘိယျောပိ၊ သမာဓိယတိ မာနသံ။
အာသေဝတိ စ ဘာဝေတိ၊ တံ နိမိတ္တံ ပုနပ္ပုနံ၊
တဿ စေဝံ ကရောန္တဿ၊ သတိသမ္ပန္နစေတသော။
ကသိဏုဂ္ဃာဋိမာကာသံ၊ ဖရိတွာန သမန္တတော၊
ဝိညာဏဿ ပဝတ္တဿ၊ နတ္ထိဘာဝေ အဘာဝကေ။
တတိယာရုပ္ပဝိညာဏံ၊
တံ ပနာပ္ပေတိ ယောဂိနော၊
အပ္ပနာယ နယောပေတ္ထ၊
ဟောတိ ဝုတ္တနယောဝ သော။
အာကာသဂတဝိညာဏံ၊ ဒုတိယာရုပ္ပစက္ခုနာ၊
ပဿန္တော ဝိဟရိတွာန၊ ‘‘နတ္ထိ နတ္ထီ’’တိအာဒိနာ။
ပရိကမ္မမနက္ကာရေ ¶ ၊ တသ္မိံ အန္တရဟိတေ ပန၊
တဿာပဂမမတ္တံဝ၊ ပဿန္တော ဝသတီ စ သော။
သန္နိပါတံ ယထာ ကောစိ၊ ဒိသွာ သင်္ဃဿ ကတ္ထစိ၊
ဂတေ သင်္ဃေ တု တံ ဌာနံ၊ သုညမေဝါနုပဿတိ။
ပုန ဘာဝေတုကာမေန၊ စတုတ္ထာရုပ္ပမာနသံ၊
သုစိဏ္ဏဝသိနာ ဟုတွာ၊ တတိယာရုပ္ပမာနသေ။
အာသန္နဒုတိယာရုပ္ပ-စိတ္တပစ္စတ္ထိကန္တိ စ၊
စတုတ္ထာရုပ္ပစိတ္တံဝ၊ န စ သန္တမိဒန္တိ စ။
ဧဝမာဒီနဝံ ¶ ဒိသွာ၊ တတိယာရုပ္ပမာနသေ၊
နိကန္တိံ ပရိယာဒါယ၊ စတုတ္ထံ သန္တတော ပန။
ဧဝံ မနသိ ကတွာန၊ ပုန တတ္ထေဝ ဓီမတာ၊
အဘာဝါရမ္မဏံ ကတွာ၊ သမ္ပဝတ္တမိဒံ မနော။
‘‘သန္တံ သန္တမိဒံ စိတ္တ’’-မိစ္စေဝံ တံ ပုနပ္ပုနံ၊
ဟောတိ အာဝဇ္ဇိတဗ္ဗဉ္စ၊ ကာတဗ္ဗံ မနသာပိ စ။
တသ္မိံ နိမိတ္တေ တဿေဝံ၊ ဝိစာရေန္တဿ မာနသံ၊
သတိ တိဋ္ဌတိ ဘိယျောပိ၊ သမာဓိယတိ မာနသံ။
အာသေဝတိ စ ဘာဝေတိ၊ တံ နိမိတ္တံ ပုနပ္ပုနံ၊
တဿ စေဝံ ကရောန္တဿ၊ သတိသမ္ပန္နစေတသော။
တတိယာရုပ္ပသင်္ခါတ-ခန္ဓေသု စ စတူသုပိ၊
စတုတ္ထာရုပ္ပဝိညာဏံ၊ တံ ပနာပ္ပေတိ ယောဂိနော။
အပ္ပနာယ ¶ နယောပေတ္ထ၊ ဟေဋ္ဌာ ဝုတ္တနယူပမော၊
အပိစေတ္ထ ဝိသေသောယံ၊ ဝေဒိတဗ္ဗော ဝိဘာဝိနာ။
‘‘အဟော သန္တာ ဝတာယ’’န္တိ၊ သမာပတ္တိ ပဒိဿတိ၊
ယာ ပနာဘာဝမတ္တမ္ပိ၊ ကတွာ ဌဿတိ ဂေါစရံ။
သန္တာရမ္မဏတာယေဝ၊ ‘‘သန္တာယ’’န္တိ ဝိပဿတိ၊
သန္တတော စေ မနက္ကာရော၊ ကထဉ္စ သမတိက္ကမော။
အနာပဇ္ဇိတုကာမတ္တာ ¶ ၊ ဟောတေဝ သမတိက္ကမော၊
‘‘သမာပဇ္ဇာမဟမေတ’’-မိစ္စာဘောဂေါ န ဝိဇ္ဇတိ။
သန္တတော တံ ကရောန္တော ဟိ၊ မနသာ သုခုမံ ပရံ၊
အသညံ ပန ဒုဗ္ဗလျံ၊ ပါပုဏာတိ မဟဂ္ဂတံ။
နေဝသညီ စ နာသညီ၊
ယာယ သညာယ ဟောတိ သော၊
န ¶ ကေဝလံ တု သညာဝ၊
ဧဒိသီ အထ ခေါ ပန။
ဧဝမေဝ ဘဝန္တေတ္ထ၊ သုခုမာ ဝေဒနာဒယော၊
ပတ္တမက္ခနတေလေန၊ မဂ္ဂသ္မိံ ဥဒကေန စ။
သာဝေတဗ္ဗော အယံ အတ္ထော၊ စတုတ္ထာရုပ္ပဗောဓနေ၊
ပဋုသညာယ ကိစ္စဿ၊ နေဝက္ကရဏတော အယံ။
‘‘နေဝသညာ’’တိ နိဒ္ဒိဋ္ဌာ၊ စတုတ္ထာရုပ္ပသမ္ဘဝါ၊
ပဋုသညာယ ကိစ္စံ သာ၊ ကာတုံ သက္ကောတိ နေဝ စ။
ယထာ ဒဟနကိစ္စံ တု၊ တေဇောဓာတု သုခေါဒကေ၊
သာ သင်္ခါရာဝသေသတ္တာ၊ သုခုမတ္တေန ဝိဇ္ဇတိ၊
တသ္မာ ပန စ သာ သညာ၊ ‘‘နာသညာ’’တိ ပဝုစ္စတိ။
ဧတာ ဟိ ရူပမာကာသံ၊
ဝိညာဏံ တဒဘာဝကံ၊
အတိက္ကမိတွာ ကမတော၊
စတဿော ဟောန္တိ အာဟ စ။
‘‘အာရမ္မဏာတိက္ကမတော၊ စတဿောပိ ဘဝန္တိမာ၊
အင်္ဂါတိက္ကမမေတာသံ၊ န ဣစ္ဆန္တိ ဝိဘာဝိနော။
သုပဏီတတရာ ¶ ဟောန္တိ၊
ပစ္ဆိမာ ပစ္ဆိမာ ဣဓ၊
ဥပမာ တတ္ထ ဝိညေယျာ၊
ပါသာဒတလသာဋိကာ’’တိ။
သင်္ခေပေန မယာရုပ္ပ-သမာပတ္တိနယော အယံ၊
ဒဿိတော ဒဿိတော သုဒ္ဓ-ဒဿိနာ ပိယဒဿိနာ။
ရူပါရူပဇ္ဈာနသမာပတ္တိဝိဓာနံ ¶ ၊
ဇာနာတိမံ သာရတရံ ယော ပန ဘိက္ခု၊
ရူပါရူပဇ္ဈာနသမာပတ္တီသု ဒက္ခော၊
ရူပါရူပံ ယာတိ ဘဝံ သော အဘိဘုယျ။
ဣတိ အဘိဓမ္မာဝတာရေ အရူပါဝစရသမာဓိဘာဝနာနိဒ္ဒေသော နာမ
ပန္နရသမော ပရိစ္ဆေဒေါ။