📜
၁၆။ သောဠသမော ပရိစ္ဆေဒေါ
အဘိညာနိဒ္ဒေသော
ဣတော ¶ ပရံ ကရိဿာမိ၊ ပညာသုဒ္ဓိကရံ ပရံ၊
ပဉ္စန္နမ္ပိ အဘိညာနံ၊ မုခမတ္တနိဒဿနံ။
ရူပါရူပသမာပတ္တီ၊
နိဗ္ဗတ္တေတွာ ပနဋ္ဌပိ၊
လောကိကာပိ အဘိညာယော၊
ဘာဝေတဗ္ဗာ ဝိဘာဝိနာ။
စတုတ္ထဇ္ဈာနမတ္တေပိ၊ သုစိဏ္ဏဝသိနာ သတာ၊
အနုယောဂမဘိညာသု၊ ကာတုံ ဝတ္တတိ ယောဂိနော။
အဘိညာ ¶ နာမ ဘိက္ခူနံ၊ သာဘိညာနံ အနုတ္တရော၊
အလင်္ကာရော ဟိ တာဏန္တိ၊ သတ္ထန္တိ စ ပဝုစ္စတိ။
နိဗ္ဗတ္တိတာသွဘိညာသု၊ ယောဂါဝစရဘိက္ခုနာ၊
သမာဓိဘာဝနာ ဟိဿ၊ တဒါ နိဋ္ဌင်္ဂတာ သိယာ။
ဒိဗ္ဗာနိ ¶ စက္ခုသောတာနိ၊ ဣဒ္ဓိစိတ္တဝိဇာနနံ၊
ပုဗ္ဗေနိဝါသဉာဏန္တိ၊ ပဉ္စာဘိညာ ဣမာ သိယုံ။
ကသိဏာနုလောမတာဒီဟိ၊ စတုဒ္ဒသနယေဟိ စ၊
ဒမေတဗ္ဗမဘိညာယော၊ ပတ္တုကာမေန မာနသံ။
ဒန္တေ သမာဟိတေ သုဒ္ဓေ၊ ပရိယောဒါတေ အနင်္ဂဏေ၊
နုပက္လေသေ မုဒုဘူတေ၊ ကမ္မနီယေ ဌိတာစလေ။
ဣတိ အဋ္ဌင်္ဂသမ္ပန္နေ၊ စိတ္တေ ဣဒ္ဓိဝိဓာယ စ၊
အဘိနီဟရတိ စေ စိတ္တံ၊ သိဇ္ဈတိဒ္ဓိဝိကုဗ္ဗနံ။
အဘိညာပါဒကဇ္ဈာနံ၊ သမာပဇ္ဇ တတော ပန၊
ဝုဋ္ဌာယ ဟိ သတံ ဝါပိ၊ သဟဿံ ဝါ ယဒိစ္ဆတိ။
‘‘သတံ ဟောမိ သတံ ဟောမီ’’-စ္စေဝံ ကတွာန မာနသံ၊
အဘိညာပါဒကဇ္ဈာနံ၊ သမာပဇ္ဇ တတော ပန။
ဝုဋ္ဌာယ ပုနဓိဋ္ဌာတိ၊
သဟာဓိဋ္ဌာနစေတသာ၊
သတံ ဟောတိ ဟိ သော ယောဂီ၊
သဟဿာဒီသွယံ နယော။
ပါဒကဇ္ဈာနစိတ္တံ တု၊ နိမိတ္တာရမ္မဏံ သိယာ၊
ပရိကမ္မမနာနေတ္ထ၊ သတာရမ္မဏိကာနိ တု။
တဒါဓိဋ္ဌာနစိတ္တမ္ပိ ¶ ၊ သတာရမ္မဏမေဝ တံ၊
ပုဗ္ဗေ ဝုတ္တပ္ပနာစိတ္တံ၊ ဝိယ ဂေါတြဘုနန္တရံ။
တမေကံ ¶ ဇာယတေ တတ္ထ၊ စတုတ္ထဇ္ဈာနိကံ မနော၊
ပရိကမ္မဝိသေသောဝ၊ သေသံ ပုဗ္ဗသမံ ဣဓ။
ဣဒ္ဓိဝိဓဉာဏံ။
ဒိဗ္ဗသောတမိဒံ ¶ တတ္ထ၊ ဘာဝေတဗ္ဗံ ကထံ သိယာ၊
အဘိညာပါဒကဇ္ဈာနံ၊ သမာပဇ္ဇ တတော ပုန။
ဝုဋ္ဌာယ ပရိကမ္မေန၊ ကာမာဝစရစေတသာ၊
သဒ္ဒေါ အာဝဇ္ဇိတဗ္ဗောဝ၊ မဟန္တော သုခုမောပိ စ။
တဿေဝံ ပန သဒ္ဒဿ၊ နိမိတ္တံ မနသိ ကုဗ္ဗတော၊
ဒိဗ္ဗသောတမိဒါနိဿ၊ ဥပ္ပဇ္ဇိဿတိ တံ ဣတိ။
သဒ္ဒေသွညတရံ သဒ္ဒံ၊ ကတွာ အာရမ္မဏံ တတော၊
ဥပ္ပဇ္ဇိတွာ နိရုဒ္ဓေ တု၊ မနောဒွါရာဝဇ္ဇနေ ပုန။
ဇဝနာနိ ဟိ ဇာယန္တေ၊ တဿ စတ္တာရိ ပဉ္စ ဝါ၊
ပုရိမာနေတ္ထ စိတ္တေသု၊ တီဏိ စတ္တာရိ ဝါ ပန။
ပရိကမ္မောပစာရာနု-လောမဂေါတြဘုနာမကာ၊
စတုတ္ထံ ပဉ္စမံ ဝါပိ၊ အပ္ပနာစိတ္တမီရိတံ။
သဟဇာတံ တု ယံ ဉာဏံ၊ အပ္ပနာမာနသေန ဟိ၊
တံ ဉာဏံ ဒိဗ္ဗသောတန္တိ၊ ဝဒန္တိ သုတကောဝိဒါ။
ထာမဇာတံ ကရောန္တေန၊ တံ ဉာဏံ တေန ယောဂိနာ၊
‘‘ဧတ္ထန္တရဂတံ သဒ္ဒံ၊ သုဏာမီ’’တိ စ စေတသာ။
အင်္ဂုလံ ဒွင်္ဂုလံ ဘိယျော၊
ဝိဒတ္ထိ ရတနံ တထာ၊
ဂါမော ဒေသော တတော ယာဝ၊
စက္ကဝါဠာ တတော ပရံ။
ဣစ္စေဝံ တု ပရိစ္ဆိဇ္ဇ၊ ဝဍ္ဎေတဗ္ဗံ ယထာက္ကမံ၊
ဧသော အဓိဂတာဘိညော၊ ပါဒကာရမ္မဏေန တု။
ဖုဋ္ဌောကာသဂတေ ¶ သဒ္ဒေ၊ သဗ္ဗေ ပန သုဏာတိ သော၊
သုဏန္တော ပါဋိယေက္ကမ္ပိ၊ သလ္လက္ခေတုံ ပဟောတိ သော။
ဒိဗ္ဗသောတဉာဏံ။
ကထံ ¶ ပနုပ္ပာဒေတဗ္ဗံ၊ စေတောပရိယမာနသံ၊
ဒိဗ္ဗစက္ခုဝသေနေဝ၊ ဣဒံ ဉာဏံ ပနိဇ္ဈတိ။
အာလောကံ ပန ဝဍ္ဎေတွာ၊ တသ္မာ ဒိဗ္ဗေန စက္ခုနာ၊
ဟဒယံ ပန နိဿာယ၊ ဝတ္တမာနံ တု လောဟိတံ။
ဒိသွာ ပရဿ ဝိညေယျံ၊
ဟောတိ စိတ္တံ တု ဘိက္ခုနာ၊
သောမနဿယုတေ စိတ္တေ၊
လောဟိတံ လောဟိတံ သိယာ။
ဒေါမနဿယုတေ စိတ္တေ၊ ဝတ္တမာနေ တု ကာဠကံ၊
ဥပေက္ခာသဟိတေ စိတ္တေ၊ တိလတေလူပမံ သိယာ။
တသ္မာ ¶ ပရဿ သတ္တဿ၊ ဒိသွာ ဟဒယလောဟိတံ၊
စေတောပရိယဉာဏံ တံ၊ ကာတဗ္ဗံ ထာမတံ ဂတံ။
ဧဝံ ထာမဂတေ တသ္မိံ၊ ယထာနုက္ကမတော ပန၊
စိတ္တမေဝ ဝိဇာနာတိ၊ ဝိနာ လောဟိတဒဿနံ။
ကာမာဝစရစိတ္တဉ္စ၊ ရူပါရူပေသု မာနသံ၊
သဗ္ဗမေဝ ဝိဇာနာတိ၊ သရာဂါဒိပ္ပဘေဒကံ။
စေတောပရိယဉာဏံ။
ပုဗ္ဗေနိဝါသဉာဏေန၊ ကတ္တဗ္ဗာ တဒနုဿတိ၊
တံ သမ္ပာဒေတုကာမေန၊ အာဒိကမ္မိကဘိက္ခုနာ၊
ဈာနာနိ ပန စတ္တာရိ၊ သမာပဇ္ဇာနုပုဗ္ဗတော။
အဘိညာပါဒကဇ္ဈာနာ၊ ဝုဋ္ဌာယ ဟိ တတော ပုန၊
ဘိက္ခုနာ ဝဇ္ဇိတဗ္ဗာဝ၊ နိသဇ္ဇာ သဗ္ဗပစ္ဆိမာ။
တတော ¶ ¶ ပဘုတိ သဗ္ဗမ္ပိ၊ ပဋိလောမက္ကမာ ပန၊
သဗ္ဗမာဝဇ္ဇိတဗ္ဗံ တံ၊ ဒိဝသေ ရတ္တိယံ ကတံ။
ပဋိလောမက္ကမေနေဝ၊ ဒုတိယေ တတိယေပိ စ၊
ဒိဝသေ ပက္ခမာသေသု၊ တထာ သံဝစ္ဆရေသုပိ။
ယာဝ အသ္မိံ ဘဝေ သန္ဓိ၊ တာဝ တေန စ ဘိက္ခုနာ၊
ကတမာဝဇ္ဇိတဗ္ဗံ တံ၊ ပုရိမသ္မိံ ဘဝေပိ စ။
စုတိက္ခဏေပိ နိဗ္ဗတ္တံ၊ နာမရူပဉ္စ သာဓုကံ၊
ဧဝမာဝဇ္ဇိတေ တသ္မိံ၊ နာမရူပေ ယဒါ ပန။
တဒေဝါရမ္မဏံ ကတွာ၊ နာမရူပံ စုတိက္ခဏေ၊
မနောဒွါရေ မနက္ကာရော၊ ဥပ္ပဇ္ဇတိ တဒါ ပန။
အာဝဇ္ဇနေ နိရုဒ္ဓသ္မိံ၊ တဒေဝါရမ္မဏံ ပန၊
ကတွာ ဇဝနစိတ္တာနိ၊ ဟောန္တိ စတ္တာရိ ပဉ္စ ဝါ၊
ပုဗ္ဗေ ဝုတ္တနယေနေဝ၊ သေသံ ဉေယျံ ဝိဘာဝိနာ။
ပရိကမ္မာဒိနာမာနိ၊ ပုရိမာနိ ဘဝန္တိ တု၊
ပစ္ဆိမံ အပ္ပနာစိတ္တံ၊ ရူပါဝစရိကံ ဘဝေ။
တေန စိတ္တေန ယံ ဉာဏံ၊ သံယုတ္တံ တေန ယာ ပန၊
သံယုတ္တာ သတိ သာ ပုဗ္ဗေ-နိဝါသာနုဿတီရိတာ။
ပုဗ္ဗေနိဝါသာနုဿတိဉာဏံ။
ရူပံ ပဿိတုကာမေန၊ ဘိက္ခုနာ ဒိဗ္ဗစက္ခုနာ၊
ကသိဏာရမ္မဏံ ဈာနံ၊ အဘိညာပါဒကံ ပန။
အဘိနီဟာရက္ခမံ ကတွာ၊ တေဇောကသိဏမေဝ ဝါ၊
ဩဒါတကသိဏံ ဝါပိ၊ အာလောကကသိဏမ္ပိ ဝါ။
ဣမေသု ¶ ကတပုညေဟိ၊ ကသိဏေသု စ တီသုပိ၊
အာလောကကသိဏံ ဧတ္ထ၊ သေဋ္ဌန္တိ ပရိဒီပိတံ။
တသ္မာ ¶ ¶ တမိတရံ ဝါပိ၊ ဥပ္ပာဒေတွာ ယထာက္ကမံ၊
ဥပစာရဘူမိယံယေဝ၊ ဌတွာ တံ ပန ပဏ္ဍိတော။
ဝဍ္ဎေတွာန ဌပေတဗ္ဗံ၊ န ဥပ္ပာဒေယျ အပ္ပနံ၊
ဥပ္ပာဒေတိ သစေ ဟောတိ၊ ပါဒကဇ္ဈာနနိဿိတံ။
ဈာနဿ ဝဍ္ဎိတဿန္တော-ဂတံ ရူပံ တု ယောဂိနာ၊
ပဿိတဗ္ဗံ ဘဝေ ရူပံ၊ ပဿတော ပန တဿ တံ။
ပရိကမ္မဿ ဝါရော ဟိ၊ အတိက္ကမတိ တာဝဒေ၊
အာလောကောပိ တတော တဿ၊ ခိပ္ပမန္တရဓာယတိ။
တသ္မိံ အန္တရဟိတေ ရူပ-ဂတမ္ပိ စ န ဒိဿတိ၊
တေနာထ ပါဒကဇ္ဈာနံ၊ ပဝိသိတွာ တတော ပုန။
ဝုဋ္ဌာယ ပန အာလောကော၊ ဖရိတဗ္ဗောဝ ဘိက္ခုနာ၊
ဧဝံ အနုက္ကမေနေဝ၊ အာလောကော ထာမဝါ သိယာ။
‘‘အာလောကော ဧတ္ထ ဟောတူ’’တိ၊
ယတ္တကံ ဌာနမေဝ သော၊
ပရိစ္ဆိန္ဒတိ တတ္ထေဝ၊
အာလောကော ပန တိဋ္ဌတိ။
ဒိဝသမ္ပိ နိသီဒိတွာ၊ ပဿတော ဟောတိ ဒဿနံ၊
တိဏုက္ကာယ ဂတော မဂ္ဂံ၊ ပုရိသေတ္ထ နိဒဿနံ။
ဥပ္ပာဒနက္ကမောပိဿ၊ တတြာယံ ဒိဗ္ဗစက္ခုနော၊
ဝုတ္တပ္ပကာရရူပံ တံ၊ ကတွာ အာရမ္မဏံ ပန။
မနောဒွါရေ မနက္ကာရေ၊ ဇာတေ ယာနိ တဒေဝ စ၊
ရူပံ အာရမ္မဏံ ကတွာ၊ ဇာယန္တိ ဇဝနာနိ ဟိ။
ကာမာဝစရစိတ္တာနိ ¶ ၊ တာနိ စတ္တာရိ ပဉ္စ ဝါ၊
ဟေဋ္ဌာ ဝုတ္တနယေနေဝ၊ သေသံ ဉေယျံ ဝိဘာဝိနာ။
အတ္ထသာဓကစိတ္တံ တံ၊ စတုတ္ထဇ္ဈာနိကံ မတံ၊
တံစိတ္တသံယုတံ ဉာဏံ၊ ဒိဗ္ဗစက္ခုန္တိ ဝုစ္စတိ။
အနာဂတံသဉာဏဿ ¶ ၊ ယထာကမ္မုပဂဿ စ၊
ပရိကမ္မံ ဝိသုံ နတ္ထိ၊ ဣဇ္ဈန္တိ ဒိဗ္ဗစက္ခုနာ။
စုတူပပါတဉာဏမ္ပိ၊ ဒိဗ္ဗစက္ခုန္တိ ဝါ ပန၊
အတ္ထတော ဧကမေဝေဒံ၊ ဗျဉ္ဇနေ ပန နာနတာ။
ဒိဗ္ဗစက္ခုဉာဏံ။
ယောဓ သုဏာတိ ကရောတိ စ စိတ္တေ၊
ဂန္ထမိမံ ပရမံ ပန ဘိက္ခု၊
သော အဘိဓမ္မမဟဏ္ဏဝပါရံ၊
ယာတိ အနေန တရေန တရိတွာ။
ဣတိ အဘိဓမ္မာဝတာရေ အဘိညာနိဒ္ဒေသော နာမ
သောဠသမော ပရိစ္ဆေဒေါ။