📜
၁၇။ သတ္တရသမော ပရိစ္ဆေဒေါ
အဘိညာရမ္မဏနိဒ္ဒေသော
အနာဂတံသဉာဏဉ္စ ¶ ၊ ယထာကမ္မုပဂမ္ပိ စ၊
ပဉ္စ ဣဒ္ဓိဝိဓာဒီနိ၊ သတ္တာဘိညာ ဣမာ ပန။
ဧတာသံ ¶ ပန သတ္တန္နံ၊ အဘိညာနမိတော ပရံ၊
ပဝက္ခာမိ သမာသေန၊ အာရမ္မဏဝိနိစ္ဆယံ။
အာရမ္မဏတ္တိကာ ဝုတ္တာ၊ ယေ စတ္တာရော မဟေသိနာ၊
သတ္တန္နမေတ္ထ ဉာဏာနံ၊ သမ္ပဝတ္တိံ သုဏာထ မေ။
တတ္ထ ဣဒ္ဓိဝိဓဉာဏံ၊ ပရိတ္တာဒီသု သတ္တသု၊
အာရမ္မဏဝိဘာဂေသု၊ ပဝတ္တတိ ကထံ ပန။
ကာယေနာဒိဿမာနေန၊ ဂန္တုကာမော ယဒါဘဝေ၊
စိတ္တသန္နိဿိတံ ကတွာ၊ ကာယံ စိတ္တဝသေန တံ။
မဟဂ္ဂတေ ¶ စ စိတ္တသ္မိံ၊ သမာရောပေတိ သော တဒါ၊
ကာယာရမ္မဏတော ဉာဏံ၊ ပရိတ္တာရမ္မဏံ သိယာ။
ဒိဿမာနေန ကာယေန၊ ဂန္တုကာမော ယဒါ ဘဝေ၊
ကာယသန္နိဿိတံ ကတွာ၊ စိတ္တံ ကာယဝသေန တံ။
ပါဒကဇ္ဈာနစိတ္တံ တံ၊ ကာယေ ရောပေတိ သော တဒါ၊
ဈာနာရမ္မဏတော ဉာဏံ၊ တံ မဟဂ္ဂတဂေါစရံ။
အနာဂတမတီတဉ္စ၊ ကရောတိ ဝိသယံ ယဒါ၊
အတီတာရမ္မဏံ ဟောတိ၊ တဒါနာဂတဂေါစရံ။
ကာယေန ဒိဿမာနေန၊ ဂမနေ ပန ဘိက္ခုနော၊
ပစ္စုပ္ပန္နော ဘဝေ တဿ၊ ဂေါစရောတိ ဝိနိဒ္ဒိသေ။
ကာယံ စိတ္တဝသေနာပိ၊ စိတ္တံ ကာယဝသေန ဝါ၊
ပရိဏာမနကာလသ္မိံ၊ အဇ္ဈတ္တာရမ္မဏံ သိယာ။
ဗဟိဒ္ဓါရမ္မဏံ ဟောတိ၊ ဗဟိဒ္ဓါရူပဒဿနေ၊
ဧဝမိဒ္ဓိဝိဓံ ဉာဏံ၊ သမ္ပဝတ္တတိ သတ္တသု။
ပစ္စုပ္ပန္နေ ပရိတ္တေ စ၊ ဗဟိဒ္ဓဇ္ဈတ္တိကေသုပိ၊
စတူသွေတေသု ဓမ္မေသု၊ ဒိဗ္ဗသောတံ ပဝတ္တတိ။
ပစ္စုပ္ပန္နော ¶ ¶ ပရိတ္တော စ၊ သဒ္ဒေါ အာရမ္မဏံ ယတော၊
ပရိတ္တာရမ္မဏံ ပစ္စု-ပ္ပန္နာရမ္မဏတံ ဂတံ။
အတ္တနော ကုစ္ဆိသဒ္ဒဿ၊ သဝနေပိ ပရဿ စ၊
အဇ္ဈတ္တာရမ္မဏဉ္စေဝ၊ ဗဟိဒ္ဓါရမ္မဏမ္ပိ စ။
စေတောပရိယဉာဏမ္ပိ၊ ပရိတ္တာဒီသု အဋ္ဌသု၊
အာရမ္မဏဝိဘာဂေသု၊ ပဝတ္တတိ ကထံ ပန။
ပရိတ္တာရမ္မဏံ ဟောတိ၊ ပရိတ္တာနံ ပဇာနနေ၊
ဇာနနေ မဇ္ဈိမာနံ တု၊ တံ မဟဂ္ဂတဂေါစရံ။
ဇာနနေ ပန မဂ္ဂဿ၊ ဖလဿာပိ ပဇာနနေ၊
တဒါ ပနဿ ဉာဏဿ၊ အပ္ပမာဏောဝ ဂေါစရော။
တံ ¶ မဂ္ဂါရမ္မဏံ ဟောတိ၊ မဂ္ဂစိတ္တဿ ဇာနနေ၊
ပရိယာယေနေဝေတဿ၊ မဂ္ဂါရမ္မဏတာ မတာ။
အတီတေ သတ္တဒိဝသ-ဗ္ဘန္တရေ စ ယဒါ ပန၊
အနာဂတေ တထာ သတ္တ-ဒိဝသဗ္ဘန္တရေပိ စ။
ပရေသံ ပန စိတ္တဿ၊ ဇာနနေ သမုဒီရိတံ၊
အတီတာရမ္မဏဉ္စေဝ၊ တဒါနာဂတဂေါစရံ။
ကထဉ္စ ပန တံ ပစ္စုပ္ပန္နဂေါစရတံ ဂတံ၊
ပစ္စုပ္ပန္နံ တိဓာ ဝုတ္တံ၊ ခဏသန္တတိအဒ္ဓတော။
တတ္ထ တိက္ခဏသမ္ပတ္တံ၊ ပစ္စုပ္ပန္နခဏာဒိကံ၊
ဧကဒွေသန္တတိဝါရပရိယာပန္နမိဒံ ပန။
သန္တတိပစ္စုပ္ပန္နန္တိ၊ အာဟု သန္တတိကောဝိဒါ၊
ဧကဗ္ဘဝပရိစ္ဆိန္နံ၊ ပစ္စုပ္ပန္နန္တိ ပစ္ဆိမံ။
ခဏာဒိကတ္တယံ ပစ္စု-ပ္ပန္နံ တမာဟု ကေစိဓ၊
စေတောပရိယဉာဏဿ၊ ဟောတိ အာရမ္မဏံ ဣတိ။
ယထာ ¶ စ ပုပ္ဖမုဋ္ဌိမှိ၊ ဥက္ခိတ္တေ ဂဂနေ ပန၊
အဝဿံ ဧကမေကဿ၊ ဝဏ္ဋံ ဝဏ္ဋေန ဝိဇ္ဈတိ။
ဧဝံ မဟာဇနဿာပိ၊ စိတ္တေ အာဝဇ္ဇိတေ ပန၊
ဧကဿ စိတ္တမေကေန၊ အဝဿံ ပန ဝိဇ္ဈတိ။
ယေနာဝဇ္ဇတိ စိတ္တေန၊ ယေန ဇာနာတိ စေတသာ၊
တေသံ ဒွိန္နံ သဟဋ္ဌာနာ-ဘာဝတော တံ န ယုဇ္ဇတိ။
ဇဝနာဝဇ္ဇနာနံ တု၊ နာနာရမ္မဏပတ္တိတော၊
အနိဋ္ဌေ ပန ဟိ ဌာနေ၊ အယုတ္တန္တိ ပကာသိတံ။
တသ္မာ သန္တတိအဒ္ဓါန-ပစ္စုပ္ပန္နာနမေဝ တု၊
ဝသေန ပစ္စုပ္ပန္နံ တံ၊ ဟောတိ အာရမ္မဏံ ဣဒံ။
ပစ္စုပ္ပန္နမ္ပိ အဒ္ဓါချံ၊ ဣဒံ ဇဝနဝါရတော၊
ဒီပေတဗ္ဗန္တိ နိဒ္ဒိဋ္ဌံ၊ တတြာယံ ဒီပနာနယော။
ယဒါ ¶ ¶ ပရဿ စိတ္တဉှိ၊ ဉာတုမာဝဇ္ဇတိဒ္ဓိမာ၊
အာဝဇ္ဇနမနော တဿ၊ ပစ္စုပ္ပန္နခဏဝှယံ။
အာရမ္မဏံ တဒါ ကတွာ၊ တေန သဒ္ဓိံ နိရုဇ္ဈတိ၊
ဇဝနာနိ ဟိ ဇာယန္တေ၊ တဿ စတ္တာရိ ပဉ္စ ဝါ။
ဧတေသံ ပစ္ဆိမံ စိတ္တံ၊ ဣဒ္ဓိစိတ္တမုဒီရိတံ၊
ကာမာဝစရစိတ္တာနိ၊ သေသာနီတိ ဝိနိဒ္ဒိသေ။
ဧတေသံ ပန သဗ္ဗေသံ၊ နိရုဒ္ဓံ တု တဒေဝ စ၊
စိတ္တံ အာရမ္မဏံ ဟောတိ၊ တသ္မာ သဗ္ဗာနိ တာနိပိ။
ဧကာရမ္မဏတံ ယန္တိ၊ န နာနာရမ္မဏာနိ ဟိ၊
အဒ္ဓါဝသာ ဘဝေ ပစ္စု-ပ္ပန္နာရမ္မဏတော ပန။
ဧကာရမ္မဏဘာဝေပိ၊ ဣဒ္ဓိမာနသမေဝ စ၊
ပရဿ စိတ္တံ ဇာနာတိ၊ နေတရာနိ ယထာ ပန။
စက္ခုဒွါရေ ¶ တု ဝိညာဏံ၊ ရူပံ ပဿတိ နေတရံ၊
ဧဝမေဝ စ တံ ဣဒ္ဓိ-စိတ္တမေဝ စ ဇာနာတိ။
ပရစိတ္တာရမ္မဏတ္တာ၊ ဗဟိဒ္ဓါရမ္မဏံ သိယာ၊
စေတောပရိယဉာဏမ္ပိ၊ အဋ္ဌသွေဝ ပဝတ္တတိ။
ပုဗ္ဗေနိဝါသဉာဏမ္ပိ၊ ပရိတ္တာဒီသု အဋ္ဌသု၊
အာရမ္မဏဝိဘာဂေသု၊ ပဝတ္တတိ ကထံ ပန။
ကာမာဝစရခန္ဓာနံ၊ သမနုဿရဏေ ပန၊
ပရိတ္တာရမ္မဏံယေဝ၊ ဟောတီတိ ပရိဒီပယေ။
ရူပါဝစရိကာရုပ္ပခန္ဓာနုဿရဏေ ပန၊
ဘဝတီတိ ဟိ ဉာတဗ္ဗံ၊ တံ မဟဂ္ဂတဂေါစရံ။
အတီတေ အတ္တနာ မဂ္ဂံ၊ ဘာဝိတံ တု ဖလမ္ပိ ဝါ၊
သမနုဿရတော ဧဝ-ပ္ပမာဏာရမ္မဏံ သိယာ။
သမနုဿရတော မဂ္ဂံ၊ မဂ္ဂါရမ္မဏမေဝ တံ၊
အတီတာရမ္မဏံယေဝ၊ ဟောတိ ဧကန္တတော ဣဒံ။
စေတောပရိယဉာဏမ္ပိ ¶ ၊ ယထာကမ္မုပဂမ္ပိ စ၊
အတီတာရမ္မဏာ ဟောန္တိ၊ ကိဉ္စာပိ အထ ခေါ ပန။
စေတောပရိယဉာဏဿ၊ သတ္တဒ္ဒိဝသဗ္ဘန္တရံ၊
အတီတံ စိတ္တမေဝဿ၊ အာရမ္မဏမုဒီရိတံ။
အတီတေ စေတနာမတ္တံ၊ ယထာကမ္မုပဂဿပိ၊
ပုဗ္ဗေနိဝါသဉာဏဿ၊ နတ္ထိ ကိဉ္စိ အဂေါစရံ။
အဇ္ဈတ္တာရမ္မဏံ အတ္တ-ခန္ဓာနုဿရဏေ သိယာ၊
ဗဟိဒ္ဓါရမ္မဏံ အည-ခန္ဓာနုဿရဏေ ဘဝေ။
သရဏေ နာမဂေါတ္တဿ၊ တံ နဝတ္တဗ္ဗဂေါစရံ၊
ပုဗ္ဗေနိဝါသဉာဏမ္ပိ၊ အဋ္ဌသွေဝ ပဝတ္တတိ။
ပစ္စုပ္ပန္နေ ¶ ပရိတ္တေ စ၊ ဗဟိဒ္ဓဇ္ဈတ္တိကေသုပိ၊
စတူသွေတေသု ဓမ္မေသု၊ ဒိဗ္ဗစက္ခု ပဝတ္တတိ။
ဒိဗ္ဗသောတသမံ ¶ ဒိဗ္ဗ-စက္ခုအာရမ္မဏက္ကမေ၊
ရူပံ သဒ္ဒေါတိ ဒွိန္နံ တု၊ အယမေဝ ဝိသေသတာ။
အနာဂတံသဉာဏမ္ပိ၊ ပရိတ္တာဒီသု အဋ္ဌသု၊
အာရမ္မဏဝိဘာဂေသု၊ ပဝတ္တတိ ကထံ ပန။
နိဗ္ဗတ္တိဿတိ ယံ ကာမာ-ဝစရေတိ ပဇာနတော၊
ပရိတ္တာရမ္မဏံ ဟောတိ၊ ရူပါရူပေသွနာဂတေ။
နိဗ္ဗတ္တိဿတိ ယဉ္စာပိ၊ သိယာ မဟဂ္ဂတဂေါစရံ၊
ဘာဝေဿတိ အယံ မဂ္ဂံ၊ ဖလံ သစ္ဆိကရိဿတိ။
ဧဝံ ပဇာနနေ အပ္ပ-မာဏာရမ္မဏတံ ဘဝေ၊
မဂ္ဂံ ဘာဝေဿတိစ္စေဝ၊ ဇာနနေ မဂ္ဂဂေါစရံ။
ဧကန္တေန ဣဒံ ဉာဏံ၊ ဟောတာနာဂတဂေါစရံ၊
စေတောပရိယံ တု ကိဉ္စာပိ၊ ဟောတာနာဂတဂေါစရံ။
အထ ခေါ ပန တံ သတ္တ-ဒိဝသဗ္ဘန္တရံ ပန၊
စိတ္တမေဝ စ ဇာနာတိ၊ န ဟိ တံ အညဂေါစရံ။
အနာဂတံသဉာဏဿ ¶ ၊ အနာဂတံသဂေါစရံ၊
‘‘အဟံ ဒေဝေါ ဘဝိဿာမိ’’-စ္စေဝမဇ္ဈတ္တဂေါစရံ။
‘‘တိဿော ဖုဿော အမုတြာယံ၊
နိဗ္ဗတ္တိဿတိနာဂတေ’’၊
ဣစ္စေဝံ ဇာနနေ တဿ၊
ဗဟိဒ္ဓါရမ္မဏံ သိယာ။
ဇာနနေ နာမဂေါတ္တဿ၊ ယဿ ကဿစိနာဂတေ၊
ပုဗ္ဗေနိဝါသဉာဏံဝ၊ တံ နဝတ္တဗ္ဗဂေါစရံ။
ယထာကမ္မုပဂဉာဏံ ¶ ၊ ပရိတ္တာဒီသု ပဉ္စသု၊
အာရမ္မဏဝိဘာဂေသု၊ ပဝတ္တတိ ကထံ ပန။
ဇာနနေ ကာမကမ္မဿ၊ ပရိတ္တာရမ္မဏံ သိယာ၊
တထာ မဟဂ္ဂတကမ္မဿ၊ တံ မဟဂ္ဂတဂေါစရံ။
အတီတမေဝ ဇာနာတိ၊ တသ္မာ စာတီတဂေါစရံ၊
အဇ္ဈတ္တာရမ္မဏံ ဟောတိ၊ အတ္တနော ကမ္မဇာနနေ။
ဗဟိဒ္ဓါရမ္မဏံ ဟောတိ၊ ပရကမ္မပဇာနနေ၊
ဧဝံ ပဝတ္တိ ဉာတဗ္ဗာ၊ ယထာကမ္မုပဂဿပိ။
သတ္တန္နမ္ပိ အဘိညာနံ၊ ဝုတ္တော အာရမ္မဏက္ကမော၊
ဧတ္ထ ဝုတ္တနယေနေဝ၊ ဝေဒိတဗ္ဗော ဝိဘာဝိနာ။
ဝိဝိဓတ္ထဝဏ္ဏပဒေဟိ သမ္ပန္နံ၊
မဓုရတ္ထမတိနီဟရံ ဂန္ထံ၊
သောတုဇနဿ ဟဒယပီတိကရံ၊
သုဏေယျ ကောစိ မနုဇော သစေတနော။
ဣတိ အဘိဓမ္မာဝတာရေ အဘိညာရမ္မဏနိဒ္ဒေသော နာမ
သတ္တရသမော ပရိစ္ဆေဒေါ။