📜
၁၈။ အဋ္ဌာရသမော ပရိစ္ဆေဒေါ
ဒိဋ္ဌိဝိသုဒ္ဓိနိဒ္ဒေသော
သမာဓိံ ¶ ¶ ပန သာဘိညံ၊ ဘာဝေတွာ တဒနန္တရံ၊
ဘာဝေတဗ္ဗာ ယတော ပညာ၊ ဘိက္ခုနာ တေန ဓီမတာ။
တတောဟံ ¶ ဒါနိ ဝက္ခာမိ၊ ပညာဘာဝနမုတ္တမံ၊
သမာသေနေဝ ဘိက္ခူနံ၊ ပရံ ပီတိသုခါဝဟံ။
ကာ ပညာ ပန ကော စတ္ထော၊
ကိမဿာ လက္ခဏာဒိကံ၊
ကတိဓာ သာ ကထံ တေန၊
ဘာဝေတဗ္ဗာတိ ဝုစ္စတေ။ –
ပညာ ဝိပဿနာပညာ၊ ပုညစိတ္တသမာယုတာ၊
ပဇာနာတီတိ ပညာ သာ၊ ဇာနနာ ဝါ ပကာရတော။
သညာဝိညာဏပညာနံ၊ ကော ဝိသေသော ကိမန္တရံ၊
သညာဝိညာဏပညာနံ၊ ဇာနနတ္တေ သမေပိ စ။
ယာ သဉ္ဇာနနမတ္တံဝ၊ သညာ နီလာဒိတော ပန၊
လက္ခဏပ္ပဋိဝေဓံ တု၊ ကာတုံ သက္ကောတိ နေဝ သာ။
ဝိညာဏံ ပန ဇာနာတိ၊ နီလပီတာဒိဂေါစရံ၊
သက္ကောတိပိ အနိစ္စာဒိလက္ခဏံ ပဋိဝိဇ္ဈိတုံ။
ဥဿက္ကိတွာ န သက္ကောတိ၊ မဂ္ဂံ ပါပေတုမေဝ တံ၊
ပညာ ဝုတ္တနယံ ကာတုံ၊ သက္ကောတိ တိဝိဓမ္ပိ တံ။
ဣမေသံ ပန တိဏ္ဏမ္ပိ၊ ဝိသေသော သမုဒီရိတော၊
သဗ္ဗေသံ ပန ဓမ္မာနံ၊ သဘာဝပဋိဝေဓနံ။
လက္ခဏံ ပန ပညာယ၊ လက္ခဏညူဟိ ဒီပိတံ၊
သမ္မောဟနန္ဓကာရဿ၊ ဝိဒ္ဓံသနရသာ မတာ။
အသမ္မောဟပစ္စုပဋ္ဌာနာ ¶ ၊ သမာဓာသန္နကာရဏာ၊
ဧဝမေတ္ထ စ ဝိညေယျာ၊ ပညာယ လက္ခဏာဒိကာ။
ကတိဓာတိ ¶ ဧတ္ထ –
လက္ခဏေနေကဓာ ဝုတ္တာ၊
လောကိကာလောကိကာ ဒွိဓာ၊
လောကိယေနေတ္ထ မဂ္ဂေန၊
ယုတ္တာ သာ လောကိကာ သိယာ။
လောကုတ္တရေန ¶ မဂ္ဂေန၊ ယုတ္တာ လောကုတ္တရာ မတာ၊
တိဝိဓာပိ သိယာ ပညာ၊ စိန္တာသုတမယာဒိတော။
တတ္ထတ္တနောဝ စိန္တာယ၊ နိပ္ဖန္နတ္တာတိ တဿ သာ၊
ဟောတိ စိန္တာမယာ ပညာ၊ ဘူရိပညေန ဒေသိတာ။
ပရတော ပန သုတွာန၊ လဒ္ဓါ ပညာ အယံ ဣဓ၊
သုတေနေဝ စ နိပ္ဖန္နာ၊ ပညာ သုတမယာ မတာ။
ယထာ ဝါပိ တထာ စေတ္ထ၊ ဘာဝနာယ ဝသေန တု၊
နိပ္ဖန္နာ အပ္ပနာပတ္တာ၊ ပညာ သာ ဘာဝနာမယာ။
ပဋိသမ္ဘိဒါစတုက္ကဿ၊ ဝသေန စတုဓာ သိယာ၊
အတ္ထဓမ္မနိရုတ္တီသု၊ ဉာဏံ ဉာဏေသု တီသုပိ။
ယံ ကိဉ္စိ ပစ္စယုပ္ပန္နံ၊ ဝိပါကာ စ ကြိယာ တထာ၊
နိဗ္ဗာနံ ဘာသိတတ္ထော စ၊ ပဉ္စေတေ အတ္ထသညိတာ။
ဖလနိဗ္ဗတ္တကော ဟေတု၊ အရိယမဂ္ဂေါ စ ဘာသိတံ၊
ကုသလာကုသလဉ္စေတိ၊ ပဉ္စေတေ ဓမ္မသညိတာ။
တသ္မိံ အတ္ထေ စ ဓမ္မေ စ၊ ယာ သဘာဝနိရုတ္တိ တု၊
နိရုတ္တီတိ စ နိဒ္ဒိဋ္ဌာ၊ နိရုတ္တိကုသလေန သာ။
ဉာဏံ အာရမ္မဏံ ကတွာ၊ တိဝိဓံ ပစ္စဝေက္ခတော၊
တေသု ဉာဏေသု ယံ ဉာဏံ၊ ပဋိဘာနန္တိ တံ မတံ။
ပရိယတ္တိပရိပုစ္ဆာဟိ ¶ ¶ ၊ သဝနာဓိဂမေဟိ စ၊
ပုဗ္ဗယောဂေန ဂစ္ဆန္တိ၊ ပဘေဒံ ပဋိသမ္ဘိဒါ။
ကထံ ဘာဝေတဗ္ဗာတိ ဧတ္ထ –
ခန္ဓာဒီသု ဟိ ဓမ္မေသု၊ ဘူမိဘူတေသု ယောဂိနာ၊
ဥဂ္ဂဟာဒိဝသေနေတ္ထ၊ ကတွာ ပရိစယံ ပန။
သီလံ စိတ္တဝိသုဒ္ဓိဉ္စ၊ သမ္ပာဒေတွာ တတော ပရံ၊
ဒိဋ္ဌိသုဒ္ဓါဒယော ပဉ္စ၊ သမ္ပာဒေန္တေန သုဒ္ဓိယာ။
တာယ ပညာယ ယုတ္တေန၊ ဘီတေန ဇနနာဒိတော၊
ဘာဝေတဗ္ဗာ ဘဝါဘာဝံ၊ ပတ္ထယန္တေန ဘိက္ခုနာ။
ရူပဉ္စ ဝေဒနာ သညာ၊ သင်္ခါရာ စေဝ သဗ္ဗသော၊
ဝိညာဏဉ္စေတိ ပဉ္စေတေ၊ ခန္ဓာ သမ္ဗုဒ္ဓဒေသိတာ။
တတ္ထ ယံ ကိဉ္စိ ရူပံ တံ၊ အတီတာနာဂတာဒိကံ၊
အဇ္ဈတ္တံ ဝါ ဗဟိဒ္ဓါ ဝါ၊ သုခုမောဠာရိကမ္ပိ ဝါ။
ဟီနံ ဝါပိ ပဏီတံ ဝါ၊ ယံ ဒူရေ ယဉ္စ သန္တိကေ၊
သဗ္ဗံ တမေကတော ကတွာ၊ ရူပက္ခန္ဓောတိ ဝုစ္စတိ။
ဣတရေသုပိ ယံ ကိဉ္စိ၊ တံ ဝေဒယိတလက္ခဏံ၊
သဗ္ဗံ တမေကတော ကတွာ၊ ဝေဒနာက္ခန္ဓတာ ကတာ။
စိတ္တဇံ ¶ ပန ယံ ကိဉ္စိ၊ တံ သဉ္ဇာနနလက္ခဏံ၊
သဗ္ဗံ တမေကတော ကတွာ၊ သညာက္ခန္ဓောတိ ဝုစ္စတိ။
ယံ ကိဉ္စိ စိတ္တသမ္ဘူတံ၊ အဘိသင်္ခါရလက္ခဏံ၊
သဗ္ဗံ တမေကတော ကတွာ၊ သင်္ခါရက္ခန္ဓတာ ကတာ။
တတ္ထ စိတ္တံ တု ယံ ကိဉ္စိ၊ တံ ဝိဇာနနလက္ခဏံ၊
သဗ္ဗံ တမေကတော ကတွာ၊ ဝိညာဏက္ခန္ဓတာ ကတာ။
စတ္တာရော ¶ စ မဟာဘူတာ၊ ဥပါဒါ စတုဝီသတိ၊
အဋ္ဌဝီသတိဓာ စေတံ၊ ရူပံ ရူပန္တိ ဂဏှတိ။
ဧကာသီတိယာ ¶ စိတ္တေန၊ သံယုတ္တာ ဝေဒနာဒယော၊
ဝေဒနာသညာသင်္ခါရ-ဝိညာဏက္ခန္ဓသညိတာ။
စတ္တာရောရူပိနော ခန္ဓေ၊ နာမန္တိ ပရိဂဏှတိ၊
ရူပက္ခန္ဓော ဘဝေ ရူပံ၊ နာမက္ခန္ဓာ အရူပိနော။
ရုပ္ပနလက္ခဏံ ရူပံ၊ နာမံ နမနလက္ခဏံ၊
ဣတိ သင်္ခေပတော နာမ-ရူပံ သော ပရိဂဏှတိ။
ဖာလေန္တော ဝိယ တာလဿ၊ ကန္ဒံ တု ယမကံ ဒွိဓာ၊
ဝဝတ္ထပေတိ နာမဉ္စ၊ ရူပဉ္စာတိ ဒွိဓာ ပန။
နာမတော ရူပတော အညော၊
သတ္တော ဝါ ပုဂ္ဂလောပိ ဝါ၊
အတ္တာ ဝါ ကောစိ နတ္ထီတိ၊
နိဋ္ဌံ ဂစ္ဆတိ သဗ္ဗဒါ။
ဧဝံ ဝဝတ္ထပေတွာ သော၊ နာမရူပံ သဘာဝတော၊
သတ္တသမ္မောဟဃာတတ္ထံ၊ ဗဟုသုတ္တဝသေနိဓ။
နာမရူပမတ္တညေဝ၊ နတ္ထိ ကောစိဓ ပုဂ္ဂလော၊
ဧဝမေတ္ထ ပဏ္ဍိတော ပေါသော၊ ဝဝတ္ထပေတိ တံ ပန။
ဝုတ္တံ ဟေတံ –
‘‘ယထာပိ အင်္ဂသမ္ဘာရာ၊
ဟောတိ သဒ္ဒေါ ရထော ဣတိ၊
ဧဝံ ခန္ဓေသု သန္တေသု၊
ဟောတိ သတ္တောတိ သမ္မုတီ’’တိ။
ယထာပိ ¶ ဒါရုယန္တမ္ပိ၊ နိဇ္ဇီဝဉ္စ နိရီဟကံ၊
ဒါရုရဇ္ဇုသမာယောဂေ၊ တံ ဂစ္ဆတိပိ တိဋ္ဌတိ။
တထေဒံ နာမရူပမ္ပိ၊ နိဇ္ဇီဝဉ္စ နိရီဟကံ၊
အညမညသမာယောဂေ၊ တံ ဂစ္ဆတိပိ တိဋ္ဌတိ။
တေနာဟု ပေါရာဏာ –
‘‘နာမဉ္စ ¶ ရူပဉ္စ ဣဓတ္ထိ သစ္စတော၊
န ဟေတ္ထ သတ္တော မနုဇော စ ဝိဇ္ဇတိ၊
သုညံ ဣဒံ ယန္တမိဝါဘိသင်္ခတံ၊
ဒုက္ခဿ ပုဉ္ဇော တိဏကဋ္ဌသာဒိသော’’တိ။
အညမညူပနိဿာယ ¶ ၊ ဒဏ္ဍကေသု ဌိတေသု ဟိ၊
ဧကသ္မိံ ပတမာနေ တု၊ တထေဝ ပတတီတရော။
တေနာဟု ပေါရာဏာ –
‘‘ယမကံ နာမရူပဉ္စ၊ ဥဘော အညောညနိဿိတာ၊
ဧကသ္မိံ ဘိဇ္ဇမာနသ္မိံ၊ ဥဘော ဘိဇ္ဇန္တိ ပစ္စယာ’’တိ။
ဥတိန္နံ နာမရူပါနံ၊ နာမံ နိတ္တေဇမေတ္ထ တံ၊
သကေနေဝ ဟိ တေဇေန၊ န သက္ကောတိ ပဝတ္တိတုံ။
န ဗျာဟရတိ နော သေတိ၊ န တိဋ္ဌတိ န ဂစ္ဆတိ၊
န ဘေဒေတိ န စောရေတိ၊ န ဘုဉ္ဇတိ န ခါဒတိ။
တထာ ရူပမ္ပိ နိတ္တေဇံ၊ ဝိနာ နာမဉ္စ သဗ္ဗထာ၊
သကေနေဝ ဟိ တေဇေန၊ န သက္ကောတိ ပဝတ္တိတုံ။
ဘုဉ္ဇာမီတိ ပိဝါမီတိ၊ ခါဒါမီတိ တထေဝ စ၊
ရောဒါမီတိ ဟသာမီတိ၊ ရူပဿေတံ န ဝိဇ္ဇတိ။
နာမံ ¶ နိဿာယ ရူပံ တု၊ ရူပံ နိဿာယ နာမကံ၊
ပဝတ္တတိ သဒါ သဗ္ဗံ၊ ပဉ္စဝေါကာရဘူမိယံ။
ဣမဿ ပန အတ္ထဿ၊ အာဝိဘာဝတ္ထမေဝ စ၊
ဇစ္စန္ဓပီဌသပ္ပီနံ၊ ဝတ္တဗ္ဗာ ဥပမာ ဣဓ။
ယထာ ဟိ နာဝံ နိဿာယ၊ မနုဿာ ယန္တိ အဏ္ဏဝေ၊
ဧဝံ ရူပမ္ပိ နိဿာယ၊ နာမကာယော ပဝတ္တတိ။
ယထာ ¶ မနုဿေ နိဿာယ၊ နာဝါ ဂစ္ဆတိ အဏ္ဏဝေ၊
ဧဝံ နာမမ္ပိ နိဿာယ၊ ရူပကာယော ပဝတ္တတိ။
သတ္တသညံ ဝိနောဒေတွာ၊ နာမရူပဿ သဗ္ဗထာ၊
ယာထာဝဒဿနံ ဧတံ၊ ‘‘ဒိဋ္ဌိသုဒ္ဓီ’’တိ ဝုစ္စတိ။
ပရိမုစ္စိတုကာမော စ၊ ဒုက္ခတော ဇာတိအာဒိတော၊
အန္တဒွယံ ဝိဝဇ္ဇေတွာ၊ ဘာဝယေ ပန ပဏ္ဍိတော။
ဒိဋ္ဌိဝိသုဒ္ဓိမိမံ ပရိသုဒ္ဓံ၊
သုဋ္ဌုတရံ တု ကရောတိ နရော ယော၊
ဒိဋ္ဌိဂတာနိ မလာနိ အသေသံ၊
နာသမုပေန္တိ ဟိ တဿ နရဿ။
ဣတိ အဘိဓမ္မာဝတာရေ ဒိဋ္ဌိဝိသုဒ္ဓိနိဒ္ဒေသော နာမ
အဋ္ဌာရသမော ပရိစ္ဆေဒေါ။