📜
၂၀။ ဝီသတိမော ပရိစ္ဆေဒေါ
မဂ္ဂါမဂ္ဂဉာဏဒဿနဝိသုဒ္ဓိနိဒ္ဒေသော
ယောဂေါ ကရဏိယော သိယာ၊
မဂ္ဂါမဂ္ဂေ တု ဉာဏံ တ-
မဓိဂန္တုံ ပနိစ္ဆတာ။
ပစ္စုပ္ပန္နဿ ဓမ္မဿ၊ နိဗ္ဗတ္တိ ဥဒယော မတော၊
ဝယော ဝိပရိဏာမောတိ၊ တဿေဝ သမုဒီရိတာ။
အနုပဿနာပိ ¶ ဉာဏန္တိ၊ ဝရဉာဏေန ဒေသိတံ၊
သော ပနေဝံ ပဇာနာတိ၊ ယောဂါဝစရမာဏဝေါ။
ဣမဿ နာမရူပဿ၊ ပုဗ္ဗေ ဥပ္ပတ္တိတော ပန၊
နိစယော ရာသိ ဝါ နတ္ထိ၊ တထာ ဥပ္ပဇ္ဇတောပိ စ။
ရာသိတော နိစယာ ဝါပိ၊ နတ္ထိ အာဂမနန္တိ စ၊
တထာ နိရုဇ္ဈမာနဿ၊ န ဒိသာဂမနန္တိ စ။
နိရုဒ္ဓဿာပိ ဧကသ္မိံ၊ ဌာနေ နတ္ထိ စယောတိ စ၊
ဧတ္ထ ဝီဏူပမာ ဝုတ္တာ၊ ဧတဿတ္ထဿ ဒီပနေ။
ဥဒဗ္ဗယမနက္ကာရမေဝံ သင်္ခေပတော ပန၊
ကတွာ တဿေဝ ဉာဏဿ၊ ဝိဘင်္ဂဿ ဝသေန တု။
‘‘အဝိဇ္ဇာသမုဒယာ ရူပသမုဒယော’’တိ ဟိ အာဒိနာ၊
နယေနေကေကခန္ဓဿ၊ ဥဒယဗ္ဗယဒဿနေ။
ဒသ ဒသာတိ ကတွာန၊ ဝုတ္တာ ပညာသလက္ခဏာ၊
တေသံ ပန ဝသေနာပိ၊ ဓမ္မေ သမနုပဿတိ။
ဧဝံ ရူပုဒယော ဟောတိ၊ ဧဝမဿ ဝယော ဣတိ၊
ဥဒေတိ ဧဝံ ရူပမ္ပိ၊ ဧဝံ ရူပံ တု ဝေတိ စ။
ဧဝံ ¶ ပစ္စယတောပေတ္ထ၊ ခဏတော ဥဒယဗ္ဗယံ၊
ပဿတော သဗ္ဗဓမ္မာ စ၊ ပါကဋာ ဟောန္တိ တဿ တေ။
ဥဒကေ ဒဏ္ဍရာဇီဝ၊ အာရဂ္ဂေရိဝ သာသပေါ၊
ဝိဇ္ဇုပ္ပာဒါဝ ဓမ္မာ တေ၊ ပရိတ္တဋ္ဌာယိနော သိယုံ။
ကဒလီသုပိနာလာတစက္ကမာယုပမာ ဣမေ၊
အသာရာ ပန နိဿာရာ၊ ဟုတွာ ခါယန္တိ ယောဂိနော။
ဧဝမေတ္တာဝတာ ¶ တေန၊ ဥဒယဗ္ဗယဒဿနံ၊
လက္ခဏာနိ စ ပညာသ၊ ပဋိဝိဇ္ဈ ဌိတံ ပန။
ဉာဏံ ¶ အဓိဂတံ ဟောတိ၊ တရုဏံ ပဌမံ ပန၊
ယဿ စာဓိဂမာ ယောဂီ၊ ဟောတာရဒ္ဓဝိပဿကော။
ဝိပဿနာယ ဟေတာယ၊
ကရုဏာယာထ ယောဂိနော၊
ဝိပဿကဿ ဇာယန္တေ၊
ဥပက္လေသာ ဒသေဝိမေ။
ဩဘာသော ပီတိ ပဿဒ္ဓိ၊ ဉာဏံ သဒ္ဓါ သတီ သုခံ၊
ဥပေက္ခာ ဝီရိယံ နိကန္တီတိ၊ ဥပက္လေသာ ဒသေဝိမေ။
သမ္ပတ္တပဋိဝေဓဿ၊ သောတာပန္နာဒိနောပိ စ၊
တထာ ဝိပ္ပဋိပန္နဿ၊ ဥပက္လေသာ န ဇာယရေ။
သမ္မာဝ ပဋိပန္နဿ၊ ယုတ္တယောဂဿ ဘိက္ခုနော၊
သဒါ ဝိပဿကဿေဝ၊ ဥပ္ပဇ္ဇန္တိ ကိရဿု တေ။
ဝိပဿနာယ ဩဘာသော၊ ဩဘာသောတိ ပဝုစ္စတိ၊
တသ္မိံ ပန သမုပ္ပန္နေ၊ ယောဂါဝစရဘိက္ခု သော။
မဂ္ဂပ္ပတ္တော ဖလပ္ပတ္တော၊ အဟမသ္မီတိ ဂဏှတိ၊
အမဂ္ဂံယေဝ မဂ္ဂေါတိ၊ တဿေဝံ ပန ဂဏှတော။
ဧဝံ ¶ ဝိပဿနာဝီထိ၊
ဩက္ကန္တာ နာမ ဟောတိ သာ၊
ဩဘာသမေဝ သော ဘိက္ခု၊
အဿာဒေန္တော နိသီဒတိ။
ပီတိ ဝိပ္ပဿနာပီတိ၊ တဿ တသ္မိံ ခဏေ ပန၊
တဒါ ပဉ္စဝိဓာ ပီတိ၊ ဇာယန္တေ ခုဒ္ဒိကာဒိကာ။
ဝိပဿနာယ ပဿဒ္ဓိ၊ ပဿဒ္ဓီတိ ပဝုစ္စတိ၊
ယောဂိနော ကာယစိတ္တာနိ၊ ပဿဒ္ဓါနေဝ ဟောန္တိ ဟိ။
လဟူနိ ¶ စ မုဒူနေဝ၊ ကမ္မညာနေဝ ဟောန္တိ ဟိ၊
ပဿဒ္ဓါဒီဟိ သော ဘိက္ခု၊ အနုဂ္ဂဟိတမာနသော။
အမာနုသိံ ရတိံ နာမ၊
အနုဘောတိ အနုတ္တရံ၊
ယံ သန္ဓာယ စ ဂါထာယော၊
ဘာသိတာ ဟိ မဟေသိနာ။
‘‘သုညာဂါရံ ပဝိဋ္ဌဿ၊ သန္တစိတ္တဿ ဘိက္ခုနော၊
အမာနုသီ ရတိ ဟောတိ၊ သမ္မာ ဓမ္မံ ဝိပဿတော။
‘‘ယတော ယတော သမ္မသတိ၊ ခန္ဓာနံ ဥဒယဗ္ဗယံ၊
လဘတီ ပီတိပါမောဇ္ဇံ၊ အမတံ တံ ဝိဇာနတ’’န္တိ။
ဉာဏာဒယော ဥပက္လေသာ၊ ဉေယျာ ဝုတ္တနယေနိဓ၊
ဧတေ ဒသ ဥပက္လေသာ၊ ဝဇ္ဇနီယာဝ ယောဂိနာ။
ဧတ္ထောဘာသာဒယော ဓမ္မာ၊
ဥပက္လေသဿ ဝတ္ထုတော၊
ဥပက္လေသာတိ နိဒ္ဒိဋ္ဌာ၊
ဥပက္လေသနိကန္တိ တု။
တံ ¶ တမာဝဇ္ဇမာနဿ၊ ဘာဝနာ ပရိဟာယတိ၊
အသတ္တေ သတ္တသညီ စ၊ ဟောတိ အပ္ပဿုတော နရော။
သဗ္ဗောဘာသာဒယော ¶ ဓမ္မေ၊ န မဂ္ဂေါတိ ဝိစာရယံ၊
မဂ္ဂေါ ဝိပဿနာဉာဏံ၊ ဣစ္စေဝံ ပန ပဏ္ဍိတော။
ဝဝတ္ထပေတိ မဂ္ဂဉ္စ၊ အမဂ္ဂဉ္စေဝ စေတသာ၊
တဿ စေဝံ အယံ မဂ္ဂေါ၊ နာယံ မဂ္ဂေါတိ ယောဂိနော။
မဂ္ဂါမဂ္ဂဉ္စ ဝိညာယ၊ ဌိတဉာဏမိဒံ ပန၊
မဂ္ဂါမဂ္ဂေသုဉာဏန္တိ၊ ဘူရိဉာဏေန ဒေသိတံ။
မဂ္ဂါမဂ္ဂဉာဏဒဿနေသု ¶ ကောဝိဒါ၊
သာရာသာရဝေဒိနော သမာဟိတာဟိတာ၊
မဂ္ဂါမဂ္ဂဉာဏဒဿနန္တိ တံ ဣဒံ၊
ဗုဒ္ဓါ ဗုဒ္ဓသာဝကာ ဝဒန္တိ ဝါဒိနော။
ဣတိ အဘိဓမ္မာဝတာရေ မဂ္ဂါမဂ္ဂဉာဏဒဿနဝိသုဒ္ဓိနိဒ္ဒေသော
နာမ ဝီသတိမော ပရိစ္ဆေဒေါ။