📜
၂၁။ ဧကဝီသတိမော ပရိစ္ဆေဒေါ
ပဋိပဒါဉာဏဒဿနဝိသုဒ္ဓိနိဒ္ဒေသော
အဋ္ဌဉာဏဝသေနေဝ ¶ ၊ သိခါပက္ကာ ဝိပဿနာ၊
နဝမံ ပဋိပဒါဉာဏ-ဒဿနန္တိ ပဝုစ္စတိ။
အဋ္ဌ ဉာဏာနိ နာမေတ္ထ၊ ဝေဒိတဗ္ဗာနိ ဝိညုနာ၊
ဥပက္လေသဝိနိမုတ္တံ၊ ဉာဏံ သုဝိသဒံ ပန။
ဥဒယဗ္ဗယေ စ ဘင်္ဂေ စ၊ ဘယေ အာဒီနဝေ တထာ၊
နိဗ္ဗိဒါပဿနာဉာဏံ၊ ဉာဏံ မုစ္စိတုကမျတာ။
ပဋိသင်္ခါ စ သင်္ခါရေ၊ ဥပေက္ခာဉာဏမဋ္ဌမံ၊
ဣမာနိ အဋ္ဌ ဉာဏာနိ၊ နဝမံ သစ္စာနုလောမကံ။
သစ္စာနုလောမဉာဏန္တိ ¶ ၊ အနုလောမံ ပဝုစ္စတိ၊
တံ သမ္ပာဒေတုကာမေန၊ ယောဂါဝစရဘိက္ခုနာ။
ဥဒယဗ္ဗယဉာဏံ တံ၊ အာဒိံ ကတွာ ပနဋ္ဌသု၊
ဧတေသု ပန ဉာဏေသု၊ ယောဂေါ ကရဏိယော ပန။
ယထာနုက္ကမတော ¶ တဿ၊ တေသု ဉာဏေသု အဋ္ဌသု၊
အနိစ္စာဒိဝသေနေဝ၊ ယောဂံ ကတွာ ဌိတဿ ဟိ။
အနိစ္စံ ဒုက္ခမနတ္တာတိ၊ သင်္ခါရေ အနုပဿတော၊
အဋ္ဌန္နံ ပန ဉာဏာနံ၊ ဝသေန ပန ယောဂိနော။
ဝိပဿနာ သိခါပတ္တာ၊ ဟောတိ ဝုဋ္ဌာနဂါမိနီ၊
သစ္စာနုလောမဉာဏန္တိ၊ အယမေဝ ပဝုစ္စတိ။
သင်္ခါရုပေက္ခာဉာဏံ တံ၊ အာသေဝန္တဿ ယောဂိနော၊
ဣဒါနိ တဿ မဂ္ဂေါ စ၊ သမုပ္ပဇ္ဇိဿတီတိ ဟိ။
သင်္ခါရုပေက္ခာ သင်္ခါရေ၊ အနိစ္စာ ဒုက္ခာတိ ဝါ တထာ၊
သမ္မသိတွာ ဘဝင်္ဂံ တု၊ ပုန ဝေါတရတေဝ သာ။
ဘဝင်္ဂါနန္တရံ သင်္ခါရု-ပေက္ခာဂတနယေန တု၊
အနိစ္စာဒိဝသေနေဝ၊ သင်္ခါရေ ပန ဂေါစရံ။
ကုရုမာနံ မနောဒွါရေ၊ ဇာယတာဝဇ္ဇနံ တတော၊
ဘဝင်္ဂါဝဋ္ဋနံ ကတွာ၊ ဇာတဿာနန္တရံ ပန။
သင်္ခါရေ ¶ ဂေါစရံ ကတွာ၊ ပဌမံ ဇဝနမာနသံ၊
ဥပ္ပဇ္ဇတီတိ တံ စိတ္တံ၊ ပရိကမ္မန္တိ ဝုစ္စတိ။
တဒနန္တရမေဝညံ၊ သင်္ခါရာရမ္မဏံ ပုန၊
ဒုတိယံ ဇဝနံ ဟောတိ၊ ဥပစာရန္တိ တံ မတံ။
တဒနန္တရံ တံ ဟောတိ၊ တထာ သင်္ခါရဂေါစရံ၊
တတိယံ ဇဝနစိတ္တံ၊ အနုလောမန္တိ သညိတံ။
ပုရိမာနံ ပနဋ္ဌန္နံ၊ ဉာဏာနံ အနုလောမတော၊
ဗောဓိပက္ခိယဓမ္မာနံ၊ ဥဒ္ဓဉ္စ အနုလောမတော။
တေနေဝ ¶ တံ ဟိ သစ္စာနုလောမဉာဏံ ပဝုစ္စတိ၊
ဣဒံ ဟိ ပန သစ္စာနု-လောမဉာဏံ မဟေသိနာ။
‘‘ဝုဋ္ဌာနဂါမိနီယာ ¶ ဟိ၊ ပရိယောသာန’’န္တိ ဘာသိတံ၊
ဉေယျံ သဗ္ဗပကာရေန၊ ပရိယောသာနန္တိ ဂေါတြဘု။
ဣတိနေကေဟိ နာမေဟိ၊ ကိတ္တိတာယာ မဟေသိနာ၊
ဝုဋ္ဌာနဂါမိနီ သန္တာ၊ ပရိသုဒ္ဓါ ဝိပဿနာ။
ဝုဋ္ဌာတုကာမော သံသာရဒုက္ခပင်္ကာ မဟဗ္ဘယာ၊
ကရေယျ သတတံ တတ္ထ၊ ယောဂံ ပဏ္ဍိတဇာတိကော။
ဣတိ အဘိဓမ္မာဝတာရေ ပဋိပဒါဉာဏဒဿနဝိသုဒ္ဓိနိဒ္ဒေသော နာမ
ဧကဝီသတိမော ပရိစ္ဆေဒေါ။