📜
၂၂။ ဗာဝီသတိမော ပရိစ္ဆေဒေါ
ဉာဏဒဿနဝိသုဒ္ဓိနိဒ္ဒေသော
ဣတော ¶ ပရံ တု ဘိက္ခုဿ၊ ဟောတိ ဂေါတြဘုမာနသံ၊
အာဝဇ္ဇနိယဌာနတ္တာ၊ မဂ္ဂစိတ္တဿ တံ ပန။
န စပ္ပဋိပဒါဉာဏ-ဒဿနံ ဝါ တထေဝ စ၊
ဉာဏဒဿနသုဒ္ဓိံ ဝါ၊ ဘဇတေ န ကုဒါစနံ။
ဥဘိန္နမန္တရာ ဧတံ၊ အဗ္ဗောဟာရိကမေဝ တံ၊
ဝိပဿနာယ သောတသ္မိံ၊ ပတိတတ္တာ ဝိပဿနာ။
ပေါထုဇ္ဇနိကဂေါတ္တံ ဝါ၊ အဘိဘုယျ ပဝတ္တိတော၊
ဂေါတ္တံ ဝုစ္စတိ နိဗ္ဗာနံ၊ တတော ဘဝတိ ဂေါတြဘု။
ဉာဏံ စတူသု မဂ္ဂေသု၊ ဉာဏဒဿနသုဒ္ဓိကံ၊
တတ္ထ တံ ပဌမံ မဂ္ဂံ၊ သမ္ပာဒေတုံ ပနိစ္ဆတာ။
အညံ ¶ ¶ ကိဉ္စိပိ ကာတဗ္ဗံ၊ ဘိက္ခုနာ တေန နတ္ထိ တံ၊
ယဉှိ တေန စ ကာတဗ္ဗံ၊ သိယာ တံ ကတမေဝ တု။
အနုလောမာဝသာနဉှိ၊ သူရံ တိက္ခံ ဝိပဿနံ၊
ဥပ္ပာဒေန္တေန တံ သဗ္ဗံ၊ ကတမေဝ စ ယောဂိနာ။
တဿာနုလောမဉာဏဿ၊ အန္တေ တု အနိမိတ္တကံ၊
ဝိသင်္ခါရံ နိရောဓဉ္စ၊ နိဗ္ဗာနံ အမတံ ပဒံ။
ဂေါစရံ ကုရုမာနံ တံ၊ နိဗ္ဗာနာရမ္မဏေ ပန၊
ပဌမာဝဇ္ဇနဉ္စေဝ၊ ပဌမာဘောဂတာပိ စ။
မဂ္ဂဿာနန္တရာဒီဟိ၊ ပစ္စယေဟိ ပနစ္ဆဟိ၊
တဿ ပစ္စယဘာဝဉ္စ၊ သာဓယန္တံ တတော ပန။
ဝိပဿနာယ မုဒ္ဓဉှိ၊ သိခါပတ္တာယ တာယ တံ၊
ဥပ္ပဇ္ဇတိ အနာဝတ္တံ-ရမ္မဏံ တဿ ဂေါတြဘု။
ဧကေနာဝဇ္ဇနေနေဝ၊ ဧကိဿာယေဝ ဝီထိယာ၊
နာနာရမ္မဏတာ စာနု-လောမဂေါတြဘုစေတသံ။
ဌတွာ ¶ အာဝဇ္ဇနဋ္ဌာနေ၊ တမနာဝဇ္ဇနမ္ပိ စ၊
မဂ္ဂဿ ပန တံ သညံ၊ ဒတွာ ဝိယ နိရုဇ္ဈတိ။
မဂ္ဂေါပိ တေန တံ ဒိန္နံ၊ အမုဉ္စိတွာဝ သဉှိတံ၊
တံ ဉာဏမနုဗန္ဓန္တော၊ ဇာယတေ တဒနန္တရံ။
ကဒါစိပိ အနိဗ္ဗိဒ္ဓပုဗ္ဗံ မဂ္ဂေါ ပနေသ ဟိ၊
လောဘံ ဒေါသဉ္စ မောဟဉ္စ၊ ဝိဒ္ဓံသန္တောဝ ဇာယတိ။
န ကေဝလမယံ မဂ္ဂေါ၊ ဒေါသနာသနမေဝ စ၊
ကရောတိ အထ ခေါပါယဒွါရာနိပိ ပိဓေတိ စ။
အနာမတဂ္ဂသံသာရဝဋ္ဋဒုက္ခမဟောဒဓိံ၊
အပါရမတိဃောရဉ္စ၊ သောသေတိ စ အသေသတော။
မိစ္ဆာမဂ္ဂံ ¶ ¶ ပနဋ္ဌင်္ဂံ၊ ဇာယမာနော စ ဥဇ္ဈတိ၊
သဗ္ဗဝေရဘယာနေတ္ထ၊ နိစ္စံ ဝူပသမေတိ စ။
ဗုဒ္ဓဿောရသပုတ္တတ္တံ၊ ဥပနေတိ နယံ ပန၊
အာနိသံသေ အနေကေပိ၊ ပဝတ္တယတိ ယောဂိနော။
ဒါယကေနာနိသံသာနံ၊ အနေကေသမနေန စ၊
အာဒိမဂ္ဂေန သံယုတ္တံ၊ ဉာဏန္တိ ဉာဏဒဿနံ။
ပဌမမဂ္ဂဉာဏံ။
တဿေဝါနန္တရံ တဿ၊ ဝိပါကာ ဒွေပိ တီဏိ ဝါ၊
ဖလစိတ္တာနိ ဇာယန္တေ၊ န ဇာယန္တေ တတော ပရံ။
ကေစိ ဧကဉ္စ ဒွေ တီဏိ၊ စတ္တာရီတိ ဝဒန္တိ တု၊
န ပနေတံ ဂဟေတဗ္ဗံ၊ အဇာနိတွာ ဝဒန္တိ တေ။
ဧကဿာသေဝနံ နတ္ထိ၊ တသ္မာ ဒွေ အနုလောမကာ၊
တေဟိ အာသေဝနံ လဒ္ဓါ၊ တတိယံ ဟောတိ ဂေါတြဘု။
စတုတ္ထံ မဂ္ဂစိတ္တံ တု၊
တသ္မာ တီဏိ ဖလာနိ ဟိ၊
အနုလောမာ တယော ဟောန္တိ၊
စတုတ္ထံ ဟောတိ ဂေါတြဘု။
ပဉ္စမံ မဂ္ဂစိတ္တဉ္စ၊ ဖလာနိ ဒွေ တတော ပန၊
သတ္တစိတ္တပရမာဝ၊ ဧကာဝဇ္ဇနဝီထိ ဟိ။
ဧတ္တာဝတာ ပနေသော ဟိ၊ သောတာပန္နောတိ ဝုစ္စတိ၊
ဖလဿ ပရိယောသာနေ၊ ဘဝင်္ဂေါတ္တရဏံ သိယာ။
တတော ဘဝင်္ဂံ ဆိန္ဒိတွာ၊ မဂ္ဂပေက္ခနဟေတုကံ၊
ဥပ္ပဇ္ဇတိ မနောဒွါရေ၊ အာဝဇ္ဇနမနော ပန။
တသ္မိံ ¶ ¶ နိရုဒ္ဓေ မဂ္ဂဿ၊ ပစ္စဝေက္ခဏသညိတာ၊
ဇဝနာနိ ဟိ ဇာယန္တေ၊ သတ္တေဝ ပဋိပါဋိယာ။
ဧသေဝ စ နယော ဉေယျော၊ ဖလာဒီနမ္ပိ ပေက္ခနေ၊
ပစ္စဝေက္ခဏဉာဏာနိ၊ ဘဝန္တေကူနဝီသတိ။
မဂ္ဂေါ ¶ ဖလံ ပဟီနာ စ၊ ကိလေသာ အဝသိဋ္ဌကာ၊
နိဗ္ဗာနဉ္စေတိ ပဉ္စေတေ၊ ပစ္စဝေက္ခဏဘူမိယော။
ဧဝံ သော ပစ္စဝေက္ခိတွာ၊ သောတာပန္နောပပတ္တိယာ၊
ယောဂမာရဘတေ ဓီရော၊ ဒုတိယာယ စ ဘူမိယာ။
ခန္ဓပဉ္စကသင်္ခါတံ၊ တံ သင်္ခါရဂတံ ပုန၊
အနိစ္စံ ဒုက္ခမနတ္တာတိ၊ ဉာဏေန ပရိမဇ္ဇတိ။
တတော ဝိပဿနာဝီထိ-မောဂါဟတိ စ တာဝဒေ၊
တဿေဝံ ပဋိပန္နဿ၊ ဟေဋ္ဌာ ဝုတ္တနယေန တု။
တတော သင်္ခါရုပေက္ခာယ၊ အဝသာနေ တထေဝ စ၊
ဧကာဝဇ္ဇနဝါရသ္မိံ၊ ဂေါတြဘုဿ အနန္တရံ။
ဗျာပါဒကာမရာဂါနံ၊ တနုဘာဝံ တု သာဓယံ၊
သကဒါဂါမိမဂ္ဂေါယံ၊ ဇာယတေ ဒုတိယော ပန။
ဒုတိယမဂ္ဂဉာဏံ။
ဣမဿာပိ စ ဉာဏဿ၊ ဟေဋ္ဌာ ဝုတ္တနယေနိဓ၊
ဖလစိတ္တာနိ ဉေယျာနိ၊ ဝိညုနာ ဒွေပိ တီဏိ ဝါ။
ဧတ္တာဝတာ ပနေသော ဟိ၊ သကဒါဂါမိ နာမယံ၊
သကိဒေဝ ဣမံ လောကံ၊ အာဂန္တွာန္တကရော ဘဝေ။
ဟေဋ္ဌာ ဝုတ္တနယေနေဝ၊ ပဉ္စဓာ ပစ္စဝေက္ခဏံ၊
ဧဝံ သော ပစ္စဝေက္ခိတွာ၊ သကဒါဂါမိပတ္တိယာ။
ယောဂမာရဘတေ ¶ ¶ ဓီရော၊ တတိယာယ စ ဘူမိယာ၊
ဗျာပါဒကာမရာဂါနံ၊ ပဟာနာယ စ ပဏ္ဍိတော။
ခန္ဓပဉ္စကသင်္ခါတံ၊ တံ သင်္ခါရဂတံ ပန၊
အနိစ္စံ ဒုက္ခမနတ္တာတိ၊ ဉာဏေန ပရိမဇ္ဇတိ။
တတော ဝိပဿနာဝီထိ-မောဂါဟတိ စ တာဝဒေ၊
တဿေဝံ ပဋိပန္နဿ၊ ဟေဋ္ဌာ ဝုတ္တနယေန တု။
တတော သင်္ခါရုပေက္ခာယ၊ အဝသာနေ တထေဝ စ၊
ဧကာဝဇ္ဇနဝီထိမှိ၊ ဂေါတြဘုဿ အနန္တရံ။
ဗျာပါဒကာမရာဂါနံ၊ မူလဃာတံ တု သာဓယံ၊
တဿာနာဂါမိမဂ္ဂေါယံ၊ ဇာယတေ တတိယော ပန။
တတိယမဂ္ဂဉာဏံ။
ဣမဿာပိ စ ဉာဏဿ၊ ဟေဋ္ဌာ ဝုတ္တနယေနိဓ၊
ပဝတ္တိ ဖလစိတ္တာနံ၊ ဝေဒိတဗ္ဗာ ဝိဘာဝိနာ။
ဧတ္တာဝတာ ပနေသောပိ၊ ဟောတိနာဂါမိ နာမယံ၊
တတ္ထေဝ ပရိနိဗ္ဗာယီ၊ အနာဝတ္တိသဘာဝတော။
ဟေဋ္ဌာ ¶ ဝုတ္တနယေနေဝ၊ ပဉ္စဓာ ပစ္စဝေက္ခဏံ၊
ဧဝံ သော ပစ္စဝေက္ခိတွာ၊ အနာဂါမိရိယသာဝကော။
ယောဂမာရဘတေ ဓီရော၊ စတုတ္ထာယ စ ဘူမိယာ၊
ပတ္တိယာရူပရာဂါဒိ-ပဟာနာယ စ ပဏ္ဍိတော။
တထေဝ သင်္ခါရဂတံ၊ အနိစ္စာဒိဝသေန သော၊
ပရိဝတ္တတိ ဉာဏေန၊ တထေဝ ပရိမဇ္ဇတိ။
တတော ဝိပဿနာဝီထိ-မောဂါဟတိ စ တာဝဒေ၊
တဿေဝံ ပဋိပန္နဿ၊ ဟေဋ္ဌာ ဝုတ္တနယေန တု။
တတော ¶ ¶ သင်္ခါရုပေက္ခာယ၊ အဝသာနေ တထေဝ စ၊
ဧကာဝဇ္ဇနဝါရသ္မိံ၊ ဂေါတြဘုဿ အနန္တရံ။
တဿာရဟတ္တမဂ္ဂေါယံ၊
ဇာယတေ တု တတော ပရံ၊
ရူပရာဂါဒိဒေါသာနံ၊
ဝိဒ္ဓံသာယ ကရော ပန။
စတုတ္ထမဂ္ဂဉာဏံ။
ဣမဿာပိ စ ဉာဏဿ၊ ဟေဋ္ဌာ ဝုတ္တနယေနိဓ၊
ပဝတ္တိ ဖလစိတ္တာနံ၊ ဝေဒိတဗ္ဗာ ဝိဘာဝိနာ။
ဧတ္တာဝတာ ပနေသော ဟိ၊
အရဟာ နာမ အဋ္ဌမော၊
အရိယော ပုဂ္ဂလော ဟောတိ၊
မဟာခီဏာသဝေါ အယံ။
အနုပ္ပတ္တသဒတ္ထော စ၊
ခီဏသံယောဇနော မုနိ၊
သဒေဝကဿ လောကဿ၊
ဒက္ခိဏေယျော အနုတ္တရော။
ဧတ္တာဝတာ စတဿောပိ၊ ဉာဏဒဿနသုဒ္ဓိယော၊
ဟိတတ္ထာယ စ ဘိက္ခူနံ၊ သင်္ခေပေနေဝ ဒဿိတာ။
သဒ္ဓေန သမ္မာ ပန ဘာဝနီယာ၊
အရိယာယ ပညာယ စ ဘာဝနာယ၊
ဝိသုဒ္ဓိကာမေန တပေါဓနေန၊
ဘဝက္ခယံ ပတ္ထယတာ ဗုဓေန။
ဣတိ အဘိဓမ္မာဝတာရေ ဉာဏဒဿနဝိသုဒ္ဓိနိဒ္ဒေသော နာမ
ဗာဝီသတိမော ပရိစ္ဆေဒေါ။