📜
၂၃။ တေဝီသတိမော ပရိစ္ဆေဒေါ
ကိလေသပ္ပဟာနကထာ
ဧတေသု ¶ ¶ ¶ ယေန ယေ ဓမ္မာ၊ ပဟာတဗ္ဗာ ဘဝန္တိ ဟိ၊
တေသံ ဒါနိ ကရိဿာမိ၊ ပကာသနမိတော ပရံ။
ဣမေသု ပန စတူသု မဂ္ဂဉာဏေသု ယေ ဓမ္မာ ယေန ဉာဏေန ပဟာတဗ္ဗာ၊ တေသံ ပဟာနမေဝံ ဝေဒိတဗ္ဗံ။ ဧတာနိ ဟိ ယထာယောဂံ သံယောဇနကိလေသမိစ္ဆတ္တလောကဓမ္မမစ္ဆရိယဝိပလ္လာသဂန္ထာဂတိအာသဝ- ဩဃယောဂနီဝရဏပရာမာသဥပါဒါနာနုသယမလအကုသလကမ္မပထ- အကုသလစိတ္တုပ္ပာဒသင်္ခါတာနံ ပဟာနကရာနိ။
တတ္ထ သံယောဇနာနီတိ ဒသ သံယောဇနာနိ။ သေယျထိဒံ – ရူပရာဂါရူပရာဂမာနဥဒ္ဓစ္စာဝိဇ္ဇာတိ ဣမေ ပဉ္စ ဥဒ္ဓံဘာဂိယသံယောဇနာနိ နာမ။ သက္ကာယဒိဋ္ဌိ ဝိစိကိစ္ဆာ သီလဗ္ဗတပရာမာသော ကာမရာဂေါ ပဋိဃောတိ ဣမေ ပဉ္စ အဓောဘာဂိယသံယောဇနာနိ နာမ။
ကိလေသာတိ ဒသ ကိလေသာ။ သေယျထိဒံ – လောဘော ဒေါသော မောဟော မာနော ဒိဋ္ဌိ ဝိစိကိစ္ဆာ ထိနံ ဥဒ္ဓစ္စံ အဟိရိကံ အနောတ္တပ္ပန္တိ။
မိစ္ဆတ္တာတိ ဒသ မိစ္ဆတ္တာ။ သေယျထိဒံ – မိစ္ဆာဒိဋ္ဌိ မိစ္ဆာသင်္ကပ္ပော မိစ္ဆာဝါစာ မိစ္ဆာကမ္မန္တော မိစ္ဆာအာဇီဝေါ မိစ္ဆာဝါယာမော မိစ္ဆာသတိ မိစ္ဆာသမာဓိ မိစ္ဆာဉာဏံ မိစ္ဆာဝိမုတ္တီတိ။
လောကဓမ္မာတိ အဋ္ဌ လောကဓမ္မာ လာဘော အလာဘော ယသော အယသော နိန္ဒာ ပသံသာ သုခံ ဒုက္ခန္တိ။ ဣဓ ပန ကာရဏူပစာရေန ¶ လာဘာဒိဝတ္ထုကဿ အနုနယဿ၊ အလာဘာဒိဝတ္ထုကဿ ပဋိဃဿ စေတံ လောကဓမ္မဂဟဏေန ဂဟဏံ ကတန္တိ ဝေဒိတဗ္ဗံ။
မစ္ဆရိယာနီတိ ပဉ္စ မစ္ဆရိယာနိ အာဝါသမစ္ဆရိယံ ကုလမစ္ဆရိယံ လာဘမစ္ဆရိယံ ဓမ္မမစ္ဆရိယံ ¶ ဝဏ္ဏမစ္ဆရိယန္တိ။ ဣမာနိ အာဝါသာဒီသု အညေသံ သာဓာရဏဘာဝံ အသဟနာကာရေန ပဝတ္တာနိ မစ္ဆရိယာနိ။
ဝိပလ္လာသာတိ အနိစ္စဒုက္ခအနတ္တအသုဘေသုယေဝ ¶ ဝတ္ထူသု ‘‘နိစ္စံ သုခံ အတ္တာ သုဘ’’န္တိ ဧဝံ ပဝတ္တာ သညာဝိပလ္လာသော စိတ္တဝိပလ္လာသော ဒိဋ္ဌိဝိပလ္လာသောတိ ဣမေ တယော ဝိပလ္လာသာ။
ဂန္ထာတိ စတ္တာရော ဂန္ထာ အဘိဇ္ဈာကာယဂန္ထော၊ ဗျာပါဒေါ၊ သီလဗ္ဗတပရာမာသော၊ ဣဒံသစ္စာဘိနိဝေသော ကာယဂန္ထောတိ။
အဂတီတိ ဆန္ဒဒေါသမောဟဘယာနိ။ အာသဝါတိ စတ္တာရော အာသဝါ – ကာမရာဂဘဝရာဂမိစ္ဆာဒိဋ္ဌိအဝိဇ္ဇာသဝေါတိ။ ဩဃယောဂါနီတိပိ တေသမေဝါဓိဝစနံ။ နီဝရဏာနီတိ ကာမစ္ဆန္ဒာဒယော။ ပရာမာသောတိ မိစ္ဆာဒိဋ္ဌိယာ အဓိဝစနံ။
ဥပါဒါနာတိ စတ္တာရိ ဥပါဒါနာနိ ကာမုပါဒါနာဒီနီတိ။ အနုသယာတိ သတ္တ အနုသယာ ကာမရာဂါနုသယော ပဋိဃမာနဒိဋ္ဌိဝိစိကိစ္ဆာဘဝရာဂါဝိဇ္ဇာနုသယောတိ။ မလာတိ တယော မလာ – လောဘော ဒေါသော မောဟောတိ။
အကုသလကမ္မပထာတိ ဒသ အကုသလကမ္မပထာ။ သေယျထိဒံ – ပါဏာတိပါတော အဒိန္နာဒါနံ ကာမေသုမိစ္ဆာစာရော မုသာဝါဒေါ ပိသုဏဝါစာ ဖရုသဝါစာ သမ္ဖပ္ပလာပေါ အဘိဇ္ဈာ ဗျာပါဒေါ မိစ္ဆာဒိဋ္ဌီတိ ဒသ။
အကုသလစိတ္တုပ္ပာဒါတိ ¶ လောဘမူလာနိ အဋ္ဌ၊ ဒေါသမူလာနိ ဒွေ၊ မောဟမူလာနိ ဒွေတိ ဣမေ ဒွါဒသာတိ။
ဧတေသံ သံယောဇနာဒီနံ ဧတာနိ ယထာသမ္ဘဝံ ပဟာနကရာနိ။ ကထံ? သံယောဇနေသု တာဝ သက္ကာယဒိဋ္ဌိဝိစိကိစ္ဆာသီလဗ္ဗတပရာမာသာ အပါယဂမနီယာ ကာမရာဂပဋိဃာတိ ဧတေ ပဌမမဂ္ဂဉာဏဝဇ္ဈာ၊ သေသာ ကာမရာဂပဋိဃာ ဩဠာရိကာ ဒုတိယမဂ္ဂဉာဏဝဇ္ဈာ၊ သုခုမာ တတိယမဂ္ဂဉာဏဝဇ္ဈာ၊ ရူပရာဂါဒယော ပဉ္စပိ စတုတ္ထမဂ္ဂဉာဏဝဇ္ဈာ ဧဝ။
ကိလေသေသု ¶ ဒိဋ္ဌိဝိစိကိစ္ဆာ ပဌမမဂ္ဂဉာဏဝဇ္ဈာ၊ ဒေါသော တတိယမဂ္ဂဉာဏဝဇ္ဈော၊ လောဘမောဟမာနထိနဥဒ္ဓစ္စအဟိရိကာနောတ္တပ္ပာနိ စတုတ္ထမဂ္ဂဉာဏဝဇ္ဈာနိ။
မိစ္ဆတ္တေသု မိစ္ဆာဒိဋ္ဌိ မုသာဝါဒေါ မိစ္ဆာကမ္မန္တော မိစ္ဆာအာဇီဝေါတိ ဣမေ ပဌမမဂ္ဂဉာဏဝဇ္ဈာ၊ မိစ္ဆာသင်္ကပ္ပော ပိသုဏဝါစာ ဖရုသဝါစာတိ ဣမေ တတိယမဂ္ဂဉာဏဝဇ္ဈာ၊ စေတနာယေဝ စေတ္ထ မိစ္ဆာဝါစာတိ ဝေဒိတဗ္ဗာ၊ သမ္ဖပ္ပလာပမိစ္ဆာဝါယာမသတိသမာဓိဝိမုတ္တိဉာဏာနိ စတုတ္ထမဂ္ဂဉာဏဝဇ္ဈာနိ။
လောကဓမ္မေသု ပဋိဃော တတိယမဂ္ဂဉာဏဝဇ္ဈော၊ အနုနယော စတုတ္ထမဂ္ဂဉာဏဝဇ္ဈော၊ ယသေ ပသံသာယ စ အနုနယော စတုတ္ထမဂ္ဂဉာဏဝဇ္ဈောတိ ဧကေ။
မစ္ဆရိယာနိ ပဌမမဂ္ဂဉာဏဝဇ္ဈာနိ ဧဝ။
ဝိပလ္လာသေသု ပန အနိစ္စေ နိစ္စံ၊ အနတ္တနိ အတ္တာတိ စ သညာစိတ္တဒိဋ္ဌိဝိပလ္လာသာ ¶ ၊ ဒုက္ခေ သုခံ၊ အသုဘေ သုဘန္တိ ဒိဋ္ဌိဝိပလ္လာသော စာတိ ဣမေ ပဌမမဂ္ဂဉာဏဝဇ္ဈာ၊ အသုဘေ သုဘန္တိ သညာစိတ္တဝိပလ္လာသာ တတိယမဂ္ဂဉာဏဝဇ္ဈာ၊ ဒုက္ခေ သုခန္တိ စတုတ္ထမဂ္ဂဉာဏဝဇ္ဈာ။
ဂန္ထေသု သီလဗ္ဗတပရာမာသဣဒံသစ္စာဘိနိဝေသကာယဂန္ထာ ပဌမမဂ္ဂဉာဏဝဇ္ဈာ၊ ဗျာပါဒကာယဂန္ထော တတိယမဂ္ဂဉာဏဝဇ္ဈော၊ အဘိဇ္ဈာကာယဂန္ထော စတုတ္ထမဂ္ဂဉာဏဝဇ္ဈောဝ။
အဂတိယော ¶ ပဌမမဂ္ဂဉာဏဝဇ္ဈာ။
အာသဝေသု ဒိဋ္ဌာသဝေါ ပဌမဉာဏဝဇ္ဈော၊ ကာမာသဝေါ တတိယဉာဏဝဇ္ဈော၊ ဣတရေ ဒွေ စတုတ္ထဉာဏဝဇ္ဈာ။ ဩဃယောဂေသုပိ ဧသေဝ နယော။
နီဝရဏေသု ဝိစိကိစ္ဆာနီဝရဏံ ပဌမဉာဏဝဇ္ဈံ၊ ကာမစ္ဆန္ဒော ဗျာပါဒေါ ကုက္ကုစ္စန္တိ တီဏိ တတိယဉာဏဝဇ္ဈာနိ၊ ထိနမိဒ္ဓဥဒ္ဓစ္စာနိ စတုတ္ထဉာဏဝဇ္ဈာနိ။
ပရာမာသော ¶ ပဌမဉာဏဝဇ္ဈော။
ဥပါဒါနေသု သဗ္ဗေသမ္ပိ လောကိယဓမ္မာနံ ဝတ္ထုကာမဝသေန ‘‘ကာမာ’’တိ အာဂတတ္တာ ရူပါရူပေသု ရာဂေါပိ ကာမုပါဒါနေ ပတတိ၊ တသ္မာ တဉ္စ ကာမုပါဒါနံ စတုတ္ထဉာဏဝဇ္ဈံ၊ သေသာနိ ပဌမဉာဏဝဇ္ဈာနိ။
အနုသယေသု ဒိဋ္ဌိဝိစိကိစ္ဆာနုသယာ ပဌမဉာဏဝဇ္ဈာ၊ ကာမရာဂပဋိဃာနုသယာ တတိယဉာဏဝဇ္ဈာ၊ မာနဘဝရာဂါဝိဇ္ဇာနုသယာ စတုတ္ထဉာဏဝဇ္ဈာ။
မလေသု ဒေါသမလံ တတိယဉာဏဝဇ္ဈံ၊ ဣတရာနိ စတုတ္ထဉာဏဝဇ္ဈာနေဝ။
အကုသလကမ္မပထေသု ပါဏာတိပါတော အဒိန္နာဒါနံ မိစ္ဆာစာရော မုသာဝါဒေါ မိစ္ဆာဒိဋ္ဌီတိ ဣမေ ပဌမဉာဏဝဇ္ဈာ၊ ပိသုဏဝါစာ ဖရုသဝါစာ ဗျာပါဒေါတိ တတိယဉာဏဝဇ္ဈာ၊ သမ္ဖပ္ပလာပေါ အဘိဇ္ဈာ စတုတ္ထဉာဏဝဇ္ဈာဝ။
အကုသလစိတ္တုပ္ပာဒေသု စတ္တာရော ဒိဋ္ဌိဂတစိတ္တုပ္ပာဒါ၊ ဝိစိကိစ္ဆာသမ္ပယုတ္တော စာတိ ပဉ္စ ပဌမဉာဏဝဇ္ဈာ၊ ဒွေ ပဋိဃသမ္ပယုတ္တာ တတိယဉာဏဝဇ္ဈာ၊ သေသာ စတုတ္ထဉာဏဝဇ္ဈာတိ။
ယဉ္စ ယေန ဝဇ္ဈံ၊ တံ တေန ပဟာတဗ္ဗံ နာမ။ တေန ဝုတ္တံ ‘‘ဧတေသံ သံယောဇနာဒီနံ ဓမ္မာနံ ဧတာနိ ယထာယောဂံ ပဟာနကရာနီ’’တိ။
ဧတေသု ¶ ဉာဏေသု စ ယေန ယေန၊
ယော ယော ဟိ ဓမ္မော သမုပေတိ ဃာတံ၊
သော သော အသေသေန စ တေန တေန၊
သန္ဒဿိတော သာဓု မယာ ပနေဝံ။
ကိလေသပဟာနက္ကမကထာယံ။
ပရိညာဒီနိ ¶ ¶ ကိစ္စာနိ၊ ယာနိ ဝုတ္တာနိ သတ္ထုနာ၊
သစ္စာဘိသမယေ တာနိ၊ ပဝက္ခာမိ ဣတော ပရံ။
ဧကေကဿ ပနေတေသု၊
ဉာဏဿေကက္ခဏေ သိယာ၊
ပရိညာ စ ပဟာနဉ္စ၊
သစ္ဆိကိရိယာ စ ဘာဝနာ။
ပရိညာဒီနိ ဧတာနိ၊ ကိစ္စာနေကက္ခဏေ ပန၊
ယထာသဘာဝတော တာနိ၊ ဇာနိတဗ္ဗာနိ ဝိညုနာ။
ပဒီပေါ ဟိ ယထာ လောကေ၊ အပုဗ္ဗာစရိမံ ဣဓ၊
စတ္တာရိ ပန ကိစ္စာနိ၊ ကရောတေကက္ခဏေ ပန။
အာလောကဉ္စ ဝိဒံသေတိ၊ နာသေတိ တိမိရမ္ပိ စ၊
ပရိယာဒိယတိ တေလဉ္စ၊ ဝဋ္ဋိံ ဈာပေတိ ဧကတော။
ဧဝံ တံ မဂ္ဂဉာဏမ္ပိ၊ အပုဗ္ဗာစရိမံ ပန၊
စတ္တာရိပိ စ ကိစ္စာနိ၊ ကရောတေကက္ခဏေ ပန။
ပရိညာဘိသမယေနေဝ၊ ဒုက္ခံ အဘိသမေတိ သော၊
ပဟာနာဘိသမယေနေဝ၊ တထာ သမုဒယမ္ပိ စ။
ဘာဝနာဝိဓိနာယေဝ၊ မဂ္ဂံ အဘိသမေတိ တံ၊
အာရမ္မဏကြိယာယေဝ၊ နိရောဓံ သစ္ဆိကရောတိ သော။
ဝုတ္တမ္ပိ စေတံ ‘‘မဂ္ဂသမင်္ဂိဿ ဉာဏံ ဒုက္ခေပေတံ ဉာဏံ၊ ဒုက္ခသမုဒယေပေတံ ဉာဏံ၊ ဒုက္ခနိရောဓေပေတံ ဉာဏံ၊ ဒုက္ခနိရောဓဂါမိနိယာ ¶ ပဋိပဒါယပေတံ ဉာဏ’’န္တိ။ တတ္ထ ယထာ ပဒီပေါ ဝဋ္ဋိံ ဈာပေတိ၊ ဧဝံ မဂ္ဂဉာဏံ ဒုက္ခံ ပရိဇာနာတိ။ ယထာ အန္ဓကာရံ နာသေတိ၊ ဧဝံ သမုဒယံ ပဇဟတိ။ ယထာ အာလောကံ ဝိဒံသေတိ၊ ဧဝံ သဟဇာတာဒိပစ္စယတာယ သမ္မာသင်္ကပ္ပာဒိမဂ္ဂံ ဘာဝေတိ။ ယထာ တေလံ ပရိယာဒိယတိ၊ ဧဝံ ကိလေသပရိယာဒါနေန နိရောဓံ သစ္ဆိကရောတီတိ ဝေဒိတဗ္ဗံ။
ဥဂ္ဂစ္ဆန္တော ယထာဒိစ္စော၊ အပုဗ္ဗာစရိမံ ပန၊
စတ္တာရိ ပန ကိစ္စာနိ၊ ကရောတေကက္ခဏေ ဣဓ။
ဩဘာသေတိ ¶ စ ရူပါနိ၊ နာသေတိ တိမိရမ္ပိ စ၊
အာလောကဉ္စ ဝိဒံသေတိ၊ သီတဉ္စ ပဋိဟညတိ။
ယထာ စ မဟတီ နာဝါ၊ အပုဗ္ဗာစရိမံ ပန၊
စတ္တာရိ ပန ကိစ္စာနိ၊ ကရောတေကက္ခဏေ ပန။
ဇဟတီ ဩရိမံ တီရံ၊ သောတံ ဆိန္ဒတိ သာ ပန၊
တထာ ဝဟတိ ဘဏ္ဍဉ္စ၊ တီရမပ္ပေတိ ပါရိမံ။
နာဝါယောရိမတီရဿ၊ ယထာ ပဇဟနံ ပန၊
တထေဝ မဂ္ဂဉာဏဿ၊ ဒုက္ခဿ ပရိဇာနနံ။
ယထာ ¶ ဆိန္ဒတိ တံ သောတံ၊ တဏှံ ဇဟတိ တံ တထာ၊
ယထာ ဝဟတိ တံ ဘဏ္ဍံ၊ သဟဇာတာဒိနာ ပန။
တထေဝ ပစ္စယတ္တေန၊ မဂ္ဂံ ဘာဝေတိ နာမ သော၊
ယထာ ပါရံ ပန ဧဝံ၊ နိရောဓာရမ္မဏံ ဘဝေ။
လောကုတ္တရေန နိဒ္ဒိဋ္ဌာ၊ ယာ လောကုတ္တရဘာဝနာ၊
သာ သင်္ခေပနယေနေဝံ၊ မယာ သာဓု ပကာသိတာ။
ကော ¶ ဟိ နာမ နရော လောကေ၊
လောကုတ္တရသုခါဝဟံ၊
ဘာဝနံ ပန ပညာယ၊
န စ ဘာဝေယျ ပဏ္ဍိတော။
ဣမံ ဝိဒိတွာ ဟိတဘာဝနံ ဝနံ၊
ဥပေတိ ယော ဝေ သုခသံဟိတံ ဟိတံ၊
ဝိဓူယ စိတ္တဿ အနုတ္တမံ တမံ၊
ဥပေတိ စာဝိဂ္ဂဟကမ္ပဒံ ပဒံ။
ဣတိ အဘိဓမ္မာဝတာရေ ဉာဏဒဿနဝိသုဒ္ဓိနိဒ္ဒေသော နာမ
တေဝီသတိမော ပရိစ္ဆေဒေါ။