📜
၂၄။ စတုဝီသတိမော ပရိစ္ဆေဒေါ
ပစ္စယနိဒ္ဒေသော
ယေသံ ¶ ¶ ပစ္စယဓမ္မာနံ၊ ဝသာ သပ္ပစ္စယာ ဣမေ၊
ဓမ္မာ တေ ပစ္စယေ စာဟံ၊ ဒဿယိဿာမိတော ပရံ။
ကတမေ ပစ္စယာတိ? ဝုစ္စတေ – ဟေတာရမ္မဏာဓိပတိအနန္တရသမနန္တရသဟဇာတ- အညမညနိဿယူပနိဿယပုရေဇာတပစ္ဆာဇာတာသေဝနကမ္မဝိပါကာဟာရိန္ဒြိယ- ဈာနမဂ္ဂသမ္ပယုတ္တဝိပ္ပယုတ္တအတ္ထိနတ္ထိဝိဂတာဝိဂတဝသေန စတုဝီသတိဝိဓာ ဟောန္တိ။
တတ္ထ ဟေတုပစ္စယောတိ လောဘော ဒေါသော မောဟော အလောဘော အဒေါသော အမောဟောတိ ဣမေ ဆ ဓမ္မာ ဟေတုပစ္စယာ။ အာရမ္မဏပစ္စယောတိ သဗ္ဗလောကိယလောကုတ္တရံ ယံ ယံ ဓမ္မံ အာရဗ္ဘ ယေ ယေ ဓမ္မာ ဥပ္ပဇ္ဇန္တိ စိတ္တစေတသိကာ ဓမ္မာ၊ တေ တေ ဓမ္မာ တေသံ တေသံ ဓမ္မာနံ အာရမ္မဏပစ္စယေန ပစ္စယော။
အဓိပတိပစ္စယောတိ ¶ ဧတ္ထ သဟဇာတာဓိပတိအာရမ္မဏာဓိပတိဝသေန ဒုဝိဓော။ တတ္ထ သဟဇာတာဓိပတိ ဆန္ဒစိတ္တဝီရိယဝီမံသာဝသေန စတုဗ္ဗိဓော၊ အာရမ္မဏာဓိပတိ ပန ဒေါမနဿဝိစိကိစ္ဆုဒ္ဓစ္စကိရိယာဗျာကတာကုသလဝိပါကေ စ အနိဋ္ဌသမ္မတဉ္စ ရူပံ ဌပေတွာ အဝသေသံ။ အနန္တရပစ္စယောတိ အနန္တရနိရုဒ္ဓါ စိတ္တစေတသိကာ ဓမ္မာ။ တထာ သမနန္တရပစ္စယောပိ။
သဟဇာတပစ္စယောတိ စိတ္တစေတသိကာ၊ မဟာဘူတာ စေဝ ဟဒယဝတ္ထု စ။ တထာ အညမညပစ္စယောပိ။ နိဿယပစ္စယောတိ ဝတ္ထုရူပါနိ စေဝ မဟာဘူတာ၊ စိတ္တစေတသိကာ စ။ ဥပနိဿယပစ္စယောတိ အာရမ္မဏာနန္တရပကတူပနိဿယဝသေန တိဝိဓော။ တတ္ထ အာရမ္မဏူပနိဿယော အာရမ္မဏာဓိပတိယေဝ၊ အနန္တရူပနိဿယော ပန အနန္တရပစ္စယောဝ၊ ပကတူပနိဿယော ပန ကာယိကသုခဒုက္ခဥတုဘောဇနသေနာသနပုဂ္ဂလာ သဒ္ဓါသီလသုတစာဂပညာရာဂဒေါသမောဟာဒယော ¶ စ။
ပုရေဇာတပစ္စယောတိ ဝတ္ထာရမ္မဏဝသေန ဒုဝိဓော။ တတ္ထ ဝတ္ထုပုရေဇာတော နာမ ဝတ္ထုရူပါနိ၊ အာရမ္မဏပုရေဇာတော နာမ ပစ္စုပ္ပန္နရူပါဒီနေဝ။ ပစ္ဆာဇာတပစ္စယောတိ စိတ္တစေတသိကာ စ။ အာသေဝနပစ္စယောတိ ဌပေတွာ အာဝဇ္ဇနဒွယံ လောကိယကုသလာကုသလကိရိယာဗျာကတာ ဓမ္မာဝ။
ကမ္မပစ္စယောတိ ¶ သဟဇာတနာနက္ခဏိကဝသေန ဒုဝိဓော။ တတ္ထ သဟဇာတာ လောကိယလောကုတ္တရာ ဧဝ၊ နာနက္ခဏိကာ ပန သာသဝကုသလာကုသလစေတနာ၊ အနာသဝကုသလစေတနာ အနန္တရမေဝ အတ္တနော ဝိပါကဿ ပစ္စယော ဟောတိ။ ဝိပါကပစ္စယောတိ ဝိပါကစိတ္တစေတသိကာ။ အာဟာရပစ္စယောတိ ကဗဠီကာရာဟာရဖဿစေတနာဝိညာဏဝသေန စတုဗ္ဗိဓော။
ဣန္ဒြိယပစ္စယောတိ ¶ ရူပသတ္တကမနဇီဝိတသုခဒုက္ခသောမနဿဒေါမနဿဥပေက္ခာသဒ္ဓါဝီရိယ- သတိသမာဓိပညာအနညာတညဿာမီတိန္ဒြိယအညိန္ဒြိယအညတာဝိန္ဒြိယာနီတိ ဝီသတိန္ဒြိယာနိ၊ တေသု ဣတ္ထိန္ဒြိယပုရိသိန္ဒြိယာနိ ဝဇ္ဇေတွာ ဝီသတိန္ဒြိယာနိ ဟောန္တိ။ ဈာနပစ္စယောတိ ဝိတက္ကဝိစာရပီတိသုခစိတ္တေကဂ္ဂတာဝသေန ပဉ္စဝိဓော။ မဂ္ဂပစ္စယောတိ ဒိဋ္ဌိသင်္ကပ္ပဝါယာမသတိသမာဓိဝါစာကမ္မန္တာဇီဝမိစ္ဆာဒိဋ္ဌိဝသေန နဝဝိဓော။
သမ္ပယုတ္တပစ္စယောတိ စိတ္တစေတသိကာဝ။ ဝိပ္ပယုတ္တပစ္စယောတိ ဝတ္ထုပုရေဇာတာနိ စေဝ ပစ္ဆာဇာတာ စိတ္တစေတသိကာ စ။ အတ္ထိပစ္စယောတိ ဇီဝိတိန္ဒြိယကဗဠီကာရအာဟာရအာရမ္မဏပုရေဇာတာနိ စေဝ နိဿယပစ္စယေ ဝုတ္တဓမ္မာပိ စ။ နတ္ထိပစ္စယောတိ အနန္တရပစ္စယောဝ။ တထာ ဝိဂတပစ္စယော စ။ အဝိဂတပစ္စယောတိ အတ္ထိပစ္စယောဝ။ ဧဝမိမေ စတုဝီသတိ ပစ္စယာ နာမ။
ဧတ္ထ ပန ကတိဟာကာရေဟိ ရူပံ ရူပဿ ပစ္စယော ဟောတီတိ? ယထာရဟံ သဟဇာတအညမညနိဿယာဟာရိန္ဒြိယအတ္ထိအဝိဂတဝသေန သတ္တဓာ ပစ္စယော ဟောတိ။
ရူပံ အရူပဿ ယထာရဟံ အာရမ္မဏာဓိပတိသဟဇာတအညမညနိဿယူပနိဿယပုရေဇာတိန္ဒြိယဝိပ္ပ- ယုတ္တအတ္ထိအဝိဂတဝသေန ဧကာဒသဟိ အာကာရေဟိ ပစ္စယော ဟောတိ။
ရူပံ ရူပါရူပဿာတိ နတ္ထိ။
သတ္တဓာ ရူပံ ရူပဿ၊ ဘဝတေကာဒသေဟိ တံ၊
ပစ္စယော နာမဓမ္မဿ၊ မိဿကဿ န ကိဉ္စိ တု။
အရူပံ အရူပဿ ယထာရဟံ ဟေတာရမ္မဏာဓိပတိအနန္တရသမနန္တရသဟဇာတအညမညနိဿယူပနိဿယာ- သေဝနကမ္မဝိပါကာဟာရိန္ဒြိယဈာနမဂ္ဂသမ္ပယုတ္တအတ္ထိနတ္ထိဝိဂတာဝိဂတ- ဝသေန ¶ ¶ ဧကဝီသတိဓာ ပစ္စယော ဟောတိ။
အရူပံ ¶ ရူပဿ ယထာရဟံ ဟေတာဓိပတိသဟဇာတအညမညနိဿယပစ္ဆာဇာတကမ္မဝိပါကာဟာရိန္ဒြိယ- ဈာနမဂ္ဂဝိပ္ပယုတ္တအတ္ထိအဝိဂတဝသေန ပန္နရသဓာ ပစ္စယော ဟောတိ။
အရူပံ ရူပါရူပဿ ယထာရဟံ ဟေတာဓိပတိသဟဇာတအညမညနိဿယကမ္မဝိပါကာဟာရိန္ဒြိယဈာနမဂ္ဂ- အတ္ထိအဝိဂတဝသေန တေရသဓာ ပစ္စယော ဟောတိ။
ဧကဝီသတိဓာ နာမံ၊ ပစ္စယော ဘဝတတ္တနော၊
တိပဉ္စဟိ တံ ရူပဿ၊ ဥဘိန္နံ တေရသဓာ ပန။
ရူပါရူပံ ရူပဿ ယထာရဟံ သဟဇာတနိဿယအတ္ထိအဝိဂတဝသေန စတုဓာ ပစ္စယော ဟောတိ။
ရူပါရူပံ အရူပဿ ယထာရဟံ သဟဇာတအညမညနိဿယိန္ဒြိယအတ္ထိအဝိဂတဝသေန ဆဓာ ပစ္စယော ဟောတိ။
ရူပါရူပံ ရူပဿာတိ နတ္ထိ။
ဥဘောပိ ရူပဓမ္မဿ၊ စတုဓာ ဟောန္တိ ပစ္စယာ၊
ဆဗ္ဗိဓာ နာမဓမ္မဿ၊ မိဿကဿ န ကိဉ္စိ တု။
ဧတေသု ပန ပစ္စယေသု ကတိ ရူပါ၊ ကတိ အရူပါ၊ ကတိမိဿကာတိ? ပုရေဇာတပစ္စယော ဧကော ရူပဓမ္မောဝ၊ ဟေတုအနန္တရသမနန္တရပစ္ဆာဇာတာသေဝနကမ္မဝိပါကဈာနမဂ္ဂသမ္ပယုတ္တနတ္ထိ- ဝိဂတာနံ ဝသေန ဒွါဒသ ပစ္စယာ အရူပဓမ္မာဝ၊ သေသာ ပန ဧကာဒသ ပစ္စယာ ရူပါရူပမိဿကာတိ ဝေဒိတဗ္ဗာ။
ပုန ကာလဝသေန ဟေတုသဟဇာတအညမညနိဿယပုရေဇာတပစ္ဆာဇာတဝိပါကာဟာရိန္ဒြိယဈာနမဂ္ဂ- သမ္ပယုတ္တဝိပ္ပယုတ္တအတ္ထိအဝိဂတာနံ ¶ ဝသေန ပန္နရသ ပစ္စယာ ပစ္စုပ္ပန္နာဝ ဟောန္တိ။ အနန္တရသမနန္တရာသေဝနနတ္ထိဝိဂတပစ္စယာ အတီတာဝ၊ ကမ္မပစ္စယော အတီတော ဝါ ဟောတိ ပစ္စုပ္ပန္နော ဝါ၊ အာရမ္မဏာဓိပတိဥပနိဿယပစ္စယာ ¶ ပန တိကာလိကာ ဟောန္တိ ကာလဝိနိမုတ္တာ စ။
ပစ္စုပ္ပန္နာဝ ဟောန္တေတ္ထ၊
ပစ္စယာ ဒသ ပဉ္စ စ၊
အတီတာ ဧဝ ပဉ္စေကော၊
ဒွေကာလိကောဝ ဒဿိတော၊
တယော တိကာလိကာ စေဝ၊
ဝိနိမုတ္တာပိ ကာလတော။
သဗ္ဗေ ¶ ပနိမေ စတုဝီသတိ ပစ္စယာ ယထာရဟံ အာရမ္မဏူပနိဿယကမ္မအတ္ထိပစ္စယာနံ ဝသေန စတူသု ပစ္စယေသု သင်္ဂဟံ ဂစ္ဆန္တီတိ ဝေဒိတဗ္ဗာ။
ဣတိ အဘိဓမ္မာဝတာရေ ပစ္စယနိဒ္ဒေသော နာမ
စတုဝီသတိမော ပရိစ္ဆေဒေါ။
နိဂမနကထာ
အဘိဓမ္မာဝတာရောယံ၊ ဝရော ပရမဂမ္ဘီရော၊
ဣစ္ဆတာ နိပုဏံ ဗုဒ္ဓိံ၊ ဘိက္ခုနာ ပန သောတဗ္ဗော။
သုမတိမတိဝိစာရဗောဓနော၊
ဝိမတိဝိမောဟဝိနာသနော အယံ၊
ကုမတိမတိမဟာတမောနာသော၊
ပဋုမတိဘာသကရော မတော မယာ။
ယတော ¶ သုမတိနာ မတော နာမတော၊
အာယာစိတသမ္မာနတော မာနတော၊
တတော ဟိ ရစိတော သဒါ တောသဒါ၊
မယာ ဟိတဝိဘာဝနာ ဘာဝနာ။
အတ္ထတော ¶ ဂန္ထတော စာပိ၊ ယုတ္တိတော စာပိ ဧတ္ထ စ၊
အယုတ္တံ ဝါ ဝိရုဒ္ဓံ ဝါ၊ ယဒိ ဒိဿတိ ကိဉ္စိပိ။
ပုဗ္ဗာပရံ ဝိလောကေတွာ၊ ဝိစာရေတွာ ပုနပ္ပုနံ၊
ဓီမတာ သင်္ဂဟေတဗ္ဗံ၊ ဂဟေတဗ္ဗံ န ဒေါသတော။
တိဝိဓာ ဗျပ္ပထာနဉှိ၊ ဂတိယော ဒုဗ္ဗိဓာပိ စေ၊
တသ္မာ ဥပပရိက္ခိတွာ၊ ဝေဒိတဗ္ဗံ ဝိဘာဝိနာ။
နိကာယန္တရလဒ္ဓီဟိ၊ အသမ္မိဿော အနာကုလော၊
မဟာဝိဟာရဝါသီနံ၊ ဝါစနာမဂ္ဂနိဿိတော။
မဓုရက္ခရသံယုတ္တော၊ အတ္ထော ယသ္မာ ပကာသိတော၊
တသ္မာ ဟိတတ္ထကာမေန၊ ကာတဗ္ဗော ဧတ္ထ အာဒရော။
သဒ္ဓမ္မဋ္ဌိတိကာမေန၊ ကရောန္တေန စ ယံ မယာ၊
ပုညမဓိဂတံ တေန၊ သုခံ ပပ္ပောန္တု ပါဏိနော။
အန္တရာယံ ဝိနာ စာယံ၊ ယထာသိဒ္ဓိမုပါဂတော၊
တထာ ကလျာဏသင်္ကပ္ပာ၊ သိဒ္ဓိံ ဂစ္ဆန္တု ပါဏိနံ။
နရနာရိဂဏာကိဏ္ဏေ ¶ ၊ အသံကိဏ္ဏကုလာကုလေ၊
ဖီတေ သဗ္ဗင်္ဂသမ္ပန္နေ၊ သုပသန္နသိတောဒကေ။
နာနာရတနသမ္ပုဏ္ဏေ၊ ဝိဝိဓာပဏသင်္ကဋေ၊
ကာဝေရပဋ္ဋနေ ရမ္မေ၊ နာနာရာမောပသောဘိတေ။
ကေလာသသိခရာကာရပါသာဒပဋိမဏ္ဍိတေ၊
ကာရိတေ ကဏှဒါသေန၊ ဒဿနီယေ မနောရမေ။
ဝိဟာရေ ¶ ဝိဝိဓာကာရစာရုပါကာရဂေါပုရေ၊
တတ္ထ ပါစီနပါသာဒေ၊ မယာ နိဝသတာ သဒါ။
အသလ္လေခမသာခလျေ၊ သီလာဒိဂုဏသောဘိနာ၊
အယံ သုမတိနာ သာဓု၊ ယာစိတေန ကတော သတာ။
ဒေဝါ ¶ ကာလေန ဝဿန္တု၊ ဝဿံ ဝဿဝလာဟကာ၊
ပါလယန္တု မဟီပါလာ၊ ဓမ္မတော သကလံ မဟိံ။
ယာဝ တိဋ္ဌတိ လောကသ္မိံ၊ ဟိမဝါ ပဗ္ဗတုတ္တမော၊
တာဝ တိဋ္ဌတု သဒ္ဓမ္မော၊ ဓမ္မရာဇဿ သတ္ထုနောတိ။
ဥရဂပုရနိဝသနေန အာစရိယေန ဘဒန္တဗုဒ္ဓဒတ္တေန သီလာစာရသမ္ပန္နေန ကတော အဘိဓမ္မာဝတာရော နာမာယံ။
အဘိဓမ္မာဝတာရော နိဋ္ဌိတော။
နမော တဿ ဘဂဝတော အရဟတော သမ္မာသမ္ဗုဒ္ဓဿ