📜
၂။ ဒုတိယော ပရိစ္ဆေဒေါ
လက္ခဏရသုပဋ္ဌာနဝိဘာဂေါ
သဘာဝေါ ¶ လက္ခဏံ နာမ၊ ကိစ္စသမ္ပဇ္ဇနာ ရသော၊
ဂယှာကာရော ဥပဋ္ဌာနံ၊ ပဒဋ္ဌာနံ တု ပစ္စယော။
အတ္တုပလဒ္ဓိသင်္ခါတာ၊ သမ္ပတ္တာ စ ပနတ္ထတော၊
လက္ခဏရသုပဋ္ဌာနာ၊ ဝေါဟာရာဘောဂဘေဒိတာ။
တေပညာသသဘာဝေသု၊ တသ္မာ ဘေဒံ ယထာရဟံ၊
လက္ခဏာဒိပ္ပကာရေဟိ၊ ပဝက္ခာမိ ဣတော ပရံ။
စိန္တေတီတိ ဘဝေ စိတ္တံ၊ စိန္တနမတ္တမေဝ ဝါ၊
သမ္ပယုတ္တာထ ဝါ တေန၊ စိန္တေန္တီတိ စ ဂေါစရံ။
ဖုသတီတိ ဘဝေ ဖဿော၊ ဖုသနံ ဝါထ ကေဝလံ၊
သမ္ပယုတ္တာထ ဝါ တေန၊ ဖုသန္တီတိ စ ဂေါစရံ။
ဧဝံ ကတ္တရိ ဘာဝေ စ၊ ကရဏေ စ ယထာရဟံ၊
တေပညာသသဘာဝေသု၊ သဒ္ဒနိဗ္ဗစနံ နယေ။
အာလမ္ဗဏမနံ စိတ္တံ၊ တံဝိဇာနနလက္ခဏံ၊
သဟဇာဓိဋ္ဌာနရသံ၊ စိန္တာကပ္ပောတိ ဂယှတိ။
အာလမ္ဗဏသမောဓာနော ¶ ၊
ဖဿော ဖုသနလက္ခဏော၊
သင်္ဃဋ္ဋနရသော တတ္ထ၊
သန္နိပါတောတိ ဂယှတိ။
ဝေဒနာလမ္ဗဏရသာ၊ သာ ဝေဒယိတလက္ခဏာ၊
ဂေါစရာနုဘဝရသာ၊ အနုဘုတ္တီတိ ဂယှတိ။
အာကာရဂဟဏံ ¶ သညာ၊ သာ သဉ္ဇာနနလက္ခဏာ၊
နိမိတ္တုပ္ပာဒနရသာ၊ ဥပလက္ခာတိ ဂယှတိ။
စေတနာ စိတ္တဝိပ္ဖာရာ၊ သာယံ ဗျာပါရလက္ခဏာ၊
ကမ္မန္တာယူဟနရသာ၊ သံဝိဓာနန္တိ ဂယှတိ။
ဧကဂ္ဂတာ အဝိက္ခေပေါ၊ သာဝိသာဟာရလက္ခဏာ၊
သမ္ပိဏ္ဍနရသာ စိတ္တံ၊ သမောဓာနန္တိ ဂယှတိ။
ယာပနံ သဟဇာတာန-မနုပါလနလက္ခဏံ၊
ဇီဝိတံ ဇီဝနရသံ၊ အာယုဗန္ဓောတိ ဂယှတိ။
သာရဏာ မနသီကာရော၊ သမန္နာဟာရလက္ခဏော၊
သံယောဇနရသော စိတ္တ-ပဋိပတ္တီတိ ဂယှတိ။
သင်္ကပ္ပနလက္ခဏော တက္ကော၊ သဟဇာဘိနိရောပနော၊
အာလမ္ဗာဟနနရသော၊ သန္နိရုဇ္ဈောတိ ဂယှတိ။
ဝိစာရော အနုသန္ဓာနော၊ အနုမဇ္ဇနလက္ခဏော၊
စိတ္တာနုယောဇနရသော၊ အနုပေက္ခာတိ ဂယှတိ။
အဓိမောက္ခော အသံသပ္ပော၊ သုသန္နိဋ္ဌာနလက္ခဏော၊
နိစ္စလာပါဒနရသော၊ ဒဠှဝုတ္တီတိ ဂယှတိ။
ဝီရိယံ ပန ဝါယာမော၊ မဟုဿာဟနလက္ခဏော၊
ကိစ္စာသံသီဒနရသော၊ ဥပတ္ထမ္ဘောတိ ဂယှတိ။
အာလမ္ဗတ္ထိကတာ ¶ ဆန္ဒော၊ ကတ္တုကာမတလက္ခဏော၊
အာလမ္ဗဏေသနရသော၊ ဟတ္ထာဒါနန္တိ ဂယှတိ။
သဟဇာတာနုဖရဏာ၊ သမ္ပိယာယနလက္ခဏာ၊
သမ္ပီနနရသာ ပီတိ၊ ပါမောဇ္ဇမိတိ ဂယှတိ။
စေတောသဒ္ဒဟနံ သဒ္ဓါ၊ ဘူတောကပ္ပနလက္ခဏာ၊
ဟိတပက္ခန္ဒနရသာ၊ အဓိမုတ္တီတိ ဂယှတိ။
အသမ္မောသာ ¶ သဘာဝေသု၊ သတိ ဓာရဏလက္ခဏာ၊
ဓမ္မာပိလာပနရသာ၊ အပ္ပမာဒေါတိ ဂယှတိ။
ဟိရီ ဇေဂုစ္ဆာ ပါပေသု၊ သာ ဟရာယနလက္ခဏာ၊
ဟီဠသံကောစနရသာ၊ ပါပလဇ္ဇာတိ ဂယှတိ။
ပါပသာရဇ္ဇမောတ္တပ္ပံ၊ ဥဗ္ဗေဂုတ္တာသလက္ခဏံ၊
ဘယသင်္ကောစနရသံ၊ အဝိဿာသောတိ ဂယှတိ။
အလောဘော အနဘိသင်္ဂေါ၊ အပရိဂ္ဂဟလက္ခဏော၊
မုတ္တပ္ပဝတ္တနရသော၊ အသံသဂ္ဂေါတိ ဂယှတိ။
အဒေါသော စိတ္တသာခလျံ၊ အဗျာပဇ္ဇနလက္ခဏော၊
သဏှပ္ပဝတ္တနရသော၊ သောမ္မဘာဝေါတိ ဂယှတိ။
အမောဟော ခလိတာဘာဝေါ၊ ပဋိဝိဇ္ဈနလက္ခဏော၊
ဝိသယောဘာသနရသော၊ ပဋိဗောဓောတိ ဂယှတိ။
တတြမဇ္ဈတ္တတောပေက္ခာ၊ သမီကရဏလက္ခဏာ၊
အပက္ခပါတနရသာ၊ သမဝါဟောတိ ဂယှတိ။
ပဿဒ္ဓိ ကာယစိတ္တာနံ၊ ဒရထာဘာဝလက္ခဏာ၊
အပရိပ္ဖန္ဒနရသာ၊ သီတိဘာဝေါတိ ဂယှတိ။
လဟုတာ ကာယစိတ္တာနံ၊ အဒန္ဓာကာရလက္ခဏာ၊
အဝိတ္ထာရရသာ သလ္လဟုကဝုတ္တီတိ ဂယှတိ။
မုဒုတာ ကာယစိတ္တာနံ၊ ကက္ခဠာဘာဝလက္ခဏာ၊
ကိစ္စာဝိရောဓနရသာ၊ အနုကုလျန္တိ ဂယှတိ။
ကမ္မညတာ ¶ ဥဘိန္နမ္ပိ၊ အလံကိစ္စဿ လက္ခဏာ၊
ပဝတ္တိသမ္ပတ္တိရသာ၊ ယောဂဘာဝေါတိ ဂယှတိ။
တထာ ပါဂုညတာ ဒွိန္နံ၊ ဝိသဒါကာရလက္ခဏာ၊
သုခပ္ပဝတ္တနရသာ၊ သေရိဘာဝေါတိ ဂယှတိ။
ဥဇုတာ ¶ ကာယစိတ္တာနံ၊ ကုဋိလာဘာဝလက္ခဏာ၊
ဇိမှနိမ္မဒနရသာ၊ ဥဇုဝုတ္တီတိ ဂယှတိ။
သမ္မာဝါစာ ဝစီသုဒ္ဓိ၊ ဝါစာသံယမလက္ခဏာ၊
မိစ္ဆာဝါစောရမရသာ၊ ဝစီဝေလာတိ ဂယှတိ။
သမ္မာကမ္မံ ကြိယာသုဒ္ဓံ၊ သမ္မာကရဏလက္ခဏံ၊
မိစ္ဆာကမ္မောရမရသံ၊ ကြိယာဝေလာတိ ဂယှတိ။
သမ္မာဇီဝေါ ဝိသုဒ္ဓေဋ္ဌိ၊ အလ္လိဋ္ဌာဇီဝလက္ခဏော၊
မိစ္ဆာဇီဝေါရမရသော၊ သမ္မာဝုတ္တီတိ ဂယှတိ။
ကရုဏာ ဒီနသတ္တေသု၊ ဒုက္ခာပနယလက္ခဏာ၊
သောတ္ထိတာပတ္ထနရသာ၊ အနုကမ္ပာတိ ဂယှတိ။
သုခဋ္ဌိတေသု မုဒိတာ၊ အနုမောဒနလက္ခဏာ၊
စေတောဝိကာသနရသာ၊ အဝိရောဓောတိ ဂယှတိ။
စေတောသာရဇ္ဇနာ လောဘော၊ အပရိစ္စာဂလက္ခဏော၊
အာလမ္ဗဂိဇ္ဈနရသော၊ အဘိလဂ္ဂေါတိ ဂယှတိ။
စေတောဗျာပဇ္ဇနံ ဒေါသော၊ သမ္ပဒုဿနလက္ခဏော၊
အာလမ္ဗဏဃာတရသော၊ စဏ္ဍိက္ကမိတိ ဂယှတိ။
စေတောသမ္မုယှနံ မောဟော၊
သော သမ္မုယှနလက္ခဏော၊
သဘာဝစ္ဆာဒနရသော၊
အန္ဓဘာဝေါတိ ဂယှတိ။
ပါပါဇိဂုစ္ဆာဟိရိကံ၊ နိလ္လဇ္ဇာကာရလက္ခဏံ၊
ပါပေါပလာပနရသံ၊ မလဂ္ဂါဟောတိ ဂယှတိ။
အသာရဇ္ဇနမနောတ္တပ္ပမနုတ္တာသနလက္ခဏံ ¶ ၊
ပါပပက္ခန္ဒနရသံ၊ ပါဂဗ္ဘမိတိ ဂယှတိ။
ဒိဋ္ဌိ ¶ ဒဠှဝိပလ္လာသော၊ သာ ပရာမာသလက္ခဏာ၊
တုစ္ဆာဘိနိဝေသနရသာ၊ မိစ္ဆာဂါဟောတိ ဂယှတိ။
‘‘အဟသ္မီ’’တိ မညမာနော၊ သော သမုန္နတိလက္ခဏော၊
ကေတုသမ္ပဂ္ဂဟရသော၊ အဟံကာရောတိ ဂယှတိ။
ပရသမ္ပတ္တီသု ဣဿာ၊ အက္ခမာကာရလက္ခဏာ၊
စေတောဝိကုစနရသာ၊ ဝိမုခတ္တန္တိ ဂယှတိ။
ပရိဂ္ဂဟေသု မစ္ဆေရံ၊ သန္နိဂူဟနလက္ခဏံ၊
သာမညာသဟနရသံ၊ ဝေဝိစ္ဆမိတိ ဂယှတိ။
စေတောပဟနနံ ထီနံ၊ တံ သံသီဒနလက္ခဏံ၊
ဥဿာဟဘဉ္ဇနရသံ၊ သံခိတ္တတ္တန္တိ ဂယှတိ။
ဝိဃာတော သဟဇာတာနံ၊ မိဒ္ဓံ မောဟနလက္ခဏံ၊
သတ္တိသံဘဉ္ဇနရသံ၊ အာတုရတ္တန္တိ ဂယှတိ။
ဥဒ္ဓစ္စံ စိတ္တဝိက္ခေပေါ၊ အဝူပသမလက္ခဏံ၊
စေတောနဝဋ္ဌာနရသံ၊ ဘန္တတ္တမိတိ ဂယှတိ။
ဝိပ္ပဋိသာရော ကုက္ကုစ္စမနုသောစနလက္ခဏံ၊
အတ္တာနုသောစနရသံ၊ ပစ္ဆာတာပေါတိ ဂယှတိ။
ကင်္ခါယနာ ဝိစိကိစ္ဆာ၊ အသန္နိဋ္ဌာနလက္ခဏာ၊
အနေကဂါဟနရသာ၊ အပ္ပတိဋ္ဌာတိ ဂယှတိ။
ဣစ္စေဝံ လက္ခဏာဒီဟိ၊ ဝိဘာဝေယျ ဝိစက္ခဏော၊
တေပညာသသဘာဝေသု၊ သဘာဝါကာရလက္ခဏံ။
လက္ခဏတ္ထကုသလာ ¶ သလက္ခဏေ၊
လက္ခဏတ္ထပရမေပိ ကေဝလံ၊
လက္ခဏုဂ္ဂဟသုခါယ ဝဏ္ဏယုံ၊
လက္ခဏာဒိမုခတော သလက္ခဏံ။
အတ္ထံ ¶ တမေဝမနုဂမ္မ မယေတ္ထ ဝုတ္တ-
မတ္ထာနမတ္ထနယနတ္ထမနေကဓာပိ၊
ပတ္ထေယျ မေတ္ထ ဝစနတ္ထနယေဟိ ဉာဏ-
မတ္ထေသု ဗုဒ္ဓဝစနတ္ထနယတ္ထိကေဟိ။
ဣတိ နာမရူပပရိစ္ဆေဒေ လက္ခဏရသုပဋ္ဌာနဝိဘာဂေါ နာမ
ဒုတိယော ပရိစ္ဆေဒေါ။