📜
၃။ တတိယော ပရိစ္ဆေဒေါ
ဘေဒသင်္ဂဟဝိဘာဂေါ
ဧဝံ ဘေဒသဘာဝေသု၊ တေသွေဝ ပုန သင်္ဂဟံ၊
သဘာဝတ္ထဝိသေသေဟိ၊ ပဝက္ခာမိ ဣတော ပရံ။
အသာဓာရဏဉာဏေဟိ၊ သတ္ထာ ဝတ္ထုဝိဝေစကော၊
သင်္ဂဟေတွာ သဘာဂေဟိ၊ ဓမ္မေ ဒဿေသိ စက္ခုမာ။
ဒိဋ္ဌိဘိနိဝေသဋ္ဌေန၊ ယထာဘူတသဘာဝတော၊
ပရမာမသတိစ္စေကာ၊ ပရာမာသောတိ ဘာသိတာ။
ကိလေသာသုစိဘာဝေန၊ ဝဏဿာဝရသော ဝိယ၊
အာလိမ္ပန္တာဝ သန္တာနံ၊ သဝန္တီတိ ပကာသိတာ။
ကာမတဏှာ ဘဝတဏှာ၊ ဒိဋ္ဌာဝိဇ္ဇာတိ အာသဝါ၊
စတ္တာရော အာသဝဋ္ဌေန၊ တယော ဓမ္မာ သဘာဝတော။
ဧတေဝေါ ¶ ဃာတိ ဝုတ္တာဝ၊ ဒွါရာလမ္ဗာဘိဝါဟိနော၊
ဩတ္ထရိတွာ ပရာဘူတေ၊ ဟရန္တာ ပါဏိနော ဘဝေ။
ယောဂါတိ ¶ စာဟု တေ ဧဝ၊ ပါဏိနော ဘဝယန္တကေ၊
ဒွါရာလမ္ဗာဘိသမ္ဗန္ဓာ၊ ယန္တဗန္ဓာဝ ယောဇိတာ။
သန္တာနမဓိဂဏှန္တာ၊ မာလုဝါဝ မဟာတရုံ၊
ဂဏှန္တာ ဒဠှမာလမ္ဗံ၊ မဏ္ဍူကမိဝ ပန္နဂေါ။
ကာမတဏှာ စ ဒိဋ္ဌိ စ၊ ဥပါဒါနာ စတုဗ္ဗိဓာ၊
ဒိဋ္ဌိ ဒိဋ္ဌိသီလဗ္ဗတ-မတ္တဝါဒေါတိ ဘေဒိတာ။
ကာယေန ကာယံ ဂန္ထေန္တာ၊ ဒုပ္ပမုဉ္စာနုဝေဌိနော၊
ကထိတာ ကာယဂန္ထာတိ၊ တဏှာဗျာပါဒဒိဋ္ဌိယော။
သီလဗ္ဗတပရာမာသော၊ ဣတိ ဒိဋ္ဌိ ဝိဘေဒိတာ၊
ဣဒံသစ္စာဘိနိဝေသော၊ ဣတိ စေဝံ စတုဗ္ဗိဓာ။
နေက္ခမ္မံ ပလိဗောဓေန္တာ၊ ဘာဝနာပရိပန္ထကာ၊
သန္တာနမဏ္ဍကောသာဝ၊ ပရိယောနန္ဓကာတိ စ။
ကာမစ္ဆန္ဒော စ ဗျာပါဒေါ၊ ထိနမိဒ္ဓဉ္စ သံသယော၊
အဝိဇ္ဇုဒ္ဓစ္စကုက္ကုစ္စမိတိ နီဝရဏာ မတာ။
အာဂါဠှံ ပရိယာဒါယ၊ ဩဂယှနုပ္ပဝတ္တိနော၊
ယောပ္ပရောဂါဝ သန္တာန-မနုသေန္တီတိ ဘာသိတာ။
ကာမရာဂေါ ဘဝရာဂေါ၊ ပဋိဃော မာနဒိဋ္ဌိယော၊
ကင်္ခါဝိဇ္ဇာတိ သတ္တေဝ၊ ဆ ဓမ္မာနုသယာ မတာ။
ဒွါရာလမ္ဗဏဗန္ဓေန၊ ပါဏီနံ ဘဝမဏ္ဍလေ၊
သံယောဇနာနိ ဝုတ္တာနိ၊ ပါသဗန္ဓာဝ ပက္ခိနံ။
ကာမရူပါရူပရာဂါ၊ ပဋိဃော မောဟသံသယော၊
ဒိဋ္ဌိ သီလဗ္ဗတံ မာနော၊ ဥဒ္ဓစ္စေန ဒသာ ဘဝေ။
ရူပါရူပရာဂုဒ္ဓစ္စံ၊ အဘိဓမ္မေ ဝိနာ ပုန၊
ဘဝရာဂိဿ မစ္ဆေရံ၊ ဂဟေတွာ ဒသဓာ သိယုံ။
သံက္လေပယန္တိ ¶ ¶ သန္တာနံ၊ ဥပဃာတေန္တိ ပါဏိနော၊
သဟဇာတေက္လေသေန္တီတိ၊ ကိလေသာတိ ပကာသိတာ။
လောဘော ဒေါသော စ မောဟော စ၊
ဒိဋ္ဌိ မာနော စ သံသယော၊
ထိနာဟိရိကနောတ္တပ္ပ-
မုဒ္ဓစ္စေန သိယုံ ဒသ။
နဝသင်္ဂဟိတာ ဧတ္ထ၊ ဒိဋ္ဌိလောဘာ ပကာသိတာ၊
သတ္တသင်္ဂဟိတာဝိဇ္ဇာ၊ ပဋိဃော ပဉ္စသင်္ဂဟော။
စတုသင်္ဂဟိတာ ကင်္ခါ၊ မာနုဒ္ဓစ္စာ တိသင်္ဂဟာ၊
ဒုကသင်္ဂဟိတံ ထီနံ၊ ကုက္ကုစ္စမေကသင်္ဂဟံ။
ဒွိဓာဟိရိကနောတ္တပ္ပ-မိဿာမစ္ဆရိယံ တထာ၊
ဣစ္စေဝံ ဒသဓာ ဝုတ္တာ၊ ပါပကေသွေဝ သင်္ဂဟာ။
ပရာမာသာသဝေါဃာ စ၊ ယောဂုပါဒါနဂန္ထတော၊
နီဝါရဏာနုသယတော၊ သံယောဇနကိလေသတော။
စုဒ္ဒသေဝ တု သင်္ခေပါ၊ သတ္တပညာသ ဘေဒတော၊
ယထာဓမ္မာနုသာရေန၊ စိတ္တုပ္ပာဒေသု ယောဇယေ။
တတောပရေ နောပရာမာ-သာဒိဘေဒိတသင်္ဂဟာ၊
စိတ္တံ စေတသိကံ ရူပံ၊ နိဗ္ဗာနမိတိ ဒီပယေ။
ဣစ္စာကုသလဓမ္မာနံ၊ ဉတွာ သင်္ဂဟမုတ္တရံ၊
မိဿကာ နာမ ဝိညေယျာ၊ ယထာသမ္ဘဝတော ကထံ၊
လောဘော ဒေါသော စ မောဟော စ၊
ဧကန္တာကုသလာ တယော၊
အလောဘာဒေါသာမောဟော စ၊
ကုသလာဗျာကတာ တထာ။
ပါဒပဿေဝ ¶ မူလာနိ၊ ထိရဘာဝါယ ပစ္စယာ၊
မူလဘာဝေန ဓမ္မာနံ၊ ဟေတူ ဓမ္မာ ဆ ဒီပိတာ။
ဝိတက္ကော ¶ စ ဝိစာရော စ၊ ပီတိ စေကဂ္ဂတာ တထာ၊
သောမနဿံ ဒေါမနဿံ၊ ဥပေက္ခာတိ စ ဝေဒနာ။
အာဟစ္စုပနိဇ္ဈာယန္တာ၊ နိဇ္ဈာနဋ္ဌေန ပစ္စယာ၊
ဈာနဓမ္မာတိ သတ္ထာဟ၊ ပဉ္စ ဝတ္ထုသဘာဝတော။
သမ္မာဒိဋ္ဌိ စ သင်္ကပ္ပော၊ ဝါယာမော ဝိရတိတ္တယံ၊
သမ္မာသတိ သမာဓီ စ၊ မိစ္ဆာဒိဋ္ဌိ စ သမ္ဘဝါ။
သမ္မာမိစ္ဆာ စ နီယန္တာ၊ နိယျာနဋ္ဌေန ပစ္စယာ၊
မဂ္ဂင်္ဂါ ဒွါဒသက္ခာတာ၊ နဝ ဓမ္မာ သဘာဝတော။
အတ္တဘာဝံ ပဝတ္တေန္တာ၊ ဩဇဋ္ဌမကဝေဒနံ၊
ပဋိသန္ဓိနာမရူပ-မာဟရန္တာ ယထာက္ကမံ။
ကဗဠီကာရော အာဟာရော၊
ဖဿော သဉ္စေတနာ တထာ၊
ဝိညာဏမိတိ စတ္တာရော၊
အာဟာရာတိ ပကာသိတာ။
ဓမ္မာနံ သဟဇာတာနံ၊ ဣန္ဒြိယဋ္ဌေန ပစ္စယာ၊
အတ္တာနမိဿရဋ္ဌေန၊ အနုဝတ္တာပကာ တထာ။
သဒ္ဓါ စ သတိ ပညာ စ၊ ဝီရိယေကဂ္ဂတာပိ စ၊
ဝေဒနာ ဇီဝိတံ စိတ္တံ၊ အဋ္ဌ ရူပိန္ဒြိယာနိ စ။
ကထံ ဇီဝိတမေကံ တု၊ သုခံ ဒုက္ခန္တိ ဝေဒနာ၊
သောမနဿံ ဒေါမနဿံ၊ ဥပေက္ခာတိ စ ဘေဒိတာ။
ပညာဒိမဂ္ဂေနညာတ-ညဿာမီတိန္ဒြိယံ ဘဝေ၊
မဇ္ဈေ အညိန္ဒြိယမန္တေ၊ အညာတာဝိန္ဒြိယံ တထာ။
သောဠသေဝ ¶ သဘာဝေန၊ ဣန္ဒြိယဋ္ဌဝိဘာဂတော၊
ဣန္ဒြိယာနီတိ ဝုတ္တာနိ၊ ဗာဝီသတိ ဝိဘာဝယေ။
ဒဠှာဓိဋ္ဌိတသန္တာနာ ¶ ၊ ဝိပက္ခေဟိ အကမ္ပိယာ၊
ဗလဝန္တသဘာဝေန၊ ဗလဓမ္မာ ပကာသိတာ။
သဒ္ဓါ သတိ ဟိရောတ္တပ္ပံ၊ ဝီရိယေကဂ္ဂတာ တထာ၊
ပညာဟိရိကာနောတ္တပ္ပ-မိစ္စေဝံ နဝဓာ မတာ။
ဇေဋ္ဌာ ပုဗ္ဗင်္ဂမဋ္ဌေန၊ ပုညာပုညပဝတ္တိယံ၊
ပစ္စယာဓိပ္ပတေယျေန၊ သဟဇာနံ ယထာရဟံ။
စတ္တာရောဓိပတီ ဝုတ္တာ၊ အာဓိပ္ပစ္စသဘာဝတော၊
ဆန္ဒော စိတ္တဉ္စ ဝီရိယံ၊ ဝီမံသာတိ စ တာဒိနာ။
ပဉ္စသင်္ဂဟိတာ ပညာ၊ ဝါယာမေကဂ္ဂတာ ပန၊
စတုသင်္ဂဟိတာ စိတ္တံ၊ သတိ စေဝ တိသင်္ဂဟာ။
သင်္ကပ္ပော ဝေဒနာ သဒ္ဓါ၊ ဒုကသင်္ဂဟိတာ မတာ၊
ဧကေကသင်္ဂဟာ သေသာ၊ အဋ္ဌဝီသတိ ဘာသိတာ၊
ဣစ္စေဝံ သတ္တဓာ ဘေဒေါ၊ ဝုတ္တော မိဿကသင်္ဂဟော။
ဟေတုဈာနင်္ဂမဂ္ဂင်္ဂါ၊ အာဟာရိန္ဒြိယတော တထာ၊
ဗလာဓိပ္ပတိတော စေဝ၊ ပုညာပုညာဒိမိဿတာ၊
ဆတ္တိံသေဝ သဘာဝေန၊ စတုသဋ္ဌိ ပဘေဒတော။
ဣစ္စေဝံ သင်္ဂဟေတွာန၊ ဝိဘာဝေယျ တတော ပရံ၊
စိတ္တုပ္ပာဒပဘေဒေသု၊ ယထာသမ္ဘဝတော ကထံ။
သိတာဝဇ္ဇနဝိညာဏံ၊ သမ္ပဋိစ္ဆနတီရဏာ၊
အဋ္ဌာရသာဟေတုကာဝ၊ မောမူဟာ ဧကဟေတုကာ။
သေသာ တု ကုသလာ ဉာဏဝိယုတ္တာ စ ဒွိဟေတုကာ၊
စိတ္တုပ္ပာဒါပရေ သတ္တ-စတ္တာလီသ တိဟေတုကာ။
ပဉ္စဝိညာဏမဇ္ဈာနံ ¶ ၊ ဒွိဈာနင်္ဂိကမီရိတံ၊
စတုတ္ထပဉ္စမဇ္ဈာနံ၊ တိဈာနံ တတိယံ မတာ။
စတုဈာနံ တု ဒုတိယံ၊ ကာမေ စ သုခဝဇ္ဇိတာ၊
ပဉ္စဈာနံ တု ပဌမံ၊ ကာမေ စ သုခိတာ မတာ။
ပဌမာနုတ္တရံ ¶ ဈာနံ၊ အဋ္ဌမဂ္ဂင်္ဂိကံ မတံ၊
သတ္တမဂ္ဂင်္ဂိကံ နာမ၊ သေသဈာနမနုတ္တရံ။
လောကိယံ ပဌမံ ဈာနံ၊ တထာ ကာမေ တိဟေတုကာ၊
ပဉ္စမဂ္ဂင်္ဂိကာ နာမ၊ စိတ္တုပ္ပာဒါ ပကာသိတာ။
သေသံ မဟဂ္ဂတံ ဈာနံ၊ သမ္ပယုတ္တာ စ ဒိဋ္ဌိယာ၊
ဉာဏေန ဝိပ္ပယုတ္တာ စ၊ စတုမဂ္ဂင်္ဂိကာ မတာ။
ပဋိဃုဒ္ဓစ္စယုတ္တာ စ၊ ဝိပ္ပယုတ္တာ စ ဒိဋ္ဌိယာ၊
တိမဂ္ဂင်္ဂံ ဒုမဂ္ဂင်္ဂံ၊ ကင်္ခိတံ သမုဒီရိတံ။
န ဟောန္တာဟေတုကေ မဂ္ဂါ၊ စိတ္တဋ္ဌိတိ စ ကင်္ခိတေ၊
ဝိဒိတာ နိယတတာ စ၊ လောကိယေသု န ဥဒ္ဓဋာ။
ကာမေသု ကဗဠီကာရော၊ အနာဟာရော အသညိနော၊
စိတ္တုပ္ပာဒေသု သဗ္ဗတ္ထ၊ အာဟာရတ္တယမီရိတံ။
ဣန္ဒြိယာနိ ဝိဘာဝေယျ၊ နဝဓာနုတ္တရေ ဗုဓော၊
အဋ္ဌဓာ သမုဒီရေယျ၊ လောကိယေသု တိဟေတုကေ။
သတ္တဓာ ပန ဉာဏေန၊ ဝိပ္ပယုတ္တေ ပကာသယေ၊
သိတဝေါဋ္ဌဗ္ဗနာပုညေ၊ ပဉ္စဓာ ကင်္ခိတေ ပန။
စတုဓာ တိဝိဓာ သေသေ၊ စိတ္တုပ္ပာဒေ သမီရယေ၊
တိဟေတုကာ သတ္တဗလာ၊ ဆဗလာ တု ဒုဟေတုကာ။
စတုဗလာ အကုသလာ၊ ကင်္ခိတံ တိဗလံ မတံ၊
ဒွိဗလံ သိတဝေါဋ္ဌဗ္ဗ-မဗလံ သေသမီရိတံ။
ဇဝနေဓိပတီနံ ¶ တု၊ ယော ကောစေကော တိဟေတုကေ၊
ဒွိဟေတုကေ ဝါ ကုသလေ၊ ဝီမံသာ နောပလဗ္ဘတိ။
လောကိယေသု ဝိပါကေသု၊
မောဟမူလေ အဟေတုကေ၊
ယထာသမ္ဘဝဝုတ္တိတ္တာ၊
နတ္ထာဓိပတိ ကောစိပိ။
သမ္ဘောတိ ¶ ကာယဝိညာဏေ၊ ပုညပါကေ သုခိန္ဒြိယံ၊
ဒုက္ခိန္ဒြိယမ္ပိ တတ္ထေဝ၊ ပါပပါကမှိ ဘာသိတံ။
သန္တီရဏဉ္စ ဟသနံ၊ သောမနဿာနိ သောဠသ၊
ပဌမာဒိစတုဇ္ဈာနံ၊ သောမနဿယုတံ ဘဝေ။
ဒေါမနဿယုတ္တာ ဒွေဝ၊ စိတ္တုပ္ပာဒါ ပကာသိတာ၊
တဒညေ ပန သဗ္ဗေပိ၊ ပဉ္စပညာသုပေက္ခကာ။
ဝေဒနာသမ္ပယောဂဉ္စ၊ ဝိနိဗ္ဘုဇ္ဇေဝမဋ္ဌဓာ၊
ဟေတုယောဂါဒိဘေဒေဟိ၊ စိတ္တုပ္ပာဒါ ပကာသိတာ။
တံတံဝိယောဂဘေဒဉ္စ၊ ပစ္စေကမထ မိဿိတံ၊
ယထာဝုတ္တာနုသာရေန၊ ယထာသမ္ဘဝတော နယေ။
ဣစ္စေဝံ ပန ယောဇေတွာ၊ စိတ္တုပ္ပာဒေသု မိဿကံ၊
တတော ဉေယျာ ဝိသုဒ္ဓါ စ၊ ဗောဓိပက္ခိယသင်္ဂဟာ။
ကာယေ စ ဝေဒနာစိတ္တေ၊ ဓမ္မေသု စ ယထာရဟံ၊
အသုဘံ ဒုက္ခမနိစ္စ-မနတ္တာတိ သုပဋ္ဌိတာ။
သမ္မာသတိ ပနိစ္စေကာ၊ ကိစ္စဂေါစရဘေဒတော၊
သတိပဋ္ဌာနနာမေန၊ စတ္တာရောတိ ပကာသိတာ။
ဥပ္ပန္နာနုပ္ပန္နပါပ-ပဟာနာနုပ္ပာဒနာယ စ၊
အနုပ္ပန္နုပ္ပန္နေဟိ ဝါ၊ နိဗ္ဗတ္တိအဘိဝုဒ္ဓိယာ။
ပဒဟန္တဿ ¶ ဝါယာမော၊ ကိစ္စာဘောဂဝိဘာဂတော၊
သမ္မပ္ပဓာနနာမေန၊ စတ္တာရောတိ ပကာသိတာ။
ဣဒ္ဓိယာ ပါဒဘူတတ္တာ၊ ဣဒ္ဓိပါဒါတိ ဘာသိတာ၊
ဆန္ဒော စိတ္တဉ္စ ဝီရိယံ၊ ဝီမံသာတိ စတုဗ္ဗိဓာ။
ပဉ္စ သဒ္ဓါ သတိ ပညာ၊ ဝီရိယေကဂ္ဂတာ တထာ၊
ဣန္ဒြိယာနိန္ဒြိယဋ္ဌေန၊ ဗလဋ္ဌေန ဗလာနိ စ။
သတိ ဓမ္မဝိစယော စ၊ တထာ ဝီရိယပီတိယော၊
ပဿဒ္ဓေကဂ္ဂတာပေက္ခာ၊ ဗုဇ္ဈန္တဿင်္ဂဘာဝတော။
ဗောဇ္ဈင်္ဂါတိ ¶ ဝိသေသေန၊ သတ္တ ဓမ္မာ ပကာသိတာ၊
နိယျာနဋ္ဌေန မဂ္ဂင်္ဂါ၊ သမ္မာဒိဋ္ဌာဒိအဋ္ဌဓာ။
ဆသင်္ဂဟေတ္ထ ဝါယာမော၊ သတိပညာ သမီရိတာ၊
ပဉ္စသင်္ဂဟိတာ နာမ၊ သမာဓိ စတုသင်္ဂဟော။
သဒ္ဓါ ဒုသင်္ဂဟာ ဝုတ္တာ၊ သေသာ ဧကေကသင်္ဂဟာ၊
ဣစ္စေဝံ သတ္တဓာ ဘေဒေါ၊ ဗောဓိပက္ခိယသင်္ဂဟော။
သတိပဋ္ဌာနသမ္မပ္ပဓာနတော ဣဒ္ဓိပါဒတော၊
ဣန္ဒြိယဗလဗောဇ္ဈင်္ဂါ၊ မဂ္ဂဘေဒါ စ ဘာသိတာ။
ဆန္ဒော စိတ္တမုပေက္ခာ စ၊ သဒ္ဓါပဿဒ္ဓိပီတိယော၊
သမ္မာဒိဋ္ဌိ စ သင်္ကပ္ပော၊ ဝါယာမော ဝိရတိတ္တယံ။
သမ္မာသတိ သမာဓီတိ၊ ဒီပိတာ ဗောဓိပက္ခိယာ၊
စုဒ္ဒသာ ဓမ္မတော ဟောန္တိ၊ သတ္တတိံသ ပဘေဒတော။
ယေဟိ ဓမ္မေဟိ ဗုဇ္ဈန္တော၊ သစ္စာနိ ပဋိဝိဇ္ဈတိ၊
သမတ္တာနုတ္တရေ ဟောန္တိ၊ န ဝါ သင်္ကပ္ပပီတိယော။
ပုဗ္ဗဘာဂေပိ လဗ္ဘန္တိ၊ လောကိယမှိ ယထာရဟံ၊
နိဗ္ဗေဓဘာဝနာကာလေ၊ ဆဗ္ဗိသုဒ္ဓိပဝတ္တိယံ။
ဣစ္စေဝံ ¶ တိဝိဓာ ဘေဒံ၊ ဝိဘာဝေယျ ယထာရဟံ၊
သဘာဝဘေဒဘိန္နာနံ၊ သဘာဂတ္ထေဟိ သင်္ဂဟံ။
ဘေဒသင်္ဂဟဝိဒူဟိ ဝဏ္ဏိတံ၊ ဘေဒသင်္ဂဟဝိမုတ္တိသာသနေ၊
ဘေဒသင်္ဂဟနယတ္ထမုတ္တမံ၊ ဘေဒသင်္ဂဟမုခံ ပကာသိတံ။
ဓမ္မသဘာဝဝိဘာဂဗုဓေဝံ၊ ဓမ္မဒိသမ္ပတိသာသနဓမ္မေ၊
ဓမ္မဝိဘူတိဝိဘူသိတစိတ္တာ၊ ဓမ္မရသာမတဘာဂိ ဘဝန္တိ။
ဣတိ နာမရူပပရိစ္ဆေဒေ ဘေဒသင်္ဂဟဝိဘာဂေါ နာမ
တတိယော ပရိစ္ဆေဒေါ။