📜
၄။ စတုတ္ထော ပရိစ္ဆေဒေါ
ပကိဏ္ဏကဝိဘာဂေါ
ဣတော ¶ ပရံ ကိစ္စတော စ၊ ဒွါရာလမ္ဗဏဝတ္ထုတော၊
ဘူမိပုဂ္ဂလတော ဌာနာ၊ ဇနကာ စ ယထာရဟံ။
သင်္ဂဟော စ ပဝတ္တိ စ၊ ပဋိသန္ဓိပဝတ္တိသု၊
စိတ္တုပ္ပာဒဝသေနေဝ၊ သံခိပိတွာန နိယျတေ။
ရူပါရူပမဟာပါကာ၊ မုပေက္ခာတီရဏဒွယံ၊
စုတိသန္ဓိဘဝင်္ဂါနိ၊ စိတ္တာနေကူနဝီသတိ။
အာဝဇ္ဇနံ တု ယုဂဠံ၊ ဒဿနံ သဝနံ တထာ၊
ဃာယနံ သာယနဉ္စေဝ၊ ဖုသနံ သမ္ပဋိစ္ဆနံ။
တီဏိ တီရဏစိတ္တာနိ၊ ဧကံ ဝေါဋ္ဌဗ္ဗနံ မတံ၊
ပဉ္စဒွါရေ မနောဒွါရေ၊ တဒါဝဇ္ဇနနာမကံ။
ပဉ္စပညာသ ¶ ဇဝနကိစ္စာနီတိ ဝိနိဒ္ဒိသေ၊
ကြိယာ စာဝဇ္ဇနံ ဟိတွာ၊ ကုသလာကုသလပ္ဖလံ။
တဒါလမ္ဗဏစိတ္တာနိ၊ ဘဝန္တေကာဒသေဝ ဟိ၊
မဟာဝိပါကစိတ္တာနိ၊ အဋ္ဌ သန္တီရဏတ္တယံ။
ပဉ္စကိစ္စန္တိ ဘာသန္တိ၊ ဥပေက္ခာတီရဏဒွယံ၊
စတုကိစ္စာ မဟာပါကာ၊ တိကကိစ္စာ မဟဂ္ဂတာ။
ဒုကိစ္စမိတိ ဝေါဋ္ဌဗ္ဗံ၊ သုခတီရဏမီရိတံ၊
ပဉ္စဝိညာဏဇဝနမနောဓာတုတ္တိကံ ပန။
ဧကကိစ္စာတိ ဘာသန္တိ၊ အဋ္ဌသဋ္ဌိ ဝိဘာဝိနော၊
ဣစ္စေဝံ ကိစ္စဘေဒေန၊ စိတ္တုပ္ပာဒါ ဝဝတ္ထိတာ။
စက္ခုသောတဃာနဇိဝှာ-ကာယဓာတု ယထာက္ကမံ၊
ပဉ္စဒွါရာ ဘဝင်္ဂံ တု၊ မနောဒွါရံ ပဝုစ္စတိ။
ဃာနာဒယော ¶ တယော ရူပေ၊ ပဉ္စ စက္ခာဒယော တထာ၊
အရူပေ နတ္ထုဘယတ္ထ၊ တဒါလမ္ဗဏမာနသံ။
ဆ ဒွါရာ ဝီထိစိတ္တာနိ၊ သတ္တ ကာမီသု ရူပိသု၊
ဒွါရတ္တယံ ဆ စိတ္တာနိ၊ မနောဒွါရမရူပိသု။
ပဋိသန္ဓာဒိဘူတာ ဟိ၊ အဝသာနေ စုတိဋ္ဌိတာ၊
မဇ္ဈေ ဘဝင်္ဂံ ဆေတွာန၊ ပစ္စေကံ ဝီထိ ဇာယတိ။
ရူပါဒါရမ္မဏေ စက္ခု-ပသာဒါဒိမှိ ဃဋ္ဋိတေ၊
အာဝဇ္ဇနာဒယော ဟောန္တိ၊ ဘဝင်္ဂဒွိစလာ ပရံ။
ပရိဏာမေ ဘဝင်္ဂဿ၊ အာလမ္ဗေ ဂဟဏာရဟေ၊
တထာ ဝီထိ မနောဒွါရေ၊ ယထာသမ္ဘဝတော ဘဝေ။
အာဝဇ္ဇာ ပဉ္စဝိညာဏံ၊ သမ္ပဋိစ္ဆနတီရဏံ၊
ဝေါဋ္ဌဗ္ဗကာမဇဝနံ၊ တဒါလမ္ဗဏမာနသံ။
သတ္တေဝံ ¶ ဝီထိစိတ္တာနိ၊ စိတ္တုပ္ပာဒါ စတုဒ္ဒသ၊
စတုပညာသ ဝိတ္ထာရာ၊ ပဉ္စဒွါရေ ယထာရဟံ။
ဥပ္ပာဒဋ္ဌိတိဘင်္ဂါနံ၊ ဝသာ စိတ္တက္ခဏံ တယံ၊
ရူပါနံ ဌိတိ ဧကူန-ပညာသဉ္စ ဒုကေ ဒုကံ။
ပရိတ္တေတိပရိတ္တေ စ၊ မဟန္တေတိမဟန္တကေ၊
ဝေါဋ္ဌဗ္ဗမောဃဇဝနံ၊ တဒါလမ္ဗန္တိ တံ ကမာ။
အာဝဇ္ဇနဉ္စ ဇဝနံ၊ မနောဒွါရေ တု ဂေါစရေ၊
ဝိဘူတေ တု တဒါလမ္ဗံ၊ ဝိတ္ထာရာ သတ္တသဋ္ဌိ တေ။
ကာမေ ဇဝနသတ္တာလ-မ္ဗဏာနံ နိယမေ သတိ၊
ဝိဘူတေတိမဟန္တေ စ၊ တဒါလမ္ဗဏမီရိတံ။
ပဉ္စဒွါရေ မနောဓာတု၊ ပစ္စေကမှိ ယထာက္ကမံ၊
ပဉ္စဝိညာဏယုဂဠံ၊ ပစ္စေကံ တု ပကာသိတံ။
မနောဒွါရေ တု ဇဝနံ၊ မဟဂ္ဂတမနုတ္တရံ၊
သုခတီရဏဝေါဋ္ဌဗ္ဗံ၊ ပရိတ္တဇဝနံ ဆသု။
မဟာဝိပါကစိတ္တာနိ ¶ ၊ ဥပေက္ခာတီရဏဒွယံ၊
ဆသု ဒွါရေသု ဇာယန္တိ၊ ဝီထိမုတ္တာနိ စေကဒါ။
သတ္တတိ ဝီထိစိတ္တာနိ၊ ဝိပါကာ တု မဟဂ္ဂတာ၊
နဝ ဝီထိဝိမုတ္တာ စ၊ ဒုဝိဓာပိ ဒသီရိတာ။
ဣစ္စေဝံ ဒွါရဘေဒေန၊ ဝိဘာဝေတွာ တတော ပရံ၊
ဉေယျာ ဂေါစရဘေဒေန၊ စိတ္တုပ္ပာဒါ ယထာရဟံ။
ရူပသဒ္ဒဂန္ဓရသဖောဋ္ဌဗ္ဗာ ပဉ္စ ဂေါစရာ၊
သေသဉ္စ ရူပပညတ္တိနာမဉ္စ ဓမ္မဂေါစရံ။
ပဉ္စဒွါရေ ဝတ္တမာနံ၊ ပဉ္စာလမ္ဗံ ယထာက္ကမံ၊
ဆာလမ္ဗဏံ မနောဒွါရေ၊ အတီတာနာဂတမ္ပိ စ။
ပညတ္တာတီတဝတ္တန္တံ ¶ ၊ ဆဒွါရဂ္ဂဟိတံ ပန၊
ဆဠာရမ္မဏသင်္ခါတံ၊ ယေဘုယျေန ဘဝန္တရေ။
နိမိတ္တဂတိကမ္မာနံ၊ ကမ္မမေဝါထ ဂေါစရံ၊
ပဋိသန္ဓိဘဝင်္ဂါနံ၊ စုတိယာဝ ယထာရဟံ။
ပဉ္စာလမ္ဗေ မနောဓာတု၊ ပစ္စေကမှိ ယထာက္ကမံ၊
ပဉ္စဝိညာဏယုဂဠံ၊ ပစ္စေကံ တု ပကာသိတံ။
ကာမပါကာနိ သေသာနိ၊ ဟသနဉ္စ ပရိတ္တကေ၊
ဉာဏဟီနာနိပုညာနိ၊ ဇဝနာနိ အနိမ္မလေ။
တိဟေတုကာမပုညာနိ၊ ပုညာဘိညာ စ လောကိယာ၊
သဗ္ဗာလမ္ဗေ ပဝတ္တန္တိ၊ အဂ္ဂမဂ္ဂဖလံ ဝိနာ။
ကြိယာဘိညာ စ ဝေါဋ္ဌဗ္ဗံ၊ ကြိယာ ကာမေ တိဟေတုကာ၊
သဗ္ဗာလမ္ဗေ ပဝတ္တန္တိ၊ နိဗ္ဗာနေ နိမ္မလာ သိယုံ။
ဒုတိယဉ္စ စတုတ္ထဉ္စ၊ အာရုပ္ပေသု မဟဂ္ဂတေ၊
မဟဂ္ဂတညေ ဝေါဟာရေ၊ အယမာလမ္ဗဏေ နယော။
စက္ခုသောတဃာနဇိဝှာ-ကာယဟဒယဝတ္ထုနာ၊
ကာမလောကေ ဆဝတ္ထူနိ၊ နိဿိတာ သတ္တ ဓာတုယော။
ပဉ္စဝိညာဏဓာတူ ¶ စ၊ တာသံ ပုဗ္ဗာပရတ္တယံ၊
မနောဓာတု တတော သေသာ၊ မနောဝိညာဏဓာတု စ။
စတဿော ဓာတုယော ရူပေ၊ တီဏိ ဝတ္ထူနိ နိဿိတာ၊
အရူပေ တု အနိဿာယ၊ ဓာတွေကာဝ ပဝတ္တတိ။
ပဉ္စပ္ပသာဒေ နိဿာယ၊ ပစ္စေကံ တု ယထာက္ကမံ၊
ပဉ္စဝိညာဏယုဂဠံ၊ ဘဝတီတိ ပကာသိတံ။
ကာမပါကာနိ သေသာနိ၊ မဂ္ဂါဝဇ္ဇနမာဒိတော၊
ဟသနံ ပဋိဃာရူပါ-ဝစရံ ဝတ္ထုနိဿိတံ။
ဒွေစတ္တာလီသ ¶ နိဿာယ၊ အနိဿာယ စ ဇာယရေ၊
အနိဿာယ ဝိပါကာနိ၊ အာရုပ္ပေတိ သမီရိတံ။
ဣစ္စေဝံ ဝတ္ထုဘေဒေန၊ စိတ္တုပ္ပာဒါ ပကာသိတာ၊
တတော ပရံ ဝိဘာဝေယျ၊ ဘူမိဘေဒေန ပဏ္ဍိတော။
နိရယေ ပေတလောကေ စ၊ တိရစ္ဆာနာသုရေ တထာ၊
ပါပကမ္မောပပဇ္ဇန္တိ၊ ပါပပါကာယ သန္ဓိယာ။
ဘူမိဿိတေသု ဒေဝေသု၊ မနုဿေသုပိ ဟီနကာ၊
အဟေတုကာယ ဇာယန္တိ၊ ပုညပါကာယ သန္ဓိယာ။
စာတုမဟာရာဇိကာ စ၊ တာဝတိံသာ စ ယာမကာ၊
တုသိတာ စေဝ နိမ္မာနရတိနော ဝသဝတ္တိနော။
ဣစ္စေဝံ ဆသု ဒေဝေသု၊ မနုဿေသု စ ဇာယရေ၊
မဟာဝိပါကသန္ဓီဟိ၊ ကာမပုညကတာ ဇနာ။
ဗြဟ္မာနံ ပါရိသဇ္ဇာ စ၊ တထာ ဗြဟ္မပုရောဟိတာ၊
မဟာဗြဟ္မာ စ ဇာယန္တိ၊ ပဌမဇ္ဈာနသန္ဓိယာ။
ပရိတ္တာ အပ္ပမာဏာဘာ၊ ဇာယန္တာဘဿရာ တထာ၊
ဒုတိယဇ္ဈာနပါကာယ၊ တတိယာယ စ သန္ဓိယာ။
ပရိတ္တသုဘပ္ပမာဏသုဘာ စ သုဘကိဏှကာ၊
စတုတ္ထာယ တု ဇာယန္တိ၊ တတိယဇ္ဈာနဘူမိကာ။
ဝေဟပ္ဖလာ ¶ အသညီ စ၊ သုဒ္ဓါဝါသာတိ သတ္တသု၊
ပဉ္စမာယ စ ဇာယန္တိ၊ အသညီစိတ္တဝဇ္ဇိတာ။
အဝိဟာ စ အတပ္ပာ စ၊ သုဒဿာ စ သုဒဿိနော၊
အကနိဋ္ဌာတိ ပဉ္စေတေ၊ သုဒ္ဓါဝါသာ ပကာသိတာ။
အာကာသာနဉ္စာယတနပါကာဒီဟိ ယထာက္ကမံ၊
အာကာသာနဉ္စာယတနဘူမိကာဒီသု ဇာယရေ။
စုတိသန္ဓိဘဝင်္ဂါနံ ¶ ၊ ဝသာ ပါကာ မဟဂ္ဂတာ၊
ကာမေ သဟေတုကာ ပါကာ၊ တဒါလမ္ဗဏတောပိ စ။
ယထာဝုတ္တနိယာမေန၊ ဘူမီသွေကာဝ ဇာယရေ၊
စိတ္တုပ္ပာဒေသု သဗ္ဗတ္ထ၊ န တွေဝါသညိနော မတာ။
ဃာနဇိဝှာကာယဓာတု-နိဿိတံ မာနသံ တထာ၊
ပဋိဃဒွယမိစ္စေဝမဋ္ဌ ဟောန္တေဝ ကာမိသု။
စက္ခုသောတဉ္စ ဝိညာဏံ၊ မနောဓာတု စ တီရဏံ၊
ကာမရူပေသု ဇာယန္တိ၊ ယထာသမ္ဘဝတော ဒသ။
ဝေါဋ္ဌဗ္ဗကာမပုညာနိ၊ ဝိပ္ပယုတ္တာနိ ဒိဋ္ဌိယာ၊
ဥဒ္ဓစ္စသဟိတဉ္စေတိ၊ သဗ္ဗတ္ထေတာနိ စုဒ္ဒသ။
ကင်္ခိတံ ဒိဋ္ဌိယုတ္တာနိ၊ သုဒ္ဓါဝါသဝိဝဇ္ဇိတေ၊
သိတဉ္စ ရူပဇဝန-မာရုပ္ပာပါယဝဇ္ဇိတေ။
ကာမကြိယာ သဟေတူ စ၊ ဥဒ္ဓံ လောကုတ္တရတ္တယံ၊
စတုတ္ထာရုပ္ပဇဝနံ၊ သဗ္ဗတ္ထာပါယဝဇ္ဇိတေ။
သေသမာရုပ္ပဇဝနံ၊ ဟိတွာပါယံ ယထာက္ကမံ၊
ဥဒ္ဓမာရုပ္ပဘူမိဉ္စ၊ ဇာယတီတိ ဝိဘာဝယေ။
သောတာပတ္တိဖလာဒီနိ၊ စတ္တာရာနုတ္တရာနိ တု၊
သုဒ္ဓါဝါသမပါယဉ္စ၊ ဟိတွာ သဗ္ဗတ္ထ ဇာယရေ။
သုဒ္ဓါဝါသမပါယဉ္စ၊ ဟိတွာရူပဉ္စ သဗ္ဗထာ၊
ပဌမာနုတ္တရော မဂ္ဂေါ၊ သေသဋ္ဌာနေသု ဇာယတိ။
သတ္တတိံသ ¶ အပါယေသု၊ ကာမေသီတိ ပကာသိတာ၊
ပဉ္စပညာသ သုဒ္ဓေသု၊ ရူပေသွေကူနသတ္တတိ။
ဆစတ္တာလီသ အာရုပ္ပေ၊ ဥပ္ပဇ္ဇန္တိ ယထာရဟံ၊
ဣစ္စေဝံ ဘူမိဘေဒေန၊ စိတ္တုပ္ပာဒါ ပကာသိတာ။
တိဟေတုသတ္တေ ¶ သဗ္ဗာနိ၊ ဒွိဟေတုကာဟေတုကေ ပန၊
ပရိတ္တာနိ ဝိဝဇ္ဇေတွာ၊ ဉာဏပါကကြိယာဇဝေ။
ပုထုဇ္ဇနာနံ သမ္ဘောန္တိ၊ ဒိဋ္ဌိယုတ္တဉ္စ ကင်္ခိတံ၊
သောတာပန္နာဒိတိဏ္ဏမ္ပိ၊ ဖလံ ဟောတိ ယထာသကံ။
ဝီတရာဂဿ ဇဝနံ၊ ကြိယာ စန္တိမနုတ္တရံ၊
ပုထုဇ္ဇနာဒိတိဏ္ဏမ္ပိ၊ ပဋိဃံ သမုဒီရိတံ။
ဇဝါ ပုထုဇ္ဇနာဒီနံ၊ စတုန္နံ သေသ သာသဝါ၊
သာသဝါဝဇ္ဇပါကာနိ၊ ပဉ္စန္နမပိ ဒီပယေ။
ပုထုဇ္ဇနေသု တေသဋ္ဌိ၊ သောတာပန္နာဒိကဒွယေ၊
ဧကူနသဋ္ဌိ စိတ္တာနိ၊ အနာဂါမိကပုဂ္ဂလေ။
သတ္တပညာသ ဇာယန္တိ၊ တေပညာသ အနာသဝေ၊
မဂ္ဂဋ္ဌေသု သကော မဂ္ဂေါ၊ ပုဂ္ဂလေသု အယံ နယော။
တိဟေတုကာမစုတိယာ၊ သဗ္ဗာပိ ပဋိသန္ဓိယော၊
ဒွိဟေတာဟေတုစုတိယာ၊ ကာမာဝစရသန္ဓိယော။
ရူပါဝစရစုတိယာ၊ သဟေတုပဋိသန္ဓိယော၊
အာရုပ္ပာရုပ္ပစုတိယာ၊ ဟေဋ္ဌိမာရုပ္ပဝဇ္ဇိတာ။
ပဋိသန္ဓိ တထာ ကာမေ၊ တိဟေတုပဋိသန္ဓိယော၊
ဘဝန္တီတိ စ မေဓာဝီ၊ စုတိသန္ဓိနယံ နယေ။
စုတိယာနန္တရံ ဟောတိ၊ ပဋိသန္ဓိ တတော ပရံ၊
ဘဝင်္ဂံ တံ ပန ဆေတွာ၊ ဟောတိ အာဝဇ္ဇနံ တတော။
အနိဋ္ဌေ ပါပပါကာဝ၊ စက္ခုဝိညာဏကာဒယော၊
ဣဋ္ဌေ တု ပုညပါကာဝ၊ ယထာသမ္ဘဝတော သိယုံ။
ပုဗ္ဗေ ¶ ဝုတ္တနယေနေဝ၊ ဝီထိစိတ္တာနိ ယောဇယေ၊
ပဉ္စဒွါရေ ယထာယောဂံ၊ မနောဒွါရေ စ ပဏ္ဍိတော။
သန္တီရဏတဒါလမ္ဗ-မိဋ္ဌာလမ္ဗေ ¶ ပဝတ္တတိ၊
သုခိတံ ဣဋ္ဌမဇ္ဈတ္တေ၊ အနိဋ္ဌေ စ ဥပေက္ခိတံ။
သုခေါပေတံ တဒါလမ္ဗံ၊ ဥပေက္ခာကြိယတော ပရံ၊
န ဟောတိ ဒေါမနဿမှာ၊ သောမနဿံ တု သဗ္ဗဒါ။
တထောပေက္ခာတဒါလမ္ဗံ၊ သုခိတကြိယတော ပရံ၊
အညတ္ထ နိယမော နတ္ထိ၊ တဒါလမ္ဗပဝတ္တိယာ။
သောမနဿဘဝင်္ဂဿ၊ ဇဝနေ ဒေါမနဿိတေ၊
တဒါလမ္ဗေ အသမ္ဘောန္တေ၊ ဥပေက္ခာတီရဏံ ဘဝေ။
ပရိကမ္မောပစာရာနု-လောမဂေါတြဘုတော ပရံ၊
ပဉ္စမံ ဝါ စတုတ္ထံ ဝါ၊ ဇဝနံ ဟောတိ အပ္ပနာ။
စတုဈာနံ သုခေါပေတံ၊ ဉာဏယုတ္တာနနန္တရံ၊
ဥပေက္ခာဉာဏယုတ္တာနံ၊ ပဉ္စမံ ဇာယတေ ပရံ။
ပုထုဇ္ဇနာန သေက္ခာနံ၊ ကာမပုညတိဟေတုတော၊
တိဟေတုကာမကြိယတော၊ ဝီတရာဂါနမပ္ပနာ။
အာဝဇ္ဇပဉ္စဝိညာဏ-သမ္ပဋိစ္ဆနတီရဏံ၊
ပဋိသန္ဓိစုတိ သဗ္ဗာ၊ ရူပါရူပါဒိကပ္ပနာ။
နိရောဓာ ဝုဋ္ဌဟန္တဿ၊ ဥပရိဋ္ဌဖလံ ဒွယံ၊
ပဉ္စာဘိညာ တထာ မဂ္ဂါ၊ ဧကစိတ္တက္ခဏာ မတာ။
ဒွိက္ခတ္တုံ ဟိ နိရောဓဿ၊ သမာပတ္တိက္ခဏေ ပန၊
စတုတ္ထာရုပ္ပဇဝနံ၊ တဒါလမ္ဗဉ္စ သဗ္ဗထာ။
ဒွိက္ခတ္တုံ ဝါထ တိက္ခတ္တုံ၊ မဂ္ဂဿာနန္တရံ ဖလံ၊
ဘဝင်္ဂါဒိ စ ဝေါဋ္ဌဗ္ဗံ၊ ဇဝနာဒိ သကိံ ပန။
တိဟေတုကာမဇဝနံ၊ အပ္ပနာဃဋိတံ ပန၊
တိက္ခတ္တုံ ဝါ စတုက္ခတ္တုံ၊ မနောဒွါရေ ပဝတ္တတိ။
ဆဒွါရေသု ¶ ¶ ပနညတ္ထ၊ ဇဝနံ ကာမဓာတုဇံ၊
ပဉ္စ ဝါရေ ဆ ဝါ သတ္တ၊ သမုပ္ပဇ္ဇတိ သမ္ဘဝါ။
သမာပတ္တိဘဝင်္ဂေသု၊ နိယမော န သမီရိတော၊
ဝီထိစိတ္တာဝသာနေ တု၊ ဘဝင်္ဂံ စုတိ ဝါ ဘဝေ။
ဣစ္စာနန္တရဘေဒေန၊ စိတ္တုပ္ပာဒဋ္ဌိတိံ စုတိံ၊
ဉတွာ ဂဏေယျ သင်္ဂယှ၊ လဗ္ဘမာနဝသာ ကထံ?
ပဉ္စဒွါရာဝဇ္ဇနတော၊ ဒသ စိတ္တာနိ ဒီပယေ၊
သေသာဝဇ္ဇနတော ပဉ္စ-စတ္တာလီသန္တိ ဘာသိတံ။
ပဉ္စဝိညာဏတော ပါပဝိပါကာ သမ္ပဋိစ္ဆနာ၊
ပရမေကံ ဒုဝေ ပုည-ဝိပါကာ သမ္ပဋိစ္ဆနာ။
သန္တီရဏဒွိဟေတုမှာ၊ ပါကာ ဒွါဒသ ဇာယရေ၊
တိဟေတုကာမပါကမှာ၊ ဧကဝီသတိ ဘာသိတံ။
ရူပါဝစရပါကမှာ၊ ပရမေကူနဝီသတိ၊
နဝဋ္ဌာရုပ္ပပါကမှာ၊ သတ္တ ဆ ဝါ ယထာက္ကမံ။
ပဋိဃမှာ တု သတ္တေဝ၊ သိတမှာ တေရသဗြဝုံ၊
ဒွိဟေတုပုညာပုညမှာ၊ ဧကဝီသတိ ဘာဝယေ။
ဒွိဟေတုကာမကြိယတော၊ အဋ္ဌာရသ ဥပေက္ခကာ၊
သုခိတမှာ သတ္တရသ၊ ဝိဘာဝေန္တိ ဝိစက္ခဏာ။
ကာမပုညာ တိဟေတုမှာ၊ တေတ္တိံသေဝ ဥပေက္ခကာ၊
သုခိတမှာ တိပညာသ၊ ဘဝန္တီတိ ပကာသိတံ။
တိဟေတုကာမကြိယတော၊ စတုဝီသတိပေက္ခကာ၊
သုခိတမှာ တု ဒီပေယျ၊ ပဉ္စဝီသတိ ပဏ္ဍိတော။
ဒသ ရူပဇဝမှေကာဒသ ဒွါဒသ တေရသ၊
ယထာက္ကမံ ပဉ္စဒသ၊ အာရုပ္ပာ ပရိဒီပယေ။
ဖလမှာ ¶ စုဒ္ဒသေဝါဟု၊ မဂ္ဂမှာ တု သကံ ဖလံ၊
ပရံ သင်္ဂဟမိစ္စေဝံ၊ ဝိဂဏေယျ ဝိသာရဒေါ။
ပဉ္စဒသမှာဒျာဝဇ္ဇ-မေကဝီသတိတောပရံ ¶ ၊
ဧကမှာ ပဉ္စဝိညာဏံ၊ ပဉ္စမှာ သမ္ပဋိစ္ဆနံ။
သုခသန္တီရဏံ ဟောတိ၊ ပဉ္စဝီသတိတော ပရံ၊
သမ္ဘောန္တိ သတ္တတိံသမှာ၊ ဥပေက္ခာတီရဏဒွယံ။
ဘဝန္တိ စတ္တာလီသမှာ၊ သုခပါကာ ဒွိဟေတုကာ၊
တထေကစတ္တာလီသမှာ၊ သုခပါကာ ဒွိဟေတုကာ၊
တထေကစတ္တာလီသမှာ၊ ဥပေက္ခာယ သမာယုတာ။
ဟောန္တိ သတ္တတိတော ကာမေ၊
သုခပါကာ တိဟေတုကာ၊
ဒွိသတ္တတိမှာ ဇာယန္တိ၊
ဥပေက္ခာသဟိတာ ပုန။
ဧကူနသဋ္ဌိတော ရူပါ၊ ပါကာ ပါကာ အရူပိနော၊
ကမာဋ္ဌစတ္တာလီသမှာ၊ တထေကဒွိတိဟီနတော။
ဖလဒွယံ စတုက္ကမှာ၊ ပဉ္စမှာန္တဖလဒွယံ၊
တိကာ မဟဂ္ဂတာ ဇဝါ၊ မဂ္ဂါ ကာမဇဝါ ဒွယာ။
စိတ္တုပ္ပာဒါနမိစ္စေဝံ၊ ဂဏိတော ပုဗ္ဗသင်္ဂဟော၊
ဉေယျောယံ ဌာနဘေဒေါတိ၊ ပုဗ္ဗာပရနိယာမိတော။
ရူပပါကမဟာပါကာ၊ မနောဓာတု စ တီရဏံ၊
ရူပမေဝ ဇနေန္တီတိ၊ ဝုတ္တာ ဧကူနဝီသတိ။
အပ္ပနာဇဝနံ သဗ္ဗံ၊ မဟဂ္ဂတမနုတ္တရံ၊
ဣရိယာပထရူပါနိ၊ ဇနေတီတိ သမီရိတံ။
ဝေါဋ္ဌဗ္ဗံ ¶ ကာမဇဝနမဘိညာ စ ယထာရဟံ၊
ဣရိယာပထဝိညတ္တိရူပါနံ ဇနကာ သိယုံ။
ပဉ္စဝိညာဏမာရုပ္ပာ၊ ဝိပါကာ စ န ကိဉ္စိပိ၊
သဗ္ဗေသံ ပဋိသန္ဓီ စ၊ စုတိ စာရဟတော တထာ။
ရူပါဒိတ္တယမိစ္စေဝံ ¶ ၊ သမုဋ္ဌာပေတိ မာနသံ၊
ဥပ္ပဇ္ဇမာနမေဝေတိ၊ ဉေယျော ဇနကသင်္ဂဟော။
ဣတိ ကိစ္စာဒိဘေဒေသု၊ ပစ္စေကသ္မိံ ပကာသိတံ၊
နယံ ဝုတ္တာနုသာရေန၊ သမာသေတွာ ဝိယောဇယေ။
ပနုဏ္ဏသမ္မောဟမလဿ သာသနေ၊
ဝိကိဏ္ဏဝတ္ထူဟိ သုဂန္ထိတံ နယံ၊
ပကိဏ္ဏမောဂယှ ပရတ္ထနိန္နယေ၊
ဝိတိဏ္ဏကင်္ခါဝ ဘဝန္တိ ပဏ္ဍိတာ။
ဗဟုနယဝိနိဗန္ဓံ ကုလ္လမေတံ ဂဟေတွာ၊
ဇိနဝစနသမုဒ္ဒံ ကာမမောဂယှ ဓီရာ၊
ဟိတသကလသမတ္ထံ ဝတ္ထုသာရံ ဟရိတွာ၊
ဟဒယ ရတနဂဗ္ဘံ သာဓု သမ္ပူရယန္တိ။
ဣတိ နာမရူပပရိစ္ဆေဒေ ပကိဏ္ဏကဝိဘာဂေါ နာမ
စတုတ္ထော ပရိစ္ဆေဒေါ။