📜
၅။ ပဉ္စမော ပရိစ္ဆေဒေါ
ကမ္မဝိဘာဂေါ
ဝိဘာဂံ ¶ ပန ကမ္မာနံ၊
ပဝက္ခာမိ ဣတော ပရံ၊
ကမ္မပါကကြိယာဘေဒေ၊
အမောဟာယ သမာသတော။
ကမ္မပစ္စယကမ္မန္တိ၊ စေတနာဝ သမီရိတာ၊
တတ္ထာပိ နာနက္ခဏိကာ၊ ပုညာပုညာဝ စေတနာ။
ဒေတိ ပါကမဓိဋ္ဌာယ၊ သမ္ပယုတ္တေ ယထာရဟံ၊
ကမ္မဿာယူဟနဋ္ဌေန၊ ပဝတ္တတ္တာ ဟိ စေတနာ။
က္လေသာနုသယသန္တာနေ ¶ ၊ ပါကဓမ္မာ ဟိ ဇာယရေ၊
ပဟီနာနုသယာနံ တု၊ ကြိယာမတ္တံ ပဝတ္တတိ။
မူလဘာဝါ စ သဗ္ဗေသံ၊ တထေဝါဝဇ္ဇနဒွယံ၊
ဇနိတာနိ စ ကမ္မေဟိ၊ ဝိပါကာနိ ပဝတ္တရေ။
စိတ္တုပ္ပာဒဝသေနေဝ၊ ကမ္မံ တေတ္တိံသဓာ ဌိတံ၊
ကမ္မစတုက္ကဘေဒေဟိ၊ ဝိဘာဝေယျ ဝိစက္ခဏော။
ပစ္စုပ္ပန္နာဒိကဏှာဒိ-ဇနကာဒိဂရာဒိတော၊
ဒိဋ္ဌဓမ္မာဒိကာမာဒိ-ဘေဒါ ဆဓာ ယထာက္ကမံ။
ယံ ပါပံ သုခဝေါကိဏ္ဏံ၊ အကိစ္ဆေန ကရီယတိ၊
ပစ္စုပ္ပန္နသုခံ ကမ္မံ၊ အာယတိံ ဒုက္ခပါကဇံ။
ကိစ္ဆေန ဒုက္ခဝေါကိဏ္ဏံ၊ ယဒိ ပါပံ ကရီယတိ၊
ပစ္စုပ္ပန္နေ စ တံ ဒုက္ခံ၊ အာယတိံ ဒုက္ခပါကဇံ။
ကိစ္ဆေန ¶ ဒုက္ခဝေါကိဏ္ဏံ၊ ယဒိ ပုညံ ကရီယတိ၊
ပစ္စုပ္ပန္နမှိ တံ ဒုက္ခံ၊ အာယတိံ သုခပါကဇံ။
ယံ ပုညံ သုခဝေါကိဏ္ဏံ၊ အကိစ္ဆေန ကရီယတိ၊
ပစ္စုပ္ပန္နသုခဉ္စေဝ၊ အာယတိံ သုခပါကဇံ။
ဝိသသံသဋ္ဌမဓုရံ၊ သဝိသံ တိတ္တကံ တထာ၊
ဂေါမုတ္တမဓုဘေသဇ္ဇ-မိစ္စောပမ္မံ ယထာက္ကမံ။
သမာဒါနေ ဝိပါကေ စ၊ သုခဒုက္ခပ္ပဘေဒိတံ၊
ကမ္မမေဝံ စတုဒ္ဓါတိ၊ ပကာသေန္တိ တထာဂတာ။
အာနန္တရိယကမ္မာဒိ၊ ဧကန္တကဋုကာဝဟံ၊
ကဏှံ ကဏှဝိပါကန္တိ၊ ကမ္မံ ဒုဂ္ဂတိဂါမိကံ။
ပဌမဇ္ဈာနကမ္မာဒိ၊ ဧကန္တေန သုခါဝဟံ၊
သုက္ကံ သုက္ကဝိပါကန္တိ၊ ကမ္မံ သဂ္ဂူပပတ္တိကံ။
ဝေါကိဏ္ဏကမ္မ ¶ ဝေါကိဏ္ဏ-သုခဒုက္ခူပပတ္တိကံ၊
ကဏှသုက္ကံ ကဏှသုက္က-ဝိပါကန္တိ သမီရိတံ။
အကဏှသုက္ကမီရေန္တိ၊ အကဏှသုက္ကပါကဒံ၊
ကမ္မံ လောကုတ္တရံ လောကေ၊ ဂတိကမ္မက္ခယာဝဟံ။
ဣတိ ဝဋ္ဋပ္ပဝတ္တမှိ၊ က္လေသဝေါဒါနဘေဒိတံ၊
ကမ္မက္ခယေန သင်္ဂယှ၊ စတုဓာ ကမ္မမီရိတံ။
ဇနကဉ္စေဝုပတ္ထမ္ဘ-မုပပီဠောပဃာတကံ၊
စတုဓာ ကိစ္စဘေဒေန၊ ကမ္မမေဝံ ပဝုစ္စတိ။
ဇနေတိ ဇနကံ ပါကံ၊ တံ ဆိန္ဒတုပပီဠကံ၊
တံ ပဝတ္တေတုပတ္ထမ္ဘံ၊ တံ ဃာတေတောပဃာတကံ။
ကရောတိ အတ္တနော ပါက-ဿာဝကာသန္တိ ဘာသိတံ၊
ပါကဒါယကကမ္မံ တု၊ ယံ ကိဉ္စိ ဇနကံ ဘဝေ။
ဗာဓမာနကကမ္မံ ¶ တု၊ တံ ပါကမုပပီဠကံ၊
ဥပဃာတကမီရေန္တိ၊ တဒုပစ္ဆေဒကံပရေ။
ဂရုကာသန္နမာစိဏ္ဏံ၊ ကဋတ္တာကမ္မုနာ သဟ၊
ကမ္မံ စတုဗ္ဗိဓံ ပါက-ပရိယာယပ္ပဘေဒတော။
မဟဂ္ဂတာနန္တရိယံ၊ ဂရုကမ္မန္တိ ဝုစ္စတိ၊
ကတံ စိန္တိတမာသန္န-မာသန္နမရဏေန တု။
ဗာဟုလ္လေန သမာစိဏ္ဏမာစိဏ္ဏန္တိ ပဝုစ္စတိ၊
သေသံ ပုညမပုညဉ္စ၊ ကဋတ္တာကမ္မမီရိတံ။
ဒိဋ္ဌဓမ္မေ ဝေဒနီယမုပပဇ္ဇာပရေ တထာ၊
ပရိယာယဝေဒနီယမိတိ စာဟောသိကမ္မုနာ။
ပါကကာလဝသေနာထ၊ ကာလာတီတဝသေန စ၊
စတုဓေဝမ္ပိ အက္ခာတံ၊ ကမ္မမာဒိစ္စဗန္ဓုနာ။
ဒိဋ္ဌဓမ္မေ ဝေဒနီယံ၊ ပဌမံ ဇဝနံ ဘဝေ၊
အလဒ္ဓါသေဝနတ္တာဝ၊ အသမတ္ထံ ဘဝန္တရေ။
ဝေဒနီယံ ¶ တုပပဇ္ဇပရိယောသာနမီရိတံ၊
ပရိနိဋ္ဌိတကမ္မတ္တာ၊ ဝိပစ္စတိ အနန္တရေ။
သေသာနိ ဝေဒနီယာနိ၊ ပရိယာယာပရေ ပန၊
လဒ္ဓါသေဝနတော ပါကံ၊ ဇနေန္တိ သတိ ပစ္စယေ။
ဝုစ္စန္တာဟောသိကမ္မာနိ၊ ကာလာတီတာနိ သဗ္ဗထာ၊
ဥစ္ဆိန္နတဏှာမူလာနိ၊ ပစ္စယာလာဘတော တထာ။
စတုဓာ ပုန ကာမာဒိဘူမိဘေဒေန ဘာသိတံ၊
ပုညာပုညဝသာ ဒွေဓာ၊ ကာမာဝစရိကံ ဘဝေ။
အပုညံ တတ္ထ သာဝဇ္ဇ-မနိဋ္ဌဖလဒါယကံ၊
တံ ကမ္မဖဿဒွါရေဟိ၊ ဒုဝိဓံ သမ္ပဝတ္တတိ။+
ကာယဒွါရံ ¶ ဝစီဒွါရံ၊ မနောဒွါရန္တိ တာဒိနာ၊
ကမ္မဒွါရတ္တယံ ဝုတ္တံ၊ ဖဿဒွါရာ ဆ ဒီပိတာ။
ကမ္မဒွါရေ မနောဒွါရေ၊ ပဉ္စဒွါရာ သမောဟိတာ၊
ဖဿဒွါရမနောဒွါရံ၊ ကမ္မဒွါရတ္တယံ ကတံ။
တထာ ဟိ ကာယဝိညတ္တိံ၊ ဇနေတွာ ဇာတစေတနာ၊
ကာယကမ္မံ ဝစီကမ္မံ၊ ဝစီဘေဒပဝတ္တိကာ။
ဝိညတ္တိဒွယသမ္ပတ္တာ၊ မနောကမ္မန္တိ ဝုစ္စတိ၊
ဘေဒေါယံ ပရိယာယေန၊ ကမ္မာနမိတိ ဒီပိတော။
ပါဏဃာတာဒိကံ ကမ္မံ၊ ကာယေ ဗာဟုလ္လဝုတ္တိတော၊
ကာယကမ္မံ ဝစီကမ္မံ၊ မုသာဝါဒါဒိကံ တထာ။
အဘိဇ္ဈာဒိ မနောကမ္မံ၊ တီသု ဒွါရေသု ဇာယတိ၊
ဒွီသု ဒွါရေသု သေသာနိ၊ ဘေဒေါယံ ပရမတ္ထတော။
ဖဿဒွါရမနောဒွါရေ၊ ဝိညတ္တိဒွယမီရိတံ၊
ပဉ္စဒွါရေ ဒွယံ နတ္ထိ၊ အယမေတ္ထ ဝိနိစ္ဆယော။
အက္ခန္တိဉာဏ ကောသဇ္ဇံ၊ ဒုဿိလျံ မုဋ္ဌသစ္စတာ၊
ဣစ္စာသံဝရဘေဒေန၊ အဋ္ဌဒွါရေသု ဇာယတိ။
ကမ္မဒွါရတ္တယဉ္စေဝ ¶ ၊ ပဉ္စဒွါရာ တထာပရေ၊
အသံဝရာနံ ပဉ္စန္နံ၊ အဋ္ဌ ဒွါရာ ပကာသိတာ။
တတ္ထ ကမ္မပထပ္ပတ္တံ၊ ပဋိသန္ဓိဖလာဝဟံ၊
ပါဏဃာတာဒိဘေဒေန၊ ဒသဓာ သမ္ပဝတ္တတိ။
ပါဏာတိပါတော ဖရုသံ၊ ဗျာပါဒေါ စ တထာပရော၊
ဣစ္စေဝံ တိဝိဓံ ကမ္မံ၊ ဒေါသမူလေဟိ ဇာယတိ။
မိစ္ဆာစာရော အဘိဇ္ဈာ စ၊ မိစ္ဆာဒိဋ္ဌိ တထာပရာ၊
ဣစ္စေဝံ တိဝိဓံ ကမ္မံ၊ လောဘမူလေဟိ ဇာယတိ။
ထေယျာဒါနံ ¶ မုသာဝါဒေါ၊ ပိသုဏံ သမ္ဖလာပနံ၊
ကမ္မံ စတုဗ္ဗိဓမ္မေတံ၊ ဒွိမူလေဟိ ပဝတ္တတိ။
ဆန္ဒာဒေါသာ ဘယာ မောဟာ၊ ပါပံ ကုဗ္ဗန္တိ ပါဏိနော၊
တသ္မာ ဆန္ဒာဒိဘေဒေန၊ စတ္တာလီသဝိဓံ ဘဝေ။
ဣစ္စာပုညံ ပကာသေန္တိ၊ စတုရာပါယသာဓကံ၊
အညတ္ထာပိ ပဝတ္တမှိ၊ ဝိပတ္တိဖလသာဓနံ။
တိဝိဓံ ပန ပုညံ တု၊ အနဝဇ္ဇိဋ္ဌပါကဒံ၊
ဒါနံ သီလံ ဘာဝနာ စ၊ တီသု ဒွါရေသု ဇာယတိ။
မဟတ္တဂါရဝါ သ္နေဟာ၊ ဒယာ သဒ္ဓုပကာရတော၊
ဘောဂဇီဝါဘယဓမ္မံ၊ ဒဒတော ဒါနမီရိတံ။
ပုညမာစာရဝါရိတ္တ-ဝတ္တမာရဗ္ဘ ကုဗ္ဗတော၊
ပါပါ စ ဝိရမန္တဿ၊ ဟောတိ သီလမယံ တဒါ။
ဒါနသီလဝိနိမုတ္တံ၊ ဘာဝနာတိ ပဝုစ္စတိ၊
ပုညံ ဘာဝေန္တိ သန္တာနေ၊ ယသ္မာ တေန ဟိတာဝဟံ။
ဇနေတွာ ကာယဝိညတ္တိံ၊ ယဒါ ပုညံ ကရီယတိ၊
ကာယကမ္မံ တဒါ ဟောတိ၊ ဒါနံ သီလဉ္စ ဘာဝနာ။
ဝစီဝိညတ္တိယာ ¶ သဒ္ဓိံ၊ ယဒါ ပုညံ ကရီယတိ၊
ဝစီကမ္မံ မနောကမ္မံ၊ ဝိနာ ဝိညတ္တိယာ ကတံ။
တံတံဒွါရိကမေဝါဟု၊ တံတံဒွါရိကပါပတော၊
ဝိရမန္တဿ ဝိညတ္တိံ၊ ဝိနာ ဝါ သဟ ဝါ ပုန။
ဒါနံ သီလံ ဘာဝနာ စ၊ ဝေယျာဝစ္စာပစာယနာ၊
ပတ္တာနုမောဒနာ ပတ္တိ-ဒါနံ ဓမ္မဿ ဒေသနာ၊
သဝနံ ဒိဋ္ဌိဇုကမ္မ-မိစ္စေဝံ ဒသဓာ ဌိတံ။
ကာမပုညံ ¶ ပကာသေန္တိ၊ ကာမေ သုဂတိသာဓကံ၊
အညတ္ထာပိ ပဝတ္တမှိ၊ သမ္ပတ္တိဖလသာဓကံ။
စိတ္တုပ္ပာဒပ္ပဘေဒေန၊ ကမ္မံ ဝီသတိဓာ ဌိတံ၊
ကာမာဝစရမိစ္စေဝံ၊ ဝိဘာဝေန္တိ ဝိဘာဝိနော။
ရူပါဝစရိကံ ကမ္မ-မပ္ပနာဘာဝနာမယံ၊
ကသိဏာဒိကမာရဗ္ဘ၊ မနောဒွါရေ ပဝတ္တတိ။
ပထဝါပေါ စ တေဇော စ၊
ဝါယော နီလဉ္စ ပီတကံ၊
လောဟိတောဒါတမာကာသံ၊
အာလောကောတိ ဝိသာရဒါ။
ကသိဏာနိ ဒသီရေန္တိ၊ အာဒိကမ္မိကယောဂိနော၊
ဥဒ္ဓုမာတံ ဝိနီလဉ္စ၊ ဝိပုဗ္ဗကံ ဝိခါဒိတံ။
ဝိစ္ဆိဒ္ဒကဉ္စ ဝိက္ခိတ္တံ၊ ဟတဝိက္ခိတ္တလောဟိတံ၊
ပုဠဝံ အဋ္ဌိကဉ္စေတိ၊ အသုဘံ ဒသဓာ ဌိတံ။
ဗုဒ္ဓေ ဓမ္မေ စ သင်္ဃေ စ၊ သီလေ စာဂေ စ အတ္တနော၊
ဒေဝတောပသမာယဉ္စ၊ ဝုတ္တာနုဿတိဘာဝနာ။
မရဏေ သတိ နာမေကာ၊ တထာ ကာယဂတာသတိ၊
အာနာပါနသတိစ္စေဝံ၊ ဒသဓာနုဿတီရိတာ။
မေတ္တာ ¶ ကရုဏာ မုဒိတာ၊ ဥပေက္ခာ ဘာဝနာတိ စ၊
စတုဗြဟ္မဝိဟာရာ စ၊ အပ္ပမညာတိ ဘာသိတာ။
အာဟာရေ တု ပဋိက္ကူလ-သညေကာတိ ပကာသိတာ၊
စတုဓာတုဝဝတ္ထာနံ၊ စတုဓာတုပရိဂ္ဂဟော။
စတ္တာရောရုပ္ပကာ စေတိ၊ စတ္တာလီသ သမာသတော၊
ကမ္မဋ္ဌာနာနိ ဝုတ္တာနိ၊ သမထေ ဘာဝနာနယေ။
အာနာပါနဉ္စ ¶ ကသိဏံ၊ ပဉ္စကဇ္ဈာနိကံ တဟိံ၊
ပဌမဇ္ဈာနိကာ ဝုတ္တာ၊ ကောဋ္ဌာသာသုဘဘာဝနာ။
မေတ္တာဒယော စတုဇ္ဈာနာ၊ ဥပေက္ခာ ပဉ္စမီ မတာ၊
အာရုပ္ပာရုပ္ပကာ သေသာ၊ ဥပစာရသမာဓိကာ။
ကသိဏာသုဘကောဋ္ဌာသေ၊
အာနာပါနေ စ ဇာယတိ၊
ပဋိဘာဂေါ တမာရဗ္ဘ၊
တတ္ထ ဝတ္တတိ အပ္ပနာ။
ကမ္မဋ္ဌာနေသု သေသေသု၊ ပဋိဘာဂေါ န ဝိဇ္ဇတိ၊
တထာ ဟိ သတ္တဝေါဟာရေ၊ အပ္ပမညာ ပဝတ္တရေ။
ကသိဏုဂ္ဃာဋိမာကာသံ၊ ပဌမာရုပ္ပမာနသံ၊
ပဌမာရုပ္ပကာဘာဝ-မာကိဉ္စညဉ္စ ဂေါစရံ။
အာရုပ္ပာ သမ္ပဝတ္တန္တိ၊ အာလမ္ဗိတွာ ယထာက္ကမံ၊
အညတ္ထ ပန သဗ္ဗတ္ထ၊ နပ္ပဝတ္တတိ အပ္ပနာ။
ပရိကမ္မံ ပရိကမ္မ-သမာဓိ စ တတော ပရံ၊
ဥပစာရပ္ပနာ စေတိ၊ ဘာဝနာယံ စတုဗ္ဗိဓံ။
ပရိကမ္မနိမိတ္တဉ္စ၊ ဥဂ္ဂဟော စ တတော ပရံ၊
ပဋိဘာဂေါတိ တီဏေဝ၊ နိမိတ္တာနိ ပကာသယုံ။
နိမိတ္တံ ဂဏှတော ပုဗ္ဗ-မာဒိကမ္မိကယောဂိနော၊
ပရိကမ္မနိမိတ္တန္တိ၊ ကသိဏာဒိကမီရိတံ။
တသ္မိံ ¶ ပန နိမိတ္တမှိ၊ အာရဘန္တဿ ဘာဝနံ၊
ပဌမံ ပရိကမ္မန္တိ၊ ဘာဝနာပိ ပဝုစ္စတိ။
စိတ္တေနုဂ္ဂဟိတေ တသ္မိံ၊ မနောဒွါရေ ဝိဘာဝိတေ၊
တဒုဂ္ဂဟနိမိတ္တံ တု၊ သမုပ္ပန္နန္တိ ဝုစ္စတိ။
ပဉ္စဒွါရဝိနိမုတ္တာ ¶ ၊ တမာရဗ္ဘ သမာဟိတာ၊
ပရိကမ္မသမာဓီတိ၊ ဘာဝနာ သာ ပကာသိတာ။
ဥဂ္ဂဟာကာရသမ္ဘူတံ၊ ဝတ္ထုဓမ္မဝိမုစ္စိတံ၊
ပဋိဘာဂနိမိတ္တန္တိ၊ ဘာဝနာမယမီရိတံ။
ရူပါဒိဝိသယံ ဟိတွာ၊ တမာရဗ္ဘ တတော ပရံ၊
ဘဝင်္ဂန္တရိတံ ဟုတွာ၊ မနောဒွါရံ ပဝတ္တတိ။
သိခါပတ္တသမာဓာန-မုပက္လေသဝိမုစ္စိတံ၊
ဥပစာရသမာဓီတိ၊ ကာမာဝစရမီရိတံ။
ပဋိဘာဂနိမိတ္တမှိ၊ ဥပစာရသမာဓိတော၊
ဘာဝနာဗလနိပ္ဖန္နာ၊ သမုပ္ပဇ္ဇတိ အပ္ပနာ။
ပုရိမံ ပုရိမံ ကတွာ၊ ဝသီဘူတံ တတော ပရံ၊
ဩဠာရိကင်္ဂမောဟာယ၊ သုခုမင်္ဂပ္ပဝတ္တိယာ။
အပ္ပနာ ပဒဟန္တဿ၊ ပဝတ္တတိ ယထာက္ကမံ၊
ဝိတက္ကာဒိဝိနိမုတ္တာ၊ ဝိစာရာဒိသမာယုတာ။
အာဝဇ္ဇနာ စ ဝသိတာ၊ တံသမာပဇ္ဇနာ တထာ၊
ဝုဋ္ဌာနာဓိဋ္ဌာနာ ပစ္စ-ဝေက္ခဏာတိ စ ပဉ္စဓာ။
ဝိတက္ကဉ္စ ဝိစာရဉ္စ၊ သဟာတိက္ကမတော ပန၊
စတုက္ကဇ္ဈာနမပ္ပေတိ၊ ပဉ္စကဉ္စ ဝိသုံ ဝိသုံ။
အပ္ပနာယ စ ပစ္စေကဈာနဿာပိ ဝိသုံ ဝိသုံ၊
ဣစ္ဆိတဗ္ဗာ ဟိ သဗ္ဗတ္ထ၊ ပရိကမ္မာဒိဘာဝနာ။
တံ ပရိတ္တံ မဇ္ဈိမဉ္စ၊ ပဏီတန္တိ ဝိဘဇ္ဇတိ၊
ဝိမောက္ခော စ ဝသီဘူတမဘိဘာယတနန္တိ စ။
ပရိတ္တာဒိ ¶ ပရိတ္တာဒိဂေါစရန္တိ စတုဗ္ဗိဓံ၊
ဒုက္ခာပဋိပဒံ ဒန္ဓာဘိညမိစ္စာဒိတော တထာ။
တံ ¶ ဆန္ဒစိတ္တဝီရိယဝီမံသာဓိပ္ပတေယျတော၊
ဝိသေသဋ္ဌိတိနိဗ္ဗေဓဟာနဘာဂိယတောပိ စ။
ပဉ္စဓာ ဈာနဘေဒေန၊ စတုဓာလမ္ဗဘေဒတော၊
သမာဓိဘာဝနာပုညမပ္ပနာပတ္တမီရိတံ။
ဣတိ ဝိက္ခမ္ဘိတက္လေသံ၊ ရူပလောကူပပတ္တိကံ၊
ရူပါဝစရကမ္မန္တိ၊ ဝိဘာဝေန္တိ ဝိသာရဒါ။
အရူပါဝစရကမ္မံ၊ စတုဓာရုပ္ပသာဓနံ၊
ရူပဓမ္မဝိဘာဂေန၊ ဘာဝိတန္တိ ပဝုစ္စတိ။
စတုပါရိသုဒ္ဓိသီလံ၊ ဓုတင်္ဂပရိဝါရိတံ၊
သီလဝိသုဒ္ဓိသင်္ခါတံ၊ ပူရယိတွာ တတော ပရံ။
ပတွာ စိတ္တဝိသုဒ္ဓိဉ္စ၊ သောပစာရသမာဓိကံ၊
တထာ ဒိဋ္ဌိဝိသုဒ္ဓိဉ္စ၊ နာမရူပပရိဂ္ဂဟံ။
ကင်္ခါဝိတရဏံ နာမ၊ ပစ္စယဋ္ဌိတိဒဿနံ၊
ဝိသောဓေတွာ မဂ္ဂါမဂ္ဂ-ဉာဏဒဿနမေဝ စ။
တတော ပရံ ဝိပဿန္တော၊ ဝိသုဒ္ဓီသု သမာဟိတော၊
သမ္ပာဒေတွာ ပဋိပဒါ-ဉာဏဒဿနမုတ္တမံ။
တတော ပပ္ပောတိ မေဓာဝီ၊ ဝိသုဒ္ဓိံ ဉာဏဒဿနံ၊
စတုမဂ္ဂသမညာတံ၊ သာမညဖလဒါယကံ။
ဆဗ္ဗိသုဒ္ဓိကမေနေဝံ၊ ဘာဝေတဗ္ဗံ ယထာက္ကမံ၊
ကမ္မံ လောကုတ္တရံ နာမ၊ သဗ္ဗဒုက္ခက္ခယာဝဟံ။
ဣတိ ဆန္နံ စတုက္ကာနံ၊ ဝသာ ကမ္မံ ဝိဘာဝယေ၊
ယေန ကမ္မဝိသေသေန၊ သန္တာနမဘိသင်္ခတံ။
ဘူမီဘဝယောနိဂတိဌိတိဝါသေသု သမ္ဘဝါ၊
ပဋိသန္ဓာဒိဘာဝေန၊ ပါကာယ ပရိဝတ္တတိ။
သာယံ ¶ ¶ ကမ္မသမညာတာ၊ ကမ္မဇာနိ ယထာရဟံ၊
ဇနေတိ ရူပါရူပါနိ၊ မနောသဉ္စေတနာ ကထံ။
ဘူမိ လောကုတ္တရာ စေဝ၊ လောကိယာတိ ဒွိဓာ ဌိတာ၊
ပရိတ္တာ စ မဟဂ္ဂတာ၊ အပ္ပမာဏာတိ ဘေဒိတာ။
ဧကာဒသ ကာမဘဝါ၊ ဘဝါ သောဠသ ရူပိနော၊
စတ္တာရောရုပ္ပကာ စေတိ၊ တိဝိဓော ဘဝ သင်္ဂဟော။
အသညေကော ဘဝေါ နေဝ-
သညိနာသညိကော ဘဝေါ၊
သဗ္ဗော သညိဘဝေါ သေသော၊
ဧဝမ္ပိ တိဝိဓော ဘဝေါ။
အာရုပ္ပာ စတုဝေါကာရာ၊ ဧကဝေါကာရသညိနော၊
ပဉ္စဝေါကာရကော နာမ၊ ဘဝေါ သေသော ပဝုစ္စတိ။
နိရယေ ဟောတိ ဒေဝေ စ၊ ယောနေကာ ဩပပါတိကာ၊
အဏ္ဍဇာ ဇလာဗုဇာ စ၊ သံသေဒဇောပပါတိကာ။
ပေတလောကေ တိရစ္ဆာနေ၊ ဘုမ္မဒေဝေ စ မာနုသေ၊
အသုရေ စ ဘဝန္တေဝံ၊ စတုဓာ ယောနိ သင်္ဂဟာ။
ဂတိယော နိရယံ ပေတာ၊ တိရစ္ဆာနာ စ မာနဝါ၊
သဗ္ဗေ ဒေဝါတိ ပဉ္စာဟ၊ ပဉ္စနိမ္မလလောစနော။
တာဝတိံသေသု ဒေဝေသု၊ ဝေပစိတ္တာသုရာ ဂတာ၊
ကာလကဉ္စာသုရာ နာမ၊ ဂတာ ပေတေသု သဗ္ဗထာ။
သန္ဓိသညာယ နာနတ္တာ၊ ကာယဿာပိ စ နာနတော၊
နာနတ္တကာယသညီတိ၊ ကာမသုဂ္ဂတိယော မတာ။
ပဌမဇ္ဈာနဘူမီ စ၊ စတုရာပါယဘူမိယော၊
နာနတ္တကာယဧကတ္တ-သညီတိ သမုဒီရိတာ။
ဧကတ္တကာယနာနတ္တ-သညီ ¶ ဒုတိယဘူမိကာ၊
ဧကတ္တကာယဧကတ္တ-သညီ ဥပရိရူပိနော။
ဝိညာဏဋ္ဌိတိယော ¶ သတ္တ၊ တီဟာရုပ္ပေဟိ ဟေဋ္ဌတော၊
အသညေတ္ထ န ဂဏှန္တိ၊ ဝိညာဏာဘာဝတော သဒါ။
စတုတ္ထာရုပ္ပဘူမိဉ္စ၊ ပဋုဝိညာဏဟာနိတော၊
တံ ဒွယမ္ပိ ဂဟေတွာန၊ သတ္တာဝါသာ နဝေရိတာ။
ဒေဝါ မနုဿာပါယာတိ၊ တိဝိဓာ ကာမဓာတုယော၊
ပဌမဇ္ဈာနဘူမာဒိ-ဘေဒါ ဘူမိ စတုဗ္ဗိဓာ။
ပဌမာရုပ္ပာဒိဘေဒါ၊ စတုဓာရုပ္ပဓာတုယော၊
သောတာပန္နာဒိဘေဒေန၊ စတုဓာနုတ္တရာ မတာ။
နိရယာဒိပ္ပဘေဒေန၊ ဘိန္နာ ပစ္စေကတော ပုန၊
ဧကတိံသဝိဓာ ဟောန္တိ၊ သတ္တာနံ ဇာတိဘူမိယော။
ဧဝံ ဘူမာဒိဘေဒေသု၊ သတ္တာ ဇာယန္တိ သာသဝါ၊
ကမ္မာနိ စ ဝိပစ္စန္တိ၊ ယထာသမ္ဘဝတော ကထံ၊
အပါယမှာ စုတာ သတ္တာ၊ ကာမဓာတုမှိ ဇာယရေ၊
သဗ္ဗဋ္ဌာနေသု ဇာယန္တိ၊ သေသကာမဘဝါ စုတာ။
သုဒ္ဓါဝါသာ စုတာ သုဒ္ဓါ-ဝါသေသုပရိ ဇာယရေ၊
အသညိမှာ စုတာ ကာမ-သုဂတိမှောပပဇ္ဇရေ။
သေသရူပါ စုတာ သတ္တာ၊ ဇာယန္တာပါယဝဇ္ဇိတေ၊
အာရုပ္ပတောပရိ ကာမ-သုဂတိမှိ တဟိမ္ပိ စ။
ပုထုဇ္ဇနာဝ ဇာယန္တိ၊ အသညာပါယဘူမိသု၊
သုဒ္ဓါဝါသေသု ဇာယန္တိ၊ အနာဂါမိကပုဂ္ဂလာ။
ဝေဟပ္ဖလေ အကနိဋ္ဌေ၊ ဘဝဂ္ဂေ စ ပတိဋ္ဌိတာ၊
န ပုနညတ္ထ ဇာယန္တိ၊ သဗ္ဗေ အရိယပုဂ္ဂလာ။
ဗြဟ္မလောကဂတာ ¶ ဟေဋ္ဌာ၊ အရိယာ နောပပဇ္ဇရေ၊
ဒုက္ခမူလသမုစ္ဆေဒါ၊ ပရိနိဗ္ဗန္တိနာသဝါ။
ဇာယန္တာနဉ္စ ဇာတာန-မိတိ ဝုတ္တနိယာမတော၊
ပဝတ္တာတီတကံ ကမ္မံ၊ ပဋိသန္ဓိပဝတ္တိယံ။
အရူပံ ¶ စတုဝေါကာရေ၊ ရူပမေဝ အသညိသု၊
ဇနေတိ ရူပါရူပါနိ၊ ပဉ္စဝေါကာရဘူမိယံ။
အာရုပ္ပာနုတ္တရံ ကမ္မံ၊ ပါကမေဝ ဝိပစ္စတိ၊
ကဋတ္တာရူပပါကာနိ၊ ကာမရူပနိယာမိတံ။
ကာလောပဓိပ္ပယောဂါနံ၊ ဂတိယာ စ ယထာရဟံ၊
သမ္ပတ္တိဉ္စ ဝိပတ္တိဉ္စ၊ ကမ္မမာဂမ္မ ပစ္စတိ။
အပါယေ သန္ဓိမုဒ္ဓစ္စ-ဟီနာ ဒတွာ ပဝတ္တိယံ၊
သဗ္ဗာပိ ပဉ္စဝေါကာရေ၊ ဒွါဒသာပုညစေတနာ။
သတ္တာကုသလပါကာနိ၊ ဝိပစ္စန္တိ ယထာရဟံ၊
ကာမာဝစရပုညာနိ၊ ကာမေသုဂတိယံ ပန။
သဟေတုကာနိ ပါကာနိ၊ ပဋိသန္ဓိပဝတ္တိယံ၊
ဇနေန္တိ ပဉ္စဝေါကာရေ၊ အဟေတုပိ ယထာရဟံ။
တိဟေတုပုညမုက္ကဋ္ဌံ၊ ပဋိသန္ဓိံ တိဟေတုကံ၊
ဒတွာ သောဠသ ပါကာနိ၊ ပဝတ္တေ တု ဝိပစ္စတိ။
တိဟေတုကောမကုက္ကဋ္ဌံ၊ ဒွိဟေတု စ ဒွိဟေတုကံ၊
သန္ဓိံ ဒေတိ ပဝတ္တေ တု၊ တိဟေတုကဝိဝဇ္ဇိတံ။
ဒွိဟေတုကောမကံ ပုညံ၊ ပဋိသန္ဓိမဟေတုကံ၊
ဒတွာဟေတုကပါကာနိ၊ ပဝတ္တေ တု ဝိပစ္စတိ။
အသင်္ခါရံ သသင်္ခါရ-ဝိပါကာနိ န ပစ္စတိ၊
သသင်္ခါရမသင်္ခါရ-ဝိပါကာနီတိ ကေစန။
ပရိတ္တံ ¶ ပဌမဇ္ဈာနံ၊ မဇ္ဈိမဉ္စ ပဏီတကံ၊
ဘာဝေတွာ ဇာယရေ ဗြဟ္မ-ပါရိသဇ္ဇာဒိ တီသုပိ။
တထေဝ ဒုတိယဇ္ဈာနံ၊ တတိယဉ္စ ယထာက္ကမံ၊
ဘာဝေတွာ ဇာယရေ ဈာနံ၊ ပရိတ္တာဘာဒိ တီသုပိ။
တထာ စတုတ္ထံ တိဝိဓံ၊ ဘာဝေတွာန သမာဟိတာ၊
ပရိတ္တသုဘာဒိကေသု၊ တီသု ဇာယန္တိ ယောဂိနော။
ပဉ္စမံ ¶ ပန ဘာဝေတွာ၊ ဟောန္တိ ဝေဟပ္ဖလူပဂါ၊
သညာဝိရာဂံ ဘာဝေတွာ၊ အသညီသူပပဇ္ဇရေ။
သုဒ္ဓါဝါသေသု ဇာယန္တိ၊ အနာဂါမိကပုဂ္ဂလာ၊
အာရုပ္ပာနိ တု ဘာဝေတွာ၊ အာရုပ္ပေသု ယထာက္ကမံ။
ဧဝံ မဟဂ္ဂတံ ပုညံ၊ ယထာဘူမိဝဝတ္ထိတံ၊
ဇနေတိ သဒိသံ ပါကံ၊ ပဋိသန္ဓိပဝတ္တိယံ။
လောကုတ္တရာနိ ပုညာနိ၊ ဥပ္ပန္နာနန္တရံ ပန၊
သမာပတ္တိက္ခဏေ စေဝ၊ ဇနေန္တိ သဒိသံ ဖလံ။
မဟဂ္ဂတာနန္တရိယံ၊ ပရိပက္ကသဘာဝတော၊
အနန္တရဘဝါတီတံ၊ ကာလာတီတံ န ပစ္စတိ။
သုခုမာလသဘာဝါ စ၊ သုခုမတ္တာ မဟဂ္ဂတာ၊
သန္တာနေ န ဝိပစ္စန္တိ၊ ပဋိပက္ခေဟိ ဒူသိတေ။
သမာနာသေဝနေ လဒ္ဓေ၊ ဝိဇ္ဇမာနေ မဟဗ္ဗလေ၊
အလဒ္ဓါ တာဒိသံ ဟေတုံ၊ အဘိညာ န ဝိပစ္စတိ။
သကံ ဘူမိမတီတာနံ၊ န ဝိပစ္စတာနုတ္တရံ၊
ကမ္မန္တရဿဓိဋ္ဌာနာ၊ သန္တာနဿေတိ ဒီပိတံ။
ဣတိ တေတ္တိံသ ကမ္မာနိ၊ ပါကာ ဆတ္တိံသ ဘာသိတာ၊
စိတ္တုပ္ပာဒါ ကြိယာ သေသာ၊ ကြိယာမတ္တပ္ပဝတ္တိတော။
စိတ္တုပ္ပာဒဝသေနေဝမေကူနနဝုတီဝိဓာ ¶ ၊
တေပညာသ သဘာဝေန၊ စိတ္တစေတသိကာ မတာ။
ဣတိ စိတ္တံ စေတသိကံ၊ နိဗ္ဗာနန္တိ နရုတ္တရော၊
နာမံ တိဓာ ပကာသေသိ၊ စက္ခုမာ ဝဒတံ ဝရော။
ဣတိ ကမ္မဝိပါကပဏ္ဍိတာ၊ မိတကမ္မဝိပါကသာသနေ၊
ဟိတကမ္မဝိပါကပါရဂူ၊ စတုကမ္မဝိပါကမဗြဝုံ။
ယတ္ထာယံ ¶ ပရမတ္ထဝတ္ထုနိယမေ တုလျေန ဗာဟုလျတော၊
အတ္ထာနတ္ထဝိစာရဏံ ပတိ ဇနော သမ္မောဟမာပါဒိတော၊
ဗုဒ္ဓါ ဗောဓိတလေ ယမာဟ သုဂတော ဂန္တွာန ဒေဝါလယံ၊
သွာယံ ကမ္မဝိပါကနိစ္ဆယနယော သင်္ခေပတော ဒီပိတော။
ဣတိ နာမရူပပရိစ္ဆေဒေ ကမ္မဝိဘာဂေါ နာမ
ပဉ္စမော ပရိစ္ဆေဒေါ။