📜
၆။ ဆဋ္ဌော ပရိစ္ဆေဒေါ
ရူပဝိဘာဂေါ
ဣတိ ပဉ္စပရိစ္ဆေဒ-ပရိစ္ဆိန္နတ္ထသင်္ဂဟံ၊
နာမဓမ္မမသေသေန၊ ဝိဘာဝေတွာ သဘာဝတော။
သပ္ပဘေဒံ ပဝက္ခာမိ၊ ရူပဓမ္မမိတော ပရံ၊
ဘူတောပါဒါယဘေဒေန၊ ဒုဝိဓမ္ပိ ပကာသိတံ။
ဥဒ္ဒေသလက္ခဏာဒီဟိ၊ ဝိဘာဂဇနကာ တထာ၊
ကလာပုပ္ပတ္တိတော စာပိ၊ ယထာနုက္ကမတော ကထံ?
ရုပ္ပတီတိ ¶ ဘဝေ ရူပဝိကာရပ္ပစ္စယေသတိ၊
ရူပရူပံ တထာ ရူပပရိယာပန္နတောပရံ။
ဘူတရူပံ တု ပထဝီ၊ အာပေါ တေဇော တထာပရော၊
ဝါယော စ ဘဝတူပါဒါရူပမေတ္ထာတိ ဘာသိတံ။
ဘူတရူပမုပါဒါယ ¶ ၊ ပဝတ္တတိ န စညထာ၊
ဣစ္စုပါဒါယရူပန္တိ၊ ရူပံ သေသမုဒီရိတံ။
စက္ခု သောတဉ္စ ဃာနဉ္စ၊ ဇိဝှာ ကာယောတိ ပဉ္စဓာ၊
ပသာဒရူပမက္ခာတံ၊ နောပသာဒံ ပနေတရံ။
ရူပသဒ္ဒဂန္ဓရသာ၊ ဖောဋ္ဌဗ္ဗမိတိ ပဉ္စဓာ၊
ရူပံ ပသာဒဝိသယံ၊ ပသာဒေါ ဂေါစရံပရံ။
ဣတ္ထတ္တံ ပုရိသတ္တဉ္စ၊ ဘာဝရူပမုဒီရိတံ၊
ဇီဝိတိန္ဒြိယရူပန္တိ၊ ဥပါဒိန္နပဝတ္တိကံ။
ဝတ္ထုရူပံ တု ဟဒယံ၊ ယံ ဓာတုဒွယနိဿယံ၊
ကဗဠီကာရမာဟာရရူပမိစ္စာဟု ပဏ္ဍိတာ။
ရူပဓမ္မသဘာဝတ္တာ၊ ရူပန္တိ ပရိဒီပိတံ၊
ဣစ္စေဝမဋ္ဌာရသဓာ၊ ရူပရူပမုဒီရိတံ။
အနိပ္ဖန္နသဘာဝတ္တာ၊ ရူပါကာရောပလက္ခိတံ၊
အနိပ္ဖန္နံ နာမ ရူပံ၊ ဒသဓာ ပရိဒီပိတံ။
ရူပပ္ပရိစ္ဆေဒံ ရူပမိစ္စာကာသော ပကာသိတော၊
ကာယဗ္ဗစီဝိညတ္တိကံ၊ ဒွယံ ဝိညတ္တိရူပကံ။
လဟုတာ မုဒုတာ ကမ္မ-ညတာ ဝိညတ္တိယာ သဟ၊
ဝိကာရရူပမိစ္စာဟု၊ ပဉ္စဓာ စ ဝိဘာဝိနော။
ဥပစယော သန္တတိ စ၊ ဇရတာနိစ္စတာတိ စ၊
စတုဓာ လက္ခဏရူပံ၊ ရူပကဏ္ဍေ ဝိဘာဝိတံ။
ဣစ္စေဝမဋ္ဌဝီသတိဝိဓာနိပိ ¶ ဝိစက္ခဏော၊
ရူပါနိ လက္ခဏာဒီဟိ၊ ဝိဘာဝေယျ ယထာက္ကမံ။
ခရတာ ပထဝီဓာတု၊ သာယံ ကက္ခဠလက္ခဏာ၊
ကလာပါဓိဋ္ဌာနရသာ၊ ပဋိဂ္ဂါဟောတိ ဂယှတိ။
အာဗန္ဓနမာပေါဓာတု၊ သာ ပဂ္ဃရဏလက္ခဏာ၊
ကလာပါဗန္ဓနရသာ၊ သင်္ဂဟတ္တေန ဂယှတိ။
တေဇနတ္တံ ¶ တေဇောဓာတု၊ သာယမုဏှတ္တလက္ခဏာ၊
ပါစနရသာ မဒ္ဒဝါ-နုပ္ပာဒနန္တိ ဂယှတိ။
ဝါယောဓာတု ဝါယနတ္တံ၊ သာ ဝိတ္ထမ္ဘနလက္ခဏာ၊
သမီရဏရသာဘိနိ-ဟာရဘာဝေန ဂယှတိ။
သဗ္ဗတ္ထာဝိနိဘုတ္တာပိ၊ အသမ္မိဿိတလက္ခဏာ၊
တံတံဘာဝသမုဿန္နသမ္ဘာရေသုပလက္ခိတာ။
အညမညေနုပတ္ထဒ္ဓါ၊ သေသရူပဿ နိဿယာ၊
စတုဒ္ဓေဝံ ကလာပေသု၊ မဟာဘူတာ ပဝတ္တရေ။
စက္ခု သမ္ဘာရစက္ခုမှိ၊ သတ္တက္ခိပဋလောစိတေ၊
ကဏှမဏ္ဍလမဇ္ဈမှိ၊ ပသာဒေါတိ ပဝုစ္စတိ။
ယေန စက္ခုပသာဒေန၊ ရူပါနိ အနုပဿတိ၊
ပရိတ္တံ သုခုမံ စေတံ၊ ဦကာသိရသမူပမံ။
သောတံ သောတဗိလဿန္တော၊
တမ္ဗလောမာစိတေ တထာ၊
အင်္ဂုလိဝေဓနာကာရေ၊
ပသာဒေါတိ ပဝုစ္စတိ။
အန္တော အဇပဒဋ္ဌာနေ၊ ဃာနံ ဃာနဗိလေ ဌိတံ၊
ဇိဝှာ ဇိဝှာယ မဇ္ဈမှိ၊ ဥပ္ပလာကာရသန္နိဘေ။
ဣစ္စေဝံ ¶ ပန စတ္တာရော၊ တံတံဒေသဝဝတ္ထိတာ၊
ကာယပ္ပသာဒေါ ကာယမှိ၊ ဥပါဒိန္နေတိ ပဉ္စဓာ။
ကပ္ပာသပဋလသ္နေဟ-သန္နိဘာ ဘူတနိဿိတာ၊
ပသာဒါ ဇီဝိတာရက္ခာ၊ ရူပါဒိပရိဝါရိတာ။
ဓီတာ ရာဇကုမာရာဝ၊ ကလာပန္တရဝုတ္တိနော၊
ဒွါရဘူတာဝ ပစ္စေကံ၊ ပဉ္စဝိညာဏဝီထိယာ။
ရူပါဒါဘိဃာတာရဟဘူတာနံ ဝါ ယထာက္ကမံ၊
ဒဋ္ဌုကာမနိဒါနာဒိကမ္မဘူတာနမေဝ ဝါ။
ပသာဒလက္ခဏာ ¶ ရူပါ-ဒါဝိဉ္ဇနရသာ တထာ၊
ပဉ္စဝိညာဏယုဂဠံ၊ ဒွါရဘာဝေန ဂယှရေ။
ရူပံ နိဘာသော ဘူတာနံ၊ သဒ္ဒေါ နိဂ္ဃောသနံ တထာ၊
ဂန္ဓောဝ ဂန္ဓနံ တတ္ထ၊ ရသော စ ရသနီယတာ။
ဣစ္စေဝံ ပန စတ္တာရော၊ ဂေါစရာ ဘူတနိဿိတာ၊
ဘူတတ္တယဉ္စ ဖောဋ္ဌဗ္ဗမာပေါဓာတုဝိဝဇ္ဇိတံ။
သဒ္ဒေါ အနိယတော တတ္ထ၊ တဒညော သဟဝုတ္တိနော၊
တံတံသဘာဝဘေဒေန၊ တံတံဒွါရောပလက္ခိတော။
ပဉ္စေဝ ပဉ္စဝိညာဏဝီထိယာ ဝိသယာ မတာ၊
စက္ခာဒိပဋိဟနနလက္ခဏာဝ ယထာက္ကမံ။
ပဉ္စဝိညာဏယုဂဠာလမ္ဗဘာဝရသာ တထာ၊
ပဉ္စဝိညာဏယုဂဠံ၊ ဂေါစရတ္တေန ဂယှရေ။
ဣတ္ထိန္ဒြိယံ ပနိတ္ထတ္တမိတ္ထိဘာဝေါတိ ဘာသိတော၊
ပုရိသတ္တံ တထာ ဘာဝေါ၊ ပုရိသိန္ဒြိယနာမကော။
တံ ဒွယံ ပနုပါဒိန္နကာယေ သဗ္ဗတ္ထ လဗ္ဘတိ၊
ကလာပန္တရဘိန္နဉ္စ၊ ဘိန္နသန္တာနဝုတ္တိ စ။
ဝသေ ¶ ဝတ္တေတိ လိင်္ဂါန-မိတ္ထိပုမ္ဘာဝလက္ခဏံ၊
ဣတ္ထီတိ စ ပုရိသောတိ၊ ပကာသနရသံ တထာ။
ဣတ္ထီနံ ပုရိသာနဉ္စ၊ လိင်္ဂဿ စ ယထာက္ကမံ၊
နိမိတ္တကုတ္တာကပ္ပာနံ၊ ကာရဏတ္တေန ဂယှတိ။
သတ္တာ မရန္တိ နာသေန၊ ယဿ ပါဏန္တိ ဝုတ္တိယာ၊
သဇီဝမတကာယာနံ၊ ဘေဒေါ ယေနောပလက္ခိတော။
တဒေတံ ကမ္မဇာတာန-မနုပါလနလက္ခဏံ၊
ဇီဝိတံ ဇီဝနရသံ၊ အာယုဗဒ္ဓါတိ ဂယှတိ။
မနောဓာတုယာ စ တထာ၊ မနောဝိညာဏဓာတုယာ၊
နိဿယလက္ခဏံ ဝတ္ထု-ရူပံ ဟဒယသမ္မတံ။
သမာဓာနရသံ ¶ တာသ-မုဗ္ဗာဟတ္တေန ဂယှတိ၊
ယသ္မိံ ကုပ္ပိတကာလမှိ၊ ဝိက္ခိတ္တာ ဟောန္တိ ပါဏိနော။
ကာယော ယဿာနုသာရေန၊ စိတ္တက္ခေပေန ခိဇ္ဇတိ၊
ယသ္မိံ နိရုဒ္ဓေ ဝိညာဏ-သောတောပိ စ နိရုဇ္ဈတိ။
ယံ နိဿာယ ပတိဋ္ဌာတိ၊ ပဋိသန္ဓိ ဘဝန္တရေ၊
တဒေတံ ကမ္မသမ္ဘူတံ၊ ပဉ္စဝေါကာရဘူမိယံ။
မဇ္ဈေ ဟဒယကောသမှိ၊ အဍ္ဎပသတလောဟိတေ၊
ဘူတရူပမုပါဒါယ၊ စက္ခာဒိ ဝိယ ဝတ္တတိ။
ကဗဠီကာရော အာဟာရော၊ ရူပါဟရဏလက္ခဏော၊
ကာယာနုယာပနရသော၊ ဥပတ္ထမ္ဘောတိ ဂယှတိ။
ဩဇာယ ယာယ ယာပေန္တိ၊ အာဟာရသ္နေဟသတ္တိယာ၊
ပါဏိနော ကာမလောကမှိ၊ သာယမေဝံ ပဝုစ္စတိ။
အာကာသဓာတု ရူပါနံ၊ ပရိယောသာနလက္ခဏာ၊
ပရိစ္ဆေဒရသာ ရူပမရိယာဒေါတိ ဂယှတိ။
သလက္ခဏပရိစ္ဆိန္နရူပဓမ္မပရိဂ္ဂဟေ ¶ ၊
ယောဂီနမုပကာရာယ၊ ယံ ဒေသေသိ ဒယာပရော။
ပရိစ္ဆိန္နသဘာဝါနံ၊ ကလာပါနံ ယထာရဟံ၊
ပရိယန္တာနမေဝေသ၊ တဒါကာရော ပဝုစ္စတိ။
ဂမနာဒိဝစီဃောသပဝတ္တမှိ ယထာက္ကမံ၊
ဝါယောပထဝိဓာတူနံ၊ ယော ဝိကာရော သမတ္ထတာ။
သဟဇောပါဒိန္နကာနံ၊ ကြိယာဝါစာပဝတ္တိယာ၊
ဝိပ္ဖန္ဒဃဋ္ဋနာဟေတု၊ စိတ္တာနုပရိဝတ္တကော။
သ ဝိကာရဝိသေသောယံ၊ ဝိညတ္တီတိ ပကာသိတော၊
ဝိညာပေတီတိ ကာယေန၊ ဝါစာယ စ ဝိစိန္တိတံ။
ဝါယောပထဝါဓိကာနံ၊ ဘူတာနမိတိ ကေစန၊
ပဝုတ္တာ တာဒိနာ ကာယ-ပရိဂ္ဂဟသုခါယ ယာ။
ကာယော ¶ ယဿာနုဘာဝေန၊
သဟာဘောဂေါဝ ခါယတိ၊
ယံ နိရောဓာ ပရာဘူတော၊
သေတိ နိစ္စေတနော ယထာ။
လောကေ ပပဉ္စာ ဝတ္တန္တိ၊ ဗဟုဓာ ယာယ နိမ္မိတာ၊
ကပ္ပေန္တိ ကာယမတ္တာနံ၊ ဗာလာ ယာယ စ ဝဉ္စိတာ။
သာယံ ကာယဝစီကမ္မ-ဒွါရဘာဝေန လက္ခိတာ၊
ဗျာပါရဃဋ္ဋနာဟေတု-ဝိကာရာကာရလက္ခဏာ။
ကာယဝါစာအဓိပ္ပာယ-ပကာသနရသာ တထာ၊
ကာယဝိပ္ဖန္ဒဃဋ္ဋန-ဟေတုဘာဝေန ဂယှတိ။
လဟုတာ ပန ရူပါနံ၊ အဒန္ဓာကာရလက္ခဏာ၊
အဝိတ္ထာနရသာ သလ္လ-ဟုကဝုတ္တီတိ ဂယှတိ။
မုဒုတာပိ ¶ စ ရူပါနံ၊ ကက္ခဠာဘာဝလက္ခဏာ၊
ကိစ္စာဝိရုဇ္ဈနရသာ၊ အနုကုလျန္တိ ဂယှတိ။
ကမ္မညတာ စ ရူပါနံ၊ အလံကိစ္စဿ လက္ခဏာ၊
ပဝတ္တိသမ္ပတ္တိရသာ၊ ယောဂ္ဂဘာဝေါတိ ဂယှတိ။
သပ္ပာယမုတုမာဟာရံ၊ လဒ္ဓါ စိတ္တမနာမယံ၊
လဟူ မုဒု စ ကမ္မညံ၊ ယဒါ ရူပံ ပဝတ္တတိ။
တထာ ပဝတ္တရူပဿ၊ ပဝတ္တာကာရဘေဒိတံ၊
လဟုတာဒိတ္တယမ္ပေတံ၊ သဟဝုတ္တိ တဒါ ဘဝေ။
သပ္ပာယပဋိဝေဓာယ၊ ပဋိပတ္တုပကာရိကာ၊
သာကာရာ ရူပသမ္ပတ္တိ၊ ပညတ္တေဝံ မဟေသိနာ။
ရူပဿောပစယော နာမ၊ ရူပဿာစယလက္ခဏော၊
ရူပုမ္မုဇ္ဇာပနရသော၊ ပါရိပူရီတိ ဂယှတိ။
ပဝတ္တိလက္ခဏာ ရူပ-သန္တတီတိ ပကာသိတာ၊
အနုပ္ပဗန္ဓနရသာ၊ အဝိစ္ဆေဒေါတိ ဂယှတိ။
ရူပမာစယရူပေန ¶ ၊ ဇာယတိစ္စုပရူပရိ၊
ပေက္ခတောပစာယာကာရာ၊ ဇာတိ ဂယှတိ ယောဂိနာ။
အနုပ္ပဗန္ဓာကာရေန၊ ဇာယတီတိ သမေက္ခတော၊
တဒါယံ သန္တတာကာရာ၊ သမုပဋ္ဌာသိ စေတသိ။
ဧဝမာဘောဂဘေဒေန၊ ဇာတိရူပံ ဒွိဓာ ကတံ၊
အတ္ထူပလဒ္ဓိဘာဝေန၊ ဇာယန္တံ ဝါထ ကေဝလံ။
ရူပဝိဝိတ္တမောကာသံ၊ ပုရက္ခတ္တေန စီယတိ၊
အဘာဝါ ပန ဘာဝါယ၊ ပဝတ္တမိတိ သန္တတိ။
ဧဝမာကာရဘေဒါပိ၊ သဗ္ဗာကာရဝရာကရော၊
ဇာတိရူပံ ဒွိဓာကာသိ၊ ဇာတိရူပဝိရောစနော။
ဇရတာ ¶ ကာလဟရဏံ၊ ရူပါနံ ပါကလက္ခဏာ၊
နဝတာပါယနရသာ၊ ပုရာဏတ္တန္တိ ဂယှတိ။
အန္တိမက္ခဏသမ္ပတ္တိ၊ ပရိဘိဇ္ဇနလက္ခဏာ၊
အနိစ္စတာ ဟရဏရသာ၊ ခယဘာဝေန ဂယှတိ။
ဣတိ လက္ခဏရူပံ တု၊ တိဝိဓံ ဘိန္နကာလိကံ၊
သဘာဝရူပဓမ္မေသု၊ တံတံကာလောပလက္ခိတံ။
ယေန လက္ခီယတိ ရူပံ၊ ဘိန္နာကာရံ ခဏေ ခဏေ၊
ဝိပဿနာနယတ္ထာယ၊ တမိစ္စာဟ တထာဂတော။
ဣစ္စေဝံ သပရိစ္ဆေဒါ၊ သဝိကာရာ သလက္ခဏာ၊
အကိစ္ဆာ ပဋိဝေဓာယ၊ ဒယာပန္နေန တာဒိနာ။
ရူပဓမ္မာ သဘာဝေန၊ ဝိဇ္ဇမာနာတိ ဘာသိတာ၊
အဇ္ဈတ္တိကာဒိဘေဒေန၊ ဗဟုဓာ ဘိဇ္ဇရေ ကထံ၊
ဒွါရဘူတာ ပဝတ္တေန္တိ၊ စိတ္တမတ္တာတိ ကပ္ပိတံ၊
ရူပမဇ္ဈတ္တိကံ တသ္မာ၊ ပသာဒါ ဗာဟိရံပရံ။
ဝဏ္ဏော ¶ ဂန္ဓော ရသောဇာ စ၊ ဘူတရူပဉ္စ ဘာသိတံ၊
အဝိနိဗ္ဘောဂရူပံ တု၊ ဝိနိဗ္ဘောဂံ ပနေတရံ။
သတ္တဝိညာဏဓာတူနံ၊ နိဿယတ္တာ ယထာရဟံ၊
ပသာဒါ ဟဒယဉ္စေဝ၊ ဝတ္ထုနာ ဝတ္ထု ဒေသိတံ။
ပဉ္စဝိညာဏုပါဒိန္န-လိင်္ဂါဒိ စ ပဝတ္တိတော၊
ပသာဒါ ဇီဝိတံ ဘာဝါ၊ စေန္ဒြိယံ နေန္ဒြိယံပရံ။
ပဉ္စဝိညာဏကမ္မာနံ၊ ပဝတ္တိမုခဘာဝတော၊
ဒွါရံ ပသာဒဝိညတ္တိ-ပရမဒွါရမီရိတံ။
ပဋိဟညန္တညမညံ၊ ပသာဒဝိသယာ ပန၊
တသ္မာ သပ္ပဋိဃံ နာမ၊ ရူပမပ္ပဋိဃံပရံ။
ဒွါရာလမ္ဗဏဘာဝေန ¶ ၊ သဘာဝေနေဝ ပါကဋာ၊
တေ ဧဝေါဠာရိကံ တသ္မာ၊ သေသံ သုခုမမီရိတံ။
ဩဠာရိကသဘာဝေန၊ ပရိဂ္ဂဟသုခါ တဟိံ၊
တေ ဧဝ သန္တိကေရူပံ၊ ဒူရေရူပံ ပနေတရံ။
တဏှာဒိဋ္ဌီဟုပေတေန၊ ကမ္မုနာဒိန္နဘာဝတော၊
ကမ္မဇာတမုပါဒိန္နံ၊ အနုပါဒိန္နကံပရံ။
စက္ခုနာ ဒိဿမာနတ္တာ၊ သနိဒဿနနာမကံ၊
ရူပမေဝ တတော သေသ-မနိဒဿနမဗြဝုံ။
သနိဒဿနရူပဉ္စ၊ ရူပံ သပ္ပဋိဃံ တထာ၊
အနိဒဿနမညံ တု၊ ထူလံ သပ္ပဋိဃံ မတံ။
အနိဒဿနရူပဉ္စ၊ သေသံ အပ္ပဋိဃံ တထာ၊
ရူပံ တိဝိဓမိစ္စေဝံ၊ ဝိဘဇန္တိ ဝိစက္ခဏာ။
အပ္ပတ္တဂေါစရဂ္ဂါဟိရူပံ စက္ခာဒိကံ ဒွယံ၊
သမ္ပတ္တဂ္ဂါဟိ ဃာနာဒိ-တ္တယမဂ္ဂါဟိကံ ရူပံ။
ဒိဋ္ဌံ ရူပံ သုတံ သဒ္ဒေါ၊ မုတံ ဂန္ဓာဒိကတ္တယံ၊
ဝိညာဏေနေဝ ဉေယျတ္တာ၊ ဝိညာတမပရံ ဘဝေ။
ဟဒယံ ¶ ဝတ္ထုမေဝေတ္ထ၊ ဒွါရံ ဝိညတ္တိကဒွယံ၊
ပသာဒါ ဝတ္ထု စ ဒွါရံ၊ အညံ တုဘယဝဇ္ဇိတံ။
ဘေဒိတွာ ရူပမိစ္စေဝံ၊ တဿေဝ ပုန ပဏ္ဍိတော၊
သမုဋ္ဌာနဇနကေဟိ၊ ဝိဘာဝေယျ ယထာရဟံ။
ကုသလာကုသလံ ကမ္မ-မတီတံ ကာမိကံ တထာ၊
ရူပါဝစရမိစ္စေဝံ၊ ပဉ္စဝီသတိဓာ ဌိတံ။
ပဋိသန္ဓိမုပါဒါယ၊ သဉ္ဇနေတိ ခဏေ ခဏေ၊
ကာမရူပေသု ရူပါနိ၊ ကမ္မဇာနိ ယထာရဟံ။
ဇာယန္တံ ¶ ပဉ္စဝိညာဏ-ပါကာရုပ္ပဝိဝဇ္ဇိတံ၊
ဘဝင်္ဂါဒိမုပါဒါယ၊ သမုပ္ပာဒေတိ မာနသံ။
သီတုဏှောတုသမညာတာ၊
တေဇောဓာတု ဌိတိက္ခဏေ၊
တထေဝဇ္ဈောဟဋာဟာရော၊
ကာမေ ကာယပ္ပတိဋ္ဌိတော။
အဇ္ဈတ္တံ ပန စတ္တာရော၊ ဗာဟိရော တုပလဗ္ဘတိ၊
သဗ္ဗေ ကာမဘဝေ ရူပေ၊ အာဟာရော န သမီရိတော။
ပဝတ္တေ ဟောန္တိ စတ္တာရော၊ ကမ္မမေဝေါပပတ္တိယံ၊
ဇီဝမာနဿ သဗ္ဗေပိ၊ မတဿောတု သိယာ န ဝါ။
ကမ္မံ စိတ္တောတုမာဟာရ-မိစ္စေဝံ ပန ပဏ္ဍိတာ၊
ရူပါနံ ဇနကတ္တေန၊ ပစ္စယာတိ ပကာသယုံ။
ဟဒယိန္ဒြိယရူပါနိ၊ ကမ္မဇာနေဝ စိတ္တဇံ၊
ဝိညတ္တိဒွယမီရေန္တိ၊ သဒ္ဒေါ စိတ္တောတုဇော မတော။
စိတ္တောတုကဗဠီကာရ-သမ္ဘူတာ လဟုတာဒယော၊
ကမ္မစိတ္တောတုကာဟာရ-ဇာနိ သေသာနိ ဒီပယေ။
ဇာယမာနာဒိရူပါနံ၊ သဘာဝတ္တာ ဟိ ကေဝလံ၊
လက္ခဏာနိ န ဇာယန္တိ၊ ကေဟိစီတိ ပကာသိတံ။
ယဒိဇာတာဒယော ¶ တေသ-မဝဿံ တံသဘာဝတာ၊
တေသဉ္စ လက္ခဏာနန္တိ၊ အနဝတ္ထာ ဘဝိဿတိ။
အဋ္ဌာရသ ပန္နရသ၊ တေရသ ဒွါဒသာတိ စ၊
ကမ္မစိတ္တောတုကာဟာရ-ဇာနိ ဟောန္တိ ယထာက္ကမံ။
ကလာပါနိ ယထာယောဂံ၊ တာနိ သင်္ဂယှ ပဏ္ဍိတာ၊
နဝ ဆ စတုရော ဒွေတိ၊ ဧကဝီသတိ ဘာဝယုံ။
ဇီဝိတဉ္စာဝိနိဗ္ဘောဂ-ရူပဉ္စ ¶ ၊ သဟဝုတ္တိတော၊
သင်္ဂယှ စက္ခုဒသကံ၊ စက္ခုမာဒါယ ဘာသိတံ။
တထာ သောတဉ္စ ဃာနဉ္စ၊ ဇိဝှံ ကာယံ ယထာက္ကမံ၊
ဣတ္ထိဘာဝဉ္စ ပုမ္ဘာဝံ၊ ဝတ္ထုမာဒါယ ဒီပယေ။
အဝိနိဗ္ဘောဂရူပေန၊ ဇီဝိတနဝကံ ဘဝေ၊
ဣစ္စေဝံ ကမ္မဇာ နာမ၊ ကလာပါ နဝဓာ ဌိတာ။
အဝိနိဗ္ဘောဂရူပဉ္စ၊ သုဒ္ဓဋ္ဌကမုဒီရိတံ၊
ကာယဝိညတ္တိယာ သဒ္ဓိံ၊ နဝကန္တိ ပဝုစ္စတိ။
ဝစီဝိညတ္တိသဒ္ဒေဟိ၊ ဒသကံ ဘာသိတံ တထာ၊
လဟုတာဒေကာဒသကံ၊ လဟုတာဒီဟိ တီဟိပိ။
ကာယဝိညတ္တိလဟုတာ-ဒီဟိ ဒွါဒသကံ မတံ၊
ဝစီဝိညတ္တိလဟုတာ-ဒီဟိ တေရသကံ တထာ။
ဂဟေတွာကာရဘေဒဉ္စ၊ တံတံကာလောပလက္ခိတံ၊
ဣတိ စိတ္တသမုဋ္ဌာနာ၊ ဆ ကလာပါတိ ဘာသိတာ။
သုဒ္ဓဋ္ဌကံ တု ပဌမံ၊ သဒ္ဒေန နဝကံ မတံ၊
လဟုတာဒေကာဒသကံ၊ လဟုတာဒိသမာယုတံ။
သဒ္ဒေန လဟုတာဒီဟိ၊ တထာ ဒွါဒသကံ ဘဝေ၊
ကလာပါ ဥတုသမ္ဘူတာ၊ စတုဒ္ဓေဝံ ပကာသိတာ။
သုဒ္ဓဋ္ဌကဉ္စ လဟုတာ-ဒေကာဒသကမိစ္စပိ၊
ကလာပါဟာရသမ္ဘူတာ၊ ဒုဝိဓာဝ ဝိဘာဝိတာ။
ကလာပါနံ ¶ ပရိစ္ဆေဒ-လက္ခဏတ္တာ ဝိစက္ခဏာ၊
န ကလာပင်္ဂမိစ္စာဟု၊ အာကာသံ လက္ခဏာနိ စ။
ဣစ္စေဝံ စတုသမ္ဘူတာ၊ ကလာပါ ဧကဝီသတိ၊
သဗ္ဗေ လဗ္ဘန္တိ အဇ္ဈတ္တံ၊ ဗာဟိရောတုသမုဋ္ဌိတာ။
အဋ္ဌကံ ¶ သဒ္ဒနဝက-မိတိ ဒွေဓာဝ ဘာသိတာ၊
မတကာယေပိ တေ ဧဝ၊ သိယုမိစ္စာဟု ပဏ္ဍိတာ။
ကာမေ သဗ္ဗေပိ လဗ္ဘန္တိ၊ သဘာဝါနံ ယထာရဟံ၊
သမ္ပုဏ္ဏာယတနာနံ တု၊ ပဝတ္တေ စတုသမ္ဘဝါ။
ဒသကာနေဝ သဗ္ဗာနိ၊ ကမ္မဇာနေဝ ဇာတိယံ၊
စက္ခုသောတဃာနဘာဝ-ဒသကာနိ န ဝါ သိယုံ။
ဝတ္ထုကာယဒသကာနိ၊ သဘာဝဒသကာနိ ဝါ၊
ဂဗ္ဘသေယျကသတ္တာနံ၊ တတော သေသာနိ သမ္ဘဝါ။
ကမ္မံ ရူပံ ဇနေတေဝံ၊
မာနသံ သန္ဓိတော ပရံ၊
တေဇောဓာတု ဌိတိပ္ပတ္တာ၊
အာဟာရဇ္ဈောဟဋော တထာ။
ဣစ္စေဝံ စတုသမ္ဘူတာ၊ ရူပသန္တတိ ကာမိနံ၊
ဒီပဇာလာဝ သမ္ဗန္ဓာ၊ ယာဝဇီဝံ ပဝတ္တတိ။
အာယုနော ဝါထ ကမ္မဿ၊ ခယေနောဘိန္နမေဝ ဝါ၊
အညေန ဝါ မရန္တာန-မုပစ္ဆေဒကကမ္မုနာ။
သတ္တရသစိတ္တက္ခဏမာယု ရူပါနမီရိတံ၊
သတ္တရသမစိတ္တဿ၊ စုတိစိတ္တောပရီ တတော။
ဌိတိကာလမုပါဒါယ၊ ကမ္မဇံ န ပရံ ဘဝေ၊
တတော ဘိဇ္ဇတုပါဒိန္နံ၊ စိတ္တဇာဟာရဇံ တတော။
ဣစ္စေဝံ မတသတ္တာနံ၊ ပုနဒေဝ ဘဝန္တရေ၊
ပဋိသန္ဓိမုပါဒါယ၊ တထာ ရူပံ ပဝတ္တတိ။
ဃာနဇိဝှာကာယဘာဝဒသကာဟာရဇံ ¶ ပန၊
ရူပံ ရူပဘဝေ နတ္ထိ၊ ပဋိသန္ဓိပဝတ္တိယံ။
တတ္ထ ¶ ဂန္ဓရသောဇာ စ၊ န လဗ္ဘန္တီတိ ကေစန၊
ကလာပါ စ ဂဏေတဗ္ဗာ၊ တတ္ထေတံ ရူပဝဇ္ဇိတာ။
ဌိတိက္ခဏဉ္စ စိတ္တဿ၊ တေ ဧဝ ပဋိသေဓယုံ၊
စိတ္တဘင်္ဂက္ခဏေ ရူပ-သမုပ္ပတ္တိဉ္စ ဝါရယုံ။
စက္ခုသောတဝတ္ထုသဒ္ဒစိတ္တဇမ္ပိ အသညိသု၊
အရူပေ ပန ရူပါနိ၊ သဗ္ဗထာပိ န လဗ္ဘရေ။
ဣတ္ထံ ပနေတ္ထ ဝိမလေန ဝိဘာဝနတ္ထံ၊
ဓမ္မံ သုဓမ္မမုပဂမ္မ သုရာဓိဝါသံ၊
ရူပံ အရူပသဝိဘာဂသလက္ခဏံ တံ၊
ဝုတ္တံ ပဝုတ္တမဘိဓမ္မနယေ မယာပိ။
ရူပဝိဘာဂမိမံ သုဝိဘတ္တံ၊ ရူပယတော ပန စေတသိ နိစ္စံ၊
ရူပသမိဒ္ဓဇိနေရိတဓမ္မေ၊ ရူပဝတီ အဘိဝဍ္ဎတိ ပညာ။
ဣတိ နာမရူပပရိစ္ဆေဒေ ရူပဝိဘာဂေါ နာမ
ဆဋ္ဌော ပရိစ္ဆေဒေါ။