📜
၇။ သတ္တမော ပရိစ္ဆေဒေါ
သဗ္ဗသင်္ဂဟဝိဘာဂေါ
စတုပညာသ ဓမ္မာ ဟိ၊ နာမနာမေန ဘာသိတာ၊
အဋ္ဌာရသဝိဓာ ဝုတ္တာ၊ ရူပဓမ္မာတိ သဗ္ဗထာ။
အဘိညေယျာ သဘာဝေန၊ ဒွါသတ္တတိ သမီရိတာ၊
သစ္စိကဋ္ဌပရမတ္ထာ၊ ဝတ္ထုဓမ္မာ သလက္ခဏာ။
တေသံ ¶ ¶ ဒါနိ ပဝက္ခာမိ၊ သဗ္ဗသင်္ဂါဟိကံ နယံ၊
အာဘိဓမ္မိကဘိက္ခူနံ၊ ဟတ္ထသာရမနုတ္တရံ။
ဒုကာ တိကာ စ ခန္ဓာယတနတော ဓာတုသစ္စတော၊
ပဋိစ္စသမုပ္ပာဒါ စ၊ ပစ္စယာ စ သမညတော။
ပစ္စယော ဧဝ နိဗ္ဗာနမပစ္စယမသင်္ခတံ၊
အသင်္ခါရမနုပ္ပာဒံ၊ သဿတံ နိစ္စလက္ခဏံ။
ပစ္စယာ စေဝ သင်္ခါရာ၊ သင်္ခတာ စ တတောပရေ၊
ဥပ္ပာဒဝယဓမ္မာ စ၊ ပစ္စယဋ္ဌိတိကာ တထာ။
နိဗ္ဗာနံ ရူပဓမ္မာ စ၊ ဝိပ္ပယုတ္တာဝ ကေဝလံ၊
အာရမ္မဏာ ဧဝ နာမ၊ နာလမ္ဗန္တိ ဟိ ကိဉ္စိပိ။
ဧကုပ္ပာဒနိရောဓာ စ၊ ဧကာလမ္ဗဏဝတ္ထုကာ၊
သံသဋ္ဌာ သမ္ပယုတ္တာ စ၊ သဟဇာတာ ယထာရဟံ။
အညမညေနုပတ္ထဒ္ဓါ၊ သဗ္ဗတ္ထ သဟဝုတ္တိနော၊
သာရမ္မဏာရမ္မဏာ စ၊ စိတ္တစေတသိကာ မတာ။
ဝိပဿနာယ ဘူမီတိ၊ တတ္ထ တေဘူမကာ မတာ၊
လောကိယာ ပရိယာပန္နာ၊ ဝဋ္ဋဓမ္မာ သဥတ္တရာ။
သက္ကာယဓမ္မာ သဘယာ၊ တီရမောရိမနာမကံ၊
သံယောဇနိယာ သမလာ၊ တထာ နီဝရဏီယကာ။
သံက္လေသိကာ ပရာမဋ္ဌာ၊ ဥပါဒါနီယသာသဝါ၊
ဩဃနီယာ ယောဂနီယာ၊ ဂန္ထနီယာတိ ဘာသိတာ။
အညေ အပရိယာပန္နာ၊ ဝိဝဋ္ဋာ စာဝိပဿိယာ၊
လောကုတ္တရာနုတ္တရာ စ၊ နောသံယောဇနိယာဒယော။
ကမ္မဇာတာ ¶ ဥပါဒိန္နာ၊ နာမ ဝုစ္စန္တိ သာသဝါ၊
အနုပါဒိန္နကာ နာမ၊ တတော သေသာ ပဝုစ္စရေ။
ဓမ္မာ သပ္ပဋိဘာဂါတိ၊ ကုသလာကုသလာ မတာ၊
အပ္ပဋိဘာဂဓမ္မာတိ၊ တဒညေ ပရိဒီပယေ။
သရဏာ ¶ စ ပဟာတဗ္ဗာ၊ ဒွါဒသာကုသလာ ပန၊
တဒညေ အရဏာ နာမ၊ ပဟာတဗ္ဗာ န ကေဟိစိ။
ရူပိနော ရူပဓမ္မာ စ၊ နာမဓမ္မာ အရူပိနော၊
ဧဝမာဒိပ္ပဘေဒေန၊ ဒွိဓာ ဘေဒံ ဝိဘာဝယေ။
ဗာလာ ဓမ္မာ တပနီယာ၊ ကဏှာ စ ကဋုကပ္ဖလာ၊
အသေဝိတဗ္ဗာ သာဝဇ္ဇာ၊ ဒွါဒသာကုသလာ မတာ။
ပဏ္ဍိတာ စာတပနီယာ၊ သုက္ကာ စ သုခဒါယကာ၊
သေဝိတဗ္ဗာနဝဇ္ဇာ စ၊ ကုသလာ ဧကဝီသတိ။
ကြိယာ ဝိပါကာ ရူပဉ္စ၊ နိဗ္ဗာနန္တိ စတုဗ္ဗိဓာ၊
ဝုတ္တာ အဗျာကတာ နာမ၊ ဓမ္မာ တဗ္ဗိပရီတတော။
ဟီနာ ဓမ္မာ ပရိတ္တာ စ၊ ကာမာဝစရဘူမိကာ၊
ရူပါရူပါ ပဝုစ္စန္တိ၊ မဇ္ဈိမာ စ မဟဂ္ဂတာ။
အပ္ပမာဏာ ပဏီတာ စ၊ ဓမ္မာ လောကုတ္တရာ မတာ၊
သံကိလိဋ္ဌသံက္လေသိကာ၊ ဒွါဒသာကုသလာ တထာ။
အသံကိလိဋ္ဌသံက္လေသိကာ၊ ဓမ္မာ တေဘူမကာပရေ၊
အသံက္လိဋ္ဌာသံက္လေသိကာ၊ နဝ လောကုတ္တရာ သိယုံ။
ဝိပါကာ တေ ပဝုစ္စန္တိ၊ ဝိပါကာ စတုဘူမကာ၊
ဝိပါကဓမ္မာ နာမာတိ၊ ကုသလာကုသလာ မတာ။
ကြိယာ ရူပဉ္စ နိဗ္ဗာနံ၊ န ပါကံ န တု ပစ္စတိ၊
အာစယဂါမိနော ဓမ္မာ၊ ပုညာပုညာဝ သာသဝါ။
ဝုတ္တာပစယဂါမိနော ¶ ၊ ကုသလာနုတ္တရာ ပန၊
ကြိယာ ရူပဉ္စ နိဗ္ဗာနံ၊ ပါကာ စောဘယဝဇ္ဇိတာ။
ပဌမာနုတ္တရော မဂ္ဂေါ၊ ဒဿနံ ဘာဝနာပရေ၊
တဒညေ ဒွယနိမ္မုတ္တာ၊ သဗ္ဗေပိ ပရမတ္ထတော။
သတ္တ လောကုတ္တရာ ဟေဋ္ဌာ၊ ဝုတ္တာ သေက္ခာတိ တာဒိနာ၊
အရဟတ္တဖလမေဝ၊ အသေက္ခန္တိ ပကာသိတံ။
လောကိယာပိ ¶ စ နိဗ္ဗာနံ၊ ဘာသိတောဘယဝဇ္ဇိတာ၊
ဧဝမာဒိပ္ပကာရေဟိ၊ တိဝိဓာတိ ဝိဘာဝယေ။
အတီတာနာဂတံ ရူပံ၊ ပစ္စုပ္ပန္နမထာပရံ၊
အဇ္ဈတ္တံ ဝါ ဗဟိဒ္ဓါ ဝါ၊ သုခုမောဠာရိကံ တထာ။
ဟီနံ ပဏီတံ ယံ ဒူရေ၊ သန္တိကေ ဝါ တဒေကတော၊
သဗ္ဗံ ရူပံ သမောဓာယ၊ ရူပက္ခန္ဓောတိ ဝုစ္စတိ။
တထေဝ ဝေဒနာက္ခန္ဓော၊ နာမ ယာ ကာစိ ဝေဒနာ၊
သညာက္ခန္ဓောတိ သညာ စ၊ ရာသိဘာဝေန ဘာသိတာ။
ဝဋ္ဋဓမ္မေသု အဿာဒံ၊ တဒဿာဒေါပသေဝနံ၊
ဝိနိဘုဇ္ဇ နိဒဿေတုံ၊ ခန္ဓဒွယမုဒါဟဋံ။
ဝိဝါဒမူလသံသာရ-ကမဟေတုနိဒဿနံ၊
သန္ဓာယ ဝေဒနာ သညာ၊ ကတာ နာနာတိ ကေစန။
စိတ္တသံသဋ္ဌဓမ္မာနံ၊ စေတနာမုခတော ပန၊
သင်္ခါရက္ခန္ဓနာမေန၊ ဓမ္မာ စေတသိကာ မတာ။
သဗ္ဗဘေဒံ တထာ စိတ္တံ၊ ဝိညာဏက္ခန္ဓ သမ္မတံ၊
ဘေဒါဘာဝေန နိဗ္ဗာနံ၊ ခန္ဓသင်္ဂဟနိဿဋံ။
အာလမ္ဗနီယဘာဝေန၊ ဥပါဒါနောပကာရတော၊
ပဉ္စုပါဒါနက္ခန္ဓာတိ၊ လောကုတ္တရဝိဝဇ္ဇိတာ။
ယထာ ¶ ထူလံ ဟိတတ္ထာယ၊ ပရိဂ္ဂါဟကယောဂိနံ၊
ဓမ္မာ တေဘူမကာ ဧက-ဘူမိဘာဝါယ ဒေသိတာ။
ဘာဇနံ ဘောဇနံ တဿ၊ ဗျဉ္ဇနံ ဘောဇကော တထာ၊
ဘုဉ္ဇိတာ စာတိ ပဉ္စေတေ၊ ဥပမေန္တိ ယထာက္ကမံ။
ဂိလာနသာလာ ဂေလညံ၊ အသပ္ပာယောပသေဝနာ၊
သမုဋ္ဌာနံ ဂိလာနောတိ၊ ဥပမေန္တိ စ ပဏ္ဍိတာ။
စာရကော ကာရဏံ တတ္ထ၊ အပရာဓော စ ကာရကော၊
အပရာဓကတော စောရော၊ ဣတိ စောပမိတာ ပုန။
နိစ္စာဓိပီဠနဋ္ဌေန ¶ ၊ ဘာရာတိ ပရိဒီပိတာ၊
က္လေသဒုက္ခမုခေနေတေ၊ ခါဒကာ စ နိရန္တရံ။
အနတ္ထာဝဟိတာ နိစ္စမုက္ခိတ္တာသိကဝေရိနော၊
မစ္စုမာရာဘိဓေယျတ္တာ၊ ဝဓကာတိ စ ဘာသိတာ။
ဝိမဒ္ဒါသဟနံ ရူပံ၊ ဖေဏပိဏ္ဍံဝ ဒုဗ္ဗလံ၊
မုဟုတ္တရမဏီယတ္တာ၊ ဝေဒနာ ဗုဗ္ဗုဠူပမာ။
မရီစိကူပမာ သညာ၊ ဝိပလ္လာသကဘာဝတော၊
သင်္ခါရာပိ စ နိဿာရာ၊ ကဒလိက္ခန္ဓသာဒိသာ။
နာနပ္ပကာရံ စိန္တေန္တံ၊ နာနာက္လေသဝိမောဟိတံ၊
ပလမ္ဘတီတိ ဝိညာဏံ၊ မာယာသမမုဒီရိတံ။
ဣစ္စေဝံ ပဉ္စုပါဒါနက္ခန္ဓာ ခန္ဓာ စ ကေဝလံ၊
ပဉ္စက္ခန္ဓာတိ နာမေန၊ ဒေသိတာတိ ဝိဘာဝယေ။
အဇ္ဈတ္တဉ္စ ဗဟိဒ္ဓါ စ၊ ဝိညာဏုပ္ပတ္တိကာရဏံ၊
ဒွါရာလမ္ဗဏဘေဒေန၊ ဒွေဓာယတနမီရိတံ။
စက္ခာဒဇ္ဈတ္တိကံ တတ္ထ၊ ဆဒွါရာယတနံ ဘဝေ၊
ဗာဟိရာယတနံ နာမ၊ တထာ ရူပါဒိဂေါစရံ။
ဣတိ ¶ ဝီထိပ္ပဝတ္တာနံ၊ ဒွါရာလမ္ဗဏသင်္ဂဟော၊
အာဂမေ အဘိဓမ္မေ တု၊ သဗ္ဗထာပိ ယထာရဟံ။
တထာဟနန္တရာတီတော၊ ဇာယမာနဿ ပစ္ဆတော၊
မနော သဗ္ဗောပိ သဗ္ဗဿ၊ မနဿာယတနံ ဘဝေ။
တထာ ပုဗ္ဗင်္ဂမဋ္ဌေန၊ သဟဇာနမရူပိနံ၊
ဒွါရဘာဝေန ဝိညာဏံ၊ သဗ္ဗမာယတနံ မတံ။
မနာယတနမိစ္စေဝံ၊ ပသာဒါယတနံ တထာ၊
ပဉ္စဝိညာဏဓမ္မာနံ၊ ဣတိ ဆဒ္ဓါ ဝိဘာဝယေ။
ပဉ္စပ္ပသာဒဝိသယာ၊ ပဉ္စာယတနသမ္မတာ၊
သေသံ ရူပဉ္စ နိဗ္ဗာနံ၊ သဗ္ဗေ စေတသိကာတိ စ။
ဧကူနသဋ္ဌိဓမ္မာနံ ¶ ၊ ဓမ္မာယတနသင်္ဂဟော၊
ဣတိ ဆဒ္ဓါ ပကာသေန္တိ၊ ဗာဟိရာယတနံ ဗုဓာ။
သုညဂါမောဝ ဒဋ္ဌဗ္ဗ-မဇ္ဈတ္တိကမသာရတော၊
ဂါမဃာတကစောရာဝ၊ တံ ဟနန္တံဝ ဗာဟိရံ။
နာမပ္ပဝတ္တိမုဠှာနံ၊ တဒုပ္ပတ္တိကကာရဏံ၊
ဒွါဒသာယတနာနီတိ၊ ဝုတ္တမိတ္ထံ မဟေသိနာ။
သမတ္တာ ဘာဝမတ္တေန၊ ဓာရေန္တီတိ သလက္ခဏံ၊
ဒွါရာလမ္ဗတဒုပ္ပန္န-ပရိယာယေန ဘေဒိတာ။
မနာယတနမေတ္ထာဟ၊ သတ္တ ဝိညာဏဓာတုယော၊
ဧကာဒသ ယထာဝုတ္တာ၊ ဣစ္စဋ္ဌာရသ ဓာတုယော။
အန္တာဒိကာ မနောဓာတု၊ မနောဝိညာဏဓာတုယာ၊
ပဝေသာပဂမေ ဒွါရ-ပရိယာယေန တိဋ္ဌတိ။
ဘေရီတလဒဏ္ဍဃောသ-သမံ ဆက္ကံ ယထာက္ကမံ၊
ကဋ္ဌာရဏိပါဝကာဒိ-သမဉ္စ တိဝိဓံ ဘဝေ။
ဒုက္ခံ ¶ သမုဒယော စေဝ၊ နိရောဓော စ တထာပရော၊
မဂ္ဂေါ စာတိ စတုဒ္ဓါဟ၊ သစ္စံ သစ္စပရက္ကမော။
ဘာရော စ ဘာရဒါနဉ္စ၊ ဘာရနိက္ခေပနံ တထာ၊
ဘာရနိက္ခေပနူပါယော၊ ဣစ္စောပမ္မံ ယထာက္ကမံ။
ရောဂေါ ရောဂနိဒါနဉ္စ၊ ရောဂဝူပသမော တထာ၊
ရောဂဘေသဇ္ဇမိစ္စေဝ-မုပမာဟိ စ ဒီပိတံ။
ဝိသရုက္ခော ရုက္ခမူလံ၊ ရုက္ခစ္ဆေဒေါ တထာပရော၊
ရုက္ခစ္ဆေဒကသတ္ထန္တိ၊ စတုဓောပမိတံ တထာ။
တီရမောရိမသင်္ခါတံ၊ မဟောဃော ပါရိမံ တထာ၊
တဒတိက္ကမုပါယောတိ၊ ဥပမေန္တိ စ တံ ဗုဓာ။
သစ္ဆိကတွာန ပစ္စက္ခ-မိစ္စောပမ္မံ ယထာက္ကမံ၊
သမာစိက္ခိ ဝိမောက္ခာယ၊ သစ္စံ တစ္ဆနိယာမတော။
တထာ ¶ ဟိ ဒုက္ခံ နာဗာဓံ၊ နာညံ ဒုက္ခာ စ ဗာဓကံ၊
ဗာဓကတ္တနိယာမေန၊ ဒုက္ခသစ္စမိတီရိတံ။
တံ ဝိနာ နာညတော ဒုက္ခံ၊ န ဟောတိ န စ တံ တတော၊
ဒုက္ခဟေတုနိယာမေန၊ သစ္စမာဟ ဝိသတ္တိကံ။
နာညာ နိဗ္ဗာနတော သန္တိ၊ န စ သန္တံ န တံ ယတော၊
သန္တဘာဝနိယာမေန၊ နိဗ္ဗာနံ သစ္စမုတ္တမံ။
နာညံ မဂ္ဂါစ နိယျာနံ၊ အနိယျာနော န စာပိ သော၊
တသ္မာ နိယျာနဘာဝေန၊ မဂ္ဂေါ သစ္စန္တိ သမ္မတော။
ဣတိ တစ္ဆာဝိပလ္လာသ-ဘူတဘာဝေါ စတူသုပိ၊
သစ္စဋ္ဌောတိ ဝိနိဒ္ဒိဋ္ဌော၊ ဒုက္ခာဒီသွဝိသေသတော။
ပီဠနဋ္ဌော သင်္ခတဋ္ဌော၊ သန္တာပဋ္ဌော စ ဘာသိတော၊
ဝိပရီဏာမဋ္ဌော စာတိ၊ ဒုက္ခဿေဝံ စတုဗ္ဗိဓာ။
အာယူဟနာ ¶ နိဒါနာ စ၊ သံယောဂါ ပလိဗောဓတော၊
ဒုက္ခဿမုဒယဿာပိ၊ စတုဓတ္ထာ ပကာသိတာ။
နိဿာရဏာ ဝိဝေကာ စာ-သင်္ခတာမတတော တထာ၊
အတ္ထာ ဒုက္ခနိရောဓဿ၊ စတုဓာဝ သမီရိတာ။
နိယျာနတော ဟေတုတော စ၊
ဒဿနာဓိပတေယျတော၊
မဂ္ဂဿာပိ စတုဒ္ဓေဝ-
မိတိ သောဠသဓာ ဌိတာ။
သစ္စိကဋ္ဌပရမတ္ထံ၊ တစ္ဆာဘိသမယဋ္ဌတော၊
တထတ္ထမပိ သစ္စဋ္ဌံ၊ ပဋ္ဌပေန္တေတ္ထ ပဏ္ဍိတာ။
တဒေတံ ပဋိဝိဇ္ဈန္တိ၊ အရိယာဝ စတုဗ္ဗိဓံ၊
ဝုတ္တမရိယသစ္စန္တိ၊ တသ္မာ နာထေန တံ ကထံ၊
ဇာတိ ¶ ဇရာ စ မရဏံ၊ သောကော စ ပရိဒေဝနာ၊
ဒုက္ခဉ္စ ဒေါမနဿဉ္စ၊ ဥပါယာသော တထာပရော။
အပ္ပိယေဟိ စ သံယောဂေါ၊ ဝိပ္ပယောဂေါ ပိယေဟိ စ၊
ယမ္ပိ န လဘတိစ္ဆန္တော၊ တမ္ပိ ဒုက္ခမိဒံ မတံ။
အပါယေသုပပဇ္ဇန္တာ၊ စဝန္တာ ဒေဝလောကတော၊
မနုဿေသု စ ဇီရန္တာ၊ နာနာဗျသနပီဠိတာ။
သောစန္တာ ပရိဒေဝန္တာ၊ ဝေဒေန္တာ ဒုက္ခဝေဒနံ၊
ဒေါမနဿေဟိ သန္တတ္တာ၊ ဥပါယာသဝိဃာတိနော။
အနိဋ္ဌေဟိ အကန္တေဟိ၊ အပ္ပိယေဟိ သမာယုတာ၊
သင်္ခါရေဟိ စ သတ္တေဟိ၊ နာနာနတ္ထဝိဓာယိဘိ။
ဣဋ္ဌေဟိ ပိယကန္တေဟိ၊ မနာပေဟိ ဝိယောဇိတာ၊
သင်္ခါရေဟိ စ သတ္တေဟိ၊ နာနာသမ္ပတ္တိဒါယိဘိ။
ဒုက္ခာပဂမမိစ္ဆန္တာ ¶ ၊ ပတ္ထယန္တာ သုခါဂမံ၊
အလဗ္ဘနေယျဓမ္မေသု၊ ပိပါသာတုရမာနသာ။
ကိစ္ဆာဓိပန္နာ ကပဏာ၊ ဝိပ္ဖန္ဒန္တာ ရုဒမ္မုခါ၊
တဏှာဒါသာ ပရာဘူတာ၊ ဘဝသံသာရသံကဋေ။
ယံ တေဘူမကနိဿန္ဒံ၊ ကဋုကံ ဂါဠှဝေဒနံ၊
ဝေဒေန္တိ သံသာရဖလံ၊ တံဇာတာဒိံ ဝိနာ ကုတော။
တသ္မာ ဇာတာဒိဘေဒေဟိ၊ ဗာဓမာနာ ဘယာဝဟာ၊
ဒုက္ခာ စ ဒုက္ခဝတ္ထု စ၊ ဗဟုဓာပိ ပပဉ္စိတာ။
တေ သဗ္ဗေ ပဉ္စုပါဒါန-က္ခန္ဓာ ဧဝ သမာသတော၊
ဒုက္ခာဓိဋ္ဌာနဘာဝေန၊ ဒုက္ခတာယ နိယာမိတာ။
တသ္မာ တေဘူမကာ ဓမ္မာ၊ သဗ္ဗေ တဏှာဝိဝဇ္ဇိတာ၊
ဒုက္ခသစ္စန္တိ ဒေသေသိ၊ ဒေသနာကုသလော မုနိ။
ဝိရာဂတေဇာလာဘေန ¶ ၊ တဏှာသ္နေဟသိနေဟိတံ၊
ဝိသရုက္ခောဝ ဇာတာဒိနာနာနတ္ထဖလောဒယံ။
နန္ဒိရာဂါနုဗန္ဓေန၊ သန္တာနမဝကဍ္ဎိတံ၊
ပုနဗ္ဘဝါဘိနိဗ္ဗတ္တိဘာဝေန ပရိဝတ္တတိ။
ပတိဋ္ဌိတဉ္စ တတ္ထေတမတ္တသ္နေဟာနုသေဝနံ၊
ဂေါစရာနုနယာဗဒ္ဓံ၊ ရာဂမုစ္ဆာသမောဟိတံ။
က္လေသရာသိပရိက္လိဋ္ဌံ၊ ဗျသနောပဒ္ဒဝါဟတံ၊
ဒုက္ခသလ္လသမာဝိဒ္ဓံ၊ ဝိဟညတိ နိရန္တရံ။
ဟဝေ ဝိရာဂတေဇေန၊ ဝိစ္ဆိန္နေ သတိ သဗ္ဗထာ၊
ကေန ဗန္ဓေန သန္တာန-မာနေဿတိ ဘဝန္တရံ။
ဘဝန္တရမသမ္ပတ္တေ၊ သန္တာနမှိ ဝိဝဋ္ဋိတေ၊
ကိမဓိဋ္ဌာယ ဇာတာဒိဒုက္ခဓမ္မာ ပဝတ္တရေ။
တသ္မာ ¶ မောက္ခဝိပက္ခေန၊ တဏှာဒုက္ခဝိဓာယိနီ၊
ဒုက္ခသမုဒယော နာမ၊ သစ္စမိစ္စာဟ နာယကော။
သဗ္ဗဒုက္ခဝိနိမုတ္တံ၊ သဗ္ဗက္လေသဝိနိဿဋံ၊
ဒုက္ခနိရောဓနာမေန၊ သစ္စံ ဝုစ္စတိ အစ္စုတံ။
ဒုက္ခဉ္စ ပရိဇာနန္တော၊ ပဇဟံ ဒုက္ခသမ္ဘဝံ၊
နိဗ္ဗာနံ ပဒမာရဗ္ဘ၊ ဘာဝနာဝီထိမောသဋော။
နိယျာနဋ္ဌင်္ဂိကော မဂ္ဂေါ၊ သဗ္ဗဒုက္ခဝိမုတ္တိယာ၊
ဒုက္ခနိရောဓဂါမီတိ၊ သစ္စံ တသ္မာ တမီရိတံ။
စတုသစ္စဝိနိမုတ္တာ၊ သေသာ လောကုတ္တရာ မတာ၊
မဂ္ဂင်္ဂသမ္ပယုတ္တာ စ၊ ဖလဓမ္မာ စ သဗ္ဗထာ။
ဣတ္ထံ သဟေတုကံ ဒုက္ခံ၊ သောပါယာမတနိဗ္ဗုတိံ၊
ပဋိပတ္တိဟိတတ္ထာယ၊ ဝိဘာဝေတိ ဝိနာယကော။
သပ္ပာဋိဟာရိယံ ဓမ္မံ၊ ဒေသေတွာန အနုတ္တရော၊
စတုဓာရိယသစ္စာနိ၊ ဝိဘဇီတိ ဝိဘာဝယေ။
တဗ္ဘာဝဘာဝိဘာဝေန ¶ ၊ ပစ္စယာကာရလက္ခိတံ၊
တိယဒ္ဓံ ဒွါဒသင်္ဂဉ္စ၊ ဝီသတာကာရသင်္ဂဟံ။
တိသန္ဓိ စတုသင်္ခေပံ၊ တိဝဋ္ဋဉ္စ တိလက္ခဏံ၊
တေဘူမကံ ဒွိမူလဉ္စ၊ စတုက္ကနယမဏ္ဍိတံ။
ပစ္စေကံ စတုဂမ္ဘီရ-မနုပုဗ္ဗဝဝတ္ထိတံ၊
အဝိဇ္ဇာကူဋသင်္ခါတံ၊ ဗန္ဓာဝိစ္ဆေဒမဏ္ဍလံ။
သောကာဒီနတ္ထနိဿန္ဒံ၊ ကေဝလံ ဒုက္ခပိဏ္ဍိတံ၊
ပဋိစ္စသမုပ္ပာဒေါတိ၊ ဘဝစက္ကံ ပဝုစ္စတိ။
ပဋိဝိဒ္ဓါယ ဝိဇ္ဇာယ၊ ဘင်္ဂါဝိဇ္ဇာယ သဗ္ဗထာ၊
ဝိဝဋ္ဋတာနုပုဗ္ဗေန၊ ဟေတုဘင်္ဂါ ယထာကထံ။
အသ္မိံ ¶ သတိ ဣဒံ ဟောတိ၊ အဿုပ္ပာဒါ ဣဒံ ဘဝေ၊
အသတာသ္မိံ န တံ ဟောတိ၊ တဿ ဘင်္ဂါဝ ဘိဇ္ဇတိ။
ဧတမတ္ထံ ပုရက္ခတွာ၊ ပစ္စယဋ္ဌိတိ ဒဿိတာ၊
ပဋိစ္စသမုပ္ပာဒဿ၊ ဣဒပ္ပစ္စယတာ နယေ။
တထာ ဟိ ဇာတိယာပါဟ၊ ပစ္စယတ္တံ မဟာမုနိ၊
ဇရာမရဏဓမ္မာနံ၊ မတ္တာဘေဒေပိ ဝတ္ထုတော။
အာဟစ္စပစ္စယဋ္ဌမှိ၊ နေဒိသီ ပစ္စယဋ္ဌိတိ၊
တတ္ထ ဓမ္မန္တရဿေဝ၊ ပစ္စယဋ္ဌော ဝိဘာဝိတော။
ဝုတ္တမာစရိယေနေတံ၊ ပဋ္ဌာနနယသင်္ဂဟေ၊
လဗ္ဘမာနနယံ တာဝ၊ ဒဿနတ္ထံ ပပဉ္စိတော။
ဧတ္ထ တသ္မာနုပေက္ခိတွာ၊ အာဟစ္စ နိယမံ ဗုဓော၊
တဗ္ဘာဝဘာဝိမတ္တေန၊ ပစ္စယတ္ထံ ဝိဘာဝယေ။
တတ္ထာဝိဇ္ဇာ စ သင်္ခါရာ၊ အဒ္ဓါတီတောတိ ဘာသိတာ၊
ဝိညာဏံ နာမရူပဉ္စ၊ သဠာယတနသညိတံ။
ဖဿော စ ဝေဒနာ တဏှာ၊ ဥပါဒါနံ ဘဝေါတိ စ၊
ပစ္စုပ္ပန္နော ဘဝေ အဒ္ဓါ၊ ဘဝေ အဒ္ဓါ အနာဂတော။
ဇာတိ ¶ ဇရာ မရဏန္တိ၊ ဒွေဓာ ဟောတိ စ သဗ္ဗထာ၊
ကာလတ္တယဝဝတ္ထာနံ၊ တိယဒ္ဓမိတိ ဒီပယေ။
တတ္ထာဝိဇ္ဇာတိ အညာဏံ၊ စတုသစ္စေသု ဘာသိတံ၊
ပုဗ္ဗန္တေ စာပရန္တေ စ၊ ပစ္စယဋ္ဌိတိယံ တထာ။
အပုညာတိသင်္ခါရောတိ၊ ဝုတ္တာ ဒွါဒသ စေတနာ၊
တထာ ပုညာဘိသင်္ခါရော၊ ကာမရူပေသု ဘာသိတော။
အာနေဉ္ဇာတိသင်္ခါရောတိ၊ ဝုတ္တာရုပ္ပာ စတုဗ္ဗိဓာ၊
ကာယဗ္ဗစီမနောဒွါရံ၊ ပတွာ တာယေဝ စေတနာ။
ဝုတ္တာ ¶ ကာယဝစီစိတ္တသင်္ခါရာတိ မဟေသိနာ၊
သင်္ခါရာတိ ဝိဘတ္တေဝမေကူနတိံသ စေတနာ။
ဧကူနဝီသတိဝိဓံ၊ ပဋိသန္ဓိက္ခဏေ တထာ၊
ပဝတ္တေ ဒွတ္တိံသဝိဓံ၊ ဝိညာဏံ ပါကမာနသံ။
တိဝိဓံ ဝေဒနာ သညာ၊ သင်္ခါရာတိ ဝိဘေဒိတံ၊
နာမရူပံ တု ဒုဝိဓံ၊ ဘူတောပါဒါယဘေဒတော။
သဠာယတနသင်္ခါတံ၊ စက္ခာဒဇ္ဈတ္တိကံ မတံ၊
စက္ခုသမ္ဖဿာဒိဘေဒါ၊ ဖဿော ဆဓာ ပကာသိတော။
သုခါ ဒုက္ခာ ဥပေက္ခာတိ၊ ဝေဒနာ တိဝိဓာ ဘဝေ၊
ကာမေ ဘဝေ စ ဝိဘဝေ၊ တဏှာတိ တိဝိဓာ မတာ။
ကာမုပါဒါနာဒိဘေဒါ၊ ဥပါဒါနာ စတုဗ္ဗိဓာ၊
ကမ္မောပပတ္တိဘေဒေန၊ ဘဝေါ နာမ ဒွိဓာ မတော။
အတ္တဘာဝါဘိနိဗ္ဗတ္တိ၊ ဇာတိ နာမ ဇရာ ပန၊
ပုရာဏဘာဝေါ မရဏံ၊ ပရိယောသာနမီရိတံ။
ဒွါဒသင်္ဂပ္ပဘေဒေန၊ ဝိဘတ္တေဝံ မဟေသိနာ၊
ပဋိစ္စသမုပ္ပာဒေါတိ၊ ပစ္စယာ ဧဝ ကေဝလာ။
ပဋိစ္စ ဖလဘာဝေန၊ သာပေက္ခံ ဌိတမတ္တနိ၊
အပစ္စက္ခာယ သင်္ဂန္တွာ၊ ဥပ္ပာဒေန္တီတိ ပစ္စယာ။
အဝိဇ္ဇာသင်္ခါရာနံ ¶ တု၊ ဂဟဏေ ဂဟိတာဝ တေ၊
တဏှုပါဒါနဘဝါပိ၊ ဣတိ ပဉ္စေတ္ထ ဟေတုယော။
တဏှုပါဒါနဘဝါနံ၊ ဂဟဏေ ဂဟိတာ ပုန၊
အဝိဇ္ဇာ သင်္ခါရာ စာတိ၊ ပဉ္စေဝေတ္ထာပိ ဟေတုယော။
ဝိညာဏာဒိသရူပေန၊ ဒဿိတံ ဖလပဉ္စကံ၊
ဇာတိဇ္ဇရာမရဏေန၊ တဒေဝ ဂဟိတံ ပုန။
အတီတေ ¶ ဟေတဝေါ ပဉ္စ၊ ဣဒါနိ ဖလပဉ္စကံ၊
ဣဒါနိ ဟေတဝေါ ပဉ္စ၊ အာယတိံ ဖလပဉ္စကံ။
ဣတ္ထံ ဘေဒေန သင်္ဂယှ၊ ဒွါဒသင်္ဂံ ဝိစက္ခဏာ၊
အတ္ထာပတ္တိဝိသေသေန၊ ဝီသတာကာရမီရယုံ။
ဟေတုဖလံ ဖလဟေတု၊ ပုန ဟေတုဖလန္တိ စ၊
တိသန္ဓိ စတုသင်္ခေပံ၊ တမေဝါဟု ဝိဘာဝိနော။
အဝိဇ္ဇာတဏှုပါဒါနာ၊ က္လေသဝဋ္ဋန္တိ ဘာသိတာ၊
ဘဝေကဒေသော သင်္ခါရာ၊ ကမ္မဝဋ္ဋံ တတောပရံ။
ဝိပါကဝဋ္ဋမိစ္စေဝံ၊ ဝိဝဋ္ဋေနာဝိဝဋ္ဋိတံ၊
တိဝဋ္ဋဝဋ္ဋိတံ ဟုတွာ၊ ဝဋ္ဋမေတံ ပဝတ္တတိ။
အနိစ္စဉ္စ ခယဋ္ဌေန၊ ဒုက္ခမေတံ ဘယဋ္ဌတော၊
အနတ္တာသာရကဋ္ဌေန၊ ဝဋ္ဋမေဝံ တိလက္ခဏံ။
သံသာရဿေဝ ဝုတ္တာယံ၊ ပစ္စယာနံ ပရမ္ပရာ၊
ပဋိစ္စသမုပ္ပာဒေါတိ၊ တတော တေဘူမကော မတော။
ဗန္ဓာဝိဇ္ဇာဏ္ဍကောသေန၊ ဝိဇ္ဇာဒိဘေဒဝဇ္ဇိတာ၊
ဝိမုတ္တိရသမပ္ပတ္တာ၊ ဘဝတဏှာပိပါသိတာ။
အဘိသင်္ခါရဘာဝေန၊ ပဋိဗန္ဓတိ သန္တတိ၊
တထာဘိသင်္ခတာ ပါက-ဘာဝါယ ပရိဝတ္တတိ။
ဝိပါကာ ¶ ပုန ကမ္မာနိ၊ ပါကာနိ ပုန ကမ္မတော၊
ဣစ္စေဝံ ပရိယာယေန၊ သံသာရောယံ ပဝတ္တတိ။
ဣစ္စာဝိဇ္ဇာဘဝတဏှာ၊ ဝဋ္ဋောပတ္ထမ္ဘကာ မတာ၊
သမ္ပယုတ္တာနုသယိတာ၊ တသ္မာ ဝဋ္ဋံ ဒွိမူလကံ။
ပစ္စယပစ္စယုပ္ပန္န-သန္တာနဘေဒတော ပန၊
နာနာဘူတာနမေကန္တံ၊ ဗီဇရုက္ခာဒယော ဝိယ။
တထာပိ ¶ တေသံ ဓမ္မာနံ၊ ဝတ္ထုလက္ခဏဘေဒတော၊
ဒီပဝဋ္ဋိသိခါနံဝ၊ နတ္ထိ ဧကန္တမေကတာ။
ဟေတုဟေတုသမုပ္ပန္နာ၊ ဤဟာဘောဂဝိဝဇ္ဇိတာ၊
ပစ္စယာယ စ ပစ္စေတု-မဗျာပါရာ တတော မတာ။
အဝိဇ္ဇာဒီနမေဝါထ၊ သမ္ဘဝေ သမ္ဘဝန္တိ စ၊
သင်္ခါရာဒိသဘာဝါတိ၊ ဌိတေဝံဓမ္မတာယ တေ။
ဣတ္ထမေကတ္တနာနတ္တာ၊ အဗျာပါရော တထာပရော၊
ဧတ္ထေဝံဓမ္မတာ စေတိ၊ နယာ ဝုတ္တာ စတုဗ္ဗိဓာ။
ဖလာနံ ပစ္စယုပ္ပတ္တိ၊ ပစ္စယတ္ထော စ ဟေတုသု၊
သဘာဝပဋိဝေဓော စ၊ ဒေသနာ စိတ္တတာတိ စ။
အတ္ထဓမ္မပဋိဝေဓ-ဒေသနာနံ ယထာက္ကမံ၊
အတိဂမ္ဘီရဘာဝေန၊ စတုဂမ္ဘီရမီရိတံ။
ပဓာနကာရဏတ္တာ ဟိ၊ အဝိဇ္ဇာဒိပရမ္ပရာ၊
ကမေန သင်္ခါရာဒီနံ၊ ပစ္စယာတိ ဝဝတ္ထိတာ။
တထာ ဟိ ဇာတိယာ ဧဝ၊ ဇရာမရဏသမ္ဘဝေါ၊
အဇာတာနံ ဇရာ ဝါထ၊ မရဏံ ဝါ ကုတော ဘဝေ။
သာဝေါပပတ္တိသင်္ခါတာ၊ ဇာတိ ကမ္မဘဝေါဒိတာ၊
အင်္ကုရော ဝိယ ဗီဇမှာ၊ တတ္ထ တတ္ထောပလဗ္ဘတိ။
သမ္ပယောဂါနုသယတော၊ ဥပါဒါနပ္ပတိဋ္ဌိတာ၊
အာယူဟန္တိ စ ကမ္မာနိ၊ အာကဍ္ဎန္တောပပတ္တိကံ။
ဥပါဒါနိယဓမ္မေသု ¶ ၊ တဏှာသ္နေဟပိပါသိတာ၊
ဒဠှီ ကုဗ္ဗန္တုပါဒါနံ၊ ပိယရူပါဘိနန္ဒိနော။
ဝေဒနီယေသု ဓမ္မေသု၊ အဿာဒမနုပဿတော၊
ဝေဒနာပစ္စယာ တဏှာ၊ သမုဋ္ဌာယ ပဝဍ္ဎတိ။
ဣဋ္ဌာနိဋ္ဌဉ္စ ¶ မဇ္ဈတ္တံ၊ ဖုသန္တာ ပန ဂေါစရံ၊
ဝေဒေန္တိ ဝေဒနံ နာမ၊ နာဖုသန္တာ ကုဒါစနံ။
ဖုသတာလမ္ဗဏဉ္စေသော၊ သဠာယတနသမ္ဘဝေ၊
ဒွါရာဘာဝေ ကုတော တဿ၊ သမုပ္ပတ္တိ ဘဝိဿတိ။
သဠာယတနမေတဉ္စ၊ နာမရူပူပနိဿိတံ၊
ဆဖဿဒွါရဘာဝေန၊ ပဝတ္တတိ ယထာရဟံ။
ပုဗ္ဗင်္ဂမာဓိဋ္ဌာနေန၊ ဝိညာဏေန ပတိဋ္ဌဟေ၊
နာမရူပံ ဥပတ္ထဒ္ဓံ၊ ပဋိသန္ဓိပဝတ္တိယံ။
သင်္ခါရဇနိတံ ဟုတွာ၊ ပတိဋ္ဌာတိ ဘဝန္တရေ၊
ဝိညာဏံ ဇနကာဘာဝေ၊ တဿုပ္ပတ္တိ ကထံ ဘဝေ။
အဝိဇ္ဇာယာနုသယိတေ၊ ပဋိဝေဓဝိရောဓိတေ၊
ဝဋ္ဋာနုဂတသန္တာနေ၊ ပဋိသန္ဓိဖလာဝဟေ။
ပါကဓမ္မာ သဘာဝေန၊ ပဝတ္တန္တိ ဟိ စေတနာ၊
အဝိဇ္ဇာပစ္စယာ ဟောန္တိ၊ သင်္ခါရာတိ တတော မတာ။
ပဋိဝိဒ္ဓေသု သစ္စေသု၊ ပစ္စယာနံ ပရမ္ပရာ၊
ဝိဃာတီယတိ သဗ္ဗာပိ၊ တတော ဝဋ္ဋံ ဝိဝဋ္ဋတိ။
ဣစ္စာဝိဇ္ဇာဝိရောဓေန၊ တဿာ ဝဋ္ဋပ္ပဝတ္တိယာ၊
သင်္ဃာတနိကဘာဝေန၊ အဝိဇ္ဇာ ကူဋသမ္မတာ။
ဇရာမရဏသင်္ဃာဋ-ပဋိပီဠိတစေတသံ၊
က္လေသမုစ္ဆာပရေတာနံ၊ သာ စာဝိဇ္ဇာ ပဝဍ္ဎတိ။
ဣစ္စာဗဒ္ဓမဝိစ္ဆေဒံ၊ ဣဒပ္ပစ္စယမဏ္ဍလံ၊
စက္ကနေမိသမာဝဋ္ဋံ၊ ကမေန ပရိဝတ္တတိ။
ဝဋ္ဋဿ ¶ ဒွါဒသင်္ဂဿ၊ တဿ တေဘူမကဿ တု၊
ဒုက္ခက္ခန္ဓဿ ဒဿေသိ၊ နိဿန္ဒေန နိဒဿနံ။
သောကဉ္စ ¶ ပရိဒေဝဉ္စ၊ တထာ ဒုက္ခဉ္စ ကာယိကံ၊
ဒေါမနဿမုပါယာသံ၊ နာနာဗျသနသမ္ဘဝံ။
ဣစ္စာတုရမနိစ္စန္တံ၊ မဟောပဒ္ဒဝသင်္ကုလံ၊
ဗဟုပက္လေသုပဿဋ္ဌံ၊ ဒုက္ခမေတန္တိ ပိဏ္ဍိတံ။
ဣစ္စေဝံ ပဉ္စုပါဒါန-က္ခန္ဓဘေဒိတသင်္ဂဟော၊
အတ္တဘာဝဘဝရထော၊ ဟတ္ထမုတ္တံဝ ယန္တကံ။
ဂတိဋ္ဌိတိနိဝါသေသု၊ သံသရန္တော နိရန္တရံ၊
စက္ကေနေတေန ယာတီတိ၊ ဘဝစက္ကမိဒံ မတံ။
အဝိဇ္ဇာဏ္ဍံ ပဒါလေတွာ၊ ပဋိဝေဓပ္ပဝတ္တိယာ၊
ပစ္စယပ္ပစ္စယုပ္ပန္နာ၊ သုပဋ္ဌန္တိ သဘာဝတော။
အနိစ္စာ ဒုက္ခနတ္တာ စ၊ ဘင်္ဂဝန္တော ဘယာဝဟာ၊
သာဒီနဝါတိ သင်္ခါယ၊ ဝိဝဋ္ဋမဘိတိဋ္ဌတိ။
တတော သာနုသယာ တဏှာ၊ နိရုဇ္ဈတိ ပုနဗ္ဘဝေ၊
သန္တာနရတိယာဘာဝါ၊ န ပက္ခန္ဒတိ သန္ဓိယံ။
အဝိရုဠှိကဘာဝေန၊ တတ္ထ ဝဋ္ဋဝိရောဓိတေ၊
အဘိသင်္ခါရဘာဝေန၊ န ပဝတ္တန္တိ စေတနာ။
ပဋိသန္ဓိပဝတ္တီပိ၊ န ဇနေန္တိ ဘဝန္တရေ၊
ဣစ္စာဝိဇ္ဇာနိရောဓေန၊ နိရုဒ္ဓါ ကမ္မစေတနာ။
ပစ္စယတ္ထနိရောဓေန၊ သင်္ခါရာနံ နိရောဓတော၊
ဝိညာဏံ ဇနကာဘာဝါ၊ နိရုဒ္ဓမိတိ ဝုစ္စတိ။
ဝိညာဏာဒိနိရောဓာ စ၊ နာမရူပါဒိကံ တထာ၊
ဒုက္ခက္ခန္ဓဿိမဿေဝံ၊ နိရောဓောတိ ပဝုစ္စတိ။
ဣတိ ¶ ဝဋ္ဋဝိဝဋ္ဋာနံ၊ ဝသာ ဒွေဓာ ဝိဘာဝိတော၊
ပဋိစ္စသမုပ္ပာဒေါတိ၊ ဒေသိတောယံ မဟေသိနာ။
သဗ္ဗသင်္ခတဓမ္မာနံ ¶ ၊ သဗ္ဗေ ဓမ္မာပိ ပစ္စယာ၊
ဇနကာ စေဝုပတ္ထမ္ဘာ၊ သံဝိဘတ္တာ ယထာရဟံ။
အာဟစ္စ ပစ္စယဋ္ဌေန၊ စတုဝီသတိဓာ ဌိတာ၊
ဟေတာလမ္ဗဏာဓိပတာနန္တရသမနန္တရာ။
သဟဇာတအညမည-နိဿယာ စောပနိဿယော၊
ပုရေဇာတာ ပစ္ဆာဇာတာ-သေဝနာ ကမ္မမေဝ စ။
ပါကာဟာရိန္ဒြိယဇ္ဈာန-မဂ္ဂင်္ဂသမ္ပယုတ္တကာ၊
ဝိပ္ပယုတ္တတ္ထိ နတ္ထိ စ၊ ဝိဂတာဝိဂတန္တိ စ။
ပဉ္စာတီတာဝ ကမ္မံ တု၊ ဝတ္တမာနဉ္စ ဤရိတံ၊
သဗ္ဗထာပိ တယော ဝုတ္တာ၊ ဝတ္တမာနာ တတောပရေ။
ဆဓာ နာမံ တု နာမဿ၊ ပဉ္စဓာ နာမရူပိနံ၊
ဧကဓာ ပုန ရူပဿ၊ ရူပံ နာမဿ စေကဓာ။
ပညတ္တိနာမရူပါနိ၊ နာမဿ ဒုဝိဓာ ဒွယံ၊
ဒွယဿ နဝဓာ စေတိ၊ ဆဗ္ဗိဓာ ပစ္စယာ ကထံ။
နိရုဒ္ဓါနန္တရာ ဧဝ၊ ဇာယန္တာနမနန္တရံ၊
နာမဓမ္မာဝ နာမာနံ၊ ဇနကတ္တောပကာရကာ။
နိရန္တရပ္ပဝတ္တိယာ၊ အနုရူပမနန္တရာ၊
အနန္တရပစ္စယေန၊ ပစ္စယောတိ ပကာသိတာ။
သမနန္တရဘာဝေန၊ တေသံ တေ ဧဝ ပစ္စယာ၊
သမနန္တရနာမေန၊ ပစ္စယောတိ ပကာသိတာ။
အတ္ထိဘာဝါယ ဓမ္မာနံ၊ နတ္ထိတာယောပကာရကာ၊
နတ္ထိပစ္စယနာမေန၊ ဝုတ္တာ တေ ဧဝ တာဒိနာ။
ဩကာသဒါနဘာဝေန၊ ဝိဂတာဝေါပကာရကာ၊
ဓမ္မာ တေ ဧဝ ဝုစ္စန္တိ၊ ဝိဂတပ္ပစ္စယောတိ စ။
ဇဝါ ¶ ¶ ပဂုဏဘာဝါယ၊ ဇဝါနမုပကာရကာ၊
အာသေဝနပစ္စယောတိ၊ နိရုဒ္ဓါနန္တရာ မတာ။
သံသဋ္ဌသဟဇာတာနံ၊ သမ္ပယောဂေန ပစ္စယာ၊
သမ္ပယုတ္တပစ္စယောတိ၊ နာမာ နာမာနမီရိတာ။
ဣစ္စေကော ဝတ္တမာနော စ၊ ပဉ္စာတီတာ ယထာရဟံ၊
အရူပါနမရူပါ စ၊ ပစ္စယာ ဆဗ္ဗိဓာ မတာ။
ပဝတ္တေ စိတ္တဇာတာနံ၊ ကမ္မဇာနဉ္စ သန္ဓိယံ၊
ရူပါနံ သဟဇာတာန-မရူပါနဉ္စ တာဒိနာ။
ဟေတုဘူတာ ဆ ဓမ္မာပိ၊ မူလဋ္ဌေနောပကာရကာ၊
ဟေတုပစ္စယဘာဝေန၊ ပစ္စယောတိ ပကာသိတာ။
တထာ နိဇ္ဈာယနဋ္ဌေန၊ တေသမေဝေါပကာရကာ၊
ဈာနပစ္စယနာမေန၊ ဈာနဓမ္မာ ဝိဘာဝိတာ။
တထေဝ နိယျာနဋ္ဌေန၊ ပစ္စယာတိ ပကာသိတာ၊
မဂ္ဂပစ္စယနာမေန၊ မဂ္ဂင်္ဂါ စ မဟေသိနာ။
တေသမေဝ စ ဓမ္မာနံ၊ သဟဇာတာတိ စေတနာ၊
ကမ္မဗျာပါရာဘာဝေန၊ ဝတ္တမာနာ စ ပစ္စယာ။
ကဋတ္တာရူပပါကာနံ၊ နာနက္ခဏိကစေတနာ၊
အဘိသင်္ခါရဘာဝေန၊ ဇနကပ္ပစ္စယာ မတာ။
ဣစ္စေဝံ ဒုဝိဓာ ဘေဒါ၊ ဝိပ္ဖာရဋ္ဌေန စေတနာ၊
ကမ္မပစ္စယနာမေန၊ ပစ္စယောတိ ပကာသိတာ။
ရူပါနံ သဟဇာတာနံ၊ အညမညမရူပိနံ၊
ပစ္စယာ သန္တဘာဝေန၊ ဝိပါကာ သမုဒီရိတာ။
ဧကောတီတောပိ စတ္တာရော၊ ဝတ္တမာနာတိ ပဉ္စဓာ၊
ပစ္စယာ နာမဓမ္မာဝ၊ နာမရူပါနမီရိတာ။
ဣမဿ ¶ ရူပကာယဿ၊ ပစ္ဆာဇာတောပကာရကော၊
ပစ္ဆာဇာတပစ္စယောတိ၊ နာမံ ရူပါနမေကဓာ။
သတ္တဝိညာဏဓာတူနံ ¶ ၊ ဆ ဝတ္ထူနိ ပဝတ္တိယံ၊
ပဉ္စဝိညာဏဝီထိယာ၊ ပဉ္စာလမ္ဗာ ယထာက္ကမံ။
ပုရေဇာတဝိသေသေန၊ နာမာနမုပကာရကာ၊
ပုရေဇာတပစ္စယောတိ၊ ရူပံ နာမဿ စေကဓာ။
စိတ္တစေတသိကာ ဓမ္မာ၊ ယံ ယမာရဗ္ဘ ဇာယရေ၊
အာလမ္ဗဏပစ္စယောတိ၊ သဗ္ဗမေတံ ပဝုစ္စတိ။
ယမာလမ္ဗံ ဂရုံ ကတွာ၊ နာမဓမ္မာ ပဝတ္တရေ၊
သွာယမေဝါလမ္ဗဏူပ-နိဿယောတိ ပကာသိတော။
အနန္တရပစ္စယေန၊ ယေ ဓမ္မာ ပစ္စယာ မတာ၊
တေ ဧဝ ဝါနန္တရူပ-နိဿယောတိ ပကာသိတော။
ရာဂသဒ္ဓါဒယော ဓမ္မာ၊ အဇ္ဈတ္တမနုဝါသိတာ၊
သတ္တသင်္ခါရဓမ္မာ စ၊ ဗဟိဒ္ဓါပနိသေဝိတာ။
ရာဂသဒ္ဓါဒိဓမ္မာနံ၊ ကမ္မံ ပါကာနမိစ္စယံ၊
ပကတူပနိဿယောတိ၊ ပဋ္ဌပေသိ တထာဂတော။
ဣစ္စေဝံ ဗလဝဋ္ဌေန၊ နိဿယေနောပကာရကာ၊
ဥပနိဿယနာမေန၊ ပစ္စယောယံ တိဓာ မတော။
ရူပါရူပံ ပနိစ္စေဝံ၊ တေကာလိကမကာလိကာ၊
ပညတ္တိ စေဝ နာမာနံ၊ ပစ္စယော ဒုဝိဓော မတော။
အာလမ္ဗာဓိပ္ပတိဘူတံ၊ နာမာနံ ဂရုဂေါစရံ၊
သဟဇာဓိပ္ပတီဓမ္မာ၊ သဟဇာနံ ယထာရဟံ။
နာမရူပါနမိစ္စေဝ-မာဓိပ္ပစ္စေန ပစ္စယော၊
အဓိပ္ပတိပစ္စယောတိ၊ ဒုဝိဓာ ပရိဒီပိတော။
သဟဇာ ¶ နာမရူပါနံ၊ မဟာဘူတာ စ ရူပိနံ၊
ပဋိသန္ဓိက္ခဏေ ဝတ္ထု၊ နာမာနမိတိ သဗ္ဗထာ။
သဟဇာတဝိသေသေန၊ ဓမ္မာနမုပကာရကာ၊
သဟဇာတပစ္စယောတိ၊ တိဝိဓေဝံ ဝိဘာဝိတာ။
အရူပိနော ¶ စတုက္ခန္ဓာ၊ မဟာဘူတာ စတုဗ္ဗိဓာ၊
သန္ဓိယံ ဝတ္ထုနာမာနိ၊ သဟဇာနီတိ သဗ္ဗထာ။
ဥပကာရပဝတ္တာ စ၊ အညမညဿ တာဒိနာ၊
အညမညပစ္စယောတိ၊ ဝိဘတ္တာ တိဝိဓာ မတာ။
သတ္တဝိညာဏဓာတူနံ၊ ဘူတောပါဒါယရူပိနံ၊
သဟဇာတနာမရူပ-ဓမ္မာနဉ္စ ယထာက္ကမံ။
ဝတ္ထု ဘူတာ စတုက္ခန္ဓာ၊ နိဿယေနောပကာရကာ၊
နိဿယပ္ပစ္စယော နာမ၊ ပစ္စယောတိ မတော တိဓာ။
ကဗဠီကာရော အာဟာရော၊ ရူပကာယဿ ပစ္စယော၊
အရူပိနော ပနာဟာရာ၊ သဟဇာနံ ယထာရဟံ။
နာမရူပါနမိစ္စေဝံ၊ ယာပနဋ္ဌေန ပစ္စယာ၊
အာဟာရပစ္စယောတေဝ၊ ဒုဝိဓေဝံ ပကာသိတော။
ပသာဒဇီဝိတာရူပိ-န္ဒြိယဓမ္မာ ယထာက္ကမံ၊
ပဉ္စဝိညာဏုပါဒိန္န-ရူပါနံ နာမရူပိနံ။
သဟဇာတာနမိစ္စေဝ-မိဿရဋ္ဌေန ပစ္စယာ၊
ဣန္ဒြိယပ္ပစ္စယောတေဝ၊ တိဝိဓာ သမုဒါဟဋော။
သတ္တဝိညာဏဓာတူနံ၊ ဆ ဝတ္ထူနိ ယထာရဟံ၊
ပစ္ဆာဇာတာ စ ကာယဿ၊ စိတ္တစေတသိကာ တထာ။
အရူပါ သဟဇာတာနံ၊ ရူပါနန္တိ မတာ တိဓာ၊
ဝိပ္ပယုတ္တပစ္စယောတိ၊ ဝိပ္ပယောဂေါပကာရကာ။
သဟဇာတံ ¶ ပုရေဇာတံ၊ ပစ္ဆာဇာတဉ္စ သဗ္ဗထာ၊
ကဗဠီကာရော အာဟာရော၊ ရူပဇီဝိတမိစ္စယံ။
အတ္ထိပစ္စယသင်္ခါတော၊ ပစ္စယော ပဉ္စဓာ မတော၊
ဝိဇ္ဇမာနသဘာဝေန၊ ပစ္စယဋ္ဌာ ယထာရဟံ။
တေ ဧဝါဝိဂတာ ဟုတွာ၊ ဝတ္တမာနောပကာရကာ၊
အဝိဂတပစ္စယောတိ၊ သုဂတေန ဝဝတ္ထိတာ။
အဋ္ဌေဝံ ¶ ဝတ္တမာနာနိ၊ နာမရူပါနိ ပစ္စယာ၊
သဗ္ဗတ္ထာဓိပ္ပတီ စာတိ၊ နဝဓာ နာမရူပိနံ။
ဣတ္ထမုဒ္ဒိဋ္ဌနိဒ္ဒိဋ္ဌာ၊ ပဋ္ဌာနနယသင်္ဂဟာ၊
ကုသလာကုသလာဒီဟိ၊ သုဝိဘတ္တာ မဟေသိနာ။
ပညတ္တိနာမရူပါနံ၊ ဝသေန တိဝိဓာ ဌိတာ၊
ပစ္စယာတိ ပကာသေန္တိ၊ စတုဝီသတိ ပဏ္ဍိတာ။
ပညတ္တိ ပညပီယတ္တာ၊ ပညာပေတီတိ စ ဒွိဓာ၊
နာမရူပဝိနိမုတ္တာ၊ ပညတ္တာ တာဒိနာ ကထံ။
ဘူတပရိဏာမာကာရမုပါဒါယ တထာ တထာ၊
ဘူမိပဗ္ဗတပါသာဏတိဏရုက္ခလတာဒယော။
သမ္ဘာရာကာရမာရဗ္ဘ၊ သန္နိဝေသဝိသေသိတာ၊
ယာနဂါမဝနုယျာနကဋသာရပဋာဒယော။
ကာရကဝေဒကာကာရံ၊ ဝိညတ္တိန္ဒြိယလက္ခိတံ၊
ခန္ဓပဉ္စကမာဟစ္စ၊ မစ္စာသုရသုရာဒယော။
စန္ဒာဒါဝဋ္ဋနာဒီဟိ၊ ဒိသာကာလာဒိသမ္မုတိ၊
ပါရမ္ပရိယကာဒီဟိ၊ ဇာတိဂေါတ္တကုလာဒယော။
တံတံကြိယာဒိဘေဒေဟိ၊ ပညတ္တာ ကထိနာဒယော၊
တံတံကလာပါသမ္ဖုဋ္ဌာ၊ ကူပါကာသဂုဟာဒယော။
တံ ¶ တံ နိမိတ္တမာရဗ္ဘ၊ စိန္တယန္တဿုပဋ္ဌိတာ၊
ကသိဏာဒိကဝေါဟာရာ၊ ဘာဝနာမယဂေါစရာ။
ပုဗ္ဗောပလဗ္ဘာဘာဝေန၊ ကသိဏုဂ္ဃာဋိမာဒယော၊
နိရောဓာ စ သမာပတ္တိ၊ ဝိသေသာဘာဝလက္ခိတာ။
ဣတိ တံ တမုပါဒါယ၊ သမညာတာ တထာ တထာ၊
သင်္ခါ သမညာ ပညတ္တိ၊ ဝေါဟာရောတိ ပကာသိတာ။
အာလမ္ဗဏဋ္ဌာကာရေန၊ သန္တာဘာဝေပိ ဝတ္ထုတော၊
စိန္တာဝေါဟာရနိပ္ဖန္နာ၊ အတ္ထစ္ဆာယာဝ ဘာသိနီ။
ပညာပီယတ္တာ ¶ ပညတ္တိ၊ နာမာယမိတိ ဘာသိတာ၊
ဥပါဒါယ စ ပညတ္တိ၊ သာ ဧဝေါပနိဓာယ စ။
ပညတ္တိ ပညာပနတော၊ ပဏ္ဍိတေဟိ ပကာသိတာ၊
အဝိဇ္ဇမာနာ ပညတ္တိ၊ ဝိဇ္ဇမာနာတိပိ ဒွိဓာ။
လောကဝေါဟာရိကဋ္ဌေန၊ ပညတ္တံ ပရမတ္ထတော၊
အဝိဇ္ဇမာနမေတာယ၊ ပညာပေန္တိ ယဒါ တဒါ။
အဝိဇ္ဇမာနပညတ္တိ၊ ဝိဇ္ဇမာနံ ယဒါ ပုန၊
ပညာပေန္တိ တဒါ ဧသာ၊ ဝိဇ္ဇမာနန္တိ ဝုစ္စတိ။
ဣတ္ထံ ပညတ္တိဓမ္မဉ္စ၊ သမ္မတတ္ထဝိသေသတော၊
ဘာဝဓမ္မဉ္စ ရူပါဒိ-သလက္ခဏဝိသေသတော။
ပညာပေတီတိ ပညတ္တိ၊ နာမာယမိတိ ဘာသိတာ၊
ယာ နာမံ နာမကမ္မာဒိနာမေန သမုဒီရိတာ။
သာ ဧဝါဝိဇ္ဇမာနေန-ဝိဇ္ဇမာနာဒိဘေဒိတာ၊
ဣတ္ထိသဒ္ဒေါ ဆဠာဘိညော၊ ရာဇပုတ္တော တု ဘာသိတာ။
ကြိယာနိမိတ္တတ္ထယောဂ-ရုဠှိဇာတောပစာရိကာ၊
သမ္ဗန္ဓောပစယာဝတ္ထာ၊ သဏ္ဌာနာပေက္ခိတာ တထာ။
ဒေဝဒတ္တောထ ¶ မေဓာဝီ၊ ဝေဒနာ စန္ဒိမာ တထာ၊
ခတ္တိယော နရသီဟော စ၊ ဘာတာ လောဟိတကံ ယုဝါ။
ကုဏ္ဍလံ ဒုဿမိစ္စေဝမာဒိဘေဒိတသင်္ဂဟာ၊
သမ္မတတ္ထသဘာဝေသု၊ ဝေါဟာရာကာရလက္ခိတာ။
သာယံ ယာဒိစ္ဆကာနွတ္ထသင်္ကေတက္ခဏသမ္ဘဝါ၊
ဝေါဟာရတ္ထဝိသေသေန၊ ဉေယျာကာရာနုသာရိနီ။
ဝစီဃောသာနုသာရေန၊ သောတဝိညာဏဝီထိယာ၊
ပဝတ္တာနန္တရုပ္ပန္န-မနောဒွါရဿ ဂေါစရာ။
အတ္ထာ ¶ ယဿာနုသာရေန၊ ဝိညာယန္တိ တတော ပရံ၊
သမ္မတာ စ သဘာဝါ စ၊ ပုဗ္ဗသင်္ကေတဘာဂိနော။
ယာယံ ဝါလမ္ဗဏာကာရဝိသေသေ ပဋိဒိဿတိ၊
ဝေဒနာဒိဝစီဃောသံ၊ သဘာဝါနုဂစေတသော။
သာယံ ပညတ္တိ ဝိညေယျာ၊ လောကသင်္ကေတနိမ္မိတာ၊
ဝစီဝိညတ္တိသဟိတော၊ သဒ္ဒေါ ဧဝါတိ ကေစန။
ဣတ္ထံ ပညတ္တိဓမ္မာတိ၊ ဝုတ္တံ ပညတ္တိကဒွယံ၊
တထာဓိဝစနာ ဓမ္မာ၊ နိရုတ္တီတိ စ တာဒိနာ။
အဝိသံဝါဒကဋ္ဌေန၊ လောကဝေါဟာရသာဓကံ၊
သမညာသစ္စမိစ္စေဝံ၊ အာစိက္ခန္တိ ဝိစက္ခဏာ။
သတ္ထာ ယံ ပရမတ္ထမုတ္တမဂုဏော နာမဉ္စ ရူပန္တိ စ၊
ဒွေဓာကာသိ သဘာဝဓမ္မကုသလော နိဗ္ဗိဇ္ဈ ဓမ္မန္တရံ၊
ဝေါဟာရတ္ထဝိသေသဉေယျမပရံ ဗျာကာသိ ပညတ္တိတော၊
အာရဒ္ဓံ ကမတော မယေဝမခိလံ တံ သုဋ္ဌု နိဋ္ဌာပိတံ။
ယံ ဓမ္မံ ဓမ္မရာဇာ နိရတိကမဘိသမ္ဗောဓိ မဂ္ဂေန ဗုဒ္ဓါ၊
ကတွာ ကဏ္ဍမ္ဗမူလေ ပရမမနုပမံ ပါဋိဟီရံ ခဏေန၊
ပါတွာကာ ¶ တတ္ထ ပတွာ ပုရဝရဂဏမုလ္လာပလာဝဏ္ဏရံသိ၊
တတ္ထာဒါယတ္ထသာရံ ကထိတမတိစိရံ ဌာတု ပါဌာနုကူလံ။
ဣတိ နာမရူပပရိစ္ဆေဒေ သဗ္ဗသင်္ဂဟဝိဘာဂေါ နာမ
သတ္တမော ပရိစ္ဆေဒေါ။
နိဋ္ဌိတော စ နာမရူပပရိစ္ဆေဒေ သဗ္ဗထာပိ
အဘိဓမ္မပရမတ္ထဝိဘာဂေါ။