📜
၈။ အဋ္ဌမော ပရိစ္ဆေဒေါ
ကသိဏာသုဘဝိဘာဂေါ
ဣတော ¶ ပရံ ပဝက္ခာမိ၊ ဘာဝနာနယမုတ္တမံ၊
နာမရူပံ ပရိဂ္ဂယှ၊ ပဋိပဇ္ဇိတုမီဟတော။
ဘာဝနာ ဒုဝိဓာ တတ္ထ၊ သမထော စ ဝိပဿနာ၊
သမထော ဒုဝိဓော တတ္ထ၊ ပရိတ္တော စ မဟဂ္ဂတော။
ဥပစာရမနုပ္ပတ္တော၊ ပရိတ္တောတိ ပဝုစ္စတိ၊
မဟဂ္ဂတပ္ပနာပတ္တော၊ သမထော လောကိယော မတော။
ကသိဏာနိ ဒသာသုဘာ၊ ဒသဓာနုဿတီ တထာ၊
အပ္ပမညာ စ သညာ စ၊ ဝဝတ္ထာရုပ္ပကာနိ စ။
ကမ္မဋ္ဌာနာနိ တတ္ထာဟု၊ စတ္တာလီသ ဝိစက္ခဏာ၊
ယတ္ထာနုယောဂံ ကုဗ္ဗန္တာ၊ ဘာဝေန္တိ သမထဒွယံ။
တံ ¶ ပယောဂဝိသုဒ္ဓေန၊ ပတွာနောပါယသမ္ပဒံ၊
အဇ္ဈာသယံ ဝိသောဓေတွာ၊ ဘာဝေတဗ္ဗန္တိ ဘာသိတံ။
ကထံ ကရောန္တော စာရိတ္တံ၊ ဝါရိတ္တဉ္စ ဝိဝဇ္ဇိယ၊
ပါတိမောက္ခံ သမာဒါယ၊ သဒ္ဓါယ ပရိပူရယေ။
ပဋိသင်္ခါယ သောဓေတွာ၊ ဆဒွါရေသု မလာသဝံ၊
ဆဠိန္ဒြိယာနိ မေဓာဝီ၊ သတာရက္ခေန ဂေါပယေ။
ပါပကာဇီဝနိဿင်္ဂေါ၊ ကုဟကာစာရနိဿဋော၊
အာဇီဝံ ပရိသောဓေယျ၊ ပဟိတတ္တေဋ္ဌိသုဒ္ဓိယာ။
ဣဒမတ္ထိတမာရဗ္ဘ၊ ပဋိသင်္ခါယ ယောနိသော၊
ပညဝါ သမ္ပဇညေန၊ ပရိဘုဉ္ဇေယျ ပစ္စယေ။
သံဝရံ ပါတိမောက္ခေ စ၊ သီလမိန္ဒြိယသံဝရံ၊
အာဇီဝပါရိသုဒ္ဓိဉ္စ၊ တထာ ပစ္စယနိဿိတံ။
သမာဒါယ ¶ စတုဒ္ဓေဝ-မဓိဋ္ဌေယျ တတော ပရံ၊
တဿေဝ ပရိဝါရာယ၊ ဓုတင်္ဂါနိ ယထာရဟံ။
ပံသုကူလိကမင်္ဂံ တိ-စီဝရံ စီဝရာယုဂံ၊
ပိဏ္ဍပါတိကမင်္ဂဉ္စ၊ သပဒါနိကမုတ္တမံ။
ခလုပစ္ဆာဘတ္တိကင်္ဂံ၊ ဓုတင်္ဂံ ပတ္တပိဏ္ဍိကံ၊
ဧကာသနိကမိစ္စေဝံ၊ ပဉ္စဓာ ဘောဇနေ ဌိတံ။
အာရညိကံ ယထာသန္ထ-
တိကင်္ဂံ ရုက္ခမူလိကံ၊
အဗ္ဘောကာသိကသောသာနိ-
ကင်္ဂါ နေသဇ္ဇိကံ တထာ။
ဆ သေနာသနမာရဗ္ဘ၊ ဓုတင်္ဂါနီတိ တေရသ၊
ကပ္ပိယေပိ စ လောလုပ္ပ-သမာစာရဝိမုတ္တိယာ။
သာမီစိပဋိပတ္တီတိ ¶ ၊ ကတွာ သလ္လေခဝုတ္တိယာ၊
ပစ္စယတ္တယမာဟစ္စ၊ ပညတ္တာနိ မဟေသိနာ။
စတုပါရိသုဒ္ဓိသီလံ၊ ဓုတင်္ဂပရိဝါရိတံ၊
ပူရေတွာန ဝိသုဒ္ဓေဝံ၊ ပယောဂပရိသုဒ္ဓိယာ။
တတော ပဏိဓိသမ္ပန္နော၊ ဘာဝနာယ ဝိသာရဒေါ၊
ဥပါယံ ပဋိပါဒေယျ၊ ပဝိဝေကရတော ကထံ?
အာဝါသော စ ကုလံ လာဘော၊
ဂဏော ကမ္မဉ္စ ပဉ္စမံ၊
အဒ္ဓါနံ ဉာတိ အာဗာဓော၊
ဂန္ထော ဣဒ္ဓီတိ တေ ဒသ။
ဆေတွာန နိပကော ယောဂီ၊
ပလိဗောဓေ ယထာရဟံ၊
နိရာလယော နိရာရမ္ဘော၊
ပပဉ္စောပသမေ ရတော။
ပိယံ ¶ ဂရုံ ဘာဝနိယံ၊ ဝတ္တာရံ ဝစနက္ခမံ၊
ကတ္တာရမတိဂမ္ဘီရကထံ ဌာနနိယောဇကံ။
ဗဟုဿုတံ ဂုဏဝန္တ-မာဂမ္မာစရိယံ ဗုဓော၊
ခမော ပဒက္ခိဏဂ္ဂါဟီ၊ နိယျာတတ္တုဇု ဘဒြကော။
အာရာဓေတွာန ဂဏှေယျ၊ တံ ကမ္မဋ္ဌာနဒါယကံ၊
ကမ္မဋ္ဌာနံ ပရိက္ခိတွာ၊ စရိယာရဟမတ္တနော။
ရာဂေါ ဒေါသော စ မောဟော စ၊
စရိယာ တီဟိ ပဏ္ဍိတာ၊
သဒ္ဓါဗုဒ္ဓိဝိတက္ကေဟိ၊
ဆဗ္ဗိဓာ စ ဝိဘာဝယုံ။
ရာဂုဿန္နဿ ¶ သပ္ပာယာ၊ ကောဋ္ဌာသာသုဘဘာဝနာ၊
ဒေါသုဿန္နဿပ္ပမညာ၊ နီလာဒိ စ စတုဗ္ဗိဓာ။
ဝိတက္ကံ မောဟုဿန္နာနံ၊ အာနာပါနံ ပကာသိတံ၊
ဆ သဒ္ဓါစရိတဿာဟု၊ ဗုဒ္ဓါနုဿတိအာဒယော။
မရဏောပသမာသညာဝဝတ္ထာနာနိ ဗုဒ္ဓိနော၊
သေသာနိ ပန သဗ္ဗေသံ၊ တတ္ထာပိ ကသိဏံ ဗုဓာ။
ဝိတက္ကပကတိကဿ၊ ပရိတ္တံ မောဟစာရိနော၊
မဟန္တမိတိ သပ္ပာယံ၊ ဂဟေတွာန တတော ပရံ။
မဟာဝါသံ နဝံ ဇိဏ္ဏံ၊ ပန္ထသောဏ္ဍိကသန္တိကံ၊
ပဏ္ဏပုပ္ဖဖလာကိဏ္ဏံ၊ ဗဟုသမ္မာနပတ္ထိတံ။
သီမန္တဒါရုနဂရ-က္ခေတ္တပစ္စန္တနိဿိတံ၊
ဝိသဘာဂမသပ္ပာယံ၊ ပဋ္ဋနံ မိတ္တဒုလ္လဘံ။
ဌာနာနိဋ္ဌာရသေတာနိ၊ ပရိဝဇ္ဇေယျ ပဏ္ဍိတော၊
သေဝေယျ ဘာဝနာယောဂ္ဂံ၊ သေနာသနမတန္ဒိတော။
နာတိဒူရံ နာစ္စာသန္နံ၊ အပ္ပသဒ္ဒမနာကုလံ၊
ဂမနာဂမနသမ္ပန္နံ၊ အပ္ပဍံသာနုပဒ္ဒဝံ။
အကိစ္ဆပစ္စယုပ္ပာဒံ ¶ ၊ လဇ္ဇီဘိက္ခုဂဏောစိတံ၊
ဝိဝေကဋ္ဌာနဗဟုလံ၊ ဗဟုဿုတနိသေဝိတံ။
အပ္ပဘယံ နိရာသင်္ကံ၊ အပ္ပဒေါသံ မဟာဂုဏံ၊
ဝိဟာရမနုသေဝန္တော၊ တတ္ထ နိဿင်္ဂစေတသာ။
တတော ကေသနခစ္ဆေဒ-ရဇနာဒိမသေသတော၊
ခုဒ္ဒကံ ပလိဗောဓဉ္စ၊ ဆိန္ဒိတွာန ယထာရဟံ။
အာဝါသံ ဂေါစရံ ဘဿံ၊ ပုဂ္ဂလံ ဘောဇနံ တထာ၊
ဝဇ္ဇေန္တောတုမသပ္ပာယံ၊ ဣရိယာပထမတ္တနော။
သေဝန္တော ¶ သတ္တ သပ္ပာယေ၊ တေ ဧဝါတိ ပဓာနဝါ၊
ဘာဝနူပါယသမ္ပန္နော၊ ဝူပကဋ္ဌော ရဟောဂတော။
ကာမေသွာဒီနဝံ ဒိသွာ၊ နေက္ခမ္မံ ဒဋ္ဌု ခေမတော၊
ပရိယုဋ္ဌာနနိဗ္ဗိန္ဒော၊ သောဓေယျဇ္ဈာသယံ ကထံ။
အပ္ပဿာဒါ မဟာဒုက္ခာ၊ ကာမာ ဟိ ကဋုကပ္ဖလာ၊
ဒုဿံဟာရာ ဒုရာရက္ခာ၊ ဗဟွာဒီနဝသဏ္ဌိတာ။
အဋ္ဌိကာ ခဇ္ဇမာနာဝ၊ ဝိဃာတာယ ပဘိဇ္ဇိတာ၊
ဂယှန္တတ္တဝဓာယေတေ၊ မံသပေသီဝ ပက္ခိဘိ။
ပဋိဝါတေ တိဏုက္ကာဝ၊ ပရိဂ္ဂါဟကဒါဟိနော၊
အင်္ဂါရကာသုသင်္ကာသာ၊ သဗ္ဗင်္ဂပရိတာသကာ။
သုပိနေ ပရိဘုတ္တာဝ၊ နာလံ ကဿစိ တိတ္တိယာ၊
န တု ကဿစိ အစ္စန္တာ၊ အလင်္ကာရာဝ ယာစိတာ။
ဆဇ္ဇန္တာ ဖလရုက္ခာဝ၊ ပဋိပန္နပဘဉ္ဇိနော၊
အသိသူနူပမာ နိစ္စ-မဓိကောဋ္ဋေန္တိ ပါဏိနော။
သတ္တိသူလူပမာ ဒဠှံ၊ တဏှာသလ္လာနုဝေဓိနော၊
ဃောရာနတ္ထဝိသာကိဏ္ဏာ၊ ကဏှသပ္ပသိရူပမာ။
သဗ္ဗာသဝပရိက္လိဋ္ဌာ ¶ ၊ သဗ္ဗာသံက္လေသဝတ္ထုကာ၊
ဂမ္မာ စ စပလာ နီစာ၊ ပုထုဇ္ဇနမမာယိတာ။
ဗဟုသာဓာရဏာ စေတေ၊ သပတ္တဇနပတ္ထိတာ၊
မဟောပဒ္ဒဝုပယဋ္ဌာ၊ ဗဟွာယာသာ ဘယာဝဟာ။
မဟာရမ္ဘသမာရဒ္ဓါ၊ ခိပ္ပာကာရဝိဓံသိနော၊
သောကသလ္လံ ပဝေသေန္တာ၊ ဝိဂစ္ဆန္တိ သုဝေ သုဝေ။
နာလံ ကဿစိ တာဏာယ၊ နာလမဿာသနာယ စ၊
အဝိသာသနိယာဝဿံ၊ ကိတဝါ မာရကိံကရာ။
သတ္တာနမုပဃာတာယ ¶ ၊ မဓုရာကာရနိမ္မိတာ၊
ရက္ခသီ ဝိယ သန္တာန-မာဝိသန္တိ မနောဟရာ။
အာဝိဋ္ဌာ ယေဟိ ဒုမ္မေဓာ၊ ဗျသနာဟိတသမ္ဘဝါ၊
ဝိပလ္လာသပရာဘူတာ၊ ဗျာပဇ္ဇန္တာ ဝိဟညရေ။
စေတောသင်္ကပ္ပရစိတာ၊ နန္ဒိရာဂေါပသေဝနာ၊
မဓုလိတ္တာသိဓာရာဝ၊ ဗျာပါရေနောပသေဝိတာ။
မနောရမသုဘာကာရာ၊ ပိယရူပေါပလမ္ဘိနော၊
မိတ္တမုခံ သပတ္တာဝ၊ ဝဉ္စယန္တိ မဟာဇနံ။
ဝဉ္စိတာ ယေဟိ ဒုမ္မေဓာ၊ သဗ္ဗသမ္ပတ္တိဓံသိတာ၊
ခေမမဂ္ဂါ ပရိဗ္ဘဋ္ဌာ၊ ဓာရေန္တိ ဝဓမတ္တနော။
ဝိရူပရူပါကာရေန၊ နိမ္မထေန္တာ ပလောဘိနော၊
အဘာဝိတာနံ ဗာလာနံ၊ မာနသံ နိဟနန္တိမေ။
ယတ္ထ ရာဂသလ္လဝိဒ္ဓါ၊ သလ္လေနေဝ ဝနေ မိဂါ၊
တတ္ထ တတ္ထာနုဓာဝန္တာ၊ ဝိပ္ဖန္ဒန္တိ နိရန္တရံ။
မမံကာရေန ဝုဍ္ဎန္တာ၊ ဃောရမာသီဝိသံ ယထာ၊
ဝိဿဋ္ဌာ ဘောဂဓမ္မေသု၊ အဿာဒေန္တိ အဝိဒ္ဒသု။
အနယဗျသနာယေတေ ¶ ၊ ဝသီ ကုဗ္ဗန္တိ ပါဏိနော၊
ဝိစိတ္တာကာရသဏ္ဌာနာ၊ ပိသာစနဂရံ ယထာ။
အနတ္ထာဝဟိတာ ဗာလာ၊ ဝါဂုရံ နာဝဗုဇ္ဈရေ၊
တတ္ထေဝ ပဋိဝမန္တိ၊ ယထာ ဟညန္တိ မုစ္ဆိတာ။
သီဃဝါဟီ မဟောဃောယံ၊ က္လေသဝဋ္ဋံ မဟဗ္ဘယော၊
သကဏ္ဋကဉ္စ ဂဟနံ၊ ပင်္ကောဝ ဒုရတိက္ကမော။
စေတောသံမောဟနဋ္ဌာနံ၊ ပမာဒပဋိသန္ဓိတံ၊
ဩဟာရိ သိထိလံ စေတံ၊ ဒုပ္ပမုဉ္စဉ္စ ဗန္ဓနံ။
ဇာလံဝ ¶ ဝိတ္ထတံ လောကေ၊
မာရပါသော သမောဍ္ဍိတော၊
ပဉ္ဇရံ စာရကော စေသော၊
သတ္တာနမနယာဝဟော။
ယတ္ထာနုရာဂသမ္ဗဒ္ဓါ၊ ပလိဂုဏ္ဌိတသာယိနော၊
မက္ကဋာလေပဗဒ္ဓါဝ၊ နိတ္ထုနန္တိ ဝိဃာတိနော။
ဗဠိသံဝါမိသစ္ဆန္နံ၊ သဝိသံ ဝိယ ဘောဇနံ၊
မိဂလုဒ္ဒနိဝါပေါဝ၊ ဝိနာသာယ သမောဍ္ဍိတာ။
မီနကာ ဝင်္ကဂိဒ္ဓါဝ၊ ယေ ဂိလိတွာ ပုထုဇ္ဇနာ၊
ဃောရံ မစ္စုမုခံ ပတွာ၊ သောစန္တာပါယဘာဂိနော။
ပါပက္ခေတ္တမိဒံ ဌာနံ၊ မိစ္ဆာလောဘနိသေဝနံ၊
ဒုစ္စရီတင်္ကုရာရောဟံ၊ အပါယဖလပူရဏံ။
အဇ္ဈောသိတာ ပနေတ္ထ စ၊ လောဘမုစ္ဆာဝိဒါဟိနော၊
ကောဓူပနာဟဇလိတာ၊ ဣဿာမစ္ဆေရဓူပိတာ။
သာရမ္ဘာယုဓသန္နဒ္ဓါ၊ ဝိပ္ဖုရန္တာ မနောရထာ၊
အာဗန္ဓိစ္ဆာ မဟာကစ္ဆာ၊ ဌန္တိ လောကဝိပတ္တိယာ။
အဝဇ္ဇံ ¶ နတ္ထိ ဧတေသ-မကတ္တဗ္ဗံ န ဝိဇ္ဇတိ၊
သမ္မုဋ္ဌသစ္စတာ တေသု၊ န ပတိဋ္ဌာတိ သာဓုတာ။
ပရောပဃာတာဘိရတာ၊ ဒယာဓမ္မပရမ္မုခါ၊
သဗ္ဗသတ္တေသွဝိဿာသီ၊ သဗ္ဗတ္ထ ပရိသင်္ကိတာ။
ဘယသန္တာသဗဟုလာ၊ သဗ္ဗာနတ္ထာနုသာရိနော၊
သာဓေန္တာ စတုရာပါယံ၊ ပါပကမ္မပုရက္ခကာ။
မဟာသင်္ကဋုပဗျုဠှာ၊ ပလိဗောဓပရိပ္ဖုဋာ၊
ဟညန္တိ ဒုက္ခဓမ္မေဟိ၊ ကာမေ ဗာလာ ဘဝေပရေ။
တတော ¶ မစ္စုနိရာသင်္ကာ၊ ခိဍ္ဍာရတိဝိမောဟိတာ၊
ကိမ္ပက္ကမိဝ ဘက္ခန္တာ၊ ရမ္မကာရဝိရောဓိနော။
ဂါမသူကရပေါတာဝ၊ ကာမာသုစိပရိပ္လုတာ၊
စမရီကတကမ္မန္တာ၊ အသ္မိံ လောကေ ပလောဘိတာ။
ခဇ္ဇမာနာ ကိလေသေဟိ၊ ကိမီဟိဝ နိရန္တရံ၊
ပရိဟာနိံ ပနညာယ၊ ပရိဝါရေန္တိ မုစ္ဆိတာ။
တတော ဇရာဟိ သန္တတ္တံ၊ ယောဗ္ဗနဉ္စောပမုယှတိ၊
ကာမာ စ ပရိဟာယန္တိ၊ ဇီဝိတဉ္စောပရုဇ္ဈတိ။
ပရံ ပမာဒါဘိဝဋ္ဌာ၊ ပါပက္လေသမဟောဒကာ၊
တတော တဏှာနဒီ ပူရာ၊ ပါပေတာပါယသာဂရံ။
ဣဓလောကပရိစ္စတ္တာ၊ ပရလောကတ္ထဓံသိတာ၊
ဂင်္ဂါကုဏပကာကာဝ၊ သေန္တိ သောကပရာယဏာ။
ဣစ္စတ္တတ္ထံ ပရတ္ထဉ္စ၊ သတ္တာ ကာမနိဗန္ဓနာ၊
ဝိဒ္ဓံသေတွာ ဝိနဿန္တိ၊ ဣဓ စေဝ ပရတ္ထ စ။
ဣတိ သာဒီနဝါ ကာမာ၊ ဃောရာ သာလသိလူပမာ၊
ယတ္ထ ဗာလာ ဝိသီဒန္တိ၊ နတ္ထိ သင်္ဂေါ ဝိဇာနတံ။
ဣတ္ထံ ¶ ကာမဘယဋ္ဋာနံ၊ သိက္ခတ္တယမနုတ္တရံ၊
သမာစိက္ခိ ဝိမောက္ခာယ၊ နေက္ခမ္မမိတိ စက္ခုမာ။
သဗ္ဗာသဝဝိဃာတာယ၊ ပဋိပတ္တိ အနုတ္တရာ၊
အန္တဒွယမနာဂမ္မ၊ မဇ္ဈိမာယံ ပကာသိတာ။
သဗ္ဗဒုက္ခသမုဂ္ဃာတီ၊ ဝိသုဒ္ဓိ ပရမုတ္တမာ၊
ဝိဇ္ဇာစရဏသမ္ပတ္တိ၊ သဗ္ဗသမ္ပတ္တိသာဓိကာ။
ပုညက္ခေတ္တမိဒံ ဌာနံ၊ တပေါကမ္မနိသေဝနံ၊
သဒ္ဓါသီလင်္ကုရာရောဟံ၊ သမ္ပတ္တိဖလပူရဏံ။
က္လေသစာရကမောက္ခာယ ¶ ၊ ဒွါရမေတမနုတ္တရံ၊
မဟောဃုတ္တရဏံ ကုလ္လံ၊ သောတ္ထိ ပါရိမပါပကံ။
ပါပစောရဝိဃာတာယ၊ ခေမမဂ္ဂေါ အနုတ္တရော၊
အကဏ္ဋကော အဂဟနော၊ ဥဇု သဗ္ဘိ ပဝေဒိတော။
မဟာဗန္ဓနမောက္ခာယ၊
အဗ္ဘုတော ဇိနဃောသိတော၊
ပလိဗောဓပရိစ္စာဂေါ၊
အဗ္ဘောကာသော အလေပနော။
သင်္ဂပင်္ကသမုတ္တာရော၊ ဂန္ထာနံ ဝိနိဝေဌနံ၊
တဏှာဒါသဗျနိတ္ထာရော၊ သေရိဘာဝေါ သုခါဝဟော။
သဗ္ဗယောဂဝိသံယောဂေါ၊ သဗ္ဗသောကနိရုန္ဓနော၊
သဗ္ဗာလယဝိသင်္ခါရော၊ သဗ္ဗဒုက္ခဝိနိဂ္ဂမော။
မာရပါသသမုစ္ဆေဒီ၊ ပတ္တမေတမနုတ္တရံ၊
မောဟန္ဓကာရဝိဒ္ဓံသီ၊ ဝိဇ္ဇာလောကဝိရောစနော။
အဗျာပဇ္ဇမိဒံ ဌာန-မဘယံ နိရုပဒ္ဒဝံ၊
တပေါကမ္မာနမောကာသော၊ မာရစက္ခုဝိမောဟနော။
သဗ္ဗသန္တာပဟရဏမိဒံ သီတံဝ စန္ဒနံ၊
နိမ္မလံ ဓမ္မသလိလံ၊ သံက္လေသမလသောဓနံ။
သံသာရသေတု ¶ သုဟတာ၊ ဗောဓိပက္ခိယပတ္ထတာ၊
သောကသလ္လသမုဒ္ဓါရီ၊ ယန္တံ သုကတယောဇိတံ။
စိတ္တာတင်္ကသမုဒ္ဓံသီ၊ ပရိဘောဂသုခေါသဓံ၊
လောကာမိသာနံ ဝမနံ၊ စေတောဒေါသဝိရေစနံ။
အစ္စန္တတိတ္တိကာရဏမီရေန္တိ ဓမ္မဘောဇနံ၊
ပိပါသဟရဏံ ပါနံ၊ ဝိမုတ္တိရသပေသလံ။
ဝဏ္ဏကိတ္တိသုဂန္ဓာယ ¶ ၊ ဂုဏမာလာ သုဂန္ထိတာ၊
ပါပကောပီနဝသနံ၊ ဟိရောတ္တပ္ပဝိစိတ္တိတံ။
အစ္စန္တပရိသုဒ္ဓါ စ၊ သဒ္ဓမ္မရတနာဝလိ၊
အရိယာနမလင်္ကာရော၊ အနုပါယိ သိရိင်္ကရော။
စိန္တာနံ ဒုန္နိမိတ္တာနမိဒံ သန္တိကရံ ပရံ၊
ဝိပတ္တိပဋိဃာတာယ၊ ပရိတ္တမိဒမုတ္တမံ။
အန္တရာယဝိနာသာယ၊ မင်္ဂလံ ဇိနဒေသိတံ၊
မိစ္ဆာဂါဟဝိမောက္ခာယ၊ သောတ္ထိ သမ္ဗုဒ္ဓဘာသိတာ။
အနိဝတ္တိ စ ပစ္စက္ခမာဝေနိကမဘာရိယံ၊
အမတောသဓမစ္စန္တမဇရာမရသာဓနံ။
ယမေတံ သမဓိဋ္ဌာယ၊ သမ္ဗောဓိတ္တယမုတ္တမံ၊
ပပ္ပောန္တိ သဗ္ဗသမ္ပတ္တိဂုဏပါရမိပူရိတံ။
သဗ္ဗာကာရဝရောပေတ-မေတံ နေက္ခမ္မသမ္မတံ၊
သီလဂမ္ဘီရပရိက္ခံ၊ ဓုတင်္ဂေါဒိတတောရဏံ။
သမာဓိဝီထိဝိတ္ထိန္နံ၊ သတိပါကာရဂေါပုရံ၊
သဒ္ဓါသမိဒ္ဓိသမ္ဖုလ္လံ၊ ပညာပါသာဒသောဘိတံ။
သမ္မာဇီဝဓဇံ ရမ္မံ၊ ဟိရောတ္တပ္ပပဋိစ္ဆဒံ၊
ဝိမုတ္တာမတသမ္ဘောဂံ၊ ဝေနေယျဇနသေဝိတံ။
အဘေဇ္ဇံ ပါပဝေရီဟိ၊ ပုရံ သုဂတမာပိတံ၊
အနီတိမနုပသဂ္ဂံ၊ ပဋိပန္နာ မဟေသယော။
ပရမဿာသသမ္ပတ္တာ ¶ ၊ ပရိပုဏ္ဏမနောရထာ၊
သဗ္ဗသင်္ဂမတိက္ကမ္မ၊ နိက္ခန္တာ အကုတော ဘယာ။
သမ္မဒတ္ထမဘိညာယ၊ မစ္စုဓေယျပဟာယိနော၊
သဗ္ဗဒုက္ခောဃနိတ္တိဏ္ဏာ၊ ပါရံ ဂစ္ဆန္တိ ပဏ္ဍိတာ။
ဣတိ ¶ သဗ္ဗင်္ဂသမ္ပန္နံ၊ မဟေသိဂဏသေဝိတံ၊
နေက္ခမ္မံ ကာမနိက္ခန္တံ၊ သဒ္ဓမ္မပထမုတ္တမံ။
ဝိရာဓေန္တိ ပရာဘူတာ၊ မုစ္ဆိတာ ယေန ဒုဇ္ဇနာ၊
တံ ပါပသမုဒါစာရံ၊ ပရိယုဋ္ဌာနမဗြဝုံ။
စေတောနီဝရဏံ စေတံ၊ ပညာစက္ခုနိရောဓနံ၊
သီလောပဃာတကရဏံ၊ စိတ္တဝိက္ခေပသင်္ဂမော။
အယသာနံ ပဒဋ္ဌာနံ၊ ဂုဏတေဇဝိနာသနံ၊
သဗ္ဗသမ္ပတ္တိဒဟနံ၊ စတုရာပါယသာဓကံ။
သဗ္ဗာသဝမလောပေတော၊ သဗ္ဗောပက္လေသသဉ္စယော၊
ပါပယက္ခသမော စေသော၊ ဒေါသာသီဝိသသင်္ဂမော။
ပမာဒပထမက္ကန္တံ၊ အမိတ္တဂဏသင်္ဂမံ၊
မဟဗ္ဘယသမုဋ္ဌာနံ၊ မဟာဗျသနသင်္ကရံ။
အပါယဒုက္ခမာရုဠှံ၊ အဟိတာဝဟိတံ ပဒံ၊
သဗ္ဗာနတ္ထကရံ ဃောရံ၊ သဗ္ဗဒုက္ခဝိဓာယကံ။
ဓိရတ္ထု ပါပဓမ္မာနံ၊ သဗ္ဗကလျာဏဟာယိနံ၊
လဒ္ဓါပိ ခဏသမ္ပတ္တိ၊ ဒုလ္လဘာ ယေဟိ နာသိတာ။
တေသံ ဟိ သမုဒါစာရော၊ ဒုလ္လဘံ ဗုဒ္ဓသာသနံ၊
သမုဒ္ဓံသေတိ အသနိ၊ ယထာ ရတနပဗ္ဗတံ။
သဒ္ဓမ္မဓနစောရာ တေ၊ နေက္ခမ္မပတိဗန္ဓကာ၊
ပဋိပတ္တိံ ဝိလုမ္ပန္တာ၊ ပလိဗုန္ဓန္တိ ပါဏိနော။
ဝိဿာသိဝဓကာပေတေ၊ ဝိဿဋ္ဌာဝဿဃာတိနော၊
ယေဟိ ဗာလာဟတာ သေန္တိ၊ နိဿယေဇိနသာသနေ။
တေပိ ¶ ဝါသေန္တိ ဒုမ္မေဓာ၊ နိဿင်္ကာ မောဟပါရုတာ၊
အန္တောမနသိ ဥစ္ဆင်္ကေ၊ ဃောရမာသီဝိသံ ယထာ။
အတ္တနော ¶ စ ဝိနာသာယ၊ နိဿဋံ က္လေသပဉ္ဇရေ၊
စိနန္တာ နာဝဗုဇ္ဈန္တိ၊ ဝိပတ္တိပထယာယိနော။
ဟလာဟလံဝ ခါဒန္တာ၊ အာလိင်္ဂန္တာဝ ပါပကံ၊
အဝဿမုပဟညန္တိ၊ ပါပဓမ္မောပလာဠိနော။
ပါပစိန္တာ ပရိဗျုဠှာ၊ ဝိတက္ကမထိတာ ဇနာ၊
လောကဒွယာပိ ဓံသေန္တိ၊ အတ္ထဒွယဝိနာသိနော။
ကောဓူပနာဟိ ဝိဂစ္ဆာ၊ ဣဿာမစ္ဆေရဒူသိတာ၊
မက္ခီ ပလာသီ သာရမ္ဘီ၊ အပ္ပတိဿာ အဂါရဝါ။
မာနာတိမာနဗဟုလာ၊ မုဓာမုခရစဏ္ဍိကာ၊
ဥဒ္ဓတာ စ ပမတ္တာ စ၊ ဒဗ္ဗိတာ ကေတုဂါဟိနော။
စေတောခိလခိလဘူတာ၊ ဝိနိဗန္ဓာနုဝေဌိတာ၊
မဟောဃော ဝိယ သဿာနိ၊ ဝိနာသေန္တိ တပေါဂုဏံ။
ဝိသယဿာဒဝိက္ခိတ္တာ၊ ဝိကိဏ္ဏာ ပါကတိန္ဒြိယာ၊
မုဋ္ဌဿတီ ကုသီတာ စ၊ ဇီဝန္တိ မောဃဇီဝိတံ။
မဟဂ္ဃသာ ဗာဟုလိကာ၊ ဒုပ္ပညာ ကာယဒဠှိကာ၊
ဂန္ထနီဝရဏာဗဒ္ဓါ၊ ဣစ္ဆာလောဘဝသီကတာ။
မလဂ္ဂဟိတသန္တာနာ၊ တိရစ္ဆာနကထာရတာ၊
ဝိနယောပသမာပေတာ၊ ဝိသမာစာရဂေါစရာ။
ဒုဗ္ဘရတာ စ ဒုပ္ပောသာ၊ သုကုမာရသုခါလယာ၊
အသန္တုဋ္ဌာ မဟိစ္ဆာ စ၊ လောလုပ္ပာစာရလက္ခိတာ။
ဒုဂ္ဂန္ဓေနေဝ သုနခါ၊ အာမဂန္ဓေန မုစ္ဆိတာ၊
တတ္ထ တတ္ထာဘိဓာဝန္တာ၊ န ပတိဋ္ဌန္တိ သာသနေ။
နိလ္လဇ္ဇာ ¶ ဝီတသာရဇ္ဇာ၊ လောကဓမ္မေသု မုစ္ဆိတာ၊
ပါပိစ္ဆာ ကုဟနစ္ဆန္နာ၊ မိစ္ဆာဇီဝပလောဘိတာ။
သဌာ ¶ ပဂဗ္ဘာ မာယာဝီ၊ အန္တောပူတိ အဝဿုတာ၊
သင်္ကဿရသမာစာရာ၊ ကသမ္ဗု သိထိလာ ဇဠာ။
သိင်္ဂါရစပလာစိတ္တာ၊ ပူတိကာယာနုရာဂိနော၊
သီဒန္တာ ပလိမာပန္နာ၊ န ဝိရုဠှန္တိ သာသနေ။
ပါပပုဂ္ဂလသံသဋ္ဌာ၊ ပါပဒိဋ္ဌိပရာဂတာ၊
အသဒ္ဓါ ဓမ္မနိစ္ဆိန္နာ၊ ဒုဋ္ဌာ ဒုဗ္ဗစနိဋ္ဌုရာ။
သာမညံ ပရိဓံသေန္တာ၊ ဒူသေန္တာ ဇိနသာသနံ၊
အတိက္ကမ္မ ဇိနောဝါဒံ၊ ဗာလာ ဒုဂ္ဂတိဘာဂိနော။
ကာမဂိဒ္ဓါ ဒုရာစာရာ၊ ဒုဿီလာ မောဟပါရုတာ၊
ခဇ္ဇန္တာ ကဒ္ဒမီဘူတာ၊ ဇိနသာသနကဏ္ဋကာ။
ဟိတာဟိတမဇာနန္တာ၊ အနုရောဓဝိရောဓိနော၊
စေတောပဟတသန္တာနာ၊ ဝိပလ္လာသပလမ္ဘိတာ။
ဝိပန္နာကုလကမ္မန္တာ၊ ပါပကာရီ ပရာဇိတာ၊
သောစန္တိ ဒီဃမဒ္ဓါနံ၊ အပါယမှိ သမပ္ပိတာ။
ဣတ္ထံ ဟိတသမုစ္ဆေဒီ၊ ကုမဂ္ဂေါယံ ရဇာပထော၊
ပါပဓမ္မပ္ပဝတ္တီတိ၊ ဝိဒိတွာ ပုန ပဏ္ဍိတော။
ပရိယုဋ္ဌာနသံက္လေသံ၊ ဝိပ္ဖရန္တံ ဝိသာရဒေါ၊
ပဋိသင်္ခါယ ရုန္ဓေယျ၊ မန္တေနေဝ မဟာဝိသံ။
ခိပ္ပမာဒိတ္တစေလောဝ၊ ပါပပါဝကမုဋ္ဌိတံ၊
ဘာဝနာဇလသေကေန၊ နိဗ္ဗာပေယျ နိရန္တရံ။
အပ္ပမာဒေန မေဓာဝီ၊ နဂေနေဝ မဟာနဒိံ၊
ပါပေါဃံ ပဋိဗန္ဓန္တော၊ ပိဒဟေယျ ခဏေ ခဏေ။
သဘယံ ¶ ဝိယ ကန္တာရံ၊ ဃောရမာသီဝိသံ ယထာ၊
ပပါတမိဝ ဂမ္ဘီရံ၊ မိဠှံ ဝိယ စ ပဏ္ဍိတော။
ပဟာယ ¶ ပရိယုဋ္ဌာနံ၊ နေက္ခမ္မမဓိမုစ္စတိ၊
ကလျာဏမိတ္တော ဝဇ္ဇေသု၊ ဘယဒဿာဝိ သုဗ္ဗတော။
ကာမရာဂဝိသံယုတ္တော၊ ဘောဂဓနနိရာလယော၊
ဣစ္ဆာလောဘဝိနိမုတ္တော၊ အမမော အပရိဂ္ဂဟော။
သောရတော သခိလော သဏှော၊ မေတ္တာယန္တော ဒယာပရော၊
အနာဟဋမနော ဓီရော၊ သန္တစိတ္တော ခမာပရော။
ဟိတေသီ သဗ္ဗပါဏီနံ၊
ဣဿာမစ္ဆေရမုစ္စိတော၊
ကောဓောပနာဟဗျာပါဒ
ဝိရောဓောပသမေ ရတော။
အနောလီနမနော ယောဂီ၊ နိစ္စာရဒ္ဓပရက္ကမော၊
သုသမာဟိတသင်္ကပ္ပော၊ ဝိပ္ပသန္နော အနာဝိလော။
ဩကပ္ပေန္တော ဝိမုစ္စန္တော၊ ပညဝါ ပဋိပတ္တိယံ၊
ပိဟယန္တော မမာယန္တော၊ သမ္မာသမ္ဗုဒ္ဓသာသနံ။
ဣတိ နီဝရဏာပေတော၊ ဉာဏာလောကဇုတိန္ဓရော၊
ပူဇေတိ သမ္မာသမ္ဗုဒ္ဓံ၊ သဒ္ဓမ္မပဋိပတ္တိယာ။
ဟိရောတ္တပ္ပဂုဏောပေတော၊
ကလျာဏာစာရဂေါစရော၊
မက္ခပ္ပလာသရဟိတော၊
သပ္ပတိဿော သဂါရဝေါ။
အဇ္ဇဝါစာရစာရိတ္တော၊ မာယာသာဌေယျနိဿဋော၊
ထမ္ဘသာရမ္ဘနိဿင်္ဂေါ၊ မဒ္ဒဝါစာရပေသလော။
မာနာတိမာနဝိမုခေါ ¶ ၊ သဒ္ဓမ္မဂရုသာဒရော၊
ပရပ္ပမာဒနိမ္မဒ္ဒီ၊ သံဝေဂဗဟုလော သဒါ။
ဝေါဒါတစိတ္တသင်္ကပ္ပော ¶ ၊ ပါပိစ္ဆာမလဝဇ္ဇိတော၊
မိစ္ဆာဒိဋ္ဌိမတိက္ကန္တော၊ သဒ္ဓမ္မေသု ပတိဋ္ဌိတော။
စေတောခိလသမုစ္ဆေဒီ၊ ဝိနိဗန္ဓဝိဝေဌကော၊
မာနသံ သမ္ပဟံသေတိ၊ သံကိလေသဝိမုတ္တိယာ။
ပဝိဝိတ္တော အသံသဋ္ဌော၊ သန္တော အပ္ပိစ္ဆတာရတော၊
အရိယာဝံသာလင်္ကာရော၊ သုပ္ပောသော သုဘရော သုခီ။
သလ္လေခဝုတ္တိ ဓုတဝါ၊ ပါပါပစယတပ္ပရော၊
ပါသာဒိကသမာစာရော၊ ပသာဒဗဟုလော မုနိ။
အနုဒ္ဓတော အစပလော၊
ဒန္တော ဂုတ္တော ယတိန္ဒြိယော၊
စေတောသမာဓိဂရုကော၊
သမ္ပဇာနော သတီယုတော။
ဥဿာဟဇာတော သဒ္ဓမ္မေ၊ ဆန္ဒဇာတော နိရန္တရံ၊
သာတစ္စကာရီ သွာကာရော၊ ပဋိပတ္တိပရာယဏော။
စေတောကာဠကာပဂတော၊ ဘာဝနာရသမုတ္တမံ၊
ရင်္ဂံ နိဒ္ဓါတဝတ္ထံဝ၊ သာဓုကံ ပဋိဂဏှတိ။
ဣတိ သမ္ပာဒိတာကာရော၊ ပရိသုဒ္ဓမနောရထော၊
နိရာဒီနဝသဉ္စာရော၊ သောတ္ထိပတ္တော နိရင်္ဂဏော။
ပါပဂါဟဝိနိမုတ္တော၊ ရာဟုမုတ္တောဝ စန္ဒိမာ၊
ဂုဏရံသိပရိက္ခိတ္တော၊ သောဘေတိ ဇိနသာသနံ။
ဣစ္စာလောဘမဒေါသဉ္စ၊ မောဟာဘာဝမထာပရံ၊
နေက္ခမ္မံ ပဝိဝေကဉ္စ၊ တထာ နိဿရဏံ ဗုဓော။
သမာရဗ္ဘ ¶ ဝိသောဓေန္တော၊ အဇ္ဈာသယမသေသတော၊
ဓီရော သမ္ပဋိပါဒေတိ၊ ဘာဝနာသုခမုတ္တမံ။
တတော ¶ ပဏီတာဓိမုတ္တိ၊ ပလိဗောဓဝိနိဿဋော၊
ပရိပန္ထဝိနိမုတ္တော၊ ဝိဂတာဝရဏာလယော။
ဘာဝနာနိန္နသန္တာနော၊ ကလ္လစိတ္တော ဝိသာရဒေါ၊
ကသိဏာဒိကမာရဗ္ဘ၊ ဘာဝေယျ သမထံ ကထံ။
ပထဝီကသိဏံ တာဝ၊ ဝိဒတ္ထိစတုရင်္ဂုလံ၊
ကတွာနာရုဏဝဏ္ဏာယ၊ မတ္တိကာယ သုမဏ္ဍလံ။
ယုဂမတ္တေ ဌပေတွာန၊ ဌာနေ သုခနိသိန္နကော၊
ပထဝီတိ သမညာယ၊ ကတွာဘောဂံ တု ဘာဝယေ။
အကတေပိ ခလာဒိမှိ၊ အကိစ္ဆေနေဝ မဏ္ဍလေ၊
နိမိတ္တံ ဇာယတိစ္စာဟု၊ ပုဗ္ဗယောဂဝတော ပန။
အာပေါမဏ္ဍလမုဂ္ဂဏှေ၊ ဘာဇနာဒိဂတေ ဇလေ၊
တေဇမှိ တေဇောကသိဏံ၊ ပဋစ္ဆိဒ္ဒါဒိသံဂတေ။
သဿဂ္ဂါဒိမှိ ကမ္မန္တေ၊ ဝါယောကသိဏမဏ္ဍလံ၊
ပဋိဘာဂသမာစာရော၊ ဖုဋ္ဌဋ္ဌာနေဝ ဇာယတိ။
နီလာဒိကသိဏံ ဝတ္ထေ၊ ပုပ္ဖေ ဝါ ဝဏ္ဏဓာတုယံ၊
အာကာသမဏ္ဍလံ ဘိတ္တိ-ဆိဒ္ဒါဒိမှိ ဥပဋ္ဌိတံ။
ဆိဒ္ဒပ္ပဝိဋ္ဌမာလောကံ၊ ဥဂ္ဂဏှေယျ ပတိဋ္ဌိတံ၊
သူရိယာလောကာဒိဘေဒံ၊ ဘူမိယံ ဝါထ ဘိတ္တိယံ။
ဒသဓာ ကသိဏေသွေဝံ၊ ယတ္ထ ကတ္ထစိ ယောဂိနော၊
ပရိကမ္မံ ကရောန္တဿ၊ ဥဂ္ဂဟော နာမ ဇာယတိ။
စိတ္တဿုပဋ္ဌိတေ တသ္မိံ၊ ပဿန္တဿေဝ စက္ခုနာ၊
ဥဂ္ဂဟမှိ နိမိတ္တမှိ၊ ပဋိပါဒေယျ ဘာဝနံ။
ဝိက္ခေပံ ဝိနိဝါရေန္တော၊ ပရိပန္ထေ ဝိရာဇယံ၊
နိမိတ္တာဘိမုခေနေဝ၊ မာနသံ ပဋိပါဒယေ။
အာသေဝန္တဿ ¶ ¶ တဿေဝံ၊ စိတ္တံ ဟောတိ သမာဟိတံ၊
သံက္လေသာ သန္နိသီဒန္တိ၊ ပဋိဘာဂေါ စ ဇာယတိ။
တတ္ထ ပဏ္ဏတ္တိသင်္ခါတေ၊ နိမိတ္တေ ဘာဝနာမယေ၊
တထေဝ ပဋိဘာဂမှိ၊ တတော ယုဉ္ဇေယျ ဘာဝနံ။
တတ္ထာဓိမုတ္တော သတိမာ၊ နိမိတ္တဝိဓိကောဝိဒေါ၊
ဣန္ဒြိယာနိ သမာနေန္တော၊ သပ္ပာယမုပလက္ခယံ။
နိဂ္ဂယှ ဥဒ္ဓတံ စိတ္တံ၊ ပဂ္ဂယှ လီနမာနသံ၊
ဦဟတံ သမ္ပဟံသေန္တော၊ ဥပေက္ခန္တော သမာဟိတံ။
ရေဏုမှိ ဥပ္ပလဒလေ၊ သုတ္တေ နာဝါယ နာဠိယာ၊
ယထာ မဓုကရာဒီနံ၊ ပဝတ္တိ သမ္မ ဝဏ္ဏိတာ။
စိတ္တပဝတ္တိအာကာရံ၊ သာဓုကံ လက္ခယံ ဗုဓော၊
တထာ သမေနာကာရေန၊ ပဟိတတ္တော ပရက္ကမေ။
သမပ္ပဝတ္တမာကာရံ၊ သလ္လက္ခေတွာ နိရန္တရံ၊
ပဒဟန္တဿ တဿေဝံ၊ အပ္ပနာ နာမ ဇာယတိ။
ပဋိဘာဂနိမိတ္တံ တု၊ ဝဍ္ဎေယျ ကသိဏံ ပုန၊
ဥပစာရဘူမိယံ ဝါ၊ အပ္ပနာယံ ဝ ကတ္ထစိ။
ဧကင်္ဂုလဒွင်္ဂုလာဒိ-ဝသေနေဝ ယထာက္ကမံ၊
ဖရန္တော မနသာယေဝ၊ နိပုဏော ယာဝဒိစ္ဆကံ။
တတ္ထေဝံ ပဌမဇ္ဈာနံ၊ ပတွာန ပဂုဏံ တတော၊
ကတွာ စိဏ္ဏဝသီဘူတာ၊ တမှာ ဝုဋ္ဌာယ ပဏ္ဍိတော။
ဝိတက္ကာဒိကထူလင်္ဂံ၊ ပဟာနာယ ယထာက္ကမံ၊
တထေဝ ပဋိပဇ္ဇန္တော၊ ပပ္ပောတိ ဒုတိယာဒယော။
ဒသဓာ ကသိဏာနေဝံ၊ ဘာဝေတွာ ပန ယောဂိနော၊
စတုက္ကပဉ္စကဇ္ဈာနံ၊ ကတွာ ဝိက္ခေပနိဿဋာ။
သုပက္ခာလိတုပက္လေသာ ¶ ၊ သန္တစိတ္တာ သမာဟိတာ၊
ပဝိဝေကရသဿာဒံ၊ အနုဘောန္တိ ယထာသုခံ။
အသုဘံ ¶ ပန ဘာဝေန္တော၊ နိမိတ္တံ ယတ္ထ ကတ္ထစိ၊
ဥဒ္ဓုမာတာဒိဘေဒမှိ၊ ဥဂ္ဂဏှေယျာသုဘေ ကထံ?
ဧကာဟာဒိမတိက္ကန္တံ၊ ဥဒ္ဓုမာတကမီရိတံ၊
ဝိဂတစ္ဆဝိ ဗီဘစ္ဆံ၊ နီလာကာရံ ဝိနီလကံ။
ဝိကိဏ္ဏပုဗ္ဗကုဓိတံ၊ ပရိဘိန္နံ ဝိပုဗ္ဗကံ၊
ဝိစ္ဆေဒိတင်္ဂပစ္စင်္ဂံ၊ ဝိစ္ဆိဒ္ဒကံ ကဠေဝရံ။
ဝိဝိဓာကာရပါဏေဟိ၊ ခဇ္ဇမာနံ ဝိခါဒိတံ၊
ဝိနာသိတင်္ဂပစ္စင်္ဂံ၊ ဝိက္ခိတ္တန္တိ ပဝုစ္စတိ။
ပါဒါဒိဘင်္ဂဝိက္ခိတ္တံ၊ ဟတဝိက္ခိတ္တကံ မတံ၊
လောဟိတံ လောဟိတာကိဏ္ဏံ၊ ပုဠဝံ ကိမိသင်္ကုလံ။
အဋ္ဌိသင်္ခလိကာမတ္တံ၊ အဋ္ဌိကန္တိ စ သဗ္ဗထာ၊
သဏ္ဌာနာကာရဘေဒေန၊ ဒသဓာသုဘဒေသနာ။
တတ္ထေဝံ ဒသဓာ ဘေဒေ၊ နိဇ္ဇီဝကုဏပါသုဘေ၊
ဥဇ္ဈိတေ ဘူမိဘာဂသ္မိံ၊ မတကာယေ ကဠေဝရေ။
လဗ္ဘမာနကမာကာရံ၊ ဩလောကေတွာ သလက္ခဏံ၊
ဥဂ္ဂဟေတွာန စိတ္တေန၊ တံတံနာမေန ဘာဝယေ။
ပဋိကူလဉ္စ ဇေဂုစ္ဆံ၊ ဒုဂ္ဂန္ဓဉ္စ ဝိရူပကံ၊
ဟရာယိတမဇညဉ္စ၊ ဟီဠိတံ ဝိက္ခိတာသိဝံ။
ဣစ္စေဝမသုဘာကာရေ၊
ကတွာဘောဂံ တု ယောဂိနော၊
ဘာဝေန္တဿုပစာရော စ၊
ပဋိဘာဂေါ စ ဇာယတိ။
ပဋိဘာဂနိမိတ္တံ ¶ တု၊ ဥပစာရေန သေဝတော၊
အပ္ပေတိ ပဌမဇ္ဈာန-မေတ္ထေဝံ သမထေ နယော။
ဝိနာ ¶ သဒ္ဓမ္မံ ပနိဒံ၊ သရီရံ ဗာလနန္ဒိတံ၊
ဝိပတ္တိပရိယောသာနံ၊ အဝဿံ ဘေဒဂါမိကံ။
ယထာ ဣဒံ တထာ ဧတံ၊ ယထာ ဧတံ တထာ ဣဒံ၊
ဇီဝမာနဉ္စ နိဇ္ဇီဝမေဝ ဓမ္မပရာယဏံ။
သဘာဝေါ သောပိ ဒေဟဿ၊
သဗ္ဗဿာပိ စ သဗ္ဗထာ၊
ဝိစိတဗ္ဗာ ဓိရေနာပိ၊
ဧသာယံ နိယတာ ဂတိ။
အနိစ္စံ ခယဓမ္မဉ္စ၊ ဒုက္ခမေဝ ဘယာဝဟံ၊
အနတ္တာ စ ပရာဘူတာ၊ ဝိဗ္ဘိဇ္ဇတိ ခဏေ ခဏေ။
ဝိနာသမာနဿာကာရံ၊ တတ္ထေဝံ ပန ပဿတော၊
ဝိပဿနာဘာဝနာတိ၊ တမီရေန္တိ တထာဂတာ။
ဘာဝနံ ဒုဝိဓမ္ပေတံ၊ ဘာဝေန္တိ ပုန ပဏ္ဍိတာ၊
ဇီဝမာနေပိ ကာယမှိ၊ တံတဒါကာရသမ္ဘဝေ။
ဇီဝမာနောပိ ကာယောယံ၊
ကုဏပေါဝ သဘာဝတော၊
တမလင်္ကာရပဋိစ္ဆန္နော၊
ဗာလာနံ န ပကာသတိ။
ဗဟိ မဋ္ဌမုပဋ္ဌာတိ၊ အန္တော ကုဏပပူရိတံ၊
ဥဂ္ဃရန္တံ ပဂ္ဃရန္တံ၊ နဝဒွါရမလဿဝံ။
သရီရံ နိစ္စဒုဂ္ဂန္ဓံ၊ နာနာကိမိသမာကုလံ၊
တစမံသပဋိစ္ဆန္နံ၊ အဋ္ဌိပဉ္ဇရသဏ္ဌိတံ။
ဝစ္စကူပမိဒံ ¶ နာမ၊ ဒွတ္တိံသာသုစိပူရိတံ၊
နရာနုက္ကာရဘူမီဝ၊ နေကဝဿဂဏောစိတာ။
သုသာနဂမနောသာနံ၊ ဗဟုသာဓာရဏာသုဘံ၊
ဂဏ္ဍဘူတံ သလ္လဘူတံ၊ ဗဟုဒုက္ခနိဗန္ဓနံ။
နာနာဗျာဓိသမာကိဏ္ဏံ ¶ ၊ နာနောပဒ္ဒဝသံကုလံ၊
နာနာနတ္ထသမောဓာနံ၊ နာနာသံက္လေသဝတ္ထုကံ။
ပေါသိတမ္ပိ စိရံ ကာလံ၊ မမံကာရမမာယိတံ၊
လဟုဒုဇ္ဇနမိတ္တောဝ၊ ပီဠိတံ သမ္ပဒုဿတိ။
ပရိဟာယတိ နိဿာရံ၊ ဇရတာပိ တံ ယောဗ္ဗနံ၊
မစ္စုဘဇ္ဇိတမစ္စန္တ-မသေသံ ပရိဘိဇ္ဇတိ။
တထာပိ ဇာလသန္တာနော၊ ဗဟုသမ္ဘာရသင်္ခတော၊
ဝတ္ထာလင်္ကာရသဉ္ဆန္နော၊ မာလာဂန္ဓာဒိသောဘိတော။
သဝိညတ္တိဝိကာရေဟိ၊ ဝိစိတ္တာကာရမဏ္ဍိတော၊
ကာယော လီဠဝိလာသေဟိ၊ ပလမ္ဘေတိ မဟာဇနံ။
ဝဉ္စိတာ ယေန ဒုမ္မေဓာ၊ ကာမက္လေသမလီမယာ၊
ပူရေန္တိ စတုရာပါယံ၊ မာရဓေယျာနုသာရိနော။
ဧဝမာဒီနဝံ ဉတွာ၊ ပူတိကာယေ ဝိစက္ခဏာ၊
အသုဘာဒိကမာကာရ-မာရဗ္ဘ ဆန္ဒုပဋ္ဌဟုံ။
ယသ္မိံ ပတန္တိ ကုဏပေ ဝိပရီတသညာ၊
သံက္လေသပါပဝသဂါ ဝိသမံ စရန္တာ၊
တံ ပဿထေတမသုဘမ္ပိ ဝိနာသဓမ္မံ၊
ဣစ္စေဝမာဟ သုဂတော ဒသဓာ ဝိဘာဂံ။
သတ္ထာရာ ကသိဏဉ္စ ယံ ဒသဝိဓံ ဝိက္ခေပဝိက္ခမ္ဘနံ၊
ကာမက္လေသဝိနာသနံ ဒသဝိဓံ ယဉ္စာသုဘံ ဘာသိတံ၊
ဒိဗ္ဗဗြဟ္မသုခါဝဟံ ¶ သမပဒံ ဝိဇ္ဇောဒယံ ယောဂိနာ၊
ကမ္မဋ္ဌာနမလံ တမုတ္တမဂုဏေနာသေဝိတံ သေဝိတုံ။
ဣတိ နာမရူပပရိစ္ဆေဒေ ကသိဏာသုဘဝိဘာဂေါ နာမ
အဋ္ဌမော ပရိစ္ဆေဒေါ။