📜
၉။ နဝမော ပရိစ္ဆေဒေါ
ဒသာနုဿတိဝိဘာဂေါ
သဒ္ဓါပဗ္ဗဇိတော ¶ ယောဂီ၊ ဘာဝေန္တောနုဿတိံ ပန၊
ဒသာနုဿတိဘေဒေသု၊ ဘာဝေယျညတရံ ကထံ။
အရဟံ သုဂတော လောကေ၊ ဘဂဝါ လောကပါရဂူ၊
ဝိဇ္ဇာစရဏသမ္ပန္နော၊ ဝိမုတ္တိပရိနာယကော။
ဇေဋ္ဌော သမ္မာဘိသမ္ဗုဒ္ဓါ၊ သေဋ္ဌော ပုရိသသာရထီ၊
သတ္ထာ ဒေဝမနုဿာနံ၊ ဗုဒ္ဓါ အပ္ပဋိပုဂ္ဂလော။
သဗ္ဗလောကဟိတော ဗန္ဓု၊ သမတ္တရတနာလယော၊
သတ္တာနမနုကမ္ပာယ၊ ဇာတော နာထော သိဝံကရော။
စက္ခုမာ တိတ္ထကုသလော၊ ဓမ္မဿာမီ တထာဂတော၊
မစ္စုဓေယျဝိမောက္ခာယ၊ ပဋိပါဒယိ ပါဏိနော။
သတ္ထဝါဟော မဟာယောဂ္ဂေါ၊ မဂ္ဂါမဂ္ဂယုဓန္ဓရော၊
သိရိသတ္ထမဓိဂ္ဂယှ၊ ဝိစရိတ္ထ မဟာပထံ၊
အနောမော အသမော ဓီရော၊
လောကဟီတပရက္ကမော၊
သဗ္ဗာကာရဝရောပေတော ¶ ၊
အစ္ဆေရဗ္ဘုတပုဂ္ဂလော။
အတ္ထဘူတော ဓမ္မဘူတော၊
ဗြဟ္မဘူတော မဟာယသော၊
ဉာဏာလောကပရိစ္ဆိန္န-
ဉေယျာသေသပရိဂ္ဂဟော။
အာနုဘာဝဝသိပ္ပတ္တော၊ အာသဘဏ္ဍာနနိစ္စလော၊
မဟန္တမရိယာဒေါယမနန္တဂတိဂေါစရော။
သဗ္ဗာ ဘိညာဗလပ္ပတ္တော၊ ဝေသာရဇ္ဇဝိသာရဒေါ၊
သဗ္ဗသမ္ပတ္တိနိဋ္ဌာနော၊ ဂုဏပါရမိပူရကော။
အပ္ပမေယျော ¶ မဟာနာဂေါ၊ မဟာဝီရော မဟာမုနိ၊
မဟေသီ မဟိတာစာရော၊ မဟာမဟော မဟိဒ္ဓိကော။
သဗ္ဗတ္ထသိဒ္ဓိသဉ္စာရော၊ မဟေသီဂဏပူဇိတော၊
ရာဇာဓိရာဇမဟိတော၊ ဒေဝဗြဟ္မာဘိဝန္ဒိတော။
အဘိဘူယ တယော လောကေ၊ အာဒိစ္စောဝ နဘန္တရေ၊
ဝိရောစတိ မဟာတေဇော၊ အန္ဓကာရေ ပဘင်္ကရော။
ဗျာမပ္ပဘာပရိက္ခိတ္တော၊ ကေတုမာလာဟလင်္ကတော၊
ဒွတ္တိံသလက္ခဏာသီတိအနုဗျဉ္ဇနသောဘိတော။
ဆဗ္ဗဏ္ဏရံသိလလိတော၊ ရတနဂ္ဃိယသန္နိဘော၊
သမိဒ္ဓိရူပသောဘဂ္ဂေါ၊ ဒဿနေယျံဝ ပိဏ္ဍိတံ။
ဖုလ္လံ ပဒုမသဏ္ဍံဝ၊ ကပ္ပရုက္ခောဝလင်္ကတော၊
နဘံဝ တာရကာကိဏ္ဏံ၊ ဥတ္တမော ပဋိဒိဿတိ။
သတ္ထုကပ္ပမဟာဝီရပုတ္တေဟိ ပရိဝါရိတော၊
သဗ္ဗလောကမဟိဒ္ဓါယ၊ ဓမ္မရာဇာ သယံဝသီ။
နိဒ္ဓါတမလစန္ဒောဝ ¶ ၊ နက္ခတ္တပရိဝါရိတော၊
ခတ္တသင်္ဃပရိဗျုဠှော၊ စက္ကဝတ္တီဝ သောဘတိ။
ဣစ္စာနန္တဂုဏာကိဏ္ဏမသေသမလနိဿဋံ၊
သဗ္ဗသမ္ပတ္တိဒါတာရံ၊ ဝိပတ္တိဝိနိဗန္ဓကံ။
ဒယာပရမဟောရတ္တံ၊ ဘဂဝန္တမနုဿရံ၊
ဘာဝေတိ ပညဝါ ယောဂီ၊ ဗုဒ္ဓါနုဿတိဘာဝနံ။
သွာခါတော တေန သဒ္ဓမ္မော၊ သမ္ဗုဒ္ဓေန သတီမတာ၊
ပစ္စတ္တပဋိဝေဓေန၊ ပဿိတဗ္ဗော ယထာရဟံ။
တဏှာဒလိဒ္ဒနာသာယ၊ မနောရထသမိဒ္ဓိယာ၊
ကာလန္တရမနာဂမ္မ၊ ပစ္စက္ခဖလဒါယကော။
ဥပနိဿယဝန္တာနံ၊ ‘‘ဧဟိ ပဿာ’’တိ ဒဿိယော၊
ပစ္စတ္တမေဝ ဝိညူဟိ၊ ဝေဒိတဗ္ဗော သဘာဝတော။
သဗ္ဗာသဝသမုဂ္ဃာတီ ¶ ၊ သုဒ္ဓါ သောဝတ္ထိကော သိဝေါ၊
ပိဟိတာပါယကုမ္မဂ္ဂေါ၊ မဂ္ဂေါ နိဗ္ဗာနပတ္တိယာ။
က္လေသသံကဋဒုဂ္ဂမှာ၊ ဒုက္ခက္ခန္ဓမဟဗ္ဘယာ၊
ခေမန္တဘူမိံ နိယျာတိ၊ အစ္စန္တမနုပဒ္ဒဝံ။
ပုညတိတ္ထမိဒံ နာမ၊ မင်္ဂလဉ္စ သိဝင်္ကရံ၊
ဟိတောဒယသုခါဓာန-မမတာဟာရမုတ္တမံ။
အဝိဇ္ဇာပဋလုဒ္ဓါရဝိဇ္ဇာနေတ္တောသဓံ ဝရံ၊
ပညာဓာရမိဒံ သတ္ထံ၊ က္လေသဂဏ္ဍပ္ပဘေဒကံ။
စတုရောဃနိမုဂ္ဂါနံ၊ သေတုဗန္ဓော သမုဂ္ဂတော၊
ဘဝစာရကရုဒ္ဓါနံ၊ မဟာဒွါရော အပါရုတော။
သောကောပါယာသဝိဒ္ဓါနံ၊ ပရိဒေဝသမင်္ဂိနံ၊
သလ္လနီဟရဏောပါယော၊ အစ္စန္တသုခမီရိတော။
ဗျသနောပဒ္ဒဝါပေတော ¶ ၊ သံက္လေသမလနိဿဋော၊
ဥဇုသမ္မတ္တနိယတော၊ ပဋိပတ္တိဝိသုဒ္ဓိယာ။
သုဒ္ဓသီလပရိက္ခာရော၊ သမာဓိမယပဉ္ဇရော၊
သမ္မာသင်္ကပ္ပစက္ကင်္ဂေါ၊ သမ္မာဝါယာမဝါဟနော။
သတိသာရထိသံယုတ္တော၊ သမ္မာဒိဋ္ဌိပုရေဇဝေါ၊
ဧသ ဓမ္မရထော ယာတိ၊ ယောဂက္ခေမဿ ပတ္တိယာ။
ဝိပတ္တိပဋိဗာဟာယ၊ သဗ္ဗသမ္ပတ္တိသိဒ္ဓိယာ၊
သဗ္ဗခန္ဓဝိမောက္ခာယ၊ ဓမ္မံ ဒေသေသိ စက္ခုမာ။
ဟိတေသီ သဗ္ဗပါဏီနံ၊ ဒယာပန္နော မဟာမုနိ၊
ဓမ္မာလောကံ ပကာသေသိ၊ စက္ခုမန္တာနမုတ္တမော။
ယံ ဓမ္မံ သမ္မဒညာယ၊ ခေမမဂ္ဂပ္ပတိဋ္ဌိတာ၊
ပါပကာပဂတာ ဓီရာ၊ ပဿဒ္ဓိဒရထာသယာ။
ဘဝယောဂါ ဝိနိမုတ္တာ၊ ပဟီနဘယဘေရဝါ၊
အစ္စန္တသုခမေဓေန္တိ၊ သောတ္ထိပတ္တာ မဟေသယော။
တမေဝမုတ္တမံ ¶ ဓမ္မံ၊ စိန္တေန္တော ပန ပဏ္ဍိတော၊
ဘာဝေတီတိ ပကာသေန္တိ၊ ဓမ္မာနုဿတိဘာဝနံ။
စတ္တာရော စ ပဋိပန္နာ၊ စတ္တာရော စ ဖလေ ဌိတာ၊
ဧသ သင်္ဃော ဥဇုဘူတော၊ ပညာသီလသမာဟိတော။
ပလာပါပဂတော သုဒ္ဓါ၊ ပဋိပတ္တိပတိဋ္ဌိတော၊
ပရိဂ္ဂဟိတသဒ္ဓမ္မော၊ သမိဒ္ဓိဂုဏသောဘိတော။
ပဟီနာပါယဂမနော၊ ပါပက္လေသဝိနိဿဋော၊
ပရိပန္ထသမုစ္ဆေဒီ၊ ဘဝစာရကဘေဒကော။
ဥတ္တမဒမထပ္ပတ္တော၊ သုဝိနီတော မဟေသိနာ၊
ဝိဇ္ဇာဝိမုတ္တိဝေါဒါတော၊ အာဇာနီယပထေ ဌိတော။
သုဂတောရသိ ¶ သမ္ဘူတော၊ သုစိဓမ္မသိရိန္ဓရော၊
ပဋိပါဒိတသမ္ပတ္တော၊ ဓမ္မသာသနသေဝိတော။
ဘယဘေရဝနိဿင်္ဂေါ၊ ဇိနတေဇာနုပါလိတော၊
မောနေယျပထသဉ္စာရော၊ သုဂတောဝါဒဘာဇနော။
အပ္ပမာဒပရိတ္တာဏော၊ သီလာလင်္ကာရဘူသိတော၊
စေတောသမာဓိသန္နဒ္ဓါ၊ ပညာယုဓသမုဇ္ဇလော။
ဥဇုမဂ္ဂမဓိဋ္ဌာယ၊ မာရကာယပ္ပဒါလနော၊
အပရာဇိတသင်္ဂါမော၊ လလိတောဒါတဝိက္ကမော။
မစ္စုဓေယျမတိက္ကန္တော၊ ဗောဓိဓမ္မပ္ပတိဋ္ဌိတော၊
ဆဠာဘိညာဗလပ္ပတ္တော၊ သမာရာဓိတသာသနော။
အနုဗောဓိမနုပ္ပတ္တော၊ ပဘိန္နပဋိသမ္ဘိဒေါ၊
သာမညပါရမိပ္ပတ္တော၊ တောသေတိ ဇိနမာနသံ။
နေကာကာရဝရူပေတော၊ နာနာသမ္ပတ္တိဖုလ္လိတော၊
ဝိပတ္တိပထနိတ္တိဏ္ဏော၊ အဘိဗုဒ္ဓိပရာယဏော။
အာဟုနေယျော ¶ ပါဟုနေယျော၊
ဒက္ခိဏေယျော သုဒုလ္လဘော၊
သဒေဝကဿ လောကဿ၊
ပုညက္ခေတ္တမနုတ္တရံ။
ယတ္ထ သုဒ္ဓိမှိ နိဒ္ဒေါသေ၊ သဒ္ဓါဗီဇံ ပတိဋ္ဌိတံ၊
အစ္စန္တံ ပရိပါစေတိ၊ သမ္ပတ္တိဖလမုတ္တမံ။
ယံ ဖလံ ပရိဘုဉ္ဇန္တာ၊ ဝိမုတ္တိရသသေဝနံ၊
အစ္စန္တသုခိတာ ဓီရာ၊ ဘဝန္တိ အဇရာမရာ။
တံ ဖလံ ပတ္ထယန္တေန၊ သင်္ဃာနုဿတိဘာဝနာ၊
ဘာဝေတဗ္ဗာ ပနိစ္စေဝမိတိ ဘာသန္တိ ပဏ္ဍိတာ။
ပဉ္စသီလံ ¶ ဒသသီလံ၊ ပါတိမောက္ခမုပေါသထံ၊
စာတုပါရိသုဒ္ဓိသီလံ၊ ဓုတင်္ဂပရိဝါရိတံ။
ဧဝမေတေသု ယံ ကိဉ္စိ၊ သမာဒါယ ရဟောဂတော၊
တမာနိသံသံ ဂုဏတော၊ ဖလတော စ ဝိစိန္တယေ။
အာဒိ စေတံ ပတိဋ္ဌာ စ၊ မုခံ ပမုခမုတ္တမံ၊
မူလံ ကုသလဓမ္မာနံ၊ ပဘဝံ ပဋိပတ္တိယာ။
သာသနောတရဏဒွါရံ၊ တိတ္ထံ သဒ္ဓမ္မဝါပိယာ၊
ပါရိသုဒ္ဓိပဒဋ္ဌာနံ၊ မဂ္ဂေါ ခေမန္တပါပကော။
သာဓု သိက္ခာသမာဒါနံ၊ ဗာဟုသစ္စဝိဘူသနံ၊
အရိယာစာရစာရိတ္တ-မဝဏ္ဏမလဝဇ္ဇနံ။
ကုလပုတ္တအလင်္ကာရော၊ ပါပဇလ္လပဝါဟနံ၊
အနပါယိ သုဂန္ဓဉ္စ၊ မဟာပုရိသသေဝိတံ။
ပစ္ဆာနုတာပဟရဏံ၊ ပီတိပါမောဇ္ဇဝဍ္ဎနံ၊
နေက္ခမ္မဘာဝနောပေတံ၊ ပဗ္ဗဇ္ဇာဝေသသောဘနံ။
သောပါနံ သဂ္ဂလောကဿ၊ ဒဠှာပါယဝိဓာနကံ၊
အနုပဒ္ဒဝသမ္ပတ္တိ၊ သမတ္ထဂုဏသူဒနီ။
က္လေသပဉ္ဇရဝိစ္ဆေဒိ ¶ ၊ ဝိပတ္တိပထဝါရဏံ၊
သောတ္ထိကမ္မသမုဋ္ဌာနံ၊ အသာဓာရဏမင်္ဂလံ။
‘‘သုလဒ္ဓါ ဝတ မေ လဒ္ဓါ၊ သဒ္ဓါ သုဂတသာသနေ၊
သီလံ မေ ယဿ ကလျာဏံ၊ ပရိသုဒ္ဓမခဏ္ဍိတံ။
‘‘ဒုလ္လဘော ဝတ မေ လဒ္ဓါ၊
မဟာလာဘော အနပ္ပကော၊
ယောဟမက္ခလိတာစာရော၊
ဥပဃာတဝိဝဇ္ဇိတော။
‘‘ဓမ္မင်္ကုရိတသန္တာနော ¶ ၊ မူလဇာတောသ္မိ သာသနေ၊
ဥဇုမဂ္ဂံ သမာရုဠှော၊ ပိဟိတာ သဘယာ ဒိသာ။
‘‘အဝဉ္စာ ဝတ မေ ဇာတိ၊ အာရဒ္ဓါ ခဏသမ္ပဒါ၊
ပတိဋ္ဌိတောမှိ သဒ္ဓမ္မေ၊ သဖလံ မမ ဇီဝိတံ’’။
ဣတ္ထံ နာနပ္ပကာရေန၊ စိန္တေန္တော ဂုဏမတ္တနော၊
သီလက္ခန္ဓဿ ဘာဝေတိ၊ သီလာနုဿတိဘာဝနံ။
သဒ္ဓါယ သီလဝန္တေသု၊ ဒတွာ ဒါနံ ယထာရဟံ၊
နိဒ္ဓါတမလမစ္ဆေရော၊ ဝိဝိတ္တော တမနုဿရေ။
ဒါနံ နိဓာနမနုဂံ၊ အသာဓာရဏမုတ္တမံ၊
အဝိနာသသုခါဓာနံ၊ အစ္စန္တံ သဗ္ဗကာမဒံ။
ကောပဒါဟောပသမနံ၊ မစ္ဆေရမလသောဓနံ၊
ပမာဒနိဒ္ဒါဝုဋ္ဌာနံ၊ လောဘပါသဝိမောစနံ။
စေတောဝိကာရဒမနံ၊ မိစ္ဆာမဂ္ဂနိဝါရဏံ၊
ဝိတ္တိလာဘသုခဿာဒေါ၊ ဝိဘဝေါဒယမင်္ဂလံ။
သဒ္ဓါဒိဂုဏဝေါဒါနံ၊ အဇ္ဈာသယဝိကာသနံ၊
သတာစာရပရိက္ခာရော၊ တနုစေတောဝိဘူသနံ။
အပ္ပမညာပဒဋ္ဌာနံ၊ အပ္ပမေယျေန ဝဏ္ဏိတံ၊
မဟာပုရိသစာရိတ္တံ၊ သပဒါနံ မဟေသိနာ။
ဓမ္မာဓိဂတဘောဂါနံ ¶ ၊ သာရာဒါနမနုတ္တရံ၊
မဟတ္တာဓိဂမူပါယံ၊ လောကသန္တတိကာရဏံ။
အတ္ထကာရီ စ သမ္မာဟံ၊ ပရိစ္စာဂသမာယုတော၊
အတ္တနော စ ပရေသဉ္စ၊ ဟိတာယ ပဋိပန္နကာ။
ဥဇုမဒ္ဒဝစိတ္တောသ္မိ၊ ကာလုဿိယဝိနိဿဋော၊
ပါပသံက္လေသဝိမုခေါ၊ ပါဏဘူတာနုကမ္ပကော။
သီလဝန္တပတိဋ္ဌောသ္မိ ¶ ၊ ကပဏာနံ ပရာယဏော၊
ဗုဒ္ဓသာသနုပဋ္ဌာကော၊ ဉာတိမိတ္တောပဇီဝိကော။
ဒါနဝေါဿဂ္ဂသမ္မုခေါ၊
သံဝိဘာဂရတော သုခီ၊
ကပ္ပရုက္ခောဝ ဖလိတော၊
ဇာတော လောကာဘိဝဍ္ဎိယာ။
ပိဟိတာပါယမဂ္ဂေါသ္မိ၊ မဂ္ဂဒွါရမပါရုတံ၊
သမ္ပတ္တာ သဗ္ဗသမ္ပတ္တိ၊ ဒလိဒ္ဒဿ မနာပိကံ။
‘‘သံသာရဒ္ဓါနပါထေယျံ၊ သဗ္ဗဒုက္ခဝိနောဒနံ၊
သုဗန္ဓံ မမ သဗ္ဗတ္ထ၊ ဂဟိတော စ ကဋဂ္ဂဟော’’။
ဧဝံ ဒါနဂုဏံ နာနပ္ပကာရေန ဝိစိန္တယံ၊
ဘာဝေတိ ဒါယကောယောဂီ၊ စာဂါနုဿတိဘာဝနံ။
သဒ္ဓံ သီလံ သုတံ စာဂံ၊ ပညံ ပဏ္ဍိတဇာတိကော၊
သမ္ပာဒယိတွာ သဒ္ဓမ္မေ၊ ဒေဝတာယော အနုဿရေ။
စာတုမဟာရာဇိကာ စ၊ တာဝတိံသာ စ ယာမကာ၊
တုသိတာ စေဝ နိမ္မာနရတိနော ဝသဝတ္တိနော။
တဒုတ္တရိဉ္စ ယေ ဒေဝါ၊ ဒိဗ္ဗကာယမဓိဋ္ဌိတာ၊
တေပိ သဒ္ဓါဒိဓမ္မေသု၊ စိရကာလံ ပတိဋ္ဌိတာ။
သုသမာဟိတသင်္ကပ္ပာ၊ ဒါနသီလဓုရန္ဓရာ၊
ဓမ္မမဂ္ဂမဓိဋ္ဌာယ၊ ဟိရောတ္တပ္ပပုရက္ခတာ။
တံ ¶ လောကမုပပန္နာသေ၊ သဿိရီကံ ပရာယဏံ၊
ဣဒ္ဓိမန္တော ဇုတိမန္တော၊ ဝဏ္ဏဝန္တော ယသဿိနော။
ဒိဗ္ဗသမ္ပတ္တိသမ္ပတ္တာ၊ နာနာဘောဂသမပ္ပိတာ၊
ပါလေန္တော ဒီဃမဒ္ဓါနံ၊ အနုဘောန္တိ မဟာသုခံ။
တေ ¶ သဗ္ဗေပိ စ မယှမ္ပိ၊ ဝိဇ္ဇန္တိ အနုပါယိနော၊
သဒ္ဓါဒိကုသလာ ဓမ္မာ၊ ဒေဝဓမ္မာတိ ဝိဿုတာ။
သဒ္ဓမ္မဂုဏသမ္ပတ္တိ-ဒါတာ မင်္ဂလနာယိကာ၊
ဒုလ္လဘာပိ စ မေ လဒ္ဓါ၊ သဒ္ဓါ သုဂတသာသနေ။
ဝဇ္ဇောပဝါဒရဟိတော၊ ပါပကမ္မပရမ္မုခေါ၊
ပရိသုဒ္ဓသမာစာရော၊ ပသန္နာမလစေတနော။
နိစ္စမောဟိတသောတောသ္မိ၊
တထာဂတသုဘာသိတေ၊
သုတဘာဇနဘူတော စ၊
သတိမာ သုသမာဟိတော။
မစ္ဆေရမလနိတ္တိဏ္ဏော၊ လောဘက္ခန္ဓဝိမုစ္စိတော၊
ဩပါနဘူတော လောကသ္မိံ၊ ဝိဿဋ္ဌသုခယာစနော။
ဝတ္ထုတ္တယမဟတ္တေ စ၊ ဟိတာဟိတဝိနိစ္ဆယေ၊
ပညာ ဝတ္ထုသဘာဝေ စ၊ တိခိဏာ မမ ဝတ္တတိ။
သမာရာဓိတသဒ္ဓမ္မော၊ ကတပုညမဟုဿဝေါ၊
ဒေဝဓမ္မသမိဒ္ဓါသ္မိ၊ ကလျာဏစရိတာကရော။
ဒေဝတာဟိ သမာနောဟံ၊ ဂုဏာလင်္ကာရဘူသိတော၊
ဟတ္ထပတ္တာ စ ဒေဝိဒ္ဓိ၊ နိပ္ဖန္နာ ဒိဗ္ဗသမ္ပဒါ။
ဒေဝသာမညမိစ္စေဝံ၊ စိန္တေန္တော ဂုဏမတ္တနော၊
ဘာဝေတိ ဂုဏသမ္ပန္နော၊ ဒေဝတာနုဿတိံ ပရံ။
ဇာတိဓမ္မာ ဇရာဗျာဓိသောကောပါယာသဘဉ္ဇိတေ၊
အနိစ္စေ ဒုက္ခေနတ္တေ စ၊ နိဗ္ဗိန္နောပဓိသမ္ဘဝေ။
ဝိရာဂေါ ¶ စ နိရောဓော စ၊ စာဂေါ မုတ္တိ အနာလယော၊
ယောယမာဒါနနိဿဂ္ဂေါ၊ နိဗ္ဗာနမိတိ ဝုစ္စတိ။
ဥပသန္တမိဒံ ¶ ဌာနမိတိ စိန္တေတိ ပဏ္ဍိတော၊
အနုပါဒါနသံက္လိဋ္ဌမသင်္ခါရမနာသဝံ။
အပ္ပမာဏံ ပဏီတဉ္စ၊ သိဝံ ပရမမစ္စုတံ၊
အနန္တဂုဏမစ္စန္တ-မဝိကာရမနာမယံ။
ခေမံ တံ ပါရိမတီရ-မဟာယနကရံ ပရံ၊
တာဏံ လေဏဉ္စ ဒီပဉ္စ၊ ပတိဋ္ဌာနံ ပရာယဏံ။
ဝဋ္ဋာနုဗန္ဓဝိစ္ဆေဒေါ၊ ဘဝတဏှာဝိသောသနံ၊
သဗ္ဗူပဓိသမုဂ္ဃာတော၊ ဒုက္ခနိဗ္ဗာပနံ သုခံ။
သဗ္ဗပါပဝိနာသောယံ၊ သဗ္ဗက္လေသဝိသောဓနံ၊
သောကောပါယာသသန္တာပဘယဘေရဝမောစနံ။
ပလိဗောဓသမုစ္ဆေဒေါ၊ ပပဉ္စဝိနိဝေဌနံ၊
သဗ္ဗသင်္ခါရသမထော၊ သဗ္ဗလောကဝိနိဿဋော။
ပါရိသုဒ္ဓိကရာ ဓာတု၊ ဘဝနိဿရဏံ ပဒံ၊
ဥတ္တမာရိယသမ္ပတ္တိ၊ အနောမမမတံ ပဒံ။
သဗ္ဗထာ ဘဒ္ဒမတုလံ၊ နိဗ္ဗာနမိတိ ပဿတော၊
ဥပသမာနုဿတီတိ၊ ဘာဝနာယံ ပဝုစ္စတိ။
သတ္တာနုဿတိမိစ္စေဝံ၊ ဘာဝေန္တော ပန ပဏ္ဍိတော၊
ပါမောဇ္ဇဗဟုလော ဟောတိ၊ ပသန္နော ဗုဒ္ဓသာသနေ။
ပဋိပဿဒ္ဓဒရထ-မုပစာရသမာဓိနာ၊
သမာဓိယတိ စိတ္တဉ္စ၊ ပရိသုဒ္ဓမနာမယံ။
ဘာဝနာမယမေတဉ္စ၊ ကတွာ ပုညမနပ္ပကံ၊
ဝါသနာဂတိသမ္ပတ္တိ-ဘောဂဘာဂီတိ ဝုစ္စတိ။
ဥပနိဿယသမ္ပန္နော၊ ပတွာ နိဗ္ဗေဓမုတ္တမံ၊
ဒိဋ္ဌေဝ ဓမ္မေ ဒုက္ခဂ္ဂိံ၊ နိဗ္ဗာပေတိ အနာသဝေါ။
လောကပ္ပဝတ္တိ ¶ ¶ စိန္တေတွာ၊ မရဏာနုဿတိံ ပန၊
ဘာဝေယျ သကမစ္စန္တံ၊ စိန္တေန္တော မရဏံ ကထံ။
အနိမိတ္တမနညာတံ၊ မစ္စာနမိဓ ဇီဝိတံ၊
ကသိရဉ္စ ပရိတ္တဉ္စ၊ တဉ္စ ဒုက္ခေန သံယုတံ။
အပ္ပောဒကမှိ မစ္ဆေဝ၊ ဗန္ဓမာနေ ရုဒမ္မုခေ၊
မစ္စု ဂစ္ဆတိ အာဒါယ၊ ပေက္ခမာနေ မဟာဇနေ။
ပုရက္ခတွာဝ မရဏံ၊ ဇာယန္တိ ပဋိသန္ဓိယံ၊
ဇာတာ ပုန မရိဿန္တိ၊ ဧဝံဓမ္မာ ဟိ ပါဏိနော။
ယမေကရတ္တိံ ပဌမံ၊ ဂဗ္ဘေ ဝသတိ မာနဝေါ၊
အဗ္ဘုဋ္ဌိတောဝ သော ယာတိ၊ သ ဂစ္ဆံ န နိဝတ္တတိ။
သတ္တာ မရန္တိ ဂဗ္ဘေပိ၊ ဇာယမာနာ စ ဒါရကာ၊
ကုမာရာ ယောဗ္ဗနပ္ပတ္တာ၊ ဗလပ္ပတ္တာ မဟတ္တရာ။
အထာဝဿံ မရန္တေဝ၊ ဇိဏ္ဏာ ဒဏ္ဍပရာယဏာ၊
သူရာ ပုညဗလတ္ထာမာ၊ နာနာဗျာဓိနိပီဠိတာ။
အဇ္ဇ သုဝေတိ မရဏံ၊ ပရိယေသတိ ပါဏိနော၊
သေနာ ယုဒ္ဓပယာတာဝ၊ သဗ္ဗေ မစ္စုဘယာကုလာ။
သတ္တာရတနလင်္ကာရာ၊ စတုရိဒ္ဓိသမုဂ္ဂတာ၊
စက္ကဝတ္တီ မဟာတေဇာ၊ ရာဇမဏ္ဍလသောဘိနော။
ကပ္ပုဋ္ဌာနမဟာဝါတာ၊ ပါတိတာဝ မဟာသိလာ၊
ပတန္တိ မစ္စုဝိက္ခိတ္တာ၊ ပရော စေတာန မာနဝါ။
ယေပိ ဒီဃာယုကာ ဒေဝါ၊ ဝဏ္ဏဝန္တာ မဟိဒ္ဓိကာ၊
အာနုဘာဝဗလပ္ပတ္တာ၊ မဟာဘောဂသုခေဓိနော။
တေပိ မစ္စုသမုဒ္ဓတ္တာ၊ ဘဝန္တိ ဘယသံကုလာ၊
ဝေရမ္ဘက္ခိတ္တပက္ခီဝ၊ မာဒိသေသု ကထာဝ ကာ။
အစ္စန္တရာယဗဟုလော ¶ ၊ မရဏာဟိတသမ္ဘဝေါ၊
နိစ္စံ စက္ကသမာရုဠှော၊ လောကောယံ ပရိဝတ္တတိ။
ဧတ္ထန္တရေ ¶ မရဏဿ၊ ဝေမဇ္ဈေ မမ ဝတ္တတော၊
အဿာသေပိ အဝိဿဋ္ဌေ၊ ဇီဝိကာ စေ ကထာဝ ကာ။
အစ္ဆေရံ ဝတ လောကသ္မိံ၊ ခဏမတ္တမ္ပိ ဇီဝိတံ၊
နိဿိတောပဒ္ဒဝဋ္ဌာနေ၊ မဟာဗျသနပီဠိတေ။
အဒ္ဓုဝံ ဇီဝိတံ နိစ္စ-မစ္စန္တံ မရဏံ မမ၊
သဘာဝေါ မရဏန္တေဝ၊ ဝိသေသော ပန ဇီဝိတံ။
အတ္ထမာရဗ္ဘ ဂစ္ဆန္တော၊ အာဒိစ္စောဝ နဘန္တရေ၊
မရဏာယာဘိဓာဝန္တော၊ ဝိဟာယာမိ သုဝေ သုဝေ။
ဝဇ္ဈပ္ပတ္တော မဟာစောရော၊
နိယျာတာဃာတနံ ယထာ၊
မရဏာယ ပယာတောဟံ၊
တထေဝမနိဝတ္တိယော။
အမ္ဗုဇောဝ ဝင်္ကဃသ္တော၊ တာဏလေဏဝိဝဇ္ဇိတော၊
နိစ္စံ မစ္စုဝသံ ယန္တော၊ ဝိဿဋ္ဌော ကိမဟံ စရေ။
ကော မေ ဟာသော ကိမာနန္ဒော၊
ကိမဟံ မောဟပါရုတော၊
မဒပ္ပမာဒဝိက္ခိတ္တော၊
ဝိစရာမိ နိရင်္ကုသော?
ဟန္ဒာဟမာရဘိဿာမိ၊ သမ္မာသမ္ဗုဒ္ဓသာသနေ၊
အာတာပီ ပဟိတတ္တော စ၊ ဟိရောတ္တပ္ပသမာဟိတော။
ပဋိပတ္တိပရော ဟုတွာ၊ ပါပဓမ္မနိရင်္ကတော၊
နိဗ္ဗာပယာမိ အစ္စန္တံ၊ သဗ္ဗဒုက္ခဟုတာဝဟံ။
ဣတ္ထံ ¶ ပနတ္တနော ယောဂီ၊ မရဏံ ပဋိစိန္တယံ၊
မရဏာနုဿတိံ နာမ၊ ဘာဝေတီတိ ပဝုစ္စတိ။
တဒေတံ ¶ ပန ဘာဝေတွာ၊ ဥပစာရသမာဟိတော၊
နိဗ္ဗေဒဗဟုလော ဟောတိ၊ အပ္ပမာဒဓုရန္ဓရော။
မိစ္ဆာဓမ္မံ ဝိရာဇေတွာ၊ နန္ဒိရာဂနိရာလယော၊
သဗ္ဗာသဝပရိက္ခီဏော၊ ပပ္ပောတိ အမတံ ပဒံ။
ဂဟေတွာ ပန မေဓာဝီ၊ ဒွတ္တိံသာကာရဘာဝနံ၊
ကရေယျ တာဝ ပစ္ဆာ ဝေ၊ အနုပုဗ္ဗမဘိဏှသော။
ကေသာ လောမာ နခါ ဒန္တာ၊ တစော မံသံ နဟာရု စ၊
အဋ္ဌိ စ မိဉ္ဇ ဝက္ကံ စ၊ ဟဒယံ ယကနံ တထာ။
ကိလောမံ ပိဟက ပပ္ဖာသံ၊ အန္တံ ဂုဏမုဒရိယံ၊
မတ္ထလုင်္ဂံ ကရီသဉ္စ၊ ပိတ္တံ သေမှမထာပရံ။
ပုဗ္ဗော စ လောဟိတံ သေဒေါ၊
မေဒေါ အဿု ဝသာထ ဝါ၊
ခေဠော သိင်္ဃာဏိကာ စေဝ၊
လသိကာ မုတ္တမိစ္စပိ။
ဃနဗန္ဓသုဘာကာရ-ဝိပလ္လာသာနုသာရိနံ၊
ယထာဘူတာဝဗောဓာယ၊ ဝိဘတ္တာဝ မဟေသိနာ။
ကာယေ ဗာတ္တိံသ ကောဋ္ဌာသာ၊
ကုဏပါဝ သမုဿိတာ၊
သာရဂယှူပဂါပေတာ၊
ဓိက္ကတာ ဓီရဟီဠိတာ။
အသုဘာဝ ပဋိက္ကူလာ၊ ဇေဂုစ္ဆာ သုစိဝဇ္ဇိတာ၊
နိန္ဒိတာ စက္ခုမန္တေဟိ၊ အန္ဓဗာလောပလာဠိတာ။
ဝိစိတ္တဆဝိသဉ္ဆန္နာ ¶ ၊ တစဘတ္တသမောဟိတာ၊
ပရိဿဝပရိက္လိဋ္ဌာ၊ ကုထိတာ ပူတိဂန္ဓိတာ။
ဓောဝိယန္တာပိ ¶ သတတံ၊ အဇဟန္တာ မလဿဝံ၊
သုဂန္ဓာနုဝိလိတ္တာပိ၊ ဒုဂ္ဂန္ဓပရိဏာမိနော။
အဟံကာရမမတ္တေန၊ ဝိဿဋ္ဌသုခသင်္ဂဟာ၊
သင်္ဃာဋဃနသမ္ဗဒ္ဓါ၊ သမ္မောဟေန္တိ မဟာဇနံ။
ဆန္ဒရာဂသမူပေတာ၊ ယတ္ထ မုဠှာ ပုထုဇ္ဇနာ၊
သေဝန္တိ ဝိသမံ ဃောရံ၊ စတုရာပါယဘာဂိနော။
တတ္ထ စိတ္တံ ဝိရာဇေတုံ၊ ပဋိပန္နော ယထာက္ကမံ၊
စေတောဝိဘာဝနတ္ထာယ၊ ကောဋ္ဌာသေသု ဝိစက္ခဏော။
ဝစသာ မနသာ စေဝ၊ ယထာဝုတ္တာနုသာရတော၊
အနုလောမပဋိလောမံ၊ သဇ္ဈာယိတွာ တတော ပရံ။
ဝဏ္ဏသဏ္ဌာနဒိသတော၊ ဝဝတ္ထပေယျ ပဏ္ဍိတော၊
တတောကာသပရိစ္ဆေဒါ၊ ပစ္စေကံ တု ယထာက္ကမံ။
ဝဏ္ဏသဏ္ဌာနဂန္ဓာ စ၊
အာသယောကာသတော တတော၊
ဝိဘာဝေယျာသုဘာကာရ-
မေကေကသ္မိံ တု ပဉ္စဓာ။
ဒသဓာဘောဂမိစ္စေဝံ၊ ကတွာ ဘာဝယတော ပန၊
သန္တိဘူတာ ပကာသေန္တိ၊ ရထစက္ကာရသာဒိသာ။
ဟိတွာ အပ္ပဂုဏေ တတ္ထ၊ ဂဏှံ သုပ္ပဂုဏံ ဗုဓော၊
အပ္ပနံ ပဋိဘာဂဉ္စ၊ ပပ္ပောတေကေကဝတ္ထုသု။
အသုဘာကာရမာရဗ္ဘ၊ ဘာဝနာ စေ ပဝတ္တတိ၊
ကမ္မဋ္ဌာနံ ပဋိက္ကူလံ၊ ပဌမဇ္ဈာနိကံ သိယာ။
နီလာဒိဝဏ္ဏမာရဗ္ဘ၊ ပဋိဘာဂေါ ယဒါ တဒါ၊
နီလာဒိကသိဏံ ဟုတွာ၊ ပဉ္စကဇ္ဈာနိကံ ဘဝေ။
လက္ခဏာကာရမာရဗ္ဘ ¶ ၊ စိန္တနာ စေ ပဝတ္တတိ၊
ဝိပဿနာကမ္မဋ္ဌာန-မိတိ ဘာသန္တိ ပဏ္ဍိတာ။
တိဓာ ¶ ပဘေဒမိစ္စေဝံ၊ ဘာဝေန္တော ပုန ဗုဒ္ဓိမာ၊
ကာယဂတာသတိံ နာမ၊ ဘာဝေတီတိ ပဝုစ္စတိ။
သောယမဇ္ဈတ္တံ နိဗ္ဗိန္နော၊ ဗဟိဒ္ဓါ စ နိရာလယော၊
ဥဗ္ဗေဂဗဟုလော ယောဂီ၊ ပမာဒမတိဝတ္တတိ။
ကာမဗန္ဓဝိနိမုတ္တော၊ ပါပါ မေဓာဝိ နိဿဋော၊
သစ္ဆိကတွာန သာမညံ၊ အမတံ ပရိဘုဉ္ဇတိ။
အာနာပါနဿတိံ နာမ၊ သမ္မာသမ္ဗုဒ္ဓဝဏ္ဏိတံ၊
ကမ္မဋ္ဌာနာဓိရာဇာနံ၊ ဘာဝေန္တော ပန ပဏ္ဍိတော။
အပ္ပနဉ္စောပစာရဉ္စ၊ သမထဉ္စ ဝိပဿနံ၊
လောကုတ္တရံ လောကိယဉ္စ၊ သုခေနေဝါဓိဂစ္ဆတိ။
သုခုမာ နိပုဏာ တိက္ခာ၊ ပရိပက္ကာ ဗလေ ဌိတာ၊
ဗောဓိပက္ခိယဓမ္မာ စ၊ ဝေါဒါယန္တိ ဝိသေသတော။
ကမ္မဋ္ဌာနေ တထာ ဟေတ္ထ၊ ဂဏနာ အနုဗန္ဓနာ၊
ဖုသနာ ဌပနာ စေဝ၊ သလ္လက္ခဏဝိဝဋ္ဋနာ။
ပါရိသုဒ္ဓိ တတော ပစ္ဆာ၊ တေသဉ္စ ပဋိပဿနာ၊
ဣစ္စေဝမဋ္ဌဓာ ဘေဒါ၊ မာတိကာယံ ပကာသိတာ။
ဝိဘတ္တာ သတိပဋ္ဌာန-ဝသာ သောဠသဓာ တတော၊
အာနာပါနပ္ပဘေဒေန၊ ဘိန္နာ ဒွတ္တိံသဓာ ပုန။
တမေဝ ပရိယာဒါယ၊ သမထဉ္စ ဝိပဿနံ၊
မဟတ္တဝေပုလ္လဂတံ၊ ဘာဝေယျ သတိမာ ကထံ။
အာနာပါနံ ပရိဂ္ဂယှ၊ ပဝိဝိတ္တော ရဟောဂတော၊
ဂဏေယျ ပဌမံ တာဝ၊ နိသိန္နော သုခမာသနေ။
ပဉ္စန္နံ ¶ န ဌပေတဗ္ဗံ၊ ဟေဋ္ဌာ န ဒသတောပရိ၊
နေတဗ္ဗမနုပုဗ္ဗေန၊ ဂဏေတဗ္ဗမခဏ္ဍိတံ။
အန္တော ¶ ဗဟိ စ ဝိက္ခေပ-မကတွာန ပုနပ္ပုနံ၊
ဖုဋ္ဌဋ္ဌာနမှိ သတိမာ၊ အနုဗန္ဓေယျ မာနသံ။
နာသိကဂ္ဂေါတ္တရောဋ္ဌေ စ၊ ကတွာဘောဂံ တတောပရံ၊
သတတဿာသသမ္ဖဿံ၊ အာဝဇ္ဇန္တဿ ယောဂိနော။
ပုထုလံ ဝါထ ဒီဃံ ဝါ၊ မဏ္ဍလံ ဝါထ ဝိတ္ထတံ၊
တာရကာဒိသမာကာရံ၊ နိမိတ္တံ တတ္ထ ဇာယတိ။
စိတ္တံ သမာဟိတံ ဟောတိ၊ ဥပစာရသမာဓိနာ၊
ဥပက္လေသာ ပဟိယျန္တိ၊ ပဋိဘာဂေ သမုဋ္ဌိတေ။
နိမိတ္တေ ဌပယံ စိတ္တံ၊ တတော ပါပေတိ အပ္ပနံ၊
ပဉ္စဇ္ဈာနဝသေနာယံ၊ သမထေ ဘာဝနာနယော။
အာရဘိတွာဘိနိဝေသ-မာနာပါနေ ပုနာပရော၊
အဇ္ဈတ္တဉ္စ ဗဟိဒ္ဓါ စ၊ တတော တဒနုသာရတော။
ဘူမိဓမ္မေ ယထာဘူတံ၊ ဝိပဿိတွာ ဝိသာရဒေါ၊
အပ္ပေတာနုတ္တရဇ္ဈာန-မယံ သုဒ္ဓိဝိပဿနာ။
အာနာပါနသမာပတ္တိံ၊ ကတွာ ပါဒကမုတ္တရံ၊
ဘာဝေန္တဿ ဝသေနာဟု၊ နယံ သောဠသဓာ ကထံ။
ဒီဃမဿာသပဿာသာ၊ ရဿံ ဝါထ တထာ ဒွယံ၊
သတိမာ မတိသမ္ပန္နော၊ ပဌမံ ပရိဂဏှတိ။
အာဒိမဇ္ဈာဝသာနံ တု၊ ကရောန္တော ဝိဒိတံ တထာ၊
သမာဟိတော သဗ္ဗကာယ-ပဋိသံဝေဒိ သိက္ခတိ။
တတော တေ ဧဝ သင်္ခါရေ၊ ပဿမ္ဘေန္တောပရူပရိ၊
ဝုတ္တော ပဿမ္ဘယံ ကာယသင်္ခါရံ သိက္ခတီတိ စ။
အာနာပါနသတိစ္စေဝံ ¶ ၊ ကာယသင်္ခါရနိဿိတာ၊
ကာယာနုပဿနာ နာမ၊ စတုဓာပိ စ ဘာသိတာ။
သမ္ပယုတ္တေန ¶ ဉာဏေန၊ ပီတိမာလမ္ဗဏေန စ၊
ဝိပဿနာယ သမထေ၊ ကုဗ္ဗန္တော ပါကဋံ သုခံ။
ဝေဒနာသညာသင်္ခါတေ၊ စိတ္တသင်္ခါရကေ တထာ၊
ပီတာဒိပဋိသံဝေဒီ၊ သိက္ခတီတိ ပဝုစ္စတိ။
ထူလေ တေ ဧဝ သင်္ခါရေ၊ သမေတုံ ပရိဘာဝယံ၊
ဝုတ္တော ‘‘ပဿမ္ဘယံ စိတ္တံ၊ သင်္ခါရံ သိက္ခတီ’’တိ စ။
တဿာ တံတံမုခေနေတ္ထ၊ သမ္ပဇ္ဇနဝိသေသတော၊
ဝေဒနာနုပဿနာယ၊ စတုဓာ သမုဒီရိတာ။
အပ္ပေန္တော ပစ္စဝေက္ခန္တော၊ ဗုဇ္ဈန္တော စ ပကာသိတံ၊
ကရောန္တော မာနသံ စိတ္တ-ပဋိသံဝေဒိ သိက္ခတိ။
တမေဝါဘိပ္ပမောဒေန္တော၊ သပ္ပီတိကသမာဓိနာ၊
‘‘အဘိပ္ပမောဒယံ စိတ္တံ၊ သိက္ခတီ’’တိ ပဝုစ္စတိ။
အပ္ပနာယောပစာရေန၊ တမေဝါထ သမာဒဟံ၊
ယောဂီ ‘‘သမာဒဟံ စိတ္တံ၊ သိက္ခတီ’’တိ ပကာသိတော။
ပစ္စနီကေဟိ ဝိက္ခမ္ဘ-သမုစ္ဆေဒေဟိ မောစယံ၊
တထာ ‘‘ဝိမောစယံ စိတ္တံ၊ သိက္ခတီ’’တိပိ ဘာသိတော။
အာနာပါနံ ပဘေဒါယ၊ ကမ္မဋ္ဌာနံ ယထာရဟံ၊
စိတ္တာနုပဿနာ နာမ၊ ပဝတ္တာယံ စတုဗ္ဗိဓာ။
ဝိပဿနာယနိစ္စာနု-ဂတတ္တာ ဟိ ဝိသေသတော၊
ဝိပဿန္တော အနိစ္စာနု-ပဿီ သိက္ခတိ ပဏ္ဍိတော။
တတော ဝိရာဂါနုပဿီ၊ နိဗ္ဗိန္ဒိတွာ ဝိရာဇယံ၊
တထာ နိရောဓာနုပဿီ၊ ဘူမိဓမ္မေ နိရောဓယံ။
ပက္ခန္ဒနပရိစ္စာဂပဋိနိဿဂ္ဂတော ¶ ပန၊
ပဋိနိဿဂ္ဂါနုပဿီ၊ သိက္ခတီတိ ပဝုစ္စတိ။
အာနာပါနမုခေနေဝ ¶ ၊ ဘူမိဓမ္မဝိပဿနာ၊
ဓမ္မာနုပဿနာ နာမ၊ ဘာသိတေဝံ စတုဗ္ဗိဓာ။
ဣတိ သောဠသဓာကာရံ၊ သိက္ခတ္တယပတိဋ္ဌိတံ၊
စတုဗ္ဗိဓမ္ပိ ပူရေတိ၊ သတိပဋ္ဌာနဘာဝနံ။
ပရိဂ္ဂယှ သတိဉ္စေဝ-မုဿာဟန္တော ဝိပဿနံ၊
ဒွတ္တိံသာကာရဘေဒေဟိ၊ သတောကာရီတိ ဝုစ္စတိ။
ဣတ္ထဉ္စ ဂဏနာဒီဟိ၊ ဘာဝေတွာ သမထံ တတော၊
ဝိပဿနာဓိဝစနံ၊ ကတွာ သလ္လက္ခဏံ ပုန။
ပတွာ ဝိဝဋ္ဋနာမဂ္ဂံ၊ ပါရိသုဒ္ဓိဖလေ ဌိတော၊
ပစ္စဝေက္ခဏသင်္ခါတံ၊ ပပ္ပောတိ သတိပဿနံ။
အာနာပါနသတိစ္စေဝမသေသံ ပရိပူရိတာ၊
သာကာရံ သပ္ပဘေဒဉ္စ၊ ဘာဝိတာတိ ပဝုစ္စတိ။
အာနာပါနသမာဓိမေတမတုလံ ဗုဒ္ဓါပဒါနုတ္တမံ၊
ပါပက္လေသရဇောဟရံ သုခမုခံ ဒုက္ခဂ္ဂိနိဗ္ဗာပနံ၊
ဘာဝေတွာ သတိသမ္ပဇညဝိပုလာ ဝိက္ခေပဝိဒ္ဓံသကာ၊
ပပ္ပောန္တုတ္တရမုတ္တမာမတပဒံ ဗောဓိတ္တယဗျာပကံ။
ဗုဒ္ဓံ ဓမ္မဉ္စ သင်္ဃံ ပုထုနနမဟိတံ သုဒ္ဓသီလံ သုဒါနံ၊
ဓမ္မဋ္ဌာ ဒေဝတာယောပသမထ မရဏံ ကာယမာနဉ္စပါနံ၊
ပညတ္တာရဗ္ဘယာယံ သတိသမဝဟိတာ ဗောဓိမဂ္ဂေါဒယာယ၊
သာယံ သဒ္ဓမ္မနေတ္တီ သဟိတသိဝဂုဏာ သေဝိတဗ္ဗာဒရေန။
ဣတိ နာမရူပပရိစ္ဆေဒေ ဒသာနုဿတိဝိဘာဂေါ နာမ
နဝမော ပရိစ္ဆေဒေါ။