📜
၁၀။ ဒသမော ပရိစ္ဆေဒေါ
သေသကမ္မဋ္ဌာနဝိဘာဂေါ
ဗျာပါဒါဒီနဝံ ¶ ¶ ဒိသွာ၊ ခေမဘာဝဉ္စ ခန္တိယံ၊
အပ္ပမညာ တု ဘာဝေန္တော၊ ဝိနေယျ ပဋိဃံ ကထံ။
စေတောသန္တာပနော ကောဓော၊
သမ္ပသာဒဝိကောပနော၊
ဝိရူပဗီဘစ္ဆကရော၊
မုခဝဏ္ဏပ္ပဓံသနော။
သီလကာလုဿိယုပ္ပာဒေါ၊ စိတ္တဝိက္ခေပသမ္ဘဝေါ၊
ပညာပဇ္ဇောတဝိဒ္ဓံသီ၊ ပဋိပတ္တိဝိဗန္ဓကော။
အပါယေကာယနော မဂ္ဂေါ၊ ပါပကဏ္ဋကဗန္ဓကော၊
ဓမ္မမဂ္ဂသမုစ္ဆေဒီ၊ မဂ္ဂဒွါရပိဓာနကော။
ယသောဝဏ္ဏဝိသင်္ခါရော၊ ဂုဏမူလပ္ပဘဉ္ဇကော၊
ဒုက္ခဓမ္မသမောဓာနော၊ ဗျသနောပဒ္ဒဝါကရော။
ဒုန္နိမိတ္တမိဒံ ဇာတံ၊ သဗ္ဗသမ္ပတ္တိဓံသနံ၊
ဓူမကေတုသမုပ္ပာဒေါ၊ သဗ္ဗလောကဝိနာသကော။
သဗ္ဗကလျာဏဓမ္မာနံ၊ အဝမင်္ဂလမုဋ္ဌိတံ၊
ဟိတာရမ္ဘသမုဂ္ဃာတီ၊ အန္တရာယသမာဂမော။
သဗ္ဗာကာရပဋိက္ကူလံ၊ သဗ္ဗဝိဒ္ဒေသကာရဏံ၊
ဝိပတ္တိမုခမုပ္ပန္နံ၊ အမိတ္တဇနပတ္ထိတံ။
သပတ္တကရဏံ ¶ ဃောရံ၊ သဗ္ဗာနတ္ထဝိဓာယကံ၊
ဘယမန္တရတော ဇာတံ၊ တံ ဇနော နာဝဗုဇ္ဈတိ။
ခုရဓာရံ လိဟန္တာဝ၊ ဂိလန္တာဝ ဟုတာသနံ၊
တိတ္တလာဗုံဝ ခါဒန္တာ၊ ဂဏှန္တာဒိတ္တမာယုဓံ။
ဗျာပါဒမတ္တသမ္ဘဝ-မတ္တဃညာယ ¶ ကေဝလံ၊
ဥပလာဠေန္တိ ဒုမ္မေဓာ၊ ဃောရမာသီဝိသံ ယထာ။
ဒေါသတေဇေန ရုက္ခောဝ၊ သုသိရာရုဠှပါဝကော၊
အန္တောနုဒယှမာနာပိ၊ ဝိပ္ဖန္ဒန္တိ ဝိဃာတိနော။
နာဝဗုဇ္ဈန္တိ ဒုမ္မေဓာ၊ စေတောသင်္ကပ္ပဝါယုနာ၊
ဥက္ကာမုခါမိဝါဒိတ္တ-မုဇ္ဇလန္တာ ပုနပ္ပုနံ။
ဘယမဂ္ဂသမာရုဠှာ၊ ခေမမဂ္ဂဝိရောဓိနော၊
ဗျာပန္နာ ကိဗ္ဗိသာကိဏ္ဏာ၊ အတ္ထဒွယဝိရောဓိနော။
အနာထာ သလ္လကာဝိဒ္ဓါ၊ ဝိသဋ္ဋာ အနုသောစိနော၊
အန္ဓာ ဝိယ မိဂါရညေ၊ ဘမန္တိ ဟတစက္ခုကာ။
အသံဝိဟိတကမ္မန္တာ၊ ဗာလာ ကောဓဝသာနုဂါ၊
ခိပ္ပံ လက္ခိံ ပရိစ္စတ္တာ၊ ယသောဘောဂေဟိ ဓံသရေ။
ဒုပ္ပဋိပ္ပာဒိတာရမ္ဘာ၊ ကောဓသင်္ခေါဘမောဟိတာ၊
ဓမ္မာမတရသဿာဒံ၊ န ဝိန္ဒန္တိ အဝိဒ္ဒသု။
ဗဟွာဒီနဝမိစ္စေဝ-မန္တော ဗျာဓိမိဝုဋ္ဌိတံ၊
ဇာတာနလမိဝုစ္ဆင်္ဂေ၊ အဇ္ဈုပေက္ခန္တိ ဒုဇ္ဇနာ။
စောဒယမာနာ ဒုက္ခေဟိ၊ က္လေသာစိဏ္ဏမလီမဟာ၊
ပါပကမ္မေဟိ ပူရေန္တာ၊ သေန္တိ မစ္စုပထေ စိရံ။
တမေဝံ ပဋိသင်္ခါယ၊ ပဋိဃံ ပန ယောနိသော၊
ဝါဠမိဂံဝ ဓာဝန္တံ၊ အာဝိသန္တံဝ ရက္ခသံ။
ပါဝကံဝ ¶ ပရိဗျုဠှံ၊ ဘာယမာနဿ ယောဂိနော၊
သောတ္ထိဘာဝါယ ခေမန္တ-မုပညတ္တံ မဟေသိနာ။
မာတာ ကလျာဏဓမ္မာနံ၊ ခမာ နာမ မဟိဒ္ဓိကာ၊
သမပ္ပဝတ္တိ သတ္တေသု၊ သဗ္ဗသမ္ပတ္တိသာဓိကာ။
ကောဓာနလဇလာသေကော ¶ ၊
သောကောပါယာသနာသနံ၊
အာဃာတသလ္လနိဒ္ဓါရီ၊
ဥပနာဟဝိမောစနံ။
ဝဏ္ဏကိတ္တိသမုဋ္ဌာနံ၊ ဂုဏမူလာဘိသေဝနံ၊
အပါရုတမုခံဝေတ-မတ္ထဒွယသမိဒ္ဓိယာ။
ဝိဃာတပရိယာဒါန-မာသဝါနမသေသတော၊
ပဋိပဿမ္ဘနံ စေတော-ပီတိကရဏစန္ဒနံ။
သဗ္ဗဒုက္ခသမုဂ္ဃာတိ၊ သုခုပဋ္ဌာနမုတ္တမံ၊
ဗျသနောဒယဝိစ္ဆေဒေါ၊ ဘယဘေရဝနိဂ္ဂမော။
စေတောပသာဒသန္ဓာနော၊ ပါသာဒိကဖလာဝဟော၊
ပဝရော ဗောဓိသမ္ဘာရော၊ နရာနရနိသေဝိတော။
ပါပကန္တာရနိတ္ထာရော၊ စတုရာပါယရောဓကော၊
ဒွါရာဝါပုရဏဉ္စေတံ၊ ဒေဝလောကူပပတ္တိယာ။
ပညာသီလသမာဓာနံ၊ ပဋိပတ္တိဝိသောဓနော၊
ပိယင်္ကရော သောမ္မဘာဝေါ၊ ဒုလ္လဘော ဗဟုပတ္ထိတော။
က္လေသသင်္ခေါဘဝိက္ခေပ-ဝိပ္ဖန္ဒပဋိဗန္ဓနံ၊
တိတိက္ခာဂုဏမက္ခာတ-မာရက္ခဝိဓိမတ္တနော။
ဝိဟိံသာရတိသာရမ္ဘ-ပဋိရောဓဝိမောစနံ၊
ဝေရိကိဗ္ဗိသဝိဒ္ဓံသီ၊ လောကာနုဂ္ဂဟကာရဏံ။
ဓမ္မပဇ္ဇောတကရဏံ ¶ ၊ သံယောဂမလသောဓနံ၊
သမ္မောဟတိမိရုဒ္ဓါရိ၊ သမ္ပတ္တိပဋိပါဒနံ။
ဣစ္စတ္တတ္ထံ ပရတ္ထဉ္စ၊ သမ္ပာဒေတွာ ခမာပရော၊
သာဓေတိ သဗ္ဗသမ္ပတ္တိ-မိဓ စေဝ ပရတ္ထ စ။
တိတိက္ခာဂုဏသမ္ပန္နော ¶ ၊ ပါဏဘူတာနုကမ္ပကော၊
အနာကုလိတကမ္မန္တော၊ သောရတော သခိလော သုစိ။
နိဝါတော သမိတာစာရော၊ သုဘဂေါ ပိယဒဿနော၊
ပဋိသင်္ခါဗလပ္ပတ္တော၊ ဓိတိမာ မတိပါဋဝေါ။
အက္ခောဘော အဓိဝါသေန္တော၊
သဗ္ဗာနတ္ထေ ပရိဿယေ၊
ဘီမသင်္ဂါမာဝစရော၊
ဟတ္ထိနာဂေါဝ သောဘတိ။
ဣတ္ထံ သမန္တတော ဘဒ္ဒံ၊ တိတိက္ခံ ပစ္စဝေက္ခတော၊
ပဿမ္ဘေတိ သမုဋ္ဌာယ၊ ခမာ ဗျာပါဒသမ္ဘမံ။
ဒိဗ္ဗောသဓမိဝါတင်္ကံ၊ မေဃဇ္ဇဝံ ဟုတာသနံ၊
ခိပ္ပမန္တရဓာပေတိ၊ တိတိက္ခာ ကောဓမတ္တနော။
တတောနေကဂုဏောပေတံ၊ နေကဒေါသပ္ပဘဉ္ဇနံ၊
ခန္တိဓမ္မမဓိဋ္ဌာယ၊ ပသန္နဓီရမာနသော။
ဘာဝေယျ ပဌမံ တာဝ၊ မေတ္တာဘာဝနမုတ္တမံ၊
အတ္တာနမုပမံ ကတွာ၊ သတ္တေသု ဟိတဝုဍ္ဎိယာ။
သဗ္ဗေ သတ္တာ စ ပါဏာ စ၊ ဘူတာ ဇီဝါ စ ပုဂ္ဂလာ၊
အဗျာပဇ္ဇာ တထာဝေရာ၊ အနီဃာ စ သုခေဓိနော။
ဝိဇ္ဇာသမ္ပတ္တိဘောဂေဟိ၊ ပဝဍ္ဎန္တု ယသဿိနော၊
ပရိဝါရဗလပ္ပတ္တာ၊ ဘယောပဒ္ဒဝဝဇ္ဇိတာ။
သခိလာ ¶ သုခသမ္ဘာသာ၊ အညမညာဝိရောဓိနော၊
မောဒန္တု သုဟိတာ သဗ္ဗေ၊ မာ ကိဉ္စိ ပါပမာဂမာ။
သဒ္ဓါပါမောဇ္ဇဗဟုလာ၊ ဒါနသီလမဟုဿဝါ၊
ဂုဏဘူသိတသန္တာနာ၊ အာယုံ ပါလေန္တနာမယံ။
သမ္မာဒိဋ္ဌိံ ¶ ပုရောဓာယ၊ သဒ္ဓမ္မပဋိပတ္တိယာ၊
အာရာဓေန္တု ဟိတောပါယ-မစ္စန္တံ သုခသာဓနံ။
ဣတိ နာနပ္ပကာရေန၊ သတ္တေသု ဟိတမာနသံ၊
မာတာဝ ပိယပုတ္တမှိ၊ ပဝတ္တေယျ နိရန္တရံ။
သိနေဟံ ပရိဝဇ္ဇေန္တော၊ ဗျာပါဒဉ္စ ဝိနာသယံ၊
ပရိသုဒ္ဓေန စိတ္တေန၊ ဟိတကာမောဝ ကေဝလံ။
မေတ္တာယ မိတ္တေ မဇ္ဈတ္တေ၊ ဝေရိကေ စ ယထာက္ကမံ၊
ကရောန္တော သီမသမ္ဘေဒံ၊ အတ္တနိ စ သမံ ဖရေ။
အာသေဝန္တဿ တဿေဝံ၊ ဟိတာဘောဂသမာဟိတံ၊
သတ္တပညတ္တိမာရဗ္ဘ၊ သမာဓိယတိ မာနသံ။
တတော အနီဃော ဧကဂ္ဂေါ၊ ဥပသန္တမနောရထော၊
ဈာနတ္တိကံ စတုက္ကံ ဝါ၊ မေတ္တာစေတောဝိမုတ္တိယာ။
ဘူမိဒေသဒိသာသတ္တ-ဘေဒဘိန္နေသု ဩဓိသော၊
ယထာသမ္ဘဝမပ္ပေတိ၊ သဗ္ဗသတ္တေသွနောဓိသော။
တဒေဝမေကသတ္တမှိ၊ ပရိစ္ဆေဒနိယာမတော၊
ဗဟုကေသု စ သတ္တေသု၊ သဗ္ဗေသု စ ပဝတ္တတိ။
တထာသေဝိတသန္တာနော၊
မေတ္တာစေတောဝိမုတ္တိယာ၊
ကရုဏာဘာဝနာယောဂ-
မာရဘေယျ တတော ပရံ။
သတ္တာနံ ¶ ဒုက္ခိတာကာရ-မာဝဇ္ဇိတွာန ယောနိသော၊
‘‘အဟော ဒုက္ခာ ဝိမုစ္စန္တု၊ သဗ္ဗေ သတ္တာ’’တိ စိန္တယံ။
ကထံ မာဏဝကောယဉ္စ၊ ဘယဘေရဝကမ္ပိတော၊
ဗျသနောပဒ္ဒဝါဝိဒ္ဓါ၊ ဝိပ္ဖန္ဒတိ ဝိဃာတဝါ။
တထာ ဟေတေ ဝိမောသာယ၊ ပဋိပန္နာ ဝိရောဓိနော၊
သဗျာပဇ္ဇာ ဝိဟညန္တိ၊ စေတောဒုက္ခသမပ္ပိတာ။
အထညေ ¶ ပရိဒေဝန္တိ၊ ဝိပတ္တိဝိနိပါတိကာ၊
ပဓုပါယိကသင်္ကပ္ပာ၊ သောကောပါယာသဘာဂိနော။
အထာပရေ ပရာဘူတာ၊ ကာမက္လေသဝသီကတာ၊
မောဟန္ဓကာရပက္ခန္တာ၊ သတ္တာ ဂစ္ဆန္တိ ဒုဂ္ဂတိံ။
တေ တတ္ထ ကဋုကံ ဃောရမနုဘောန္တာ သကံ ဖလံ၊
ဒုက္ခသူလသမာဝိဒ္ဓါ၊ ဗာဟာ ပဂ္ဂယှ ကန္ဒရေ။
ဒီဃရတ္တာဓိမုတ္တာယ၊ ဒေဝလောကသမိဒ္ဓိယာ၊
ဒေဝကာယာ ဝိဟာယန္တိ၊ အကာမာ ပရိဝတ္တိနော။
စိရကာလံ ဇလိတွာန၊ သူရိယောဝ နဘန္တရေ၊
ဗြဟ္မာနောပိ ပတန္တေဝ၊ ဗြဟ္မလောကာပရာယဏာ။
ခန္ဓပဉ္စကမိစ္စေဝံ၊ ဒုက္ခာဂါရံ သမုဗ္ဗဟံ၊
နာနာဂတီသု ဝိက္ခိတ္တံ၊ ပါဏဇာတံ ဝိဟညတိ။
အနာထမနယာပန္နံ၊ ပရိဟာနိဘယာကုလံ၊
ဝါတမဏ္ဍလိကက္ခိတ္တပက္ခီဝ ပရိဝတ္တတိ။
ဣတိ ဒိသွာန သုတွာ ဝါ၊ သမ္ဘာဝေတွာန ဝါ ပုန၊
ဒုက္ခာပဂမမိစ္ဆန္တော၊ ဒုက္ခာပဂမ ပတ္ထယံ။
သုခိတေသု စ မေဓာဝီ၊ ဒုက္ခာကာရမနုဿရံ၊
ပဝတ္တေယျ ဒယာပန္နော၊ ကရုဏာဘာဝနပ္ပနံ။
‘‘အဟော ¶ သတ္တာ ဝိမုစ္စန္တု၊ ဒုက္ခဓမ္မေဟိ သဗ္ဗထာ၊
သာဓု သမေန္တုပါယာသာ၊ သောကာ စ ပရိဒေဝနာ။
‘‘ခီယန္တု ပါပဓမ္မာ စ၊ ပဿမ္ဘေန္တာမယာ တထာ၊
သံက္လေသာ ပလိဗောဓာ စ၊ သမုစ္ဆိဇ္ဇန္တု ပါဏိနံ။
‘‘ဗျာပါဒါ စ ဝိဟာယန္တု၊ ဝိနိဝတ္တန္တုပဒ္ဒဝါ၊
ဗျသနာနိ ဝိနဿန္တု၊ ဝိဂစ္ဆန္တု ဝိပတ္တိယော။
‘‘ဝိဟေသာ ¶ စ ဝိဃာတာ စ၊ ခီယန္တု ဘယဘေရဝါ၊
ပဋိက္ကမန္တု ဝိဿဋ္ဌာ၊ သောတ္ထိံ ပဿန္တု ပါဏိနော’’။
ဣစ္စေဝမနုကမ္ပန္တော၊ သဗ္ဗသတ္တေပိ သဗ္ဗထာ၊
သဗ္ဗဒုက္ခသမုဂ္ဃာတံ၊ ပတ္ထေန္တော ကရုဏာယတိ။
သောကုပ္ပတ္တံ နိဝါရေန္တော၊ ဝိဟိံသံ ဒူရတော ဟရံ၊
မေတ္တာယမိဝ ပါပေတိ၊ ကရုဏာဈာနမပ္ပနံ။
ကရုဏာနန္တရံ ယောဂီ၊ ဘာဝေယျ မုဒိတံ တတော၊
သတ္တာနံ သုခိတာကာရမာဝဇ္ဇေတွာန ယောနိသော။
ကထံ စိရာယ ဗြဟ္မာနော၊ မဟာတေဇာ မဟိဒ္ဓိကာ၊
ပီတိဘက္ခာ သုဘဋ္ဌာယီ၊ ပမောဒန္တိ နိရာမယာ။
ဒေဝကာယာ မဟာဘောဂါ၊
မဟေသက္ခာ ယသဿိနော၊
အစ္ဆရာပရိဝါရေဟိ၊
ပရိစာရေန္တိ နန္ဒနေ။
ရာဇာဘိသေကသမ္ပတ္တာ၊ ဆတ္တစာမရဘူသိတာ၊
အာဓိပ္ပစ္စမဓိဋ္ဌာယ၊ သုခိတာ ရာဇဘောဂိနော။
ယထောပဋ္ဌိတဘောဂေဟိ၊ တဒညေပိ စ ပါဏိနော၊
ယထာကာမိတနိပ္ဖန္နာ၊ မောဒန္တိ သုခပီတိကာ။
စတုရာပါယိကာ ¶ သတ္တာ၊ ပါပကမ္မပရိက္ခယာ၊
တတော စုတာဘိနန္ဒန္တိ၊ သုခဋ္ဌာနေ ပတိဋ္ဌိတာ။
သဗ္ဗာလယသမုဂ္ဃာတံ၊ ပတွာ လောကုတ္တရံ ပဒံ၊
ပဋိပဿဒ္ဓဒရထာ၊ သုခံ မောဒန္တနပ္ပကံ။
ဣတိ ဒိသွာန သုတွာ ဝါ၊ သမ္ဘာဝေတွာ ပုနပ္ပုနံ၊
သတ္တာနမဓိဝါသေန္တော၊ သုခါကာရံ ပမောဒတိ။
‘‘အဟော ¶ သာဓု အဟော သုဋ္ဌု၊
မောဒန္တိ ဝတ ပါဏိနော၊
အဟော သုလဒ္ဓံ သတ္တာနံ၊
သမိဒ္ဓိမဘိပတ္ထိတံ။
‘‘ပသန္နမုခဝဏ္ဏာ စ၊ ပရိပုဏ္ဏမနောရထာ၊
ပီတိပါမောဇ္ဇဗဟုလာ၊ စိရံ ဇီဝန္တုနာမယာ။
‘‘ဘယမဂ္ဂမတိက္ကန္တာ၊ ဒုက္ခသင်္ဃာဋနိဿဋာ၊
ခေမမဂ္ဂမနုပ္ပတ္တာ၊ ပီတိသမ္ပတ္တိဖုလ္လိတာ။
‘‘သမဂ္ဂါ သုဟိတာ စေတေ၊ ပဋိသန္ဓာနပေသလာ၊
သမ္ပတ္တိမဘိဝေဒေန္တိ၊ ကလျာဏဂုဏဘူသိတာ’’။
ဣတိ သမ္မာ ပိဟာယန္တော၊ သုခါဓိဂမသမ္ပဒံ၊
သတ္တာနမဘိရောစေန္တော၊ မုဒိတာယ သမံ ဖရံ။
ဟိတွာ ပလာသာဘိသင်္ဂံ၊ ဣဿာရတိနိရင်္ကတော၊
မေတ္တာယမိဝ ပါပေတိ၊ မုဒိတာဈာနမပ္ပနံ။
မုဒိတံ ပန ဘာဝေတွာ၊ ဘာဝေယျုပေက္ခမုတ္တမံ၊
ဝိရောဓာနုနယံ ဟိတွာ၊ ဟုတွာ မဇ္ဈတ္တမာနသော။
သဘာဝဘူတ လောကဿ၊
လာဘာလာဘံ ယသာယသံ၊
နိန္ဒာပသံသံ ¶ ပဿန္တော၊
သုခံ ဒုက္ခဉ္စ ကေဝလံ။
ကထံ ကမ္မဿကတတ္တာယံ လောကာနုပရိဝတ္တတိ၊
လောကဓမ္မေ ပရာဘူတော၊ အတ္တာဓေယျဝိဝဇ္ဇိတော။
ကိံ နာမတ္ထိ သမတ္ထေတ္ထ၊ ပဝတ္တေတုံ ယထာရုစိ၊
ကဿ ဝါ ရုစိယာ ဟောန္တိ၊ သုခိတာ ဝါထ ဒုက္ခိတာ။
ယထာပစ္စယသမ္ဘူတာ၊ သုခဒုက္ခာ ဟိ ပါဏိနော၊
န သက္ကာ ပရိဝတ္တေတုံ၊ အညေန ပုန ကေနစိ။
မိစ္ဆာမဂ္ဂမဓိဋ္ဌာယ ¶ ၊ ဝိပဇ္ဇန္တိ စ မာနဝါ၊
သမ္မာမဂ္ဂံ ပုရောဓာယ၊ သမ္ပဇ္ဇန္တိ ပုနတ္တနာ။
တတ္ထ ကာယဝသေနေတေ၊ ပရိဝတ္တန္တိ အညထာ၊
ယထာရုစိတကမ္မန္တာ၊ ပစ္စေကဝသဝတ္တိနော။
နိရတ္ထကဝိဟေသာယံ၊ မညေ လောကဝိစာရဏာ၊
သန္တမေတံ ပဏီတဉ္စ၊ ယဒိဒံ တတြုပေက္ခနံ။
အဟံ ကော နာမ ကေ စေတေ၊ ကိမဋ္ဌာနဗုဓန္တရော၊
ပရေသုပရိ ပေက္ခန္တော၊ ဝိဟညာမီတိ အတ္တနော။
သုခိတာ ဟောန္တု ဝါ မာ ဝါ၊ ဒုက္ခာ မုစ္စန္တု ဝါ န ဝါ၊
သမိဒ္ဓါ ဝါ ဒလိဒ္ဒါ ဝါ၊ ကာ မမေတ္ထ ဝိစာရဏာ။
အတ္တာနံ ပရိဟာရန္တု၊ ယထာကာမံ တု ပါဏိနော၊
ပလိဗောဓော ပပဉ္စော ဝါ၊ ဗျာပါဒေါ ဝါ န မေ တဟိံ။
ဣတိ သင်္ခါယုပေက္ခန္တော၊ ဟိတကာမောပိ ပါဏိနံ၊
အပက္ခပါတုပေက္ခာယ၊ သမံ ဖရတိ ယောနိသော။
အညာဏုပေက္ခာ နိက္ခန္တော၊ အနုရောဓံ ဝိရာဇိယ၊
မေတ္တာယမိဝ ပါပေတိ၊ ပဉ္စမဇ္ဈာနမပ္ပနံ။
အပ္ပမညာ ¶ စတဿေဝ-မာစိက္ခိ ဝဒတံ ဝရော၊
မဟာပုရိသဓောရယှော၊ ဟိတကာမော မဟာမုနိ။
န လိင်္ဂဝိသဘာဂမှိ၊ အာဒိကမ္မိကယောဂိနာ၊
ဘာဝေတဗ္ဗာ မတသတ္တေ၊ မေတ္တမေဝ န သဗ္ဗထာ။
ပတ္တဗ္ဗသမ္ပဒါကာရံ၊ ဒုက္ခာကာရဉ္စ ပါဏိသု၊
အာဝဇ္ဇံ မုဒိတာကာရမနတ္တာဓီနတံ တထာ။
အတ္တနိ ဒုဂ္ဂတေ မိတ္တေ၊ မဇ္ဈတ္တေတိ ယထာက္ကမံ၊
ပဌမံ ဘာဝနာယောဂမာရဘိတွာ တတော ပရံ။
အတ္တနိ မိတ္တေ မဇ္ဈတ္တေ၊ ဝေရိကေတိ စတူသုပိ၊
ကရောန္တော သီမသမ္ဘေဒံ၊ သဗ္ဗတ္ထ သမမာနသော။
ဘူမိကာဒိပ္ပဘေဒေဟိ ¶ ၊ ပရိစ္ဆိဇ္ဇောဓိသော တထာ၊
အပရိစ္ဆိဇ္ဇ ဝါ စေတာ၊ ဘာဝေတဗ္ဗာတိ ဘာသိတာ။
အသင်္ခေါတိတသန္တာနာ၊ တာဟိ ဘူတာနုကမ္ပကာ၊
ဝိဟရန္တုတ္တမာ ဗြဟ္မဝိဟာရာတိ တတော မတာ။
အပ္ပမာဏာလမ္ဗဏတ္တာ၊ တထာ သုပ္ပဋိပတ္တိယာ၊
သတ္တေသု အပ္ပမာဏတ္တာ၊ အပ္ပမညာတိ သမ္မတာ။
အသမ္ပတ္တဟိတာ သတ္တာ၊ ဒုက္ခိတာ လဒ္ဓသမ္ပဒါ၊
ကမ္မဿကာတိ စိန္တေတွာ၊ တတော တေသု ယထာက္ကမံ။
‘‘သမ္ပတ္တီဟိ သမိဇ္ဈန္တု၊
ဒုက္ခာ မုစ္စန္တု ပါဏိနော၊
အဟော သတ္တာ သုခပ္ပတ္တာ၊
ဟောန္တု သတ္တာ ယထာ တထာ’’။
ဣစ္စာဘိဝုဒ္ဓိမိစ္ဆန္တော၊ ဒုက္ခာပဂမနံ တထာ၊
သမိဒ္ဓေ အနုမောဒန္တော၊ ဥပေက္ခန္တော စ ပီဏိတေ။
မာတာဝ ¶ ဒဟရေ ပုတ္တေ၊ ဂိလာနေ ယောဗ္ဗနေ ဌိတေ၊
သကိစ္စပသုတေ စေဝ၊ စတုဓာ သမ္ပဝတ္တတိ။
ဣတ္ထံ စတုဓာ သတ္တေသု၊ သမ္မာ စိတ္တပဝတ္တနာ၊
သဗ္ဗထာပိ စတုဒ္ဓါဝ၊ တတော ဝုတ္တာ မဟေသိနာ။
ဣစ္စေတာ ပန ဘာဝေန္တော၊ ပသန္နမုခမာနသော၊
သုခံ သုပတိ သုတ္တောပိ၊ ပါပံ ကိဉ္စိ န ပဿတိ။
ပဋိဗုဇ္ဈတနုတြာသော၊ ဇာဂရောဝ ပမောဒတိ၊
စေတသော စ သမာဓာနံ၊ ခိပ္ပမေဝါဓိဂစ္ဆတိ။
ပရိဿယာ ပဟီယန္တိ၊ ဝိဂစ္ဆန္တိ စုပဒ္ဒဝါ၊
ဒေဝတာပိ စ ရက္ခန္တိ၊ အမုယှန္တံ အနာကုလံ။
ဖုလ္လံဝ ¶ ကမလံ ကာလေ၊ စန္ဒံဝ ဝိမလံ ဇနော၊
သောမ္မကောမလဓမ္မေဟိ၊ ပိယစက္ခူဟိ ပဿတိ။
အသံဟီရော အသံကုပ္ပော၊ သဗ္ဗာဝတ္ထာသု ပဏ္ဍိတော၊
သမံ ပဝတ္တိတာရမ္ဘော၊ လောကမေသောနုဂဏှတိ။
ခဏမတ္တောပစာရေကာ၊ ပဝတ္တေကမှိ ပုဂ္ဂလေ၊
အပ္ပမာဏာ ဖလိတွေဝ၊ ဝဏ္ဏယန္တိ မဟေသိနော။
ပဂေဝ သဗ္ဗသတ္တေသု၊ အပ္ပနာပတ္တဘာဝနာ၊
စတဿောပိ သမီဘူတာ၊ ဝသီဘူတာ နိရန္တရံ။
ပုညဓာရာဘိသန္ဒန္တာ၊ ပရိပူရေန္တိ ပဏ္ဍိတံ၊
အပ္ပမေယျမဟောဃောဝ၊ သာဂရံ ဝီစိမာလိနံ။
အပ္ပမညာမယာနံ ဟိ၊ ပုညာနံ သောဠသိံ ကလံ၊
သဗ္ဗောပဓိကပုညာနိ၊ နာဂ္ဃန္တီတိ ပကာသိတံ။
အဝဉ္ဈာ တဿ ပဗ္ဗဇ္ဇာ၊ ယဿ ဟေတာသု ဂါရဝေါ၊
သုခုမောဒဂျဗဟုလော၊ တိဿော သိက္ခာ သုသိက္ခတိ။
အမောဃံ ¶ ရဋ္ဌပိဏ္ဍဉ္စ၊ ဘုဉ္ဇတေသော ဝိသေသတော၊
တမ္ပိ မဟပ္ဖလံ ဟောတိ၊ သဒ္ဓါဒေယျံ ပတိဋ္ဌိတံ။
သဒ္ဓါဒိကုသလာ ဓမ္မာ၊ ပဝဍ္ဎန္တိ အခဏ္ဍိတာ၊
သမ္ဗုဒ္ဓိစရိယာနဉ္စ၊ မဟတ္တံ တဿ ပါကဋံ။
အကိစ္ဆပဋိဝေဓာယ၊ ပါဒကဇ္ဈာနမုတ္တမံ၊
ဥဇု စေကာယနော မဂ္ဂေါ၊ ဗြဟ္မလောကူပပတ္တိယာ။
ဝါသနာဘာဂိယာ စေတာ၊ ဗောဓိသမ္ဘာရကူလိကာ၊
သောဝဂ္ဂိကာ သုခါဟာရာ၊ လောကာရက္ခာ နိရုတ္တရာ။
အပ္ပမေယျာနိသံသေဝံ၊ အပ္ပမေယျဂုဏောဒယာ၊
အပ္ပမညာ တတော တာသု၊ န ပမဇ္ဇေယျ ပဏ္ဍိတော။
ပဋိက္ကူလံ ¶ ပနာဟာရေ၊ ဘာဝေန္တော သညမုတ္တမံ၊
ကဗဠီကာရမာဟာရ-မန္နပါနာဒိသင်္ဂဟံ။
အသိတံ ခါယိတံ ပီတံ၊ သာယိတဉ္စ ရဟောဂတော၊
ပဋိက္ကူလန္တိ စိန္တေယျ၊ ဂမနာဒိဝသာ ကထံ။
တပေါဝနမိဒံ ဟိတွာ၊ ရမဏီယမနာကုလံ၊
အာဟာရဟေတု ဂန္တဗ္ဗော၊ ဂါမော ဂါမဇနာကုလော။
တတ္ထာသုစိပရိက္လိဋ္ဌေ၊ ဒုဇ္ဇနာဝါရသင်္ကရေ၊
ဒီနမေသယတုတ္တိဋ္ဌံ၊ ဂေဟေ ဂေဟေ တု ဘောဇနံ။
တံ ခေဠမလသံက္လိဋ္ဌံ၊ ဇိဝှဂ္ဂပရိဝတ္တိတံ၊
ဒန္တစုဏ္ဏိတသမ္ဘိန္နံ၊ ဝဏ္ဏဂန္ဓံ ဝိလိဿတိ။
ပိတ္တသေမှပရိဗျုဠှံ၊ ပုဗ္ဗလောဟိတမိဿိတံ၊
ပဝိသန္တံ ပဋိက္ကူလံ၊ ဇေဂုစ္ဆံ ဓိက္ကတာသိဝံ။
ကုစ္ဆိယံ ကုဏပါကိဏ္ဏေ၊ ဒုဂ္ဂန္ဓပရိဘာဝိတေ၊
သုဝါနဝမထာကာရံ၊ ဝန္တံဝ သွာနဒေါဏိယံ။
တတ္တစန္ဒနိကာယံဝ ¶ ၊ နာနာကိမိသမာကုလေ၊
တတ္ထ ဗုဗ္ဗုဠကစ္ဆန္နံ၊ ကုထိတံ ပရိပစ္စတိ။
သံပစ္စန္တံ ပနေတဉ္စ၊ သဘာဝဉ္စ ဝိသေဝိတံ၊
ဝဍ္ဎေတိ ကေသလောမာဒိံ၊ နာနာကုဏပသဉ္စယံ။
ဝိပစ္စန္တမထောပေတမနေကောပဒ္ဒဝါဝဟံ၊
ကုဋ္ဌဂဏ္ဍကိလာသာဒိမဟာဗျာဓိသတောဒယံ။
ပူတိဘူတဉ္စ တံ ပက္က-မနေကဒွါရသဉ္စိတံ၊
မေဒပိဏ္ဍံဝ ကုထိတံ၊ ပရိဿဝတိ သန္တတံ။
ယေန ပူတိဂတော ကာယော၊ နိစ္စံ ဒုဂ္ဂန္ဓဝါယိကော၊
ဓောဝိယန္တောပိ သတတံ၊ သုစိဘာဝံ န ဂစ္ဆတိ။
ကုစ္ဆိတော ¶ သောယမာဟာရော၊
ကာယာသုစိနိသေဝနော၊
နိဿန္ဒမလနိဋ္ဌာနော၊
ဥပက္လေသဖလာဝဟော။
ကာမရာဂသမုဋ္ဌာနံ၊ ရောဂဇာတိနိဗန္ဓနံ၊
မဒပ္ပမာဒါဓိဋ္ဌာနံ၊ ပါပကမ္မမဟာပထော။
အဟိတောဒယမဂ္ဂေါယံ၊ ဘယဘေရဝသမ္ဘဝေါ၊
ဗျသနာဂမနဒွါရံ၊ အပါယာဝဟိတံ မုခံ။
စရန္တတ္တသမတ္တာဝ၊ ယတ္ထောဒရိယမုစ္ဆိတာ၊
က္လိဋ္ဌကမ္မာနိ ဒုမ္မေဓာ၊ ကရောန္တာ ဒုက္ခဘာဂိနော။
တတ္ထ စိတ္တဝိရာဂါယ၊ ကိံ ပက္ကဖလသန္နိဘေ၊
ရသဿာဒပိယာကာရေ၊ ဃောရာဒီနဝသဉ္စိတေ။
ဘာဝေန္တဿ ပဋိက္ကူလ-သညမေဝံ ဝိဘာဝိနော၊
ဥပစာရပထံ ပတွာ၊ စိတ္တံ ဟောတိ သမာဟိတံ။
သောယံ ¶ ပဿမ္ဘိတာဟာရ-
ဝိသဒေါ သော ဝိစက္ခဏော၊
မဒပ္ပမာဒနိက္ခန္တော၊
ရသဿာဒနိရာလယော။
လိမ္ပေန္တော ဝိယ ဘေသဇ္ဇ-မက္ခရဗ္ဘဉ္ဇကော ယထာ၊
ပုတ္တမံသံဝ ခါဒန္တော၊ အာဟာရံ ပရိဘုဉ္ဇတိ။
အရိယဝံသာနုပဇာတော၊
အပ္ပိစ္ဆာဒိဂုဏောဒိတော၊
ကာမဇာလံ ပဒါလေတွာ၊
သောတ္ထိံ ပပ္ပောတိ ပဏ္ဍိတော။
စတုဓာတုဝဝတ္ထာနံ၊ ဘာဝေန္တော ပန ပဉ္စဓာ၊
ဓာတုယော ပရိဂဏှေယျ၊ စတဿောပိ သဘာဝတော။
သင်္ခေပေန ¶ စ ဝိတ္ထာရာ၊ သမ္ဘာရာ စ သလက္ခဏာ၊
အဇ္ဈတ္တဉ္စ ဗဟိဒ္ဓါ စ၊ စတုဓာ ဝိဘဇေ ကထံ။
ယံ ကိဉ္စိ ကေသလောမာဒိ၊ ကက္ခဠတ္တံ ပဝုစ္စတိ၊
အဇ္ဈတ္တံ ပထဝီဓာတု၊ ဗဟိဒ္ဓါ တု တတောပရာ။
ယူသဘူတန္တိ ယံ ကိဉ္စိ၊
အာပေါဝ ပရိပါစကံ၊
တေဇော ဝါယောတိ ဂဏှေယျ၊
ဝိတ္ထမ္ဘကမသေသတော။
ဝိတ္ထာရတောပိ သမ္ဘာရာ၊ ကေသလောမာဒိ ဝီသတိ၊
ပထဝီဓာတု ပိတ္တာဒိ၊ ဒွါဒသာပေါတိ ဘာဝယေ။
တေဇေန ယေန ကာယောယံ၊ သန္တပ္ပတိ ဇိရီယတိ၊
ပရိဒယှတိ သမ္မာ စ၊ ပစ္စန္တိ အသိတာဒယော။
တဒေတံ ¶ စတုကောဋ္ဌာသံ၊ ကာယသမ္ဘဝမတ္တနော၊
တေဇောဓာတူတိ ဂဏှေယျ၊ ဝါယောဓာတူတိစာပရံ။
ဥဒ္ဓဉ္စာဓောဂမာဝါတာ၊ ကုစ္ဆိကောဋ္ဌာသယာ တထာ၊
အင်္ဂမင်္ဂါနုသာရီ စ၊ ဆဓာနာပါနမိစ္စပိ။
တံ တံ လက္ခဏမာရဗ္ဘ၊ နိဒ္ဓါရေတွာ သလက္ခဏံ၊
ပရိဂဏှေယျ သဗ္ဗတ္ထ၊ စတုဓာ ဓာတုသင်္ဂဟံ။
ဣစ္စေဝံ စတုကောဋ္ဌာသော၊
ဓာတုမတ္တော ကဠေဝရော၊
နိစ္စေတနော စ နိဿတ္တော၊
နိဿာရော ပရဘောဇနော။
ရိတ္တော တုစ္ဆော စ သုညော စ၊
ဝိဝိတ္တော စ ပဝဇ္ဇိတော၊
အတ္တာ ဝါ အတ္တနီယံ ဝါ၊
နတ္ထေဝေတ္ထ ကထဉ္စိပိ။
ကေဝလံ ¶ စေတနာဝိဒ္ဓါ၊ ကာယောယံ ပရိဝတ္တတိ၊
ကမ္ပိတော ယာယ ယန္တံဝ၊ သာဓိပ္ပာယောဝ ခါယတိ။
အာယု ဥသ္မာ စ ဝိညာဏံ၊ ယဒါ ကာယံ ဇဟန္တိမံ၊
အပဝိဒ္ဓါ တဒါ သေတိ၊ နိရတ္ထံဝ ကလိင်္ဂရံ။
ဝိပရီတံ ပပဉ္စေန္တာ၊ ဗဟုဓာ မောဟပါရုတာ၊
ယတ္ထ မိစ္ဆာဝိပလ္လာသပရာဘူတာ ပုထုဇ္ဇနာ။
သံသာရဒ္ဓါနကန္တာရံ၊ စတုရာပါယသင်္ကရံ၊
ဗျသနေကာယနောပါယံ၊ နာတိဝတ္တန္တိ ဒုဇ္ဇနာ။
သောယမေဝံ စတုဒ္ဓါတိ၊
ဓာတုဘေဒေန ပဿတော၊
တဿောပစာရိကော ¶ နာမ၊
သမထော ဟောတိ စေတသိ။
ဣတ္ထံ ဓာတုဝဝတ္ထာနံ၊ ကတွာ တဒနုသာရတော၊
ဥပါဒါရူပဓမ္မေ စ၊ နာမဓမ္မေ စ သဗ္ဗထာ။
ဘူမိဘူတေ ပရိဂ္ဂယှ၊ ပဿန္တော ပစ္စယဋ္ဌိတိံ၊
အဇ္ဈတ္တဉ္စ ဗဟိဒ္ဓါ စ၊ ဝိပဿန္တောဒယဗ္ဗယံ။
ယထာဘူတမဘိညာယ၊ နိဗ္ဗိန္ဒန္တော ဝိရဇ္ဇတိ၊
ဝိရာဂါ စ ဝိမုစ္စိတွာ၊ ပါရဂူတိ ပဝုစ္စတိ။
အာရုပ္ပံ ပန ဘာဝေန္တော၊ ကမ္မဋ္ဌာနမနာဝိလံ၊
စတုက္ကပဉ္စကဇ္ဈာနံ၊ ပတွာ ကသိဏမဏ္ဍလေ။
ပရိစိဏ္ဏဝသီဘူတာ၊ ဈာနာ ဝုဋ္ဌာယ ပဉ္စမာ၊
စိန္တေတိ ဒဏ္ဍာဒါနာဒိရူပဒေါသမဘိဏှသော။
နိဗ္ဗိန္ဒန္တော တတော ရူပေ၊ တဒါကာရေ စ ဂေါစရေ၊
တဒါလမ္ဗဏဓမ္မေ စ၊ ပတ္ထေန္တော သမတိက္ကမံ။
ပတ္ထရိတွာန ယံ ကိဉ္စိ၊ အာကာသကသိဏံ ဝိနာ၊
ဥဂ္ဃာဋေတိ တမေဝါထ၊ ကသိဏံ ဓိတိမာ သတော။
န ¶ တံ မနသိ ကရောတိ၊ နာဝဇ္ဇတိ န ပေက္ခတိ၊
စိန္တာဘောဂဝိနိမုတ္တော၊ ကသိဏံ ပတိ သဗ္ဗထာ။
တဒပ္ပာယသမညာတမာကာသံ ပတိ မာနသံ၊
သာဓုကံ ပဋိပါဒေတိ၊ ယောနိသော ပဋိစိန္တယံ။
တဿာဝဇ္ဇနသမ္ပန္နံ၊ ဥပါယပဋိပါဒိတံ၊
ကသိဏာပဂမာကာသံ၊ စိန္တနာရဗ္ဘ ဝတ္တတိ။
ဣတ္ထမန္တရဓာပေတွာ၊ ကသိဏံ တု တတော ပရံ၊
သဗ္ဗာဝန္တမနန္တရံ၊ ဖရတာကာသဂေါစရံ။
တတ္ထ ¶ ဝုတ္တနယေနေဝ၊ ဘာဝေန္တဿောပစာရတော၊
ပဌမာရုပ္ပမပ္ပေတိ၊ အာကာသာနန္တဂေါစရေ။
တတော တမှာ ဝသီဘူတာ၊ ဝုဋ္ဌဟိတွာ ဝိစိန္တယံ၊
‘‘အာသန္နရူပါဝစရဇ္ဈာနပစ္စတ္ထိက’’န္တိ တံ။
နိကန္တိံ ပရိယာဒါယ၊ တမှာ အာကာသဂေါစရာ၊
အပ္ပေတုံ ဒုတိယာရုပ္ပ-မတိသန္တန္တိ ဂစ္ဆတိ။
ပဌမာရုပ္ပဝိညာဏ-မနန္တံ ဖရတော တတော၊
ဒုတိယာရုပ္ပမပ္ပေတိ၊ ဝိညာဏာနန္တဂေါစရေ။
ပဌမာရုပ္ပဝိညာဏ-မဘာဝေန္တော တတော ပရံ၊
အပ္ပေတိ တတိယာရုပ္ပ-မာကိဉ္စညမှိ ဂေါစရေ။
တတော စ တတိယာရုပ္ပံ၊ ‘‘သန္တမေတ’’န္တိ ပဿတော၊
စတုတ္ထာရုပ္ပမပ္ပေတိ၊ တတိယာရုပ္ပဂေါစရေ။
ဂူထမှိ မဏ္ဍပေ လဂ္ဂေါ၊ ဧကော တန္နိဿိတောပရော၊
ဧကော ဗဟိ အနိဿာယ၊ တံ တံ နိဿာယ စာပရော။
ဌိတော စတူဟိ ဧတေဟိ၊ ပုရိသေဟိ ယထာက္ကမံ၊
သမာနတာယ ဉာတဗ္ဗာ၊ စတဿောပိ ဝိဘာဝိနာ။
ဣစ္စာလမ္ဗဏဘေဒေဟိ ¶ ၊ စတုဓာရုပ္ပဘာဝနာ၊
အင်္ဂဘေဒံ ပနေတာသံ၊ န ကထေန္တိ တထာပိ စ။
သုပ္ပဏီတတရာ ဟောန္တိ၊ ဥဒ္ဓမုဒ္ဓံ ယထာက္ကမံ၊
စာတုမဟာရာဇိကာဒိဒိဗ္ဗသမ္ပတ္တိယော ယထာ။
အာနေဉ္ဇမိတိ ဘာဝေတွာ၊ သမာပတ္တိံ စတုဗ္ဗိဓံ၊
သုသမာဟိတသင်္ကပ္ပော၊ သမ္ပန္နာစလမာနသော။
ဝိပဿန္တော ယထာဘူတံ၊ သစ္ဆိကတွာ ဖလုတ္တမံ၊
ဥဘတောဘာဂဝိမုတ္တော၊ အရဟာတိ ပဝုစ္စတိ။
ကမ္မဋ္ဌာနဝိဓိံ ¶ ဉတွာ၊ စတ္တာလီသဝိဓံ တတော၊
အဘိညာယောပိ ဝိညေယျာ၊ သမထေ ဘာဝနာနယေ။
ဣဒ္ဓိဝိဓာ ဒိဗ္ဗသောတာ၊ စေတောပရိယဇာနနာ၊
ပုဗ္ဗေနိဝါသာနုဿတိ၊ ဒိဗ္ဗစက္ခု တထာပရာ။
စေတောသမာဓိနိဿဋ္ဌာ၊ ပဉ္စာဘိညာ ပကာသိတာ၊
ရူပါဝစရဓမ္မာဝ၊ ပဉ္စမဇ္ဈာနဘူမိကာ။
ဗဟုဘာဝါဒိဓိဋ္ဌာနံ၊ ကောမာရာဒိဝိကုဗ္ဗနာ၊
မနောမယာဘိနိမ္မာနမိစ္စေဝံ တိဝိဓိဒ္ဓိယော။
ဒိဗ္ဗေ စ မာနုသေ သဒ္ဒေ၊
တထာ ဒူရေ စ သန္တိကေ၊
သုဏန္တိ ယာယ သာ ဒိဗ္ဗာ၊
သောတဓာတူတိ ဘာသိတာ။
စေတောပရိယဉာဏန္တိ၊ ပရပုဂ္ဂလစေတသော၊
သရာဂဝီတရာဂါဒိပရိစ္ဆေဒကမီရိတံ။
ပုဗ္ဗေနိဝုတ္ထခန္ဓာနုဿရဏေ ဉာဏမီရိတံ၊
ပုဗ္ဗေနိဝါသာနုဿတိဉာဏ နာမေန တာဒိနာ။
စဝမာနေ စ ဇာယန္တေ၊ သတ္တေ ရူပမရူပကံ၊
တထာ မာနုသကံ ရူပံ၊ ထူလံ သုခုမ သန္တိကံ။
ဒူရေ ¶ ပကာသံ ဆန္နဉ္စ၊ ယေန ပဿန္တိ ယောဂိနော၊
စုတူပပါတဉာဏံ တံ၊ ဒိဗ္ဗစက္ခူတိ ဝုစ္စတိ။
အနာဂတံသဉာဏဉ္စ၊ ယထာကမ္မုပဂံ တထာ၊
တန္နိဿိတတ္တာ ဂစ္ဆန္တိ၊ ဒိဗ္ဗစက္ခုမှိ သင်္ဂဟံ။
ဣတိ ပဉ္စဝိဓံ ပတ္တုမဘိညံ ပန ပဏ္ဍိတော၊
ကတွာန ပဉ္စမဇ္ဈာနေ၊ ပဉ္စဓာ ဝသိတံ စိဒံ။
တထာ ¶ သမာဟိတေ စိတ္တေ၊ ပရိသုဒ္ဓေ နိရင်္ဂဏေ၊
မုဒုဘူတေ ကမ္မနိယေ၊ အာနေဉ္ဇမှိ ပတိဋ္ဌိတေ။
အဘိညာပါဒကဇ္ဈာနာ၊ တတော ဝုဋ္ဌာယ ပဉ္စမာ၊
အဘိညာပရိကမ္မာယ၊ နိန္နာမေယျာထ မာနသံ။
အဓိဋ္ဌေယျာဒိကံ တံ တမာဝဇ္ဇိတွာ ယထာရဟံ၊
ပရိကမ္မံ ကရိတွာန၊ သမာပဇ္ဇေယျ ပါဒကံ။
ပုနဒေဝ စ ဝုဋ္ဌာယ၊ ပရိကမ္မံ ယထာ ပုရေ၊
ကရောန္တဿ ပနပ္ပေတိ၊ အဘိညာဏေန ပဉ္စမံ။
အဓိဋ္ဌန္တံ ဝိကုဗ္ဗန္တံ၊ နိမ္မိနန္တံ ယထာရဟံ၊
သဒ္ဒေ သုဏန္တံ သတ္တာနံ၊ ပရိဇာနဉ္စ မာနသံ။
သရံ ပုဗ္ဗေနိဝါသဉ္စ၊ ပဿံ သုဂတိဒုဂ္ဂတိံ၊
ယထာကမ္မံ ဝိပါကဉ္စ၊ ပဇာနန္တမနာဂတံ။
ယထာသမ္ဘဝမိစ္စေဝမုပါယကုသလော မုနိ၊
ဥပနိဿယသမ္ပန္နော၊ အဘိညမဓိဂစ္ဆတိ။
ပတ္တာဘိညော မဟာယောဂီ၊ ပရိယောဒါတမာနသော၊
ပရိပက္ကေန ဉာဏေန၊ ဝိပဿိတွာ တိလက္ခဏံ။
လဒ္ဓါသဝက္ခယံ ဉာဏံ၊ ဆဓာဘိညမနုတ္တရံ၊
မဟာခီဏာသဝေါ နာမ၊ ဆဠဘိညော ပဝုစ္စတိ။
စတ္တာလီသဝိဓံ ¶ ပနိတ္ထမမလောစေတောမလက္ခာလနံ၊
ကမ္မဋ္ဌာနနယံ ယမာဟ သုဂတော သမ္မာ သမာဓာနကံ၊
သံခိတ္တံ ကထိတံ တမေတ္ထ သကလံ သာဘိညမေတ္တာဝတာ၊
ကတ္တဗ္ဗာ မုနိနေတ္ထ သာဓုမတိနာ သမ္ဘာဝနာ သဗ္ဗထာ။
ဝရဂုဏဂဏဘူသိတာနုသိဋ္ဌံ၊
ဣတိ သမထမိမံ တု ဘာဝယိတွာ၊
ပရမမနုပမံ ¶ ဘဇန္တိ ဓီရာ၊
ဟိတသုခမုခမုတ္တမာနုဗုဒ္ဓံ။
ဣတိ နာမရူပပရိစ္ဆေဒေ သေသကမ္မဋ္ဌာနဝိဘာဂေါ နာမ
ဒသမော ပရိစ္ဆေဒေါ။
နိဋ္ဌိတော စ နာမရူပပရိစ္ဆေဒေ သဗ္ဗထာပိ
သမထဘာဝနာဝိဘာဂေါ။