📜
၁၁။ ဧကာဒသမော ပရိစ္ဆေဒေါ
ဝိပဿနာဝိဘာဂေါ
ဒွိဓာ သမုဋ္ဌာနဓုရာ၊ တိဝိဓာ ဘူမိယော မတာ၊
တိဝိဓာဘိနိဝေသာ စ၊ သရီရံ တု စတုဗ္ဗိဓံ။
တိဝိဓာ ဘာဝနာ တတ္ထ၊ သင်္ခါရေသု ယထာရဟံ၊
ဒုဝိဓာကာရမာရဗ္ဘ၊ နိဇ္ဈာယတိ တိလက္ခဏံ။
အဋ္ဌာရသာကာရဘိန္နာ၊ ဒသာဝတ္ထာ ဝိဘာဝိတာ၊
တိဓာ ဝိဘာဂါ သာဓေတိ၊ ဝိမောက္ခတ္တယမုတ္တမံ။
စတုသစ္စပဋိဝေဓာ၊ သတ္တဋ္ဌာရိယပုဂ္ဂလာ၊
က္လေသဟာနီ ယထာယောဂံ၊ စတဿော ပဋိသမ္ဘိဒါ။
တိဝိဓာ ¶ စ သမာပတ္တိ၊ နိရောဓာ စ တထာပရာ၊
နိဿန္ဒဖလမိစ္စာဟု၊ တဿာ သာသနကောဝိဒါ။
ဝိပဿနာဘာဝနာယ-မိတိ ဘာသန္တိ ပဏ္ဍိတာ၊
တမိဒါနိ ပဝက္ခာမိ၊ ယထာနုက္ကမတော ကထံ။
ဘူမိဓမ္မေ ¶ ပရိဂ္ဂယှ၊ ဝိစိနန္တဿ ယောဂိနော၊
သတိယာ သမထာ ဝါထ၊ သမုဋ္ဌာတိ ဝိပဿနာ။
သဘာဝပဋိဝေဓေ စ၊ သဒ္ဓမ္မပဋိပတ္တိယံ၊
ပညာသဒ္ဓါဒွယံ တဿာ၊ ဓုရမာဟု ဓုရန္ဓရာ။
တေဘူမကသဘာဝါနံ၊ သပ္ပစ္စယပရိဂ္ဂဟော၊
ဉာတပရိညာ နာမာယံ၊ ဘူမီတိ ပဌမာ မတာ။
ကလာပတော သမ္မသနံ၊ ဥဒယဗ္ဗယဒဿနံ၊
ပရိညာတီရဏာ နာမ၊ ဒုတိယာ ဘူမိ ဘာသိတာ။
ပဟာနပရိညာ ဘူမိ၊ တတိယာဟု တတောပရံ၊
ဘင်္ဂါဒိဉာဏမိစ္စေဝံ၊ တိဝိဓာ ဘူမိယော မတာ။
ခဏသန္တတိအဒ္ဓါန-ဝသေနေတ္ထ သမီရိတာ၊
အနိစ္စာ ဒုက္ခာနတ္တာတိ၊ တိဝိဓာဘိနိဝေသနာ။
ဒိဋ္ဌိကင်္ခါဝိတရဏာ၊ မဂ္ဂါမဂ္ဂပဋိပ္ပဒါ၊
ဝိသုဒ္ဓိယော စတဿောပိ၊ သရီရန္တိ နိဒဿိတာ။
သလက္ခဏဝဝတ္ထာနံ၊ ပစ္စယာကာရနိစ္ဆယော၊
ကုမ္မဂ္ဂပရိဟာရော စ၊ တိလက္ခဏဝိပဿနာ။
ဣတိ လက္ခဏဘိန္နတ္တာ၊ လဗ္ဘန္တေကက္ခဏေပိ စ၊
ဒေသိတာ ဟေတုဘူတေန၊ ကမေနေဝံ ဝိသုဒ္ဓိယော။
သီလဗ္ဗိသုဒ္ဓိအာဒီနံ၊ တထာ သာဝ ပရမ္ပရာ၊
စိတ္တဗ္ဗိသုဒ္ဓိအာဒီနမတ္ထာယာတိ ပကာသိတာ။
ဒိဿမာနသဘာဝါနံ၊ ပဿန္တော ပစ္စယဋ္ဌိတိ၊
ပရိပန္ထဝိမုတ္တော ဟိ၊ ပဋိပါဒေတိ ဘာဝနံ။
တထာပိ ¶ စ ဝိသေသေန၊ ပဋိပန္နဿ ယောဂိနော၊
တတ္ထ တတ္ထ ဝိဘူတတ္တာ၊ ဌာနတော ဘေဒိတာ ကထံ။
ရူပပုဗ္ဗင်္ဂမံ ¶ ဝါထ၊ နာမပုဗ္ဗင်္ဂမံ တထာ၊
အဇ္ဈတ္တံ ဝါ ဗဟိဒ္ဓါ ဝါ၊ ယထာပါကဋဓမ္မတော။
နာမရူပါဒိဘေဒေန၊ ဘူမိဓမ္မပရိဂ္ဂဟော၊
ဝုတ္တာ ဒိဋ္ဌိဝိသုဒ္ဓီတိ၊ အတ္တဒိဋ္ဌိပ္ပဟာနတော။
အာဟစ္စ ပစ္စယုပ္ပန္နာ၊ တထာ တဗ္ဘာဝဘာဝိနော၊
ပဝတ္တန္တီတိ သင်္ခါရေ၊ ပဿတော ပန ယောနိသော။
ပစ္စယဂ္ဂါဟိနီ ပညာ၊ နာမရူပပ္ပဝတ္တိယာ၊
ကင်္ခါ တရန္တိ တာယာတိ၊ ကင်္ခါဝိတရဏာ မတာ။
အနိစ္စာ ဒုက္ခာနတ္တာတိ၊ ပစ္စယာယတ္တဝုတ္တိတော၊
သင်္ခိပိတွာ ကလာပေန၊ သမ္မသီယန္တိ သင်္ခတာ။
ဥပ္ပာဒဝယဘာဝေါပိ၊ လက္ခဏတ္တယသာဓကော၊
ပစ္စယာကာရမာရဗ္ဘ၊ လက္ခီယတိ ဝိသေသတော။
တသ္မာ သမ္မသနဉာဏံ၊ ဥဒယဗ္ဗယဒဿနံ၊
ကင်္ခါဝိတရဏာယံ တု၊ သင်္ဂယှတိ ဝိသုဒ္ဓိယံ။
တတ္ထ သံက္လေသဝိက္ခေပံ၊ ကုမ္မဂ္ဂံ ပရိဝဇ္ဇတော၊
မဂ္ဂါမဂ္ဂဝိသုဒ္ဓီတိ၊ ဉာဏဒဿနမီရိတံ။
တတော ကထေန္တိ အက္လိဋ္ဌမုဒယဗ္ဗယဒဿနံ၊
အာဒိံ ကတွာ ပဋိပဒါဉာဏဒဿနသုဒ္ဓိယံ။
ပစ္စယပစ္စယုပ္ပန္နေ၊ ယထာဝတ္ထုဝဝတ္ထိတေ၊
ပဟာတုမီဟမာနာနံ၊ နိယျာနပဋိပတ္တိတော။
ဥပက္လေသဝိသုဒ္ဓါ ဟိ၊ ပုနဒေဝေါဒယဗ္ဗယံ၊
အဓိဋ္ဌဟိတွာ ဘင်္ဂါဒိ-ဉာဏေဟိ ပဋိပဇ္ဇတိ။
တထာ ¶ စာဘိနဝုပ္ပန္နေ၊ ဘိဇ္ဇမာနေ ဝိပဿတော၊
သံဝေဂကဍ္ဎိတံ ဉာဏံ၊ ဘင်္ဂါဒိမနုတိဋ္ဌတိ။
တတော ¶ ပုဗ္ဗေ ပဝတ္တာ ဟိ၊ သံက္လေသာပါယသမ္ဘဝါ၊
ပဋိပတ္တိဝိသုဒ္ဓီတိ၊ န သင်္ဂယှတိ ဘာဝနာ။
သမ္ပာဒေန္တော ပနိစ္စေတာ၊ စတဿောပိ ဝိသုဒ္ဓိယော၊
အနိစ္စာ ဒုက္ခာနတ္တာတိ၊ ဘာဝေယျ တိဝိဓာ ကထံ။
ပစ္စယပစ္စယုပ္ပန္နာ၊ ဇာတာနန္တရဘေဒိနော၊
အနိစ္စာ စ ပဘင်္ဂူ စ၊ ပလုဇ္ဇန္တိ စဝန္တိ စ။
အဒ္ဓုဝါ စ အသာရာ စ၊ ဝိဘဝါ စ ဝိနာသိနော၊
သင်္ခတာ ဝိပရိဏာမ-ဓမ္မာ ဣတ္တရကာလိကာ။
ခယဓမ္မာ ဝယဓမ္မာ၊ လဟုကာလပ္ပဝတ္တိနော၊
တာဝကာလိကဓမ္မာ စ၊ ပရိတ္တဋ္ဌိတိကာ တထာ။
ခဏတ္တယပရိစ္ဆိန္နာ၊ ပုဗ္ဗာပရဝိစိတ္တကာ၊
ပုရက္ခတာ နိရောဓဿ၊ သဿတာ န ကုဒါစနံ။
ဇာယန္တိ ပရိဟာနာယ၊ န တု ဇာယန္တိ ဝုဒ္ဓိယာ၊
ဇိယျမာနာဝ တိဋ္ဌန္တိ၊ ဇိဏ္ဏာ ဘင်္ဂပရာယဏာ။
အဟုတွာယေဝုပ္ပဇ္ဇန္တိ၊ န ကုတောစိပိ အာဂတာ၊
ဟုတွာ အန္တရဓာယန္တိ၊ န တု ကတ္ထစိ သဉ္စိတာ။
တံ တံ ပစ္စယသာမဂ္ဂိ-မတ္တလာဘာယ နိဿိတာ၊
နိရောဓဓမ္မာ ဇာယန္တိ၊ ဇာတာ ဗျန္တိ ဘဝန္တိ တေ။
ယထာ နဒီ ပဗ္ဗတေယျာ၊ ယထာ ဒီပသိခါ တထာ၊
သီဃသီဃံ ပဝတ္တန္တာ၊ ဥပ္ပဇ္ဇန္တိ ဝယန္တိ စ။
ဇာတာ ဇာတာ နိရုဇ္ဈန္တိ၊ အညေ အညေ တု ဇာယရေ၊
အဝီစိ အနုသမ္ဗန္ဓာ၊ န ဇာနန္တိ ဝိသေသတော။
ဣတိ ¶ နာနပ္ပကာရေန၊ ဝိပဿန္တော ဝိစက္ခဏော၊
အနိစ္စဘာဝနံ ဓီရော၊ ပရိပါစေတိ သာဓုကံ။
ဒုက္ခာ ¶ စ ဒုက္ခဝတ္ထူ စ၊ အဘိဏှပရိပီဠိတာ၊
ရောဂါ ဂဏ္ဍာ စ သလ္လာ စ၊ အဃတော စ ဥပဒ္ဒဝါ။
ဘယောပသဂ္ဂါဃမူလာ၊
သာသဝါဒီနဝီတိတာ၊
အလေဏာသရဏာတာဏာ၊
ဝဓကာ မာရကာမိသာ။
ဇာတိဓမ္မာ ဇရာဗျာဓိ-
သောကောပါယာသဘာဂိနော၊
ပရိဒေဝသဘာဝါ စ၊
သံက္လေသာ ဒုက္ခဘာဂိနော။
ဇေဂုစ္ဆာ ပဋိကူလာ စ၊ ဗီဘစ္ဆာ စ ဝိရူပိနော၊
အဇညာ စပလာ ဟီနာ၊ ဒုဂ္ဂန္ဓာ ဗာလသေဝိတာ။
သောကန္တရိကတာနိစ္စံ၊ တဏှာယ ကဍ္ဎိတာ ဘုသံ၊
ကပဏာ ဒုဂ္ဂတာ ဒီနာ၊ ဝိပန္နာ စ ဝိဃာတိနော။
အတ္တလာဘံ ဂဝေသန္တိ၊ တံတံပစ္စယနိဿိတာ၊
ဒုက္ခာဓိဋ္ဌာနမစ္စန္တံ၊ ဇာတာ ပုန ဝိဟညရေ။
အဂ္ဂိကူပေ နိမုဂ္ဂါဝ၊ က္လေသသန္တာပဘာဂိနော၊
ဩဝိဒ္ဓါ ဝိယ သတ္တီဟိ၊ သင်္ခါရာ နိစ္စဒုက္ခိတာ။
ဇာယမာနာ စ ဇိယျန္တာ၊ မိယျန္တာ စ ခဏေ ခဏေ၊
ပသုကာ ဝိယ နိစ္စမ္မာ၊ ဟညန္တိ သေရိကာတုရာ။
တိလာနိ တိလယန္တေဝ၊ ဥစ္ဆုယန္တေဝ ဥစ္ဆုယော၊
ဥဒယဗ္ဗယာဝဿံ တေ၊ ပီဠယန္တိ အဘိဏှသော။
မနောရမနဝါကာရာ ¶ ၊ ဝိပလ္လာသပရိက္ခတာ၊
ဣရိယာပထသဉ္ဆန္နာ၊ နောပတိဋ္ဌန္တိ ဒုက္ခတော။
သင်္ခါရေသု ¶ ပနေတေသု၊ ဝေဒနာဿာဒရောဓိနော၊
သာဝ သန္ဒုလသမ္ဗဒ္ဓါ၊ သမ္မောဟပရိဝါရိတာ။
‘‘အဒုံ ဒုက္ခမိဒံ ဒုက္ခ’’-မိတိ သံသာရစာရိနော၊
ဒုက္ခဟေတုမဇာနန္တာ၊ သမ္ဘမန္တိ အဝိဒ္ဒသု။
သုခါကာရမပဿန္တာ၊ ဒုက္ခဘာရနိပီဠိတာ၊
ပတ္ထေန္တိ ဒုက္ခမေဝညံ၊ ဗာလာ ဗျသနဘာဂိနော။
စဝန္တာ ဥပပဇ္ဇန္တာ၊ ရုက္ခသာခံဝ မက္ကဋော၊
ဒုက္ခမေကံ ဝိမုစ္စန္တိ၊ တတော ဂဏှန္တိ စာပရံ။
တေ ဒီဃရတ္တံ သောစန္တိ၊ တဏှာသလ္လသမပ္ပိတာ၊
ဒိဋ္ဌိပါသသမုပေတာ၊ မာနတ္ထမ္ဘာနုသာယိနော။
တမာကာရံ ပနိစ္စေဝံ၊ ဝိပဿန္တော ဝိသာရဒေါ၊
ဒုက္ခာနုပဿနံ နာမ၊ ပရိပါစေတိ ဘာဝနံ။
ဓမ္မဋ္ဌိတိနိယာမာ ဟိ၊ ခန္ဓာယတနဓာတုယော၊
အနတ္တာသဿတန္တာ စ၊ ဤဟာဘောဂဝိဝဇ္ဇိတာ။
ပယောဇနမဓိဋ္ဌာယ၊ န တု ဗျာပါရယန္တိ စ၊
ပစ္စယပစ္စယုပ္ပန္နာ၊ ဇနေတုံ ဝါထ ဇာယိတုံ။
တထာပိ ဟေတုသာမဂ္ဂိ-သမ္ဘဝေ သမ္ဘဝန္တိ တေ၊
တဗ္ဘာဝဘာဝိဘာဝေန၊ အညမညပဝတ္တိတာ။
အဇာယိတုံ န သက္ကောန္တိ၊ သတိ ပစ္စယသမ္ဘဝေ၊
ပစ္စယာနမလာဘေ တု၊ န ဇာယန္တိ ကုဒါစနံ။
န ကိဉ္စေတ္ထ အပေက္ခိတွာ၊ သမဂ္ဂါ ဟောန္တိ ပစ္စယာ၊
န ဇနေတုံ န သက္ကောန္တိ၊ သမဂ္ဂါ စ ကုဒါစနံ။
ယထာပစ္စယလာဘေန ¶ ၊ ပဝတ္တန္တိ ယထာ တထာ၊
ရက္ခိတာ ဝါ ဝိဓာတာ ဝါ၊ နတ္ထိ အဿာမိကာ တထာ။
‘‘အဟံ ¶ မမ’’န္တိ ဂဏှန္တာ၊ ပရိဏာမေန္တိ အညထာ၊
ဝိဿသန္တာ ဟရန္တေတေ၊ ပရာဘူတာ ပလမ္ဘိနော။
ရိတ္တာ တုစ္ဆာ စ သုညာ စ၊ ဝိဝိတ္တာ သာရဝဇ္ဇိတာ၊
သလက္ခဏပရိစ္ဆိန္နာ၊ ဓမ္မာ နတ္ထေတ္ထ ပုဂ္ဂလော။
ဇာယမာနာ စ ဇိယျန္တာ၊ မိယျမာနာ စ သင်္ခတာ၊
ဝိဝသာ ပရိဝတ္တန္တိ၊ ဝသော တေသံ န ကတ္ထစိ။
န တေသု ကဿစိဿေရံ၊ န တေသဉ္စတ္ထိ ကတ္ထစိ၊
န စတ္တနီတိ သင်္ခါရာ၊ အာဓိပစ္စဝိဝဇ္ဇိတာ။
ကဒလီပတ္တဝဋ္ဋီဝ၊ အညမညပတိဋ္ဌိတာ၊
သဟဇာတဂ္ဃနီဘူတာ၊ နောပဋ္ဌန္တိ အနတ္တတော။
အရူပနိဿိတံ ရူပံ၊ အရူပံ ရူပနိဿိတံ၊
ဇစ္စန္ဓပီဌသပ္ပီဝ၊ အညမညဝဝတ္ထိတံ။
ယန္တသုတ္တေန ယန္တံဝ၊ ကာယယန္တံ ပဝတ္တတိ၊
နာမာဝကဍ္ဎိတံ တတ္ထ၊ နတ္ထိ အတ္တာ သယံဝသီ။
စေတောဝိပ္ဖာရနိပ္ဖန္နာ၊ ဝါယောဓာတုသမုဋ္ဌိတာ၊
ဣရိယာပထဝိညတ္တိဝိကာရာ ပါလကာ မတာ။
ဩဝိဒ္ဓဝေဒနာသလ္လဝိကာရပရိဏာမတော၊
ဗာလာနံ စိတ္တနိပ္ဖန္နာ၊ အတ္တာတိ ပရိကပ္ပနာ။
သုဒ္ဓသင်္ခါရပုဉ္ဇောယံ၊ နေတ္ထ သတ္တောပလဗ္ဘတိ၊
တံ တံ ပစ္စယမာဂမ္မ၊ ဒုက္ခက္ခန္ဓောဝ ဇာယတိ။
ဧဝမာဒိပ္ပကာရေဟိ၊ ဝိပဿန္တော အနတ္တတော၊
အနတ္တဘာဝနံ နာမ၊ ဘာဝေတီတိ ပဝုစ္စတိ။
ဘာဝေန္တော တိဝိဓမ္ပေတံ၊ နိဇ္ဈာယတိ တိလက္ခဏံ၊
နိမိတ္တဉ္စ ပဝတ္တဉ္စ၊ သမာရဗ္ဘ ယထာက္ကမံ။
အတ္တလာဘနိမိတ္တဉ္စ ¶ ¶ ၊ တံတံပစ္စယနိဿိတာ၊
တဗ္ဘာဝဘာဝိဘာဝေန၊ လက္ခီယန္တိ နိမိတ္တတော။
ဇာယမာနာ စ ဇိယျန္တာ၊ မိယျမာနာ စ သင်္ခတာ၊
တံ တံ ဘာဝမတိက္ကမ္မ၊ ပဝတ္တန္တိ ခဏေ ခဏေ။
ဟေတုနိဿယနာကာရော၊ နိမိတ္တန္တိ တတော မတော၊
ပဝတ္တံ ဝတ္တနာကာရော၊ ခဏသန္တတိအဒ္ဓတော။
အပုဗ္ဗာဘိနဝုပ္ပတ္တိ၊ ဥပ္ပာဒေါတိ ပကာသိတော၊
ပုဗ္ဗာပရိယသန္ဓာနံ၊ ပဋိသန္ဓီတိ ဘာသိတာ။
အာယူဟန္တီတိ ဝုစ္စန္တိ၊ တဒတ္ထံ ပန ဝါဝဋာ၊
ဣစ္စာဒိပရိယာယေဟိ၊ ဗဟွာကာရာပိ သင်္ခတာ။
နိမိတ္တေ စ ပဝတ္တေ စ၊ ဝတ္ထုတော ယန္တိ သင်္ဂဟံ၊
တံ ဒွယာကာရမာရဗ္ဘ၊ ပတိဋ္ဌာတိ တိလက္ခဏံ။
ပစ္စယာဓီနဓမ္မာနံ၊ ဥပ္ပာဒဝယလက္ခိတာ၊
အနိစ္စတာနိမိတ္တဋ္ဌာ၊ ပဝတ္တေသု န ပါကဋာ။
ပုဗ္ဗာပရဝိစိတ္တာနမသမတ္ထာနမတ္တနိ၊
သန္နိဿယေန နိပ္ဖန္နော၊ ဘာဝဒုဗ္ဗလျသာဓကော။
ဟေတုသင်္ခါတဘာဝေါ ဟိ၊ သင်္ခါရာနမနိစ္စတာ၊
ပဝတ္တမာနာ ဒဿေတိ၊ တံ သဘာဝံ ပနတ္တနော။
နိစ္စာ ဓုဝါ စေ သင်္ခါရာ၊ ကသ္မာ ပေက္ခန္တိ ပစ္စယေ၊
အဟုတွာ ယဒိ နိဿာယ၊ ဇာတာ ကာ တတ္ထ နိစ္စတာ၊
အတ္တလာဘံ လဘိတွာန၊ ဟေတုသာမဂ္ဂိလာဘတော၊
ယာပေဿန္တိ တမညတြ၊ ကထံ နာမတ္တဒုဗ္ဗလာ။
ပစ္စယေ အနပေက္ခိတွာ၊ ယဒိ နတ္ထိ သမတ္ထတာ၊
အတ္တလာဘူပလာဘာယ၊ ကိံ သမတ္ထာနုပါလနေ၊
ဇနကာ ¶ ¶ ပစ္စယာနဉှိ၊ တဒါယူဟနတော ပရံ၊
ပရိဟာရိတုမာရဒ္ဓါ၊ ဇိယာ ခိတ္တသရော ယထာ။
အစ္စီဝ ဝဋ္ဋိနိက္ခန္တာ၊ မေဃမုတ္တာဝ ဝိဇ္ဇုတာ၊
ပစ္စယုဒ္ဓဋဝိဿဋ္ဌာ၊ ဓမ္မာ ဘင်္ဂပရာယဏာ။
တသ္မာ နိမိတ္တမာကာရံ၊ ပဿန္တော သ ဝိပဿကော၊
‘‘ဝိနဿန္တိ အဝဿ’’န္တိ၊ သဒ္ဒဟန္တော ဝိမုစ္စတိ။
အနိစ္စတော တထာ ဟေဝံ၊ ဝိပဿန္တဿ ယောဂိနော၊
သဒ္ဓါဝိမောက္ခ ဗာဟုလျံ၊ ဘဝတီတိ ပကာသိတံ။
ဣတိ သင်္ခါရဓမ္မေသု၊ နိမိတ္တာကာရနိစ္ဆိတံ၊
အနိစ္စလက္ခဏံ ဓီရော၊ နိဇ္ဈာယတိ နိယာမတော။
ဗာဓကတ္တဘယာကာရာ၊ ပဝတ္တေ ဒုက္ခိတာ ဝိယ၊
ပဝတ္တမာနာ ပီဠေန္တိ၊ သင်္ခါရာ စ ဘယာဝဟာ။
ဥပ္ပာဒါဘိနဝါကာရံ၊ အတိက္ကမ္မ တတော ပရံ၊
ဇရာဇစ္စရိတာ ဟုတွာ၊ ဘဉ္ဇမာနာ ကထံ သုခါ။
တသ္မာ ပဝတ္တမာကာရံ၊ နိဇ္ဈာယန္တော နိရန္တရံ၊
သင်္ခါရေ ဒုက္ခတော ဒိသွာ၊ ဟိတွာန ပဏိဓိံ တဟိံ။
တဒါယူဟနနိဿင်္ဂေါ၊ ပဿဒ္ဓဒရထော သုခီ၊
သမာဓိဗဟုလော ယောဂီ၊ ဝူပသန္တောတိ ဝုစ္စတိ။
ဗျာပါရဝသိတာကာရံ၊ သင်္ခါရာနံ ဝိပဿတော၊
နိမိတ္တေ စ ပဝတ္တေ စ၊ ဥပဋ္ဌာတိ အနတ္တတော။
အနတ္တာဓီနနိပ္ဖန္နာ၊ ဝသာတီတပ္ပဝတ္တိနော၊
ဘာဝဒုဗ္ဗလျနိဿာရာ၊ ကထမတ္တာ ဘဝိဿရေ။
တမေဝံ ပဋိဝိဇ္ဈန္တော၊ မညတာနတ္တလက္ခဏံ၊
ဝိပဿနာရသဿာဒီ၊ သံဝေဂဗဟုလော ဘဝေ။
ဣစ္စာဟစ္စ ¶ ပဝတ္တာနံ၊ လက္ခဏာနံ သဘာဝတော၊
ဝဝတ္ထိတော တတ္ထ တတ္ထ၊ တံတံလက္ခဏနိစ္ဆယော။
တထာပိပါကဋဋ္ဌာနေ ¶ ၊ ဟေတုဘူတေ စ ယောနိသော၊
ဝဝတ္ထပေတိ သင်္ခါယ၊ လက္ခဏာနိ ဝိစက္ခဏော။
ဥပ္ပာဒဝယဘာဝေန၊ ဒိဿမာနာ ဟိ သင်္ခတာ၊
ပုဗ္ဗာပရဝိဝေကေန၊ ဒဿေန္တိ တဒနိစ္စတံ။
တထာ စ ဝိပရိဏာမံ၊ ဝိပဿန္တော ဝိသာရဒေါ၊
နိမိတ္တဖလနိပ္ဖန္နံ၊ တမတ္ထမဓိမုစ္စတိ။
ဒုက္ခပ္ပဝတ္တိဟေတုတ္တာ၊ နိမိတ္တမပိ ပဏ္ဍိတော၊
ဘယာဝဟနိယာမေန၊ ဗာဓကန္တေဝ ပဿတိ။
တထာ ဟိ ပစ္စယာရဗ္ဘ၊ သင်္ခါရာ နိဿယန္တိ စေ၊
တတောဝဿံ ဘဝိဿန္တိ၊ မဟဗ္ဘယသမောဟိတာ။
နိရောဓဓမ္မာ ဇာယန္တိ၊ သလ္လဝိဒ္ဓါဝ ဒုက္ခိတာ၊
ဇရာတုရာ ဝိပဇ္ဇန္တာ၊ ဘိဇ္ဇန္တာဝ ဝိဃာတိနော။
တေနေဝါနိစ္စတော ဒိဋ္ဌာ၊ ဒုက္ခဘာဝေန ခါယရေ၊
သင်္ခတတ္တာ သဘာဝေါ ဟိ၊ ဒုက္ခာယ ပရိဝတ္တတိ။
အနိစ္စာ ပုန သင်္ခါရာ၊ ဒုက္ခာတိ စ ဝဝတ္ထိတာ၊
အနတ္တတ္တနိယာမေန၊ နိဒဿေန္တိ သလက္ခဏံ။
ကထံ အတ္တပရာဓီနာ၊ ပစ္စယုပ္ပန္နဘင်္ဂုရာ၊
ဝိပတ္တိနိယတာ ဝါထ၊ ဗာဓမာနာ ဘယာဝဟာ။
အာဟစ္စာကာရဘေဒေန၊ တိဝိဓာ ဟိ ဝိပဿနာ၊
အနိစ္စာ ဒုက္ခာနတ္တာတိ၊ အယမေတ္ထ ဝိနိစ္ဆယော။
တိဓာဘူတာ ပနိစ္စေတာ၊ ပဟာနာကာရဘေဒိတာ၊
မဟာဝိပဿနာ နာမ၊ အဋ္ဌာရသဝိဓာ ကထံ။
ဟေတုသာမဂ္ဂိနိပ္ဖန္နမနိစ္စန္တိ ¶ တိလက္ခဏံ၊
အနိစ္စတံ ဝိပဿန္တော၊ နိစ္စသညံ ဝိမုဉ္စတိ။
အနိစ္စတာယာဓိဋ္ဌာနနိမိတ္တံ ¶ ပန ပဿတော၊
အနိမိတ္တေ ဝိမုစ္စန္တီ၊ အနိမိတ္တာနုပဿနာ။
နိရုဇ္ဈမာနဓမ္မာနံ၊ ဗျန္တိဘာဝံ ဝိပဿတော၊
သမုဒယံ ပဇဟန္တီ၊ နိရောဓာအနုပဿနာ။
သိထိလာ ဇာတု နိဿာရာ၊ ဒုဗ္ဗလာ လဟုဃာတိနော၊
ခယဓမ္မာတိ သင်္ခါယ၊ ဃနသညံ ဝိမုဉ္စတိ။
အတ္တလာဘမတိက္ကမ္မ၊ ဝယန္တီတိ ဝိစိန္တယံ၊
ဇဟတာယူဟနံ တတ္ထ၊ ပုတ္တေ သူတိပဇာ ဝိယ။
အနဝတ္တိတဘာဝါနံ၊ အညထတ္တံ ဝိပဿတော၊
ဝိကာရပရိဏာမေသု၊ ဓုဝသညာ ဝိရဇ္ဇတိ။
အာလမ္ဗဉ္စ တဒါလမ္ဗ-ဉာဏဘင်္ဂဉ္စ ဘာဝယံ၊
သာရာဒါနာဘိနိဝေသံ၊ အဓိပညာယ မုစ္စတိ။
ဣစ္စာနိစ္စာနိမိတ္တာ စ၊ နိရောဓာ စ ခယာ ဝယာ၊
ဝိပရီဏာမာဓိသညာ၊ ဓမ္မာနုပဿနာတိ စ။
သတ္တာနုပဿနာဘေဒမနိစ္စာကာရဒဿနံ၊
နိစ္စသညာဒိဘင်္ဂါယ၊ ပရိဒီပေန္တိ ပဏ္ဍိတာ။
တံ တမာကာရမာရဗ္ဘ၊ တထာ ဗာဟုလျဝုတ္တိတော၊
တံလက္ခဏာနုဂတာ စ၊ ဘေဒါ တဿေဝ သတ္တဓာ။
သုခသညံ နိဿဇ္ဇန္တီ၊ ဝုတ္တာ ဒုက္ခာနုပဿနာ၊
နိဗ္ဗိန္နာ နိဗ္ဗိဒါဉာဏံ၊ ဝိရာဂါ ရာဂဝဇ္ဇိတာ။
ဇာတာပ္ပဏိဟိတာ နာမ၊ မုဉ္စန္တီ ပဏိဓိံ တထာ၊
နိရာလယာဘိနိဝေသာ၊ အာဒီနဝါနုပဿနာ။
ပဉ္စာနုပဿနာဘေဒံ ¶ ၊ တဒိဒံ ဒုက္ခဒဿနံ၊
သုခသညာဒိဘင်္ဂါယ၊ ပဝတ္တန္တိ ပကာသိတံ။
အနတ္တတော ¶ ဝိပဿန္တော၊ အတ္တသညာ ဝိမုစ္စတိ၊
ဇဟတတ္တာဘိနိဝေသံ၊ ဈာယန္တော ပုန သုညတော။
ဒွယာနုပဿနာဘေဒမနတ္တာကာရဒဿနံ၊
အတ္တသညာဘိနိဝေသံ၊ ဝိမောက္ခာယ ဝိဘာဝိတုံ။
ပဋိနိဿဂ္ဂတော ဒိသွာ၊ သင်္ခါရေသု တိလက္ခဏံ၊
ဇဟန္တော သင်္ခတာဒါနံ၊ ပက္ခန္ဒတိ အသင်္ခတေ။
ယထာဘူတေန ဉာဏေန၊ ဝိပဿန္တော ဝိမုစ္စတိ၊
သမ္မောဟာဘိနိဝေသမှာ၊ အဝိပလ္လတ္ထဒဿနော။
မောဟတာဘောဂဝိမုတ္တာ၊ ပဋိသင်္ခါနုပဿနာ၊
ဇဟန္တပ္ပဋိသင်္ခံ တု၊ ပဋိသင်္ခါယ လက္ခဏံ။
ဒိဋ္ဌိသင်္ခါတဒေါသတ္တာ၊ ဝိဘာဝေန္တော ဝိဝဋ္ဋတော၊
သံယောဂါဘိနိဝေသမှာ၊ ပဋိလီနော ဝိမုစ္စတိ။
မုစ္စီတုကမျတာဉာဏံ၊ ပဋိနိဿဂ္ဂသမ္မတံ၊
ယထာ ဘူတံ တထာ ဉာဏံ၊ ပစ္စယာကာရနိဿိတံ။
သင်္ခါရုပေက္ခာဉာဏံ တု၊ ပဋိသင်္ခါနုပဿနာ၊
ဝုဋ္ဌာနဂါမိနီ နာမ၊ ဝိဝဋ္ဋန္တိ ပဝုစ္စတိ။
စတဿောပိ ပနိစ္စေတာ၊ အာဒါနာဒိပ္ပဘဉ္ဇိတာ၊
လက္ခဏတ္တယမာဟစ္စ၊ ပဝတ္တန္တိ ယထာ တထာ။
နိမိတ္တမာရဗ္ဘ တထာ ပဝတ္တံ၊
တိလက္ခဏံ ဈာယတိ ယာယ ယောဂီ၊
တမိတ္ထမဋ္ဌာရသဘေဒဘိန္နံ၊
ဝိပဿနာဘာဝနမာဟု ဓီရာ။
နိဒဿိတံ ဇိနဝစနာနုသာရတော၊
ဝိဘာဝယံ မနသိ ဟိတာဝဟံ ပရံ၊
နိရာမယံ ပဒမနုပါပုဏိဿတိ။
ဣတိ နာမရူပပရိစ္ဆေဒေ ဝိပဿနာဝိဘာဂေါ နာမ
ဧကာဒသမော ပရိစ္ဆေဒေါ။