📜
၁၂။ ဒွါဒသမော ပရိစ္ဆေဒေါ
ဒသာဝတ္ထာဝိဘာဂေါ
ဣစ္စဋ္ဌာရသဓာ ဘိန္နာ၊ ပဋိပက္ခပ္ပဟာနတော၊
လက္ခဏာကာရဘေဒေန၊ တိဝိဓာပိ စ ဘာဝနာ။
ကလာပတော သမ္မသနံ၊ ဥဒယဗ္ဗယဒဿနံ၊
ဘင်္ဂေ ဉာဏံ ဘယေ ဉာဏံ၊ ဉာဏမာဒီနဝေပိ စ။
တထေဝ နိဗ္ဗိဒါဉာဏံ၊ ဉာဏံ မုစ္စိတုကမျတာ၊
ပဋိသင်္ခါ စ သင်္ခါရု-ပေက္ခာဉာဏာနုလောမကံ။
ဣစ္စာဝတ္ထာပဘေဒေန၊ ဒသဓာပိ ဝိဘာဝိတာ၊
သဘာဂတ္ထဝိသေသေန၊ တိဓာ သင်္ဂဟိတာ ပုန။
ယထာဘူတံ နာမ ဉာဏတ္တယံ သမ္မသနာဒိကံ၊
ဘယာဒိဉာဏံ တိဝိဓံ၊ နိဗ္ဗိဒါတိ ပဝုစ္စတိ။
တထာ မုစ္စိတုကာမာဒိ၊ ဝိရာဂေါဝ စတုဗ္ဗိဓံ၊
လက္ခဏတ္တယနိဇ္ဈာနဝသေန ပုန ဝုဋ္ဌိတာ။
သုညတဉ္စာနိမိတ္တဉ္စ ¶ ၊ တထာပ္ပဏိဟိတန္တိ စ၊
သာဓေတိ မဂ္ဂသင်္ခါတံ၊ ဝိမောက္ခတ္တယမုတ္တမံ။
ဣတိ ဘာဝေတုကာမဿ၊ ဝိဘာဝေတိ ယထာက္ကမံ၊
ဒသာဝတ္ထာဝိဘာဂေန၊ သမာဒါယ ယထာ ကထံ။
ဝိသုဒ္ဓါ ¶ ပဌမံ တာဝ၊ သာဓု သီလဝိသုဒ္ဓိယာ၊
ဥပစာရပ္ပနာယဉ္စ၊ ဌတွာ စိတ္တဝိသုဒ္ဓိယံ။
သပ္ပစ္စယံ ပရိဂ္ဂယှ၊ နာမရူပံ သဘာဝတော၊
ဒိဋ္ဌိကင်္ခါဝိတရဏံ၊ ပတွာ သုဒ္ဓိံ တတော ပရံ။
အတီတာနာဂတေ ခန္ဓေ၊ ပစ္စုပ္ပန္နေ စ သာသဝေ၊
ကလာပတော သမ္မသိတွာ၊ သမ္မသေယျ တိလက္ခဏံ။
အာဒါနနိက္ခေပနတော၊
ဝယောဝုဒ္ဓတ္ထဂါမိတော၊
အာဟာရတောပိ ဥတုတော၊
ကမ္မတော စာပိ စိတ္တတော။
ဓမ္မတာရူပတော စာပိ၊ ရူပသတ္တကတော နယေ၊
ကလာပတော ယမကတော၊ ခဏိကာ ပဋိပါဋိတော။
ဒိဋ္ဌိမုဂ္ဃာဋယန္တော စ၊ မာနမုဂ္ဃာဋယံ တထာ၊
နိကန္တိပရိယာဒါနော၊ နာမသတ္တကတော နယေ။
နိစ္စာ စေ န နိရုဇ္ဈေယျုံ၊ န ဗာဓေယျုံ သုခါ ယဒိ၊
ဝသေ ဝတ္တေယျုမတ္တာ စေ၊ တဒဘာဝါ န တာဒိသာ။
သမ္ဘဝန္တိ ဟိ သင်္ခါရာ၊ သတိ ပစ္စယသမ္ဘဝေ၊
တတော ပစ္စယနိပ္ဖန္နာ၊ အဝဿံ ဘေဒဂါမိနော။
တဒနိစ္စာ ခယဋ္ဌေန၊ ဒုက္ခာ နာမ ဘယဋ္ဌတော၊
အနတ္တာသာရကဋ္ဌေန၊ သင်္ခါရာတိ ဝိဘာဝယံ။
ကာလေန ¶ သမ္မသေ ရူပံ၊ နာမံ ကာလေန သမ္မသေ၊
အဇ္ဈတ္တဉ္စ ဗဟိဒ္ဓါ စ၊ သမာသဗျာသတော တတော။
ယထောပဋ္ဌိတဘေဒေန၊ သမ္မသန္တော သမူဟတော၊
ကလာပတော သမ္မသနမိတိ ဘာဝေတိ ပဏ္ဍိတော။
တဿေဝံ သမ္မသန္တဿ၊ ကမ္မညံ ဟောတိ မာနသံ၊
သူပဋ္ဌန္တိ စ သင်္ခါရာ၊ ဝေါဒါယတိ စ ဘာဝနာ။
တတော ¶ ပရံ ဝိပဿန္တော၊ ပရိဂ္ဂဏှာတိ ပဏ္ဍိတော၊
ပစ္စုပ္ပန္နသဘာဝါနံ၊ ခန္ဓာနမုဒယဗ္ဗယံ။
တဏှာသမ္မောဟကမ္မေဟိ၊
ခန္ဓပဉ္စကသဘာဝေါ၊
ရူပမာဟာရတော ဟောတိ၊
ဖဿတော ဝေဒနာဒယော။
ဝိညာဏံ နာမရူပမှာ၊ သမ္ဘောတီတိ စ ပဿတော၊
တဿ ပစ္စယတော ဟောတိ၊ ခန္ဓေသုဒယဒဿနံ။
တဏှာဒီနံ နိရောဓာ စ၊
နိရောဓော ဟောတိ ပဿတော၊
တထာ ဝီသတိဓာ ဟောတိ၊
တတ္ထေဝ ဝယဒဿနံ။
နိဗ္ဗတ္တိဝိပရိဏာမလက္ခဏံ ပန ပဿတော၊
ခဏတော ဒသဓာ နေသမုဒယဗ္ဗယဒဿနံ။
ဣတ္ထံ ပညာသဓာ ဘေဒေါ၊
ခန္ဓာနမုဒယဗ္ဗယော၊
အာယတနာဒိဘေဒေါပိ၊
ယောဇေတဗ္ဗော ယထာရဟံ။
တဒေဝမနုပဿန္တော ¶ ၊ ခန္ဓာယတနဓာတုယော၊
အနိစ္စာ ဒုက္ခာနတ္တာတိ၊ ဘာဝေတိ ဗဟုဓာ ဗုဓော။
ဘာဝနာပသုတဿေဝံ၊ ပဿတော ဗောဓိပက္ခိယာ၊
ပါတုဘူတာ ပဝတ္တန္တိ၊ ဝိသေသေန ဝိသာရဒါ။
သလက္ခဏပရိစ္ဆိန္နေ၊ တိလက္ခဏဝဝတ္ထိတေ၊
ဆန္ဒော သာသဝသင်္ခါရေ၊ သာရဒံ ပရိယေသတိ။
တတ္ထ ¶ ပုဗ္ဗင်္ဂမံ ဟုတွာ၊ သံပက္ခန္ဒတိ မာနသံ၊
သင်္ကပ္ပောဘိနိရောပေတိ၊ အာဟရန္တော ပုနပ္ပုနံ။
ယထာဝတ္ထုသဘာဝေန၊ တတော သဒ္ဓါဓိမုစ္စတိ၊
သတိ သူပဋ္ဌိတာ ဟောတိ၊ ပရိဂ္ဂယှ သဘာဝတော။
ပညာ သမ္ပဋိဝိဇ္ဈန္တီ၊ သမာဟစ္စ ဝိပဿတိ၊
ပဂ္ဂဟေတွာန ဝါယာမော၊ ပဋိပါဒေတိ ဘာဝနံ။
တတော ပီတိမနော ဟောတိ၊ နိပ္ဖာဒိတမနောရထော၊
ပါမောဇ္ဇဗဟုလော ဟုတွာ၊ ပဿဒ္ဓဒရထော ပန။
ဝိက္ခေပုဒ္ဓစ္စနိတ္တိဏ္ဏော၊ သမာဓိယတိ နိစ္စလော၊
ဥပေက္ခာ ဘာဝနာဝီထိံ၊ အဓိဋ္ဌာတိ တတော ပရံ။
အာရုဠှယောဂ္ဂါစရိယော၊ အာဇာနီယရထော ဝိယ၊
ဝါတာဘာဝေ ပဒီပေါဝ၊ ပသန္နေကမုခဋ္ဌိတာ။
သုခုမာ နိပုဏာကာရာ၊ ခုရဓာရာဂတာ ဝိယ၊
ဂဏှန္တီ ဘာဝနာဂဗ္ဘံ၊ ပဝဍ္ဎတိ ဝိပဿနာ။
သမ္ပတ္တပဋိဝေဓဿ၊
တဿေဝံ တံ ဝိပဿတော၊
ဇာယတေကော ဥပက္လေသော၊
ဒသောပက္လေသဝတ္ထုကာ။
ဩဘာသော ¶ ပီတိ ပဿဒ္ဓိ၊ အဓိမောက္ခော စ ပဂ္ဂဟော၊
သုခံ ဉာဏမုပဋ္ဌာနမုပေက္ခာ စ နိကန္တိ စ။
ဇာတေသွေတေသု ယံ ကိဉ္စိ၊ ဥဠာရံ ဇာတဝိမှယော၊
ဒိသွာ ဝိပဿနာမဂ္ဂါ၊ ဝေါက္ကမိတွာ တတော ပရံ။
တမဟံကာရဝိက္ခိတ္တော၊ အဿာဒေန္တော မမာယတိ၊
ဟောတာဓိမာနိကော ဝါထ၊ မညန္တော တမနုတ္တရံ။
သိယာ ¶ စေဝမုပက္လိဋ္ဌာ၊ ပတိတာ ဝါထ ဘာဝနာ၊
တတ္ထေဝံ ပဋိသင်္ခါယ၊ ပဋိဝိဇ္ဈတိ ပဏ္ဍိတော။
န တဏှာဒိဋ္ဌိမာနေဟိ၊ ပရိယောဂါဟဟေတုတော၊
လက္ခဏာလမ္ဗဏတ္တာ စ၊ လောကိယာယံ ဝိပဿနာ။
ဒိဋ္ဌိမာနနိကန္တီ စ၊ ကုမ္မဂ္ဂါ ပရိပန္ထကာ၊
မဂ္ဂေါ ဝိသုဒ္ဓိယာ နာမ၊ ဝိသုဒ္ဓါ စ ဝိပဿနာ။
သာရထီဝ ရထံ ဘန္တမိတိ သင်္ခါယ သာဓုကံ၊
ပဝိဋ္ဌမဂ္ဂံ ဝိက္ခိတ္တံ၊ သမ္ပာဒေတိ ယထာ ပုရေ။
ဣတ္ထံ မဂ္ဂေ အမဂ္ဂေ စ၊ ယာထာဝပဋိဝေဓကံ၊
မဂ္ဂါမဂ္ဂဝိသုဒ္ဓီတိ၊ ဉာဏဒဿနမီရိတံ။
စေတောပဝတ္တနာကာရမိတိ သလ္လက္ခယံ ဗုဓော၊
သာဓုကံ ပဋိဝိဇ္ဈန္တော၊ သုခုမံ နိပုဏံ တတော။
ပရိပန္ထေ ဝိမောစေတွာ၊ ဗောဓေတွာ ဗောဓိပက္ခိယေ၊
ဘာဝနံ ပဋိပါဒေန္တော၊ ပုနဒေဝေါဒယဗ္ဗယံ။
သမဓိဋ္ဌာယ မေဓာဝီ၊ ဝိပဿတိ တိလက္ခဏံ၊
ဥဒယဗ္ဗယဉာဏန္တိ၊ တမီရေန္တိ တတော ပရံ။
သင်္ခါရာနံ ဝိဘူတတ္တာ၊ သာကာရာနံ ဝိသေသတော၊
တိလက္ခဏာနံ ဒိဋ္ဌတ္တာ၊ သင်္ခါရေသု သဘာဝတော။
ပရိပန္ထာ ¶ ဝိမုတ္တဿ၊ မဂ္ဂါမဂ္ဂဝိသုဒ္ဓိယာ၊
ယထာဝီထိပ္ပဝတ္တဿ၊ ပဋိပတ္တိဝိသုဒ္ဓိယာ။
ဣန္ဒြိယာနံ သုတိက္ခတ္တာ၊ ပရိပက္ကာ ဝိပဿနာ၊
ဥဒယမှာ ဝိမုစ္စိတွာ၊ ဘင်္ဂေ ဌာတိ ယထာ ကထံ။
ဥပ္ပာဒေါ ပစ္စယာယတ္တော၊ ဓမ္မာနမိတိ နိစ္ဆိတေ၊
နိရောဓာနုဂတာ ဇာတိ၊ သိဒ္ဓါဝဿံ နိယာမတော။
တတောဒယာဝ ပဋ္ဌာယ၊ အတ္ထာယ သူရိယော ဝိယ၊
ဝိနာသာယ ပဝတ္တန္တာ၊ ဝယန္တေဝါတိ ပေက္ခတိ။
ဥဒယာဘောဂမောဟာယ ¶ ၊ ဝယန္တိစ္စေဝ သဗ္ဗထာ၊
ဘေဒဿဘာဝမာရဗ္ဘ၊ ဓမ္မေသု သတိ တိဋ္ဌတိ။
အတီတာ စ နိရုဒ္ဓါဝ၊ နိရုဇ္ဈိဿန္တိနာဂတာ၊
နိရုဇ္ဈန္တေဝ ဝတ္တန္တာ၊ ဣစ္စေဝမနုပဿတော။
နိဇ္ဈရောဝ ဂိရဂ္ဂမှိ၊ ဝါရိဝေါဏတပေါက္ခရေ၊
ပဒီပေါ ဝိယ ဈာယန္တော၊ အာရဂ္ဂေရိဝ သာသပေါ။
အာတပေ ဝိယ ဥဿာဝေါ၊ ပရိဿာဝေ ဇလံ ဝိယ၊
မဒ္ဒိတံ ဖေဏပိဏ္ဍံဝ၊ လောဏပိဏ္ဍမိဝေါဒကေ။
ဥဒကေ ဒဏ္ဍရာဇီဝ၊ ဝိဇ္ဇုတာဝ ဝလာဟကေ၊
ဇလံ တတ္တကပါလေဝ၊ သလိလေ ဝိယ ဗုဗ္ဗုဠံ။
ဝါတဗ္ဘာဟတတူလံဝ၊ တီရံ ပတ္တာဝ ဝီစိယော၊
ဖလံ ဗန္ဓနမုတ္တံဝ၊ တိဏာနီဝ ဟုတာဝဟေ။
ဇာယန္တာပိ စ ဇိယျန္တာ၊ မိယျန္တာ စ နိရန္တရံ၊
နိရောဓာယာဘိဓာဝန္တာ၊ ဘင်္ဂါဘိမုခပါတိနော။
ဝိဂစ္ဆန္တာဝ ဒိဿန္တိ၊ ခီယန္တန္တရဓာယိနော၊
ဝိဒ္ဓံသယန္တာ သင်္ခါရာ၊ ပတန္တာ စ ဝိနာသိနော။
ဘင်္ဂဉာဏံ ¶ တမက္ခာတံ၊ ယေန ဉာဏေန ပဿတော၊
အနိစ္စန္တာနုဓာဝန္တိ၊ တိဝိဓာပိ ဝိပဿနာ။
ဥဒယဗ္ဗယဘင်္ဂေသု၊ ပါကဋာ ဟိ အနိစ္စတာ၊
ဘယာဒီနဝနိဗ္ဗေဒေ၊ ဒုက္ခတာနတ္တတာ တတော။
ဣတ္ထံ ဘင်္ဂမဓိဋ္ဌာယ၊ ပဿန္တဿ တိလက္ခဏံ၊
သင်္ခါရာ သဘယာ ဟုတွာ၊ သမုပဋ္ဌန္တိ ယောဂိနော။
ဝါဠမိဂါနုဗဒ္ဓါဝ၊ နိမ္မုဇ္ဇန္တာ ဝိယဏ္ဏဝေ၊
အမနုဿဂဟိတာဝ၊ ပရိက္ခိတ္တာဝ ဝေရိဟိ။
ကဏှသပ္ပသမာလီဠှာ ¶ ၊ စဏ္ဍဟတ္ထိသမုဋ္ဌိတာ၊
ပပါတာဝါဋပက္ခန္တာ၊ ပတန္တာဝ ဟုတာဝဟေ။
ဝဇ္ဈပ္ပတ္တာ မဟာစောရာ၊ ဆိဇ္ဇန္တာ ဝိယ သီသတော၊
သူလမာရောပိယန္တာဝ၊ ပဗ္ဗတေနောတ္ထဋာ ဝိယ။
ဇာတိသင်္ကဋပက္ခန္တာ၊ ဇရာဗျာဓိနိပီဠိတာ၊
မရဏာသနိသမ္မဒ္ဒါ၊ မဟာဗျသနဘာဂိနော။
မစ္စုနဗ္ဘာဟတာ နိစ္စံ၊ ဒုက္ခဘာရသမောတ္ထဋာ၊
သောကောပါယာသနိဿန္ဒာ၊ ပရိဒေဝပရာယဏာ။
တဏှာဒိဋ္ဌိမမတ္တေန၊ သတ္တာ ဧတ္ထာဓိမုစ္ဆိတာ၊
ဗဒ္ဓါ ဘယေန ဗဒ္ဓါဝ၊ မုတ္တာဝ ဘယမုတ္တကာ။
ဣတိ သင်္ခါရဓမ္မေသု၊ ဘယုပ္ပတ္တိမုဒိက္ခတော၊
ဘယဉာဏန္တိ ဘာသန္တိ၊ ဘယမုတ္တာ မဟေသယော။
သဘယာ ပုန သင်္ခါရာ၊ သန္ဒိဿန္တိ သမန္တတော၊
အဟိတာဝဟိတာနိစ္စမာဒီနဝံ နိရန္တရံ။
ဂူထကူပံဝ ကုထိတံ၊ ဘသ္မစ္ဆန္နောဝ ပါဝကော၊
သရက္ခသံဝ သလိလံ၊ သဝိသံ ဝိယ ဘောဇနံ။
ဝနံ ¶ ဝါဠမိဂါကိဏ္ဏံ၊ မဂ္ဂေါ စောရမဟဗ္ဘယော၊
ဘိဇ္ဇမာနာ မဟာနာဝါ၊ ဖလန္တာ အသနီ ယထာ။
အာဝုဓာကုလသန္နဒ္ဓါ၊ ယုဒ္ဓဘူမိပတိဋ္ဌိတာ၊
သင်္ဂတာဝ မဟာသေနာ၊ ဃောရာနတ္ထနိယာမိတာ။
ရထံ စက္ကသမာရုဠှံ၊ ဝုယှန္တံ ဝဠဝါမုခံ၊
ကပ္ပုဋ္ဌာနမဟာရမ္ဘံ၊ ကပ္ပော ပတ္တန္တရော ယထာ။
တထာ ¶ လောကာ တယောပေတေ၊
မဟောပဒ္ဒဝသင်္ကုလာ၊
ဍယှန္တေကာဒသဂ္ဂီဟိ၊
ပရိပ္ဖန္ဒပရာယဏာ။
မဟာရညမိဝါဒိတ္တံ၊ ဘဝယောနိဂတိဋ္ဌိတိ-
သတ္တာဝါသာ သမီဘူတာ၊ ဇလိတင်္ဂါရကာသုကာ။
အာသီဝိသာ မဟာဘူတာ၊ ဝဓကာ ခန္ဓပဉ္စကာ၊
စက္ခာဒယော သုညာ ဂါမာ၊ ဂေါစရာ ဂါမဃာတကာ။
ဣစ္စာနယသမာကိဏ္ဏံ၊ ဘဝသာဂရမဏ္ဍလံ၊
လေဏံ တာဏံ ပတိဋ္ဌာ ဝါ၊ သရဏံ ဝါ န ဝိဇ္ဇတိ။
ဧတ္ထာဘိရောဓိနော ဗာလာ၊ ဝင်္ကဃသ္တာဝ မီနကာ၊
မဟာသကဋုပဗ္ဗုဠှာ၊ မဟဗ္ဘယပတိဋ္ဌိတာ။
ဇာယမာနာဝ ဇိယျန္တာ၊ နာနာဗျသနပီဠိတာ၊
ဝိပတ္တာဝဋ္ဋပတိတာ၊ မရဏာဗဒ္ဓနိစ္ဆယာ။
မောဟန္ဓကာရပိဟိတာ၊ စတုရောဃသမောတ္ထဋာ၊
ဝိတုန္နာ ဒုက္ခသလ္လေန၊ ဝိဟညန္တိ ဝိဃာတိနော။
ဣတ္ထဉ္စ ဝိသပုပ္ဖံဝ၊ နာနာနတ္ထဖလာဝဟံ၊
ဒုက္ခာနုဗန္ဓသမ္ဗာဓံ၊ အာဗာဓံဝ သမုဋ္ဌိတံ။
အာသီဝိသံဝ ¶ ကုပိတံ၊ ဃောရံ ဘယနိဗန္ဓနံ၊
အသိသူနံဝ သာရမ္ဘံ၊ ဒုက္ခာယူဟနကံ ပဒံ။
သဝိဒါဟပရိပ္ဖန္ဒပက္ကဗန္ဓမိဝေါဒကံ၊
ဥပ္ပာဒဉ္စ ပဝတ္တဉ္စ၊ နိမိတ္တာယူဟနံ တထာ။
ပဋိသန္ဓိဉ္စ ပဿန္တံ၊ ဉာဏမာဒီနဝံ မတံ၊
တေဘူမကေသု တေနာယမဝုဒ္ဓိံ ပဋိဝိဇ္ဈတိ။
ဘယဘေရဝပက္ခန္တေ၊ ဗဟွာဒီနဝပစ္စယေ၊
သင်္ခါရေ သမဝေက္ခန္တော၊ နိဗ္ဗိန္ဒတိ နိရာလယော။
ဝိသံ ¶ ဇီဝိတုကာမောဝ၊ ဝေရိကေ ဝိယ ဘီရုကော၊
သုပဏ္ဏံ နာဂရာဇာဝ၊ စောရံ ဝိယ မဟဒ္ဓနော။
ဒုက္ခာနုသယသမ္ဗာဓေ၊ ဗာဓမာနေ ဝိဘာဝယံ၊
သံဝေဇေတိ နိရာနန္ဒေ၊ ပရိပန္ထဘယာကုလေ။
သုဒ္ဓါ မုတ္တကရီသံဝ၊ သုဟိတော ဝမိတံ ဝိယ၊
သုဝိလိတ္တောဝ ဒုဂ္ဂန္ဓံ၊ သုနှာတော အင်္ဂဏံ ဝိယ။
ရာဂဒေါသပရိက္လိဋ္ဌေ၊ စတုရာသဝပူတိကေ၊
ဟီနလောကာမိသာသာရေ၊ သံက္လေသဝိသဒူသိတေ။
သင်္ခါရေပိ ဇိဂုစ္ဆန္တော၊ နာဘိနန္ဒတိ ပဏ္ဍိတော၊
တဿေတံ နန္ဒိနိဿဋ္ဌံ၊ နိဗ္ဗိဒါဉာဏမဗြဝုံ။
သဘယာဒီနဝေ ဒိသွာ၊ သင်္ခါရေ ပုန ပဏ္ဍိတော၊
နိဗ္ဗိန္ဒန္တော တတော တေဟိ၊ ပရိမုစ္စိတုမိစ္ဆတိ။
မီနာဝ ကုမီနေ ဗဒ္ဓါ၊ ပဉ္ဇရေ ဝိယ ပက္ခိနော၊
စောရော စာရကဗဒ္ဓါဝ၊ ပေဠာယန္တောဝ ပန္နဂေါ။
ပင်္ကေ သန္နော မဟာနာဂေါ၊ စန္ဒော ရာဟုမုခံ ဂတော၊
မိဂေါ ယထာ ပါသဂတော၊ တထာ သံသာရစာရကေ။
အဝိဇ္ဇာပရိယောနဒ္ဓေ ¶ ၊ ခန္ဓပဉ္စကသန္ထရေ၊
ဒိဋ္ဌိဇာလပဋိစ္ဆန္နေ၊ ဝိပလ္လာသပရိက္ခိတေ။
ပဉ္စနီဝရဏာဗဒ္ဓေ၊ မာနတ္ထမ္ဘသမုဿယေ၊
ဣစ္ဆာပပါတဂမ္ဘီရေ၊ ဝိပတ္တိဝိနိပါတနေ။
ဇရာဗျာဓိသမုပ္ပာဒေ၊ ဓူမကေတုပပတ္တိကေ၊
ကောဓူပနာဟဒဟနေ၊ သောကောပါယာသဓူပိတေ။
မဒပ္ပမာဒါဝရောဓေ၊ ဘဝတဏှာဝကဍ္ဎနေ၊
ဝိပ္ပယောဂသမုတ္တာသေ၊ နိစ္စာပါယဘယာကုလေ။
ဆာလမ္ဗာဘိဟတေ ¶ နိစ္စံ၊ ဖဿဒွါရာဓိကုဋ္ဋနေ၊
သဉ္စေတနာကာရဏိကေ၊ ဝေဒနာကမ္မကာရဏေ။
အနတ္ထာလာပနိဂ္ဃောသေ၊ က္လေသရက္ခသလာလိတေ၊
မရဏာရမ္ဘနိဋ္ဌာနေ၊ ဗဒ္ဓါ မုတ္တိံ ဂဝေသတိ။
အဂ္ဂိံ ဝိယ စ သမ္ဖုဋ္ဌ-မသုစိံ ဂဟိတံ ဝိယ၊
ပေတံ ခါဒိတုကာမံဝ၊ ဝိက္ကန္တေန္တမိဝါဝုဓံ။
မဟာဗျသနုပဿဋ္ဌေ၊ သင်္ခါရေ မောတ္တုမိစ္ဆတော၊
မုစ္စိတုကမျတာဉာဏမုပ္ပန္နန္တိ ပဝုစ္စတိ။
ဒုဇ္ဇဟေ ပလိဗဇ္ဈန္တေ၊ ဂန္ထာနုသယသင်္ဂမေ၊
တဏှုပါဒါနဂဟဏေ၊ နန္ဒိရာဂါနုဗန္ဓနေ။
ဒိဋ္ဌိမာနမဒတ္ထဒ္ဓေ၊ လောဘပါသနိရန္တရေ၊
သံယောဇနမဟာဒုဂ္ဂေ၊ စိရကာလပ္ပပဉ္စိတေ။
သင်္ခါရေ မုဉ္စတစ္စန္တံ၊ အာဝိဇ္ဈိတွာဝ ပန္နဂံ၊
လက္ခဏာနုပနိဇ္ဈာယ၊ သုခုမံ ပန ယောနိသော။
မဇ္ဈတ္တဂဟဏော တသ္မာ၊ နိရပေက္ခဝိမုတ္တိယာ၊
ဝဂ္ဂုလီဝါဖလံ ရုက္ခံ၊ ဝီမံသတိ ဝိသေသတော။
ဝိဟတံ ¶ ဝိယ ကပ္ပာသံ၊ ဝိဟနန္တော ပုနပ္ပုနံ၊
ဂန္ဓံ ဝိယ စ ပိသေန္တော၊ ပိသိတံယေဝ သာဓုကံ။
အနိစ္စာ ဒုက္ခာနတ္တာတိ၊ သတိမာ သုသမာဟိတော၊
အာဟစ္စ ပဋိဝိဇ္ဈန္တော၊ လက္ခဏာနိ ဝိပဿတိ။
ဝိပဿန္တဿ တဿေဝံ၊ ပဋိသင်္ခါနုပဿနာ-
ဉာဏမိစ္စာဟု နိပုဏံ၊ ဝိစိနန္တံ ဝိသာရဒါ။
ဣတိ သမ္မာ ဝိပဿန္တော၊ သစ္ဆိကတွာ တိလက္ခဏံ၊
ယထာဘူတသဘာဝေန၊ တတ္ထေဝမနုပဿတိ။
အနိစ္စာ ¶ ဝတ သင်္ခါရာ၊ နိစ္စာတိ ဂဟိတာ ပုရေ၊
ဒုက္ခာဝ သုခတော ဒိဋ္ဌာ၊ အနတ္တာဝ ပနတ္တတော။
အနိစ္စာ ဒုက္ခာနတ္တာ စ၊ သင်္ခတာ ပုန သဗ္ဗထာ၊
အလဗ္ဘနေယျဓမ္မာ စ၊ တထေဝါကာမကာရိယာ။
ဓာတုမတ္တာ ပရာဓီနာ၊ အတ္တာဓေယျဝိဝဇ္ဇိတာ၊
မစ္စုဓေယျဝသာနီတာ၊ ဥပဓိဟတဂေါစရာ။
အဟံ မမန္တိ ဝေါဟာရော၊ ပရော ဝါထ ပရဿ ဝါ၊
အတ္တာ ဝါ အတ္တနီယံ ဝါ၊ ဝတ္ထုတော နတ္ထိ ကတ္ထစိ။
ယထာပိ အင်္ဂသမ္ဘာရာ၊ ဟောတိ သဒ္ဒေါ ရထော ဣတိ၊
ဧဝံ ခန္ဓေသု သန္တေသု၊ ဟောတိ သတ္တောတိ သမ္မုတိ။
တတ္ထ ကပ္ပေန္တိ အတ္တာနံ၊ ဗာလာ ဒုမ္မေဓိနော ဇနာ၊
အဇ္ဈတ္တံ ဝါ ဗဟိဒ္ဓါ ဝါ၊ ပဿတော နတ္ထိ ကိဉ္စနံ။
သုခိတော ဒုက္ခိတော ဝါထ၊ ပုဂ္ဂလော နာမ ကတ္ထစိ၊
ဝတ္ထုတော နတ္ထိ သဗ္ဗတ္ထ၊ သင်္ခါရာ တံသဘာဝိနော။
ဇာယမာနာ စ ဇိယျန္တာ၊ မိယျမာနာ စ သင်္ခတာ၊
အတ္တာဝ ဒုက္ခိတာ ဟေတေ၊ န တု ဒုက္ခာယ ကဿစိ။
ဒုက္ခမေဝ ¶ ဟိ သမ္ဘောတိ၊ ဒုက္ခံ တိဋ္ဌတိ ဝေတိ စ၊
နာညတြ ဒုက္ခာ သမ္ဘောတိ၊ နာညံ ဒုက္ခာ နိရုဇ္ဈတိ။
ဧတ္ထ ဂယှူပဂံ နတ္ထိ၊ ပလာသေတံ ပပဉ္စိတံ၊
နိရုဒ္ဓဿ သမာယူဟာ၊ နိရတ္ထကသမုဗ္ဘဝါ။
အနိစ္စာ ဟောန္တု သင်္ခါရာ၊ ဒုက္ခိတာ ဝါ မမေတ္ထ ကိံ၊
အနတ္တာ ဝါတိ? သင်္ခါရုပေက္ခာဉာဏံ ပဝတ္တတိ။
ဣတိ ဒိသွာ ယထာဘူတံ၊ ယာဝ ဘင်္ဂါ တတော ပရံ၊
ဂဏှန္တီ ဘာဝနာဂဗ္ဘံ၊ ပရိပက္ကာ ဝိပဿနာ။
အဝဿံ ဘင်္ဂနိဋ္ဌာနေ၊ ဘယာဒီနဝနိစ္ဆိတေ၊
နိဗ္ဗိန္ဒိတွာ ဝိရဇ္ဇန္တော၊ ပဋိသင်္ခါယုပေက္ခတိ။
တတ္ထ ¶ မုတ္တကရီသံဝ၊ ခေဠပိဏ္ဍံဝ ဥဇ္ဈိတံ၊
ဝိဿဋ္ဌပရပုတ္တံဝ၊ ဝိဿဋ္ဌဘရိယံ ဝိယ။
ပဝတ္တဉ္စ နိမိတ္တဉ္စ၊ ပဋိသင်္ခါယုပေက္ခတော၊
သဗ္ဗသင်္ခါရဓမ္မေသု၊ ဂတိယောနိဘဝေသု ဝါ။
ဝါရိ ပေါက္ခရပတ္တေဝ၊ သူစိကဂ္ဂေဝ သာသပေါ၊
ခိတ္တံ ကုက္ကုဋပတ္တံဝ၊ ဒဒ္ဒုလံဝ ဟုတာဝဟေ။
န ပသာရီယတီ စိတ္တံ၊ န တု သဇ္ဇတိ ဗဇ္ဈတိ၊
အာလယာ ပတိလီယန္တိ၊ ပရိဝတ္တတိ ဝဋ္ဋတော။
သီတံ ဃမ္မာဘိတတ္တောဝ၊
ဆာတဇ္ဈတ္တောဝ ဘောဇနံ၊
ပိပါသိတောဝ ပါနီယံ၊
ဗျာဓိတောဝ မဟောသဓံ။
ဘီတော ခေမန္တဘူမိံဝ၊ ဒုဂ္ဂတောဝ မဟာနိဓိံ၊
အဉ္ဇသံ မဂ္ဂမုဠှောဝ၊ ဒီပံ ဝိယ စ အဏ္ဏဝေ။
အဇရာမရမစ္စန္တံ ¶ ၊ အသင်္ခါရမနာသဝံ၊
သဗ္ဗဒုက္ခက္ခယံ ဌာနံ၊ နိဗ္ဗာနမဘိကင်္ခတိ။
ဝုဋ္ဌာနဂါမိနီ စာယံ၊ သိခပ္ပတ္တာ ဝိပဿနာ၊
သကုဏီ တီရဒဿီဝ၊ သာနုလောမာ ပဝတ္တတိ။
အပ္ပဝတ္တမနိမိတ္တံ၊ ပဿန္တော ပန သန္တတော၊
ပက္ခီဝ နိပ္ဖလံ ရုက္ခံ၊ ဟိတွာ ဝုဋ္ဌာတိ သင်္ခတာ။
ဥပစာရသမာဓီတိ၊ ကာမာဝစရဘာဝနာ၊
မုတ္တောယံ လောကိယော မဂ္ဂေါ၊ ပုဗ္ဗဘာဂဝိပဿနာ။
ပရိပက္ကာ ကမေနေဝံ၊ ပရိဘာဝိတဘာဝနာ၊
ပရိစ္စဇန္တီ သင်္ခါရေ၊ ပက္ခန္ဒန္တီ အသင်္ခတေ။
ဇနေတာနုတ္တရံ ¶ မဂ္ဂ-မာသေဝနဝိသေသတော၊
ကဋ္ဌသင်္ဃဋ္ဋနာ ဇာတာ၊ အစ္စိဓူမာဝ ဘာသုရံ။
ဥဂ္ဂစ္ဆတိ ယထာဒိစ္စော၊ ပုရက္ခတွာရုဏံ တထာ၊
ဝိပဿနံ ပုရက္ခတွာ၊ မဂ္ဂဓမ္မော ပဝတ္တတိ။
တထာ ပဝတ္တမာနော စ၊ နိဗ္ဗာနပဒဂေါစရော၊
ဝိမောက္ခတ္တယနာမေန၊ ယထာရဟမသေသတော။
က္လေသဒူသိတသန္တာနေ၊ အဘိဟန္တွာ ဝိဂစ္ဆတိ၊
ဧကစိတ္တက္ခဏုပ္ပာဒေါ၊ အသနီ ဝိယ ပဗ္ဗတံ။
ပုဗ္ဗေ ဝုတ္တနယေနေဝ၊ အပ္ပနာနယမီရယေ၊
ပါဒကဇ္ဈာနဘေဒေန၊ ဈာနင်္ဂနိယမော ဘဝေ။
ပရိကမ္မောပစာရာနု-လောမသင်္ခါတဂေါစရာ၊
ယံ ကိဉ္စိ လက္ခဏာကာရံ၊ ဝိပဿန္တာ ပဝတ္တရေ။
တတော ဂေါတြဘု နိဗ္ဗာန-မာလမ္ဗိတွာန ဇာယတိ၊
ဗဟိဒ္ဓါ ခန္ဓတော တသ္မာ၊ ဝုဋ္ဌာနန္တိ ပဝုစ္စတိ။
တတော ¶ မဂ္ဂေါ ကိလေသမှာ၊ ဝိမုစ္စန္တော ပဝတ္တတိ၊
ဝုဋ္ဌာနံ ဥဘတော တသ္မာ၊ ခန္ဓတော စ ကိလေသတော။
ဒွေ တထာ တီဏိ ဝါ ဟောန္တိ၊ ဖလာနိ စ တတော ပရံ၊
ဘဝင်္ဂပါတော တံ ဆေတွာ၊ ဇာယတေ ပစ္စဝေက္ခဏာ။
မဂ္ဂံ ဖလဉ္စ နိဗ္ဗာနံ၊ ပစ္စဝေက္ခတိ ပဏ္ဍိတော၊
ဟီနေ ကိလေသေ သေသေ စ၊ ပစ္စဝေက္ခတိ ဝါ န ဝါ။
ဘာဝေတွာ ပဌမံ မဂ္ဂ-မိတ္ထမာဒိဖလေ ဌိတော၊
တတော ပရံ ပရိဂ္ဂယှ၊ နာမရူပံ ယထာ ပုရေ။
ကမေန စ ဝိပဿန္တော၊ ပုနဒေဝ ယထာရဟံ၊
ယထာနုက္ကမမပ္ပေတိ၊ သကဒါဂါမိအာဒယော။
ဣတ္ထံ ¶ ဝိဘတ္တပရိပါကဝိဘာဝနာယံ၊
ဗုဒ္ဓါနုဗုဒ္ဓပရိဘာဝိတဘာဝနာယံ၊
ပစ္စုဒ္ဓရေတိ ဘဝသာဂရပါရဂါမီ၊
မဂ္ဂေါ မဟေသိ ဂုဏသာဂရပါရဂါမီ။
ဣစ္စေတံ ဒသဝိဓ ဘာဝနာဝိဘာဂံ၊
ဘာဝေတွာ ပရမဟိတာဝဟံ ကမေန၊
ပပ္ပောန္တိ ပဒမဇရာမရံ စိရာယ၊
သံက္လေသံ သကလမဝဿဇန္တိ ဓီရာ။
ဣတိ နာမရူပပရိစ္ဆေဒေ ဒသာဝတ္ထာဝိဘာဂေါ နာမ
ဒွါဒသမော ပရိစ္ဆေဒေါ။