📜
၁၃။ တေရသမော ပရိစ္ဆေဒေါ
နိဿန္ဒဖလဝိဘာဂေါ
ဝိပဿနာယ ¶ နိဿန္ဒမိတိ ဝုတ္တမိတော ပရံ၊
သစ္စာနံ ပဋိဝေဓာဒိံ၊ ပဝက္ခာမိ ယထာက္ကမံ။
ပရိညာ စ ပဟာနဉ္စ၊ သစ္ဆိကိရိယာ စ ဘာဝနာ၊
ဣတိ ဒုက္ခာဒိသစ္စေသု၊ ကိစ္စမာဟု စတုဗ္ဗိဓံ။
တံ သဗ္ဗံ မဂ္ဂကာလမှိ၊ ကရိဿတိ တတော ပရံ၊
ပဋိပဿဒ္ဓကိစ္စတ္တာ၊ ကတံ ဟောတိ ဖလေ ကထံ။
ဆိန္နတာလော ဖလဿေဝ၊ ဆိန္နာနုသယမူလကာ၊
ခန္ဓာ နာလမဓိဋ္ဌာနံ၊ ဝိပလ္လာသပဝတ္တိယာ။
အစ္စန္တပဋိပက္ခတ္တာ၊ စတုမဂ္ဂပဝတ္တိယာ၊
ပရံ က္လေသာ န ဇာယန္တိ၊ ဒဍ္ဎဗီဇင်္ကုရံ ယထာ။
နိယျာနဋ္ဌဝိသေသေန၊ အညမညဿ ပစ္စယော၊
မဂ္ဂေါဝ မဂ္ဂံ ဘာဝေတိ၊ ဇာယမာနောထ ဝါ ပုန။
မဂ္ဂပ္ပဝတ္တိသန္တာနေ ¶ ၊ ဘာဝနာတိ ပဝုစ္စတိ၊
ဝတ္တမာနေန တံ ကိစ္စံ၊ နိပ္ဖာဒိတမသေသတော။
ဣတိ တီဏိပိ သစ္စာနိ၊ ကိစ္စတော ပဋိဝိဇ္ဈတိ၊
နိဗ္ဗာနံ သစ္ဆိကုဗ္ဗန္တော၊ မဂ္ဂေါ ဧကက္ခဏေ သဟ။
ကိစ္စပ္ပဝတ္တိတော စေတ္ထ၊ ပဋိဝေဓောတိ ဝုစ္စတိ၊
တဉ္စ သာဓေတိ မဂ္ဂေါယံ၊ နိယျန္တော သန္တိဂေါစရော။
ပရိစ္စဇိတွာ သင်္ခါရေ၊ မဂ္ဂဿာရဗ္ဘ နိဗ္ဗုတိံ၊
နိယျာနမေဝ သစ္စေသု၊ ကိစ္စသာဓနမီရိတံ။
မဂ္ဂေါ ¶ ဧဝ ဟိ နိယျာတိ၊ သေသာ တဿောပကာရကာ၊
အပ္ပေန္တာ ဈာနဓမ္မာ စ၊ ဗုဇ္ဈန္တာ ဗောဓိပက္ခိယာ။
တသ္မာ တဿေဝ ဝုဋ္ဌာနံ၊ ပကာသေန္တိ ဝိသေသတော၊
ခန္ဓေဟိ စ ကိလေသေဟိ၊ ဝိမောက္ခတ္တယတော ကထံ။
ကတွာနာဘိနိဝေသံ တု၊ ယတ္ထ တတ္ထ ယထာ တထာ၊
ဘူမိဓမ္မံ ပရိဂ္ဂယှ၊ ဝိပဿိတွာ တတော ပရံ။
ယတော ကုတောစိ ဝုဋ္ဌာနံ၊ ယဒိ ဟောတိ အနိစ္စတော၊
ဟုတွာဓိမောက္ခဗဟုလော၊ သဒ္ဓိန္ဒြိယဝိသေသတော။
အနိမိတ္တဝိမောက္ခေန၊ နိယျန္တော သတ္တပုဂ္ဂလော၊
သဒ္ဓါနုသာရီ ပဌမေ၊ မဇ္ဈေ သဒ္ဓါဝိမုတ္တကော။
အန္တေ ပညာဝိမုတ္တောတိ၊ တမီရေန္တိ တထာဂတာ၊
သင်္ခါရေ ဒုက္ခတော ဒိသွာ၊ ဝုဋ္ဌဟန္တော သ ပုဂ္ဂလော။
ပဿဒ္ဓိဗဟုလော ဟုတွာ၊ သမာဓိန္ဒြိယလာဘတော၊
တထေဝါပ္ပဏိဟိတေန၊ နိယျန္တော တိဝိဓော ဘဝေ။
အနတ္တတော ဝုဋ္ဌဟိတွာ၊ ဝေဒဗာဟုလျယောဂတော၊
သုညတေနာထ နိယျန္တော၊ ပညိန္ဒြိယဝိသေသတော။
ဓမ္မာနုသာရီ ပဌမေ၊ ဒိဋ္ဌိပ္ပတ္တော တတော ပရံ၊
အန္တေ ပညာဝိမုတ္တောတိ၊ တမ္ပိ ဒီပေန္တိ ပဏ္ဍိတာ။
အာနေဉ္ဇပါဒကဇ္ဈာန-နာမကာယဝိသေသတော ¶ ၊
သစ္ဆိကတွာန နိဗ္ဗာနံ၊ မဇ္ဈေ ဆ ကာယသက္ခိနော။
အရူပတော စ မဂ္ဂေန၊ အာနေဉ္ဇေန စ ရူပတော၊
ဝိမုတ္တော ဥဘတောဘာဂ-ဝိမုတ္တော အရဟာ ဘဝေ။
တိဝိမောက္ခမုခီဘူတာ၊ ဣတိ ဝုဋ္ဌာနသာဓိကာ၊
သတ္တပုဂ္ဂလဘေဒဉ္စ၊ သမ္ပာဒေတိ ဝိပဿနာ။
အဓိမုစ္စတိ ¶ သဒ္ဓါ စ၊ ယထာဝတ္ထုသဘာဝတော၊
ဉေယျဓမ္မေသု သဗ္ဗတ္ထ၊ ပညာ စ ပဋိဝိဇ္ဈတိ။
တသ္မာ သဒ္ဓါ စ ပညာ စ၊ ဝတ္ထုနိစ္ဆယလက္ခဏာ၊
ဝတ္ထုပ္ပတိဋ္ဌိတာ စာယံ၊ တိလက္ခဏဝိပဿနာ။
တသ္မာ သဒ္ဓါဓုရော ယောဂီ၊ ဒိသွောဠာရိကလက္ခဏံ၊
တတော ပရမနတ္တာတိ၊ သုခုမေ အဓိမုစ္စတိ။
တဿေဝမဓိမုတ္တဿ၊ သဒ္ဓါ ဝါ ပန ကေဝလာ၊
သမာဓိန္ဒြိယာဓိကာ စ၊ ဝုဋ္ဌာနဃဋိကာ ဘဝေ။
ထူလလက္ခဏမောဟာယ၊ ပညာဓုရေ ဝိပဿတော၊
ဓမ္မသဘာဝမာဟစ္စ၊ သုခုမံ ပဋိဝိဇ္ဈတိ။
တသ္မာ သဒ္ဓါဓုရဿေဝ၊ ဝုဋ္ဌာနဒွယမာဒိတော၊
အန္တေ သဒ္ဓါနုဂတဿ၊ ပညာ သုပရိပူရတိ။
ပညာဓုရဿ သေသန္တိ၊ ကေစိ အာစရိယာ ပန၊
ဓုရသံသန္ဒနံ နာမ၊ ဝုဋ္ဌာနေသု ဝိဘာဝယုံ။
သတ္တက္ခတ္တုပရမော စ၊
ကောလံကောလော တထာပရော၊
ဧကဗီဇီတိ တိဝိဓော၊
သောတာပန္နော ပဝုစ္စတိ။
သကိံဒေဝ ဣမံ လောကံ၊ အာဂန္တွာ ပုန ပုဂ္ဂလော၊
သကဒါဂါမိနာမေန၊ ဒုတိယောပိ ပကာသိတော။
အန္တရာပရိနိဗ္ဗာယီ ¶ ၊ ဥပဟစ္စာပရော တထာ၊
အသင်္ခါရံ သသင်္ခါရံ၊ ဥဒ္ဓံသောတောတိ ပဉ္စဓာ။
အနာဂါမီ စ တတိယော၊ စတုတ္ထော အရဟာတိ စ၊
ဣတ္ထံ ဖလဋ္ဌာ စတ္တာရော၊ မဂ္ဂဋ္ဌာ စ တတောပရေ။
ဘာဝနာပရိယာယေန ¶ ၊ ပဋိဝေဓာနုရူပတော၊
စတ္တာရော စ ယုဂါ ဟောန္တိ၊ အဋ္ဌ စာရိယပုဂ္ဂလာ။
ဒိဋ္ဌိကင်္ခါ ပဟီယန္တိ၊ အာဒိမဂ္ဂေန သဗ္ဗထာ၊
အပါယဂမနီယမ္ပိ၊ ပါပမညံ ပဟီယတိ။
သကဒါဂါမိမဂ္ဂေန၊ ခီယန္တောဠာရိကာ တထာ၊
အနာဂါမိကမဂ္ဂေန၊ ကာမဒေါသာဝ သဗ္ဗထာ။
အရဟတ္တေန သဗ္ဗေပိ၊ က္လေသာ ခီယန္တိ သဗ္ဗထာ၊
က္လေသဟာနိ ယထာယောဂ-မိတိ ဉေယျာ ဝိဘာဝိနာ။
ပဋိသမ္ဘိဒါ စတဿော၊ အတ္ထေ ဓမ္မေ နိရုတ္တိယံ၊
ပဋိဘာနေ စ ဘာသန္တိ၊ ဉာဏံ ဘေဒဂတံ ဗုဓာ။
ဟေတုပ္ဖလဉ္စ နိဗ္ဗာနံ၊ ဘာသိတတ္ထော တထာပရော၊
ပါကာကြိယာတိ ပဉ္စေတေ၊ အတ္ထနာမေန ဘာသိတာ။
ဟေတု စာရိယမဂ္ဂေါ စ၊ ဘာသိတဉ္စ တထာပရံ၊
ကုသလာကုသလဉ္စေတိ၊ ပဉ္စ ဓမ္မော ပကာသိတော။
တတ္ထေဝံ ဒသဓာ ဘေဒေ၊ အတ္ထဓမ္မေ ယထာရဟံ၊
ယော ဝေါဟာရော သဘာဝေန၊ သာ နိရုတ္တီတိ သမ္မတာ။
တံတံဂေါစရကိစ္စာဒိ-ဘေဒဘိန္နံ တဟိံ တဟိံ၊
ပဝတ္တမာနံ ယံ ဉာဏံ၊ ပဋိဘာနံ တမီရိတံ။
ပုဗ္ဗယောဂေါ ဗာဟုဿစ္စံ၊
ဒေသဘာသာ တထာဂမော၊
ပရိပုစ္ဆာ စာဓိဂမော၊
နိဿယော မိတ္တသမ္ပဒါ။
ဣစ္စူပနိဿယံ ¶ လဒ္ဓါ၊ ဘိဇ္ဇတိ ပဋိသမ္ဘိဒါ၊
အသေက္ခဘူမိယံ ဝါထ၊ သေက္ခဘူမိယမေဝ ဝါ။
သရဿတော ¶ အာဂမတော၊ တထာလမ္ဗဏတောပိ စ၊
နာမုပ္ပတ္တိံ ပကာသေန္တိ၊ ဖလဿ တိဝိဓံ ဗုဓာ။
တိဓာ တတော သမာပတ္တိ၊ သောတာပတ္တိဖလာဒိကာ၊
သုညတာ စာနိမိတ္တာ စ၊ တထာပ္ပဏိဟိတာတိ စ။
တဉ္စ ဝုတ္တနယေနေဝ၊ သမာပဇ္ဇိတုမိစ္ဆတော၊
ဝိပဿန္တဿ သင်္ခါရေ၊ ဖလမပ္ပေတိ အတ္တနော။
နိရောဓံ တု သမာပတ္တိံ၊ ရူပါရူပဿ လာဘကော၊
သမာပဇ္ဇတာနာဂါမီ၊ အရဟာ စ ယထာ တထာ။
ရူပါရူပသမာပတ္တိံ၊ သမာပဇ္ဇ ယထာက္ကမံ၊
ဝုဋ္ဌဟိတွာ ဝိပဿန္တော၊ တတ္ထ တတ္ထေဝ သင်္ခတေ။
ယုဂနန္ဓံ ပဝတ္တေတွာ၊ သမထဉ္စ ဝိပဿနံ၊
ယာဝါကိဉ္စညာယတန-မိတ္ထံ ပတွာ တတော ပရံ။
အဓိဋ္ဌေယျမဓိဋ္ဌာယ၊ ကတွာဘောဂံ ယထာရဟံ၊
မဂ္ဂါရူပသမာပတ္တိံ၊ သမာပဇ္ဇတိ ပဏ္ဍိတော။
တတော နိရောဓံ ဖုသတိ၊ စိတ္တုပ္ပာဒဒွယာ ပရံ၊
တဿေဝံ မနသာဘာဝေါ၊ နိရောဓောတိ ပဝုစ္စတိ။
ဖလစိတ္တသမုပ္ပာဒါ၊ ဝုဋ္ဌာနံ တဿ ဒီပိတံ၊
တတော ဘဝင်္ဂံ ဆေတွာန၊ ပစ္စဝေက္ခတိ ဗုဒ္ဓိမာ။
ဣစ္စာနေကဂုဏာဓာရံ၊ ပညာဘာဝနမုတ္တမံ၊
ဘာဝေယျ မတိမာ ယောဂီ၊ ပတ္ထေန္တော ဟိတမတ္တနော။
ဣတ္ထံ သုသမ္ပာဒိတသီလစိတ္တ-
ပညာဝိသုဒ္ဓီ ပဋိပါဒယန္တာ၊
ပတွာန သမ္ဗောဓိမပေတသောကာ၊
ပါလေန္တိ သောတ္ထိံ ပရမံ စိရာယ။
ပက္ခာလိတက္လေသမလာ မဟေသီ၊
အစ္စန္တဝေါဒါတဂုဏောဒိတတ္တာ၊
လောကဿ ဟောန္တုတ္တမဒက္ခိဏေယျာ။
ဣတိ နာမရူပပရိစ္ဆေဒေ နိဿန္ဒဖလဝိဘာဂေါ နာမ
တေရသမော ပရိစ္ဆေဒေါ။
နိဋ္ဌိတော စ သဗ္ဗထာပိ ဝိပဿနာဝိဘာဂေါ။
နိဂမနကထာ
ဧတ္တာဝတာ ပဋိညာတော၊ ပဝက္ခာမီတိ အာဒိတော၊
နာမရူပပရိစ္ဆေဒေါ၊ ပရိနိဋ္ဌာပိတော မယာ။
တေရသေဝ ပရိစ္ဆေဒါ၊ ဝိဘတ္တာ သတ္တ သာဓိကာ၊
နာမရူပပရိစ္ဆေဒေ၊ ဘာဏဝါရာ ပကာသိတာ။
အဘိဓမ္မပရမတ္ထာ၊ သမထော စ ဝိပဿနာ၊
ဝိသုံ ဝိသုံ ဝိဘတ္တာတိ၊ ဝိဘာဂေတ္ထ တိဓာ မတာ။
သောယံ ဝိဇ္ဇာဝိမောက္ခာ စ၊ ဟဒယေသု ဝိဘာဝိနံ၊
ဝလ္လဘတ္တမဓိဋ္ဌာယ၊ သာသနေတ္ထ ဂဝေသိနံ။
မနောဂတတမုဒ္ဓံသီ၊ ရဝိရံသီဝ ပဏ္ဍိတော၊
ဒဿေတု စိရမာလောကံ၊ သဒ္ဓမ္မရတနာလယေ။
ပဏ္ဍိစ္စံ ¶ ပရမတ္ထေသု၊ ပါဋဝံ ပဋိပတ္တိယံ၊
ပတ္ထယန္တေန ဘိက္ခူန-မိတ္ထံ သုဂတသာသနေ။
နာမရူပပရိစ္ဆေဒ-မသံကိဏ္ဏမနာကုလံ၊
ကုဗ္ဗတာ ဟိတကာမေန၊ သုကတေန ကတေန မေ။
မဟာမေရုနိဘံ ¶ ဂေဟံ၊ မဟာစေတိယဘူသိတံ၊
မဟာဝိဟာရမာရုဠှ-မဟာဗောဓိမဟုဿဝံ။
အလင်္ကာတုံ ပဟောန္တာလံ၊ စိရကာလံ တပေါဓနာ၊
လင်္ကာဒီပဿလင်္ကာရံ၊ ကလင်္ကာပဂတာလယံ။
နာမရူပပရိစ္ဆေဒေါ၊
အန္တရာယံ ဝိနာ ယထာ၊
နိဋ္ဌိတောယံ တထာ လောကေ၊
နိဋ္ဌန္တဇ္ဈာသယာ သုဘာ။
ဣတိ အနုရုဒ္ဓါစရိယေန ဝိရစိတံ
နာမရူပပရိစ္ဆေဒပကရဏံ နိဋ္ဌိတံ။
နမော တဿ ဘဂဝတော အရဟတော သမ္မာသမ္ဗုဒ္ဓဿ