📜
ပဌမော ပရိစ္ဆေဒေါ
၁။ စိတ္တဝိဘာဂေါ
၁။ သရူပသင်္ဂဟကထာ
စိတ္တံ ¶ စေတသိကံ ရူပံ၊ နိဗ္ဗာနန္တိ နိရုတ္တရော၊
စတုဓာ ဒေသယီ ဓမ္မေ၊ စတုသစ္စပ္ပကာသနော။
စိတ္တမေကူနနဝုတိဝိဓံ တတ္ထ ဝိဘာဝယေ၊
ဧကနဝုတိဝိဓံ ဝါ၊ ဧကဝီသသတမ္ပိ ဝါ။
ဒွေပညာသ သရူပေန၊ ဓမ္မာ စေတသိကာ မတာ၊
စိတ္တုပ္ပာဒဝသာ ဘိန္နာ၊ သမ္ပယောဂါနုသာရတော။
အဋ္ဌဝီသဝိဓံ ရူပံ၊ ဘူတောပါဒါယဘေဒတော၊
ဒုဝိဓံ ရူပရူပံ တု၊ အဋ္ဌာရသဝိဓံ ဘဝေ။
နိဗ္ဗာနံ ပန ဒီပေန္တိ၊ အသင်္ခတမနုတ္တရံ၊
အတ္ထနာမဝသာ ဒွေဓာ၊ ပညတ္တီတိ ပဝုစ္စတိ။
တေသံ ဒါနိ ပဝက္ခာမိ၊ ဝိဘာဂံ တု ယထာက္ကမံ၊
စတုဓာ ပရမတ္ထာနံ၊ ဒွိဓာ ပညတ္တိယာ ကထံ။
ကုသလာဒိဝိဘာဂေန ¶ ၊ တတ္ထ စိတ္တံ စတုဗ္ဗိဓံ၊
တထာ ဘူမိဝိဘာဂေန၊ ကာမဘူမာဒိတော ကထံ။
သောမနဿသဟဂတံ၊ ဥပေက္ခာသဟိတံ တထာ၊
ဉာဏေန သမ္ပယုတ္တဉ္စ၊ ဝိပ္ပယုတ္တန္တိ ဘေဒိတံ။
အသင်္ခါရံ သသင်္ခါရမိတိ ဘိန္နံ ပုနဋ္ဌဓာ၊
ကာမာဝစရကုသလံ၊ ကာမေ သုဂတိသာဓကံ။
တက္ကစာရပီတိသုခ-စိတ္တဿေကဂ္ဂတာယုတံ ¶ ၊
ပဌမဇ္ဈာနကုသလံ၊ ပဉ္စင်္ဂိကမုဒါဟဋံ။
ဝိတက္ကဟီနံ ဒုတိယံ၊ ဈာနံ တု စတုရင်္ဂိကံ၊
ဝိစာရဟီနံ တတိယံ၊ ဈာနံ ပန တိဝင်္ဂိကံ။
ပီတိဟီနံ စတုတ္ထဉ္စ၊ ဥပေက္ခေကဂ္ဂတာယုတံ၊
ပဉ္စမဉ္စ ပကာသေန္တိ၊ ဥဘယမ္ပိ ဒုဝင်္ဂိကံ။
ဧဝံ ဈာနင်္ဂဘေဒေန၊ စိတ္တံ ပဉ္စဝိဓံ ဘဝေ၊
ရူပါဝစရကုသလံ၊ ရူပဘူမိပဝတ္တကံ။
အာကာသာနဉ္စာယတနံ၊ ကုသလံ ပဌမံ ဘဝေ၊
ဝိညာဏဉ္စာယတနန္တိ၊ ဒုတိယံ တတိယံ တထာ။
အာကိဉ္စညာယတနံ တု၊ စတုတ္ထံ ပန မာနသံ၊
နေဝသညာနာသညာယ-တနဉ္စေတိ စတုဗ္ဗိဓံ။
အာရုပ္ပကုသလံ နာမ၊ ဥပေက္ခေကဂ္ဂတာယုတံ၊
ဒုဝင်္ဂိကမိဒံ သဗ္ဗံ၊ အာရုပ္ပဘဝသာဓကံ။
သောတာပတ္တိမဂ္ဂစိတ္တံ၊ ပဌမာနုတ္တရံ တထာ၊
သကဒါဂါမိ အနာဂါမိ၊ အရဟတ္တန္တိ သဗ္ဗထာ။
စတုဓာ မဂ္ဂဘေဒေန၊ ဈာနဘေဒေန ပဉ္စဓာ၊
ဝီသတာပရိယာပန္နကုသလံ ဒွယမိဿိတံ။
ဣတ္ထံ ဘူမိဝိဘာဂေန၊ ကုသလံ တု စတုဗ္ဗိဓံ၊
ဧကဝီသာပိ ဗာဝီသံ၊ သတ္တတိံသဝိဓမ္ပိ ဝါ။
သောမနဿသဟဂတံ ¶ ၊ ဥပေက္ခာသဟိတံ တထာ၊
ဒိဋ္ဌိဂတသမ္ပယုတ္တံ၊ ဝိပ္ပယုတ္တန္တိ ဘေဒိတံ။
အသင်္ခါရံ သသင်္ခါရမိတိ ဘိန္နံ ပုနဋ္ဌဓာ၊
လောဘမူလံ ပကာသေန္တိ၊ လောဘမောဟဒွိဟေတုကံ။
ဒေါမနဿသဟဂတံ ¶ ၊ ပဋိဃေန သမာယုတံ၊
အသင်္ခါရံ သသင်္ခါရမိတိ ဘိန္နံ ဒွိဓာ ပန။
ဒေါသမူလံ ပကာသေန္တိ၊ ဒေါသမောဟဒွိဟေတုကံ၊
ဝိစိကိစ္ဆာသဟဂတံ၊ ဥဒ္ဓစ္စသဟိတန္တိ စ။
ဥပေက္ခာဝေဒနာယုတ္တံ၊ မောမူဟံ ဒုဝိဓံ ပန၊
မောဟမူလံ ပကာသေန္တိ၊ မောဟေနေဝေကဟေတုကံ။
ဒွါဒသာကုသလာ နာမ၊ စတုရာပါယသာဓကာ၊
ဧတေ သုဂတိယဉ္စာပိ၊ ဝိပတ္တိဖလဒါယကာ။
စက္ခုသောတဃာနဇိဝှာ-ကာယဝိညာဏနာမကာ၊
ပဉ္စဝိညာဏယုဂဠာ၊ ယုဂဠံ သမ္ပဋိစ္ဆနံ။
သန္တီရဏဒွယဉ္စေဝ၊ ဥပေက္ခာသဟိတံ တထာ၊
ပုညာပုညဝသေနေဝ၊ ဝိပါကာ ဒုဝိဓာ ဌိတာ။
ဥပေက္ခာသဟိတာ တတ္ထ၊ မာနသာ ဒွါဒသေရိတာ၊
ကာယဝိညာဏယုဂဠံ၊ သုခဒုက္ခယုတံ ကမာ။
သောမနဿသဟဂတံ၊ ယံ သန္တီရဏမာနသံ၊
တံ ပုညပါကမေဝါဟု၊ ပါပပါကံ န ဝိဇ္ဇတိ။
ပဉ္စဒွါရမနောဒွါရ-ဝသေန ဒုဝိဓံ ပန၊
ဥပေက္ခာဝေဒနာယုတ္တံ၊ ကြိယာဝဇ္ဇနနာမကံ။
သောမနဿသဟဂတံ၊ ဟသိတုပ္ပာဒမာနသံ၊
ကြိယာဇဝနမိစ္စေဝံ၊ တိဝိဓာဟေတုကကြိယာ။
အဋ္ဌေဝ ပုညပါကာနိ၊ ပါပပါကာနိ သတ္တဓာ၊
ကြိယစိတ္တာနိ တီဏီတိ၊ အဋ္ဌာရသ အဟေတုကာ။
သပုညေဟိ ¶ သမာနာ စ၊ မဟာပါကမဟာကြိယာ၊
မဟဂ္ဂတကြိယာ ပါကာ၊ ဖလစိတ္တာနိ စ ကမာ။
ဣတ္ထမေကူနနဝုတိ-ဝိဓံ ¶ စိတ္တံ ဘဝေ တထာ၊
ဧကနဝုတိဝိဓံ ဝါ၊ ဧကဝီသသတမ္ပိ ဝါ။
တက္ကစာရပီတိသုခစိတ္တဿေကဂ္ဂတာယုတံ၊
သောတာပတ္တိမဂ္ဂစိတ္တံ၊ ပဌမဇ္ဈာနိကံ မတံ။
ဒုတိယံ တက္ကတော ဟီနံ၊ တတိယံ တု ဝိစာရတော၊
စတုတ္ထံ ပီတိတော ဟီနံ၊ ဥပေက္ခေကဂ္ဂတာယုတံ။
ပဉ္စမန္တိ စ ပဉ္စေတေ၊ ပဌမာနုတ္တရာ မတာ၊
ဒိဋ္ဌိကင်္ခါသီလဗ္ဗတပရာမာသပ္ပဟာယိနော။
တထေဝ သကဒါဂါမိမဂ္ဂစိတ္တဉ္စ ပဉ္စဓာ၊
ရာဂဒေါသမောဟတ္တယတနုတ္တကရမီရိတံ။
ကာမဒေါသသမုဂ္ဃာတကရံ နိရဝသေသတော၊
တတိယာနုတ္တရဉ္စာပိ၊ ကုသလံ ပဉ္စဓာ တထာ။
ရူပရာဂါရူပရာဂမာနုဒ္ဓစ္စာပိ စာပရာ၊
အဝိဇ္ဇာ စေတိ ပဉ္စုဒ္ဓံဘာဂိယာနမသေသတော။
သံယောဇနာနံ သေသာနံ၊ သမုဂ္ဃာတကရံ ပရံ၊
စတုတ္ထာနုတ္တရံ မဂ္ဂစိတ္တံ ပဉ္စဝိဓန္တိ စ။
စတ္တာရိ ပဉ္စကာနေဝ၊ မဂ္ဂေသု စ ဖလေသု စ၊
သေသာနိ စေကာသီတီတိ၊ ဧကဝီသသတံ ဘဝေ။
လောကုတ္တရာနံ အဋ္ဌန္နံ၊ ဣစ္စေဝံ ပဉ္စဓာ ပုန၊
ဈာနင်္ဂမဂ္ဂဗောဇ္ဈင်္ဂ-ဝိဘာဂါယ ယထာရဟံ။
ပါဒကဇ္ဈာနမာမဋ္ဌဈာနံ အဇ္ဈာသယော တထာ၊
ဝုဋ္ဌာနဂါမိနီ စေဝ၊ နိယာမေတိ ဝိပဿနာတိ။
ဣတိ စိတ္တဝိဘာဂေ သရူပသင်္ဂဟကထာ နိဋ္ဌိတာ။
ပဌမော ပရိစ္ဆေဒေါ။