📜
တတိယော ပရိစ္ဆေဒေါ
၃။ ဝီထိသင်္ဂဟကထာ
စက္ခုသောတဃာနဇိဝှာ-ကာယာယတန ပဉ္စဓာ၊
ပသာဒါ ဟဒယဉ္စေတိ၊ ဆ ဝတ္ထူနိ ဝိနိဒ္ဒိသေ။
စက္ခုသောတဃာနဇိဝှာ-ကာယဒွါရာ စ ပဉ္စဓာ၊
မနောဒွါရံ ဘဝင်္ဂန္တိ၊ ဆ ဒွါရာ စိတ္တဝီထိယာ။
ရူပသဒ္ဒဂန္ဓရသ-ဖောဋ္ဌဗ္ဗာ ပဉ္စ ဂေါစရာ၊
ဓမ္မာရမ္မဏပညတ္တိ၊ ဆ ဒွါရာရမ္မဏက္ကမာ။
နိမိတ္တဂတိကမ္မာနိ ¶ ၊ ကမ္မမေဝါထ ဂေါစရာ၊
ပဋိသန္ဓိဘဝင်္ဂါနံ၊ စုတိယာ စ ယထာရဟံ။
မရဏာသန္နသတ္တဿ၊ ယထောပဋ္ဌိတဂေါစရံ၊
ဆဒွါရေသု တမာရဗ္ဘ၊ ပဋိသန္ဓိ ဘဝန္တရေ။
ဧကစိတ္တက္ခဏာ ဟောတိ၊ ယာဝဇီဝံ တတော ပရံ၊
ဘဝင်္ဂံ ပရိယောသာနေ၊ စုတိ စေကက္ခဏာ ဘဝေ။
ဒုဟေတာဟေတုစုတိယာ၊ ကာမာဝစရသန္ဓိယော၊
တိဟေတုကာမစုတိယာ၊ သဗ္ဗာပိ ပဋိသန္ဓိယော။
ရူပါဝစရစုတိယာ ¶ ၊ သဟေတုပဋိသန္ဓိယော၊
အာရုပ္ပတောပရိ ကာမေ၊ တတ္ထ ဝါပိ တိဟေတုကာ။
ပဋိသန္ဓိ ဘဝင်္ဂဉ္စ၊ ဧကမေဝေကဇာတိယံ၊
စုတိ စာရမ္မဏဉ္စဿ၊ ဧဝမေဝ ယထာရဟံ။
ရူပါဒါရမ္မဏေ စက္ခု-ပ္ပသာဒါဒိမှိ ဃဋ္ဋိတေ၊
မဇ္ဈေ ဘဝင်္ဂံ ဆိန္ဒိတွာ၊ ဝီထိ နာမ ပဝတ္တတိ။
အာဝဇ္ဇပဉ္စဝိညာဏသမ္ပဋိစ္ဆနတီရဏာ၊
ဝေါဋ္ဌဗ္ဗကာမဇဝနတဒါရမ္မဏနာမကာ။
သတ္တေဝ ဌာနသင်္ခေပါ၊ ပဉ္စဒွါရိကမာနသာ၊
စတုပညာသ သဗ္ဗေပိ၊ ဝိတ္ထာရေန သရူပတော။
အာဝဇ္ဇသဗ္ဗဇဝနတဒါရမ္မဏနာမကာ၊
သတ္တသဋ္ဌိ သရူပေန၊ မနောဒွါရိကမာနသာ။
ဣဋ္ဌေ အာရမ္မဏေ ဟောန္တိ၊ ပုညပါကာနိ သဗ္ဗထာ၊
အနိဋ္ဌေ ပါပပါကာနိ၊ နိယမောယံ ပကာသိတော။
တတ္ထာပိ အတိဣဋ္ဌမှိ၊ တဒါရမ္မဏတီရဏံ၊
သောမနဿယုတံ ဣဋ္ဌမဇ္ဈတ္တမှိ ဥပေက္ခိတံ။
ဂေါစရေတိပရိတ္တမှိ ¶ ၊ အတိအပ္ပာယုကေ ပန၊
ဘဝင်္ဂမေဝ စလတိ၊ မောဃဝါရောတိ သော ကတော။
ဝေါဋ္ဌဗ္ဗနံ ပရိတ္တမှိ၊ ဒွတ္တိက္ခတ္တုံ ပဝတ္တတိ၊
တတော ဘဝင်္ဂပါတောဝ၊ သောပိ မောဃောတိ ဝုစ္စတိ။
ဇဝနဉ္စ မဟန္တမှိ၊ ဇဝိတွာန တတော ပရံ၊
န သမ္ဘောတိ တဒါလမ္ဗံ၊ သောပိ မောဃောတိ ဝုစ္စတိ။
ဂေါစရေတိမဟန္တမှိ၊ အတိဒီဃာယုကေ ပန၊
သမ္ဘောတိ စ တဒါလမ္ဗံ၊ သမ္ပုဏ္ဏောတိ ပဝုစ္စတိ။
ဂေါစရေတိမဟန္တမှိ၊ တဒါရမ္မဏသမ္ဘဝေါ၊
ပဉ္စဒွါရေ မနောဒွါရေ၊ ဝိဘူတေ ပန ဂေါစရေ။
ကာမာဝစရသတ္တာနံ ¶ ၊ ကာမာဝစရဂေါစရေ၊
ပရိတ္တဇဝနေသွေဝ၊ တဒါရမ္မဏမုဒ္ဒိသေ။
နာတိတိက္ခေ နာတိသီဃေ၊ နာတိတေဇုဿဒေ ဇဝေ၊
သမမန္ဒပ္ပဝတ္တမှိ၊ တဒါရမ္မဏမိစ္ဆိတံ။
သုခေါပေတံ တဒါလမ္ဗံ၊ ဥပေက္ခာကြိယတော ပရံ၊
န ဟောတုပေက္ခာသဟိတံ၊ သုခိတကြိယတော တထာ။
န ဟောတိ ဒေါမနဿမှာ၊ သောမနဿိကမာနသံ၊
တဒါရမ္မဏမညဉ္စ၊ ဘဝင်္ဂံ စုတိ ဝါ တထာ။
ရဇ္ဇနာဒိဝသေနေတ္ထ၊ ဇဝနာကုသလံ ဘဝေ၊
ကုသလံ ပန သမ္ဘောတိ၊ သဒ္ဓါပညာဒိသမ္ဘဝေ။
တဒေဝ ဝီတရာဂါနံ၊ ကြိယာ နာမ ပဝုစ္စတိ၊
အဝိပါကတမာပန္နံ၊ ဝဋ္ဋမူလပရိက္ခယာ။
အပ္ပနာဇဝနံ သေသံ၊ မဟဂ္ဂတမနုတ္တရံ၊
ဆဗ္ဗီသတိ ယထာယောဂံ၊ အပ္ပနာဝီထိယံ ဘဝေ။
ပရိကမ္မံ ¶ ကရောန္တဿ၊ ကသိဏာဒိကဂေါစရေ၊
သုသမာဟိတစိတ္တဿ၊ ဥပစာရသမာဓိနာ။
ပရိကမ္မောပစာရာနုလောမဂေါတြဘုတော ပရံ၊
ပဉ္စမံ ဝါ စတုတ္ထံ ဝါ၊ ဇဝနံ ဟောတိ အပ္ပနာ။
ပုထုဇ္ဇနာန သေက္ခာနံ၊ ကာမပုညတိဟေတုတော၊
တိဟေတုကာမကြိယတော၊ ဝီတရာဂါနမပ္ပနာ။
တတြာပိ သုခိတဇဝံ၊ သုခိတဒွယတော ပရံ၊
ဥပေက္ခိတမှာ သမ္ဘောတိ၊ ဥပေက္ခေကဂ္ဂတာယုတံ။
ပဉ္စ ဝါရေ ဆ ဝါ သတ္တ၊ ပရိတ္တဇဝနံ ဘဝေ၊
သကိံ ဒွေ ဝါ တဒါလမ္ဗံ၊ သကိမာဝဇ္ဇနာဒယော။
အပ္ပနာဇဝနဉ္စေကံ၊ ပဌမုပ္ပတ္တိယံ ပန၊
တတော ပရံ ဝသီဘူတံ၊ အဟောရတ္တံ ပဝတ္တတိ။
သကိံ ¶ ဒွေ ဝါ နိရောဓဿ၊ သမာပတ္တိက္ခဏေ ပန၊
စတုတ္ထာရုပ္ပဇဝနံ၊ တတော စိတ္တံ နိရုဇ္ဈတိ။
နိရောဓာ ဝုဋ္ဌဟန္တဿ၊ ဥပရိဋ္ဌဖလဒွယံ၊
ပဉ္စာဘိညာ တထာ မဂ္ဂါ၊ ဧကစိတ္တက္ခဏာ မတာ။
ဖလမေကဒွယံ တထာ၊ တိဿော ဝါ မဂ္ဂဝီထိယံ၊
သမာပတ္တိက္ခဏေ တမ္ပိ၊ အဟောရတ္တံ ပဝတ္တတိ။
ပဉ္စဒွါရေ န လဗ္ဘန္တိ၊ လောကုတ္တရမဟဂ္ဂတာ၊
ဝီထိမုတ္တမနောဓာတု၊ ပဉ္စ စိတ္တာနိ အန္တိမေ။
ပရိတ္တာနေဝ သဗ္ဗာနိ၊ ပဉ္စဒွါရေသု သမ္ဘဝါ၊
မနောဒွါရမှိ ဝေါဋ္ဌဗ္ဗ-တဒါလမ္ဗဇဝါ သိယုံ။
ဃာနဇိဝှာကာယဝီထိ၊ တဒါရမ္မဏမေဝ စ၊
ရူပေ နတ္ထိ တထာရူပေ၊ စက္ခုသောတာပိ ဝီထိယော။
သဗ္ဗာပိ ¶ ဝီထိယော ကာမေ၊
ရူပေ တိဿော ပကာသိတာ၊
ဧကာ ဝီထိ ပနာရူပေ၊
နတ္ထာသညီသု ကာစိပိ။
သတ္တာပိ ဝီထိစိတ္တာနိ၊ ကာမေ ရူပေ ဆ သမ္ဘဝါ၊
အရူပေ ဒွေ မနောဒွါရာ-ဝဇ္ဇနံ ဇဝနန္တိ စာတိ။
ဣတိ စိတ္တဝိဘာဂေ ဝီထိသင်္ဂဟကထာ နိဋ္ဌိတာ။
တတိယော ပရိစ္ဆေဒေါ။