📜
စတုတ္ထော ပရိစ္ဆေဒေါ
၄။ ဝီထိပရိကမ္မကထာ
ပဌမာဝဇ္ဇနံ ပဉ္စ-ဒသန္နံ ပရတော ဘဝေ၊
ဒုတိယာဝဇ္ဇနံ ဟောတိ၊ ဧကဝီသတိတော ပရံ။
ဧကမှာ ¶ ပဉ္စဝိညာဏံ၊ ပဉ္စမှာ သမ္ပဋိစ္ဆနံ၊
သုခသန္တီရဏံ ဟောတိ၊ ပဉ္စဝီသတိတော ပရံ။
သတ္တတိံသတိတော ဟောတိ၊ ဥပေက္ခာတီရဏဒွယံ၊
ဝေါဋ္ဌဗ္ဗနသရူပါနံ၊ ဒွိန္နံ ကာမဇဝါ ပရံ။
မဂ္ဂါဘိညာ ပရံ ဒွိန္နံ၊ တိဏ္ဏန္နံ လောကိယပ္ပနာ၊
ဖလာ စတုန္နံ ပဉ္စန္နံ၊ ဥပရိဋ္ဌဖလဒွယံ။
ဘဝန္တိ စတ္တာလီသမှာ၊ သုခပါကာ ဒွိဟေတုကာ၊
တထေကစတ္တာလီသမှာ၊ ဥပေက္ခာယ သမာယုတာ။
ဟောန္တိ ¶ သတ္တတိတော ကာမေ၊ သုခပါကာ တိဟေတုကာ၊
ဒွါသတ္တတိမှာ ဇာယန္တိ၊ ဥပေက္ခာသဟိတာ ပန။
ဧကူနသဋ္ဌိတော ရူပ-ပါကာ ပါကာ အရူပိနော၊
ကမာဋ္ဌစတ္တာလီသမှာ၊ တထေကဒွိတိဟီနတော။
ပုဗ္ဗသင်္ဂဟမိစ္စေဝံ၊ ဝိဂဏေတွာ ဝိစက္ခဏော၊
ပရသင်္ဂဟသင်္ချာဒိံ၊ ဝိဘာဝေယျ ဝိသာရဒေါ။
ပဉ္စဒွါရာဝဇ္ဇနတော၊ ဒသ စိတ္တာနိ ဒီပယေ၊
သေသာဝဇ္ဇနတော ပဉ္စစတ္တာလီသန္တိ ဘာသိတံ။
ပဉ္စဝိညာဏတော ပါပဝိပါကာ သမ္ပဋိစ္ဆနာ၊
ပရမေကံ ဒွယံ ပုညဝိပါကာ သမ္ပဋိစ္ဆနာ။
သန္တီရဏာ ဒွိဟေတုမှာ၊ ပါကာ ဒွါဒသ ဇာယရေ၊
တိဟေတုကာမပါကမှာ၊ ဧကဝီသတိ လဗ္ဘရေ။
ရူပါဝစရပါကမှာ၊ ပရမေကူနဝီသတိ၊
နဝဋ္ဌာရူပပါကမှာ၊ သတ္တ ဆာပိ ယထာက္ကမံ။
ပဋိဃမှာ တု သတ္တေဝ၊ သိတမှာ တေရသေရိတာ၊
ပါပပုညဒွိဟေတုမှာ၊ ဧကဝီသတိ ဘာဝယေ။
ဒွိဟေတုကာမကြိယတော ¶ ၊ အဋ္ဌာရသ ဥပေက္ခကာ၊
သတ္တရသ သုခေါပေတာ၊ ဝိဘာဝေယျ ဝိစက္ခဏော။
ကာမပုညတိဟေတုမှာ၊ တေတ္တိံသေဝ ဥပေက္ခကာ၊
တေပညာသ သုခေါပေတာ၊ ဘဝန္တီတိ ပကာသိတံ။
တိဟေတုကာမကြိယတော၊ စတုဝီသတိပေက္ခကာ၊
သုခိတမှာ တု ဒီပေယျ၊ ပဉ္စဝီသတိ ပဏ္ဍိတော။
ဒသရူပဇဝမှေကာ-ဒသဒွါဒသ ¶ တေရသ၊
ယထာက္ကမံ ပဉ္စဒသ၊ အာရုပ္ပာ ပရိဒီပယေ။
ဖလမှာ စုဒ္ဒသေဝါဟု၊ မဂ္ဂမှာ တု သကံ ဖလံ၊
ပရံ သင်္ဂဟမိစ္စေဝံ၊ ဝိဂဏေယျ ဝိသာရဒေါ။
ပုဗ္ဗာပရသမောဓာန-မိတိ ဉတွာ တတော ပရံ၊
ဝတ္ထုဝီထိသမောဓာနံ၊ ယထာသမ္ဘဝမုဒ္ဒိသေ။
ပဉ္စ ဝတ္ထူနိ နိဿာယ၊ ကမတော ပဉ္စမာနသာ၊
တေတ္တိံသ ပန နိဿာယ၊ ဟဒယံ မာနသာ သိယုံ။
ကာမပါကမနောဓာတု-ဟသိတုပ္ပာဒမာနသာ၊
ဒေါသမူလာနိ မဂ္ဂေါ စ၊ ရူပဇ္ဈာနာဝ သဗ္ဗထာ။
ဒသာဝသေသာပုညာနိ၊ ကာမပုညမဟာကြိယာ၊
ဝေါဋ္ဌဗ္ဗာရူပဇဝနံ၊ သတ္တ လောကုတ္တရာနိ စ။
ဒွေစတ္တာလီသ စိတ္တာနိ၊ ပဉ္စဝေါကာရဘူမိယံ၊
နိဿာယ ဟဒယံ ဟောန္တိ၊ အရူပေ နိဿယံ ဝိနာ။
အာရုပ္ပပါကာ စတ္တာရော၊ အနိဿာယေတိ သဗ္ဗထာ၊
ဝိတ္ထာရေနဋ္ဌဓာ ဘိန္နံ၊ သင်္ခေပါ တိဝိဓံ ဘဝေ။
တေစတ္တာလီသ နိဿာယ၊ အနိဿာယ စတုဗ္ဗိဓံ၊
နိဿိတာနိဿိတာ သေသာ၊ ဒွေစတ္တာလီသ မာနသာ။
ပဉ္စ စိတ္တပ္ပနာ ဟောန္တိ၊ ကမေနေကေကဝီထိယံ၊
မနောဓာတုတ္တိကံ နာမ၊ ပဉ္စဒွါရိကမီရိတံ။
သုခတီရဏဝေါဋ္ဌဗ္ဗ-ပရိတ္တဇဝနာ ¶ ပန၊
ဧကတိံသာပိ ဇာယန္တေ၊ ဆသု ဝီထီသု သမ္ဘဝါ။
မဟာပါကာ ပနဋ္ဌာပိ၊ ဥပေက္ခာတီရဏဒွယံ၊
ဆသု ဒွါရေသု ဇာယန္တိ၊ ဒသ မုတ္တာ စ ဝီထိယာ။
စုတိသန္ဓိဘဝင်္ဂါနံ၊ ဝသာ ပါကာ မဟဂ္ဂတာ၊
နဝ ဝီထိဝိမုတ္တာတိ၊ ဒသဓာ ဝီထိသင်္ဂဟော။
ဧကဒွါရိကစိတ္တာနိ ¶ ၊ ပဉ္စဆဒွါရိကာ တထာ၊
ဆဒွါရိကဝိမုတ္တာ စ၊ ဝိမုတ္တာတိ စ သဗ္ဗထာ။
ဆတ္တိံသ တယေကတိံသ၊ ဒသ စေဝ နဝေတိ စ၊
ဉတွာ ဝီထိသမောဓာနံ၊ ဂေါစရဉ္စ သမုဒ္ဒိသေ။
ကမတော ပဉ္စဝိညာဏာ၊ လောကုတ္တရမဟဂ္ဂတာ၊
အဘိညာဝဇ္ဇိတာ သဗ္ဗာ၊ ပဉ္စတာလီသ မာနသာ။
ယထာသမ္ဘဝတော ဟောန္တိ၊ ရူပါဒေကေကဂေါစရာ၊
ပဉ္စဂေါစရမီရေန္တိ၊ မနောဓာတုတ္တိကံ ပန။
သန္တီရဏမဟာပါကာ၊ ပရိတ္တဇဝနာနိ စ၊
ဝေါဋ္ဌဗ္ဗနမဘိညာ စ၊ တေစတ္တာလီသ သမ္ဘဝါ။
ဆာရမ္မဏေသု ဟောန္တီတိ၊ အဋ္ဌဓာ တိဝိဓာ ပုန၊
ဧကာရမ္မဏစိတ္တာနိ၊ ပဉ္စဆာရမ္မဏာနိ စ။
သင်္ခေပါ မာနသာ ပဉ္စ-စတ္တာလီသ တယော တထာ၊
တေစတ္တာလီသ စေဝေတိ၊ သတ္တဓာပိ သိယုံ ကထံ။
ကာမပါကမနောဓာတု-ဟသိတုပ္ပာဒမာနသာ၊
ပဉ္စဝီသ ယထာယောဂံ၊ ပရိတ္တာရမ္မဏာ မတာ။
ကသိဏုဂ္ဃာဋိမာကာသံ၊ ပဌမာရုပ္ပမာနသံ၊
တဿေဝ နတ္ထိဘာဝံ တု၊ တတိယာရုပ္ပကံ တထာ။
အာလမ္ဗိတွာ ပဝတ္တန္တိ၊ အာရုပ္ပာ ကမတော တတော၊
ဒုတိယဉ္စ စတုတ္ထဉ္စ၊ ဆ မဟဂ္ဂတဂေါစရာ။
အပ္ပမာဏသမညာ ¶ တေ၊ နိဗ္ဗာနေ ပန ဂေါစရေ၊
အဋ္ဌ လောကုတ္တရာ ဓမ္မာ၊ နိယမေန ဝဝတ္ထိတာ။
ကသိဏာသုဘကောဋ္ဌာသေ၊
အာနာပါနေ စ ယောဂိနော၊
ပဋိဘာဂနိမိတ္တမှိ ¶ ၊
အပ္ပမညာနုယုဉ္ဇတော။
သတ္တပဏ္ဏတ္တိယဉ္စေဝ၊ ရူပဇ္ဈာနံ ပဝတ္တတိ၊
ယထာဝုတ္တနိမိတ္တမှိ၊ သေသမာရုပ္ပကန္တိ စ။
အဘိညာဝဇ္ဇိတာ ဧကဝီသ မဟဂ္ဂတာ သဗ္ဗာ၊
သဗ္ဗေ ပဏ္ဏတ္တိသင်္ခါတေ၊ နဝတ္တဗ္ဗေ ပဝတ္တရေ။
ဇာယန္တာကုသလာ ဉာဏဝိပ္ပယုတ္တဇဝါ တထာ၊
အပ္ပမာဏံ ဝိနာ ဝီသ၊ ပရိတ္တာဒီသု တီသုပိ။
တိဟေတုကာမပုညာနိ၊ ပုညာဘိညာ စ ပဉ္စိမေ၊
စတူသုပိ ပဝတ္တန္တိ၊ အရဟတ္တဒွယံ ဝိနာ။
ကြိယာဘိညာ စ ဝေါဋ္ဌဗ္ဗံ၊ ကြိယာကာမေ တိဟေတုကာ၊
ဆ သဗ္ဗတ္ထာပိ ဟောန္တီတိ၊ သတ္တဓာ မာနသာ ဌိတာ။
ဧကတိစ္စတုကောဋ္ဌာသဂေါစရာ တိဝိဓာ ပန၊
သမသဋ္ဌိ တထာ ဝီသ၊ ကမေနေကာဒသေတိ စ။
ပဉ္စဒွါရေသု ပဉ္စာပိ၊ ပစ္စုပ္ပန္နာဝ ဂေါစရာ၊
တေကာလိကာ နဝတ္တဗ္ဗာ၊ မနောဒွါရေ ယထာရဟံ။
အဇ္ဈတ္တာ စ ဗဟိဒ္ဓါ စ၊ ပဉ္စဒွါရေသု ဂေါစရာ၊
မနောဒွါရေ နဝတ္တဗ္ဗော၊ နတ္ထိဘာဝေါပိ လဗ္ဘတိ။
ပဉ္စဒွါရေသု ပဉ္စန္န-မေကမေကော စ ဂေါစရော၊
ဆာပိ အာရမ္မဏာ ဟောန္တိ၊ မနောဒွါရမှိ သဗ္ဗထာ။
ပဉ္စဒွါရေသု ဂဟိတံ၊ တဒညမ္ပိ စ ဂေါစရံ၊
မနောဒွါရေ ဝဝတ္ထာနံ၊ ဂစ္ဆတီတိ ဟိ ဒေသိတံ။
အတီတာ ¶ ဝတ္တမာနာ စ၊ သမ္ဘဝါ ကာမသန္ဓိယာ၊
ဆဒွါရဂဟိတာ ဟောန္တိ၊ တိဝိဓာ တေပိ ဂေါစရာ။
ကမ္မနိမိတ္တမေဝေကံ ¶ ၊ မနောဒွါရေ ဥပဋ္ဌိတံ၊
နဝတ္တဗ္ဗမတီတဉ္စ၊ ဓမ္မာရမ္မဏသင်္ဂဟံ။
အာလမ္ဗိတွာ ယထာယောဂံ၊ ပဋိသန္ဓိမဟဂ္ဂတာ၊
အန္တေ စုတိ ဘဝေ မဇ္ဈေ၊ ဘဝင်္ဂမ္ပိ ပဝတ္တတီတိ။
ဣတိ စိတ္တဝိဘာဂေ ဝီထိပရိကမ္မကထာ နိဋ္ဌိတာ။
စတုတ္ထော ပရိစ္ဆေဒေါ။