📜
ပဉ္စမော ပရိစ္ဆေဒေါ
၅။ ဘူမိပုဂ္ဂလကထာ
ဣတော ပရံ ပဝက္ခာမိ၊ ဘူမိပုဂ္ဂလဘေဒတော၊
စိတ္တာနံ ပန သဗ္ဗေသံ၊ ကမတော သင်္ဂဟံ ကထံ။
နိရယဉ္စ တိရစ္ဆာနယောနိ ပေတာသုရာ တထာ၊
စတုရာပါယဘူမီတိ၊ ကာမေ ဒုဂ္ဂတိယော မတာ။
စာတုမဟာရာဇိကာ စ၊ တာဝတိံသာ စ ယာမကာ၊
တုသိတာ စေဝ နိမ္မာနရတိနော ဝသဝတ္တိနော။
ဆဠေတေ ဒေဝလောကာ စ၊ မာနဝါတိ စ သတ္တဓာ၊
ကာမသုဂတိယော စေကာဒသဓာ ကာမဘူမိယော။
ဗြဟ္မာနံ ပါရိသဇ္ဇာ စ၊ တထာ ဗြဟ္မပုရောဟိတာ၊
မဟာဗြဟ္မာ စ တိဝိဓာ၊ ပဌမဇ္ဈာနဘူမိယော။
ပရိတ္တာဘာပ္ပမာဏာဘာ၊ တထေဝါဘဿရာတိ စ၊
ဒုတိယဇ္ဈာနဘူမိ စ၊ တိဝိဓာဝ ပကာသိတာ။
ပရိတ္တသုဘာပ္ပမာဏာသုဘာ စ သုဘကိဏှကာ၊
တိဝိဓာပိ ပဝုစ္စန္တိ၊ တတိယဇ္ဈာနဘူမိယော။
ဝေဟပ္ဖလာ ¶ ¶ အသညီ စ၊ သုဒ္ဓါဝါသာ စ ပဉ္စဓာ၊
ဣစ္စေတာ ပန သတ္တာပိ၊ စတုတ္ထဇ္ဈာနဘူမိယော။
အဝိဟာ စ အတပ္ပာ စ၊ သုဒဿာ စ သုဒဿိနော၊
အကနိဋ္ဌာတိ ပဉ္စေတေ၊ သုဒ္ဓါဝါသာ ပကာသိတာ။
ဣတိ သောဠသဓာ ဘိန္နာ၊ ဗြဟ္မလောကာ ပဝုစ္စရေ၊
ရူပိဗြဟ္မာနမာဝါသာ၊ ရူပါဝစရဘူမိယော။
အာကာသာနဉ္စာယတနနာမာဒီဟိ ပကာသိတာ၊
အရူပိဗြဟ္မလောကာ စ၊ စတုဓာရူပဘူမိယော။
သောတာပန္နာဒိဘေဒေန၊ စတုဓာနုတ္တရာ မတာ၊
ပဉ္စတိံသ ပနိစ္စေဝံ၊ သဗ္ဗထာပိ စ ဘူမိယော။
ဇာယန္တိ စတုရာပါယေ၊ ပါပပါကာယ သန္ဓိယာ၊
ကာမာဝစရဒေဝေသု၊ မဟာပါကေဟိ ဇာယရေ။
အဟေတုကာ ပုညပါကာဟေတုကေန တု ဇာယရေ၊
ဘုမ္မဒေဝမနုဿေသု၊ မဟာပါကေဟိ စေတရေ။
ဝိပါကံ ပဌမဇ္ဈာနံ၊ ပဌမဇ္ဈာနဘူမိယံ၊
ဒုတိယံ တတိယဉ္စေဝ၊ ဒုတိယဇ္ဈာနဘူမိယံ။
တတိယမှိ စတုတ္ထံ တု၊ စတုတ္ထမှိ စ ပဉ္စမံ၊
အာရုပ္ပာ စ ကမေနေဝ၊ အာရုပ္ပေ ဟောန္တိ သန္ဓိယော။
ကာယဝါစာမနောဒွါရေ၊ ကမ္မံ ပါဏဝဓာဒိကံ၊
ကတွာ ပါပကစိတ္တေဟိ၊ ဇာယန္တာပါယဘူမိယံ။
ကာယဝါစာမနောဒွါရေ၊ ဒါနံ သီလဉ္စ ဘာဝနံ၊
ကာမပုညေဟိ ကတွာန၊ ကာမသုဂတိယံ သိယုံ။
ပရိတ္တံ မဇ္ဈိမံ ဈာနံ၊ ပဏီတဉ္စ ယထာက္ကမံ၊
ဘာဝေတွာ တိဝိဓာ ဟောန္တိ၊ တီသု ဘူမီသု ယောဂိနော။
ဝေဟပ္ဖလေသု ¶ ဇာယန္တိ၊ ဘာဝေတွာ ပဉ္စမံ တထာ၊
သညာဝိရာဂတဉ္စေဝ၊ ဘာဝေတွာသညိဘူမိယံ။
သုဒ္ဓါဝါသေသု ¶ ဇာယန္တိ၊ အနာဂါမိကပုဂ္ဂလာ၊
အာရုပ္ပာနိ စ ဘာဝေတွာ၊ အရူပေသု ယထာက္ကမံ။
လောကုတ္တရံ တု ဘာဝေတွာ၊ ယထာသကမနန္တရံ၊
သမာပတ္တိက္ခဏေ စေဝ၊ အပ္ပေတိ ဖလမာနသံ။
အပါယမှာ စုတာ သတ္တာ၊ ကာမဓာတုမှိ ဇာယရေ၊
သဗ္ဗဋ္ဌာနေသု ဇာယန္တိ၊ ကာမသုဂတိတော စုတာ။
စုတာ ဇာယန္တိ ရူပမှာ၊ သဗ္ဗတ္ထာပါယဝဇ္ဇိတေ၊
ကာမသုဂတိယံ ဟောန္တိ၊ အရူပါသညတော စုတာ။
တထာရူပစုတာ ဟောန္တိ၊ တတ္ထေဝေါပရိမေဝ စ၊
ဝဋ္ဋမူလသမုစ္ဆေဒါ၊ နိဗ္ဗာယန္တိ အနာသဝါ။
သုဒ္ဓါဝါသေသွနာဂါမိ-ပုဂ္ဂလာဝေါပပဇ္ဇရေ၊
ကာမဓာတုမှိ ဇာယန္တိ၊ အနာဂါမိဝိဝဇ္ဇိတာ။
ဟေဋ္ဌုပပတ္တိဗြဟ္မာနံ၊ အရိယာနံ န ကတ္ထစိ၊
အသညသတ္တာပါယေသု၊ နတ္ထေဝါရိယပုဂ္ဂလာ။
ဝေဟပ္ဖလေ အကနိဋ္ဌေ၊ ဘဝဂ္ဂေ စ ပတိဋ္ဌိတာ၊
န ပုနာညတ္ထ ဇာယန္တိ၊ သဗ္ဗေ အရိယပုဂ္ဂလာ။
ဆသု ဒေဝေသွနာဂါမီ၊ ဝီတရာဂါ န တိဋ္ဌရေ၊
န စိရဋ္ဌာယိနော တတ္ထ၊ လောကိယာပိ စ ယောဂိနော။
ဂိဟိလိင်္ဂေ န တိဋ္ဌန္တိ၊ မနုဿေသု အနာသဝါ၊
ပဗ္ဗဇ္ဇာယဉ္စ ဘုမ္မေ စ၊ ဗြဟ္မတ္တေပိ စ တိဋ္ဌရေ။
ယာနိ ပညာသ ဝဿာနိ၊
မနုဿာနံ သ ပိဏ္ဍိတော၊
ဧကော ¶ ရတ္တိဒိဝေါ တေန၊
မာသေကော တိံသ ရတ္တိယော။
ဒွါဒသမာသိယော ဝဿော၊ တေန ပဉ္စသတံ ဘဝေ၊
စာတုမဟာရာဇိကာနံ၊ ပမာဏမိဒမာယုနော။
တံ ¶ နဝုတိဝဿသတ-သဟဿံ ပန ပိဏ္ဍိတံ၊
ဂဏနာယ မနုဿာနံ၊ စတုဘာဂူပရူပရိ။
ယံ မနုဿဝဿသတံ၊ တဒေကော ဒိဝသော ကတော၊
တေန ဝဿသဟဿာယု၊ တာဝတိံသေသု ဒေသိတော။
ကောဋိတ္တယံ သဋ္ဌိသတသဟဿဉ္စာဓိကံ ဘဝေ၊
ဂဏနာယ မနုဿာနံ၊ တာဝတိံသေသု ပိဏ္ဍိတံ။
အာယုပ္ပမာဏမိစ္စေဝံ၊ ဒေဝါနမုပရူပရိ၊
ဒွိက္ခတ္တုံ ဒွိဂုဏံ ကတွာ၊ စတုဘာဂမုဒါဟဋံ။
ဂဏနာယ မနုဿာနံ၊ တတ္ထ စုဒ္ဒသ ကောဋိယော၊
စတ္တာလီသသတသဟဿာဓိကာ ယာမဘူမိယံ။
တုသိတာနံ ပကာသေန္တိ၊ သတ္တပညာသ ကောဋိယော၊
သဋ္ဌိသတသဟဿာနိ၊ ဝဿာနိ အဓိကာနိ စ။
နိမ္မာနရတိဒေဝါနံ၊ ဒွိသတံ တိံသ ကောဋိယော၊
စတ္တာလီသဝဿသတသဟဿာနိ စ သဗ္ဗထာ။
နဝကောဋိသတဉ္စေကဝီသတိဝဿကောဋိယော၊
သဋ္ဌိဝဿသတသဟဿာဓိကာ ဝသဝတ္တိသု။
ကပ္ပဿ တတိယော ဘာဂေါ၊ ဥပဍ္ဎဉ္စ ယထာက္ကမံ၊
ကပ္ပေကော ဒွေ စ စတ္တာရော၊ အဋ္ဌ ကပ္ပာ စ သောဠသ။
ဒွတ္တိံသ စတုသဋ္ဌီ စ၊ နဝသု ဗြဟ္မဘူမိသု၊
ဝေဟပ္ဖလာ အသညီ စ၊ ပဉ္စကပ္ပသတာယုကာ။
ကပ္ပသဟဿံ ¶ ဒွေ စတ္တာရိ၊ အဋ္ဌ သောဠသ စက္ကမာ၊
သဟဿာနိ စ ကပ္ပာနံ၊ သုဒ္ဓါဝါသာနမုဒ္ဒိသေ။
ဝီသကပ္ပသဟဿာနိ၊ စတ္တာလီသဉ္စ သဋ္ဌိ စ၊
စတုရာသီတိသဟဿာ၊ ကပ္ပာ စာရုပ္ပကေ ကမာ။
အာယုပ္ပမာဏနိယမော၊ နတ္ထိ ဘုမ္မေ စ မာနဝေ၊
ဝဿာနံ ဂဏနာ နတ္ထိ၊ စတုရာပါယဘူမိယံ။
ပုထုဇ္ဇနာရိယာ ¶ စေတိ၊ ဒုဝိဓာ ဟောန္တိ ပုဂ္ဂလာ၊
တိဟေတုကာဒိဘေဒေန၊ တိဝိဓာ စ ပုထုဇ္ဇနာ။
မဂ္ဂဋ္ဌာ စ ဖလဋ္ဌာ စ၊
အဋ္ဌေဝါရိယပုဂ္ဂလာ၊
အာဒိတော သတ္တ သေက္ခာ စ၊
အသေက္ခော စာရဟာပရော။
အဟေတုကာဝ လဗ္ဘန္တိ၊ သတ္တာ ဒုဂ္ဂတိယံ ပန၊
တိဟေတုကာဝ လဗ္ဘန္တိ၊ ရူပါရူပေ သစိတ္တကာ။
ကာမာဝစရဒေဝေသု၊ အဟေတုကဝိဝဇ္ဇိတာ၊
ဝိနိပါတာသုရေ စေဝ၊ မာနဝေ စ တယောပိ စ။
အရိယာ နာမ လဗ္ဘန္တိ၊ အသညာပါယဝဇ္ဇိတေ၊
ပုထုဇ္ဇနာ တု လဗ္ဘန္တိ၊ သုဒ္ဓါဝါသဝိဝဇ္ဇိတေ။
သုဒ္ဓါဝါသမပါယဉ္စ၊ ဟိတွာသညိဘဝံ တိဓာ၊
သောတာပန္နာဒယော ဒွေပိ၊ သေသဋ္ဌာနေသု လဗ္ဘရေ။
ဣတိ သဗ္ဗပ္ပဘေဒေန၊ ဘူမိပုဂ္ဂလသင်္ဂဟံ၊
ဉတွာ ဝိညူ ဝိဘာဝေယျ၊ တတ္ထ စိတ္တာနိ သမ္ဘဝါတိ။
ဣတိ စိတ္တဝိဘာဂေ ဘူမိပုဂ္ဂလကထာ နိဋ္ဌိတာ။
ပဉ္စမော ပရိစ္ဆေဒေါ။