📜
ဆဋ္ဌော ပရိစ္ဆေဒေါ
၆။ ဘူမိပုဂ္ဂလစိတ္တပ္ပဝတ္တိကထာ
ကာမသုဂတိယံ ¶ ဟောန္တိ၊ မဟာပါကာ ယထာရဟံ၊
မဟဂ္ဂတဝိပါကာ စ၊ ယထာသန္ဓိဝဝတ္ထိတာ။
ဝေါဋ္ဌဗ္ဗကာမပုညာနိ၊ ဝိယုတ္တာနိ စ ဒိဋ္ဌိယာ၊
ဥဒ္ဓစ္စသဟိတဉ္စေတိ၊ ဟောန္တိ သဗ္ဗတ္ထ စုဒ္ဒသ။
သန္တီရဏမနောဓာတု-စက္ခုသောတမနာ ¶ ပန၊
ဒသ စိတ္တာနိ ဇာယန္တိ၊ သဗ္ဗတ္ထာရူပဝဇ္ဇိတေ။
ဒိဋ္ဌိဂတသမ္ပယုတ္တာ၊ ဝိစိကိစ္ဆာယုတာ တထာ၊
ပဉ္စ သဗ္ဗတ္ထ ဇာယန္တိ၊ သုဒ္ဓါဝါသဝိဝဇ္ဇိတေ။
ဒေါသမူလဒွယဉ္စေဝ၊ ဃာနာဒိတ္တယမာနသာ၊
အဋ္ဌ သဗ္ဗတ္ထ ဇာယန္တိ၊ မဟဂ္ဂတဝိဝဇ္ဇိတေ။
စတုတ္ထာရုပ္ပဇဝနံ၊ အနာဂါမိဖလာဒယော၊
မဟာကြိယာ စ ဇာယန္တိ၊ တေရသာပါယဝဇ္ဇိတေ။
ဟေဋ္ဌာရုပ္ပဇဝါ ဒွေ ဒွေ၊ ဆာပါယုပရိဝဇ္ဇိတေ၊
သိတရူပဇဝါ ဟောန္တိ၊ အရူပါပါယဝဇ္ဇိတေ။
သောတာပတ္တိဖလာဒီနိ၊ သုဒ္ဓါပါယဝိဝဇ္ဇိတေ၊
ပဌမာနုတ္တရံ သုဒ္ဓါ-ပါယာရူပဝိဝဇ္ဇိတေ။
အဝတ္ထာဘူမိဘူတတ္တာ၊ န ဂယှန္တိ အနုတ္တရာ၊
ဧကဝေါကာရဘူမိ စ၊ ရူပမတ္တာ န ဂယှတိ။
သဘုမ္မာ သဗ္ဗဘုမ္မာ စ၊ ဧကဒွိတ္တယဝဇ္ဇိတာ၊
တထာရူပသုဒ္ဓါဝါသ-ဗြဟ္မာပါယဝသာတိ စ။
မာနသာ ¶ ပဉ္စ ကောဋ္ဌာသာ၊ သတ္တရသ စတုဒ္ဒသ၊
ဆတ္တိံသတေကဝီသာ စ၊ ဧကဉ္စေဝ ယထာက္ကမံ။
အဋ္ဌာရသာပိ ဟောန္တေတေ၊ နဝဓာပိ ပုနေကဓာ၊
စတုဓာ တိဝိဓာ စေဝ၊ ဧကဓာတိ စ ဘေဒတော။
တေရသာပိ စ ကောဋ္ဌာသာ၊ ဘဝန္တေကတိဘူမကာ၊
ဆသတ္တေကာဒသသတ္တ-ရသဘူမကမာနသာ။
ဧကဒွယတိစတုက္ကပဉ္စကာဓိကဝီသဇာ၊
ဆဗ္ဗီသတိံသဇာ စေတိ၊ ယထာနုက္ကမတော ဘဝေ။
စတ္တာရိ ပုန စတ္တာရိ၊ ဧကမဋ္ဌဋ္ဌ စေကကံ၊
စတ္တာရေကာဒသ ဒွေ ဒွေ၊ သတ္တ တေဝီသ စုဒ္ဒသ။
ကြိယာဇဝမဟာပါကာ ¶ ၊ လောကုတ္တရမဟဂ္ဂတာ၊
ဒွေပညာသ န လဗ္ဘန္တိ၊ စတုရာပါယဘူမိယံ။
ကာမာဝစရဒေဝေသု၊ ဆသု ဘုမ္မေ စ မာနဝေ၊
ကာမသုဂတိယံ နတ္ထိ၊ နဝ ပါကာ မဟဂ္ဂတာ။
ဒေါသမူလမဟာပါကာ၊ ဃာနာဒိတ္တယမာနသာ၊
နတ္ထာရူပဝိပါကာ စ၊ ဝီသတီ ရူပဘူမိယံ။
ကင်္ခါဒိဋ္ဌိယုတာ ပဉ္စာရူပပါကာ စတုဗ္ဗိဓာ၊
ပဉ္စာဒေါနုတ္တရာ စေဝ၊ သုဒ္ဓါဝါသေ န လဗ္ဘရေ။
အာဒါဝဇ္ဇနမဂ္ဂါ စ၊ ပဋိဃာရူပမာနသာ၊
ကာမပါကာ သိတာရူပေ၊ တေစတ္တာလီသ နတ္ထိ တေ။
သတ္တတိံသ ပရိတ္တာ စ၊ လဗ္ဘန္တာပါယဘူမိယံ၊
မာနသာသီတိ လဗ္ဘန္တိ၊ ကာမသုဂတိယံ ပန။
ဧကူနသတ္တတိ ရူပေ၊ သုဒ္ဓေ ပညာသ ပဉ္စ စ၊
ဆစတ္တာလီသ အာရုပ္ပေ၊ နတ္ထာသညီသု ကိဉ္စိပိ။
ဣတ္ထမေကဒွိတိစတုပဉ္စဘုမ္မာနိ ¶ သောဠသ၊
ဒသ ပဉ္စဒသေဝါထ၊ စတုတ္တိံသ စတုဒ္ဒသ။
အပါယာဟေတုကာနံ တု၊ မဟာပါကကြိယာဇဝေ၊
ဟိတွာ သေသပရိတ္တာနိ၊ စိတ္တာနိ ပန လဗ္ဘရေ။
ဒွိဟေတုကာဟေတုကာနံ၊ သေသာနံ ကာမမာနသာ၊
လဗ္ဘန္တိ ပန ဟိတွာန၊ ဉာဏပါကကြိယာဇဝေ။
တိဟေတုကာနံ သတ္တာနံ၊ တတ္ထ တတ္ထူပပတ္တိယံ၊
တတ္ထ တတ္ထူပပန္နာနံ၊ လဗ္ဘမာနာနိ လဗ္ဘရေ။
တိဟေတုကာနံ သဗ္ဗေပိ၊ မာနသာပါယပါဏိနံ၊
သတ္တတိံသာဝသေသာနံ၊ ဧကတာလီသ နိဒ္ဒိသေ။
ပုထုဇ္ဇနာန သေက္ခာနံ၊ န သန္တိ ဇဝနကြိယာ၊
န သန္တိ ဝီတရာဂါနံ၊ ပုညာပုညာနိ သဗ္ဗထာ။
ကင်္ခါဒိဋ္ဌိယုတာ ¶ ပဉ္စ၊ သေက္ခာနံ နတ္ထိ မာနသာ၊
ဒေါသမူလဒွယဉ္စာပိ၊ နတ္ထာနာဂါမိနော ပန။
ဝဝတ္ထိတာရိယေသွေဝ၊ ယထာသကမနုတ္တရာ၊
မဂ္ဂဋ္ဌာနံ သကော မဂ္ဂေါ၊ နတ္ထညံ ကိဉ္စိ သဗ္ဗထာ။
ပုထုဇ္ဇနာနံ ဒွိန္နမ္ပိ၊ ဖလဋ္ဌာနံ ယထာက္ကမံ၊
တတိယဿ ဖလဋ္ဌဿ၊ စတုတ္ထဿ စ သမ္ဘဝါ။
တေသဋ္ဌိ စေဝ စိတ္တာနိ၊ လဗ္ဘန္တေကူနသဋ္ဌိ စ၊
သတ္တပညာသ စိတ္တာနိ၊ တေပညာသ စ သဗ္ဗထာ။
စတုပညာသ ပညာသ၊ ပညာသဒွယဟီနကာ၊
ကာမေသု တေသံ သမ္ဘောန္တိ၊ စတုတာလီသ စက္ကမာ။
တေစတ္တာလီသ စေကူနစတ္တာလီသ ယထာက္ကမံ၊
ဘဝန္တေကူနတာလီသ၊ ပဉ္စတ္တိံသ စ ရူပိသု။
သတ္တဝီသ ¶ စ တေဝီသ၊ တေဝီသ စ ယထာက္ကမံ၊
အာရုပ္ပေသုပိ လဗ္ဘန္တိ၊ တေသမဋ္ဌာရသေဝ စ။
ပုထုဇ္ဇနာ စ စတ္တာရော၊ အပါယာဟေတုကာဒယော၊
အရိယာ စေဝ အဋ္ဌာတိ၊ ဒွါဒသန္နံ ဝသာ သိယုံ။
ဆဗ္ဗိဓာ စိတ္တကောဋ္ဌာသာ၊ ဧကပုဂ္ဂလိကာ တထာ၊
စတုပဉ္စဆသတ္တဋ္ဌ-ပုဂ္ဂလဋ္ဌာတိ စက္ကမာ။
ဆဗ္ဗီသ စုဒ္ဒသေဝါထ၊ တေရသ ဒွေ စ မာနသာ၊
ဒသ သတ္တာဓိကာ စေဝ၊ ပုန သတ္တာဓိကာ ဒသာတိ။
ဣတိ စိတ္တဝိဘာဂေ ဘူမိပုဂ္ဂလစိတ္တပ္ပဝတ္တိကထာ နိဋ္ဌိတာ။
ဆဋ္ဌော ပရိစ္ဆေဒေါ။