📜
သတ္တမော ပရိစ္ဆေဒေါ
၇။ ဘူမိပုဂ္ဂလသမ္ဘဝကထာ
ဒွိဟေတုကာဟေတုကာနံ ¶ ၊ န သမ္ပဇ္ဇတိ အပ္ပနာ၊
အရဟတ္တဉ္စ နတ္ထီတိ၊ နတ္ထေဝ ဇဝနကြိယာ။
ဉာဏပါကာ န ဝတ္တန္တိ၊ ဇဠတ္တာ မူလသန္ဓိယာ၊
ဒွိဟေတုကတဒါလမ္ဗံ၊ သိယာ သုဂတိယံ န ဝါ။
တိဟေတုကာနံ သတ္တာနံ၊ သမထဉ္စ ဝိပဿနံ၊
ဘာဝေန္တာနံ ပဝတ္တန္တိ၊ ဆဗ္ဗီသတိပိ အပ္ပနာ။
အရဟန္တာန သတ္တာနံ၊ ဘဝန္တိ ဇဝနကြိယာ၊
ယထာဘူမိနိယာမေန၊ ဉာဏပါကာ စ လဗ္ဘရေ။
ဝဇ္ဈာ ¶ ပဌမမဂ္ဂေန၊ ကင်္ခါဒိဋ္ဌိယုတာ ပန၊
ပဋိဃံ တတိယေနေဝ၊ ကမ္မမန္တေန သာသဝံ။
တသ္မာ တေသံ န ဝတ္တန္တိ၊ တာနိ စိတ္တာနိ သဗ္ဗထာ၊
မဂ္ဂဋ္ဌာနံ တု မဂ္ဂေါဝ၊ နာညံ သမ္ဘောတိ ကိဉ္စိပိ။
အဟေတုကဝိပါကာနိ၊ လဗ္ဘမာနာယ ဝီထိယာ၊
သဗ္ဗထာပိ စ သဗ္ဗေသံ၊ သမ္ဘဝန္တိ ယထာရဟံ။
ပဉ္စဒွါရေ မနောဒွါရေ၊ ဓုဝမာဝဇ္ဇနဒွယံ၊
ပရိတ္တပုညာပုညာနိ၊ လဗ္ဘန္တိ လဟုဝုတ္တိတော။
ကြိယာဇဝနမပ္ပနာ၊ နတ္ထာပါယေသု ကာရဏံ၊
နတ္ထိ သဟေတုကာ ပါကာ၊ ဒုဂ္ဂတတ္တာ ဟိ သန္ဓိယာ။
ဗြဟ္မာနံ ပဋိဃံ နတ္ထိ၊ ဈာနဝိက္ခမ္ဘိတံ တထာ၊
ဟေဋ္ဌာဈာနံ ဝိရတ္တတ္တာ၊ န ဘာဝေန္တိ အရူပိနော။
ပုဗ္ဗေဝ ဒိဋ္ဌသစ္စာဝ၊ အရိယာရူပဘူမကာ၊
တသ္မာဒိမဂ္ဂေါ နတ္ထေတ္ထ၊ ကာယာဘာဝါ သိတံ တထာ။
သုဒ္ဓါဝါသာပိ ပတ္တာဝ၊ ဟေဋ္ဌာနုတ္တရပဉ္စကံ၊
သတ္တပါပပဟီနာ စ၊ တသ္မာ နတ္ထေတ္ထ တာနိ စ။
ပဉ္စဒွါရိကစိတ္တာနိ ¶ ၊ ဒွါရာဘာဝေ န ဝိဇ္ဇရေ၊
သဟေတုကဝိပါကာ စ၊ ယထာဘူမိဝဝတ္ထိတာ။
သမ္ဘဝါသမ္ဘဝဉ္စေဝံ၊ ဉတွာ ပုဂ္ဂလဘူမိသု၊
လဗ္ဘမာနဝသာ တတ္ထ၊ စိတ္တသင်္ဂဟမုဒ္ဒိသေ။
ကုသလာဒိပ္ပဘေဒါ စ၊ တထာ ဘူမာဒိဘေဒတော၊
ဝတ္ထုဒွါရာရမ္မဏတော၊ ဘူမိပုဂ္ဂလတောပိ စ။
ဝိဘာဂေါ ယော သမုဒ္ဒိဋ္ဌော၊
စိတ္တာနဉ္စ တု သမ္ဘဝါ၊
ဉေယျော ¶ စေတသိကာနဉ္စ၊
သမ္ပယောဂါနုသာရတောတိ။
ဣတိ စိတ္တဝိဘာဂေ ဘူမိပုဂ္ဂလသမ္ဘဝကထာ နိဋ္ဌိတာ။
သတ္တမော ပရိစ္ဆေဒေါ။
နိဋ္ဌိတော စ စိတ္တဝိဘာဂေါ။