📜
အဋ္ဌမော ပရိစ္ဆေဒေါ
၂။ စေတသိကဝိဘာဂေါ
၈။ စေတသိကသမ္ပယောဂကထာ
ဣတိ စိတ္တဝိဓိံ ဉတွာ၊ ဒွေပညာသ ဝိဘာဝိနာ၊
ဉေယျာ စေတသိ သမ္ဘူတာ၊ ဓမ္မာ စေတသိကာ ကထံ။
ဖဿော စ ဝေဒနာ သညာ၊ စေတနေကဂ္ဂတာ တထာ၊
ဇီဝိတံ မနသိကာရော၊ သတ္တ သာဓာရဏာ ဣမေ။
ဝိတက္ကော စ ဝိစာရော စ၊ ပီတိ စ ဝီရိယံ တထာ၊
ဆန္ဒော စ အဓိမောက္ခော စ၊ ဆ ပကိဏ္ဏကနာမကာ။
ပုညာပုညေသု ပါကေသု၊ ကြိယာသု စ ယထာရဟံ၊
မာနသေသု ပဝတ္တန္တိ၊ ဝိပ္ပကိဏ္ဏာ ပကိဏ္ဏကာ။
သဒ္ဓါ ¶ သတိန္ဒြိယဉ္စေဝ၊ ဟိရောတ္တပ္ပဗလဒွယံ၊
အလောဘော စ အဒေါသော စ၊ ပညာ မဇ္ဈတ္တတာပိ စ။
အဋ္ဌေတေ ¶ ဥတ္တမာ နာမ၊ ဓမ္မာ ဥတ္တမသာဓနာ၊
နိဝဇ္ဇာတိ ပဝုစ္စန္တိ၊ ယုဂဠာ ဆ တတောပရေ။
ပဿဒ္ဓိ ကာယစိတ္တာနံ၊ လဟုတာ မုဒုတာ တထာ၊
ကမ္မညတာ စ ပါဂုည-တာ စ ဥဇုကတာတိ စ။
အပ္ပမညာဒွယံ နာမ၊ ကရုဏာမုဒိတာ သိယုံ၊
သမ္မာဝါစာ စ ကမ္မန္တာ-ဇီဝါ စ ဝိရတိတ္တယံ။
ပဉ္စဝီသ ပနိစ္စေတေ၊ အနဝဇ္ဇာ ယထာရဟံ၊
ပါပါဟေတုကမုတ္တေသု၊ အနဝဇ္ဇေသု ဇာယရေ။
လောဘော ဒေါသော စ မောဟော စ၊
မာနော ဒိဋ္ဌိ စ သံသယော၊
ထိနမိဒ္ဓဉ္စ ဥဒ္ဓစ္စံ၊
ကုက္ကုစ္စဉ္စ တထာ ဒသ။
အဟိရီကမနောတ္တပ္ပံ၊ ဣဿာ မစ္ဆရိယန္တိ စ၊
ဟောန္တိ စုဒ္ဒသ သာဝဇ္ဇာ၊ သာဝဇ္ဇေသွေဝ သမ္ဘဝါ။
ဒွေပညာသ စတုဒ္ဓေဝံ၊ ဓမ္မာ စေတသိကာ ဌိတာ၊
တေသံ ဒါနိ ပဝက္ခာမိ၊ သမ္ပယောဂဉ္စ သင်္ဂဟံ။
သတ္တ သာဓာရဏာ သဗ္ဗ-စိတ္တသာဓာရဏာ တတော၊
စိတ္တေန သဒ္ဓိ အဋ္ဌန္နံ၊ ဝိပ္ပယောဂေါ န ကတ္ထစိ။
ဝိတက္ကော ပဉ္စဝိညာဏံ၊ ဒုတိယာဒိဝိဝဇ္ဇိတေ၊
ဝိစာရောပိ စ တတ္ထေဝ၊ တတိယာဒိဝိဝဇ္ဇိတေ။
သောမနဿယုတေ ပီတိ-စတုတ္ထဇ္ဈာနဝဇ္ဇိတေ၊
ဝီရိယံ ပဌမာဝဇ္ဇ-ဝိပါကာဟေတုဝဇ္ဇိတေ။
ဆန္ဒော သမ္ဘောတိ သဗ္ဗတ္ထ၊ မောမူဟာဟေတုဝဇ္ဇိတေ၊
အဓိမောက္ခော ဝိစိကိစ္ဆာ-ပဉ္စဝိညာဏဝဇ္ဇိတေ။
ဆသဋ္ဌိ ¶ ¶ ပဉ္စပညာသ၊ သတ္တတိ စေဝ သောဠသ၊
ဝီသတေကာဒသေဝါထ၊ ပကိဏ္ဏကဝိဝဇ္ဇိတာ။
မာနသာ ပဉ္စပညာသ၊ သဝိတက္ကာ ဆသဋ္ဌိ စ၊
သဝိစာရေကပညာသ၊ သပ္ပီတိကမနာ တထာ။
တေသတ္တတိ သဝီရိယာ၊ သဆန္ဒေကူနသတ္တတိ၊
သာဓိမောက္ခာ ပဝုစ္စန္တိ၊ အဋ္ဌသတ္တတိ မာနသာ။
ပညာပ္ပမညာဝိရတီ၊ ဟိတွာ ဧကူနသဋ္ဌိသု၊
ပါပါဟေတုကမုတ္တေသု၊ သဒ္ဓါဒေကူနဝီသတိ။
ဒွိဟေတုကာဟေတုပါပဝဇ္ဇိတေသု သမာသတော၊
ပညာ တု ဇာယတေ သတ္တစတ္တာလီသေသု သဗ္ဗထာ။
မဟာကြိယာကာမပုည-ရူပဇ္ဈာနေသု ဇာယရေ၊
အပ္ပမညာဋ္ဌဝီသေသု၊ ဟိတွာ ဈာနံ တု ပဉ္စမံ။
လောကုတ္တရေသု သဗ္ဗတ္ထ၊ သဟေဝ ဝိရတိတ္တယံ၊
ကာမပုညေသု သမ္ဘောတိ၊ ယထာသမ္ဘဝတော ဝိသုံ။
ဝိရတီအပ္ပမညာသု၊ ပဉ္စသွပိ ယထာရဟံ၊
ကဒါစိဒေဝ သမ္ဘောတိ၊ ဧကေကောဝ န စေကတော။
အဟိရီကမနောတ္တပ္ပံ၊ မောဟဥဒ္ဓစ္စမေဝ စ၊
ပါပသာဓာရဏာ နာမ၊ စတ္တာရော ပါပသမ္ဘဝါ။
လောဘော စ လောဘမူလေသု၊ ဒိဋ္ဌိယုတ္တေသု ဒိဋ္ဌိ စ၊
မာနော ဒိဋ္ဌိဝိယုတ္တေသု၊ ဒိဋ္ဌိမာနာ န စေကတော။
ဒေါသမူလေသု ဒေါသော စ၊ ဣဿာ မစ္ဆရိယံ တထာ၊
ကုက္ကုစ္စမိတိ စတ္တာရော၊ ဝိစိကိစ္ဆာ တု ကင်္ခိတေ။
သဟေဝ ထိနမိဒ္ဓံ တု၊ သသင်္ခါရေသု ပဉ္စသု၊
ဣတိ စုဒ္ဒသ သာဝဇ္ဇာ၊ သာဝဇ္ဇေသွေဝ နိစ္ဆိတာ။
မာနော ¶ ¶ စ ထိနမိဒ္ဓဉ္စ၊ သဟ ဝါထ ဝိသုံ န ဝါ၊
ဣဿာမစ္ဆေရကုက္ကုစ္စာ၊ အညမညံ ဝိသုံ န ဝါတိ။
ဣတိ စေတသိကဝိဘာဂေ စေတသိကသမ္ပယောဂကထာ နိဋ္ဌိတာ။
အဋ္ဌမော ပရိစ္ဆေဒေါ။