📜
နဝမော ပရိစ္ဆေဒေါ
၉။ စေတသိကသင်္ဂဟကထာ
သတ္တ သာဓာရဏာ စေဝ၊ ဆ ဓမ္မာ စ ပကိဏ္ဏကာ၊
သဒ္ဓါဒိ ပဉ္စဝီသေတိ၊ အဋ္ဌတိံသ သမိဿိတာ။
ကာမာဝစရပုညေသု၊ လဗ္ဘန္တိ ပဌမဒွယေ၊
သတ္တတိံသေဝ ဒုတိယေ၊ ပညာမတ္တဝိဝဇ္ဇိတာ။
တတိယေ စ ယထာဝုတ္တာ၊ ပီတိမတ္တဝိဝဇ္ဇိတာ၊
ဆတ္တိံသေဝ စတုတ္ထမှိ၊ ပညာပီတိဒွယံ ဝိနာ။
မဟာကြိယာသု ယုဇ္ဇန္တိ၊ ဟိတွာ ဝိရတိယော တထာ၊
ပဉ္စတိံသ စတုတ္တိံသဒွယံ တေတ္တိံသကံ ကမာ။
ဌပေတွာ အပ္ပမညာ စ၊ မဟာပါကေသု ယောဇိတာ၊
တေတ္တိံသာ စေဝ ဒွတ္တိံသဒွယေကတ္တိံသကံ ကမာ။
အပ္ပမညာ ဂဟေတွာန၊ ဟိတွာ ဝိရတိယော တထာ၊
ပဉ္စတိံသေဝ ပဌမေ၊ ရူပါဝစရမာနသေ။
ဝိတက္ကံ ဒုတိယေ ဟိတွာ၊ ဝိစာရဉ္စ တတော ပရံ၊
စတုတ္ထေ ပန ပီတိဉ္စ၊ အပ္ပမညဉ္စ ပဉ္စမေ။
ယထာဝုတ္တပကာရာဝ ¶ ၊ စတုတ္တိံသ ယထာက္ကမံ၊
တေတ္တိံသ စေဝ ဒွတ္တိံသ၊ သမတိံသဉ္စ လဗ္ဘရေ။
ပဉ္စမေန သမာနာ စ၊ ဌပေတွာရုပ္ပမာနသာ၊
ဘူမာရမ္မဏဘေဒဉ္စ၊ အင်္ဂါနဉ္စ ပဏီတတံ။
အပ္ပမညာ ¶ ဌပေတွာန၊ ဂဟေတွာ ဝိရတိတ္တယံ၊
ဆတ္တိံသာနုတ္တရေ ဟောန္တိ၊ ပဌမဇ္ဈာနမာနသေ။
ဝိတက္ကံ ဒုတိယေ ဟိတွာ၊ ဝိစာရဉ္စ တတော ပရံ၊
ပီတိံ ဟိတွာ စတုတ္ထေ စ၊ ပဉ္စမေပိ စ သဗ္ဗထာ။
ယထာဝုတ္တပ္ပကာရာဝ၊ ပဉ္စတိံသ ယထာက္ကမံ၊
စတုတ္တိံသဉ္စ တေတ္တိံသ၊ တထာ တေတ္တိံသ စာပရေ။
ဧဝံ ဗာဝီသဓာ ဘေဒေါ၊ အနဝဇ္ဇေသု သင်္ဂဟော၊
ဧကူနသဋ္ဌိစိတ္တေသု၊ အဋ္ဌတိံသာနမီရိတော။
ဝိရတီ အပ္ပမညာ စ၊ ဂဟေတွာ ပန သဗ္ဗသော၊
ဧကမေကံ ဂဟေတွာ စ၊ ပစ္စက္ခာယ စ သဗ္ဗထာ။
ကာမေသု သတ္တဓာ ပုညေ၊ စတုဓာ စ ကြိယေ တထာ၊
ရူပဇ္ဈာနစတုက္ကေ စ၊ ကတ္တဗ္ဗောယမ္ပိ သင်္ဂဟော။
ဣမိနာ ပနုပါယေန၊ သမသတ္တတိ ဘေဒတော၊
အနဝဇ္ဇေသု ဝိညေယျော၊ စိတ္တုပ္ပာဒေသု သင်္ဂဟော။
ဣတိ သဗ္ဗပ္ပကာရေန၊ အနဝဇ္ဇဝိနိစ္ဆယံ၊
ဉတွာ ယောဇေယျ မေဓာဝီ၊ သာဝဇ္ဇေသု စ သင်္ဂဟံ။
သတ္တ သာဓာရဏာ စေဝ၊ ဆ ဓမ္မာ စ ပကိဏ္ဏကာ၊
စတ္တာရော ပါပသာမညာ၊ ဓမ္မာ သတ္တရသေဝိမေ။
ဧကူနဝီသာသင်္ခါရေ၊ ပဌမေ လောဘဒိဋ္ဌိယာ၊
ဒုတိယေ လောဘမာနေန၊ ယထာဝုတ္တာ စ တတ္တကာ။
အဋ္ဌာရသ ¶ ဝိနာ ပီတိံ၊ တတိယေ လောဘဒိဋ္ဌိယာ၊
စတုတ္ထေပိ ဝိနာ ပီတိံ၊ လောဘမာနေန တတ္တကာ။
ပဋိဃေ စ ဝိနာ ပီတိံ၊ အသင်္ခါရေ တထေဝ တေ၊
လဗ္ဘန္တိ ဒေါသကုက္ကုစ္စ-မစ္ဆရိယာဟိ ဝီသတိ။
အသင်္ခါရေသု ဝုတ္တာ စ၊ သသင်္ခါရေသု ပဉ္စဓာ၊
ထိနမိဒ္ဓေနေကဝီသ၊ ဝီသ ဒွေဝီသတိက္ကမာ။
ဆန္ဒံ ¶ ပီတိဉ္စ ဥဒ္ဓစ္စေ၊ ဟိတွာ ပဉ္စဒသေဝ တေ၊
ဟိတွာ ဝိမောက္ခံ ကင်္ခဉ္စ၊ ဂဟေတွာ ကင်္ခိတေ တထာ။
သတ္တဝီသတိဓမ္မာနံ၊ ဣတိ ဒွါဒသ သင်္ဂဟာ၊
ဒွါဒသာပုညစိတ္တေသု၊ ဝိညာတဗ္ဗာ ဝိဘာဝိနာ။
ဟိတွာ ဆာနိယတေ ဓမ္မေ၊ ဂဟေတွာ စ ယထာရဟံ၊
စတုတ္တိံသာပိ ဝိညေယျာ၊ သင်္ဂဟာ တတ္ထ ဝိညုနာ။
ဒွါဒသာကုသလေသွေဝ၊ ဉတွာ သင်္ဂဟမုတ္တရံ၊
ဉေယျာဟေတုကစိတ္တေသု၊ သင်္ဂဟံ ကမတော ကထံ?
သတ္တ သာဓာရဏာ ဆန္ဒဝဇ္ဇိတာ စ ပကိဏ္ဏကာ၊
ဟသိတုပ္ပာဒစိတ္တမှိ၊ ဒွါဒသေဝ ပကာသိတာ။
ဝေါဋ္ဌဗ္ဗေ စ ဝိနာ ပီတိံ၊ ဝီရိယံ သုခတီရဏေ၊
ဧကာဒသ ယထာဝုတ္တာ၊ ဓမ္မာ ဒွီသုပိ ဒေသိတာ။
မနောဓာတုတ္တိကေ စေဝ၊ ဥပေက္ခာတီရဏဒွယေ၊
ဒသ ဟောန္တိ ယထာဝုတ္တာ၊ ဟိတွာ ဝီရိယပီတိယော။
သတ္တ သာဓာရဏာ ဧဝ၊ ပဉ္စဝိညာဏသမ္ဘဝါ၊
ဣစ္စာဟေတုကစိတ္တေသု၊ ပဉ္စဓာ သင်္ဂဟော ဌိတော။
ဣတိ စေတသိကေ ဓမ္မေ၊ စိတ္တေသု ဂဏိတေ ပုန၊
စိတ္တေန သဟ သင်္ဂယှ၊ ဂဏေယျာပိ စ ပဏ္ဍိတော။
အဋ္ဌတိံသာတိ ¶ ယေ ဝုတ္တာ၊ စိတ္တေန သဟ တေ ပုန၊
ဧကူနစတ္တာလီသေတိ၊ သဗ္ဗတ္ထေကာဓိကံ နယေ။
ဗာဝီသေဝံ ဒသ ဒွေ စ၊ ပဉ္စ စေတိ ယထာရဟံ၊
သင်္ဂဟာ သမ္ပယုတ္တာနံ၊ တာလီသေကူနကာ ကထာ။
ဝိတက္ကော စ ဝိစာရော စ၊ ပီတိ ပညာ တထာ ပန၊
အပ္ပမညာ ဝိရတီတိ၊ နဝ ဓမ္မာ ယထာရဟံ။
ဂဟေတဗ္ဗာပနေတဗ္ဗာ၊ ဘဝန္တိ အနဝဇ္ဇကေ၊
ပရိဝတ္တေတိ သဗ္ဗတ္ထ၊ ဝေဒနာ တု ယထာရဟံ။
ဆန္ဒာဓိမောက္ခဝီရိယာ ¶ ၊ သဒ္ဓါဒေကူနဝီသတိ၊
ဖဿာဒယော ဆဠေဝါတိ၊ န စလန္တဋ္ဌဝီသတိ။
တေရသေဝ တု သာဝဇ္ဇေ၊ ဆဠေဝါဟေတုမာနသေ၊
န စလန္တိ ဒသ အညေ၊ စုဒ္ဒသာ ဆ စ သမ္ဘဝါတိ။
ဣတိ စေတသိကဝိဘာဂေ စေတသိကသင်္ဂဟကထာ နိဋ္ဌိတာ။
နဝမော ပရိစ္ဆေဒေါ။