📜
ဒသမော ပရိစ္ဆေဒေါ
၁၀။ ပဘေဒကထာ
ဧကုပ္ပာဒါ နိရောဓာ စ၊ ဧကာလမ္ဗဏဝတ္ထုကာ၊
သဟဂတာ သဟဇာတာ၊ သံသဋ္ဌာ သဟဝုတ္တိနော။
တေပညာသ ပနိစ္စေတေ၊ သမ္ပယုတ္တာ ယထာရဟံ၊
စိတ္တစေတသိကာ ဓမ္မာ၊ အဋ္ဌာရသဝိဓာပိ စ။
ဧကဓာ ¶ ဆဗ္ဗိဓာ စေဝ၊ စတုဓာ သတ္တဓာ ဌိတာ၊
စိတ္တုပ္ပာဒပဘေဒေန၊ ဘိန္ဒိတဗ္ဗာ ဝိဘာဝိနာ။
အဋ္ဌ ဓမ္မာဝိနိဗ္ဘောဂါ၊ ဘိန္နာသီတိ နဝုတ္တရာ၊
သတ္တသတံ ဒသ ဒွေ စ၊ သဗ္ဗေ ဟောန္တိ သမိဿိတာ။
သန္တီရဏမနောဓာတု၊ သိတဝေါဋ္ဌဗ္ဗနာ တထာ၊
အပုညာ ကာမပုညာ စ၊ မဟာပါကာ မဟာကြိယာ။
ပဌမဇ္ဈာနဓမ္မာ စ၊ လောကုတ္တရမဟဂ္ဂတာ၊
ပဉ္စပညာသ သဗ္ဗေပိ၊ ဝိတက္ကာ ဟောန္တိ ဘေဒိတာ။
ဝိစာရာပိ စ တေယေဝ၊ ဒုတိယဇ္ဈာနနာမကာ၊
ဧကာဒသာပရေ စေတိ၊ ဆသဋ္ဌိ ပရိဒီပိတာ။
အပုညာ ကာမပုညာ စ၊ မဟာပါကာ မဟာကြိယာ၊
စတုက္ကာ စေဝ စတ္တာရော၊ သိတဉ္စ သုခတီရဏံ။
ပဌမာဒိတိကဇ္ဈာနာ ¶ ၊ လောကုတ္တရမဟဂ္ဂတာ၊
ဣစ္စေဝမေကပညာသ၊ ပီတိယော ဟောန္တိ သဗ္ဗထာ။
သိတဝေါဋ္ဌဗ္ဗနာ ဒွေ စ၊ သာဝဇ္ဇာ စာနဝဇ္ဇကာ၊
ဘိန္နမေဝံ တု ဝီရိယံ၊ တေသတ္တတိဝိဓံ ဘဝေ။
သာဝဇ္ဇာ စာနဝဇ္ဇာ စ၊ မောမူဟဒွယဝဇ္ဇိတာ၊
ဆန္ဒာ ဘဝန္တိ သဗ္ဗေပိ၊ သဋ္ဌိဘေဒါ နဝုတ္တရာ။
သန္တီရဏမနောဓာတု၊ သိတဝေါဋ္ဌဗ္ဗနာ တထာ၊
သာဝဇ္ဇာ စာနဝဇ္ဇာ စ၊ ဝိစိကိစ္ဆာဝိဝဇ္ဇိတာ။
အဓိမောက္ခာ ပနိစ္စေဝံ၊ အဋ္ဌသတ္တတိ ဘေဒိတာ၊
တိသတံ နဝုတိ ဒွေ စ၊ ဘိန္နာ ဟောန္တိ ပကိဏ္ဏကာ။
ဧကူနသဋ္ဌိ ဝါ ဟောန္တိ၊ သဒ္ဓါဒေကူနဝီသတိ၊
သဟဿဉ္စ သတဉ္စေကံ၊ ဧကဝီသဉ္စ သဗ္ဗထာ။
ဉာဏေန ¶ သမ္ပယုတ္တာ စ၊ ကာမေ ဒွါဒသဓာပရေ၊
ပဉ္စတိံသာတိ ပညာပိ၊ သတ္တတာလီသဓာ ကထာ။
ရူပဇ္ဈာနစတုက္ကာ စ၊ ကာမပုညာ မဟာကြိယာ၊
အဋ္ဌဝီသပ္ပမညေဝံ၊ ဆပ္ပညာသ ဘဝန္တိ စ။
အနုတ္တရာ ကာမပုညာ၊ တိဿော ဝိရတိယော ပန၊
ဟောန္တိ သောဠသဓာ ဘိန္နာ၊ အဋ္ဌတာလီသ ပိဏ္ဍိတာ။
ပဉ္စဝီသာနဝဇ္ဇေဝံ၊ သမ္ပယုတ္တာ စတုဗ္ဗိဓာ၊
သဟဿဒွိသတဉ္စေဝ၊ ဒွိ စ သတ္တတိ ဘေဒတော။
စတ္တာရော ပါပသာမညာ၊ ဘိန္နာ ဒွါဒသဓာ ပန၊
အဋ္ဌတာလီသဓာ ဟောန္တိ၊ တေ သဗ္ဗေ ပရိပိဏ္ဍိတာ။
လောဘော ပနဋ္ဌဓာ ဘိန္နော၊ ထိနမိဒ္ဓဉ္စ ပဉ္စဓာ၊
စတုဓာ ဒိဋ္ဌိမာနော စ၊ စတုဓာ ဒိဋ္ဌိယော ဝိသုံ။
ဒွိဓာ ဒေါသာဒိစတ္တာရော၊ ဝိစိကိစ္ဆေကဓာတိ စ၊
သာဝဇ္ဇာ သတ္တဓာ ဝုတ္တာ၊ ဘိန္နာသီတိ တိကုတ္တရာ။
ဣစ္စဋ္ဌာရသဓာ ¶ ဝုတ္တာ၊ တေပညာသာပိ ဘေဒတော၊
ဒွိသဟဿဉ္စ တု သတံ၊ ဘဝန္တေကူနသဋ္ဌိ စ။
ဝိတက္ကဝိစာရပီတိသုခေါပေက္ခာသု ပဉ္စသု၊
ဘိန္ဒိတွာ ဈာနဘေဒေန၊ ဂဟေတဗ္ဗာ အနုတ္တရာ။
အညတြ ပန သဗ္ဗတ္ထ၊ နတ္ထိ ဘေဒပ္ပယောဇနံ၊
အဋ္ဌေဝ ကသ္မာ ဂယှန္တိ၊ အဘေဒေနာတိ လက္ခယေ။
ပဌမာဒိစတုဇ္ဈာနာ၊ လောကုတ္တရမဟဂ္ဂတာ၊
ဣစ္စေကမေကဒသဓာ၊ စတုတာလီသ ပိဏ္ဍိတာ။
တေဝီသ ပဉ္စမာ စေတိ၊ သတ္တသဋ္ဌိ သမိဿိတာ၊
အပ္ပနာ တတ္ထ သဗ္ဗာပိ၊ အဋ္ဌပညာသ ဒီပိတာ။
ပဉ္စတိံသေဝ ¶ သင်္ခေပါ၊ လောကုတ္တရမဟဂ္ဂတာ၊
အပ္ပနာ တတ္ထ သဗ္ဗာပိ၊ ဆဗ္ဗီသတိ ပကာသိတာ။
ဣဒ္ဓိဝိဓံ ဒိဗ္ဗသောတံ၊ စေတောပရိယနာမကာ၊
ပုဗ္ဗေနိဝါသာနုဿတိ၊ ဒိဗ္ဗစက္ခူတိ ပဉ္စဓာ။
အဘိညာဉာဏမီရေန္တိ၊ ရူပါဝစရပဉ္စမာ၊
ကုသလဉ္စ ကြိယာ စေတိ၊ ဘေဒိတံ ဒုဝိဓမ္ပိ စ။
တံ ဒွယမ္ပိ သမ္မိဿေတွာ၊ ပဉ္စာဘိညာ စ လောကိယာ၊
အာသဝက္ခယဉာဏဉ္စ၊ ဆဠဘိညာ ပဝုစ္စရေ။
လောကိယာ စ ဒသာဘိညာ၊ ဘိန္ဒိတွာ ကုသလကြိယာ၊
သတ္တသတ္တတိ ဈာနာနိ၊ အဋ္ဌသဋ္ဌိ ပနပ္ပနာ။
သတ္တသတ္တတိ စိတ္တာနိ၊ စတုပညာသ သဗ္ဗထာ၊
ပစိတာနိ စ စိတ္တာနိ၊ ဧကတိံသသတံ သိယုန္တိ။
ဣတိ စေတသိကဝိဘာဂေ ပဘေဒကထာ နိဋ္ဌိတာ။
ဒသမော ပရိစ္ဆေဒေါ။