📜
ဧကာဒသမော ပရိစ္ဆေဒေါ
၁၁။ ရာသိသရူပကထာ
သဗ္ဗံ ¶ သဘာဝသာမည-ဝိသေသေန ယထာရဟံ၊
ဂတရာသိဝသေနာထ၊ အဋ္ဌာရသဝိဓံ ကထံ။
ဖဿပဉ္စကရာသီ စ၊ ဈာနိန္ဒြိယမထာပရေ၊
မဂ္ဂဗလဟေတုကမ္မ-ပထလောကိယရာသယော။
နိရဝဇ္ဇာ ¶ ဆ ပဿဒ္ဓိ-အာဒိကာ စ သတီမတာ၊
ယုဂနန္ဓာ စ သမထာ၊ တထာ ယေဝါပနာတိ စ။
ဖဿော စ ဝေဒနာ သညာ၊ စေတနာ စိတ္တမေဝ စ၊
ဖဿပဉ္စကရာသီတိ၊ ပဉ္စ ဓမ္မာ ပကာသိတာ။
ဝိတက္ကော စ ဝိစာရော စ၊ ပီတိ စေကဂ္ဂတာ တထာ၊
သုခံ ဒုက္ခမုပေက္ခာတိ၊ သတ္တ ဈာနင်္ဂနာမကာ။
သဒ္ဓိန္ဒြိယဉ္စ ဝီရိယံ၊ သတိ စေဝ သမာဓိ စ၊
ပညာ စတုဗ္ဗိဓာ ဝုတ္တာ၊ မနော ပဉ္စာပိ ဝေဒနာ။
ဇီဝိတိန္ဒြိယမေကန္တိ၊ စက္ခာဒီနိ စ သတ္တဓာ၊
ဗာဝီသတိန္ဒြိယာ နာမ၊ ဓမ္မာ သောဠသ ဒေသိတာ။
အာဒိမဂ္ဂေ အနညာတ-ညဿာမီတိန္ဒြိယံ ဘဝေ၊
မဇ္ဈေ အညိန္ဒြိယံ အန္တေ၊ အညာတာဝိန္ဒြိယန္တိ စ။
ပညာနုတ္တရစိတ္တေသု၊ ဟောန္တိ တီဏိန္ဒြိယာနိပိ၊
တိဟေတုကေသု သေသေသု၊ ဧကံ ပညိန္ဒြိယံ မတံ။
သုခံ ဒုက္ခိန္ဒြိယဉ္စေဝ၊ သောမနဿိန္ဒြိယံ တထာ၊
ဒေါမနဿမုပေက္ခာတိ၊ ပဉ္စဓာ ဝေဒနာ ကထာ။
ရူပါရူပဝသာ ဒွေဓာ၊ ဇီဝိတိန္ဒြိယမေကကံ၊
စက္ခုသောတဃာနဇိဝှာကာယိတ္ထိပုရိသိန္ဒြိယာ။
တတ္ထ ဇီဝိတရူပဉ္စ၊ အဋ္ဌေတ္ထ န တု ဂယှရေ၊
တသ္မာ နာမိန္ဒြိယာနေဝ၊ ဒသပဉ္စ ဝိနိဒ္ဒိသေ။
သမ္မာဒိဋ္ဌိ ¶ စ သင်္ကပ္ပော၊ ဝါယာမော ဝိရတိတ္တယံ၊
သမ္မာသတိ သမာဓိ စ၊ မိစ္ဆာဒိဋ္ဌိ စ ဓမ္မတော။
မဂ္ဂင်္ဂါနိ နဝေတာနိ၊ ဒွါဒသာပိ ယတော ဒွိဓာ၊
သမ္မာမိစ္ဆာတိ သင်္ကပ္ပော၊ ဝါယာမော စ သမာဓိ စ။
လောကပါလဒုကဉ္စေဝ ¶ ၊ ဟိရောတ္တပ္ပမထာပရံ၊
အဟိရီကမနောတ္တပ္ပံ၊ ဒုကံ လောကဝိနာသကံ။
ပဉ္စ သဒ္ဓါဒယော စေတိ၊ ဗလဓမ္မာ နဝေရိတာ၊
ကဏှသုက္ကဝသေနာပိ၊ ပဋိပက္ခေ အကမ္ပိယာ။
ဆ ဟေတူ ဟေတုရာသိမှိ၊
လောဘာလောဘာဒိကာ တိကာ၊
မောမူဟေ ကင်္ခိတုဒ္ဓစ္စာ၊
တတ္ထ ဝုတ္တာတိ အဋ္ဌဓာ။
မိစ္ဆာဒိဋ္ဌိ အဘိဇ္ဈာ စ၊ ဗျာပါဒေါ ဝိရတိတ္တယံ၊
သမ္မာဒိဋ္ဌိနဘိဇ္ဈာ စ၊ အဗျာပါဒေါ စ စေတနာ။
ဒသ ကမ္မပထာနေတ္ထ၊ ဝုတ္တာ ဝိရတိစေတနာ၊
လောကပါလဝိနာသာတိ၊ ဝုတ္တာ လောကဒုကာ ဒွိဓာ။
ပဿဒ္ဓိအာဒိယုဂဠာ၊ နိရဝဇ္ဇာ ဆ ရာသယော၊
သတိ စ သမ္ပဇညဉ္စ၊ ဥပကာရဒုကံ ဘဝေ။
ယုဂနန္ဓဒုကံ နာမ၊ သမထော စ ဝိပဿနာ၊
ပဂ္ဂဟော စ အဝိက္ခေပေါ၊ သမထဒ္ဒုကမီရိတံ။
ယေ သရူပေန နိဒ္ဒိဋ္ဌာ၊ စိတ္တုပ္ပာဒေသု တာဒိနာ၊
တေ ဌပေတွာဝသေသာ တု၊ ယေဝါပနကနာမကာ။
ဆန္ဒော စ အဓိမောက္ခော စ၊ တတြမဇ္ဈတ္တတာ တထာ၊
ဥဒ္ဓစ္စံ မနသိကာရော၊ ပဉ္စာပဏ္ဏကနာမကာ။
မာနော စ ထိနမိဒ္ဓဉ္စ၊ ဣဿာ မစ္ဆရိယံ တထာ၊
ကုက္ကုစ္စမပ္ပမညာ စ၊ တိဿော ဝိရတိယောပိ စ။
ဧတေ ¶ အနိယတာ နာမ၊ ဧကာဒသ ယထာရဟံ၊
တတော စ သေသာ သဗ္ဗေပိ၊ နိယတာတိ ပကိတ္တိတာ။
ကေစိ ¶ ရာသိံ န ဘဇန္တိ၊ ကေစိ စာနိယတာ ယတော၊
တသ္မာ ယေဝါပနာတေဝ၊ ဓမ္မာ သောဠသ ဒေသိတာ။
သတ္တတိံသာဝသေသာ တု၊ တတ္ထ တတ္ထ ယထာရဟံ၊
သရူပေနေဝ နိဒ္ဒိဋ္ဌာ၊ စိတ္တုပ္ပာဒေသု သဗ္ဗထာ။
ဒေသိတာနုတ္တရုဒ္ဓစ္စေ၊ နာမတော ဝိရတုဒ္ဓဝါ၊
တထာနုတ္တရစိတ္တေသု၊ နိယတံ ဝိရတိတ္တယံ။
စိတ္တံ ဝိတက္ကော သဒ္ဓါ စ၊
ဟိရောတ္တပ္ပဗလဒွယံ၊
အလောဘော စ အဒေါသော စ၊
လောဘော ဒေါသော စ ဒိဋ္ဌိ စ။
အဟိရီကမနောတ္တပ္ပံ၊
ဥဒ္ဓစ္စံ ဝိရတိတ္တယံ၊
သောဠသေတေ ယထာယောဂံ၊
ဒွီသု ဌာနေသု ဒေသိတာ။
ဝေဒနာ တီသု ဝီရိယံ၊ သတိ စ စတုရာသိကာ၊
သမာဓိ ဆသု ပညာ စ၊ သတ္တဋ္ဌာနေသု ဒီပိတာ။
ဧကဝီသ ပနိစ္စေတေ၊ သဝိဘတ္တိကနာမကာ၊
သေသာ ဒွတ္တိံသတိ ဓမ္မာ၊ သဗ္ဗေပိ အဝိဘတ္တိကာတိ။
ဣတိ စေတသိကဝိဘာဂေ ရာသိသရူပကထာ နိဋ္ဌိတာ။
ဧကာဒသမော ပရိစ္ဆေဒေါ။