📜
ဒွါဒသမော ပရိစ္ဆေဒေါ
၁၂။ ရာသိဝိနိစ္ဆယကထာ
တတ္ထ ဝိညာဏကာယာ ဆ၊ သတ္တ ဝိညာဏဓာတုယော၊
ဖဿာ စက္ခာဒိသမ္ဖဿာ၊ ဆဗ္ဗိဓာ သတ္တဓာပိ စ။
စက္ခုသမ္ဖဿဇာဒီဟိ ¶ ¶ ၊ ဘေဒေဟိ ပန ဝေဒနာ၊
သညာ စ စေတနာ စေဝ၊ ဘိန္နာ ဆဓာ စ သတ္တဓာ။
စိတ္တုပ္ပာဒေသု ဓမ္မာ စ၊ ခန္ဓာယတနဓာတုယော၊
အာဟာရာ စ ယထာယောဂံ၊ ဖဿပဉ္စကရာသိယံ။
သဗ္ဗေ သင်္ဂဟိတာ ဟောန္တိ၊ တသ္မာ နာမပရိဂ္ဂဟော၊
မူလရာသိ စ သော သဗ္ဗ-သင်္ဂဟောတိ ပဝုစ္စတိ။
ဈာနရာသိမှိ ပဉ္စေဝ၊ ဓမ္မာ သတ္တပ္ပဘေဒတော၊
ဣန္ဒြိယာနိ စ ဗာဝီသ၊ ဓမ္မတော ပန သောဠသ။
နဝ မဂ္ဂင်္ဂဓမ္မာ စ၊ ဘိန္နာ ဒွါဒသဓာပိ တေ၊
ဆဠေဝ ဟေတုယော တတ္ထ၊ ဒေသိတာ ကင်္ခိတုဒ္ဓဝါ။
ဒသ ကမ္မပထာ ဓမ္မာ၊ ဆဠေဝ ပန ဒေသိတာ၊
သေသာဝ ဒသဓမ္မေဟိ၊ သမာနာ စတုရာသယော။
ပညာ ဒသဝိဓာ တတ္ထ၊ ဝေဒနာ နဝဓာ ဌိတာ၊
သမာဓိ သတ္တဓာ ဟောတိ၊ ဝီရိယံ ပန ပဉ္စဓာ။
သတိ ဘိန္နာ စတုဓာဝ၊ ဝိတက္ကော တိဝိဓော မတော၊
ဒွိဓာ စိတ္တာဒယော ဟောန္တိ၊ ဒသပဉ္စေဝ သမ္ဘဝါ။
သေသာ ဒွတ္တိံသ သဗ္ဗေပိ၊ ဓမ္မာ ဧကေကဓာပိ စ၊
ဟိတွာ ရူပိန္ဒြိယာနေတေ၊ ဝိဘာဂါ အဋ္ဌဓာ ကထံ။
ဖဿော စ စေတနာ သညာ၊ ဝိစာရော ပီတိ ဇီဝိတံ၊
နိရဝဇ္ဇာ ဆ ယုဂဠာ၊ သာဝဇ္ဇမောဟကင်္ခိတာ။
ယေဝါပနကဓမ္မာ စ၊ ဝိရတုဒ္ဓစ္စဝဇ္ဇိတာ၊
ဒွါဒသာ စေတိ သဗ္ဗေပိ၊ ဒွတ္တိံသကေကဓာ တထာ။
စိတ္တံ မနိန္ဒြိယံ စိတ္တံ၊ သဒ္ဓါ သဒ္ဓိန္ဒြိယံ ဗလံ၊
ဗလေသု လောကိယာ ဝုတ္တာ၊ လောကိယေ စ ဒုကဒွယေ။
စတ္တာရော ဟေတုရာသိယံ၊
မိစ္ဆာဒိဋ္ဌိ စ မဂ္ဂင်္ဂေ၊
ပဉ္စကမ္မပထေပိ တေ။
ယေဝါပနကရာသိမှိ၊ ဒေသိတာ ဝိရတုဒ္ဓဝါ၊
မဂ္ဂဟေတူသု စေဝေတိ၊ ဒွိဓာ ပဉ္စဒသ ဌိတာ။
ဝိတက္ကော ဈာနမဂ္ဂေသု၊ တိဝိဓာ နဝဓာ ပန၊
ဝေဒနာ မူလရာသိမှိ၊ တထာ ဈာနိန္ဒြိယေသု စ။
ဣန္ဒြိယမဂ္ဂရာသိမှိ၊ ဗလပိဋ္ဌိဒုကတ္တိကေ၊
စတုဓာ သတိ တတ္ထေဝ၊ ဝီရိယမ္ပိ စ ပဉ္စဓာ။
သမာဓိ သတ္တဓာ ဝုတ္တော၊ ဈာနင်္ဂေသု စ တတ္ထ စ၊
တတ္ထေဝ ဒသဓာ ပညာ၊ ဟေတုကမ္မပထေသု စ။
ဒသနဝသတ္တပဉ္စစတုတိဒွေကဓာ ဌိတာ၊
ဆဠေကကာ ပဉ္စဒသ၊ ဒွတ္တိံသ စ ယထာက္ကမံ။
အဋ္ဌ ဝိဘာဂသင်္ခေပါ၊ ပဒါနိ ဒသဓာ သိယုံ၊
တေပညာသေဝ ဓမ္မာ စ၊ အဋ္ဌာရသ စ ရာသယော။
ဣတိ ဓမ္မဝဝတ္ထာနေ၊ ဓမ္မသင်္ဂဏိယံ ပန၊
စိတ္တုပ္ပာဒပရိစ္ဆေဒေ၊ ဥဒ္ဒေသနယသင်္ဂဟော။
ပဒါနိ စတုရာသီတိ၊ ဒေသိတာနိ သရူပတော၊
ယေဝါပနကနာမေန၊ သောဠသေဝ ယထာရဟံ။
တတ္ထာနိယတနာမာနိ၊ ပဒါနေကာဒသေဝ တု၊
ဝုတ္တာနေကူနနဝုတိ၊ နိယတာနေဝ သမ္ဘဝါ။
အသမ္ဘိန္နပဒါနေတ္ထ၊ တေပညာသေဝ သဗ္ဗထာ၊
စိတ္တစေတသိကာနံ တု၊ ဝသေန ပရိဒီပယေ။
ဝိဘာဂပဒဓမ္မာနံ ¶ ¶ ၊ ဝသေနေဝံ ပကာသိတော၊
စိတ္တစေတသိကာနံ တု၊ ကမတော ရာသိနိစ္ဆယောတိ။
ဣတိ စေတသိကဝိဘာဂေ ရာသိဝိနိစ္ဆယကထာ နိဋ္ဌိတာ။
ဒွါဒသမော ပရိစ္ဆေဒေါ။