📜
တေရသမော ပရိစ္ဆေဒေါ
၁၃။ ရာသိယောဂကထာ
ဣတိ ရာသိဝီထိံ ဉတွာ၊ လဗ္ဘမာနဝသာ ဗုဓော၊
တေသမေဝါထ ယောဂမ္ပိ၊ စိတ္တုပ္ပာဒေသု ဒီပယေ။
ကာမာဝစရကုသလဿ၊ ပဌမဒွယမာနသေ၊
သဗ္ဗေပိ ရာသယော ဟောန္တိ၊ ယထာသမ္ဘဝတော ကထံ။
ဖဿပဉ္စကရာသီ စ၊ ဈာနပဉ္စကရာသိ စ၊
ဣန္ဒြိယဋ္ဌကရာသီ စ၊ မဂ္ဂပဉ္စကရာသိ စ။
ဗလသတ္တကရာသီ စ၊ ဟေတုကမ္မပထတ္တိကာ၊
ဒသာဝသေသာ ရာသီ စ၊ လောကပါလဒုကာဒယော။
ယေဝါပနကနဝကံ၊ နိယတုဒ္ဓစ္စဝဇ္ဇိတာ၊
အပ္ပမညာဒွယဉ္စေဝ၊ တိဿော ဝိရတိယောတိ စ။
ဣတိ သတ္တရသေဝေတေ၊ ဒေသိတာ စ သရူပတော၊
ယေဝါပနကရာသီ စ၊ လဗ္ဘန္တိဋ္ဌာရသာပိ စ။
ဆပ္ပညာသ ပဒါနေတ္ထ၊ ဒေသိတာနိ သရူပတော၊
ဓမ္မာ ပန သမတိံသ၊ တတ္ထ ဟောန္တိ သရူပတော။
တာနိ ¶ ယေဝါပနကေဟိ၊ ပဉ္စသဋ္ဌိ ပဒါနိ စ၊
ဓမ္မာ စေကူနတာလီသ၊ ဘဝန္တိ ပန သမ္ဘဝါ။
တတ္ထ ဒွါဒသ ဓမ္မာ စ၊ ဒေသိတာ သဝိဘတ္တိကာ၊
အဝသေသာ တု သဗ္ဗေပိ၊ အဝိဘတ္တိကနာမကာ။
ဧကဒွိ ¶ စ တိစတုက္က-ဆသတ္တဋ္ဌာနိကာ ပန၊
သတ္တဝီသ စ သတ္တေကော၊ ဒွေကေကော စ ယထာက္ကမံ။
နိယတာ တု စတုတ္တိံသ၊ ဓမ္မာဝ သဟဝုတ္တိတော၊
ယထာသမ္ဘဝဝုတ္တိတော၊ ပဉ္စဓာ နိယတာ ကထာ။
တတ္ထ စာနိယတေ သဗ္ဗေ၊ ဂဟေတွာ စ ပဟာယ စ၊
ပစ္စေကဉ္စ ဂဟေတွာပိ၊ သတ္တဓာ ယောဇနက္ကမော။
သကိမေကူနတာလီသ၊ စတုတ္တိံသ ယထာက္ကမံ၊
ပဉ္စက္ခတ္တုဉ္စ ယောဇေယျ၊ ပဉ္စတိံသာတိ ပဏ္ဍိတော။
ရာသယော စ ပဒါနီဓ၊ ဓမ္မန္တရဝိဘတ္တိယော၊
သရူပယေဝါပနကေ၊ နိယတာနိယတေ ယထာ။
ယောဇနာနယဘေဒဉ္စ၊ ဂဏနာသင်္ဂဟဋ္ဌိတိ၊
လဗ္ဘမာနာနုမာနေန၊ သလ္လက္ခေန္တော တဟိံ တဟိံ။
ဉာဏံ ဉာဏဝိယုတ္တမှိ၊ ဟိတွာ ပီတိံ ဥပေက္ခိတေ၊
ဝေဒနာ ပရိဝတ္တေန္တော၊ ကာမပုညေ စ သေသကေ။
မဟာကြိယေ စ ယောဇေယျ၊ ပဟာယ ဝိရတိတ္တယံ၊
အပ္ပမညာ စ ဟိတွာထ၊ မဟာပါကေ စ ယောဇယေ။
တက္ကာဒိံ ကမတော ဟိတွာ၊ သဗ္ဗတ္ထ ဝိရတိတ္တယံ၊
ပဉ္စမေ အပ္ပမညာယ၊ ဟိတွာ ရူပေ စ ယောဇယေ။
ဟိတွာပ္ပမညာ ယောဇယေ၊ ယထာဈာနမနုတ္တရေ၊
လောကုတ္တရိန္ဒြိယဉ္စေဝ၊ ဂဟေတွာ ဝိရတိတ္တယံ။
ဈာနာနိ ¶ စတုတာလီသ၊ သုခယုတ္တာနိ ဝတ္တရေ၊
ဥပေက္ခိတာနိ တေဝီသ၊ ပဉ္စမဇ္ဈာနေ စ သဗ္ဗထာ။
အပ္ပမညာဝိရတိယော၊ ကာမပုညေသု လဗ္ဘရေ၊
အပ္ပမညာ ရူပဇ္ဈာန-စတုက္ကေ စ မဟာကြိယေ။
လောကုတ္တရေသု သဗ္ဗတ္ထ၊ သမ္ဘောတိ ဝိရတိတ္တယံ၊
နတ္ထိဒွယမ္ပိ အာရုပ္ပေ၊ မဟာပါကေ စ ပဉ္စမေ။
ဝိတက္ကာဒိတ္တယံ ¶ ပညာ၊ ပဉ္စ စာနိယတာ စလာ၊
ဟာနိဗုဒ္ဓိဝသာ သေသာ၊ န စလန္တိ ကုဒါစနံ။
ဗာဝီသတိဝိဓော စေတ္ထ၊ သင်္ဂဟော အနဝဇ္ဇကေ၊
ဒွယဒွယဝသာ စေဝ၊ ဈာနပဉ္စကတောပိ စ။
ဣတိ ဉတွာနဝဇ္ဇေသု၊ ရာသိသင်္ဂဟ သမ္ဘဝံ၊
သာဝဇ္ဇေသုပိ ဝိညေယျာ၊ ဝိညုနာ ရာသယော ကထံ။
လောဘမူလေသု ပဌမေ၊ ဖဿပဉ္စကရာသိ စ၊
ဈာနပဉ္စကရာသီ စ၊ တထေဝိန္ဒြိယပဉ္စကံ။
မဂ္ဂဗလစတုက္ကဉ္စ၊ ဟေတုကမ္မပထဒုကာ၊
လောကနာသကရာသီ စ၊ သမထော သမထဒ္ဒုကာ။
တတြမဇ္ဈတ္တတံ ဟိတွာ၊ ယေဝါပနကနာမကာ၊
စတ္တာရော စေတိ လဗ္ဘန္တိ၊ တတ္ထေကာဒသ ရာသယော။
ဒွတ္တိံသေဝ ပဒါနေတ္ထ၊ ဒေသိတာနိ သရူပတော၊
တာနိ ယေဝါပနကေဟိ၊ ဆတ္တိံသေဝ ဘဝန္တိ စ။
အသမ္ဘိန္နပဒါနေတ္ထ၊ သမဝီသတိ သမ္ဘဝါ၊
သဝိဘတ္တိကနာမာ စ၊ နဝ ဓမ္မာ ပကာသိတာ။
ဧကဒွယတိစတုက္က-ဆဋ္ဌာနနိယတာ ပန၊
ဧကာဒသ ဆဠေကာ စ၊ ကမေနေကော ပုနေကကော။
နတ္ထေဝါနိယတာ ¶ ဟေတ္ထ၊ ယေဝါပနကနာမကာ၊
ယောဇနာနယဘေဒေါ စ၊ တသ္မာ တတ္ထ န ဝိဇ္ဇတိ။
မာနော စ ထိနမိဒ္ဓဉ္စ၊ ဣဿာ မစ္ဆရိယံ တထာ၊
ကုက္ကုစ္စမိတိ သာဝဇ္ဇေ၊ ဆဠေဝါနိယတာ မတာ။
မာနော ဒိဋ္ဌိဝိယုတ္တေသု၊ သသင်္ခါရေသု ပဉ္စသု၊
ထိနမိဒ္ဓံ တယော သေသာ၊ ပဋိဃဒွယယောဂိနော။
ဣစ္စေဝမဋ္ဌ ¶ သာဝဇ္ဇာ၊ အနဝဇ္ဇဋ္ဌဝီသတိ၊
ဆတ္တိံသ မာနသာ သဗ္ဗေ၊ ဟောန္တာနိယတယောဂိနော။
တေဟိ ယုတ္တာ ယထာယောဂံ၊ ဧကဒွိတ္တယပဉ္စဟိ၊
ဒွေ ဒွါဝီသံ တယော စေဝ၊ နဝ စာထ ယထာက္ကမံ။
ဣတိ ဝုတ္တာနုသာရေန၊ လဗ္ဘမာနဝသာ ပန၊
တဒညေသုပိ ယောဇေယျ၊ သာဝဇ္ဇေသု ယထာက္ကမံ။
လောဘမူလေသု လောဘဉ္စ၊ ဒေါသဉ္စ ပဋိဃဒွယေ၊
မောဟမူလေ ကင်္ခုဒ္ဓစ္စံ၊ ဂဟေတွာ ဟေတုရာသိယံ။
ဒိဋ္ဌိံ ဒိဋ္ဌိဝိယုတ္တမှိ၊ ဟိတွာ ပီတိမုပေက္ခိတေ၊
ဝေဒနံ ပရိဝတ္တေန္တော၊ ဒေါသမူလေ စ ပဏ္ဍိတော။
တထာ ကမ္မပထံ ဒိဋ္ဌိံ၊
ပီတိံ ဆန္ဒဉ္စ မောမုဟေ၊
ကင်္ခိတေ အဓိမောက္ခဉ္စ၊
ဟိတွာ ယောဇေယျ ရာသယော။
စိတ္တဿ ဌိတိံ ပတ္တာသု၊ စိတ္တဿေကဂ္ဂတာ ပန၊
ကင်္ခိတေ ပရိဟီနာဝ၊ ဣန္ဒြိယာဒီသု ပဉ္စသု။
ဣတိ ဒွါဒသဓာ ဉတွာ၊ သာဝဇ္ဇေသုပိ သင်္ဂဟံ၊
အဟေတုကေပိ ဝိညေယျာ၊ ယထာသမ္ဘဝတော ကထံ။
အဋ္ဌာရသာဟေတုကေသု ¶ ၊ ပဉ္စဝိညာဏမာနသေ၊
ဖဿပဉ္စကရာသီ စ၊ ဈာနဋ္ဌာနဒုကံ တထာ။
ဣန္ဒြိယတ္တိကရာသီ စ၊ ယေဝါပနကနာမကော၊
ဧကော မနသိကာရောတိ၊ စတ္တာရော ရာသယော သိယုံ။
အသမ္ဘိန္နာ ပနဋ္ဌေဝ၊ ဒွေ တတ္ထ သဝိဘတ္တိကာ၊
ဧကဒွယတိကဋ္ဌာနာ၊ ဆဠေကော စ ပုနေကကော။
မနောဓာတုတ္တိကာဟေတု-ပဋိသန္ဓိယုဂေ ပန၊
ဝိတက္ကော စ ဝိစာရော စ၊ အဓိကာ ဈာနရာသိယံ။
သုခသန္တီရဏေ ¶ ပီတိ၊ ဒုတိယာဝဇ္ဇနေ ပန၊
ဝီရိယဉ္စ သမာဓိဉ္စ၊ လဗ္ဘတိန္ဒြိယရာသိယံ။
အဓိကာ ဟသိတေ ဟောန္တိ၊ ပီတိ စ ဝီရိယာဒယော၊
ယေဝါပနာဓိမောက္ခော စ၊ ပဉ္စဝိညာဏဝဇ္ဇိတေ။
ဣစ္စာနဝဇ္ဇေ ဗာဝီသ၊
သာဝဇ္ဇေ ဒွါဒသာပရေ၊
ယောဂါ ဟေတုမှိ ပဉ္စေတေ၊
တာလီသေကူနကာ ကထာတိ။
ဣတိ စေတသိကဝိဘာဂေ ရာသိယောဂကထာ နိဋ္ဌိတာ။
တေရသမော ပရိစ္ဆေဒေါ။