📜
စုဒ္ဒသမော ပရိစ္ဆေဒေါ
၁၄။ ရာသိသမ္ဘဝကထာ
နဝေဝ ¶ ယေဝါပနကာ၊ အဋ္ဌာရသ စ ရာသယော၊
နဝဘိံသတိသမ္ဘိန္နာ၊ ဒသ ဒွေ သဝိဘတ္တိကာ။
ဧကဒွယတိစတုဆသတ္တဋ္ဌာနာနဝဇ္ဇကေ၊
သတ္တဝီသတိ သတ္တေကော၊ ဒွယမေကော ပုနေကကော။
ဒသေဝ ယေဝါပနကာ၊ ဧကာဒသ စ ရာသယော၊
အဋ္ဌဝီသတိသမ္ဘိန္နာ၊ ဒသေဝ သဝိဘတ္တိကာ။
ဧကဒွယတိစတုက္ကဆဋ္ဌာနနိယတာ ပန၊
အဋ္ဌာရသ စ သတ္တေကော၊ ဧကော စေကောဝ ပါပကေ။
ဒွေ ယေဝါပနကာ ဟောန္တိ၊ ရာသယော စ စတုဗ္ဗိဓာ၊
တေရသေတ္ထ အသမ္ဘိန္နာ၊ တယောဝ သဝိဘတ္တိကာ။
ဧကဒွယတိကဋ္ဌာနာ၊ ဒသ ဒွေကော အဟေတုကေ၊
ဣစ္စာနဝဇ္ဇာ သာဝဇ္ဇာ-ဟေတုကေ ယောဂနိစ္ဆယော။
သတ္တာပိ ¶ နတ္ထိ သာဝဇ္ဇေ၊ နိရဝဇ္ဇေ ပကာသကော၊
အဟေတုကေ စ မဂ္ဂါဒိရာသယော နတ္ထိ စုဒ္ဒသ။
အနဝဇ္ဇာ တု သာဝဇ္ဇေ၊ သာဝဇ္ဇကာနဝဇ္ဇကေ၊
စိတ္တုပ္ပာဒမှိ နတ္ထေဝ၊ နတ္ထောဘယမဟေတုကေ။
သာဝဇ္ဇာ ပန သာဝဇ္ဇေ၊ အနဝဇ္ဇာနဝဇ္ဇကေ၊
ဂဟေတဗ္ဗာ တု သဗ္ဗတ္ထ၊ သာဓာရဏာ ပကိဏ္ဏကာ။
ဈာနပဉ္စကစိတ္တေသု၊ သတ္တသဋ္ဌိသု နိဒ္ဒိသေ၊
ဈာနင်္ဂယောဂဘေဒေန၊ ရာသိဘေဒံ တဟိံ တဟိံ။
စတုဆက္ကာနဝဇ္ဇေသု ¶ ၊ ဉာဏပီတိကတံ တထာ၊
စတုဝီသ ပရိတ္တေသု၊ စတုဓာ ဘေဒမုဒ္ဒိသေ။
သရာဂဝီတရာဂါနံ၊ အပ္ပမညာပဝတ္တိယံ၊
ကရုဏာမုဒိတာ ဟောန္တိ၊ ကာမပုညမဟာကြိယေ။
ဥပစာရပ္ပနာပတ္တာ၊ သုခိတာ သတ္တဂေါစရာ၊
တသ္မာ န ပဉ္စမာရုပ္ပေ၊ မဟာပါကေ အနုတ္တရေ။
သောတာပတိတုပေက္ခာသု၊ ပရိကမ္မာဒိသမ္ဘဝေ၊
ဈာနာနံ တုလျပါကတ္တာ၊ တပ္ပာကေသု စ လဗ္ဘရေ။
ဝိရတီ စ သရာဂါနံ၊ ဝီတိက္ကမနသမ္ဘဝါ၊
သမ္ပတ္တေ စ သမာဒါနေ၊ ကာမပုညေသု လဗ္ဘရေ။
တံတံဒွါရိကဒုဿိလျ-စေတနုစ္ဆေဒကိစ္စတော၊
မဂ္ဂေ စ တုလျပါကတ္တာ၊ ဖလေ စ နိယတာ သိယုံ။
ပဝတ္တာကာရဝိသယဘိန္နာ ပဉ္စာပိ သမ္ဘဝါ၊
လောကိယေ လဗ္ဘမာနာပိ၊ ဝိသုံ စေဝ သိယုံ န ဝါ။
ပါပါ လဗ္ဘန္တိ ပါပေသု၊ သတ္တ ဆက္ကေကကာ ကမာ၊
သရူပယေဝေါဘယကာ၊ နိယတဋ္ဌ ဆဠေတရေ။
သာဓာရဏာ စ သဗ္ဗတ္ထ၊ ယထာဝုတ္တာ ပကိဏ္ဏကာ၊
တတ္ထ စေကဂ္ဂတာ နတ္ထိ၊ ဣန္ဒြိယာဒီသု ကင်္ခိတေ။
ဆန္ဒာဓိမောက္ခာ ¶ ယေဝါပိ၊ ဝီသေကာဒသဝဇ္ဇိတေ၊
ဥဒ္ဓစ္စမေကာဒသသု၊ မဇ္ဈတ္တမနဝဇ္ဇကေ။
သဗ္ဗတ္ထ မနသိကာရော၊ တိဒွေကဒွိတိကာပရေ၊
အဋ္ဌဋ္ဌဝီသစတူသု၊ ပဉ္စဒွီသု ယထာက္ကမံ။
သမုဒါယဝသေနေတ္ထ၊ ဥဒ္ဓစ္စဝိရတိတ္တယံ၊
သဝိဘတ္တိကမညတ္ထ၊ အဝိဘတ္တိကမေဝ တံ။
စိတ္တုပ္ပာဒေသု ¶ တေနေတံ၊ ဝိဘတ္တိအဝိဘတ္တိကံ၊
ဣတိ သာဓု သလ္လက္ခေယျ၊ သမ္ဘဝါသမ္ဘဝံ ဗုဓောတိ။
ဣတိ စေတသိကဝိဘာဂေ ရာသိသမ္ဘဝကထာ နိဋ္ဌိတာ။
စုဒ္ဒသမော ပရိစ္ဆေဒေါ။